ATV

Tag: Ballina

  • Pa kuorum, dështon rezoluta e PDK-së për policinë

    Pa kuorum, dështon rezoluta e PDK-së për policinë

    Përgatiti: Benita Zeneli

    Rezoluta për Policinë e Kosovës e propozuar nga PDK-ja, përmes së cilës kërkohet pagesa e shtesave të rrezikshmërisë, pagesa e sigurimit shëndetësor, si dhe pensionimi i parakohshëm për policët, sërish nuk u hodh në votim në Kuvendin e Kosovës.

    Për të dytën herë me radhë që kjo pikë ishte në rend dite, deputetët e Lëvizjes Vetëvendosje dhe pjesëtarë të kabinetit qeveritar nuk ishin fare prezent në sallë, duke pamundësuar kuorumin që propozim-rezoluta të votohet.

    Pas diskutimit që u bë për këtë rezolutë, në seancën e dytë e cila ishte e rregullt, deputetët e pushtetit erdhën në sallë.

    Edhe në këtë seancë u kërkua plotësim-ndryshimi i rendit të ditës, në mënyrë që të mundësohet hedhja në votim e rezolutës.

    “Meqë tashmë janë deputetët në sallë, propozoj që të hidhet në votim rezoluta”, tha deputeti i PDK-së, Rashit Qalaj.

    Megjithatë, sërish nuk u arritën votat e mjaftueshme.

    32 votuan pro plotësim-ndryshimit të rendit të ditës, përfshirë këtu edhe kryetarin e Kuvendit, Glauk Konjufca, ndërsa 38 abstenuan.

    Debati vazhdoi për çështje tjera, kryesisht për rezolutën e Parlamentit Evropian, ku dënohet sulmi terrorist në Banjskë të Zveçanit më 24 shtator, si dhe për vendimin e presidentes Vjosa Osmani për mos dekretim të Blerim Isufajt për kryeprokuror tw shtetit, të cilin opozita e quajti antikushtetues.

  • Kosova pret mesazhet e emisarëve për rrugën përpara

    Kosova pret mesazhet e emisarëve për rrugën përpara

    Përgatiti: Fatlum Jashari

    Në prag të vizitës në Prishtinë të pesë emisarëve për dialogun, Qeveria nuk ka konfirmuar nëse qëndrimi i saj për mosshkuarje në dialog deri në ndëshkimin ndërkombëtar të Serbisë, është përfundimtar ose jo.

    Kosova shpreson, që të shtunën nga emisarët që përfaqësojnë BE-në, SHBA-në, Gjermaninë, Francën dhe Italinë, të marrë zotime dhe garanci për këtë, si dhe ndryshimin e qasjes ndërkombëtare ndaj Serbisë, pas 24 Shtatorit.

    Edhe pse e vlerësojnë sulmin terrorist-paramilitar në Banjskë përbën pikë ndryshimi, opinionistët theksojnë se dialogu është i pa-alternativë.

    “Është qëndrim i drejtë i Qeverisë së Kosovës, por Qeveria duhet të mos shihet si fajtor, si pengues i dialogut, sepse në një fazë të caktuar jemi parë (si të tillë) dhe për këtë jemi të sanksionuar. Nëse e humbim këtë mundësi, pozicionin që e kemi fitu më 24 Shtator, atëherë është rrezik që të ndëshkohemi edhe më shumë, përveç tjerash dihet që masat ndëshkuese do t’i kenë efektet në vitin 2024, nëse vazhdojnë deri në vitin e ardhshëm, atëherë ne mund t’i humbin 500 milionë euro fonde të BE-së”, tha Bekim Kabashi, opinionist.
    Krahas konstatimit se 24 Shtatori zbuloi fytyrën e vërtetë të presidentit të Serbisë, Aleksandar Vucic, opinionisti Fitim Mulolli thekson se Kosova nuk duhet të heqë dorë nga dialogu, por të ndërtojë argumente mbi aktin e agresionit në Banjskë.

    “Eventi i 24 Shtatorit nuk zhvesh Kosovën nga obligimet e saj që i ka për m’i zbatu marrëveshjet, sepse është krijuar një përshtypje e tillë në publik dhe shpesh e kemi parë edhe te zyrtarët qeveritar dhe politik. Duhet taktizim i mirë, që të rikonfirmohet gatishmëria jonë për bashkëpunim dhe dialog, mirëpo në anën tjetër që të ketë masa shumë të ashpra ndaj Serbisë dhe që të rishikohet pozicioni i krejt komunitetit ndërkombëtar përballë Serbisë, pas 24 shtatorit”, tha Mulolli.

    Një skenar mospajtimi për vazhdimin e dialogut, sipas Kabashit, rrezikon ta fusë procesin në një cikël vonesash të reja për të cilat është e interesuar Serbia.

    “Mendoj se nuk është e rastësishme edhe shpallja e zgjedhjeve, sepse ka një qëllim, një tendencë për të prolonguar, mos me i dhënë një definim të qartë dialogut, pra procesit për normalizim të marrëdhënieve Kosovë-Serbi. Ky është interes i parë i Serbisë, shkaku edhe i luftës në Ukrainë ku Serbia pret që atje të dihet se si po përfundon, pastaj të veprohet me Kosovën”, tha Kabashi.

    Krahas kërkesës për veprime brenda javësh për zbatimin e marrëveshjes së Brukselit dhe shtojcës së Ohrit, nga Kosova dhe Serbia, të martën, presidenti i Francës, Emmanuel Macron, listoi në radhë veprimet që, sipas tij, duhen ndërmarrë.

  • Një grua bie nga një ndërtesë në Fushë-Kosovë, Policia nis hetimet

    Një grua bie nga një ndërtesë në Fushë-Kosovë, Policia nis hetimet

    Sot një grua ka rënë nga një ndërtesë në rrugën “Arbëria” në Fushë-Kosovë.

    Lajmin për ATV-në e ka konfirmuar zëdhënësja e Policisë për rajonin e Prishtinës, Flora Ahmeti, e cila tha se personi i lënduar është dërguar për trajtim mjekësor.

    “Sot rreth 14:20, kemi pranuar informatën se në rrugë “Arbëria” në Fushë Kosovë, një person ka rënë nga një ndërtesë. Personi i lënduar (femër), menjëherë është dërguar për tretman mjekësor. Aktualisht hetuesit policor në koordinim me prokurorinë përkatëse janë duke punuar për të sqaruar të gjitha rrethanat që lidhen me rastin”, tha Ahmeti.

  • Rohde mirëpret rezolutën e PE-së për Kosovën

    Rohde mirëpret rezolutën e PE-së për Kosovën

    Ambasadori gjerman, Jorn Rohde, ka shkruar edhe njëherë për kërkesat që kanë ndaj Serbisë pas sulmit terrorist të 24 shtatorit, pas miratimit të një rezolute për këtë ngjarje nga Parlamenti Europian.

    “Rezoluta e PE për situatën në Kosovë pas sulmit terrorist më 24.9. në Banjska. Siç tha kancelari Scholz, ne kërkojmë hetime intensive dhe kërkojmë nga Serbia të bashkëpunojë në hetimet e udhëhequra nga autoritetet e Kosovës. Ai gjithashtu nënvizoi nevojën urgjente që të dyja palët të zgjidhin konfliktin”, ka shkruar Rohde, duke shpërndarë një postim në X nga eurodeputetja Viola von Cramon për këtë rezolutë.

    Ajo tha se rezoluta kërkon nga BE dënimin më të ashpër të mundshëm të sulmit ndaj policisë së Kosovës nga paraushtarakët e udhëhequr nga Milan Radoiçiq; hetimin e sulmit në Banjska nga autoritetet e Kosovës me mbështetjen e BE-së; Serbia të bashkëpunojë pa kushte në hetim; plani i kontrollit të KFOR’it për veriun, duke përfshirë përforcimin dhe shtimin; de-përshkallëzimi në veri dhe kthimi në dialogun e udhëhequr nga BE-ja; Zbatimi i të gjitha marrëveshjeve të kaluara, përfshirë Asociacionin.

  • ​Banka Botërore: Ngadalësohet rritja ekonomike në Kosovë

    ​Banka Botërore: Ngadalësohet rritja ekonomike në Kosovë

    Banka Botërore vlerëson se në Kosovë rritja reale e Bruto Produktit Vendor (BPV) u ngadalësua gjatë këtij viti, por parashikimet e kësaj banke janë se aktiviteti ekonomik pritet të zgjerohet me 3.2 për qind gjatë vitit 2023.

    Menaxheri i Bankës Botërore për Kosovën, Massimiliano Paolucci, ka thënë se rritja ekonomike në Mal të Zi dhe Shqipëri ishte më e fortë seç pritej në vitin 2023, e nxitur nga një sezon i fortë turistik, ndër faktorët e tjerë, dhe mund të ngadalësohet pak në vitin 2024. Por sipas tij, rritja në Kosovë, Maqedoni të Veriut, Bosnjë dhe Hercegovinë dhe Serbi parashikohet të përshpejtohet në vitin 2024, e mbështetur nga rritja e konsumit dhe e investimeve.

    Sipas Paolucci, për Kosovën është i domosdoshëm zbatimi në kohë dhe efektiv i Strategjisë së re të Energjisë duke ruajtur stabilitetin fiskal.

    “Për Kosovën, është i domosdoshëm zbatimi në kohë dhe efektiv i Strategjisë së re të Energjisë duke ruajtur stabilitetin fiskal, krahas nevojës për të reduktuar hendekun që Kosova ka në infrastrukturën e sektorit të ujërave, mbeturinave dhe ndërlidhjes [transportit ndërkombëtar]”, citohet në komunikatë Paolucci.

    Ai ka shtuar se rritja e shkallës së investimeve në kapital njerëzor dhe përfshirja më e madhe e grave joaktive në tregun e punës, duke reduktuar barrierat për pjesëmarrje, gjithashtu duke rritur qasjen në shërbimet e kujdesit për fëmijë, janë një parakusht për të çliruar potencialin për rritje më të lartë ekonomike.

    “Në Kosovë, si kudo në Ballkanin Perëndimor, përballë kushteve të jashtme sfiduese, rritja reale e BPV-së u ngadalësua, por mbetet pozitive. Aktiviteti ekonomik pritet të zgjerohet me 3.2 për qind gjatë vitit 2023. Inflacioni ka qenë në rënie të vazhdueshme nga kulmi i tij prej 14.2 për qind në korrik 2022, por presionet mbi çmime mbeten të larta. Perspektiva afatmesme mbetet pozitive, në kontekstin e një pasigurie të lartë. Kontributi i investimeve në rritjen ekonomike pritet të jetë më i lartë në periudhën 2024-2025, i mbështetur nga rritja e investimeve në infrastrukturë publike, përfshirë këtu edhe projektet me financimit të jashtëm, si dhe investimet më të larta publike dhe private në kapacitete prodhuese dhe në efiçiencë të energjisë”, thuhet në raportin e ri Ekonomik i Bankës Botërore për Ballkanin Perëndimor.

    Sipas Bankës Botërore, shkalla e rritjes rajonale në vitin 2024, edhe pse më e shpejtë se në vitin 2023, mund të jetë 0.1 për qind më e ulët seç ishte parashikuar nga Banka Botërore në edicionin e mëparshëm të raportit në muajin prill.

    Projeksioni i rritjes për vitin 2025 është mbajtur i pandryshuar në 3.5 për qind.

  • Pesëshja perëndimore vijnë në Prishtinë dhe Beograd për të bërë përparim të prekshëm

    Pesëshja perëndimore vijnë në Prishtinë dhe Beograd për të bërë përparim të prekshëm

    Presidentja e Kosovës, Vjosa Osmani deklaroi se regjimi i Millosheviqit përdori aktin e dhunës seksuale si mjet të frikësimit dhe demoralizimit. Osmani u shpreh se lufta në Kosovë është testament i vlerave, por edhe dëshmi e përkushtimit që tmerret e luftës nuk mund të njollosin asnjëherë dinjitetin njerëzor. Në adresimin e saj në tryezën më të lartë vendimmarrëse në botë, kryetarja e shtetit ka cituar një deklaratë të një viktime të dhunës seksuale nga Kosova, teksa rrëfen për torturat e tmerrshme të forcave serbe. Në takimin e posaçëm të formatit Arria të Këshillit të Sigurimit, Osmani përmendi edhe Vasfije Krasniqi Goodman, gruan e parë që foli publikisht për aktin makabër.

    Ajo në një adresim virtual deklaroi se sa herë takon një të mbijetuar të dhunës seksuale, kupton nivelin e dhimbjes dhe fuqinë transformuese të qëndrueshmërisë së tyre. Osmani shtoi se viktimat e dhunës seksuale zgjedhin të lulëzojnë dhe luftojnë për drejtësi.

    “Gjatë viteve 1998-1999, Kosova ishte shënjestër e një lufte brutale dhe gjenocidiale të kryer nga regjimi i Millosheviqit. Mes tingujve shurdhues të artilerisë dhe heshtjes së dhimbshme të pasojave të luftës, u shfaq realiteti tronditës i mijërave të mbijetuar të dhunës seksuale dhe luftës. Prandaj sot, teksa ju drejtohem të gjithëve, ndjej përgjegjësi të madhe dhe mbaj një barrë të rëndë mbi supet e mia, ndërsa përpiqem të jap drejtësi për këto heroina të përditshme që jetojnë me një dhimbje të përjetshme dhe torturuese dhe ndërsa unë kërkoj me zjarr që akte të tilla tmerri të mos përsëriten kurrë më. Dhuna seksuale e lidhur me konfliktin ka vazhduar për një kohë të gjatë në trajektoren e historisë njerëzore. Ajo godet në zemër të njerëzimit. Ajo i kapërcen kufijtë dhe është kthyer në një nga çështjet më urgjente globale që kërkojnë vëmendjen tonë të menjëhershme. Prandaj është përgjegjësia jonë kolektive që të veprojmë me vendosmëri dhe të veprojmë me zgjuarsi. Qysh kur jam angazhuar në politikë, duhet të pranoj se takimet që lënë një impakt të përhershëm janë takimet me të mbijetuarit e dhunës seksuale dhe luftës”, deklaroi ajo.

    Osmani ka ndarë edhe një deklaratë të mbijetuare, e cila kishte rrëfyer për aktin makabër të dhunimit seksuale nga forcat serbe.

    “Për të kuptuar më mirë atë që po them, ju lutemi kushtojini vëmendje deklaratës së mëposhtme të një të mbijetuare. Kjo është ajo që ajo ndau me ne dhe atë që ajo donte që unë të ndaja me ju: “Po mundohesha të fshihesha nën karrige. Mbylla sytë dhe veshët me duar, duke u përpjekur të mos dëgjoja britmat dhe ulërimat e grave te tjera. Çfarë u bën grave te tjera, në shkollën ku jemi dërguar me dhunë, nuk kam parë kurrë gjëra kaq të tmerrshme. Në atë moment një djalë më tërhoqi zvarrë nga këmba ime, më hodhi në tokë dhe më hoqi me forcë pantallonat. Unë isha si e paralizuar. Nuk i ndjeja këmbët dhe kisha gjakderdhje të rëndë. Isha vetëm nëntë vjeç. Ajo ishte vetëm nëntë vjeç. E tmerrshme dhe shkatërruese. … Ata nuk ndalen para asgjëje. Ata shkatërrojnë jetë. Ata jo vetëm që duan të shkatërrojnë kombe apo vende, por duan të shkatërrojnë besimin tonë te njerëzimi. Ata duan të dehumanizojnë njerëzit. Dhimbja që ata shkaktojnë mbi viktimat e tyre mbetet e gdhendur në strukturën e qenieve të tyre gjatë gjithë jetës. Megjithatë, është e jashtëzakonshme se si, nga hiri i vuajtjes së tyre, lind një qëndrueshmëri frymëzuese”, tregoi kryetarja e shtetit.

    Tutje, e para e vendit deklaroi se është gjithmonë e mahnitur kur sheh vendosmërinë e palëkundur të të mbijetuarave për të refuzuar të përkufizohen nga e kaluara.

    “Pas luftës në Kosovë dolën në dritë kaq shumë raste të dhunës seksuale. Këto raste na ndihmuan të hedhim dritë mbi taktikat brutale të përdorura nga regjimi i Millosheviqit. Raporte të shumta dokumentuan përdhunime dhe tortura seksuale të shumta. Aktet e tilla të tmerrshme të dhunës seksuale u përdorën si mjete të frikësimit dhe demoralizimit, por në të njëjtën mënyrë si mjete të spastrimit etnik dhe gjenocidit, duke synuar dëbimin e popullatës së Kosovës nga shtëpitë e tyre. Në Kosovë, çdo vit që kalon, ne ishim dëshmitarë të qëndresës dhe vendosmërisë së jashtëzakonshme të grave dhe burrave kosovarë, të cilët refuzojnë të heshtin nga luftërat që kaluan. Lufta e tyre kundër stigmës dhe kërkimi i tyre për drejtësi janë shembullore”, u shpreh Osmani.

    Në takimin për “Parandalimin dhe reagimin ndaj dhunës seksuale të shkaktuar nga konfliktet”, kryetarja e Kosovës përmendi edhe gruan e parë që rrëfeu publikisht për tmerrin që përjetoi. Ajo tha se Vasfije Krasniqi Goodman është bërë simbol i kërkimit për drejtësi.

    “Duke qenë një nga të parat që doli përpara për t’u përballur me publikun, zonja Vasfije Krasniqi Goodman, e cila foli publikisht në tetor të vitit 2018, ajo u sigurua që bota të njihej me një heroinë, një Vasfije Krasniqi e ndjeshme, por me një vendosmëri të madhe, e mbijetuara e parë e dhunës seksuale gjatë luftës që foli publikisht. Duke vepruar kështu, ajo u përball me vuajtjet e tmerrit të mbi mijëra e mijëra të mbijetuarve. Ajo u bë fytyra e luftës së tyre dhe simboli i kërkimit të tyre për drejtësi dhe vendosmërisë së tyre të pashoqe për ta kthyer pikëllimin në shpresë”, deklaroi Osmani ndër tjerash.

    Përdorimi i dhunës seksuale si një armë lufte, Osmani tha se është përpjekje e qëllimshme për t’i zhveshur individëve dinjitetin, shpresën por edhe vet identitetin e tyre.

    “Lufta jonë është një testament i vlerave që ne i vlerësojmë: drejtësia, dhembshuria dhe barazia. Vendosmëria jonë për të çrrënjosur këtë praktikë të neveritshme nuk është vetëm imperativi i politikës, por është një detyrë morale, një dëshmi e përkushtimit tonë ndaj botës ku tmerret e luftës nuk mund të njollosin kurrë dinjitetin njerëzor”, përfundoi ajo.

    Rreth 20 mijë gra e burra nga Kosova janë dhunuar seksualisht gjatë luftës së fundit në Kosovë. Për këtë krim, gjykatat vendore kanë dënuar vetëm një person me dhjetë vjet burgim.

  • Konjufca voto pro, VV-ja abstenon që Rezoluta për Policinë të hyjnë në rend dite në seancën e rregullt

    Konjufca voto pro, VV-ja abstenon që Rezoluta për Policinë të hyjnë në rend dite në seancën e rregullt

    Kryetari i kuvendit, Glauk Konjufca ka votuar pro që në rend ditë në seancën ë rregullt të futet votimi i Rezolutës për Policinë e Kosovës, raporton EO.

    Përderisa deputetët e VV-së kanë abstenuar. Konjufca tha se 70 deputet kanë marr pjesë, 32 kanë votuar për plotësimin e rendit të ditës dhe 38 abstenuan.

    Deputeti i PDK-së Rashit Qalaj, tha se duke marr parasysh që në seancë janë kthyer deputet e VV-së, ka të votohet Rezoluta për mbështetjen urgjente financiare të Policisë së Kosovës.

    “Duke parë që në seancë kanë ardhur edhe deputet e VV-së të vendoset si pikë e rendit të ditës edhe votimi i projekt rezolutës për Propozim-Rezolutës për mbështetjen urgjente financiare të Policisë së Kosovës”, tha ai.

  • Stano: Pesë diplomatë perëndimorë po shkojnë në Prishtinë e Beograd për të bërë përparim të prekshëm

    Stano: Pesë diplomatë perëndimorë po shkojnë në Prishtinë e Beograd për të bërë përparim të prekshëm

    Të dërguarit e BE-së dhe SHBA-së, si dhe këshilltarët e sigurisë të liderëve të Francës, Gjermanisë dhe Italisë, do të vijnë në Prishtinë dhe Beograd të shtunën me qëllim të “bërjes së përparimit të prekshëm” në zbatimin e Marrëveshjes së Ohrit dhe uljen e tensioneve, veçanërisht pas ngjarjet në Banjskë në veri të Kosovës.

    Kështu i tha agjencisë së lajmeve Beta zëdhënësi i Komisionit Evropian Peter Stano.

    Stano tha se Miroslav Lajcak, Gabriel Escobar dhe këshilltarët e sigurisë së presidentit të Francës, kancelarit gjerman dhe kryeministrit të Italisë, Emmanuel Bon, Jens Pletner dhe Francesco Talo, do të shkojnë në bisedime me kryeministrin e Kosovës Albin Kurti dhe Presidenti serb Aleksandar Vuçiq “me pritshmëri të qarta se të dyja palët do të vazhdojnë procesin e normalizimit të marrëdhënieve dhe do të zbatojnë detyrimet e tyre pa vonesë dhe pa kushte”.

    “Në të njëjtën kohë, autoritetet serbe duhet të bëjnë gjithçka për të zbardhur sfondin, autorët dhe organizatorët e dhunës në Banjskë”, tha zëdhënësi i Përfaqësuesit të Lartë të BE-së, Josep Borrell.

    Sepse, sipas tij, Prishtina dhe Beogradi duhet të kenë parasysh se Bashkimi Evropian, anëtarët e tij dhe SHBA-të vazhdojnë të ofrojnë mbështetje të fuqishme për zgjidhjen e marrëdhënieve ndërmjet Kosovës dhe Serbisë dhe të ardhmes evropiane të gjithë rajonit.

    Në të njëjtën kohë, burime diplomatike evropiane i thanë Beta-s se zyrtarë të lartë të vendeve kryesore perëndimore po shkojnë në Prishtinë dhe Beograd me kërkesën që jo vetëm të ndalet përshkallëzimi në Kosovë, por edhe “fjalë për fjalë, sa më shpejt të jetë e mundur, të organizohen zgjedhjet komunale në veri me pjesëmarrjen e serbëve të Kosovës dhe konkretisht të fillojë zbatimin e Marrëveshjes së Brukselit për Themelimin e Bashkësisë së Komunave Serbe”.

    Diplomatët në selinë e BE-së theksuan veçanërisht se pesë zyrtarët e lartë perëndimorë po kërkojnë nga kryeministri i Kosovës Albin Kurti që të organizojë sa më parë zgjedhjet e reja komunale në veri të Kosovës, mënyra më e lehtë të jetë dorëheqja e kryetarëve aktualë dhe pa kushte, si dhe ti pranojnë obligimin për themelimin e Asociacionit

    Beogradi, në të njëjtën kohë, duhet të dëshmojë se nuk ka qenë i përfshirë në mënyrë të drejtpërdrejtë apo të tërthortë në ngjarjet në Banjskë, “dhe deri më tani nuk ka asnjë provë se autoritetet serbe ishin, por as nuk dinin se çfarë po përgatitej atje”, bënë të ditur burime në Bruksel.

    “Vuçiq duhet ta bëjë shpejt, sepse nuk ka durim të pafund në Bashkimin Evropian dhe disa masa tashmë po diskutohen në qarqet evropiane në rast se Beogradi nuk e bën atë që pritet”, thanë burime diplomatike evropiane.

  • Parlamenti Evropian miraton rezolutën që dënon sulmin terrorist në Banjskë

    Parlamenti Evropian miraton rezolutën që dënon sulmin terrorist në Banjskë

    Parlamenti Europian ka miratuar rezolutën për ngjarjet e fundit mes Kosovës dhe Serbisë, përfshirë sulmin terrorist në Banjskë.

    Në këtë rezolutë, PE do të kërkojë përgjegjësi nga Serbia nëse vërtetohet lidhja me sulmin terrorist ku u vra Afrim Bunjaku.

    Për miratimin e kësaj rezolute ka njoftuar edhe eurodeputeti Vladimír Bilčík, i cili është raportues për Serbinë në PE.

    “Parlamenti Europian miratoi rezolutën për zhvillimet e fundit në dialogun Serbi-Kosovë. Ne kemi nevojë për një hetim të plotë të sulmit në Banjska dhe dhënien e drejtësisë. Beogradi dhe Prishtina duhet gjithashtu të kthehen në një dialog paqësor dhe konstruktiv të lehtësuar nga BE”, ka shkruar ai.

  • Shënjestrohet një rast i ri për shpërlarje të parave, sekuestrohen rreth 20 milionë euro ndërsa arrestohen 3 persona

    Shënjestrohet një rast i ri për shpërlarje të parave, sekuestrohen rreth 20 milionë euro ndërsa arrestohen 3 persona

    Prokuroria Speciale njoftoi se kanë shënjestruar një rast të ri.

    Sipas një komunikate dërguar mediave thuhet se ky rast është shënjestruar për “Shpëlarja e parave”, si dhe vepra të tjera penale.

    “Kryeprokurori i Prokurorisë Speciale të Republikës së Kosovës (PSRK), Blerim Isufaj, ka mbajtur sot takimin e radhës me ekipin e përbashkët për përzgjedhjen dhe shënjestrimin e krimeve të rënda, ku kanë shënjestruar një (1) rast të ri. Prokuroria Speciale njofton se rasti është shënjestruar për “Shpëlarja e parave”, si dhe vepra të tjera penale”, thuhet në  komunikatë.

    Tutje, bëhet e ditur se në kuadër të hetimeve janë sekuestruar dhe konfiskuar sasi e madhe e armatimit të llojit të ndryshëm, rreth tridhjetë (30) vetura, si dhe pasuri të paluajtshme rreth njëzet milion (20.000.000) euro.

    Prokuroria Speciale njoftoi se lidhur me këtë rast janë të ndaluar tre persona dhe të njëjtit sipas vendimit të gjykatës janë nën masën e paraburgimit.