ATV

Tag: Ballina

  • Stoltenberg: E mirëpres propozimin për formimin e Asociacionit, hap kyç drejt paqes në rajon

    Stoltenberg: E mirëpres propozimin për formimin e Asociacionit, hap kyç drejt paqes në rajon

    Sekretari i Përgjithshëm i NATO-s, Jens Stoltenberg, ka thënë se sulmi i 24 shtatorit në Banjskë ka bërë që ta rrisin prezencën e KFOR-it me ushtarë shtesë. Për këtë, Stoltenberg ka kërkuar që kryerësit e këtij sulmi të mbahen përgjegjës, raporton EO.

    Në një konferencë për medie së bashku me presidenten Vjosa Osmani, Stoltenberg ka folur edhe për propozimin e Asociacionit të komunave me shumicë serbe. Këtë e quajti hap kyç drejt paqes në rajon.

    “Kënaqësi të jem përsëri në Prishtinë dhe të takohem përsëri me ju pas takimit në Bruksel. Sapo patëm një diskutim të rëndësishëm për gjendjen e sigurisë në Kosovë dhe rajon. Në shtator pamë një ndezje të dhunës në veriun e Kosovës që ngriti shqetësime të një konflikt më i gjerë mund të kthehet në Ballkanin Perëndimor”, tha Stoltenberg.

    Ai tha se sulmet janë të papranueshme.

    “Personat përgjegjës duhet të mbahen për përgjegjës. NATO ka reaguar me shpejtësi, kemi sjellë 1000 shtesë trupa në Kosovë, kemi dërguar armatime të rënda, kemi rritur patrullimet në veri”, tha ai.

    “Do të bëjmë atë që është e nevojshme të mbajmë një mjedis të sigurt dhe lëvizje të lirë për të gjithë njerëzit në Kosovë. Stabiliteti në rajon vendoset nga të gjitha anët që duhet të zgjedhin diplomacinë mbi dhunën dhe t’i nderojnë zotimet ekzistuese”, tha Stoltenberg.

    “Çdo vendosje e forcave të Policisë së Kosovës duhet të marrë konfirmimin e NATO’s… NATO e mbështet dialogun e lehtësuar nga BE mes Prishtinës dhe Beogradit, dhe të dyja palët duhet të angazhohen në mirëbesim. I mirëpres propozimet e fundit për themelimin e asociacionit të komunave me shumicë serbe në Kosovë. Ky do të ishte një hap kyç drejt normalizimit të marrëdhënieve dhe drejt paqes afatgjate dhe të qëndrueshme në rajon”, tha ai.

    Ai e falënderoi Osmanin për “mirëpritjen dhe takimin shumë konstruktiv”.

  • Osmani: Kosova dhe NATO janë në njërën anë, terroristët janë në anën tjetër

    Osmani: Kosova dhe NATO janë në njërën anë, terroristët janë në anën tjetër

    Presidentja e Kosovës, Vjosa Osmani, ka thënë se Serbia vazhdon t’i mbështesë terroristët që sulmuan Kosovën më 24 shtator, prandaj sipas saj Serbia duhet të mbahet përgjegjëse, raporton EO.

    Pas takimit me sekretarin e Përgjithshëm të NATO-s, Jens Stoltenberg, Osmani ka thënë se anëtarësimi i Kosovës në NATO është qenësorë, prandaj tha se ky institucion i sigurisë mund të llogarisë Kosovën si partnere të saj.

    “Në një kohë jashtëzakonisht sfiduese për sigurinë në përgjithësi, Kosova është një shtet i ri dhe demokratik, liria e Kosovës është edhe rezultat i mbështetjes së NATO-s. Në të njëjtën kohë jemi falënderues edhe për ushtarët e NATO-s.”

    “Edhe pse kjo paqe është cenuar dhe vazhdoj që të cenohet nga Serbia. Të dhënat e hetimeve zyrtare konfirmojnë se Serbia qëndron prapa këtij sulmi. Në mënyrë që të mos lejohet përsëritja e një akti të tillë Serbi duhet që të mbahet përgjegjëse. Serbia mbete një kërcenim i vazhdueshëm për rajonin. Policia e Kosovës dhe NATO janë në njërën anë, terroristët janë në anën tjetër. Republika e Kosovës është partner ku gjithnjë mund të llogarisni”, u shpreh Osmani.

  • Shefi i NATO-s në Presidencë, takohet me Osmanin

    Shefi i NATO-s në Presidencë, takohet me Osmanin

    Presidentja e Kosovës, Vjosa Osmani, e ka pritur në takim Sekretarin e Përgjithshëm të NATO-s, Jens Stoltenberg, raporton Ekonomia Online. Më pas ai do të takohet edhe me kryeministrin, Albin Kurti. Të hënën shefi i NATO-s do nisi turin treditor në Ballkan. Fillimisht ishte në Bosnje e Hercegovinë. Kurse të martën Stoltenberg do jetë në Serbi ku e pret në bisedime presidenti Aleksandar Vuçiq dhe kryeministrja Ana Bërnabiq.

    Një vizitë është parashikuar me shkencëtarë serbë ku do të prezantohet edhe teknologjia me e re e zhvilluar nga NATO në funksion të paqes dhe sigurisë.

    Në Maqedoninë e Veriu pas bisedimeve me presidentin Stevo Pendarovski dhe kreun e qeverisë Dimitar Kovaçevski, kreu i Aleancës së Atlantikut do të mbajë një fjalim në parlamentin e Maqedonisë pasi më herët do të zhvillojë një takim me kryeparlamentarin, shqiptarin Talat Xhaferi.

    I gjithë turi do të mbyllet me një takim dhe konferencë të përbashkët mes Sekretarit të Përgjithshëm të NATO-s me liderët e Ballkanit Perëndimor në Shkup të mërkurën e 22 nëntorit. Në të pritet të jetë i pranishëm edhe kryeministri Edi Rama. Përveç udhëheqësve të rajonit, në tryezën e diskutimeve do të jenë edhe presidenti kroat dhe kryeministri slloven.

    Vizita e Jens Stoltenberg vjen në një moment të rindezjes së tensioneve në Ballkan, e veçmas ato mes Kosovës dhe Serbisë pas ngjarjes terroriste në Banjskë. Po aq në sfondin e këtij turi intensiv janë edhe diskutimet mbi të ardhmen e sanksioneve të Bashkimit Evropian ndaj Rusisë për shkak të vazhdimit të konfliktit në Ukrainë.

  • Haxhiu thotë se s’i ka emrat e kryerësve të veprës në rastin Dehari: S’do ta prisja ftesën e prokurorit

    Haxhiu thotë se s’i ka emrat e kryerësve të veprës në rastin Dehari: S’do ta prisja ftesën e prokurorit

    Ministrja e Drejtësisë, Albulena Haxhiu, ka dëshmuar para Prokurorisë Speciale në lidhje me rastin e ish-aktivistit Astrit Dehari, raporton Ekonomia Online.

    Ajo pas dhënies së kësaj dëshmie ka mbajtur një konferencë për medie, duke thënë se po ta kishte emrin e kryerësve të veprës penale, s’do ta priste ftesën e prokurorit. Haxhiu tutje u shpreh se prokurori është ai që duhet të bëjë hetime.

    “Po ta kisha emrin e kryesit apo kryersve të veprës penale, unë nuk do ta prisja ftesën e prokurorit për ta thënë emrin e personit që dyshohet, e kjo është puna e tij, për këtë paguhet nga taksat e qytetarëve të Republikës së Kosovës, për këtë ai është prokuror, që të bëjë hetime, punën e tij unë nuk mund ta bëjë”.

    Haxhiu ka thënë tutje se për rastin Dehari duhen hetime të mirëfillta duke thënë se prokurori Afrim Shefkiu po e trajton me arrogancë këtë rast.

    “Nuk është bërë asgjë në zbardhje të vërtetës, prokurori Shefkiu përveç që se ka trajtuar, e ka trajtuar me arrogancë, nuk iu përgjigj avokatit të familjes për hetimet e mëtutjeshme. Prokurori Shefkiu asnjëherë nuk e ka marrë mundin që t’u përgjigjet thirrjeve të avokatit të familjes për të informuar më shumë familjen e Astritit lidhur me punën dhe hetimet që po bëhen, me arrogancë reagoi edhe ndaj deklaratës sime të cilës i qëndroj dhe e ripërsëris sa herë të jetë nevoja. Le të më ftojë sërish për të dëshmuar. Do t’i përgjigjem njësoj sa herë të jetë nevoja”.

    “Hetimet e mirëfillta janë domosdoshmëri, dhe prokurori i rastit duhet t’i kryejë hetimet në mënyrë të ndërgjegjshme dhe të përpiktë, dhe nëse kjo kërkesë për të është e pamundur të realizohet, atëherë të mos bëhet personi që e pengon drejtësinë. Le të kalojë kjo lëndë në duart e prokurorëve që e duan drejtësinë, edhe në Kosovë, por edhe drejtësinë për rastin Dehari”.

  • IKShPK: Uji i Badocit mund të përdoret për pije, ka rënë niveli i manganit

    IKShPK: Uji i Badocit mund të përdoret për pije, ka rënë niveli i manganit

    Instituti Kombëtar i Shëndetësisë Publike të Kosovës (IKSHPK) ka njoftuar se uji i liqenit të Badocit mund të përdoret për pije.

    Në një njoftim për medie, IKShPK ka bërë me dije se vlerat e manganit në ujin e liqenit dhe në rrjetin shpërndarës në ditët e fundit rezultojnë brenda standardeve të parapara.

    “Vlerat e manganit në ujin e liqenit dhe në rrjetin shpërndarës në ditët e fundit rezultojne brenda standardeve të parapara me Udhëzimin Administrativ nr. 10/2021 “Cilësia e Ujit për konsum nga njeriu”. Për t’u shpallur UJI HIGJIENIK DHE I SIGURT PËR PIJE në zonën e furnizimit nga fabrika e Badovcit, në laboratoret e IKSHPK-se Laboratori i parametrave bazik ku testohet Mangani si parametër indikues dhe Laboratori analitik-ICPMS ku testohet mangani si metal i rëndë, sipas procedurave standarde janë kryer tri matje të njëpasnjëshme në tri ditët e fundit:

    Më datën 17 nëntor: 0.025-0.050 mg/litër

    Më datën 18 nëntor: 0.010-0.031 mg/ litër

    Më datën 19 nëntor: 0.017-0.037 mg/ litër

    Bazuar në rezultatet laboratorike, uji në zonat e furnizuara nga Liqeni i Badovcit gjegjësisht – Fabrika në Badovc i plotëson kriteret të parapara me Udhëzimin Administrativ nr. 10/2021 “Cilësia e Ujit për konsum nga njeriu”(vlerat referente të Manganit 50 µg/L (0.05 mg/L).

    Nga sot vazhdon monitorimi i rregullt si aktivitet themelor i Qendrës së ujit brenda IKSHPK-së”, thuhet në njoftim.

  • Pozita u bën thirrje deputetëve opozitarë që të enjten t’i votojnë marrëveshjet ndërkombëtare

    Pozita u bën thirrje deputetëve opozitarë që të enjten t’i votojnë marrëveshjet ndërkombëtare

    Deputeti nga mazhoranca, Armend Muja ka thënë se në seancën e Kuvendit që është vendosur të mbahet të enjten shumica e pikave që do të diskutohen janë për marrëveshjet ndërkombëtare, me ç’rast iu ka bërë thirrje gjithë deputetëve, me theks atyre të opozitës t’i votojnë këto marrëveshje, pasi siç tha ai, janë jetike për qytetarët e vendit.

    Muja pas mbledhjes së Kryesisë së Kuvendit derisa ka renditur marrëveshjet që do të diskutohen, tha se afërisht vlera e tyre është 400 milionë euro.

  • KMDNLj: Dënojmë fuqishëm shkeljet që Gjykata Speciale Raciste po ua bënë pengjeve të Hagës

    KMDNLj: Dënojmë fuqishëm shkeljet që Gjykata Speciale Raciste po ua bënë pengjeve të Hagës

    Këshilli për Mbrojtjen e të Drejtave dhe Lirive të Njeriut (KMDLNj) ka reaguar pasi Gjykata Speciale gjatë fundjavës ka ndaluar këtë të shtunë dhe të diel telefonatat dhe komunikimet përmes video-lidhjes (platformës zoom) mes të paraburgosurve dhe familjarëve të tyre.

    Në reagimin e bërë nga KMLDNJ, thuhet se kufizimet janë bërë pa ndonjë paralajmërim.

    Po ashtu KMDLNj thotë se “në të njëjtën kohë kryetarja e Gjykatës Speciale Raciste, Ekaterina Trandafilova paralajmëroi se do ta vizitojë Kosovën dhe do të ketë një takim “informues“ me shoqërinë civile ndërsa nuk tregoi nëse do të ketë ndonjë takim me politikanët, ndryshe që këtë mund ta bëjë edhe pa e informuar publikun”.

    “KMDLNj –ë fuqishëm dënon shkeljet që Gjykata Speciale Raciste po ua bënë pengjeve të Hagës, të gjithë shtetas të Kosovës dhe të gjithë shqiptarë sikur edhe heshtjen e institucioneve të Kosovës që, me dashje apo pa dashje janë vënë në krahë të kësaj Gjykate. Vizita e Ekaterina Trandafilovës në Kosovë për KMDLNj –ë është e papranueshme, e neveritshme dhe në kundërshtim me standardet minimale profesionale dhe morale dhe si e tillë duhet të bojkotohet dhe kundërshtohet”, thuhet në reagim.

    Reagimi i plotë:

    Sipas informatave të KMDLNj –së, ndaj pengjeve që po mbahen në Qendrën e Paraburgimit në Hagë, të gjithë shqiptarë dhe të gjithë shtetas të Kosovës, si të paraburgosur, duke u gjykuar dhe në vuajtje të dënimit, kohëve të fundit u ishin nënshtruar disa kufizimeve në fushën e informimit e që përfundoi me ndërprerjen e paparalajmëruar të vizitave familjare dhe personave të tjerë që kishin marrë pëlqimin nga autoritetet e Gjykatës Raciste Speciale për vizita. Edhe komunikimi tjetër ishte ndërprerë, pa dhënë ndonjë sqarim. Vizitat ishin ndërprerë krejtësisht në kohën e pandemisë mirëpo jo edhe komunikimet me familjarë dhe të tjerë përmes telefonit dhe formave tjera elektronike.

    Në të njëjtën kohë kryetarja e Gjykatës Speciale Raciste, Ekaterina Trandafilova paralajmëroi se do ta vizitojë Kosovën dhe do të ketë një takim “informues“ me shoqërinë civile ndërsa nuk tregoi nëse do të ketë ndonjë takim me politikanët, ndryshe që këtë mund ta bëjë edhe pa e informuar publikun.

    Kjo farë kryetare e pati lënë për një kohë tjetër vizitën për faktin se ishin paralajmëruar protesta ndërsa, tani e vlerëson se kushtet janë më të mira për ta realizuar këtë vizitë “informuese“. Se takohet me shoqërinë civile, është thuaja normale aq më parë që një pjesë të saj e kanë partner edhe para themelimit të Gjykatës përkatësisht nga Rasti i Burrelit apo “Shtëpisë së Verdhë“. Se një pjesë e madhe e shoqërisë civile ka pasur qëndrim anues dhe oportunist ndaj shkeljeve serioze të drejtave të njeriut që i ka bërë kjo Gjykatë në raport me pengjet nga Kosova është e ditur botërisht prandaj këta Trandafilova nuk e ka asnjë problem t’i informojë për punën dhe transparencën e kësaj Gjykate, tmerrësisht e mbyllur dhe tmerrësisht diskriminuese në baza etnike që identifikohet me mungesën e transparencës elementare, së paku deri më tani.

    Thuhet se kjo gjykatë është pjesë e sistemit të drejtësisë së Kosovës, injorantët dhe dashkëqinjt vërtet mendojnë ashtu ndonëse me asgjë nuk identifikohet me Kosovën përveç se në baza etnike arreston dhe dënon shqiptarë. Ata që kanë kryer krime masive në Kosovë (serbët dhe Serbia) nuk ndiqen për krimet e bëra, janë shndërruar në bashkëpunëtorë dhe dëshmitarë të gjykatës për të cilën janë angazhuar që nga polici i trafikut i Serbisë e deri te presidenti i këtij shteti kriminel. Ekaterina Trandafilova është takuar edhe me civilistët dhe jocivilistët nga Serbia, do të ishte befasi po të mos takohej.

    LESP-i i Kosovës, njërin ndër kapitujt kryesorë për sukses në procesin e risocializimi të të dënuarve i konsideron vizitat familjare, miqësore dhe shoqërore, ruajtjen e familjes dhe krijimin e familjes së re, me një fjalë parasheh të ruhet dhe forcohet mjedisi social. Po të njëjtën gjë e parasheh Deklarata Universale mbi të Drejtat e Njeriut e Kombeve të Bashkuara, Konventa Evropiane për të Drejtat e Njeriut, Rregullat Evropiane të Burgjeve dhe Rregullat e Nelson Mandelës që kinse i zbaton kjo Gjykatë, si standardin më të lartë të Kombeve të Bashkuara që rregullon të drejtat e personave të privuar nga liria.

    Shkeljet që iu bëhet në vazhdimësi pengjeve nga Kosova në Hagë, të gjithë shtetas të Kosovës dhe të gjithë shqiptarë duhet të trajtohen seriozisht nga Komiteti Ndërkombëtar për Parandalimin e Torturës dhe Trajtimit Degradues për faktin se askujt nga Kosova nuk i lejohet t’i vizitojë brenda hapësirës së burgut për të parë trajtimin e tyre dhe kushtet fizike. Kjo metodologji përdoret në të gjitha vendet e botës, hiç atyre diktatoriale dhe është thuaja praktikë uniforme e monitorimit. Ekaterina Trandafilova duhet të tregojë pse vetëm Komiteti Ndërkombëtar i Kryqit të Kuq nga Gjeneva dhe Ombudspersoni i Holandës kanë të drejtë t’i vizitojnë pengjet e Hagës dhe, deri më tani nuk kanë bërë asgjë në mbrojtje të drejtave të tyre.

    Pjesa më e madhe e deputetëve të Kosovës dhe politikanët e tashëm, jo që kanë ndonjë interesim për këta të syrgjynosur por po kërkojnë rrugë dhe mundësi si t’ua ndërprenë mbrojtjen ligjore dhe vizitat familjare përmes ndalimit të financimit. Të gjithë i përmendin se deri më tani janë shpenzuar për mbrojtje dhe vizita familjare 20 milionë euro kurse Kroacia vetëm për mbrojtjen e Ante Gotovinës i ka shpenzuar 33 milionë euro.

    KMDLNj –ë fuqishëm dënon shkeljet që Gjykata Speciale Raciste po ua bënë pengjeve të Hagës, të gjithë shtetas të Kosovës dhe të gjithë shqiptarë sikur edhe heshtjen e institucioneve të Kosovës që, me dashje apo pa dashje janë vënë në krahë të kësaj Gjykate. Vizita e Ekaterina Trandafilovës në Kosovë për KMDLNj –ë është e papranueshme, e neveritshme dhe në kundërshtim me standardet minimale profesionale dhe morale dhe si e tillë duhet të bojkotohet dhe kundërshtohet.

  • Kurti thotë se OJQ-të e bizneset mund të regjistrohen si ndërmarrje sociale: Mundësohet punësimi e mirëqenia për grupet e cenueshme

    Kurti thotë se OJQ-të e bizneset mund të regjistrohen si ndërmarrje sociale: Mundësohet punësimi e mirëqenia për grupet e cenueshme

    Kryeministri i Albin Kurti dhe ministri i Financave, Punës dhe Transfereve, Hekuran Murati, janë takuar me përfaqësues të organizatave jo-qeveritare dhe bizneset, raporton Ekonomia Online.

    Kurti, ka njoftuar se nga tani këto dy të fundit do të mund të marrin statusin e ndërmarrjeve sociale. Sipas tij, ky vendim mundëson punësimin dhe sigurimin e mirëqenies për grupet e cenueshme.

    “Vizionin për të ofruar mundësi të barabarta për të gjithë e kemi shprehu kaherë, ndërsa punën dhe vullnetin për ta bërë atë vizion realitet e kemi dëshmuar mes hartimit dhe zbatimit të politikave për një ekonomi sa më gjithëpërfshirëse. Politikat e orientuara për personat me aftësi të kufizuara lehonat dhe fëmijët të moshuarit dhe familjet me asnjë të punësuar kanë siguruar që qytetarët dhe shteti do të jenë bashkë për të vepruar për të gjithë pa lënë asnjëri mbrapa. Punësimi dhe drejtësia barazia dhe zhvillimit ekonomik janë baza e së cilit hap të rrugëtimit tonë. Sot pranë jush në emër të Qeverisë së Republikës së Kosovës ju paraqes edhe një arritje tjetër në këtë drejtim, për herë të parë në Kosovë Qeveria jonë ofron mundësin që organizatat joqeveritare dhe bizneset të regjistrohen dhe të marrin statusin e ndërmarrjes sociale, pra në vendin tonë kem ndërmarrje publike kemi ndërmarrje private po kemi edhe ndërmarrje sociale. Kornizën ligjore e cila ka qenë ekzistuese në fund po e zbatojmë ashtu që të adresojmë nevojat e grupit cenueshme të shoqërisë përmes zhvillimit të sektorit ndërmarresisë sociale”.

    “Lehtësirat të cilat do të i ofrojnë ndërmarrjes sociale në njërën anë e inkuadrojnë aktivizimin në tregun e punës të personave nga grupet të cenueshme ndërkaq në anën tjetër sigurojnë rishpërndarjen e të hyrave për të i shërbyer pikërisht këtyre grupeve, edhe të rritet punësimi po njëkohësisht edhe mirëqenia. Punësimi në fillim përmes inkuadrimit ndërkaq mirëqenia në fund përmes rishpërndarjes së fitimit. Ju si biznese dhe si organizata jo qeveritare tashmë keni punë me personat nga grupet e cenueshëm Ne po ua prezantojmë procesin e regjistrimit të ndërmarrjes sociale dhe po u informojnë rreth fitimeve që lehtësojnë punën tuaj në shërbim të tyre grupeve të shoqërisë. Nëse aktivitetin tuaj e keni strukturuar në atë mënyrë që ofroni shërbime për grupe të cenueshme apo keni punësuar së paku 30% të stafit nga grupet e cenueshme, ju mund të aplikoni për të marrë certifikatën e ndërmarrjes sociale të shënoheni në regjistrin e ndërmarrjes sociale dhe të operoni si të tilla në tregun në Kosovë”.

    “Si Qeveri mbetemi të përkushtuar që të gjithë ta ndjejnë dorën e Shtetit dhe synojmë të bëjmë këtë duke garantuar qasje të barabartë në mundësi për avancimin ekomomik. Andaj ju konsiderojmë pikërisht juve këtu të ftuar si dhe të gjithë organizatat qeveritar edhe biznese që punojnë në shërbim të grupeve të cenueshme si partnerët kyç në këtë rrugëtim tonë të përbashkët”.

    Ministri i Financave, Hekuran Murati, ka treguar se kompanitë ku 30% e punëtorëve janë nga grupet e cënueshme, mund të aplikojnë si ndërmarrje sociale.

    Sipas tij, përfitimet janë që kompanitë ose OJQ-të lirohen nga tatimi në fitim.

    “Si Qeveri pra në vazhdimësi në mënyrë të vazhdueshme jemi munduar të zbatojmë politikat të cilat adresojnë pabarazinë si në tregun e punës po ashtu edhe nivelin e të hyrave për familje. Kemi pasur sit ju kujtohet masën 1.8 të pakos ringjalljes ekonomike nga e cila mbi 2200 familje pra janë mbështetur për punësim që nuk kanë pasur asnjë anëtar të familjes të punësuar. Po ashtu përmes masës 3.5 jemi përkujdesur që të mbështesim deri më tani mbi 46 mijë gra lehona të cilat po ashtu si të pa puna nuk kanë pasur burime të ardhurave mirëpo dora e Shtetit më në fund ka arritur të i mbështes edhe këtë kategori”.

    “Gjithsesi kemi pasur edhe masën 1.6 për punësimin për persona me aftësi të kufizuar të cilët ishin jashtë tregut të punës. E ku nga 160 përfitues që kemi pasur fillimisht kanë kryer trajnimet në punë në vendin e punës e pastaj e kanë vazhduar punësimin shumica prej tyre. Ky është një varg masash ku disa prej tyre janë shndërruar në skena të përhershme e cila kanë për qëllim përkrahjen e grupeve të cenueshme në shoqëri po të njëjtin qellim sot po e prezantojmë edhe fillimin e procesit të regjistrimit të ndërmarrjeve sociale, ndërmarrje këto që karakterizohen nga iniciativa e lirë përkrahja për grupe të cenueshme si dhe vullnetarizmi, ndryshe nga bizneset tradicionale e cila kanë për qëllim maksimizimin e fitimit ndërmarrjet sociale përdorin fondet e tyre për të avancuar misionin shoqëror, e në përkrahje të këtij mision ato po pranojnë edhe lehtësira gjatë operimit të tyre, për të kualifikuar për regjistrim të ndërmarrjes sociale ju mund të jeni biznese apo organizata qeveritare që ofroni shërbime të ndryshme për grupet e cenueshme përfshirë këtu edhe shërbime shëndetësore rezidenciale psiko-sociale dhe të aftësimit profesional. Gjithashtu përveç ofrimit të shërbimeve edhe kompanitë apo OJQ-të që punësojnë së paku 30% të punonjësve nga grupet e cenueshme dhe bëjnë prodhimin apo përpunimin e produkteve mund të aplikojnë për të marr statusin e ndërmarrjeve sociale”.

    “Para se të aplikojnë bizneset apo OJQ-të do të definojnë qartë fushëveprimtarinë e tyre klasifikimin se cilën kategori janë A apo B si dhe mënyrën e shpërndarjes së fitimit duke pasur parasysh se deri më 30% e fitimit mund të shpërndahet për paga ndërsa pjesa tjetër shkon për zgjerim apo investim në veprimtarinë e tyre. Pas aplikimit për të fituar statusin e ndërmarrjes sociale OJQ-të apo bizneset dërgojnë dokumentet e nevojshme për aplikim të divizioneve për ndërmarrje sociale në Ministri dhe pas aplikimit Komisioni për vlerësim të statusit ndërmarrjes sociale pajis organizatën që kualifikohet me certifikatën e ndërmarrjes sociale, gjithashtu ndërmarrjet sociale të regjistruara lirohen edhe nga tatimi në fitim që ato gjenerojnë gjatë ushtrimit të aktiviteteve të tyre si dhe ju nënshtrohen vlerës 0 të tatimit mbi vlerën e shtuar kur importojnë lëndën e parë linjat e prodhimit dhe makineritë apo pajisjet e procesit të prodhimit apo ofrimit të shërbimit. Përkushtimi i Qeverisë zhvillimin e sektorit të ndërmarrësisë sociale mbetet i vazhdueshëm dhe fillimi i regjistrimit në këtë ndërmarrjeve është bërë vetëm hapi i parë”.

  • Ministrja Haxhiu dëshmon për rastin e Astrit Deharit

    Ministrja Haxhiu dëshmon për rastin e Astrit Deharit

    Ministria e Drejtësisë, Albulena Haxhiu, ka dëshmuar të hënën për rastin e vdekjes së aktivistit të VV-së, Astrit Dehari, raporton Ekonomia Online. Pas intervistimit, në ambientet e Ministrisë së Drejtësisë, Ministrja Haxhiu do të mbajë konferencë për medie.

    Përderisa avokati i familjes Dehari, Tomë Gashi ka bërë me dije se i është refuzuar kërkesa e tij që gjatë intervistimit të ministres të jetë i pranishëm.

    Gashi e ka cilësuar prokurorinë si “selektive”.

    Më 5 nëntor të vitit 2016, në orët e para të mbrëmjes u raportua për një vdekje të një personi brenda Qendrës së Paraburgimit në Prizren. Vetëm pak minuta më pas u raportua se brenda qelisë së tij ishte gjetur i vdekur ish-aktivisti i LVV-së, Astrit Dehari, i cili aty po qëndronte nën dyshimet se ka qenë një nga gjashtë personat që mori pjesë në sulmin e gushtit të po atij viti me granatahedhëse në Kuvendin e Kosovës.

    Deklarata e parë nga Policia e Kosovës në atë kohë ishte se Dehari kishte vdekur si pasojë e medikamenteve. Këtë deklaratë e kishte thënë ish-drejotri i Policisë së Rajonit të Prizrenit, Nexhmi Krasniqi, i cili për një kohë të gjatë kishte mohuar se kishte dhënë këtë deklaratë.

    Vdekja e Astrit Deharit, menjëherë u cilësua si e dyshimtë, ndërsa u kërkua që ndaj tij të bëhej edhe autopsia nga Instituti i Mjekësisë Ligjore.

    Ish-kryeprokurori i Prizrenit, Sylë Hoxha, i cili tash është në pension, pesë vite më parë kishte thënë se Astrit Dehari kishte pasur shenja në qafë.

    Në ditën kritike, menjëherë u njoftua edhe se Ministria e Drejtësisë në atë kohë e udhëhequr nga ish-ministrja e Drejtësisë Dhurata Hoxha, se kishin filluar hetimet për të zbardhur rrethanat e vdekjes së Astrit Deharit.

    Astrit Dehari kishte vdekur në ditën e 68-të të qëndrimit të tij në paraburgim në Prizren.

    LVV në atë kohë tha se vdekja e Astrit Deharit ishte përgjegjësi institucionale. Dyshime rreth vdekjes së Astrit Deharit pati edhe familja e tij.

    Më datë 7 nëntor të vitit 2016, u krye edhe autopsia e trupit të Astrit Deharit ndërsa, Sylë Hoxha atë kohë kishte dalë me deklaratë se ish-aktivisti i LVV-së kishte vdekur si pasojë e asfiksisë apo problemeve me frymarrjen.

  • Tempertura të ulëta me reshje bore, parashikimi i motit për 7 ditët e ardhshme

    Tempertura të ulëta me reshje bore, parashikimi i motit për 7 ditët e ardhshme

    Besim Aliu nga Instituti Hidrometeorologjik i Kosovës, për emisionin e mëngjesit ALARM në ATV, tha se temperaturat e ulëta do të vazhdojnë të mbretërojnë në vendin tonë edhe gjatë kësaj jave.

    Ai tregoi se dita më e nxehtë e javës do të jetë sot, ndërsa gjatë ditë në vazhdim, temperaturat do të lëvizin deri në -4.5 gradë Celsius.

    Ky është parashikimi i plotë i motit nga IHMK për javë që sapo kemi hyrë:

    Vikendi ishte i ftohtë, por këto masa ajrore të ardhura nga pjesa veriore e kontinentit do të jenë të qëndrueshme edhe gjatë kësaj jave. Temperaturat minimale në viset e larta do të regjistrohen në -3 gradë Celsius, kurse në viset e ulëta deri në -2 gradë Celsius.

    Sot qytetin më të ftohtë e kishim qytetin e Mitrovicës me -2 gradë Celsius, kur qyteti i Prizrenit ishte me 0 gradë Celsius.

    Qytetet tjera kanë pasur temperaturë minimale me -1 gradë Celsius.

    Temperatura 500 metra mbi nivel tokës, do të thotë e matur në Ferizaj, ishte -4.5 gradë Celsius, që nënkupton se në shtresa të ulëta kemi pasur edhe ngrica të dobëta dhe brymë.

    Dihet se bryma është një fenomen apo dukuri që na ndikon negativisht në fushën e perimo-kulturës.

    Nga dita e nesërme, pas ditë do të kemi zhvillim të vranësirave të cilat në orët e pas ditës do të sjellin reshje shiu, reshjet do të vazhdojnë edhe në ditën e mërkurë dhe do të jenë të intensitetit mesatar deri të lartë, kështu që temperaturat pastaj do të ulën. Sot ditë e hënë, do të jenë temperaturat më të larta, diku 15 gradë Celsius. Minimalja gjatë kësaj jave do të lëvizin nga -2 gradë Celsius deri në 4 gradë Celsius, kurse maksimalja nga 5 gradë Celsius deri në 15 gradë Celsius.

    Kjo vlerë 15 gradë Celsius do të jetë sot, kurse ditët tjera do të jenë temperaturat më të ulëta për shkak të reshjeve, kurse në vise të larta, përderisa në viset e ulëta kemi reshje shiu, në vise të larta me lartësi mbi detare mbi 1000 metra, do të kemi reshje bore. Do të thotë atje vetëm se kemi deri tani reshje orte, por sasitë e tyre do të rriten.

    Do të fryjë erë kryesisht nga veri perëndimi dhe jug perëndimi apo edhe veri lindja do të kemi intervale, shpejtësia e së cilës do të jetë nga 1-9 apo 10 metra për sekondë, pra do të jetë erë mesatare e lehtë dhe lokalisht e fortë.

    Më shumë informata për parashikimin e motit i gjeni në videon më poshtë: