Tash e pesë muaj, Korporata Energjetike e Kosovës vazhdon të funksionojë me ushtrues detyre.
Qëkur Nagip Krasniqi u arrestua, më 19 prill, teksa 6 ditë më vonë u suspendua bordi i drejtorëve i KEK-ut nuk e ka konsideruar shkarkimin e tij dhe shpalljen e konkursit për kryeshef të ri të ndërmarrjes.
Pas vendimit të fundit të Gjykatës së Prishtinës, për lirim nga paraburgimi, duke ia zëvendësuar me masën e sigurisë që i ndalon Krasniqit afrimin ndaj dëshmitarëve, bordi i drejtorëve nuk ka kthyer përgjigje. Paraprakisht, kishin thënë se për këtë çështje do të vendoset pasi të ketë një vendim nga organet e drejtësisë.
Bazuar në afate ligjore për funksionim të ndërmarrjeve, sipas drejtorit të organizatës “Çohu”, Arton Demhasajt, Krasniqi është dashur të shkarkohet dhe të hapet konkursi.
“Po flasim potencialisht për një kohë për të cilën është konsumuar ky gjashtëmujori që ligji e lejon me qenë ushtrues detyre. Prandaj mendoj se Bordi është dashur ta shkarkojë dhe t’i hapë procedurat për zgjedhjen e një drejtori të ri. Sepse, ushtruesi i detyrës momentalisht që është, është i cunguar sa i përket kompetencave për me e udhëheqë një ndërmarrje kaq të rëndësishme publike siç është KEK-u”, tha Demhasaj.
Sipas Demhasajt, mos-hapja e konkursit të ri, mund të jetë edhe e qëllimshme.
“Në një formë nëse bordi shpall konkurs i bie se po a pranon kushtimisht se ka diçka të vërtetë në ato pretendimet për shkelje që kanë qarkulluar” , tha Demhasaj.
Nagip Krasniqi, i cili u arrestua më 19 Prill nën dyshimet për keqpërdorim të detyrës zyrtare, u lirua nga paraburgimi më 15 shtator. Megjithëse, hetimet ndaj tij janë duke vazhduar, aktakuza nga Prokuroria nuk është ngritur akoma.
Krasniqi dyshohet për keqpërdorime në tenderin në vlerë 3.5 milionë euro për riparimin emergjent të kaldajës së njësisë A5 dhe një tjetër kontratë për konsulencë në vlerë 60 mijë euro.
Me 12 vjet burgim unik është dënuar Iran Badalli, në shtëpinë e të cilit ishte gjetur eksploziv. Si pasojë e shpërthimit të një pjesë të eksplozivit, kishte mbetur i vdekur një polic, teksa ishin lënduar disa të tjerë.
Ai u gjet fajtor për dy vepra penale, “Shkaktim i rrezikut të përgjithshëm” dhe “armëmbajtje pa leje”. Për të njëjtat vepra penale u dënua edhe i akuzuari i dytë Arben Gashi, me 12 vjet burg unik.
Por, dënimi u konsiderua i ulët nga avokati i familjes së policit Sami Thaçi, i cili kishte vdekur si pasojë e shpërthimit.
Ankesë do të parashtrojë edhe avokati i policit të lënduar rëndë në këtë shpërthim, Artur Mrasori.
Por, ndryshe mendojnë familjarët e Iran Badallit, të cilët vendimin e quajtën skandaloz.
Ndërkaq, në oborrin e Gjykatës ndodhi edhe një përplasje verbale mes dy palëve, ku u nevojit edhe ndërhyrja e policisë.
Rasti kishte ndodhur në janar të vitit 2020, derisa sa po kryhej një bastisje në shtëpinë e Iran Badallit në fshatin Zhur të Prizrenit, pas një thirrje për dhunë në familje. Aty njësitet policore kishin hasur në eksploziv, një pjesë e të cilit kishte shpërthyer në duar të policit Sami Thaçi, i cili kishte mbetur i vdekur, ndërsa të plagosur mbetën polici Artur Mrasori dhe disa të tjerë, përfshirë edhe djalin e Badallit.
Sipas aktakuzës, Badalli së bashku me Arben Gashin, ishin furnizuar me eksploziv nga i akuzuari Valbon Çollaku, i cili e kishte pranuar fajësinë për import, prodhim ose shitje të armëve apo materialit plasës, dhe Gjykata në Prizren i kishte shqiptuar dënim me gjobë në shumë prej 1.000 euro dhe dënim me kusht në kohëzgjatje prej 6 muajve.
Për të tretin muaj me radhë, naftëtarët mesatarisht fitojnë nga 20 deri në 30 centë për litër naftë.
Çmimi mesatar i importit në 18 ditët e para të muaji, sipas të dhënave të doganës, llogaritet të jetë 1 euro e 20 centë, përfshirë edhe taksat.
Megjithatë, në disa pompa, çmimi i naftës arrin në 1.58 centë për litër, apo 38 centë më shtrenjtë se mesatarja e importit.
Ngjashëm ishte edhe në muajin gusht, kur një litër naftë shitej me çmim prej 1 euro e 49 centësh apo 21 centë më shtrenjtë se mesatarja e importit që ishte 1.28 centë.
Edhe korriku ishte pothuajse i njëjtë. Rreth 27 centë fitonin naftëtarët në një litër, teksa mesatarja e importit sillej rreth 1.16 centë e shitej me 1.43 centë.
Në raste të tilla, sipas ish-ministrit të Tregtisë e Industrisë, Ismet Mulaj, do të duhej reaguar shteti me mekanizmat e tij.
“Autoriteti i Konkurrencës dhe Ministria e Tregtisë, përmes inspektoratit të tregut do të duhej që të hetoheshin a ka ndonjë marrëveshje mes bizneseve të mëdha, që të mbajnë çmime të larta, ose të mbajnë çmime në kundërshtim me ligjin dhe që shkojnë në dëm të tregut në Kosovë”, tha Mulaj.
E nga autoriteti i Konkurrencës, përmes telefonit thanë se janë duke e monitoruar situatën nëse ka marrëveshje mes naftëtarëve për rritje të çmimit të naftës.
Por ani pse janë plot 3 muaj që çmimet janë të larta, ende nuk ka diçka konkrete.
Kësisoj, sipas Mulajt, mundësi tjetër është edhe vendosja e çmimit tavan.
“Ministria e Tregtisë përmes një udhëzimi administrativ ka mundësi që të vendosë çmime tavan, nëse heton që kompanitë e mëdha kanë krijuar marrëveshje dhe këto marrëveshje në mënyrë jo të drejtë i mbajnë çmimet e larta në Kosovë”, tha Mulaj.
Megjithatë, një masë e tillë ishte vendosur muajin e kaluar nga ana e Ministrisë por që ka skaduar, dhe nga kjo ministri nuk treguan nëse të njëjtën do ta vendosin prapë.
Ndërkaq, në anën tjetër, Shoqata e naftëtarëve rritjen e çmimeve e arsyeton me rritjen në bursë, pa e komentuar fitim enorm.
“Mua më mungon njeriu dhe natyra”, thotë një nxënëse.
“Mua më mungon libri i artit figurativ”, thotë një nxënës.
Por të tjerët i kanë kompletuar të gjitha.
“Të gjitha librat i kam, nuk më mungon asnjë”, thotë një tjetër nxënës.
Në shkollën fillore “Ismail Qemali” në kryeqytet, sipas drejtoreshës Mimoza Krasniqi, 90% e nxënësve kanë libra, por mungesë të disa teksteve ka nga klasa 6-të deri në të 9-tën.
“90% e nxënësve në ciklin e lartë janë kompletuar me libra, ndërsa ata të ciklit të ulët nuk e kanë aty-këtu ndonjë libër, por në përgjithësi librat bazë i kanë të gjithë nxënësit”, tha Krasniqi.
Megjithatë, me këtë nuk pajtohet SBASHK-u. Sipas Sindikatës së Arsimit, shumë shkollave në Kosovë u mungojnë librat.
“Nga bisedat mund të ketë ndonjë klasë që kjo përqindje ka arritë, por ka ende shkolla që ka nxënës që ka mungesë të tërësishëm të librave apo të pjesshme”, tha Jasharaj.
E para e Arsimit, Arbërie Nagavci, megjithatë, deklaroi se dikasteri i saj nuk ka pranuar ndonjë ankesë.
“95% që kanë aplikuar janë realizuar pagesat. Nga shkollat gjegjësisht nga komunat nuk kemi asnjë raportim për mungesë në klasa. Nga vizitat e zyrtarëve të arsimit është raportuar javën e kaluar, gjendja ka qenë relativisht e mirë, por zyrtarisht nga komunat nuk kemi njoftime për mungesa”, tha Nagavci.
Qeveria kishte ndarë 13 milionë euro për subvencionimin e teksteve shkollore.
Zëdhënësi i Bashkimit Evropian për Punë të Jashtme, Peter Stano, i është kundërpërgjigjur kryeministrit të Kosovës, Albin Kurti, i cili të hënën në një konferencë për media adresoi kritika të rrepta ndaj emsiarit të BE-së për dialogun Kosovë-Serbi, Mirosllav Lajçak.
“Sa i përket deklaratave të bëra nga zotëri Kurti, ne nuk i komentojmë –komentet, sidomos nëse ato përmbajnë pretendime të pabaza. Shtetet anëtare të BE-së, vazhdimisht e kanë bërë shumë të qartë se ata plotësisht përkrahin emisarin special Miroslav Lajçak, sikurse dhe përfaqësuesin e lartë (Josep Borrell) në rolin e tij si lehtësues në dialogun Prishtinë-Beograd”.
“Pra ata (BE-ja) plotësisht përkahin këtë dyshe në angazhimin e tyre që të ndihmojnë Kosovën dhe Serbinë që më në fund të vijnë në një nivel që t’i normalizojnë marrëdhëniet”, tha Stano, gjatë konferencës së rregullt të BE-së të mbajtur në Bruksel.
Bashkimi Evropian nëpërmjet një deklarate ka shprehur mbështetjen e plotë për përpjekjet e përfaqësuesit të lartë Josep Borrell në cilësinë e lehtësuesit të dialogut Beograd-Prishtinë, si dhe përfaqësuesit special të BE-së Miroslav Lajçak, dhe kujton se rruga evropiane e Kosovës dhe e Serbisë kalon nëpër dialogun e lehtësuar nga BE-ja dhe nëpërmjet normalizimit të marrëdhënieve të tyre.
Pas takimit të nivelit të lartë të dialogut Beograd-Prishtinë, më 14 shtator në Bruksel, Bashkimi Evropian ka shprehur shqetësimin për mungesën e zbatimit nga palët të angazhimeve të tyre sipas Marrëveshjes për Rrugën drejt Normalizimit dhe Aneksit të Zbatimit të saj, për të cilat të dyja palët ranë dakord më herët këtë vit, dhe të cilat janë të detyrueshme për to dhe luajnë një rol në rrugën evropiane të palëve.
Përfaqësuesit të Lartë Josep Borrell në cilësinë e Lehtësuesit të Dialogut Beograd-Prishtinë, nëpërmjet një deklarata thekson se BE-ja u kërkon palëve të angazhohen në mënyrë konstruktive dhe me mirëbesim.
“Kjo nënkupton fillimin e zbatimit bazuar në Propozimin e BE-së pa vonesa të mëtejshme, i cili gjithashtu përfshin detyrimin e të dyja palëve për të zbatuar plotësisht të gjitha Marrëveshjet e kaluara të Dialogut. Puna për themelimin e Asociacionit të Komunave me Shumicë Serbe duhet të fillojë pa ndonjë vonesë apo parakusht të mëtejshëm. BE-ja u kujton palëve përgjegjësinë e tyre për të respektuar parimin e konfidencialitetit në Dialog, i cili është një komponent kyç i çdo procesi negociator të ndjeshëm politik. BE-ja mbetet po aq e shqetësuar për mungesën e progresit nga të dyja palët në de-përshkallëzimin e tensioneve në veri të Kosovës, disa muaj pas shpërthimit të fundit të dhunës që la të plagosur qytetarë, trupa të KFOR-it, forca të rendit dhe përfaqësues të mediave, disa me pasoja të rënda dhe të përhershme. Pavarësisht thirrjeve të përsëritura nga BE-ja dhe partnerët e tjerë ndërkombëtarë, hapat e ndërmarrë deri më tani mbeten të pamjaftueshëm dhe situata e sigurisë në veri mbetet e tensionuar. Në këtë kontekst, lëvizjet e Kosovës – duke përfshirë shpronësimet e tokës në veri të Kosovës, kërkesat për zhvendosje, telekomunikacionin, dhe përdorimin e forcave speciale të policisë për detyrat e policisë në komunitet – nuk janë në përputhje me sundimin e ligjit dhe rrezikojnë të kontribuojnë për rritjen e mëtejshme të tensioneve. Sulmet e vazhdueshme në shkallë të vogël nga grupet kriminale dhe frikësimi i kadetëve të policisë serbe të Kosovës të sapo rekrutuar/popullatës lokale janë të papranueshme dhe duhet të ndalen menjëherë. Bllokimi nga Serbia i udhërrëfyesit të Energjisë, si dhe përpjekjet e tjera që nuk janë në përputhje me Marrëveshjen për rrugën drejt normalizimit dhe aneksin e saj, bien ndesh me frymën e procesit të Dialogut. Kërkesat e bëra në Deklaratën në emër të BE-së të datës 3 qershor mbeten plotësisht të vlefshme. Masat e kthyeshme që ka marrë BE-ja mbeten në fuqi, duke përfshirë pezullimin e takimeve të nivelit të lartë me Kosovën. BE-ja është e gatshme të heqë këto masa në rast të progresit në përmbushjen e kërkesave ekzistuese, ose të vlerësojë masat e mëtejshme ndaj të dyja palëve, nëse është e nevojshme”, thuhet në deklaratë.
BE-ja rikujton rëndësinë e mbajtjes së shpejtë të zgjedhjeve të parakohshme lokale në veri të Kosovës për të ndihmuar në uljen e tensioneve. Është e nevojshme zgjidhja më e shpejtë për të mundësuar shpalljen e zgjedhjeve. Ne inkurajojmë serbët e Kosovës që të angazhohen plotësisht në procesin zgjedhor dhe të deklarojnë publikisht pjesëmarrjen e tyre të pakushtëzuar.
BE nëpërmjet kësaj deklarate u bën thirrje të gjithë akterëve politikë, në të gjitha nivelet e qeverisjes, si në Kosovë ashtu edhe në Serbi, që të angazhohen në mënyrë konstruktive në procesin që çon në zgjedhjet e parakohshme lokale në veri të Kosovës, të shmangin hapat e mëtejshëm përshkallëzues dhe të mbështesin përparimin në dialogun e ndërmjetësuar nga BE-ja.
“BE-ja shpreh mbështetjen e plotë për përpjekjet e Përfaqësuesit të Lartë Josep Borrell në cilësinë e Lehtësuesit të Dialogut Beograd-Prishtinë, si dhe Përfaqësuesit Special të BE-së Miroslav Lajçak, dhe u kujton palëve se rruga evropiane e Kosovës dhe e Serbisë kalon nëpër Dialogun e lehtësuar nga BE-ja dhe nëpërmjet normalizimit të marrëdhënieve të tyre. Të dyja palët rrezikojnë të humbasin mundësitë për të përparuar në rrugët e tyre evropiane”, thuhet në deklaratë.
Presidentja e Republikës së Kosovës, Vjosa Osmani, e cila po qëndron në New York ku po mbahet sesioni i 78-të i Asamblesë së Kombeve të Bashkuara, ka zhvilluar një takim me presidentin e Kenias, William Ruto.
Në këtë takim, Presidentja Osmani e ka falënderuar homologun Ruto pas vendimit të Kenias për njohjen e pasaportave të Republikës së Kosovës dhe në të njëjtën kohë ka shtruar nevojën e thellimit të marrëdhënieve diplomatike në të mirë të qytetarëve dhe shteteve.
“Mezi presim ndërmarrjen e hapave të përbashkët që do t`i afrojnë tutje vendet dhe popujt tanë”, ka theksuar Presidentja Osmani.
Në takim, ndër të tjera u diskutua edhe për mundësinë e bashkëpunimit ekonomik ndërmjet Kosovës dhe Kenias, si dhe nxitjen e shkëmbimeve tregtare dhe ekonomike.
Presidentja Osmani në një pjesë të takimit foli edhe për përkushtimin e Kosovës për zhvillim të qëndrueshëm dhe mundësinë e nismave të përbashkëta në fusha të tilla si energjia e rinovueshme dhe ndryshimet klimatike.
Një fëmijë tre vjeç është rrahur nga edukatoret e çerdhes “Gëzimi Ynë” në Fushë-Kosovë. Kështu së paku pretendon një qytetar me emrin Fatos Geci, raporton Ekonomia Online.
Siç tregon ai, fëmija 3 vjeçar është tërhequr zvarrë nga një edukatore dhe më pastaj edhe është rrahur keq.
Familjarët kanë publikuar edhe video nga keqtrajtimi. E, nga fotografitë e publikuara shihet se i vogli ka marrë edhe lëndime nëpër duar.
“Nipi im ka pësuar trauma të rënda psiçike dhe nuk mund të flejë më, nipi po përjeton një ankth të madh”, shkruan ndër të tjerash Fatos Geci.
Ai ka kërkuar nga organet kompetente që të merren seriozisht me rastin.
“Kërkoj nga organet e drejtësis të bëjnë punën e tyre. IDIOTEVE dhe mostrave të tilla duhet t’i jepet fund një herë e përgjithmonë. Le të jetë rasti i fundit i dhunës ndaj fëmijëve”, ka shkruar ai.
Me ndarjen e çmimeve për filmat pjesëmarrës, Prishtina Internacional Film Festival përmbylli edicionin e tij të 15-të.
Çmimi kryesor, i cili tash e dy vjet e mbanë emrin Vjosa Berisha, iu dha filmit debutues të regjisorit shqiptar, Fisnik Maxville, “Toka brenda meje”, si dhe filmit nga Bullgaria, “Blaga’s lessons”, të regjisorit Stefan Kumandarev.
“Një ndjenjë jashtëzakonisht e bukur, se me të vërtetë ka pas një garë. Edhe një herë jashtëzakonisht shumë e shtirë dhe jam tepër i kënaqur që këtë çmim po e ndajmë përveç dy filmave, njëri prej të cilit është edhe filmi i im”, tha regjisori Fisnik Maxville.
Çmimi për arritje vjetopre i takoi producentit Valon Bajgora për suksesin e tij ndërkombëtar në botën e filmit këtë vit.
“Festivali është garë, garë për filmin më të mirë. Konkurrenca ka qenë shumë e mirë. Filmat, seleksioni i sivjetmë ka qenë shumë shumë i mirë, filmat e mirë. Kam pasur kënaqësi me i pa të gjithë edhe normal që kur garon, garon për me fitu edhe ki besim që filmin që e ke ba ti, është filmi më i mirë në botë, por kur i sheh filmat tjerë që janë të nivelit tënd, ndoshta edhe më të mirë edhe ti atë besimin që e ke, fillon edhe me u kthy në realitet. Faleminderit të jurisë, faleminderit të Fisit, faleminderit të festivalit, për neve është plotësi shumë e madhe edhe një motivim shumë i madh për me vazhdu edhe me punu. Unë u emocionova shumë kur u jep çmimi për producentin më të mirë, humba komplet nuk disha as çka me thanë”, u shpreh producenti Bajgora.
Ndërsa aktorët Edgar Morais dhe Rafael Morais u shpërblyen me çmimin “Aktori më i mirë”. Ata me këtë çmim u vlerësuan për rolin e tyre në filmin “Një filxhan kafe dhe këpucë të reja veshur”.
Për regjisorin e njëhersh, udhëheqësin e këtij festivali, Fatos Berisha, ky edicion ishte tejet i veçantë.
Po ndjehem i lehtësuar nga një barrë e përgjegjësisë që e kam pasur dhe njëkohësisht i lumtur që çdo gjë shkoi mirë. Krenar me punën e bashkëpunëtorëve të mi, miqve, përkrahësve, shokëve, shoqeve edhe shpresoj që kjo energji me na mbajtë edhe me vazhdu kështu. Në menjëherë do ta vazhdojë punën. Të hënën, pushojmë pak, të martën, ia nisim me punu për edicionin tjetër dhe tash duhet me mendu për vitin tjetër menjëherë”, u shpreh regjisori Berisha.
Edicioni i 15-të i Prifest, këtë vit pati në fokus industrinë e filmit Izraelit.
Më poshtë po ju sjellim listën e plotë të fituesve të çmimeve në edicionin e 15-të të Prifest:
Çmimet e PriForum-it:
Best Pitch AWARD Vanessa Redgrave in amount of 1000 EUR goes to BIG IN GAZI BABA from North Macedonia given by Neptun;
Color Grading in Services in amount of 10K given by In My Country Postproduction House goes to HAPPY FAMILY – TURKEY;
Final Mix in Sound Postproduction in Services in amount of 10K given by In My Country Postproduction House goes toEVERYBODY DIES ON THE NEWS, Bulgaria;
AWARD in amount of 1000 EUR for Izraeli projects only goes to SECOND WIFE;
IKONE STUDIO PRIZE – 7K in services for Camera Equipments goes to LUCKY US from Kosovo;
KOSOVO CINEMATOGRAPHY CENTER AWARD for the Best Pitch in amount of 3000 EUR will be devided in two projects:
1500 EUR for MEDUSA – Albania
1500 Euro for I MUST GO DOWN BY THE SEA AGAIN – Kosova.
Çmimet për filmat më të mirë:
Mirenjohje speciale per filmin e shkurtër: HOME OF THE HEART nga Sarah Saidan, Francë;
Filmi më i mirë i shkurtër: ROAD TRIPPER, nga Christophe Granger, Francë
Filmi më i mirë i metrazhit të mesëm:
SI NÉ VAJ nga Aulona Selmani, Zvicërr;
Hyjnesha e Artë për aktoren më të mirë Eli Skorcheva për filmin BLAGA’S LESSONS, Bullgari;
Hyjnesha e Artê për aktorin më të mirë shkon për vëllezërit binjak Edgar Morais
Rafael Morais nga filmi NJË FILXHAN KAFE DHE KÊPUCË TË REJA VESHUR, Shqipëri;
Hyjnesha e Artë për regjinë më të mirë ndahet mes Fisnik Maxville dhe Stefan Kumandarev;
Hyjnesha e Artë – Çmimi i PriFest-it për arritje vjetore në kinematografi për kineastin vendor, shkon për:
producentin VALON BAJGORA
‘Çmimi Vjosa Berisha’ – Hyjnesha e Kuqe per filmin me te mirë Ballkanik:
ndahet mes filmave TOKA BRENDA MEJE nga Fisnik Maxville (Kosove, Zvicerr) dhe BLAGA’S LESSONS nga Stefan Kumandarev (Bullgari).
Delegacioni ukrainas së bashku me Nenad Canakun, kryetarin e Institutit për Ballkanin Perëndimor, u mikpritën nga stafi akademik i Kolegjit AAB, por edhe nga studentë të shumtë.
Njohja e Pavarësisë së Kosovës nga Ukraina, ishte një ndër çështjet që u diskutua ndërmjet delegacionit ukrainas dhe studentëve të AAB-së.
“Ne nuk e dimë se a do të ekzistojmë nesër, apo a do të jemi gjallë. Siç e dini, paqeruajtësit ukrainas qëndruan në Kosovë për një kohë të gjatë të sigurojnë stabilitet dhe paqe, por tani për tani ne jemi ata që kami nevojë për paqeruajtësit”, tha Mykola Davidyuk, politolog ukrainas.
Ndërsa, Nenad Çanak, ish-deputeti i kuvendit të Serbisë, ka folur për ndikimin e Rusisë në Ballkan dhe për moszgjidhjen e çështjeve të hapura mes shteteve të Ballkanit Perëndimor.
“Ekziston një influencë shumë e fortë e Rusisë, e cila po ndikon në marrëdhëniet tona. Nëse nuk e heqim qafe influencën toksike të Rusisë, është thuajse e pamundur për ne që t’i zgjidhim problemet tona lokale”, tha Çanak.
Edhe zyrtarët e tjerë ukrainas kanë folur kryesisht për ndikimin e Rusisë dhe për pasojat e luftës në Ukrainë.
Pasi Rusia nisi luftën në Ukrainë, gazetarë por edhe zyrtarë tjerë ukrainas kanë ardhur në Kosovë.
Edicionin Qendror të lajmeve në ATV e gjeni në videon më poshtë:
