ATV

Tag: Ballina

  • ​Hovenier: ShBA beson në Lajçakun dhe Borrellin si ndërmjetësues të dialogut

    ​Hovenier: ShBA beson në Lajçakun dhe Borrellin si ndërmjetësues të dialogut

    Shtetet e Bashkuara të Amerikës kanë rikonfirmuar edhe njëherë mbështetjen ndaj Bashkimit Evropian si ndërmjetësues të dialogut. Mbështetje konkrete ambasadori amerikan, Jeffrey Hovenier, i dha sot (e mërkurë) edhe ndërmjetësve evropianë të dialogut, Josep Borrell dhe Miroslav Lajçak.

    Në samitin e Paqes dhe Demokracisë (KDPS), Hovenier tha se vetëm normalizimi i marrëdhënieve Kosovë-Serbi i sjell dy vendet më pranë institucioneve trans-atlantike. Derisa theksoi se Shtetet e Bashkuara dhe partnerët e shohin dialogun e lehtësuar nga BE si më të mirën dhe si të vetmen mënyrë për të avancuar dhe arritur integrimin e plotë evropian dhe paqe e prosperitet të qëndrueshëm në rajon.

    E siç tha ai, zbatimi i marrëveshjes së bazike dhe aneksit të saj nga të dyja palët, mbetet pritshmëri e ShBA-së.

    “Ne po përpiqemi të mbështesim secilin vend këtu për t’u transformuar, për t’u bërë një kontribues i sigurisë dhe jo një burim problemesh dhe destabiliteti. Kjo do të thotë se do të vazhdoni të shihni mbështetjen e plotë amerikane për dialogun e lehtësuar nga BE. ShBA ka besim të plotë në Bashkimin Evropian, në lehtësimin e saj të dialogut, dhe se ShBA ka besim të plotë te përfaqësuesi i Lartë Borrell dhe përfaqësuesi Special i BE-së, Lajçak, si zbatues objektivë të kësaj politike. Dhe, këtu nuk dua të flas me fjalë. Është e rëndësishme për të gjithë akterët në këtë proces, të pranojnë procesin në të cilin janë dhe të luajnë ‘poker’ me letrat që u janë shpërndarë. Dhe për të mbajtur parasysh këtë vizion që punon drejt marrëdhënies së normalizimit, duke punuar drejt zbatimit komplet dhe të plotë të [marrëveshjes së] Ohrit dhe aneksit të zbatimit të saj nga të dyja palët që është pritshmëria jonë, zbatimi i plotë nga të gjithë, është rruga përpara, e sjell Kosovën shumë më afër këtij vizioni që ne ndajmë për integrim të plotë në strukturat evropiane dhe euroatlantike”, tha Hovenier, dy ditë pasi kryeministri i Kosovës, Albin Kurti, drejtoi akuza ndaj Lajçakut, që e cilësoi si ndërmjetësues të njëanshëm.

    Ai theksoi se ShBA-ja dhe vendet transatlantike e mbështesin paqen dhe angazhohen për të, sikurse bën në Bosnje dhe në Kosovë, porse shtoi se njerëzit e rajonit duhet të jenë udhëheqës në avancimin e vziionit të tyre.

    “Unë kam qenë dëshmitar i dorës së parë i fuqisë, kapacitetit të aleancave transatlantike dhe strukturave evropiane dhe partneriteteve që ne ndërtuam së bashku kur mobilizuam forcat tona për t’i dhënë fund spastrimit etnik apo dhunës në Bosnje apo këtu në Kosovë. Herë pas here, pa pushim, Aleancat Translatike, angazhimi diplomatik, veprimet e NATO-s, aktiviteti dhe vendimet e BE-së janë dëshmuar në elementë thelbësorë dhe të rëndësisë kritike të angazhimit të diplomacisë dhe sigurisë në ndjekjen e paqes. Por ne nuk mund ta arrijmë këtë, ne mund ta mbështesim atë, ne mund ta lehtësojmë atë, por njerëzit e rajonit duhet të jenë udhëheqës në shikimin dhe avancimin e vizionit të tyre dhe ne jemi të gatshëm të qëndrojmë plotësisht në mbështetje të një vendi të fuqishëm dhe kuptimplotë”, tha Hovenier.

    Ambasadori amerikan theksoi se e ardhmja e Ballkanit Perëndimor mbetet në institucionet evropiane dhe transatlantike.

    “Procesi zyrtar i anëtarësimit në BE është duke u zhvilluar për Shqipërinë, Malin e Zi, Maqedoninë e Veriut dhe Serbinë. Këto janë ndryshime. Dhe ndërsa sfida kryesore aktuale për arritjen e këtij vizioni të një Evrope krejtësisht të lirë dhe në paqe, që përfshin Ballkanin Perëndimor në opinionet tona, padyshim që lufta brutale e gjithanshme që Putin po bën tani për Ukrainën, siç e thashë tashmë në fjalim, Ballkani Perëndimor mbetet një element thelbësor, jo vetëm kritik, por absolutisht thelbësor i vizionit. Evropa nuk është e tërë pa Ballkanin Perëndimor, duhet të jemi të qartë. Pra, ndërsa ky rajon është qartësisht pjesë qendrore e Evropës, sot jam po aq i sigurt sa kam qenë ndonjëherë se e ardhmja e Ballkanit Perëndimor mbetet në institucionet evropiane dhe transatlantike”, vijoi ai.

    Edhe pse sfidat e sigurisë dhe politike sot nuk ndihen si në epokën e Millosheviqit, Hovenier theksoi se një dështim për të arritur marrëdhënie të normalizuara mes Kosovës dhe Serbisë është dhe mbetet pengesë e madhe për avancimin e rajonit.

    “Qëllimi i SHBA-së mbetet shumë, shumë i qartë, kjo marrëveshje aktuale, kjo përpjekje për të avancuar marrëdhëniet e normalizuara është një hap i përkohshëm drejt një qëllimi eventual të njohjes reciproke mes këtyre dy vendeve, kjo duhet të ndodhë, nuk mund të keni paqe të qëndrueshme pa të. Por një dështim për të avancuar, një dështim për të arritur marrëdhënie të normalizuara është dhe mbetet një pengesë e madhe për avancimin e këtij rajoni në institucionet evropiane dhe euroatlantike me të gjitha pasojat shoqëruese, jo vetëm për Kosovën dhe Serbinë, por për rajonin.

    Ambasadori amerikan u shpreh se janë duke punuar shumë për të ndihmuar Kosovën dhe Serbinë, që të kenë të ardhme të qëndrueshme dhe të begatë. Sipas tij, ShBA-ja pret që ta sheh Kosovën “të zërë vendin e saj të merituar, si një vend i mesëm i vogël i Ballkanit Perëndimor, vend që njihet nga i gjithë komuniteti ndërkombëtar për atë që është, një shtet plotësisht i pavarur dhe sovran, kjo është e padiskutueshme.”

  • ​Gjuha e urrejtjes në rritje, Konjufca: Politikanët nuk janë shembull i mirë

    ​Gjuha e urrejtjes në rritje, Konjufca: Politikanët nuk janë shembull i mirë

    Politikanët nuk kanë arritur të jenë shembull i mirë i luftimit të gjuhës së urrejtjes, tha kryeparlamentari Glauk Konjufca. Sipas tij, përgjegjësia bie mbi secilin përfaqësues politik që ta dënojë gjuhën e urrejtjes. Konjufca deklaroi se Kuvendi është në procedurën e hartimit të Kodit të Etikës, e cila sipas tij do të ndihmojë për krijimin e praktikave demokratike të komunikimit. Kështu tha ai në konferencën “Gjuha e urrejtjes në diskursin publik”, ku mes tjerash u nënvizua se gjuha e urrejtjes në Kosovë është në rritje.

    Konjufca tha se gjuha e urrejtjes është një fenomen global, i cili po sfidon në çdo shtet të botës.

    “Fatkeqësisht, ekzistojnë raste të shumta kur edhe politikanët nuk kanë arritur të jenë shembull i mirë i luftimit të gjuhës së urrejtjes në diskursin publik dhe ta ofrojnë atë shembull, atë model që duhet dhe kjo është një model i cili promovon një gjuhë që promovon veçoritë e secilit individ, vlerat e tij, e sidomos të grupeve shoqërore, grupeve etnike, të grupeve identitare të ndryshme racore, fetare, seksuale e kështu me radhë. Një prej formave më të shprehura e dekurajimit për përfshirjen publike dhe politike, sidomos në grupet më të cenueshme shoqërore, pra është gjuha e urrejtjes. Konsiderohet që përgjegjësia bie mbi secilin përfaqësues politik që jo vetëm ta dënojmë gjuhën dhe e cila nxit urrejtje, por edhe të ftojmë mbështetësit dhe qytetarët për tolerancë dhe mirëkuptim, pavarësisht dallimeve që i kemi”, deklaroi Konjufca.

    Pavarësisht legjislacionit, kryeparlamentari shtoi se përvoja e deritashme ka dëshmuar nevojën për përforcimin e mekanizmave.

    “Kuvendi i Kosovës është në procedurën e hartimit të Kodit të Etikës, ne ende si Kuvend nuk e kemi Kodin e Etikës. Jemi duke e përpiluar atë. Dhe kjo ma merr mendja që më shumë do të ndihmojë përfaqësuesve të popullit për krijimin e praktikave demokratike të komunikimit. Dhe që ato të jenë më të kontrolluara, më të standardizuara dhe që të mos lejojmë përdorimin e shprehjeve të tilla, të cilat më vjen keq do të mund t’i keni dëgjuar edhe në Parlamentin e Kosovës”, u shpreh ai.

    Shefi i Zyrës së BE-së në Kosovë, Tomas Szunyog tha se gjuha e urrejtjes i prek më së shumti grupet e ndjeshme dhe se ky fenomen është i njëjtë me terrorizmin.

    “Për BE-në gjuha e urrejtjes dhe krimi i urrejtjes janë krime serioze sepse ndikojnë shumë në të drejtat fondamentale të individëve, të shoqërisë në përgjithësi dhe minojnë edhe vet themelin e shoqërisë tonë. Komisioni ka përfshirë edhe gjuhën e urrejtjes dhe krimin e urrejtjes në zgjerimin e krimeve të BE-së dhe që nga 2021 në dhjetor, gjuha e urrejtjes dhe krimi i urrejtjes do të jenë në të njëjtën grup të krimeve sikurse edhe terrorizmi, trafikimi me qenie njerëzore, drogat e paligjshme, trafikimi i armëve e kështu me radhë. Gjuha e urrejtjes i prek më së shumti ata më të ndjeshmit, komunitetin LGBTI, rom, ashkali, egjiptas dhe komunitetet tjera joshumicë, si dhe vajzat, gratë nga të gjitha komunitetet, persona me pa aftësi dhe çfarëdo grupi tjetër që ndihet sikur në disavantazh apo i margjinalizuar”, u shpreh Szunyog.

    Sipas tij, raportet rregullative të Kosovës kanë ndërmarrë masat e duhura për të adresuar gjuhën e urrejtjes.

    Me këtë rast, kryetari Glauk Konjufca ka përmendur edhe rastet kur është hasur gjuhë e urrejtjes në librat shkollor, për çka tha se janë dëshmi që nuk ka pasur kontroll e as cilësi para se të njëjtat të publikohen.

    Për këtë foli edhe Avokati i Popullit, Naim Qelaj ku tha se janë analizuar 47 teksteve shkollore, ku është vërejtur në masë të madhe gjuha e urrejtjes.

    “Nëse i referohemi një analize të thjesht të diskursit të komunikimit publik sot në vendin tonë, unë mund të konstatoj se gjuha e urrejtjes në baza diskriminuese ndaj grave, personave LGBTI është në rritje dhe kjo kryesisht mbi bazën e seksit, gjinisë, identitetit gjinor të tyre. E kjo rritje vërehet dukshëm siç u tha edhe nga kryetari i Kuvendit, në rrjete sociale, si platforma që lehtësojnë qasjen gjithëpërfshirëse të secilit dhe mundësinë të lehtë për të shprehur, pamenduar për pasojat që mund t’i ketë ajo që komentojnë në këto platforma”, tha Qelaj.

    Tutje, ai theksoi se janë në fazën përfundimtare të analizimit të gjuhës në diskursin publik, ku siç tha ai, është vërejtur gjuhë e urrejtjes nga deputetët në debatet parlamentare për Kodin Civil.

    E drejtoresha e Nismës së të Rinjve për të Drejtat e Njeriut “YIHR”, Marigona Shabiu tha se qytetarët janë vazhdimisht dëshmitarë të një kulture fyese të debatit në Kuvend.

    “Një gjuhë e tillë është kërcënim për vet demokracinë dhe të drejtat e njeriut. Historia ka treguar që gjuha e urrejtjes është një akt në serinë e akteve që shpesh herë rezulton në krime më të madh të urrejtjes dhe si e tillë përbën rrezik për çdo shoqëri dhe qytetar. Rrezikshmëria e gjuhës së urrejtjes si një akt shumëfishohet kur ajo instrumentalizohet dhe përdoret nga vetë zyrtarët e liderët shtetëror, që bartin pushtet institucional. Fatkeqësisht ne jemi dëshmitar të këtij fenomeni në vazhdimësi në Kosovë. Fillojmë me Kuvendin e Republikës së Kosovës, në këtë institucion që supozohet të jetë forum për promovimin e barazisë, lirisë së gjithëpërfshirjes, kemi dëgjuar të përdoret gjuhë e urrejtjes si diskriminuese, ashtu edhe pezhorative ndaj komuniteteve dhe individëve më të cenueshëm të shoqërisë tonë”, përfundoi ajo.

    Edhe Shabiu ka përmendur seancën e 16 marsit ku është debatuar për Kodin Civil, ku tha se ka krijuar ndjenjë të frikës dhe pasigurisë për komunitetin LGBTI.Sipas saj, personat e njëjtë nuk po ndëshkohen dhe vazhdojnë të mbajnë pozita. /KP

  • “Gjuha e urrejtjes në diskursin publik”, Szunyog: Hyn në të njëjtin grup me terrorizmin

    “Gjuha e urrejtjes në diskursin publik”, Szunyog: Hyn në të njëjtin grup me terrorizmin

    Është mbajtur konferenca e nivelit të lartë me për “gjuhën e urrejtjes në diskursin publik”, ku shefi i BE-së në Kosovë, Tomas Szunyog, tha se çfarëdo lloji i urrejtjes është e papërputhshme me vlerat themelore të Bashkimit Evropian.

    Szunyog tha se për BE-në, gjuha e urrejtjes është krim serioz, pasi sipas tij, ndikon shumë në të drejtat fundamentale të individëve, shoqërisë dhe e minojnë vetë themelin e shoqërisë kosovare.

    “Komisioni ka përfshirë gjuhën e urrejtjes në zgjerimin e krimeve të BE-së dhe që nga 2021-ta, gjuha e urrejtjes dhe kthimi i urrejtjes do të jenë në të njëjtin grup të krimeve sikurse terrorizmi, trafikimi me qenie njerëzore, trafikimi i armëve e kështu me radhë”.

    “Gjuha e urrejtjes i prek ata më të ndjeshmit, komunitetin LGBTQ+, romët, ashkalinjë, egjiptianë dhe komunitetet e tjera joshumicë, vajzat, gratë nga të gjitha komunitetet, personat me aftësi të kufizuara dhe të gjitha grupet e tjera që ndihen sikurse është në disavantazh apo i margjinalizuar me pjesën tjetër të shoqërisë”, tha Szunyog, njofton Klankosova.tv.

    Më tej, ai tha se raportet rregullative të Kosovës kanë ndërmarrë masat e duhura për ta adresuar gjuhen e urrejtjes në Kosovë, teksa bëri ftesë që e njëjta të bëhet edhe në raportet e tjera vjetore.

  • Specialja refuzon 9 kërkesa për statusin e viktimave pjesëmarrëse në çështjen Thaҫi dhe të tjerët

    Specialja refuzon 9 kërkesa për statusin e viktimave pjesëmarrëse në çështjen Thaҫi dhe të tjerët

    Dhomat e Specializuara të Kosovës (DhSK) në Hagë, i kanë refuzuar si të parakohshme nëntë kërkesa për statusin e viktimave pjesëmarrëse në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.

    Kjo është bërë e ditur nga faqja zyrtare e DhSK-së, në të cilin njoftim thuhet se trupi gjykues ka marrë këtë vendim më 19 shtator, raporton ‘‘Betimi për Drejtësi’’.

    E gjithë kjo, me arsyetimin se afati kohor për dorëzimin e këtyre kërkesave ka skaduar më 15 shkurt.

    “Trupi gjykues refuzoi të merrte në konsideratë bazueshmërinë e këtyre kërkesave pasi afati kohor për dorëzimin e tyre në këtë çështje skadoi më 15 shkurt dhe nuk ishte treguar asnjë arsye e pranueshme për t’i konsideruar ato si të vlefshme siç parashihet në Rregullën 9 (5) (b)”, thuhet në njoftim.

    Megjithatë, po në këtë njoftim thuhet se trupi gjykues vuri në dukje se Zyra për Pjesëmarrjen e Viktimave mund të ridorëzojë raportin me disa informacione shtesë.

    Vendimin e plotë në gjuhën angleze mund ta gjeni: KËTU.

    Ndryshe, së fundmi është pranuar një viktimë tjetër që të marrë pjesë në proces gjyqësor, ku deri më tash numri total i viktimave në këtë çështje ka arritur 141.

    Ndryshe, gjatë muajit prill ka filluar gjykimi derisa në seancën e 3 prillit, Zyra e Prokurorit të Specializuar (ZPS) dhe mbrojtësi i viktimave kanë paraqitur deklarimet hyrëse dhe pas leximit të aktakuzës së ndryshuar nga ana e ZPS-së, ish-presidenti Hashim Thaçi, ish-kryeparlamentarët Kadri Veseli dhe Jakup Krasniqi, si dhe ish-deputeti Rexhep Selimi, u deklaruan të pafajshëm për veprat penale që iu vihen barrë.

    Më 4 prill mbrojtja e Thaçit, Veselit dhe Selimit kanë dhënë fjalën hyrëse derisa më 5 prill mbrojtja e Krasniqit ka dhënë fjalën hyrëse.

    Më 11 prill ka filluar paraqitja e provave të Prokurorisë ku dëshmitarja e parë e mbrojtur e Prokurorisë, ka dhënë dëshminë e saj më 11 prill, 12 prill, 13 prill dhe më 17 prill.

    Më 17 prill ka filluar dëgjimi i dëshmitarit të dytë, po ashtu i mbrojtur, i cili ka vazhduar dhënien e dëshmisë edhe më 18 prill, 19 prill dhe 20 prill, ku ka përfunduar dhënien e dëshmisë edhe dëshmitari i tretë, kurse më 10 maj ka filluar dhënien e dëshmisë dëshmitari i katërt, dëshmia e të cilit përfundoi më 17 maj.

    Tutje, dëshmitari i pestë ka filluar dëshminë më 17 maj dhe e përfundoi më 22 maj, ku filloi dëshminë dëshmitari i gjashtë i cili përfundoi dëshminë më 23 maj, në të njëjtën ditë me dëshmitarin e shtatë.

    Kurse, më 12 qershor ka filluar dëshminë e tij dëshmitari i tetë, i cili përfundoi dëshminë e tij më 14 qershor, ndërkaq me 15 qershor ka përfunduar dëshmia e dëshmitarit i nëntë.

    Më 19 qershor ka përfunduar dëshminë dëshmitari i dhjetë, në ditën ku ka filluar dëshminë dëshmitari i 11-të i cili e ka përfunduar dëshminë e tij më 20 qershor. E më 10 korrik ka filluar dëshminë dëshmitari i 12-të, i cili ka përfunduar dëshminë më 11 korrik, në seancën ku ka filluar dëshminë Rrustem Mustafa, ish-komandat i zonës operative të Llapit.

    Mustafa ka vazhduar dhënien e dëshminë së tij në seancën e 12, 13, 14, 17 dhe 18 korrikut.

    Ndërsa dëshmitari i 14-të me radhë, Francis Ladwidge, oficeri britanez që shërbeu në Kosovë filloi dëshminë po më 18 korrik dhe e mbaroi më 19 korrik, ku nisi dëshminë dëshmitari i 15-të, i cili e përfundoi më 20 korrik.

    Kurse, më 14 gusht filloi dhënien e dëshmisë dëshmitari i 16-të, e që e përfundoi më 16 gusht dhe më 17 gusht përfundoi dëshminë dëshmitarja e 17, Dragica Bozhaniq.

    E dëshmia e dëshmitarit të 18-të ka filluar më 28 gusht dhe ka mbaruar më 29 gusht, në ditën kur filloi dëshminë dëshmitari i 19-të, i cili përfundoi dëshminë më 30 gusht.

    Më 4 shtator përfundoi në të njëjtën ditë dëshminë dëshmitari i 20-të, kurse pa masa mbrojtëse, dëshmitari i 21-të, Agim Idrizi filloi të dëshmojë, i cili përfundoi dëshminë më 5 shtator, ku edhe filloi dëshmia e zyrtarit nga organizata ndërkombëtare “Human Rights Watch”, të Frederick Abrahams, i cili përfundoi më 11 shtator.

    Më 11 shtator ka përfunduar edhe dëshmia e dëshmitarit të 23-të, ndërkaq më 12 shtator ka filluar të dëshmojë dëshmitari i 24-të.

    Në të njëjtën ditë ka filluar dëshminë dëshmitari i 25-të Douglas Young, ish-oficer i ushtrisë britanike, i cili ka përfunduar dëshminë më 14 shtator.

    Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

    Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

    Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

    Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020

  • Hovenier rikonfirmon mbështetjen e ShBA-së ndaj BE-së si ndërmjetësuese e dialogut

    Hovenier rikonfirmon mbështetjen e ShBA-së ndaj BE-së si ndërmjetësuese e dialogut

    Ambasadori i ShBA-së në Kosovë, Jeffrey Hovenier ka kërkuar zbatimin e marrëveshjes së Brukselit dhe Ohrit.

    Në samitin e Paqes dhe Demoracisë(KDPS), Hovenier tha se vetëm normalizimi i marrëdhënieve Kosovë-Serbi i sjell dy vendet më pranë institucioneve trans-atlantike.

    Ai nënvizoi edhe mbështetjen që e ka ShBA ndaj Bashkimit Evropian si ndërmjetësues të dialogut.

  • Çanak: Serbia po tolerohet që të mos drejtohet kah Rusia

    Çanak: Serbia po tolerohet që të mos drejtohet kah Rusia

    Ish-kryetari i Lidhjes Socialdemokrate të Vojvodinës, Nenad Çanak, në emisionin CONTEXT në ATV, tha se zvarritja e gjetjes së një zgjidhje mes Serbisë dhe Kosovës po ndodh për shkak se nuk po sanksionohet ai që po e saboton zgjidhjen.

    “Mësimi i parë në Fakultetin Juridik thotë, fjalia e parë e së Drejtës Romake: ‘nuk ka drejtësi pa sanksione’. Atëherë nuk munden të keni shtet ligjor nëse pas saj nuk qëndrojnë të sanksionuarit të cilët nuk e respektojnë të drejtën. Tani doni sikur të ndihmonit në zgjidhje të mosmarrëveshjes në mes të Kosovës dhe Serbisë e njëkohësisht nuk po e sanksiononi atë që po e saboton zgjidhjen”, tha Çanak.

    Ai tha se në Serbi ka baza të fuqishme të agjenturave ruse dhe për shkak që ky shtet të mos rrëshqasë në konceptin e një shteti “Proxy” si Bjellorosua, po tolerohet nga bashkësia ndërkombëtare.

    Për këtë, sipas tij, çmimin po e paguan Kosova.

    “Aktualisht për shkak të ndikimit rus në Serbi dhe Bosnjë e Hercegovinën verilindore, me qëllim nuk e përmendi Republikën Srpska por them Bosnje sepse Vojvodinën e quajnë Serbia veriore dhe kështu përpiqem t’u tregojë se sa bizare është kjo sidoqoftë, aty ka baza të fuqishme të agjenturave ruse e pastaj tani që Serbia të mos rrëshqiste në konceptin e një shteti ‘proxy’ si Bjellorusia, Serbia tolerohet sepse nëse u bëjmë presion do të drejtohen kah Rusia. Dhe kush e paguan çmimin? Po dikush tjetër e kush është ai dikush tjetër? Në këtë rast Kosova. Shumë e thjesht, personalisht mendoj se nëse do të donin vërtet zgjidhje si njohja e ndërsjellë, njohja de facto, por hajde t’i normalizojmë raportet që mos të turpërohemi me stikerë në targa sepse askush fundja nuk e di se çfarë shkruan nën stikerë, kinse askush në Prishtinë nuk e di që jemi nga Serbia por kemi stiker në targë, këto janë gjëra vërtet fëmijërore dhe nga jashtë duket ashtu”, tha Çanak./atvlive.tv

    Intervistën e plotë e gjeni në videon më poshtë:

  • Poeti Lulzim Tafa mysafir nderi në Kongresin Botëror të Poetëve, mbahet në një anije gjigante

    Poeti Lulzim Tafa mysafir nderi në Kongresin Botëror të Poetëve, mbahet në një anije gjigante

    Poeti i njohur kosovar, Lulzim Tafa do të jetë i ftuar si mysafir nderi në Kongresin Botëror të Poetëve.

    Ky kongres, i 42-ti me radhë, sivjet për herë të parë mbahet në një anije gjigante dhe do të marrin pjesë poetë nga mbarë bota.

    Kongresi do nisë në Romë-Itali dhe do të lëvizë bashkë me vargjet e poetëve nëpër ujërat e Mesdheut, në Maltë, në Greqi dhe përsëri do të kthehet në Itali.

    “Poezia mbi ujë”, shprehet poeti Lulzim Tafa teksa tregon që është i lumtur që do të jetë pjesë e kësaj eksperience e njëkohësisht për faktin që në këtë kongres do të jetë prezente edhe letërsia shqipe.

    “Jam i lumtur që do t’i takoj shumë nga miqtë e mi poetë nga të gjitha anët e globit, po ashtu jam i lumtur që në këtë kongres do të jetë prezente edhe letërsia jonë”, shprehet Tafa.

    Kongresi Botëror i Poetëve do të mbahet më datë 22 deri më 29 shtator.

  • ​Ligjit për zyrtarët publikë, Presidenca: Ndryshimi i neneve, përgjegjësi e Kuvendit

    ​Ligjit për zyrtarët publikë, Presidenca: Ndryshimi i neneve, përgjegjësi e Kuvendit

    Një ditë më parë Partia Demokratike e Kosovës ka kritikuar presidenten e vendit, Vjosa Osmani për dekretimin e Ligjit për zyrtarët publikë, pasi Gjykata Kushtetuese kishte kontestuar disa nene të këtij ligji.

    Lidhur me këtë Bekim Kupina, këshilltar për media i presidentes ka thënë se sa i përket pastrimit të Ligjit për zyrtarët publikë duhet adresuar Kuvendit të Kosovës.

    “Sa i përket pastrimit të Ligjit për Zyrtarë Publik, ju ftojmë që për këtë t’i adresoheni Kuvendit të Kosovës si autoritet që ka pasur përgjegjësinë kushtetuese dhe ligjore për ta pastruar ligjin nga nenet e kontestuara”, ka thënë ai.

    Ai ka thënë se përgatitja e tekstit konform aktgjykimit të gjykatës kushtetutese, është detyrë dhe përgjegjësi e Kuvendit (komisionit funksional) dhe jo e presidentes.

    “Edhe aktgjykimi i Gjykatës Kushtetuese, edhe rregullorja e Kuvendit (Neni 91, para 2 i Rrregullores), përcaktojnë një përgjegjësi të tillë. Sipas rregullores, nëse Gjykata Kushtetuese shfuqizon ndonjë nen të aktit para hyrjes në fuqi të të njëjtit, kryetari i Kuvendit kërkon nga komisioni funksional që në përputhje me Vendimin e Gjykatës Kushtetuese ta përgatisë tekstin e aktit për shpallje nga Presidenti. Pra, përgatitja e tekstit konform aktgjykimit të gjykatës kushtetutese, është detyrë dhe përgjegjësi e Kuvendit (komisionit funksional) dhe jo e Presidentes. Presidentja nuk ka kompetencë të ndërhyjë në përgatitjen apo përshtatjen e ligjit me aktgjykimin e gjykatës. Nese ka ndodhur ndonjë gabim teknik në procesin e përgatitjes së Ligjit nga ana e Kuvendit, Presidentja do të kërkojë nga Kuvendi që urgjentisht të rregullohet ky lëshim në përputhje me praktikat ekzistuese të së kaluarës kur ka pasur lëshime teknike”, vijoi ai.

  • Shqipëria kryeson sot Këshillin e Sigurimit në OKB, Rama drejton debatin

    Shqipëria kryeson sot Këshillin e Sigurimit në OKB, Rama drejton debatin

    Shqipëria kryeson sot Debatin e Hapur të Nivelit të Lartë të Këshillit të Sigurimit në Kombet e Bashkuara.

    Debati i hapur në Këshillin e Sigurimit, i cili do të drejtohet nga Kryeministri Edi Rama, do të ketë në fokus temat e sigurisë, paqes dhe luftës në Ukrainë.

    Debatin e hapur, kryeministri Rama do e drejtojë në krah të Sekretarit të Përgjithshëm të OKB-së, Antonio Guterres, dhe presidentit amerikan, Xho Bajden (o. Joe Biden).

    Po ashtu, gjatë kësaj të mërkure,kreu i qeverisë shqiptare do të takohet dhe me Presidentin ukrainas Volodymyr Zelenski (Zelensky), me të cilin do të nënshkruajë dhe një deklaratë.

    Një ditë para mbajtjes së debatit të hapur, kryeministri Rama dha një videomesazh nga Nju Jorku (Neë York) ku bëri me dije se Shqipëria do të vërë theksin te nevoja për një veprim efektiv shumëpalësh, si metoda më e mirë, sipas tij, për zgjidhjen e problemeve të përbashkëta, sidomos të paqes e sigurisë.

    Sakaq, të pranishëm në javën e nivelit të lartë të sesionit të 78-të të OKB, ka qenë Ministri i Jashtëm, Igli Hasani dhe Presidenti Bajram Begaj.

    Ky i fundit ka mbajtur dhe një fjalë në takimin e nivelit të lartë, ku theksoi se zhvillimi i qëndrueshëm “është garancia më e fortë për një botë të karakterizuar nga paqja e stabiliteti”.

    Po ashtu, kreu i shtetit shqiuptar ka zhvilluar një sërë takimet me personalitete të larta të shteteve apo qeverive në botë.

    Begaj u takua gjithashtu edhe me Përfaqësuesin e Lartë dhe njëherazi zv.presidentin e Komisionit Evropian, Xhosep Borel (Josep Borrell).

    Gjatë takimit, Begaj ka falënderuar Borel për mbështetjen dhe vëmendjen e treguar për rajonin e Ballkanit Perëndimor dhe veçanërisht, për hapjen e negociatave me Shqipërinë. Kreu i shteti ka theksuar se një perspektivë e qartë evropiane e rajonit është garanci për sigurinë dhe të ardhmen e tij.

  • Bashkimi Evropian i vlerësoi “pretendime të pabazuara” akuzat e kryeministrit Kurti ndaj Lajçakut

    Bashkimi Evropian i vlerësoi “pretendime të pabazuara” akuzat e kryeministrit Kurti ndaj Lajçakut

    Përgatiti: Fatlum Jashari

    Përkundër akuzave nga kryeministri i Kosovës, Albin Kurti, për anim dhe veprim të bashkërenduar me Serbinë, Bashkimi Evropian shprehu mbështetje të plotë për dy përfaqësuesit e saj në procesin e dialogut, Josep Borrell dhe Mirolav Lajçak.

    Krahas një deklarate të lëshuar në mëngjes, BE-ja kërkoi angazhim në mirëbesim dhe ruajtje të parimit të konfidencialitetit nga të dyja palët.

    “Para së gjithash, lidhur me komentet nga zotëri Kurti, ne nuk komentojmë komentet e të tjerëve, veçanërisht kur ato përmbajnë pretendime të pabaza. Mendoj se vendet anëtare të BE-së e kanë bërë të qartë se mbështesin plotësisht Përfaqësuesin e Posaçëm, Miroslav Lajçak, e po ashtu edhe Përfaqësuesin e Lartë në rolin e tij si lehtësues i dialogut Beograd – Prishtinë”, tha zëdhënësi i BE-së për Politikë të Jashtme, Peter Stano.

    Duke i vlerësuar të pamjaftueshme veprimet nga Kosova dhe duke konstatuar se nuk janë përmbushur kërkesat për heqjen e masave, BE-ja nuk përjashtoi shtimin e tyre apo vendosjen e tyre për Serbinë.

    Pasi vlerësoi se dialogu është në një fazë bllokade, opinionisti Bekim Kabashi theksoi se akuzat nga kryeministri janë formë presioni për të fituar më shumë në proces, jo për ta larguar ndërmjetësin.

    “Tash, duhet të ketë veprime nga ana e bashkësisë ndërkombëtare, pra duhet të presim se si të operojnë ata, duhet të gjendet një metodë, të vazhdohet me shuttle-diplomacy apo ndonjë formë tjetër të ngjashme, dhe të sillen palët sërish në dialog dhe të procedohet tutje”, tha Kabashi.

    Teksa konstatoi se asnjëra palë nuk dëshiron zbatimin e marrëveshjes bazë dhe shtojcës, Kabashi tha se Serbia po përfiton nga veprimet e Kosovës.

    “Të dy palët nuk janë të interesuara për ta implementuar marrëveshjen, por meqë veprimet po i bën pala kosovare, po i merr edhe ndëshkimet nga BE-ja. Në anën tjetër, Serbia, presidenti Vucic, po është pozicion më komod”, tha Kabashi.

    Krahas vlerësimit se akuzat për anim nuk priten mirë nga faktori ndërkombëtar, opinionisti Fitim Mulolli theksoi se “kryeministri Kurti po dështon ta kuptojë ose po e injoron faktin se ShBA-ja është unike me BE-në, në procesin e dialogut”.

    “Nga të gjitha këto, përfitues është presidenti Vucic, sepse dialogu po stërzgjatet, veriu po mbetet si çështje e pazgjidhur – që është narrativë e tyre. Shqiptarët, sipas Vucicit, po tregojnë që s’dinë me menaxhu, që nuk dinë me i respektu pakicat e kështu me radhë. Me apo pa vetëdije, po ndihmohet kjo narrativë e Vucicit, e cila është shumë e rrezikshme për Republikën e Kosovës”, tha Mulolli.

    Referuar takimeve të 14 Shtatorit në Bruksel, kryeministri Albin Kurti dhe zëvendësi i tij, Besnik Bislimi, akuzuan emisarin Miroslav Lajçak për anim dhe bashkërendim të veprimeve me presidentin e Serbisë, në dëm të Kosovës.