Tag: Ballina

Përgatiti: Fatlum Jashari

Zbulimi në këtë fazë të hetimit nga Kryeministri dhe Ministri i Punëve të Brendshme i provave, fakteve dhe identitetit të të dyshuarve për sulmin terrorist-paramilitar të 24 shtatorit, sipas juristëve, bie ndesh me Kodin Procedurës Penale.

Publikimi pa dakordim paraprak me Prokurorinë, sipas juristit Ylli Zekaj, tregon mungesë ndjeshmërie ndaj rastit dhe përpjekje për të fituar poenë politikë.

“Është fazë shumë e hershme, tani kur nuk kemi aktakuzë me ardhë deri te një shpalosje e tillë e provave dhe fakteve, e besoj që kjo ka qenë edhe arsyeja pse Prokuroria, me të drejtë, nuk ka marrë pjesë në konferencë. E që jo rrallë ndodh që spektri politik, qoftë ai kryeministri apo ministri, të zbulojnë prova dhe fakte, të cilat edhe me Kodin e Procedurës Penale janë të ndaluara të zbulohet në këtë fazë, për shkak se ato mund të dëmtojnë integritetin e hetimeve, dhe zhvillimin e një hetimi efikas dhe efektiv që në fund të mund të rezultojë që të gjithë ata të jenë pjesë e aktakuzës”, tha Zekaj.

Krahas vlerësimit se deklaratat e së shtunës përbëjnë presion ndaj Prokurorisë për përmbyllje të hetimit, juristët përmendin dëmet e shkaktuara.

“Në rast se publikohen informata të tilla natyrisht që e pengojnë në masë të konsiderueshme procesin hetimor, andaj në rrjedhë të kësaj kushdo që ka informatat të tilla, aq më tepër krerët e institucioneve të larta shtetërore, duhet të rezervohen nga plasimi në publik i informatave të tilla, aq më tepër përdorimi i emrave të përveçëm, të cilët natyrisht nëse kanë qenë në masa të fshehta të hetimit, atëherë potencialisht e kanë dëmtuar në masë të madhe procesin hetimor”, tha Ardian Bajraktari, jurist.

“Shumica prej tyre mund tani mund të kalojnë me lehtësi territorin e Kosovës, të dalin në Serbi, dhe të jenë të paqasshëm për organet e rendit. Për më tepër, në këtë fazë të procedurës janë të lejuara masat e hetimit dhe vëzhgimit, që me zbulimin e këtyre provave dhe fakteve janë të pamundura të aplikohen ndaj të njëjtëve dhe dëmtojnë seriozisht hetimet”, tha juristi Ylli Zekaj.

Prokuroria është duke vijuar hetimin lidhur me sulmin terrorist-paramilitar në Banjskë, ndërsa tre të arrestuarit për rastin mbesin në paraburgim.

Përgjegjësinë për udhëheqjen dhe organizimin e sulmit më 24 Shtator, në të cilin mbeti i vrarë rreshteri i Policisë, heroi Afrim Bunjaku, disa ditë pas ngjarjes e mori atëkohë nënkryetari i Listës Serbe, Milan Radojcic.

Përgatiti: Kastriot Tahiri

Në Katedralen Shën Nënë Tereza, në Prishtinë mbrëmë u mblodhën shumë besimtar të krishterë, për të festuar Krishtlindjen.

Ipeshkvi i Kosovës, Imzot Dodë Gjergji, foli për rëndësinë e Kishës dhe tolerancën midis njerëzve në Kosovë.

Të mos pushojmë kurrë duke kërkuar të vërtetën dhe që ajo të na gjejë neve, të promovojmë dashurinë me njëri-tjetrin dhe tolerancën ndërfetare si pasuri e paçmueshme në mesin tonë, por duke e ngritur në dimension tjetër. Nëpërmjet paqes, lirisë e dashurisë çdo njëri të zbulojë bukurinë e shpirtit dhe atë t’ia paraqesë Krijuesit dhe nëse gjen guximin të afrohet për t’u pagëzuar”, tha Dodë Gjergji.

Një pjesë e fjalës së Ipeshkvit iu kushtua edhe të sëmurëve dhe atyre pa përkujdesje.

“Dëshiroj me gjithë zemër t’i lutem Zotit për të gjithë njerëzit që kanë nevojë, për të sëmurët, për ata të cilët u mungon kujdesi, dashuria, sidomos lutem për paqe në botë, sepse paqja në shumë vende është duke shkatërruar fatin e shumë njerëzve, jetën e shumë të pafajshmëve dhe ne që kemi përjetuar këtë të keqe të angazhohemi që të ruajmë paqen pas nesh”, tha Dodë Gjergji.

Në katedralen “Shën Nënë Tereza” në Prishtinë është mbajtur mesha e ditës së Krishtlindjes, kurse gjatë ditës në shumë kisha katolike në Kosovë, ka pasur organizime të ndryshme për nder të kësaj feste.

Sindikata e Bashkuar e Arsimit në Kosovë (SBAShK) ka kërkuar nga MAShT-i që mësimdhënësve të dalluar tu jepet paga e 13-të.

Pas kësaj kërkese ka reaguar zëvendësministri i Arsimit, Taulant Kelmendi.

Ai ka thënë se nuk ka kërkesë zyrtare lidhur me këtë çështje.

“Nuk ka ndonjë ftesë zyrtare, e as ndonjë iniciativë zyrtare për diçka të tillë”, deklaroi Kelmendi për Front Online.

Kreu i SBASHK-ut, Rrahman Jasharaj, i është kundërpërgjigjur këtij të fundit lidhur me deklaratën.

Duke ju referuar Kelmendit, Jasharaj tha se ai ka ardh vonë në këtë detyrë.

Sipas Jasharajt, zëvendësministri i Arsimit duhet ta dijë që çështjet e rregulluara me kontratë nuk kanë nevojë për kërkesë individuale.

“Z.Taulant ka ardh vonë në këtë detyrë e ai duhet ta dijë që çështjen që janë të rregulluara me kontratë nuk ka nevojë për secilin të bëhet kërkesë veç e veç por këtë kërkesë të dërgojnë tek personeli arsimor dhe DKA-së së punëdhënësve”, ka deklaruar Jasharaj për Front Online.

Kreu i SBASHK-ut tha se e drejta e çdo mësimdhënësi është ta kërkojnë të drejtën e tyre.

Duke aluduar në rezultatet e dobëta në testin ‘PISA’, Jasharaj thotë se kjo mund të jetë pengesë që mos të realizohet kjo kërkesë.

“Është e drejtë individuale e mësimdhënësve ta kërkojnë një të drejtë që ja siguron kontrata kolektive. Vendimi është marr kur është nënshkruar kontrata dhe kjo çështje është rregulluar në kontratën kolektive, por për tu realizuar kjo e drejtë lidhët edhe me arritjet më të larta. Neve na gjeti me një situatë të keqe edhe rezultatet në PISA dhe mund të jetë pengesë që të realizohet kjo kërkesë e secilit individë“, është shprehur ai.

Autoritetet në Kosovë kanë ngritur alarmin për sulme të reja të mundshme në veri të Kosovës. Kryeministri Albin Kurti tha, se Millan Radoiçiq, ish-nënkryetar i Listës Serbe, që mori përgjegjësinë për sulmin në Banjskë, po përgatit sulme të reja ndaj Kosovës së bashku me grupin që kreu sulmin e 24 shtatorit ku mbeti i vrarë një polic i Kosovës dhe më pas tre sulmues.

Në një konferencë në fundjavë, duke u bazuar në informacione të inteligjencës kosovare, Kurti përmendi disa lokacione në Serbi, ku grupi sipas tij, po kryen trajnime, përfshirë poligone ushtarake të Serbisë. Pretendimet e kryeministrit të Kosovës u hodhën menjëherë poshtë nga Ministria Serbe e Mbrojtjes. Kryeministri kosovar nuk ofroi dëshmi, por sipas Kurtit, “Milan Radoiçiq mban takime të rregullta me inteligjencën serbe dhe se pjesëtarët e grupit të tij, paguhen 2.000 euro në muaj”.

Kurti: Radoiçiq përgatit sulme të tjera në Kosovë

“Kumtimi i urdhrit për sulmin në Banjskë, ishte dhënë në ambientet e kompanisë Novi Pazar Put, në pronësi të Zvonko dhe Zharko Vesellinoviq, që kanë qenë partnerë biznesi të Radoçiqit. Pas sulmit terrorist, Millan Radoiçiq u lirua nga gjykata serbe në kohë rekorde. Ai tash po vazhdon përgatitjet për sulme të tjera në Kosovë, bashkë me disa pjesëtarë të organizatës terroriste Mbrojtja Civile”, tha kryeministri Kurti. Duke zbuluar të dhëna, kryeministri kosovar tha se “Radoiçiq është duke mbajtur takime të rregullta me zyrtarë të lartë të inteligjencës serbe (BIA).

“Ambientet e firmës, Jabllanovica në Rashkë, si ato të Novi Pazar Put, po përdoren për strehimin dhe ruajtjen e automjeteve dhe mjeteve eksplozive për sulmet e ardhshme nga Radoiçiq dhe grupi i tij. Realisht, në këtë ndërtesë strehohen disa anëtarë të ‘Mbrojtjes Civile’, që kryejnë vëzhgime në territorin e Kosovës”, tha Kurti. Ai po ashtu, përmendi edhe një poligon të ushtrisë serbe në Peshter, ku sipas tij, kanë rinisur ushtrimet e një grupi prej 60 personash të “Mbrojtjes Civile”, që sipas Kurtit “kanë marrë pjesë në sulmin në Banjskë”. “Mbrojtja Civile” dhe “Brigada e Veriut”, dy organizata të serbëve të veriut në Kosovë cilësohen organizata terroriste.

“Ky grup kishte planifikuar sulme ndaj Policisë tonë pas përfundimit të zgjedhjeve në Serbi në lokacionet kufitare që lidhen me rrugët ilegale alternative”, tha Kurti. Sipas tij, Kosova në bashkëpunim me partnerët ndërkombëtarë, është e përgatitur që të zmbrapsë sulme të tilla.

Sekretari i Përgjithshëm i NATO-s, Jens Stoltenberg dhe kryeministri Kurti para takimit në Prishtinë 20.11.2023Sekretari i Përgjithshëm i NATO-s, Jens Stoltenberg dhe kryeministri Kurti para takimit në Prishtinë 20.11.2023

Sekretari i Përgjithshëm i NATO-s, Jens Stoltenberg dhe kryeministri Kurti para takimit në Prishtinë 20.11.2023Fotografi: Office of the Prime Minister in Kosovo

Serbia mohon akuzat

Sipas të dhënave të Ministrisë së Brendshme të Kosovës, që nga viti 2021 e deri më tash, “Policia e Kosovës ka qenë cak i 114 sulmeve në veri”, kryesisht të kryera nga grupi, që kreu sulmin në Banjskë të Zveҫanit.

Menjëherë pas këtyre deklarimeve të kryeministrit Kurti, Ministria e Mbrojtjes së Serbisë, mohoi këto akuza duke i quajtur madje “absurde”. “Është gënjeshtër dhe absurditet i plotë që terrenet stërvitore të Forcave të Armatosura të Serbisë po përdoren për stërvitjet e ndonjë njësie, me përjashtim të njësive të Forcave të Armatosura të Serbisë dhe herë pas here edhe të Ministrisë së Punëve të Brendshme”, tha Ministria Serbe e Mbrojtjes, duke hedhur poshtë po ashtu se “ka plane për sulme në territorin e Kosovës”.

Shtimi i prezencës së NATO-s pas sulmit të 24 shtatorit në Kosovë

Sulmi i 24 shtatorit në Banjskë të veriut të Kosovës është cilësuar si më i rëndi që nga shpallja e pavarësië së Kosovës, duke ngritur edhe shqetësimin faktorit ndërkombëtar për stabilitet në vend. Sekretari i Përgjithshëm i NATO-s, Jens Stoltenberg, në konferencën e tij të fundivitit tha, se “ruajtja e një mjedisi paqësor dhe të sigurt në Kosovë është çelësi për stabilitetin e rajonit më të gjerë të Ballkanit Perëndimor.

