Tag: Ballina

Përgatiti: Armand Hoti

Politikanë, përfaqësues të institucioneve, ekonomistë dhe ekspertë u bënë bashkë për t’i ndarë qëndrimet lidhur me Projektligjin për Fondin Sovran. Në këtë fond synohet t’u barten asetet e rëndësishme publike, shtetit.

Kryetari i Komisionit për Ekonomi, Ferat Shala, u shpreh se projektligji përmban paqartësi në nene të caktuara.

“Neni 19, kapitali themeltar 20 milionë euro. Cilat ndërmarrje mund të rivitalizohen me 20 euro? Por vetëm javën e kaluar 15 milionë euro iu dhanë postës pa e ditur ku po shkojnë”, tha Shala.

Ndërkohë, deputetja e Lidhjes Demokratike të Kosovës, Hikmete Bajrami, nuk pret që themelimi i Fondit Sovran të prodhojë rezultate në favor të ekonomisë.

“Nuk mund të jap komente duke thënë se Ligji mund të përmirësohet përmes përmirësimit të disa neneve në të. Thjesht kjo është një ide në të cilën aspak nuk besojmë”, tha Bajrami.

Duke iu referuar projektligjit, Arian Zeka nga Oda Ekonomike Amerikane shprehu shqetësimin e tij lidhur me mënyrën e financimit të Fondit.

“Do t’i përmend disa prej shqetësimeve tona, që lidhen kryesisht me mënyrën se si do të financohet Fondi Sovran. Kosova ka burime të kufizuara financiare. Nën një: burimet e kufizuar financiare, nën dy: mungesa e ekspertizës financiare janë një dëshmi që një numër i madh i agjencive të pavarura të vendit, sot e kësaj dite, vazhdojnë të kenë ushtrues detyre dhe të mos plotësohen me pozita. Kemi shqetësimin që një gjë e tillë mund ta karakterizojë edhe Fondin”, tha Zeka.

Megjithatë, kritikave e komenteve iu përgjigj zëvendësministri i Ekonomisë, Getoar Mjeku, njëherësh anëtar i grupit punues për hartimin e tij.

“Qëllimi i Fondit Sovran është thjesht që të sjellë një mendësi të re në qeverisje e ndërmarrjeve publike në menaxhimin e aseteve e pasurive të rëndësishme shtetërore, edhe ta kemi një mekanizëm profesionist të papolitizuar që ndodh në zhvillimin e vendit. Fondi Sovran nuk është mekanizëm financues për qeverinë e Kosovës, Fondi Sovran është mekanizëm financues për zhvillimin e vendit. Ka rregulla shumë të qarta të cilat duhet t’i keni parasysh”, tha Mjeku.

Në korrik të këtij viti, Projektligji për Fondin Sovran kaloi në parim në Kuvend me 61 vota për.

Mes tjerash, ndërmarrjet publike që pritet t’i barten Fondit Sovran janë KEK-u, Telekomi, Posta e Kosovës, Trepça, Trainkosi dhe Infrakosi.

Me themelimin e Fondit Sovran do të shuhet Agjencia Kosovare e Privatizimit.

Përgatiti: Sara Shehu

Specializantët e Qendrës Klinike Universitare të Kosovës, të cilët protestuan për 4 ditë para Ministrisë së Shëndetësisë, kanë vendosur ta ndërpresin atë. Deri të ky vendim erdhi pas një takimi që ata mbajtën të martën me ministrin e Shëndetësisë, Arben Vitia.

Vitia u ka premtuar zgjidhje për disa nga kërkesat e tyre, përfshirë edhe pagesën e kujdestarive nga nëntori.

“Pas një takimi me ministrin Vitia, bëmë disa marrëveshje. Për kujdestarinë, mospagesën nga muaji shkurt për specializantët, kjo tha që s’është e mundur të kompensohet nga Ministria e Shëndetësisë, prandaj mbetet që secili specializant në mënyrë vetjake apo përmes ndonjë avokati të ngrejë këtë çështje e t’i fitojë pagesat”, tha përfaqësuesi i Këshillit të Specializantëve, Arianit Zajmi.

Po ashtu, Zajmi tha se kanë shpresa edhe në zbritjen e pagesës për shkollimin specialistik, që aktualisht për një vit është 500 euro.

“Sa i përket pagesës për 500 euro për vit, Vitia tha se përmes ndonjë rruge ligjore, nëse gjendet atëherë do të bashkëpunojmë për ndryshimin e këtij vendimi. E ne kemi kuptu që përmes një rruge, Komisioni për Shëndetësi mund ta ndryshojë këtë situatë dhe do të takohemi me ata për një zgjidhje. Dhe pika tjetër që ministri Vitia na premtoi se nga fillimi nëntorit kujdestaritë do të paguhen të gjitha varësisht nga puna që bëjnë përmes aneks-kontratave”, tha Zajmi.

Për premtimet e ministrit Vitia, optimiste është edhe njëra nga specializantët e klinikës së Neurologjisë, Pranvera Bytyqi.

“Takimi me ministrin ka qenë i kënaqshëm pasi ai ka qenë i gatshëm me iu përgjigj kërkesave tona. Ne duhet të punojmë 500 euro vitin shkollor, por ministri na dha hapësirë që të gjejmë një rrugë alternative ligjore që thotë se ky çmim mund të zbritet, pasi që është shumë e lartë e papërballueshme 5 vjet 2.500 euro, një shumë e papërballueshme për shumicën prej nesh”, tha Bytyqi.

Ministria e Shëndetësisë, përmes një përgjigje me shkrim, ka bërë të ditur për ATV-në, se nga java tjetër do të finalizohen aneks kontratat për specializantët.

“Me qëllim të adresimit të pagesës së kujdestarive, Ministri i Shëndetësisë ka nxjerr vendim për kompensim, ku kjo çështje do të rregullohet me kontratë. Përgatitja e aneks-kontratave pritet të finalizohet gjatë kësaj jave në mënyrë që të adresohet çështja e specializantëve”, thuhet në përgjigjen e MSH-së.

Kërkesat i shpalosën për ditë me radhë para objektit të të Ministrisë së Shëndetësisë, mbi 50 specializantë të 37 klinikave të QKUK-së.

Komisioni Evropian ka paraqitur një pako me propozime për të ruajtur më mirë kufijtë e jashtëm të BE-së dhe për menaxhimin më efikas të imigrimit ilegal. Në këtë paketë mes tjerash Komisioni Evropian ka propozuar edhe forcimin e mekanizmave të pezullimit të liberalizimit të vizave për ato vende, qytetarët e të cilave mund të hyjnë në BE pa viza.

Mekanizmat e pezullimit të liberalizimit të vizave tashmë ekzistojnë sipas rregullores së vitit 2018.

Me propozimin e ri të Komisionit Evropian, liberalizimi i vizave do të mund të pezullohet edhe për shkak të mos përshtatjes së regjimit të vizave të atyre vendeve me regjimin e vizave të BE-së për shtetasit e tretë.

Komisioni Evropian ka përmendur rajonin e Ballkanit Perëndimor si shembull, i cili dëshmon se një vend mund të bëhet pikë transiti për imigrantët ilegalë drejt BE-së për shkak se mund të hyjnë pa viza në një vend fqinj.

Burimet e Komisionit Evropian në mënyrë të veçantë kanë përmendur Serbinë, e cila ua kishte hequr vizat shtetasve të vendeve si Kuba, Tunizia, Burundi, dhe disa vendeve të tjera për të hyrë në Serbi. Kjo kishte ndikuar që një numër i shtetasve të këtyre vendeve të hynin në Serbi pa viza e pastaj të kalonin në Bashkimin Evropian.

Vetëm pas insistimit të Bashkimit Evropian, Serbia kishte nisur të përshtatë regjimin e saj të vizave me atë të Bashkimit Evropian. Kërkesa për përshtatje me regjimin e vizave të BE-së Komisioni ka pasur edhe për vendet tjera të rajonit të Ballkanit.

Serbia, në fillim të vitit 2022, ka pasur liberalizim vizash për 22 shtete, të cilat nuk kanë pasur liberalizim për lëvizje në BE. Ky numër tash është zvogëluar në 12, por Komisioni kërkon nga Serbia që të vazhdojë të shënojë përparim në këtë drejtim.

Më së shumti progres në përshtatjen me politikën e vizave të BE-së ka shënuar Maqedonia e Veriut, ndërsa më shumë progres kërkohet nga Shqipëria dhe Bosnja e Hercegovina.

Të gjitha vendet e rajonit të Ballkanit Perëndimor gëzojnë liberalizimin e vizave nga ana e BE-së. Edhe për Kosovën BE-ja ka miratuar vendimin për liberalizimin e vizave dhe ai do të nisë të zbatohet nga 1 janari i vitit 2024.

“Kur këto vende partnere të Ballkanit Perëndimor kanë bërë përparim në përshtatjen e regjimit të vizave me atë të BE-së, kjo ka pasur ndikim në zvogëlimin e numrit të imigrantëve ilegalë në BE përmes kësaj rruge”, thuhet në raportin e Komisionit Evropian.

Komisioni Evropian të mërkurën ka publikuar edhe raportin e gjashtë të monitorimit të mekanizmave për pezullimin e liberalizimit të vizave për vendet e rajonit të Ballkanit Perëndimor.

“Raporti konkludon se të gjitha këto shtete duhet të bëjnë hapa të mëtejmë për t’u përshtatur me politikën e vizave të BE-së dhe të vazhdojnë përpjekjet e tyre për të parandaluar aplikimet e pabazuara për azil. Përpjekje shtesë duhet të bëhen edhe për të parandaluar imigrimin ilegal, si dhe luftë kundër krimit të organizuar dhe korrupsionit”, thuhet në raportin e KE-së.

Sipas mekanizmave aktualë për pezullimin e vizave, ky proces mund të niset vetëm në disa raste specifike, si për shembull rritja e menjëhershme dhe domethënëse e numrit të imigrantëve ilegalë apo rrezikut për sigurinë kombëtare.

Janë katër skenarë kur Mekanizmi i pezullimit të vizave do të aktivizohej:

1. Në rast të rritjes së konsiderueshme – mbi 50% – të migrimit të parregullt.

2. Në rast të rritjes së konsiderueshme – mbi 50% – të kërkesave për azil me shkallë të ulët pranimi, rreth 3-4%.

3. Në rast të rënies së bashkëpunimit për riatdhesimin e shtetasve që përjashtohen nga BE-ja, si rezultat i qëndrimit të parregullt.

4. Në rast të rrezikut të shtuar për sigurinë e shteteve anëtare të BE-së, veçanërisht për vepra penale të rënda.

Sipas propozimit të Komisionit Evropian të mërkurën, arsye për pezullimin e liberalizimit të jetë “mospërshtatja e mjaftueshme me regjimin e vizave të BE-së, kërcënimet hibride dhe ekzistimi i dhënies së shtetësisë për investime”.

Komisionarja e BE-së për çështje të brendshme, Ylva Johanson, ka thënë se është shumë e rëndësishme që të ndalet praktika e shitjes së pasaportave nga vendet që gëzojnë liberalizimin e vizave.

“Ka shtete që gëzojnë liberalizimin e vizave e që ua shesin shtetësinë personave të ndryshëm, shpesh me dosje kriminale, me emra të ndryshuar, e pastaj ata mund të hyjnë në BE pa viza”, ka thënë ajo.

Me këtë ajo ka arsyetuar propozimet që vendet, të cilat do ta shesin në këtë mënyrë shtetësinë e tyre, të përballen me mundësinë e pezullimit të liberalizimit të vizave nga ana e BE-së.

Zëvendëspresidenti i Komisionit Evropian, Margaritis Schinas, ka thënë se fokus i veçantë në politikën e përbashkët të migrimit duhet të jetë riatdhesimi i suksesshëm i atyre personave, të cilëve u është refuzuar qëndrimi në territorin e Bashkimit Evropian.

Ai ka theksuar se në këtë pikë shumë shtete të BE-së nuk kanë pasur sukses t’i dëbojnë personat, për të cilët është lëshuar vendimi përkatës i autoriteteve për të lëshuar territorin e BE-së. Kjo, sipas tij, ka ndikuar që në rrugët e qyteteve evropiane të ketë njerëz me qëndrim ilegal që janë përfshirë në akte të krimit dhe terrorizmit.

“Edhe kryesi i sulmit terrorist në Bruksel, edhe ai në Francë, kanë qenë duke qëndruar ilegalisht, edhe pse kanë pasur urdhër ta lëshojnë territorin e këtyre vendeve”, ka thënë Schinas.

Ai ka shtuar se asnjë politikë e menaxhimit të migrimit nuk do të jetë e suksesshme pa pasur sukses në riatdhesimin e personave që nuk mund të qëndrojnë në territorin e BE-së.

Kryeministri i Kosovës, Albin Kurti, është treguar për punën e bërë në dy vjet e gjysmë qeverisje, duke thënë se në këtë periudhë ka sunduar ligji.

Ai ka bërë të ditur se janë kryer mbi 1 mijë operacione kundër krimit të organizuar dhe kontrabandës, ndërsa Policia e Kosovës ka arrestuar mbi 3 mijë e 800 persona për vepra të rënda penale, në mesin e cilëve mbi 300 zyrtarë publikë.

“Ajo sot ka 850 policë të rinj nga radhët e të gjitha komuniteteve që jetojnë në vend”, ka shkruar Kurti në Facebook.

Tutje, kreu i ekzekutivit ka thënë se falë punës së institucioneve të sigurisë, janë lokalizuar dhe shkatërruar 16 laboratorë të drogës, prej tyre nëntë në veri të vendit.

“Në total, në dy vjet e gjysmë, në gjithë territorin e Republikës, janë konfiskuar 2.2 ton substanca narkotike. Mbi 14 milionë euro janë sekuestruar nën dyshimin e keqpërdorimeve dhe shpëlarjes së parave. Dogana e Kosovës ka konfiskuar mall me vlerë prej 30.6 milionë euro, kurse vlera e parandaluar nga ana e Doganës së Kosovës në fushën e ekonomisë joformale, është mbi 90 milionë euro”.

Kryeministri ka bërë të ditur se në bashkëpunim me Malin e Zi dhe Maqedoninë e Veriut janë mbyllur gjashtë, respektivisht dy rrugë ilegale, përgjatë kufijve përkatës që Kosova ndan me këto dy shtete.

Ndërkaq, në mënyrë të njëanshme, në pjesën veriore të Republikës ka thënë se deri më tani janë mbyllur 24 rrugë ilegale të cilat përdoreshin për kontrabandë, trafikim dhe kalim ilegal të kufirit nga struktura të krimit të organizuar.

“Janë ngritur nëntë stacione të reja policore për mbikëqyrjen dhe kontrollin e kufirit. Deri në vitin 2021 nuk kishte asnjë të tillë. Janë shkatërruar gjashtë laboratorë për prodhimin e kriptovalutave. Vlera e narkotikëve dhe pajisjeve të laboratorëve të drogës arrin deri në 40 milionë euro. Ligjshmëri. Shërbim. Siguri”, ka përfunduar Kurti.

Në Parlamentin Evropian janë dërguar pesë draft-rezoluta për ngjarjet e 24 shtatorit në veri të Kosovës.

Në draft-rezolutën e propozuar nga “S&D Group”, që përbëhet nga socialistët dhe demokratët i është bërë thirrje Bashkimit Evropian që “të ndryshojë urgjentisht politikën e saj zbutëse ndaj Serbisë”.

Po ashtu në pikën 13 të draft-rezolutës së “S&D Group” bëhet thirrje që masat e marra nga BE-ja ndaj Kosovës të hiqen menjëherë.

“Të heksohet rëndësia e mbajtjes së Serbisë përgjegjëse për rolin e saj në sulmin e 24 shtatorit 2023 dhe nevojën për të vendosur masa negative kundër Serbisë”.

“Të shprehet keqardhje për faktin që gjykata e Beogradit refuzoi thirrjen e Zyrës së Kryeprokurorit Publik të Beogradit për ndalimin e Milan Radoiçiqit, për shkak të rrezikut të arratisjes së tij, duke pasur parasysh se Radoiçiq mori përgjegjësinë për organizimin e sulmit të 24 shtatorit 2023”, thuhet në draft-rezolutën e socialistëve dhe demokratëve, transmeton KlanKosova.tv

Draft-rezolutë në Parlamentin Evropian ka dorëzuar edhe grupi politik pro-evropian, të cilët i kanë bërë thirrje BE-së dhe shteteve anëtare të saj të përgatisin sanksione kundër organizatorëve, financuesve dhe autorëve të sulmit të 24 shtatorit në Banjskë duke u bazuar në gjetjet e hetimit.

Po ashtu, në draft-rezolutën e këtij grupi i është bërë thirrje Serbisë që të përmbahet nga përpjekjet e saj për ta izoluar Kosovën nga bashkësia ndërkombëtare.

“Shprehim keqardhje që Serbia ka rifilluar fushatën e çnjohjeve ndaj Kosovës; i bëjmë thirrje Serbisë që të përmbahet nga përpjekjet për të izoluar Kosovën nga bashkësia ndërkombëtare duke bërë fushatë kundër njohjes së saj ose duke e përjashtuar vendin nga organizatat ndërkombëtare”, thuhet ndër të tjera në draft-rezolutën e këtij grupi.

Draft-rezolutë ka dorëzuar edhe grupi i “Të Gjelbërve/Aleanca e Lirë Evropiane”, grup ky që përbëhet kryesisht nga parti politike të gjelbra dhe regjionale.

Ky grup në Parlamentin Evropian ka dorëzuar një draft-rezolutë prej 24 pikash, ku në pikën 2 kërkohet që të gjithë autorët e sulmit terrorist në Banjskë të sillen para drejtësisë, teksa ka përmendur edhe sulmet gjatë muajit maj ndaj pjesëtarëve të KFOR-it, Policisë së Kosovës dhe gazetarëve.

“Kërkojmë që të gjithë autorët e këtij sulmi terrorist të sillen para drejtësisë pa vonesë, përfshirë edhe në Serbi. Dënojmë fuqishëm sulmet e dhunshme të majit 2023 kundër ushtarëve të KFOR-it, policëve dhe gazetarëve kosovarë; u bëjmë thirrje autoriteteve përkatëse të nxjerrin para drejtësisë të gjithë autorët e këtyre sulmeve të mjerueshme”.

Po ashtu, i është bërë thirrje Komisionit Evropian dhe Këshillit të Evropës që të marrin masa ndaj Qeverisë së Serbisë nëse hetimet zbulojnë se shteti serb ishte i përfshirë drejtpërdrejt në sulmin terrorist në Banjskë ose në sulmet e majit të vitit 2023, apo edhe nëse autoritetet serbe s’janë të gatshme që të bashkëpunojnë me autoritetet e Kosovës.

“I bëjmë thirrje Komisionit, në këtë kontekst, të ngrijë fondet e dhëna Serbisë sipas programit IPA, nëse gjetjet e hetimit tregojnë se shteti serb ishte i përfshirë drejtpërdrejt në këto sulme”, thuhet në draft-rezolutë.

Tutje, ky grup politik në Parlamentin Evropian, në draft-rezolutë ka shprehur shqetësimin nga provat që lidhin grupet kriminale në veri të Kosovës me shtetin e Serbisë.

“Shpreh shqetësimin e thellë, në këtë kontekst, se të gjithë ata që janë përgjegjës për përleshjet në Banjskë mund të mos sillen para drejtësisë”, thuhet tutje në draft-rezolutë.

Në anën tjetër, Kosovës i është kërkuar themelimi i Asociacionit të Komunave me Shumicë Serbe “pa vonesa të mëtejshme, në përputhje me Marrëveshjet e Brukselit të vitit 2013 dhe 2015, Kushtetutën e Kosovës dhe aktgjykimin e Gjykatës Kushtetuese të Kosovës të vitit 2015”.

Agresionin në Banjskë e ka dënuar edhe grupi i Kosnervatorëve dhe Reformistëve Evropianë që vijnë nga qendra e djathtë.

Por, të njëjtit në draft-rezolutën e cila përbëhet nga nëntë pika, kanë kërkuar të hetohet Serbia dhe të mbahet përgjegjëse për veprimet e grupit terrorist.

Ky grup është shprehur se i mbështet thirrjet për zgjedhje në veri të Kosovës “dhe inkurajon autoritetet që të zbatojnë të gjitha politikat e nevojshme për të siguruar zgjedhje të drejta, demokratike dhe paqësore”.

Ndërsa, draft-rezolutën e pestë në Parlamentin Evropian e ka dërguar grupi më i madh dhe më i vjetër në parlament i quajtur “PPE”, që është grup i qendrës së djathtë.

PPE-ja e ka dënuar fuqishëm inkursionin terrorist në Kosovë dhe sulmin kundër policëve të Kosovës në Banjskë, teksa ka kërkuar nga autoritetet kosovare që të dyfshojnë përpjekjet e tyre “për të parandaluar kontrabandën e armëve në vend, e cila po bëhet duke përdorur autoambulanca dhe objektet e kishës që i përkasin Kishës Ortodokse Serbe në veri të Kosovës”.

“Dënojmë strehimin e autorëve të inkursionit të armatosur në veri të Kosovës, si dhe çdo propagandë për ta, glorifikimin e veprimeve të tyre apo mbështetjen politike për ta”.

“Dënojmë përpjekjet e vazhdueshme ruse për të ushtruar ndikim mbi Ballkanin Perëndimor, dhe veçanërisht në Serbi dhe Kosovë, duke shfrytëzuar ndarjet kulturore, etnike dhe fetare dhe duke destabilizuar forcat pro-demokratike; dënojmë, në këtë drejtim, përfshirjen e mundshme ruse në sulmet e Banjskës”, thuhet në draft-rezolutën e PPE-së.

Po ashtu, PPE-ja i ka bërë thirrje Bashkimit Evropian “që të vendosë masa kufizuese ndaj udhëheqjes serbe, nëse konfirmohet përfshirja e saj në sulmin në Banjskë”.

Në Qendrën Kryesore të Mjekësisë, Familje (QKMF) në kryeqytet nga 9 tetori kur edhe ka filluar vaksinimi kundër gripit sezonal, janë vaksinuar rreth 4 mijë persona, ka konfirmuar për Ekonomia Online, Xhevrije Canolli shefe e Njësisë së Vaksinimit.

Madje tha se një numër i konsiderueshëm i qytetarëve janë vaksinuar edhe nga ekipet mobile, duke sqaruar se ky proces po vazhdon edhe në 13 Qendra të tjera.

“Siç jeni njoftuar edhe ju më herët procesi i  vaksinimit kundër gripit sezonal ka filluar në javën e kaluar më datën 9 tetor që nga ajo datë e deri me sot janë vaksinuar rreth 4 mijë qytetarë po ashtu edhe nga ekipi mobil janë vaksinuar një numër i konsiderueshme i qytetarëve që për arsye shëndetësore nuk mund të vijnë në Qendër të Mjekësisë Familjare”.

“Këtë vit sikurse edhe vitin e kaluar procesi i vaksinimit kundër gripit sezonal është organizuar përveç në Qendrës Kryesore të Mjekësisë Familjare edhe në 13 qendra tjera të Mjekësisë Familjare duke përfshirë këtu edhe qendrën e re në lagjen Vetrnik pra procesi i vaksinimi është krejtësisht i arritshëm nga qytetarët meqenëse mund ta marrin këtë shërbim varësisht nga vendi ku banojnë varësisht nga adresa në qendrën më të afërt ku ka njësi të vaksinimit”.

Ajo u ka bërë thirrje qytetarëve që ta marrin vaksinën në mënyrë që të parandalohet dhe mbrohen nga sëmundjet infektive.

“Meqenëse jemi në sezonin e gripit ku rastet me grip fillojnë të rriten kisha ftuar qytetarët të vaksinohen pasi qe kjo është koha më e mirë për të vaksinuar muaji shtator dhe tetor dhe vaksinimi mbetet mënyra më e mire dhe më efektive në parandalimin dhe mbrojtjen nga sëmundjet infektive. Vaksinimi mbron vetë personin që imunizohet dhe njëkohësisht ndihmon në parandalimin  e përhapjes së virusit të gripit në komunitet”.

Tutje Canolli tregoi se cilët persona mund të marrin vaksinën, duke filluar nga personat mbi moshën 65 vjeçare, gratë shtatzëna e fëmijët nëse rekomandohet nga mjeku, raporton EO.

“Vaksinimi kundër gripit  rekomandohet sidomos grupeve me rrezik të lartë sidomos grupeve në rrezik të lartë siç janë personat e moshuar mbi 65 vjet personat me sëmundje kronike grave, shtatzënë fëmijëve nën 5 vjeç personelit shëndetësor ndërsa nuk rekomandohet në rastet e alergjisë në ndonjë komponent vaksinës në raste të sëmundjeve akute me temperaturë të lartë të fëmijët e vegjël nën 6 muaj është me rëndësi të madhe qe duhet ta  cekim se në mesin e personave të moshuar vaksinimi kundër gripit redukton komplikimit dhe vdekshmërinë e shkaktuar nga gripi”.

Gjatë qëndrimit në Tiranë në kuadër të samitit të Procesit të Berlinit, kryeministri i Kosovës, Albin Kurti pati takim bilateral me kancelarin e Gjermanisë, Olaf Scholz.

Kurti e falënderoi Kancelarin Scholz për rolin dhe mbështetjen e Gjermanisë ndaj Republikës së Kosovës. Marrëdhëniet tona bilaterale janë të lidhura me vlerat e përbashkëta të lirisë, demokracisë e barazisë, tha ai.

Kryeministri e falënderoi Scholz-in për ri-energjizimin e Procesit të Berlinit të cilin Kosova e mbështet fuqishëm.

U bisedua për situatën e sigurisë pas sulmit terrorist ndaj Kosovës më 24 shtator, ku kryeministri Kurti theksoi se Kosova ka qenë nën kërcënimin e drejtpërdrejtë nga një sulm paraushtarak e terrorist i sponsorizuar nga Serbia.

Ai theksoi se ecja përpara duhet ta ketë parasysh veprimin agresor të Serbisë, për të cilin ka dëshmi e fakte të mjaftueshme të përfshirjes së tyre.