Tag: Ballina

Përgatiti: Armand Hoti

Dyert janë të hapura. Komuna paralele e Prishtinës në Graqanicë, po vazhdon punën normalisht.

Stafi i punësuar këtu, nuk pranoi të flasë për televizionin. Por, një nëpunës i kësaj komune, jo-zyrtarisht tregoi për ATV-në disa nga shërbimet që ofron kjo komunë.

“Ofiqari punon, vërtetime, fotokopje të gjitha punojnë. Kemi drejtori, lëshojmë subvecione. E gjitha financohet nga Serbia. Marrim pagë rreth 550 euro”, thuhet në përgjigjen e nëpunësit të kësaj komune.

Mirëpo, komuna paralele e Prishtinës në Graqanicë, sipas të dhënave zyrtare të autoriteteve serbe, është vetëm njëra nga mbi 20 komunat paralele që operojnë në territorin e Republikës së Kosovës, që nga paslufta.

Politologu Fidan Ukaj, thotë këto institucione paralele cenojnë integritetin e shtetit të Kosovës.

“Këto institucione padyshim se janë të jashtë-ligjshme. Me një fjalë këto institucione duhet të mbyllen dhe nuk duhet të ekzistojnë më”, tha Ukaj.

Duke iu referuar marrëveshjes së vitit 2013 mes Kosovës dhe Serbisë, Ukaj thotë se këto institucione do duhej të inkuadroheshin në kuadër të institucioneve e Kosovës.

“Edhe pse me marrëveshjen për normalizimin e raporteve të vitit 2013, parashihet inkuadrimi i tyre në institucionet e Kosovës, Serbia vazhdon me këtë destruktivitet të saj, duke i mbajtur gjallë insitucionet paralele, duke lëshuar dokumentacion për komunitetin serb në Kosovë”, tha Ukaj.

As Bashkimi Evropian e as Qeveria e Kosovës, nuk iu kanë përgjigjur pyetjeve të ATV-së lidhur me këtë temë.

Kurse, profesori universitar Basri Muja thotë se pikërisht Bashkimi Evropian ka rol kyç për shuarjen e tyre.

“Të jem i sinqertë nuk mendoj që mundë të ketë një zhbërje vullnetare të tyre nga Qeveria e Serbisë, Qeveria e Kosovës duhet të ushtrojë presion tek bashkësia ndërkombëtare sepse çelësi është aty”, tha Muja.

Ndërsa në rast të themelimit të Asociacionit të Komunave me Shumicë Serbe, sipas profesorit Muja, institucionet paralele në Kosovë vetëm se do fuqizoheshin edhe më tepër.

Pos komunave, Serbia investon edhe në sistemin arsimor të Serbisë në Kosovë. Ndërsa njëjtë vepron edhe me sistemin e shëndetësisë, kulturës e të tjera.

Edicionin Qendror të lajmeve në ATV e gjeni në videon më poshtë:

Përgatiti: Driton Sadiku

Edhe një takim pa progres.

Kryeministri Albin Kurti e presidenti serb Aleksandër Vuqiq, assesi të merren vesh për çështjen e veriut, madje as me ndihmën e ndërmjetësuesve të Bashkimit Evropian për dialog.

Andaj mos-pajtimet mes palëve sipas njohësve të sigurisë, rrisin gjithmonë rrezikun për eskalim të situatës në veri të Kosovës.

Në anën tjetër nga Beogradi fajësojnë kryeministrin Albin Kurti se po nxit tensione.

Në një intervistë për mediat serbe, Ministri i Mbrojtjes së Serbisë, Millosh Vuçeviq tha se qëllimi i vetëm i Kurtit është që ta pastroj Kosovën nga serbët.

“Kurti është gati për çdo gjë. Shqiptarët vetëm duan të provokojnë konflikt dhe qëllimi i Kurtit është ta pastrojë Kosovën nga serbët”, ka thënë Vuçeviq.

Situata në veri aktualisht është e qetë derisa për sigurinë atje po përkujdeset KFOR-i.

Ndryshe së fundmi tensionet në veri nisën pasi kryetarët e ri të komunave, hynë në objektet zyrtare për ta ushtruar funksionin e tyre, gjë që u kundërshtua ashpër nga serbët.

Edicionin Qendror të lajmeve në ATV e gjeni në videon më poshtë:

Përgatiti: Pranvera Krasniqi

5 persona kanë vdekur një ditë më parë në Kosovë, si pasojë e aksidenteve rrugore.

Me fare pak diferencë kohore, bëhet fjalë për tri aksidentet më të rënda që ndodhën mbrëmë në Graçanicë, Pejë e Podujevë. Policia ka njoftuar gjithashtu se edhe 62 tjera u shënuan me lëndime te lehta trupore vetëm në 24 orët e fundit.

Në raportin e policisë thuhet se shkaktar kryesor i aksidenteve ishte mos përshtatja e vozitjes me kushtet e rrugës.

Por, sipas Bekim Ahmetit, ekspert në komunikacion, rritja e shqiptimit të gjobave në trafik mund të ndikoj në vetëdijesimin e vozitësve në parandalimin e aksidenteve.

“Ka raste ku po falin shumë Policia edhe mandej vozitësit nuk po jenë të përgjegjshëm as për nga shpejtësia as rruga as shenjat…”, tha Ahmeti.

Ahmeti për më tepër thotë se ka mundësi që aksidentet të parandalohen edhe nëse nuk ka ngecje nga institucionet përkatëse.

“Duhet ti rrisin masat për me i parandalu edhe me u shtu siguria…”, tha Ahmeti.

Lidhur me aksidentet e fundit që ndodhën në vend, përmes një postimi në Facebook, ka reaguar edhe Kryetari i Aleancës për Ardhmërinë e Kosovës, Ramush Haradinaj. Ai ka apeluar te çdo pjesëmarrës në komunikacion për kujdes të shtuar dhe respektim të rregullave.

Ndërkaq, gjatë gjithë vitit të kaluar, në Kosovë kanë ndodhur afër 21 mijë aksidente, ku 95 prej tyre ishin me fatalitet me gjithsej 106 persona të vdekur.

Edicionin Qendror të lajmeve në ATV e gjeni në videon më poshtë:

Presidentja e Kosovës, Vjosa Osmani, nga Nju Jorku, është deklaruar për takimet që do të ketë me liderët botëror dhe për pritjen zyrtare të organizuar nga presidenti i Shteteve të Bashkuara të Amerikës, Joe Biden.

Osmani, theksoi në pritjen zyrtare, do të ketë mundësi që ta falendërojë Bidenin për mbështetjen e vazhdueshme.

“Është shumë me rëndësi që do të kemi mundësi që të marrim pjesë në organizime bashkë me lider të tjerë botëror, takimet do të nisin pas gjysmë ore”.

“Mirëpo më e rëndësishmja do të jetë pritja e organizuar nga presidenti Biden, ku do të kem mundësi që ta falënderojë në emër të popullit të Republikës së Kosovës, për aleancën tonë të fuqishme dhe për mbështetjen e vazhdueshme të Shtetet e Bashkuara të Amerikës”, u shpreh Osmani.

Osmani theksoi se në takime me homologët e saj do të flasë për zhvillimet e fundit në Kosovë, sikurse edhe për synimet e Kosovës për krijimin e raporteve me shtetet anëtare të OKB-së dhe anëtarësim në organizata ndërkombëtare.

Ajo poashtu do të marrë pjesë edhe në aktivitete e diskutime të shumta të organizuara nga shtetet aleate.

Në agjendën e Presidentes Osmani do të jenë edhe një sërë aktivitetesh të përbashkëta me mërgatën shqiptare në Amerikë si dhe disa nga shoqatat të cilat e zhvillojnë aktivitet në SHBA.

Rritja e çmimit të karburanteve nuk ka të ndalur këto ditë në vendin tonë. Në tregun e Kosovës një litër naftë ka arritur deri në 1.56 euro ose 10 centë më shumë se një javë më parë. Këtë rritje të çmimeve të derivateve nuk e kanë mirëpritur qytetarët e hiç më pak edhe taksitë, derisa nga Shoqata e Naftëtarëve kjo ngritje arsyetohet me rritjen e çmimeve në bursë.

Qytetari nga Prishtina, Enver Mulani, tha se rritja e çmimit të naftës është e papërballueshme, derisa shton se çmimet janë ngritur e rrogat e punëtorëve në Kosovë janë të ulëta.

Po ashtu edhe Rexhep Latifi, i cili punon taksist, shprehet i shqetësuar me rritjen e çmimeve të karburanteve.

Sipas tij, me standardin e jetesës në Kosovë, çmimi i naftës nuk është aspak në rregull.

Qytetari Naser Sylejmani thotë se çmimet e naftës po rriten çdo ditë dhe shton se kjo po i kushton shumë në xhep.

Edhe kryetari i Shoqatës së Naftëtarëve, Fadil Berjani ka pranuar se këto ditë ka ngritje të çmimeve të karburanteve.

Sipas tij, çmimet janë përafërsisht për diesel 1.47 euro deri 1.55 euro për litër, ndërsa, benzina 1.46 euro deri 1.51 euro.

Ai në një përgjigje me shkrim thotë për KosovaPress se çmimi i naftës në Kosovë po rritet sipas çmimeve në bursa.

Ndërkaq, vendimi i fundit i Ministrisë së Industrisë, Ndërmarrësisë dhe Tregtisë për caktimin e çmimit dhe masave tjera mbrojtëse të produkteve të naftës duket se nuk po ndikon fare për uljen e çmimeve.

Përfundimi i rundit të fundit të dialogut Kosovë-Serbi, pa ndonjë pajtim mes palëve, ka ngritur pikëpyetje të reja për të ardhmen e procesit të ndërmjetësuar nga Bashkimi Evropian për normalizimin e marrëdhënieve mes dy vendeve. Takimi i 14 shtatorit mes kryeministrit të Kosovës, Albin Kurti dhe presidentit të Serbisë, Aleksandar Vuçiq, nën ndërmjetësimin e përfaqësuesve evropianë, Josep Borrell e Miroslav Lajçak, u mbyll pa ndonjë rezultat.

Zëdhënësi i BE-së, Peter Stano, tha në një konferencë për media, më 15 shtator, se “dialogu nuk ka dështuar”, por se takimi i fundit ndërmjet Kurtit dhe Vuçiqiq, i zhvilluar në Bruksel, “nuk ka dhënë rezultate”.

“Palët nuk janë në gjendje të tejkalojnë dallimet e tyre”, përfundoi Stano, duke theksuar se BE-ja është vetëm ndërmjetëse në dialog, dhe se përparimi në këtë proces varet nga Kosova dhe Serbia.

Në Aneksin për zbatimin e Marrëveshjes për normalizimin e marrëdhënieve mes dy palëve, ndër të tjera shkruhet se Kosova dhe Serbia do të përballen me pasoja, nëse nuk i përmbushin obligimet që dalin nga ujdia.

Këtë e ka konfirmuar edhe përfaqësuesi i lartë i BE-së për politikë të jashtme dhe siguri, Josep Borrell, i cili tha më 14 shtator se “pa normalizim nuk do të ketë të ardhme evropiane as për Kosovën, as për Serbinë”.

Cilët janë hapat e mëtejshëm?

Bashkimi Evropian ka paralajmëruar konsultime me vendet anëtare dhe me Shtetet e Bashkuara të Amerikës për hapat e ardhshëm pas bisedimeve të fundit të pasuksesshme ndërmjet Kosovës dhe Serbisë.

Burimet në BE nuk kanë saktësuar nëse po shqyrtohen masa ndaj Kosovës dhe Serbisë, por vetëm kanë thënë se masat e vendosura nga BE-ja ndaj Kosovës nuk do të hiqen, pasi nuk janë plotësuar kushtet për një gjë të tillë, raportoi REL.

Ndërkohë, SHBA-ja njoftoi, po ashtu, se do të “konsultohet brenda dhe me partnerët evropianë për hapat e mëtejshëm”.

“Presim që të dyja vendet t’i marrin seriozisht obligimet e tyre ndaj Marrëveshjes për normalizimin e marrëdhënieve, që kanë arritur më herët këtë vit. Koha po kalon”, thuhet në përgjigjen e Departamentit amerikan të Shtetit.

“Kurti krijoi realitet të ri në veri”

Dushan Janjiq, nga Forumi për marrëdhënie etnike në Beograd, e quan “lojë” deklaratën e zyrtarit të lartë të BE-së, Borrell, se bisedimet e 14 shtatorit ishin të pasuksesshme. Ai beson se kryeministri i Kosovës, Kurti, në të vërtetë pati suksesin më të madh.

Borrell akuzoi drejtpërdrejt Kurtin për dështimin e bisedimeve, sepse nuk pranoi një “propozim kompromisi” që të dyja palët të zbatonin paralelisht detyrimet e tyre.

“Çfarëdo që të thonë për Kurtin, ai është më i suksesshmi nga të gjithë bashkë. Ai krijoi një realitet të ri në veri të Kosovës”, thekson Janjiq, duke shtuar se kjo situatë sjell rreziqe për sigurinë.

Sipas tij, Prishtina dhe Beogradi nuk duhet as të diskutojnë për zbatimin e Aneksit të Marrëveshjes për normalizimin e marrëdhënieve, derisa serbët e veriut të mos kthehen në institucionet e Kosovës.

Nëntorin e kaluar, serbët nga veriu i Kosovës u larguan nga institucionet e Kosovës për të penguar qeverinë e Kurtit që të heqë targat e lëshuara nga autoritetet serbe për qytetet e Kosovës.

Ndërkohë, një krizë e re ndodhi në fund të majit, sepse pas zgjedhjeve të prillit, të cilat u bojkotuan nga popullata serbe, në pushtet erdhën kryetarët shqiptarë.

Çfarë thanë Kurti dhe Vuçiq pas takimit të pasuksesshëm?

Për kryeministrin e Kosovës, hapat e ardhshëm janë vazhdimi i bisedimeve për zbatimin e marrëveshjes në mënyrë “të sekuencuar”, përkatësisht, që të zbatohen pikat e marrëveshjes ashtu siç janë radhitur në Marrëveshjen për normalizimin e marrëdhënieve.

Kurti ka pohuar disa herë se Asociacioni i komunave me shumicë serbe nuk mund të jetë “parakusht” për zbatimin e marrëveshjes, dhe se çështja duhet të zgjidhet në kuadër të dhjetë pikave të Marrëveshjes bazë, të cilat të dyja palët i kanë pranuar në fund të shkurtit, me propozimin e BE-së.

“Për një gjë të tillë duhen negociata intensive, të cilat duhet të organizohen nga ndërmjetësit [BE-ja]. Shpresoj se së shpejti do të na ftojnë [në një rund të ri të dialogut]”, tha Kurti më 14 shtator.

Nga ana tjetër, presidenti i Serbisë, pas takimit të fundit në Bruksel, tha se nuk e di se cilat janë hapat e ardhshëm, por se “do të duhet gjithmonë të bisedojmë”.

„Nuk besoj që ky është fundi i botës. Jam i sigurt se do të dëgjojmë se kush është përgjegjës, është diçka që, thjeshtë, duhet të ndodhë. Por ajo që është e rëndësishme për ne, është se jam i sigurt se duhet të vazhdojmë bisedimet”, tha Vuçiq.

I pyetur nëse BE-ja ka përmendur ndonjë masë ndëshkuese, udhëheqësi serb dekari se këtë “nuk e dëshiron për popullatën shqiptare në Kosovë”.

Normalizimi i marrëdhënieve është kusht për Kosovën dhe Serbinë që të përparojnë në procesin e integrimit në Bashkimi Evropian.

Kosova ka aplikuar për anëtarësim në BE vitin e kaluar, ndërsa Serbia është vend kandidat nga viti 2012.

Qeveria e Kosovës dhe mazhoranca në Kuvend po akuzohen për miratim të ligjeve që janë në kundërshtim me Kushtetutën e vendit. Sipas Partisë Demokratike të Kosovës (PDK), ekzekutivi është shndërruar në shkelësin më të madh të Kushtetutës, ndërkaq në Institutin e Kosovës për Drejtësi (IKD), thonë se në përmbajtjen e ligjeve të sponsorizuara nga qeveria ka probleme serioze kushtetuese. Në anën tjetër, në partinë në pushtet kritikojnë opozitën se po përdorë mekanizmin e Gjykatës Kushtetuese për të bllokuar reformat që po i ndërmerr qeveria.

Shefi i grupit parlamentar të PDK-së, Abelard Tahiri, thotë për KosovaPress, se opozita po fiton çdo betejë me pushtetin në Gjykatën Kushtetuese.

Ai përmend rrëzimin e Ligjit për Këshillin Prokurorial dhe Ligjin për zyrtarët publikë, të cilët sipas tij, dëshmojnë padijeninë dhe dëmin e vazhdueshëm që qeveria po i bënë Kosovës.

Sipas tij, edhe Ligji për tatimin në pronë është antikushtetues dhe si i tillë do të rrëzohet nga ky institucion.

Ndërkaq, hulumtuesi në Institutin e Kosovës për Drejtësi (IKD), Naim Jakaj, thotë për KosovaPress, se kjo legjislaturë në Kuvend ka më së shumti ligje të dërguara në Gjykatën Kushtetuese.

Ai shton se Qeveria e Kosovës nuk është duke draftuar ligje në pajtim me Kushtetutën dhe standardet ndërkombëtare.

Por të kundërtën e thotë deputeti i LVV-së, Adnan Rrustemi, i cili njëherësh është edhe kryetar i Komisionit për legjislacion në Kuvend.

Ai kritikon partitë opozitare se po tentojnë përmes mekanizmit të Gjykatës Kushtetuese t’i bllokojnë reformat e iniciuara nga Qeveria Kurti.

Aktualisht në Gjykatën Kushtetuese janë duke u shqyrtuar Ligji për paga në sektorin publik, Ligji për Byronë shtetërore për verifikimin dhe konfiskimin e pasurisë së pajustifikueshme, Ligji për masat e përkohshme të produkteve themelore në raste të veçanta të destabilizimit në treg, Ligji për pagën minimale dhe Ligji për tatimin në pronë.

Gjykata Kushtetuese muaj më parë ka rrëzuar Ligjin për Këshillin Prokurorial, derisa së fundmi shfuqizoi disa nene të rëndësishme të Ligjit për zyrtarë publikë.

KosovaPress pyeti në Gjykatën Kushtetuese se kur pritet të ketë vendimmarrje për ligjet e tjera, mirëpo të njëjtit nuk kthyen përgjigje.

Pesëmbëdhjetë pjesëtarë të Policisë së Kosovës po qëndrojnë në Auckland të Zelandës së Re ku janë pjesëmarrës në Konferencën Ndërkombëtare të Grave në Polici.

Në video të dërguar nga shikuesja e emisionit “N’frekuence – ATV” gjatë parakalimit në “Paradën e Kombeve” shihet të ketë qenë pjesëmarrëse edhe Ambasadorja e Kosovës ne Australi znj. Jetmira Berdynaj si dhe pjesëtaret e Policisë së Republikës së Shqipërisë ku përshëndeten nga mërgimtarët shqiptarë të cilët jetojnë në Auckland.

Në dy aksidente trafiku që kanë ndodhur të shtunën në mbrëmje në rajonin e Prishtinës, kanë humbur jetën tre persona.

Dy persona kanë vdekur në një aksident trafiku në rrugën që lidhë fshatin Sfeqël me fshatin Shajkovc të Podujevës, ku është përfshirë një veturë.

Lajmin e ka konfirmuar zëdhënësja e Policisë për Rajonin e Prishtinës, Flora Ahmeti për KosovaPress, e cila tha se dy nga personat e lënduar nuk kanë arrit të përballojnë plagët e shkaktuara nga aksidenti dhe të njëjtit kanë vdekur.

Ajo tha po ashtu se me hetimin për zbardhjen e shkaqeve të këtij vetaksidenti, po merren hetuesit nga Njësiti i trafikut.

“Sot rreth orës 20:30 në rrugën që lidhë fshatin Sfeqël me fshatin Shajkovc të Podujevës, ka ndodhur një aksident trafiku, ku është përfshirë një veturë. Si pasojë e aksidentit tre persona kanë pësuar lëndime të rënda trupore. Dy nga personat e lënduar nuk kanë arrit të përballojnë plagët e shkaktuara nga aksidenti dhe të njëjtit kanë vdekur. Vdekjen e viktimave e ka konstatuar ekipi mjekësor në vendngjarje”, theksoi Ahmeti.

Po ashtu ajo ka bërë të ditur se sot rreth orës 16:30 në rrugën Llapnasellë -Graqanicë, ka ndodhur një aksident trafiku me pasoja fatale.

“Si pasojë e aksidentit, lëndime trupore kanë pësuar dy persona, një prej tyre nuk kanë arritë të përballojnë plagët dhe i njëjti ka ndërruar jetë. Vdekjen e ka konstatuar ekipi mjekësor në QKUK”, tha ajo.

Me rastin po merret hetuesia nga njësiti i trafikut rrugor.

Policia e Kosovës njofton se me kërkesë të autoriteteve vendore, sot autoritetet e shtetit të Gjermanisë kanë ekstraduar në aeroportin e Prishtinës të dyshuarin L.T i moshës 38 vjeçar, i dyshuar për vrasjen e rëndë në Kaçanik gjatë vitit 2022.

Policia Rajonale e Ferizajt më 10 maj 2022, në ora 14:00 kishte pranuar një informacion se në rrugën magjistrale Ferizaj-Kaçanik, përball Varrezave të Dëshmorëve në Kaçanik, tek vendi i quajtur ‘’Fusha Pajtimit’’ ishte një rast i vrasjes së rëndë.

Sipas policisë Sektori Rajonal i Hetimeve nën autorizim të Prokurorisë Themelore në Ferizaj i kishte nisur hetimet për rastin e vrasjes së rëndë, ku nga të shtënat me armë zjarri në vendin e ngjarjes kishte ndërruar jetë personi H.B ( M/K) i moshës 31 vjeçar, ndërsa plagë të rënda trupore kishte pësuar personi tjetër K.B (M/K) i moshës 34 vjeçar, i cili ishte dërguar për tretman mjekësor në Qendrën Klinike Universitare në Prishtinë.

Sektori Rajonal i Hetimeve pas punëve intenzive hetimore, grumbullimit të informacioneve në terren, kishte identifikuar dhe ishte vënë në ndjekje të personave të dyshuar: H. Q ( M/K) i moshës 38 vjeçar dhe L. T ( M/K) i moshës 22 vjeçar .

Në lidhje me këtë policia rajonale e Ferizajt në bazë të autorizimit nga Prokuroria Themelore në Ferizaj, për publikimin e fotografive të personave në kërkim, kishte kërkuar bashkëpunim me qytetarë rreth informacioneve për vendodhjen e dy të dyshuarëve, e në anën tjetër Gjykata Themelore e Ferizajt kishte lëshuar letër-rreshtim ndërkombëtar.

“Me kërkesë të autoriteteve vendore, sot, datë 16.09.2023, autoritetet e shtetit të Gjermanisë kanë ekstraduar në aeroportin e Prishtinës të dyshuarin L.T ( M/K ) i moshës 38 vjeçar, i cili ditë më parë është arrestuar në Gjermani”, thuhet në njoftim.

Policia Ferizajt të dyshuarin e ka dërguar në Gjykatën Themelore në Ferizaj dhe ndaj tij nga gjykata është caktuar masa e paraburgimit prej 30 ditëve, ndërsa në kërkim policor mbetet i dyshuari tjetër H.Q.