”Në këtë periudhë të vitit, falënderimet dhe respekti im më i thellë shkon për forcat tona të NATO-s. Pa ju nuk do të kishte NATO, nuk do të kishte siguri dhe nuk do të kishte liri. Shërbimi i tyre na mban pa rreziqe, të sigurt dhe të lirë”, tha Stoltenberg. Aleanca veriatlantike, këtë vit dërgoi qindra trupa shtesë duke e rritur numrin në 4600 trupa. Rritja e numrit të ushtarëve u bë pas trazirave në veri pas vendosjes së kryetarëve shqiptarë në katër komunat me shumicë serbe, ku serbët lokalë plagosën dhjetëra ushtarë të KFOR-it si dhe pas sulmit në Banjskë më 24 shtator, ku grupe serbësh të armatosur sulmuan policinë e Kosovës, duke vrarë një polic.

Thirrje për heqjen e masave ndëshkuese

Sidoqoftë, udhëheqësit e Kosovës i bënë thirrje Bashkimit Evropian që të heqë masat ndëshkuese ndaj Kosovës dhe të ndëshkojë Serbinë për siç thonë “veprime armiqësore ndaj Kosovës dhe largim nga marrëveshja për normalizimin e marrëdhënieve ndërmjet të dyja vendeve”.

Presidentja e Kosovës, Vjosa Osmani, ka thënë se “masat e vendosura nga Bashkimi Evropian pas tensioneve të fundit ishin të padrejta”. “Ato që janë kërkuar nga Kosova për atë që e quanin depërshkallëzim, tashmë kanë ndodhur dhe masat është dashur të hiqeshin tashmë, sepse, janë masa që në mënyrë të padrejtë ndikojnë negativisht në jetën e qytetarëve tanë për shkak të projekteve që janë bllokuar, të cilat kryesisht u dedikohen komunave”, thotë Presidentja Osmani.

Sipas saj, “ka tendencë nga disa që tani masat të keqpërdoren si mënyrë për të kushtëzuar Kosovën për çështje komplet të ndryshme nga ato për të cilat janë vendosur”, dhe një qasje e tillë sipas Presidentes Osmani është e papranueshme. Edhe kryeministri Albin Kurti, na ana e tij, në një postim në rrjetet sociale, kërkoi heqjen e masave ndëshkuese dhe që Kosovës t’i jepet statusi i vendit kandidat për anëtarësim në Bashkimin Evropian dhe në programin e Partneritetit për Paqe me NATO-n. “Pikërisht kështu partnerët tanë perëndimorë do t’i kërkonin fuqishëm Serbisë të zbatonte detyrimin e njohjes de facto të Kosovës. Kurti shfaqi shpresën se “Bashkimi Evropian dhe Shtetet e Bashkuara do t’i vendosin sanksione Serbisë, për sjelljet dhe veprimet armiqësore e agresore ndaj Kosovës, dhe për heqjen dorë nga marrëveshja për normalizimin e marrëdhënieve”.

Marrëveshja e arritur në Ohrër me ndërmjetësim të BE-së, kërkon marrëdhënie të mira fqinjësore ndërmjet Kosovës dhe Serbisë. Udhëheqësit më të lartë evropianë Kosovës i kërkuan themelimin e Asociacionit të Komunave me shumicë serbe, ndërsa Serbisë, njohjen de facto të Kosovës.

Na ndajnë edhe pak ditë nga 1 Janari, kur hynë në fuqi liberalizimi i vizave për kosovarët.

E për të udhëtuar drejt shteteve të zonës Shengen, qytetarët duhet të jenë të pajisur me pasaportë të Kosovës.

Një numër i madh i qytetarëve kosovar kanë aplikuar që të pajisen me këtë dokument.

Nga fillimi i vitit 2023, 287 mijë e 965 kosovar janë pajisur me pasaporta.

Kështu ka bërë të ditur në një përgjigje për Front Online nga Ministria e Punëve të Brendshme.

“Qytetarë të pajisur me pasaporta për vitin 2023 gjithsej janë 287965”.

209 mijë e 755 qytetarë u pajisen me letërnjoftim gjatë 2023-tës

Numri i qytetarëve që janë pajisur me letërnjoftim gjatë 2023-tës ka shkuar tek 209755.

Këtë statistikë e kanë bërë të ditur nga MPB-ja.

“Qytetarë të pajisur me letërnjoftime për vitin 2023 gjithsej janë 209755”, thuhet në përgjigjen e tyre.

E numri për letërnjoftime për herën e parë që kanë aplikuar qytetarët është me i ulët se ai parapraku.

“Qytetarë të cilët janë pajisur për herë të parë më letërnjoftim gjithsej janë 41798”.

Kaq persona janë të pajisur me patentë shoferë në Kosovë

Nga muaji janar 2023 e deri më tani gjithsej 93 mijë e 385 shofer të rinj u pajisen me patent shofer.

Ndërsa qytetarë që kanë aplikuar për herën e parë për këtë kategori është mbi 40 mijë.

Statistikat janë siguruar nga Ministria e Punëve të Brendshme për Front Online.

“Qytetarë të pajisur me patentë shofer në vitin 2023 gjithsej janë 93385. Qytetarë të pajisur për herë të parë me patentë shofer këtë vit gjithsej janë 40308”, thuhet në përgjigjen e MPB-së.

Mbi 2 mijë qytetarë hoqën dorë nga shtetësia kosovare gjatë këtij viti

Për shkak se në shumicën e shteteve evropiane nuk lejohet dyshtetësia, shumë kosovarë gjatë 2023 hoqën dorë nga shtetësia e Kosovës.

2 mijë e 938 persona u liruan nga shtetësia.

Kështu thonë nga MPB-ja për Front Online.

“Gjatë periudhës Janar-Nëntor 2023 nga shtetësia e Republikës së Kosovës janë liruar 2,938 persona”.

Nga fillimi i këtij viti e deri më tani 654 qytetarë kanë marrë shtetësi kosovare.

“Gjatë periudhës Janar-Nëntor 2023, kanë aplikuar 1,174 persona për fitim të shtetësisë së Republikës së Kosovës dhe prej tyre 654 persona kanë marrë shtetësinë e R. Kosovës”, thuhet në përgjigjen e MPB-së.

Ndryshe, që nga tetori i 2022-tës deri në fund të janarit të 2023-tës Kosova është përballur me mungesë të materialeve për prodhimin e disa dokumenteve si pasaporta, patentë-shoferët e letërnjoftimeve.

MPB pati bërë të ditur me 26 janar se gjatë asaj jave ishte pajisur me material bazik për prodhimin e dokumenteve personale.

Deri në gjysmë ore është koha e pritjes në pikën kufitare në Merdarë për të hyrë në Kosovë.

Te Dheu i Bardhë pritjet janë deri në 15 minuta dhe 10 minuta në Jarinje.

Ndërkaq, në pikat e tjera kufitare ka pritje deri në 5 minuta.

Një vendim i trupit gjykues në Hagë rreth vizitave e telefonatave për ish-krerët e Ushtrisë Çlirimtare të Kosovës në Hagë, duket se ka krijuar shumë probleme në komunikimin e Thaçit e të tjerëve me familjen.

Me një parashtresë urgjente që ata e kanë dorëzuar tek trupi gjykues, janë ankuar se ish-krerët e UÇK-së po kanë shumë probleme të komunikojnë me fëmijët e pjesën të familjes.

Parashtresën të cilën e ka dorëzuar mbrojtja e Rexhep Selimit, e të cilën e ka parë edhe Nacionale, e kanë përkrahur edhe avokatët e Hashim Thaçit e Kadri Veselit.

“Mbrojtja e Selimit pohon se kërkohet një ndërhyrje urgjente gjyqësore për të siguruar që vendimi i Panelit të zbatohet në mënyrë të drejtë dhe të përshtatshme. Mbrojtja e Selimit kërkon që Paneli të lëshojë një urdhër që urdhëron Sekretarin që të veprojë në përputhje me Vendimin e Panelit gjatë zbatimit të modifikimit të kushteve të paraburgimit. Konkretisht, Mbrojtja e Selimit kërkon që Paneli të urdhërojë Sekretarin që të ndryshojë zbatimin e Vendimit në atë mënyrë që: (i) t’i lejojë z. Selimi të thërrasë gruan dhe fëmijët e tij nga Qendra e Paraburgimit pa kufizime të mëtejshme; (ii) rrit kohëzgjatjen e vizitave personale jo të privilegjuara nga 40 minuta në 2 orë për vizitë; (iii) rrit kohëzgjatjen e vizitave private nga gjysmë dite në një ditë të plotë; dhe (iv) lejon z. Selimi të caktojë vizitat me fleksibilitet më të madh dhe njoftim më pak të avancuar”, thuhet në kërkesën e mbrojtjes së Rexhep Selimit.

Nga kërkesa, del se vendimi i gjyqtarëve që parashihet disa kushte shtesë për vizita e telefonata, po has në vështirësi.

Kërkesën e kanë përkrahur edhe avokatët e Hashim Thaçit e Kadri Veselit.

“Si Mbrojtja e Thaҫit dhe Mbrojtja Veseli i bashkohen Kërkesës. Thaҫi dhe Veseli kërkojnë nga Paneli që të urdhërojë Sekretarin që të ndryshojë zbatimin e Vendimit në atë mënyrë që: (i) lejon z. Thaҫi dhe z. Veseli të thërrasin gruan dhe fëmijët e tyre nga Njësia e Menaxhimit të Paraburgimit pa kufizime të mëtejshme; (ii) rrit kohëzgjatjen e vizitave të paprivilegjuara personalisht nga 40 minuta në 2 orë për vizitë; (iii) rrit kohëzgjatjen e vizitave private nga gjysmë dite në një ditë të plotë; dhe (iv) i lejon z. Thaҫi dhe z. Veseli të planifikojnë vizita me fleksibilitet më të madh dhe njoftim më pak të avancuar”, thuhet në kërkesë.

Madej, avokatët kanë alarmuar se të akuzuarve po iu shkelet e drejta elementare për jetën familjare

“Mbrojtja Thaҫi më tej parashtron se: (i) kufizimet e vendosura e privojnë z. Thaҫi nga gëzimi kuptimplotë i të drejtës së tij për jetën familjare; për anëtarët e ngushtë të familjes; 20 (iii) lejimi i z. Thaҫi për të bërë telefonata me anëtarët e familjes së tij të ngushtë në datat dhe oraret e zgjedhjes së tij, do të ishte në përputhje me Vendimin;21 (iv) kohëzgjatja dhe planifikimi i vizitave private të z. Thaҫi kërkon një fleksibilitet më të madh”, thuhet në kërkesë.

Avokati i Kadri Veselit është ankuar se fëmijëve të Kadri Veselit po iu ndikohet edhe shkollimi, varësisht nga koha e vizitave e telefonatave.

“Mbrojtja Veseli kërkon më tej: (i) sqarimin se fëmijët e mitur të z. Veseli, të cilët ende jetojnë në shtëpi, të lejohen t’i bashkohen telefonatave së bashku me gruan e z. Veseli;24 dhe (ii) që të tregohet kujdes më i madh për të siguruar që shkollimi i fëmijëve të z. Veseli të mos ndikohet nga caktimi i vizitave personale familjare”, thuhet në kërkesë.

Megjithatë, gjithë këto kërkesa janë rrëzuar nga trupi gjykues. Sipas vendimit, kjo kërkesë duhet t’i dorëzohet Zyrës së Sekretarit, në të cilën janë ankuar avokatët.

“Sipas Udhëzimit të Praktikës mbi Ankesat, dhe siç urdhërohet në Vendimin e Panelit, një ankesë e tillë duhet t’i dorëzohet drejtpërdrejt Sekretarit. Përveç nëse specifikohet ndryshe në vendimin e Panelit, i paraburgosuri ka 30 ditë kalendarike për të paraqitur një ankesë të tillë pas marrjes së vendimit me shkrim të Sekretarit. duke refuzuar të rishqyrtojë vendimin fillestar të Sekretarit. Paneli më tej vëren se, përveç nëse urdhërohet ndryshe në Vendimin e Panelit, i paraburgosuri ka të drejtë të kërkojë rishikim gjyqësor brenda 30 ditëve nga vendimi i Sekretarit për rishqyrtim”, thuhet në vendim.

“Paneli thekson, për më tepër, se i ka pajisur Sekretarin me diskrecion të gjerë për të rregulluar dhe zbatuar vendimin e Panelit në një mënyrë në përputhje me kushtet e atij vendimi, të drejtat e të akuzuarit dhe konsideratat praktike të rëndësishme për zbatimin efektiv të Vendimit. Prandaj, çdo ankesë kundër zbatimit të vendimit të Panelit duhet të vërtetojë se Sekretarja ka shkuar përtej lirisë së veprimit që i është dhënë asaj nga Paneli për të zbatuar vendimin e tij dhe/ose e ka ushtruar atë diskrecion në mënyrë arbitrare”, përfundon vendimi.

Prokuroria kishte kërkuar madje ndalimin e plot të vizitave e telefonatave për ish-krerët e UÇK-së, por vendimi ishte refuzuar. Kjo pas dyshimeve se ata kanë tentuar të ndajnë informacione për dëshmitarë me vizitorët.

Barrë të rëndë për kryeministrin Kurti e kanë cilësuar njohësit politikë çështjen e formimit të Asociacionit të komunave me shumicë serbe në Kosovë.

Kjo sipas analistëve politik pritet të bëhet shkak që vitin e ardhshëm të ketë zgjedhje të reja në Kosovë.

“Asociacioni është shndërruar në një element të patejkalueshëm dhe çdo humbje kohe në realizmin e tij praktik shkon në dëm të qeverisë dhe të shtetit të Kosovës. Kjo nënkupton izolimin, alternativa e mosrealizimit të Asociacionit është izolimi dhe vazhdimi i masave ndëshkuese që janë aktualisht. Kryeministri Kurti është në pozitë të palakueshme sepse përderisa ka qenë krye opozitar ka qenë kundërshtari më i madh i Asociacionit, ndërsa tani si kryeministër është vetëdijesuar se s’ka asnjë mundësi tjetër që të bllokojë procesin, por mund të neglizhojë dhe të humbas kohë”, tha Artan Muhaxhiri, analist politik.

Njohësi i rrethanave politike, Dritëro Arfi, vlerëson se kryeministri Kurti, me pranimin e Asociacionit dhe me themelimin e tij, duhet t’i drejtohet sovranit për legjitimet të ri.

“Unë mendoj se do të krijohen zgjedhje të reja sepse qeveria e ka një problematik, pasi një mënyrë e ka deligjetimuar vetveten me pranimin e Asociacionit. Kjo nuk është gjë e keqe, por tash duhet të kërkojë votën për ri legjitimim dhe jo vetëm qeveria, por duhet të kemi një konsensus shoqëror, pasi këtu edhe partitë opozitare e kanë një pjesë të përgjegjësisë, jo vetëm qeveria. Ky është një problem shoqëror dhe nacional, ku nuk duhet t’i lihet përgjegjësia vetëm qeverisë. Qeveria e ka përgjegjësinë është e vërtet, por duhet të gjejë mekanizmat që të unifikojë faktorin shqiptar dhe shoqëror se si të shkojmë tutje”, tha Arfi.

Ditë më parë, në samitin BE – Ballkani Perëndimor, presidentja Vjosa Osmani tha se fillimisht draft-statuti i Asociacionit duhet të shkojë në Gjykatën Kushtetuese dhe nëse del të jetë në pajtim me Kushtetutën, Kosova do ta zbatojë atë.

Më shumë detaje i gjeni në Edicionin Qendror të lajmeve në videon më poshtë: