ATV

Tag: Ballina

  • Daka për zgjedhjet në veri: KQZ-ja nuk ka mandat për organizim të referendumit

    Daka për zgjedhjet në veri: KQZ-ja nuk ka mandat për organizim të referendumit

    Ish-kryetarja e Komisionit Qendror Zgjedhor, Valdete Daka, vlerëson se KQZ-ja nuk ka mandat të organizojë referendum në katër komunat veriore.

    Mes tjerash,ajo ka folur edhe për udhëzimin administrativ, për të cilin tha se ka rregulluar vetëm procedurat e mbledhjes së nënshkrimeve dhe jo si do të organizoheshin zgjedhjet.

    “Me ligjin mbi zgjedhjet e përgjithshme dhe lokale, KQZ-ja është i vetmi institucion që organizon zgjedhje, mirëpo ato zgjedhje duhet të dekretohen nga presidenti i shtetit. Në rastin konkret, edhe nëse mblidhen 20 për qind të nënshkrimeve pastaj duhet të organizohet një lloj referendumi, të cilin KQZ-ja për momentin nuk ka mandat të organizojë”, u shpreh Daka.

    “Sepse nuk ka ligj për referendum, dhe nuk mundet me një udhëzim të jap një kompetencë KQZ-së të cilin për momentin nuk e ka”.

    “Në fakt KQZ-ja ka kompetencë të organizojë referendum por nuk ka ligj për referendumin në bazë të cilit do të organizoheshin”.

  • Dreshaj: Për vendimin e MASHTI-t për librat duhet të kërkohej hetim

    Dreshaj: Për vendimin e MASHTI-t për librat duhet të kërkohej hetim

    Deputeti i Aleancës për Ardhmërinë e Kosovës, Shemsedin Dreshaj, ka komentuar vendimin e Ministrisë së Arsimit lidhur me mos-shpërndarjen e teksteve shkollore.

    Ai ka thënë se për këtë vendim do të duhej të kërkohej hetim.

    “Një veprim i tillë antiligjor i Qeverisë konkretisht i MASHT-it është një vendim i cili në një shtet normal, me një strukturë normale legjislative do të duhej të merrej në konsideratë dhe të kërkohet hetuesi për arsyet e dështimit të sigurimit të librave. Duhet të gjendet një formë që është e kapshme për popullatën, kemi njerëz që nuk dinë të aplikojnë online, kemi qytetarë që s’kanë gjiro llogari bankare, kemi fëmijë që kanë shkathtësi që janë para kohe pjesë e procesit mësimor, e të atillë që janë në hall me përmbaruesit, ka shumë probleme që në qeverisjet paraprake janë marrë parasysh. Kjo dukuri mund ta stimulojë familjen që nuk mund t’i sigurojë mjetet të ikë jashtë vendit, ose ta ndalojë fëmijën në shtëpi”, ka thënë ai.

    Sipas tij, ky ka qenë “hap eksperimental, i pamenduar mirë por uroj që të mos jetë pengesë e zhvillimit të procesit normal mësimor”.

    Teksa ka folur për pasojat, Dreshaj ka theksuar se në arsim nuk lejohen eksperimentet.

    “Në arsim duhet të jemi të kujdesshëm për shkak se arsimi nuk lejon eksperimente, një eksperiment i padëshmuar në fakte është aventurë në arsim, kemi pasur të tillë por që na kanë kushtuar shumë pastaj efektet i ka shumë të dëmshme, efektet e tilla mund të jenë ndonjëherë të parimparueshme ose mund të kërkojë kohë për t’u riparuar, nëse bëhet një dëm i tillë atëherë mund të presim me vite, zakonisht mund të presim 4-8 vite që të shihen efektet e dëmit”, shtoi ai.

  • Vendoset kujdestari për barnatoret në Prishtinë dhe gjoba për mos respektimin e orarit

    Vendoset kujdestari për barnatoret në Prishtinë dhe gjoba për mos respektimin e orarit

    Kuvendi Komunal i Prishtinës me shumicë votash kanë miratuar ndryshim, plotësimi i rregullores për fillimin dhe mbarimin e orarit të punës së organizatave të biznesit në kryeqytet.

    Sipas njoftimit, në këtë ndryshim sqarohet se nga tetori, në 10 (dhjetë) barnatore të kryeqytetit do të ketë kujdestari me orarë të plotë (24 orë) nga ora 07:00 deri në 07:00.

    “Orari i kujdestarisë së natës për barnatore është prej orës 21:00 deri në 07:00, kujdestarojnë 5 (pesë) barnatore në gjithë kryeqytetin. Gjobiten me nga 300 deri në 1000 euro personi fizik dhe nga 1000 deri në 3000 euro personi juridik, nëse nuk i përmbahen orarit të përcaktuar. Orari i barnatoreve kujdestare do të publikohet së shpejti”, thuhet në njoftim.

    Votimin nga Kuvendi i Prishtinës e pa mirëpritur edhe Oda e Farmacistëve të Kosovës, e cila ka falënderuar Komunën e Prishtinës -Drejtorinë e Shëndetësisë, si dhe drejtorin Izet Sadiku për punën e bërë deri në miratimin e rregullores në Kuvendin Komunal të Prishtinës.

    “Më në fund pas shumë viteve të diskutimeve rregullorja e cila përcakton orarin e punës së barnatoreve hyn në fuqi në kryeqytet. Edhe kjo kërkesë e kahmotshme e farmacistëve të kryeqytetit po bëhet realitet me punën e përbashkët të Odës së Farmacistëve dhe Komunës së Prishtinës. Rregullimi i orarit 24-orësh për barnatore është i rëndësishëm për disa arsye: Siguria e pacientit: Lodhja dhe rraskapitja nga oraret e zgjatura të farmacistëve mund të dëmtojnë gjykimin dhe përqendrimin. Kjo mund të çojë në gabime mjekimi, dhe dhënien e gabuar të barnave që mund të kenë pasoja të rënda për sigurinë e pacientit. Mirëqenia e punonjësve: Orari i gjatë dhe i parregullt i punës mund të ketë efekte negative në shëndetin fizik dhe mendor të stafit të barnatores. Bilanci punë dhe jetës private: Stafi i barnatores, si të gjithë punonjësit, meriton një ekuilibër të arsyeshëm punës dhe jetës private. Efikasiteti dhe produktiviteti: Derisa orët e zgjatura të funksionimit mund të jenë të përshtatshme për klientët, kjo nuk mund të përkthehet domosdoshmërisht në rritje të efikasitetit dhe produktivitetit. Lodhja mund të çojë në ritëm më të ngadaltë të punës dhe ulje të efikasitetit, duke ndikuar përfundimisht në aftësinë e farmacistëve për t’i shërbyer pacientëve në mënyrë efektive. Pajtueshmëria ligjore dhe rregullatore: Shumë juridiksione kanë rregullore dhe ligje të punës që kufizojnë numrin maksimal të orëve të punës dhe kërkojnë pushime të detyrueshme për punonjësit. Prandaj edhe njëherë si Odë e Farmacistëve shprehim mirënjohjen tonë në emër të farmacistëve të kryeqytetit për punën e përbashkët dhe aprovimin e jetësimin e kësaj rregulloreje, dhe urojmë që edhe komunat tjera që ende nuk e kanë sa më parë ta bëjnë këtë”, thuhet në njoftim.

  • Përzgjedhësi i kombëtares së Kosovës, Primoz Gliha: Lojtarët duhet të vdesin në fushë për ekipin kombëtar

    Përzgjedhësi i kombëtares së Kosovës, Primoz Gliha: Lojtarët duhet të vdesin në fushë për ekipin kombëtar

    Përgatiti: Zeqir Hasani

    Në një konferencë të mbajtur për media në hotel ‘Emerald’, Përzgjedhësi i kombëtares së Kosovës, Primoz Gliha ka thënë se futbollistët duhet të jenë gati dhe të vdesin në fushë për vendin e tyre.

    “Ne duhet të jemi gati edhe të vdesim në fushë, pasi luajmë për ekipin kombëtar dhe për një futbollist profesionist, nuk ka gjë më të rëndësishme. Nuk luajmë për para, por për dinjitet dhe duhet ta tregojmë në fushë këtë”, tha Gliha.

    Gliha po ashtu ka treguar edhe arsyen pse e ka ftuar vetëm një futbollistë të Albi Mall Superligë dhe tregoi që kishte në plan të ftonte Emerallahun.

    “Ne kishim në plan grumbullimin e Emërllahut, por ai u lëndua”, Ka dallim mes Superligës së Kosovës dhe ligave tjera, këtu ritmi është më I ngadaltë. Sa i përket Edvin Kuq në do të shohim në të ardhmen nëse na duhet edhe mund ta ftojmë”, u shpreh Gliha.

    Kurse Menaxheri I kombëtares Barjam Shala para gazetarëve ka folur edhe për Arbnor Mujën, futbollistin mitrovicas që iu bashkua së fundmi Shqipërisë.

    Shala ka deklaruar se FFK ka bërë gjithçka që ai të jetë pjesë e Kosovës, por ishte dëshira e lojtarit që të luajë për Shqipërinë.

    Kujtojmë që me datën 9 shtator Kosova do të përballet me Zvicrën në stadiumin “Fadil Vokrri” dhe tre ditë me pas udhëton në Bukuresht për të zhvilluar ndeshjen me Rumaninë.

    Aktualisht ‘Dardanët’ pasi 4 ndeshjeve të zhvilluara renditen në vendin e pestë me vetëm katër pikë.

  • Falja e tatimit në pronë, kushtetuesja pezullon zbatimin e ligjit

    Falja e tatimit në pronë, kushtetuesja pezullon zbatimin e ligjit

    Përgatiti: Nora Luta

    Komunat nuk do të mund të falin tatimin në pronë prej 100 eurosh, të paktën deri në nëntor të këtij viti.

    Gjykata Kushtetuese ka vendosur masë të përkohshme për nenin 5 të Ligjit për tatimin në pronë, i cili parasheh faljen e tatimit në pronë për qytetarët në vlerë të kësaj shume.

    Sipas vendimit të publikuar të hënën, zbatimi i këtij neni pezullohet menjëherë.

    “Gjykata, njëzëri, ka vendosur që (i) kërkesa për vendosjen e masës së përkohshme lidhur me aktin e lartcekur, të miratohet në kohëzgjatje deri më 30 nëntor 2023; dhe për pasojë (ii) të pezullohet menjëherë zbatimi i nenit 5 të Ligjit Nr.08/L-224 për Ndryshimin dhe Plotësimin e Ligjit Nr. 06/L-005 për Tatimin në Pronën e Paluajtshme dhe zbatimi i vendimeve të nxjerra në bazë të këtij neni, deri në afatin e lartcekur”, thuhet në vendimin e Gjykatës Kushtetuese.

    Vendimin e Gjykatës e ka mirëpritur Asociacioni i Komunave të Kosovës, pasi shumica e komunave e kishin kundërshtuar këtë mënyrën të faljes së tatimit në pronë, duke thënë se po i shkaktohet dëm buxhetit të tyre.

    Në bazë të këtij vendimi, sipas Sazan Ibrahimit, kuvendet komunale nuk do të mund të marrin asnjë vendim rreth faljes së tatimit në pronë.

    Ndërkohë, nga ky ligj deri tash kanë përfituar qytetarët e Komunës së Drenasit, asaj të Obiliqit dhe të e Graçanicës, të cilat vendosën t’ua falin nga 100 euro të tatimit në pronë qytetarëve për këtë vit.

    Kërkesa për vlerësim të ligjit në Gjykatën Kushtetuese ishte dërguar para dy javësh nga komuna e Prizrenit, me mbështetjen edhe të komunave tjera anëtare të Asociacionit të Komunave të Kosovës, pasi AKK-ja si institucion nuk konsiderohet palë e autorizuar për t’iu drejtuar Kushtetueses.

  • Hashim Thaçi nga Haga flet për veten, familjen, Edi Ramën dhe të ardhmen e Kosovës

    Hashim Thaçi nga Haga flet për veten, familjen, Edi Ramën dhe të ardhmen e Kosovës

    Pas afro tri vitesh që nga arrestimi i tij nga Dhomat e Specializuara në Hagë, Nacionalja ka realizuar një intervistë ekskluzive me ish-Presidentin e Kosovës, Hashim Thaçi, brenda dhomave të paraburgimit, ku ai flet për veten, familjen, Kryeministrin e Shqipërisë, Edi Ramën, të tashmen dhe të ardhmen e Kosovës, për domosdoshmërinë jetike të vendit që të qëndrojë në aleancën e përhershme me Shtetet e Bashkuara të Amerikës, të mos qëndrojë në një gjendje të vazhdueshme krizas të njëpasnjëshme, si dhe për nevojën e përmbylljes njëherë e përgjithmonë të çështjeve me Serbinë – në njohje të ndërsjellë.

    Në fillim të intervistës zoti Thaçi thotë se “sot jam në izolim fizik, por jo burg mendor” dhe shprehet se ka “energjinë fizike” dhe “freskinë mendore”. Por për çka është në veçanti i përmalluar është për familjen në rend të parë, dhe miqt e tij jetësor.

    “Mrekulli të jashtëzakonshme njerëzore”, e quajti ish-Presidenti Thaçi vizitën e tij të parë që nga paraburgimi në Burojë të Skenderajt më 29 maj të këtij viti, kur i ishte aprovuar vizita për shkaqe shëndetësore të së ëmës së tij; ku tregon se “koha dhe biseda me ta ishte më e veçanta në jetën time”.

    “Jam i mallëngjyer për njerëzit që i dua dhe më duan, që më besuan për më tepër se dy dekada, në procesin e përbashkët të ndërtimit të Kosovës së lirë, të pavarur, tolerante, zhvillimore”, u shpreh zoti Thaçi.

    Teksa kujton edhe takimin me kryeministrin shqiptar, Edi Ramën, ai i gëzohet edhe librat që ky i fundit i solli. “Si zakonisht, ishte me plot humor të mirë. Por, kur u ndamë, e ndjeva se u emocionua shumë, por gjithmonë me besim për të ardhmen më të mirë dhe më të sigurt, përtej hapësirës ku qëndruam duke pirë kafe rreth dy orë”.

    Më pas, ish-Presidenti Thaçi duke komentuar në vija të trasha gjendjen e tanishme në vend, kërkon të hiqet dorë nga marrja për së tepërmi me të kaluarën, dhe “të mos rrezikohet apo humbet e ardhmja”.

    “Uniteti brendashqiptar dhe investimi për pajtim ndëretnik janë çelësi i suksesit për Kosovën. Bota po lëviz dhe po ndryshon më shpejtë se sa intuitat apo agjendat tona lokale”, na tha ish-Presidenti i vendit.

    Çka duket se ia ka marrë vëmendjen Presidentit është krizat e njëpasnjëshme në vend, për çka shprehet se “Çdo krizë e vonon shumë Kosovën”.

    “Por edhe i minon përpjekjet e miqve ndërkombëtarë për ta konsoliduar shtetin e Kosovës në rrafshin e brendshëm, por edhe në afirmimin e saj ndërkombëtar”.

    “Përkrahja ndërkombëtare nuk duhet të merren si e mirëqenë. Atë gjithmonë duhet merituar. Kosova çdo ditë duhet të vazhdojë të prodhojë argumente që e lehtësojnë mbështetjen e miqëve ndërkombëtar”.

    Ish-Presidenti i Kosovës, Hashim Thaçi, sheh në retrospektivë për të treguar se Kosova, po, është storie suksesi, por është “storie e përbashkët suksesi” me aleatët e saj jetik perëndimor.

    “Ta mendojmë Konferencën e Rambujesë, kohën e bombardimeve, çlirimin e Kosovës, bërjen e Kosovës shtet, njohjen e saj nga mbi 100 shtete, vendimin e Gjykatës Ndërkombëtare të Drejtësisë, integrimin e saj në shumë institucione dhe organizata ndërkombëtare”.

    Këtu, ish Presidenti e kthen kokën kah skeptikët dhe kundërshtarët e bërjes së Kosovës shtet dhe të pavarur, dhe kërkon që të qëndrohet kah aleatët.

    Sepse, përkundrazi “Kosova do ta ketë pamjen e zymtë, të pasigurt, dekurajuese dhe me shumë dilema. Do të jetë ekonomikisht më e varfër, fare investime të huaja dhe me demokraci të lëkundur”.

    “Një vendi me kriza të përhershme askush nuk i beson”.

    Ish-Presidenti thotë se Kosovën që ai e beson është një Kosovë që është në NATO, në BE, “dhe në raporte të përjetshme speciale me ShBA’në”.

    “Me Serbinë duhet të arrihet paqe e përhershme, me njohje reciproke, ligjërisht obliguese. Sa më shumë që vonohet kjo marrëveshje, aq më e vonuar do të jetë Kosova në NATO dhe BE, e aq më e zbehtë do të jetë mbështetja e ShBA’së.Përvoja ime më tregon se Brukseli e mbështet Kosovën, për aq sa e inkurajon dhe e mbanë në vëmendje atë Uashingtoni. Aleanca me ShBA-në duhet kultivuar për të ardhmen strategjike, e jo veç për kujtesë falënderimi. Suksesi ynë është mirënjohja më e madhe që Perëndimi mund të pranojë dhe vlerësojë nga Kosova”, tha ish-Presidenti në intervistë me Nacionalen.

    Intervista e plotë me Hashim Thaçin:

    Nacionale: Disa vite para se të arrestoheshit, disa herë e keni përsëritur se do të dilnit në pension pas përfundimit të mandatit të Presidentit. A e keni pasur përnjëmend?

    Hashim Thaçi: Nuk më mungon zyra e Presidentit apo e Kryeministrit, dhe as agjenda apo debatet ditore politike, partiake apo parlamentare. Pas përfundimit të angazhimit politik dhe procesit që po kaloj aktualisht, dua të jetoj kapituj të angazhimeve tjera jetësore.

    Unë sot jam në izolim fizik, por jo në burg mendor.

    Ndjej se kam energjinë fizike e krijuese, përvojnë dhe freskinë mendore të bëjë gjëra të mira, të dobishme dhe kreative për shoqërinë dhe vendin tim.

    Për qytetarët kosovarë, liria dhe pavarësia nuk duhet të jenë të mjaftueshme.

    Kosova ka shumë oportunitete të parealizuara; kapitali human përbën pasurinë më të çmueshme. Unë besoj në shoqërinë aktive, dinamike dhe inovative kosovare; besoj në të ardhmen e sigurt të fëmijve tanë dhe fëmijët e fëmijve tanë.

    Nacionale: Çka ju ka marrë malli më së shumti në Kosovë?

    Hashim Thaçi: Për familjen, të rri dhe të bisedojë i lirë me ta: Lumen, Endritin, i cili tani u rrit dhe u bë burrë, të merrja pjesë në ceremoninë e tij të diplomimit, të shëtisja maleve, bjeshkëve të bukura të Kosovës, të përcillnim ndeshje futbolli së bashku, apo të kalonim së bashku ndonjë ditë skijimi në bjeshkët e Brezovicës. Të bisedonim për ëndërrat e tij jetësore, apo për ndonjë film apo libër etj.

    I mungojmë njëri-tjetrit çdo ditë, por ky është çmimi i lirisë.

    E di që mallëngjimi është deri diku dobësi, por paraqet edhe njerëzi: jemi njerëz nga mishi dhe gjaku.

    Po, më ka marrë malli për prindërit të cilët kanë hyrë në fazën e moshës së thyer, edhe pse flas shpesh përmes telefonit. Ardhja e tyre vitin e kaluar këtu në vizitë ishte një emocion i veçantë dhe i paharrueshëm.

    Vizita ime para do kohësh, më 29 maj 2023, e cila u krye në ruajtje dhe shoqërim të DHSK, në vendlindje në Burojë, biseda me prindërit, për disa orë, paraqet një mrekulli të jashtëzakonshme njerëzore. Koha dhe biseda me ta ishte më e veçanta në jetën time. Evokuam kujtime të së kaluarës, biseduan për rrethin e ngushtë dhe të gjerë familjar, për të sotmen, por edhe për të ardhmen. Janë të bekuar që kanë plot mbesa e stërmbesa, nipa e stërnipa. Po e jetojnë pleqërinë të qetë, krenarë dhe dinjitozë.

    Jam i mallëngjyer për njerëzit që i dua dhe më duan, që më besuan për më tepër se dy dekada, në procesin e përbashkët të ndërtimit të Kosovës së lirë, të pavarur, tolerante, zhvillimore.

    Nacionale: Në fjalimin e fundit para popullit të Kosovës, ditën kur u arrestuat, një pjesë më ka lënë shumë përshtypje: ajo kur thoni të qëndrojmë së bashku dhe që të mos lejojmë të thellohemi në krizë kushtetuese dhe institucionale. Çka keni pasur ndërmend kur i keni thënë ato fjalë?

    Hashim Thaçi: Unë vazhdoj të besoj se vetëm duke qëndruar të bashkuar si popull, mund t’i tejkalojmë sfidat. Të bashkuar ia dolëm në procesin e lirisë dhe pavarësisë, e ashtu duhet të vazhdojmë edhe në fazën e integrimit euro-atlantik.

    Ky unitet qytetar dhe institucional duhet të mishërohet në vlerat perëndimore, në kuptimin e ecjes përpara, e jo bashkim në kauza të gabuara. Jo të kalohet koha së bashku duke reflektuar për ballafaqimet e së kaluarës, por të hidhet shikimi kah e ardhmja.

    E kaluara jonë nuk është sfiduese, ajo është e fituar, është shumë krenare dhe me integritet, atë nuk mund dhe nuk duhet të tentojmë ta ndryshojmë. Sfidat dhe zgjidhjet i kemi përpara.

    Njerëzit duan zhvillim, vende pune, mirëqenie, edukim cilësor, shërbim shëndetësor, ambient më të pastër, etj. Duhet kujdes që, duke u marrë shumë me të kaluarën të mos vonohet, rrezikohet apo edhe të humbet e ardhmja.

    Uniteti brendashqiptar dhe investimi për pajtim ndëretnik janë çelësi i suksesit për Kosovën. Bota po lëviz dhe po ndryshon më shpejtë se sa intuitat apo agjendat tona lokale.

    Çdo krizë e vonon shumë Kosovën, por edhe i minon përpjekjet e miqve ndërkombëtarë për ta konsoliduar shtetin e Kosovës në rrafshin e brendshëm, por edhe në afirmimin e saj ndërkombëtar.

    Përkrahja ndërkombëtare nuk duhet të merren si e mirëqenë. Atë gjithmonë duhet merituar. Kosova çdo ditë duhet të vazhdojë të prodhojë argumente që e lehtësojnë mbështetjen e miqëve ndërkombëtar.

    Nacionale: Mbështetja personale e Edi Ramës për ju pasi u arrestuat ka habitur shumëkënd. Ai ju quan vëlla e ju shpreh dashuri të madhe miqësore. Ne ishim dëshmitarë të raporteve të mira, edhe sa ju ishit në Kosovë. Por, a ishin gjithnjë të mira?

    Hashim Thaçi: Kur erdhëm në Hagë, si pasojë e masave anti-Covid, i kaluam pa asnjë kontakt fizik rreth 9 muaj, madje as me familje. Nuk ishte e lehtë. Vizita e Edit ndodhi në vend dhe rrethana të jashtëzakonshme e të paimagjinueshme, përtej politikës dhe procesit gjyqësor, bisedë krejt vëllazërore. Më kishte marrë malli. Edi lufton dhe zakonisht fiton në kauzën që beson, është impresionuese se si ai po vazhdon të ndërtojë dhe afirmojë Shqipërinë evropiane.

    U gëzova shumë që, pas autorizimit të shefit të paraburgimit, pranova librat që Edi më kishte sjellë në objektin e paraburgimit të DHSK. Si zakonisht, ishte me plot humor të mirë. Por, kur u ndamë, e ndjeva se u emocionua shumë, por gjithmonë me besim për të ardhmen më të mirë dhe më të sigurt, përtej hapësirës ku qëndruam duke pirë kafe rreth dy orë.

    Ne besojmë në drejtësi, në të vërtetën dhe transparencën. Qytetarët e Kosovës janë të etur të shohin dhe të dëgjojnë të vërtetën. Jo të cunguar, apo të njëanshme. Kosova dhe qytetarët e saj besojnë në parimet e drejtësisë moderne, të cilat i ka përfshirë dhe i respekton edhe me kushtetutë dhe ligje shtetërore. Drejtësi që respekton standardet bashkëkohore, e shpejtë dhe efikase. Drejtësi që e fiton legjitimitetin e brendshëm. Kosova ka vuajtur shumë nga padrejtësia. Kosova ka ecur përpara vetëm duke i respektuar parimet e lirisë, drejtësisë dhe demokracisë.

    Nacionale: Në politikën kosovare ju keni ndërtuar raporte personale edhe me figura tjera politike. A mund ta përmendni ndonjë prej tyre, që ndoshta edhe ju mungon sot?

    Hashim Thaçi: Nuk do t’i ndaja njerëzit nga politika dhe jo politika. Më mungojnë miqtë me të cilët kam punuar bashkërisht mbi dy dekada, me të cilët kam ndarë gëzimin, hidhërimin, suksesin dhe dështimin, njerëzit e rrugëtimit krenar për lirinë, shtetin dhe zhvillimin e vendit.

    Jam i inspiruar nga këta njerëz dhe përulem me respekt dhe mirënjohje që më duruan në gabime dhe më besuan në sukses. Integriteti i këtyre njerëzve është i jashtëzakonshëm. Ani pse e dinim se rrugëtimi me mua ishte jo i lehtë dhe i shkurtë, por më i sigurti dhe i qëndrueshmi.

    Bashkëpunimi me partnerë apo rivalë politikë për mua ka qenë gjithmonë respekt, kujdes dhe qëllim në vete. Gjithë jetën time politike e kam bërë me njerëz të profileve të ndryshme politike. Për mua kanë qenë gjithmonë më me rëndësi prioritetet politike e jo ato ideologjike, partiake apo individuale.

    Gjatë ballafaqimeve politike kam fituar shumë miq dhe kundërshtarë, por edhe janë krijuar kundërshti të ndryshme politike prejudikuese, por normale për shoqërinë demokratike plurale. Për mua janë të kuptueshme.

    U jam shumë mirënjohës të gjithëve që i kanë qëndruar familjes sime afër, por edhe për vizitat që më kanë bërë në Hagë. Por, mbi të gjitha, për besimin që tregojnë në atë që përfaqësoj.

    E riktheksoj, njerëzit më mungojnë, jo politika. Më kanë vizituar presidentë, kryeministra, ambasadorë, kongresmenë, politikanë, aktivistë të shoqërisë civile, udhëheqës të bashkësive fetare, veprimtarë të të drejtave të njeriut, intelektualë, akademikë, gazetarë, njerëz të artit dhe kulturës, botës së sportit, sipërmarrës, qytetarë nga Diaspora, të njohur dhe të panjohur. Të them të drejtën, u kënaqa duke biseduar për tema private, familjare dhe profesionale.

    U jam shumë falënderues të gjithëve qytetarëve, kudo që jetojnë, të cilët ndajnë solidaritetin e tyre.

    Nacionale: Ju keni pasur kohë, si asnjëherë më parë, të mendoni për gjëra të ndryshme, ndoshta edhe për luftën e fundit në Kosovë. A ka diçka të re që mund të na e thuash për atë periudhë?

    Hashim Thaçi: Të them të drejtën, më shumë mendoj për të ardhmen se sa për kapitujt e mbyllur suksesshëm të Kosovës. Ne nuk e filluam luftën, dhe as s’e deshëm atë, populli i Kosovës i rezistoi agresorit. Nuk bëmë as më pak as më shumë se sa atë që duhej bërë, siç kanë bërë dhe bëjnë sot edhe shumë kombe bartëse të civilizimit botëror.

    Ne fituam.

    Tash duhet ta forcojmë paqen. Ajo sjell zhvillim, rend e ligj, harmoni mes njerëzve, jetë më të mirë e mirëqenie për qytetarët.

    Vetëm me histori nuk mund ta fitojmë të ardhmen, historia duhet respektuar, institucionalizuar. Ajo është mishërim i qytetarëve, por nuk garanton sukses për të sotmen dhe të ardhmen.

    Nëse dështojmë sot, e lëndojmë dhe e përbaltim historinë e fitores së djeshme. Por, duhet pasur parasysh se historia jonë e suksesit nuk është vetëm pronë kosovare, është edhe meritë e jashtëzakonshme e botës perëndimore.

    Kosova është storie e suksesit të përbashkët. Pa përkrahjen e sponzoruesve të lirisë dhe pavarësisë si shoqëri mund të mbijetojmë ngatërrueshëm disi, por si shtet funksional nuk mund të ekzistojmë.

    Ta mendojmë Konferencën e Rambujesë, kohën e bombardimeve, çlirimin e Kosovës, bërjen e Kosovës shtet, njohjen e saj nga mbi 100 shtete, vendimin e Gjykatës Ndërkombëtare të Drejtësisë, integrimin e saj në shumë institucione dhe organizata ndërkombëtare.

    Duhet kujtuar se jo të gjithë faktorët relevantë botërorë ishin entuziastë për bërjen e Kosovës së lirë dhe të pavarur.

    E kundërta, Kosova do ta ketë pamjen e zymtë, të pasigurt, dekurajuese dhe me shumë dilema. Do të jetë ekonomikisht më e varfër, fare investime të huaja dhe me demokraci të lëkundur. Një vendi me kriza të përhershme askush nuk i beson.

    Por, unë besoj në Kosovën në NATO, në BE dhe në raporte të përjetshme speciale me ShBA’në.

    Me Serbinë duhet të arrihet paqe e përhershme, me njohje reciproke, ligjërisht obliguese. Sa më shumë që vonohet kjo marrëveshje, aq më e vonuar do të jetë Kosova në NATO dhe BE, e aq më e zbehtë do të jetë mbështetja e ShBA’së.

    Përvoja ime më tregon se Brukseli e mbështet Kosovën, për aq sa e inkurajon dhe e mbanë në vëmendje atë Uashingtoni.

    Aleanca me ShBA-në duhet kultivuar për të ardhmen strategjike, e jo veç për kujtesë falënderimi. Suksesi ynë është mirënjohja më e madhe që Perëndimi mund të pranojë dhe vlerësojë nga Kosova.

    Nacionale: Kosova po përballet me probleme të mëdha, ikjen e të rinjve. Shquheni për mesazhe përbashkuese, edhe shkaku i pozitës si president. A keni ndonjë mesazh edhe për këta të rinj: Pse duhet të rrinë në Kosovë e ta duan atë?

    Hashim Thaçi: Largimi i të rinjve dhe familjeve të tëra nga Kosova është shqetësues dhe paraqet alarm.

    Njerëzit nuk largohen pse nuk e duan atdheun, por nga mungesa e mundësive për jetë më të mirë. Me këtë trend, shumë shpejt, në pak vite, mund të kemi proporcionin e mbi gjysmës së qytetarëve kosovarë që jetojnë në Diasporë.

    Nuk duhet vetëm ankuar apo vajtuar largimin e tyre, por krijimin e kushteteve për frendim apo zvogëlimin e këtij fenomeni. Por, askush nuk duhet të mendojë se largimin e njerëzve për në Diasporë mund ta ndalë tërësisht.

    Nuk duhet harruar se Kosova ishte përfituese e madhe nga Diaspora. Ata investuan shumë për lirinë dhe zhvillimin e Kosovës. Tash duhet ta shndërrojmë këtë faktor në përparësi për ekonominë dhe emancipimin shoqëror.

    Është e njohur se shumë talentë briliantë po ikin jashtë, me këtë gjendje largimi do të rritet, pra “largimi i trurit”.

    Uroj që të mos jetë njëdrejtimësh…besoj që shumë shpejt do ta kemi “qarkullimin e trurit” ku njerëzit largohen, qëndrojnë jashtë e pastaj kthehen në vendet e tyre…dua të besoj se invetime të ndryshme në Kosovë mund të lidhen me dijen dhe përvojën e sipërmarrësisë në Kosovë.

    Të rinjt besojnë dhe ndihen krenarë me Kosovën. Të arriturat e Kosovës janë të jashtëzakonshme. Kosova është vend që ka dëshmuar që mund të bëjë mrekullira. Pra, më shumë shpresë, besim dhe optimizëmn për të sotmen dhe të ardhmen e saj.

    Të punohet që secili qytetar, të ndihet mirë dhe krenar me Kosovën. /Nacionale

  • ​Dëshmitari kundër Thaçit dhe të tjerëve: Gjatë luftës përkrahnim LDK-në, sot e adhuroj Kurtin

    ​Dëshmitari kundër Thaçit dhe të tjerëve: Gjatë luftës përkrahnim LDK-në, sot e adhuroj Kurtin

    Dëshmitari i njëzetë i Zyrës së Prokurorit të Specializuar në gjykimin kundër Thaçit dhe të tjerëve, ka folur për një familjar të zhdukur e për të cilin pretendon se ishte marrë nga anëtarë të UÇK-së. Arsyet për këtë, në gjykatore u tha se kishin të bënin me xhelozinë në fshat si dhe faktin që ai ishte përkrahës i Lidhjes Demokratike të Kosovës.

    Dëshmitari i mbrojtur i cili mban kodin 4368, ka thënë se ai dhe familja e tij gjatë periudhës së luftës kishin përkrahur hapur LDK-në.

    Por sot, derisa është përgjigjur në pyetjet e avokatit të Rexhep Selimit, Eric Tully, ka thënë se nuk është mbështetës i kësaj partie por i kryeministrit Albin Kurti.

    Avokati Tully: Ju po ashtu keni thënë se mbase ky inati që ka ekzistuar në fshat mbase ishte për shkak të mbështetjes së LDK-së, mbase mbështetja e LDK-së ka bërë që të arrestohej i afërmi 1. Në deklaratën e dhënë për ZPS-në, në pyetjen pse beson që donin ta likuidonin, ju keni thënë ‘Kishte ca gjëra që ishin bërë bashkë, për shembull fakti që ishte me LDK-në, kishte edhe një inat nga njerëzit në fshat kundër tij’.

    Dëshmitari: Sot nuk jam i LDK-së, jam i Vetëvendosjes, i Albin Kurtit, sepse ka ardhur një njëri prej qielli, ka ardhur një njëri shumë i zgjuar, Vjosa Osmani, jam përkrah këtyre, nuk jam më për LDK-në.

    Ndërsa në pyetjet e avokatit të ish-presidentit Thaçi, Gregory Kehoe, dëshmitari është përgjigjur edhe për një rast kur sipas tij kishte shkuar për të takuar Adem Demaçin, por i njëjti sipas tij nuk i kishte pranuar.

    Ai ka thënë se aty kishte parë edhe Albin Kurtin.

    Avokati Kehoe: Pra shkuat të takoni Demaçin së bashku me personin 2, shkuat për të folur me Demaçin dhe Kurtin, ju keni folur edhe me Kurtin i cili ishte asistent i Demaçit, kështu ka qenë?

    Dëshmitari: Demaçi nuk ka dalë prej zyrës vetëm….Kurtin e adhuroj sot se është kryeministër shumë i mirë por nuk kam pasur muhabete me Kurtin, as me Thaçin, Demaçi nuk na ka pranuar, se e diti situatën ku është dhe nuk na ka pranuar.

    Avokati Kehoe: Por me Kurtin u takuat, çfarë marrëdhënie kishit me Kurtin.

    Prokurorja Hackler: kundërshtojmë i nderuar gjykatës sepse tha që nuk u takua me Kurtin.

    Avokati Kehoe: E patë Kurtin kur ishit aty?

    Dëshmitari: E pash por pa biseduar, nuk biseduam.

    Avokati Kehoe: Çfarë marrëdhëniesh kishit me Kurtin?

    Dëshmitari … (Përmbajtje e redaktuar)

    Derisa është përgjigjur në pyetjet e mbrojtjes, dëshmitari ka thënë se shtëpia e tij ishte garantuar nga forcat serbe.

    Pjesë të mëdha të dëshmisë së tij gjykata i ka transmetuar me përmbajtje të redaktuar apo janë dhënë në seancë private.

    Gjithashtu seanca është mbyllur sa herë që pyetjet kanë pasur të bëjnë me emra të personave të tjerë.

    Gjatë intervistimit nga avokati Kehoe, në gjykatore është shfaqur një dokument i cili nuk është dhënë edhe për publikun.

    Ndërsa ai i ka papërmendur dëshmitarit deklaratat e tij të dhëna më parë.

    Avokati Kehoe: Thuhet që kidnapimi dyshohet që është bërë nga xhelozia, thuhet i afërmi 1, një shqiptar i Kosovës dhe disa djem që punojnë jashtë vendit, kurr nuk kanë pasur ndonjë interes në politikë dhe këtë e ka thënë hapur, ai nuk di të lexojë dhe as të shkruajë por kishte shumë influencë në fshatin e tij. A është fakt ky, a ja keni thënë këtij institucioni këtë gjë, që ai nuk kishte fare interes në politikë dhe këtë e ka pas thënë hapur?

    Dëshmitari: Unë jo, nuk e di kush e ka thënë këtë.

    Pas kësaj seanca ka vijuar e mbyllur, për t’u hapur pastaj me pyetjet e avokatit Kehoe lidhur me kidnapimin që pretendohet se i është bërë familjarit të tij.

    Dëshmitari ka thënë se të afërmit e tij, “numri 1” dhe “numri 2” u kishin dhënë para serbëve për të mos e futur në burg “numrin 2”.

    Ai gjithashtu ka thënë se “numri 1” është përfshirë edhe në rastet me fshatarë të tjerë për të kuptuar se sa para donin serbët.

    Dëshmitari: (Numri 2) Ky ka qenë azil politik në Francë, kur është kthyer prej Francës, donin me mbyll në burg serbët me numrin 2, ai ka qenë azil politik, e kemi ble një traktor për me shpëtu këtë prej burgut… Kanë ardhur të shtëpia na kanë bastisë, për numrin dy që ka ardhur prej Francës, e gjetën një aparat të madh e morën serbët atë aparatin. Ne u kemi dhënë para serbëve, nuk u kemi dhënë shqiptarëve në atë kohë.

    Ndërsa avokati Tully ka përmendur deklaratat e dëshmitarit, të dhëna ditë më parë në konferencën përgatitore me ZPS-në, por për të njëjtat ai ka thënë se nuk i kujtohen.

    Avokati Eric: Ju përshkruani gjendjen pas arrestimit të të afërmit 1. Ju thoni si më poshtë: Jam i interesuar veçanërisht sa i takon terrorit që ekzistonte tek vendasit. Kur u pyet sa i takon pjesës së raportit që thotë që kidnapimi kishte si qëllim të vinte një shembull për të tjerët dhe për të nxitur pak terrorin ndërmjet vendasve, 4368 tha që ai nuk mendon që kidnapimi çoi në frikë, megjithëse disa fshatarë ishin të shqetësuar lidhur me këtë dhe thanë ‘o Zot, mund të më vijë edhe mua radha ndonjëherë’. Pastaj në fund fare thuhet që 4368 tha që ne nuk ishim një familje që mburreshim, dhe qëllimi i tyre ishte t’i ulnin kokën atyre personave si puna jonë. Pyetja ime është kjo, a ju kujtohet të keni thënë këtë?

    Dëshmitari: Nuk e kam thënë këtë gjë, nuk më kujtohet.

    Avokati: Dëshmitar, kjo ka ndodhur dy ditë më parë, ka dhënë një shënim përgatitor për këtë seancë, prokuroria, dhe kjo është ajo çfarë thuhet në shënimin përgatitore të prokurorisë.

    Kjo seancë po karakterizohet me redaktime të shumta si dhe mbyllje për publikun.

    Gjithashtu, disa pjesë të dëshmisë së dëshmitarit nuk janë kuptuar për shkak të modifikimit të tepërt të zërit./KosovaPress

  • Jasharaj: Eksperimenti i ministres Nagavci për rimbursimin e teksteve shkollore, doli të jetë i gabuar

    Jasharaj: Eksperimenti i ministres Nagavci për rimbursimin e teksteve shkollore, doli të jetë i gabuar

    Kryetari i SBASHK-ut, Rrahman Jasharaj, në një lidhje të drejtpërdrejt në emisionin A LIVE në ATV, tha se eksperimenti i Qeverisë për rimbursimin e teksteve shkollore doli të jetë i gabuar dhe po e cënon fillimin e mbartë të vitit shkollor.

    “Kam qenë nga njerëzit më të lumtur kur kam marrë raporte nga komunat se kolegët e mi, pra punëtorët e arsimit, nuk kanë kërkesa për ndonjë veprim sindikal dhe kemi shpresuar se vitin shkollor 2023/2024 më në fund do ta fillojmë mirë e mbarë, por dy konferenca me mediat e zonjës Nagavci treguan se kjo nuk do të ndodhë. E kam fjalën te eksperimenti i gabuar për tekstet shkollore, ngase buxheti i Kosovës duhet ndarë me kohë për libra dhe na ishte thënë fillimisht se do të kemi nëpër shkolla libra 1-5 dhe mësimdhënësit do të gjenden disi me tekstet e vitit të kaluar 6-9.Ky eksperiment doli të jetë i gabuar dhe po e cënon fillimin e mbartë të vitit shkollor”, u shpreh Jasharaj.

    Ai thotë se ka edhe informacione nga terreni se libraritë janë të mbushura me plot prindër, për shkak se në qyteza të vogla nuk ka librari dhe për blerjen e librave, prindërve iu është dashur të drejtohen nëpër qytete të mëdha.

    “Kjo ka mund të mos ndodhë dhe arsyetimi se po ruhet buxheti e po bëhet transparencë nuk qëndron ngase po bëhet rimbursimi, siç është thënë, dhe prindërit janë në dy halle. Halli i parë për të parë a po bëhet rimbursimi për të shkuar atje nëse dinë të aplikojnë për të shkuar te bankomatet për të pritur, pastaj për të shkuar në librari dhe kemi mijëra prindër që janë në gjendje tepër të vështirë ekonomike, kemi prindër që nuk kanë fare xhirollogari, lexova në media se paska edhe raste që i kanë xhirollogaritë e bllokuara fatkeqësisht, por edhe ata që nuk kanë fare xhirollogari dhe tani sidomos këta që punojnë në sektorin privat, po edhe në publik do ta kenë vështirë të shkojnë nga komuna apo qyteza e tyre për të pritur në radhë për të marrë libra, aq më keq zonja Nagavci ka deklaruar se prindërit duhet të komunikojnë me mësimdhënësit për të parë se shkolla e caktuar për të cilat libra është orientuar dhe pra e kemi një vit shkollor që fillon me vështirësi”, tha Jasharaj.

    Sipas tij, problemi më i madh qëndron në mungesën e gatishmërisë së ministres Nagavci për t’u takuar e komunikuar me SHBASHK-un.

    “Unë e di se mësimdhënësit e di se edhe DKA-të, shkolla përgjegjësi kanë bërë gjithë përgatitjet teknike brenda mundësive të veta dhe ky eksperiment nuk është dashur të ndodhë dhe po nëse kanë menduar ta bëjnë është dashur të dihet që në maj, por atë që po e them në emër të SBASHK-ut, problemi më i madh qëndron në mungesën e mirëkuptimit, gjegjësisht mungesën e gatishmërisë së zonjës Nagavci për t’u takuar, për të komunikuar me SBASHK-un që janë përfaqësues të tërë mësimdhënësve dhe punëtorëve tjerë”, u shpreh Jasharaj. /atvlive.tv

    Më shumë detaje rreth kësaj çështje i gjeni në emisionin “A LIVE”, të cilin e gjeni në videon më poshtë:

  • ​Osmani: Serbia po na e sfidon integritetin territorial, kemi nevojë për Shqipërinë

    ​Osmani: Serbia po na e sfidon integritetin territorial, kemi nevojë për Shqipërinë

    Të shkëlqyera i ka konsideruar presidentja Vjosa Osmani, raportet mes Kosovës dhe Shqipërisë. Ajo deklaroi se angazhohet për tejkalimin e çdo lloj mospajtimi të momentit mes kryeministrit Kurti dhe Rama. Kështu u shpreh ajo pas takimit me presidentin e Shqipërisë, Bajram Begaj, për çka tha se kryefjala e kësaj vizite është bashkërendimi për një strategji dhe veprim të unifikuar të politikës së jashtme. E presidenti i Shqipërisë, Bajram Begaj deklaroi se askush nuk mund të çuditet pse Kosova është prioritet kombëtar dhe se në të gjitha takimet e tij ka kërkuar njohjen e Kosovës. Ai u shpreh se Kosova duhet të ketë koordinim të ngushtë dhe më të mirë me Shtetet e Bashkuara të Amerikës dhe Bashkimin Evropian.

    Presidentja Vjosa Osmani tha se Kosova ka nevojë për mbështetjen e Shqipërisë, qw të bëhet zë në të gjitha instancat ndërkombëtare, raporton KosovaPress.

    “Kryefjala e vizitës sime është bashkërendimi për një strategji dhe veprim të unifikuar të politikës së jashtme. Siç e dini, dy muaj më parë, shtetet tona nënshkruan edhe 13 marrëveshje në fusha të ndryshme nga siguria, drejtësia, arsimi, kultura e bujqësia. Në dy vitet e fundit janë nënshkruar 41 marrëveshje qeveritare, ndërministrore, ndërinstitucionale. Ato synojnë fuqizimin e shteteve tona dhe njëkohësisht lehtësimin e jetës së qytetarëve në dy shtetet. Bashkëpunimi ekonomik është i një rëndësie të madhe për qytetarët tanë. Prandaj edhe duhet dhe mund ta krijojmë një shkëmbim edhe më dinamik, nga i cili përfitojnë edhe bizneset por edhe qytetarët”, deklaroi Osmani.

    Kryetarja e shtetit shtoi se janë të vendosur për të kontribuar në funksion të paqes dhe stabilitetit, të cilat siç tha ajo, po rrezikohen nga Rusia dhe satelitët e saj në rajon. Osmani deklaroi se Kosova sot përballet me sfidimin më të madh të sigurisë në 25 vjetët e fundit.

    “Përderisa politika shtetërore e Serbisë vazhdimisht po e sfidon integritetin territorial të Kosovës dhe angazhohet në agresion institucional kundër Kosovës në baza të rregullta, ne do të kemi nevojë për përkrahjen e Shqipërisë, e po ashtu për përkrahjen e aleatëve dhe partnerëve euroatlantikë dhe natyrisht që pajtohem me presidentin Begaj që koordinimi me miqtë dhe aleatët tanë është parakusht për suksesin tonë kudo e kurdo. Dialogu me Serbinë është duke vazhduar por natyrisht që rruga e vetme që sjell paqen, stabilitetin afatgjatë në gjithë rajonin tonë është atëherë kur rezultati përfundimtar është njohja reciproke dhe ruajtja e integritetit territorial, sovranitetit, rendit kushtetues dhe funksionalitetit të brendshëm të Republikës së Kosovës”, shtoi presidentja e vendit.

    Në konferencë për media, Osmani theksoi se synim shtetëror dhe strategjik mbetet anëtarësimi në NATO dhe Bashkim Evropian, si dhe në të gjitha organizatat tjera ndërkombëtare.

    Tutje, ajo komentoi edhe raportet mes kryeministrave të të dyjave vende, ku tha se relacionet mes të dyja vendeve janë “mes motrash”.

    “Relacionet mes Kosovës dhe Shqipërisë janë të shkëlqyera. Ne herë i quajmë vëllazërore, por mua më pëlqen t’i quaj relacione mes motrash. Sepse është relacioni më i sinqertë që ekziston. Relacionet mes Kosovës dhe Shqipërisë mund të fuqizohen edhe më tej, mund dhe do ta rrisim koordinimin mes nesh. Sepse është në interes të të dyja shteteve, në interes të kombit tonë, por në interes edhe të paqes dhe stabilitetit afatgjatë…Nuk është situata në veri ajo që ka acaruar dialogun Kosovë-Serbi, është Serbia ajo që gjithnjë acaron situatën në rajonin tonë nëpërmjet sulmeve të njëpasnjëshme ndaj Kosovës. Nuk ka javë që kalon që dikush nga Serbia nuk gjuan me armë policët e Kosovës që janë në territorin e Republikës së Kosovës”, theksoi ajo.

    Megjithatë, ajo komentoi edhe raportet e kreyminstrave Albin Kurti dhe Edi Rama, pwr çka shtoi se çdo diskutim i momentit që mund të ketë involvuar mospajtime është tejkaluar.

    “Si presidente angazhohem që të tejkalojmë çdo lloj mospajtimi të momentit që ekziston, por nuk e shoh as si tragjike, as diçka që na pengon të ecim përpara në këtë qëllim të përbashkët, atë që ju e përmendet si diskutime apo acarim”, u shpreh ajo.

    Edhe presidenti i Shqipërisë, Bajram Begaj tha se nuk kanë rëndësi mosmarrëveshjet e momentit.

    “Nuk ka rëndësi mosmarrëveshjet e momentit. Vizita e presidentes Osmani sot në Shqipëri tregon që ne jemi bashkë për çështje të rëndësishme të interesit ndërshtetëror, por gjithashtu jemi bashkë për të përçuar atë që si komb kemi, frymën evropiane dhe euroatlantike. Rrugëtimi ynë është në një kah, ky rrugëtim është i sigurtë, është i ndryshëm nga Serbia. Nuk mund të vazhdojmë më të mendojmë që jemi në lindje, ne do të vazhdojmë të jemi një në rrugëtimin tonë drejt perëndimit. Nuk mendoj që ka vend për tu shqetësuar, absolutisht ka vend për të përmirësuar këtë koordinim ndërinstitucional që zëri i Kosovës të dëgjohet në çdo forum, në çdo organizëm”, tha ai në konferencë për media.

    Ai shtoi se karakteri strategjik i marrëdhënieve mes të dyja vendeve ka një rol unik për stabilitetin, sigurinë, zhvillimin e qëndrueshëm dhe perspektivën euroatlantike.

    Presidentja Vjosa Osmani sot dhe nesër do të qëndrojë për vizitë në Shqipëri. Ajo u prit me ceremoni shtetërore në ambientet e Presidencës së Shqipërisë. Ajo do të takohet edhe me kryeparlamentaren Lindita Nikolla dhe me kryeministrin Edi Rama. Po ashtu, do t’ia dorëzojë dekretin e nënshtetësisë së Kosovës, shkrimtarit me famë botërore, Ismail Kadare. /KP

  • Njohësja e arsimit: Nxënësit nuk kanë mbetur pa libra, qeveria ka subvencionuar edhe pajisjet shkollore që më parë s’kanë qenë

    Njohësja e arsimit: Nxënësit nuk kanë mbetur pa libra, qeveria ka subvencionuar edhe pajisjet shkollore që më parë s’kanë qenë

    Njohësja e arsimit, Salie Gajtani-Osmankaq, në një intervistë në emisionin A LIVE në ATV, duke komentuar fillimin e vitit të ri shkollor për sivjet, ku shumë nxënës e kanë nisë pa libra, tha se problemi kryesor ka qenë vonesa e informimit.

    Sipas saj, nxënësit nuk kanë mbetur pa libra, madje thotë ajo, këtë vit Qeveria majde ka subvencionuar edhe pajisjet shkollore, e cila nuk ak qenë më parë.

    “Këtu unë lidhem gjithmonë dhe e kam kritiku vazhdimisht qeverisjen qendrore, në kuptimin që pse është lënë të informohen prindërit në këtë kohë, do të thotë pak ditë para fillimit të mësimit të vitit shkollor. Sikur kjo informatë t’u bëhej e ditur prindërve në qershor, sot do të kishim një situatë tjetër, do të thotë debati do të zbriste deri në këtë nivel, kur kemi të drejtë e s’kemi të drejtë e hallet e problemet, por e para prindërit do të kishin kohë të mjaftueshme që të kontaktonin me mësimdhënësit se cilat libra duhet t’i sigurojnë, si t’i sigurojnë, e kështu me radhë, si dhe do të ndanin ç’është më e rëndësishmja, nga buxheti i tyre familjar, sado që do të thotë qeveria e ka bërë të ditur se do subvencionojë shpenzimet, madje do të japë edhe për pajisjet shkollore që nuk e kanë pasë më herët, mirëpo krejt problemi për mua është koha, koha e shkurtër e cila si dhe mungesa e buxhetit familjar, edhe pse janë nderë një shumë e madhe e mjeteve tashmë, sipas informatave që kam, janë nderë në llogaritë e prindërve, atyre që kanë apliku në e-Kosova, megjithatë prindërve u ka mungu kjo pjesë e ndarë e buxhetit për sigurimin e librave shkollor”, u shpreh Gajtani-Osmankaq.

    Ajo thotë se për dallim me vitet e kaluara ku kishin greva, çështja e fillimit të vitit të ri shkollor këtë vit ka kaluar në një debat tjetër dhe se tani problemi është i zgjidhshëm.

    “Sikur e kemi bërë njëfarë rutine që në çdo fillimvit shkollor me ndodhë diçka. Do thotë, s’po du me përmendë vitet e pandemisë, ato telashe që i patëm edhe në nivel vendor sikur gjithë bota. Por, ja që pas pandemisë sërish çdo vit shkollor po e nisëm me shumë debat, me shumë huti, me shumë dilema. Vjet t’i kishim grevat, të gjithë jemi dëshmitarë çfarë ndodhi, si ndodhi, çka shkoi keq. Sivjet na ndodhi kjo me librat, që në fakt nuk e prisnim, por ja që ndodhi. Mirëpo, po du me e theksu që tani kemi zbritur në një nivel tjetër të debatit dhe ndonëse ka pasur mjaft revoltë me thanë ashtu në mesin e prindërve dhe huti, nuk mund të themi që ky është problem i pazgjidhshëm. Do thotë, unë po shoh tani shumë reagime, të cilat do thotë sidomos nga aspekti spektri politik, flasin sikur librat nuk janë fare, kjo nuk është e vërtetë, sepse librat do të jenë mbi tavolinë, ai ka të gjithë fëmijët jo”, tha Gajtani-Osmankaq. /atvlive.tv

    Më shumë detaje rreth kësaj çështje i gjeni në emisionin “A LIVE”, të cilin e gjeni në videon më poshtë: