ATV

Tag: Ballina

  • Vrasja e Donjeta Pajazitaj, prova kryesore në duart e FBI-së

    Vrasja e Donjeta Pajazitaj, prova kryesore në duart e FBI-së

    Përgatiti: Arian Hajdaraj

    Pas 8 vjetësh hetime, Gjykata Supreme e liroi Naser Pajazitajn nga akuzat për vrasjen e Donjeta Pajazitajt. Por, Prokuroria e Pejës nuk i ka ndalur hetimet për rastin.

    Së fundmi, njëra prej provave është dërguar për ekzaminim të mëtejmë, në Shtetet e Bashkuara të Amerikës.

    “Provën kryesore të kësaj çështjeje penale, e kemi dërgu për ekzaminim në SHBA, në institucionin më të lartë, pasi ta pranojmë raportin, do të merren veprimet ligjore konform gjetjeve të raportit”, tha zëdhënësi i Prokurorisë së Pejës, Shkodran Nikçi.

    Televizioni merr vesh se bëhet fjalë për videon në të cilën shihet Naser Pajazitaj duke e marrë me veturë një vajzë në qendër të fshatit. Ndryshe nga ekzaminimi i parë në një shtet tjetër që nuk dha rezultat, analiza tani pritet më me optimizëm.

    “Kjo provë është ekzaminuar në Turqi, por nuk kemi pranuar rezultate të detajuara. Jemi optimist se do ketë gjetje”, tha Nikçi.

    Donjeta Pajazitaj u gjet e vrarë në bjeshkët e fshatit Strellc të Deçanit, më 17 dhjetor të 2015-ës. Për vrasjen e saj u akuzua kushëriri, Naser Pajazitaj. Por me vendim të Gjykatës Supreme, ai përfundimisht u lirua nga akuzat për vrasje më 6 prill, me arsyetimin se nuk ka prova të drejtpërdrejta që argumentojnë fajësinë e tij.

    Pas lirimit, Naser Pajazitaj kërkoi mbi 1 milion euro kompensim për kohën që qëndroi në burg. Këshilli Gjyqësor ia ofroi atij 60 mijë euro, shumë të cilën ai e refuzoi.

  • Kushtetuesja vendos për Ligjin e pagave, rrëzon nenet e Ligjit që zvogëlonin pagat e larta të zyrtarëve publikë

    Kushtetuesja vendos për Ligjin e pagave, rrëzon nenet e Ligjit që zvogëlonin pagat e larta të zyrtarëve publikë

    Gjykata Kushtetuese ka aprovuar kërkesën e Avokatit të Popullit i cili e kishte dërguar në Gjykatën Kushtetuese Ligjin për Pagat në Sektorin Publik, me kërkesë për vlerësimin e përputhshmërisë së tij me Kushtetutën.

    Për këtë Ligj, Avokati i Popullit kishte pranuar 104 ankesa nga subjekte të ndryshme të sektorit publik.

    Sot, është publikuar aktgjykimi i Gjykatës Kushtetuese lidhur me këtë kërkesë, ku bëhet e ditur se gjykata ka rrëzuar disa nga nenet e Ligjit të Pagave, të cilin e miratoi Kuvendi i Kosovës, e që u hartua nga Qeveria Kurti.

    Kushtetuesja së pari ka sqaruar, se me këtë Aktjgykim nuk do të afektohen, të gjithë ata zyrtarë, të cilëve u është ngritur paga.

    Ndërsa, ulja e pagave, për disa funksione, është konsideruar anti-kushtetuese. Kushtetuesja, i ka kërkuar Kuvendit që brenda 6 muajve, ta ndryshoj Ligjin.

    Gjykata, në njoftimin për media, thotë se njëzëri ka vendosur që të deklarojë kërkesën e pranueshme dhe të konstatojë, njëzëri, që: “(i) paragrafi 2 i nenit 2 (Fushëveprimi) dhe paragrafi 2 i nenit 45 (Shfuqizimi) në ndërlidhje me paragrafin 2 të nenit 24 (Shtesa për kushte të tregut të punës), paragrafin 5 të nenit 25 (Shtesa e performancës), paragrafin 4 të nenit 28 (Shtesa për vëllimin e punës) dhe paragrafët 2 dhe 3 të nenit 42 (Përcaktimi i ekuivalencës) të Ligjit të kontestuar, nuk janë në përputhshmëri me paragrafin 1 të nenit 4 [Forma e Qeverisjes dhe Ndarja e Pushtetit] dhe paragrafin 1 të nenit 7 [Vlerat] të Kushtetutës; (ii) paragrafi 6 i nenit 6 (Paga bazë) të Ligjit të kontestuar, nuk është në përputhshmëri me paragrafët 1 dhe 2 të nenit 46 [Mbrojta e Pronës] të Kushtetutës në ndërlidhje me nenin 1 (Mbrojtja e pronës) të Protokollit nr.1 të Konventës Evropiane për të Drejtat e Njeriut; (iii) paragrafi 2 i nenit 41 (Shtesa tranzitore) të Ligjit të kontestuar, nuk është në përputhshmëri me paragrafët 1 dhe 2 të nenit 46 [Mbrojtja e Pronës] të Kushtetutës në ndërlidhje me nenin 1 (Mbrojtja e Pronës) të Protokollit nr.1 të Konventës Evropiane për të Drejtat e Njeriut dhe paragrafin 1 të nenit 4 [Forma e Qeverisjes dhe Ndarja e Pushtetit] dhe paragrafin 1 të nenit 7 [Vlerat] të Kushtetutës; (iv) paragrafi 3 i nenit 41 (Shtesa tranzitore) të Ligjit të kontestuar, nuk është në përputhshmëri me paragrafët 1 dhe 2 të nenit 46 [Mbrojtja e Pronës] të Kushtetutës në ndërlidhje me nenin 1 (Mbrojtja e Pronës) të Protokollit nr.1 të Konventës Evropiane për të Drejtat e Njeriut dhe paragrafin 1 të nenit 24 [Barazia para Ligjit] të Kushtetutës në ndërlidhje me nenin 14 (Ndalimi i diskriminimit) të Konventës Evropiane për të Drejtat e Njeriut; (v) paragrafi 4 i nenit 41 (Shtesa tranzitore) të Ligjit të kontestuar, nuk është në përputhshmëri me paragrafin 1 të nenit 24 [Barazia para Ligjit] të Kushtetutës në ndërlidhje me nenin 1 (Ndalimi i përgjithshëm i diskriminimit) të Protokollit nr.12 të Konventës Evropiane për të Drejtat e Njeriut; (vi) paragrafët 2, 3 dhe 4 të nenit 41 (Shtesa tranzitore) dhe paragrafi 2 i nenit 45 (Shfuqizimi) të Ligjit të kontestuar, shpallen të pavlefshëm me hyrjen në fuqi të Aktgjykimit; (vii) në pajtim me paragrafin 1 të nenit 116 [Efekti Juridik i Vendimeve] të Kushtetutës, të urdhërojë Kuvendin e Republikës së Kosovës, që brenda gjashtë (6) muajsh nga hyrja në fuqi e Aktgjykimit, të ndërmarrë veprimet e nevojshme për plotësimin dhe ndryshimin e paragrafit 2 të nenit 2 (Fushëveprimi) dhe paragrafit 6 të nenit 6 (Paga bazë) të Ligjit të kontestuar, në pajtim me Kushtetutën dhe këtë Aktgjykim; (viii) deri në plotësimin dhe ndryshimin e paragrafit 2 të nenit 2 (Fushëveprimi) të Ligjit të kontestuar, paragrafi 3 i nenit 2 (Fushëveprimi), paragrafi 2 i nenit 22 (Shtesat), paragrafi 5 i nenit 24 (Shtesa për kushte të tregut të punës), paragrafi 8 i nenit 25 (Shtesa e performancës), paragrafi 7 i nenit 28 (Shtesa për vëllimin e punës) dhe paragrafi 4 i nenit 42 (Përcaktimi i ekuivalencës), zbatohen në përputhje me Kushtetutën dhe këtë Aktgjykim; dhe (ix) ky Aktgjykim hyn në fuqi më 1 shkurt 2024”.

    “Aktgjykimi fillimisht sqaron që Ligji i kontestuar është publikuar në Gazetën Zyrtare më 5 janar 2023, ndërsa ka hyrë në fuqi më 5 shkurt 2023. I njëjti është miratuar pasi ligji paraprak, përkatësisht Ligji nr.06/L-111 për Pagat në Sektorin Publik, pas kërkesës së Avokatit të Popullit, ishte shpallur në kundërshtim me Kushtetutën përmes Aktgjykimit të Gjykatës KO219/19. Aktgjykimi, më tej, sqaron që Ligji i kontestuar, me qëllim të krijimit të një “sistemi të njëtrajtshëm të pagave në sektorin publik”, shfuqizon (i) Ligjin nr.03/L-147 për Pagat e Nëpunësve Civilë; (ii) dispozita të caktuara të ligjeve të veçanta ndërlidhur me institucione dhe agjenci të pavarura; si dhe (iii) çdo ligj dhe akt tjetër nënligjor që është në kundërshtim me përcaktimet e tij. Sipas sqarimeve të dhëna në Aktgjykim, i njëjti përmes Shtojcave përkatëse, kategorizon të gjithë funksionarët/zyrtarët dhe nëpunësit publikë që bien në fushëveprimin e Ligjit të kontestuar, në pozita, grupe, klasa dhe koeficientë. Efekti i këtij kategorizimi në ndërlidhje me vlerën e koeficientit të përcaktuar përmes Ligjit nr.08/L-213 për Ndryshimin dhe Plotësimin e Ligjit nr.08/L-193 mbi Ndarjet Buxhetore për Buxhetin e Republikës së Kosovës për Vitin 2023, ka rezultuar në ngritje substanciale të nivelit të pagave të një pjese të zyrtarëve të sektorit publik dhe zbritje substanciale të nivelit të pagave të një pjese tjetër. Kategoritë e afektuara nga zbritja e nivelit të pagave, përfitojnë nga një periudhë tranzitore dy (2) vjeçare pas hyrjes në fuqi të ligjit, përkatësisht (i) gjatë vitit të parë, njëqind përqind (100%) të shtesës tranzitore dhe rrjedhimisht, përgjatë këtij viti nuk afektohen nga zbritja e nivelit të pagës; ndërsa, (ii) gjatë vitit të dytë, pesëdhjetë përqind (50%) të shtesës tranzitore. Aktgjykimi gjithashtu sqaron që nga të drejtat e periudhës tranzitore, janë përjashtuar (i) anëtarët e shërbimit të jashtëm të Republikës së Kosovës, të cilët për pasojë janë afektuar me zbritje të menjëhershme pagash përmes hyrjes në fuqi të Ligjit të kontestuar; dhe (ii) të gjithë personat që janë punësuar në sektorin publik pas hyrjes së tij në fuqi. Më tej, sipas sqarimeve të dhëna në Aktgjykim, Ligji i kontestuar gjithashtu (i) delegon përcaktimin e vlerës së koeficientit në një ligj tjetër, përkatësisht Ligjin për Ndarjet Buxhetore të Republikës së Kosovës; (ii) saktëson që zbritja e nivelit të pagës në Republikën e Kosovës mund të bëhet vetëm në rast të dy rrethanave përjashtimore, përkatësisht një “tronditje makroekonomike” apo shpalljes së gjendjes së jashtëzakonshme; (iii) saktëson rregullat e përcaktimit të kategorive të shtesave dhe kompensimeve, përfshirë tavanet/kufijtë përkatës buxhetor, duke saktësuar gjithashtu që këto çështje rregullohen ekskluzivisht me këtë ligj dhe mund të rregullohen më tej vetëm me akte të tjera nënligjore; dhe (iv) përcakton kompetencën e Ministrisë së Punëve të Brendshme (MPB), për të miratuar, ndër tjerash, çështjet që ndërlidhen me strukturën, komponentët apo nivelet e koeficienteve në institucionet publike të Republikës së Kosovës”.

    “Aktgjykimi gjithashtu sqaron që, Ligji i kontestuar tashmë ka prodhuar efektet e tij tek kategoritë të cilave u është ngritur niveli i pagës, si dhe tek kategoritë që u është zbritur niveli i pagës e që nuk i janë nënshtruar mbrojtjes përmes periudhës tranzitore, përkatësisht (i) për të gjithë funksionarët/zyrtarët/nëpunësit për pesëmbëdhjetë (15) vitet e para të përvojës së punës, sepse lartësia e shtesës për përvojën e punës është përgjysmuar me hyrjen në fuqi të Ligjit të kontestuar; dhe (ii) shërbimin e jashtëm të Republikës së Kosovës, i cili është përjashtuar nga e drejta në shtesë tranzitore. Me përfundimin e afatit një (1) vjeçar të periudhës/shtesës tranzitore, përkatësisht nga 5 shkurti 2024, me zbritje prej pesëdhjetë përqind (50%) të shtesës tranzitore, do të afektohen të gjithë funksionarët/zyrtarët/nëpunësit që hyjnë në fushëveprimin e Ligjit të kontestuar dhe të cilëve u është zbritur niveli i pagës sipas përcaktimeve të Ligjit të kontestuar”, thotë mes tjerash Aktgjykimi i Gjykatës Kushtetuese, të cilin mund ta lexoni të plotë më poshtë:

    Njoftim për vendim në rastin KO 79/23

  • Shfaqja “Bretkosa” mbush gjysmë dekade në skenë

    Shfaqja “Bretkosa” mbush gjysmë dekade në skenë

    Shfaqja “Bretkosa”, prodhim i Teatrit AAB “Faruk Begolli”, e cilësuar si shfaqja më e mirë në Kosovë, sot mbush pesë vjet nga dhënia e premierës së saj.

    E krijuar nën regjinë e Burbuqe Berishës dhe me aktorët, Ilir Tafa, Donat Qosja, Basri Shala dhe Valmir Krasniqi, rëndësia e kësaj shfaqje vazhdon të mbetet e pazbehur edhe pas gjysmë dekade nëpër skenat teatrore mbarë kombëtare.

    Më 26 dhjetor 2018, ishe ditë e mërkurë kur për herë të parë në Teatrin Kamertal në ambientet e Kolegjit AAB u dha premiera e shfaqjes “Bretkosa”, e cila magjepsi publikun menjëherë me portretizimin e saj prekës të pasojave të luftës së fundit të Kosovës.

    Me skena të ndryshme herë – herë komike, e më shumë tragjike, shfaqja “Bretkosa” ballafaqon përpjekjet e njerëzve për të shpëtuar nga traumat dhe pasojat që ka lënë lufta.

    Përmes dialogjeve të personazheve, shpaloset historia e dhimbshme e kryepersonazhit të shfaqjes, Zekës, një ish luftëtari idealist, i cili shfaq traumat dhe pasojat e trashëguara nga lufta, gjatë bisedave më të tjerët, pavarësisht, arsyetimeve të veprimeve të tij dhe kërkimfaljeve të rralla.

    E ndërtuar mbi dramën e kroatit Dubravko Mihanoviç, me të njëjtin titull, por e adaptuar në mënyrë brilante për realitetin kosovarë, shfaqja “Bretkosa” rrëfen një realitet, ku askush nuk ka durim për të dëgjuar tjetrin dhe komunikimi duket i pamundur, edhe për gjerat që janë më të thjeshta. Mbi të gjitha, shfaqja është e liruar nga monotonia dhe tematika, e cila në fakt, siç janë shprehur kritikët dhe krijuesit skenik, shpërfaq nuanca të zhanreve të ndryshme, andaj edhe po e mbush sallën kamertale të AAB, sa herë shfaqet.

    “Kuarteti” i aktorëve, i prirë nga Ilir Tafa, “berberi”, kryepersonazhi i kësaj drame, rolin e të cilit e luan Ilir Tafa, gjatë shfaqjes, këtë rol e ndërtoi me ritme dhe kundër-ritme.

    Variacionet e interpretimit të tij shquheshin edhe me të folurit, sa me turp, sa me plasje të herëpashershme që shënjonin baticat dhe zbaticat e oqeanit të dhembjes që buburitë në shpirtin e “Berberit”, ish luftëtarit të cilit i ishin vrarë shokët e togut, e ai e mallkonte veten që ka shpëtuar.

    Në shfaqje, Toni, të cilin e interpreton aktori Donat Qosja, përballet me humbjen e vendit të punës për shkak të privatizimit të ndërmarrjes, proces ky që la shumë punëtorë pa punë, duke i zhytur ata në pasiguri. Roli i taksistit të cilin e interpreton aktori Basri Shala, vjen si rol përplotësues, përmes të cilit ai ndërfutë situata, zhvillime, ngjarje e kuptime të ndryshme, gjë që e bën lojën teatrore të jetë më dinamike.

    Duke i shtuar ngjarjes së shfaqjes, personazhi i librashitësit të cilin e interpreton aktori Valmir Krasniqi vjen si një pikë e re fokale. Ai është një student, që shet libra për të siguruar jetën.

    Gjatë gjithë shfaqjes, personazhet thurin situata nga më të ndryshmet, ku secili veç e veç dhe të gjithë së bashku, dëshmuan në mënyrën më njerëzore për pasojat që lufta dhe paslufta kishte lënë vragë të mëdha në personazhet që ata luanin.

    Ndërsa sot shënon pesë vjetorin e dhënies së premierës, trashëgimia e shfaqjes “Bretkosa” vazhdon të qëndrojë si një testament i vizionit artistik të regjisores së madhe, Burbuqe Berisha. Me dhjetëra repriza nëpër teatrot mbarë kombëtare dhe rëndësinë e saj të palëkundur, Teatri AAB “Faruk Begolli”, vazhdon të nderojë kujtimin e regjisores Burbuqe Berisha.

    Repriza e radhës e shfaqjes “Bretkosa” do të jepet këtë të enjte më datën 28 dhjetor 2023 në ora 19:30. /atvlive.tv


    Posteri i premierës së shfaqjes “Bretkosa” më 26 dhjetor 2018.

  • Çollakaj: E them me përgjegjësi profesionale se nuk do të ketë luftë as në Kosovë, as në Ballkan

    Çollakaj: E them me përgjegjësi profesionale se nuk do të ketë luftë as në Kosovë, as në Ballkan

    Profesori universitar dhe njohësi i çështjeve të sigurisë, Fatmir Çollakaj, në emisionin A LIVE në ATV, duke komentuar zhvillimet e fundit në veri të vendit, po ashtu edhe deklaratat të ndryshme për mundësi agresioni nga ana e Serbisë, vlerësoi se nuk do të ketë luftë në këtë pjesë të vendit.

    Ai thotë se një situatë e ngjashme si ajo e 24 shtatorit nuk përjashtohet, për shkak se sipas Çollakajt, kjo do t’i konvenonte edhe presidentit Vuçiq për shkak të revoltës së qytetarëve kundër tij.

    “Unë në krejt paraqitjet e mia deri më sot, them me përgjegjësi profesionale se luftë nuk do të ketë në atë pjesë të vendit e as në Kosovë, e as në Ballkan. Përpjekje eventuale për ndonjë sulm të ngjashëm si të 24 shtatorit, nuk përjashtohet ajo mundësi, çka mund të mos ndodh por nuk përjashtohet mundësia që të ndodh, sepse Serbisë i konvenon dhe i nevojitet sidomos në këtë fazë ku Vuçiqi po sfidohet seriozisht në Beograd me protesta të dhunshme që për mua një tregues i një mllefi dhe një revolte të madhe të akumuluar me diskursin e vet politik neo-diktatorial”, tha Çollakaj. /atvlive.tv

    Intervistën e plotë të tij në A LIVE e gjeni në videon më poshtë:

  • Vendimi i Serbisë që t’i njohë targat RKS, Stano: BE-ja tani pret që Kosova të përgjigjet në mënyrë të ngjashme

    Vendimi i Serbisë që t’i njohë targat RKS, Stano: BE-ja tani pret që Kosova të përgjigjet në mënyrë të ngjashme

    Zëdhënësi i Bashkimit Evropian, Peter Stano tha sot se BE-ja mirëpret vendimin e Qeverisë së Serbisë për të lejuar lirinë e lëvizjes për automjetet me targa RKS, shkruan gazeta online Reporteri.net.

    Nga Bashkimi Evropian thonë se tani presin hapa të ngjashëm nga Kosova, teksa e shohin këtë vendim si hap që tregon se “është e mundur të arrihet progres në procesin e normalizimit të raporteve mes Kosovës dhe Serbisë”.

    “Ky vendim paraqet një hap pozitiv në zbatimin e Marrëveshjes për rrugën drejt normalizimit, si dhe angazhimet e mëparshme nga dialogu lidhur me lirinë e lëvizjes. Kjo tregon se është e mundur të arrihet progres në procesin e normalizimit të marrëdhënieve ndërmjet Kosovës dhe Serbisë. Ai gjithashtu përfaqëson një hap në drejtimin e duhur drejt një integrimi më të mirë rajonal dhe evropian të Ballkanit Perëndimor, nga i cili në fund përfitojnë qytetarët e rajonit. Ky vendim i hap rrugën heqjes së plotë të regjimit të stikerasve. BE-ja tani pret që Kosova të përgjigjet në mënyrë të ngjashme”, tha Peter Stano në një deklaratë për N1.

    Qeveria e Serbisë ka vendosur të hënën që të lejojë që veturat me targa RKS të lejohen të qarkullojnë brenda territorit të saj.

    Vendimin e ka shpalosur drejtori per Kosovë në Qeverinë e Serbisë Petar Petkoviq duke thënë se po e implementojnë një marrëveshje të nënshkruar nga Borko Stefanoviq, tani opozitar serb.

    Petkoviq ka thënë se me këtë vendim Serbia nuk e njeh pavarësinë e Kosovës dhe se targat s’janë simbol i shtetësisë sipas tij. Ai ka përmendur edhe pajisjen me targa RKS kohëve të fundit duke thënë se përfaqësuesit e Kishës Ortodokse i përdorin ato.

    Petkoviq theksoi se një njoftim se Serbia nuk e njeh Kosovën do të vendoset në të gjitha pikat kufitare dhe administrative.

    Sipas tij, ky vendim “nuk paragjykon përcaktimin e statusit përfundimtar dhe nuk mund të interpretohet si pëlqim i Beogradit për të devijuar nga të drejtat e garantuara me Rezolutën 1244 të Këshillit të Sigurimit të Kombeve të Bashkuara”, thuhet në tekstin e mohimit.

  • Tre të dyshuarve për sulmin në Banjskë iu vazhdohet paraburgimi edhe për dy muaj

    Tre të dyshuarve për sulmin në Banjskë iu vazhdohet paraburgimi edhe për dy muaj

    Tre të dyshuarve për sulmin në Banjskë u është vazhduar masa e paraburgimit deri në muajin shkurt të vitit të ardhshëm, ka konfirmuar për ATV-në Gjykata Themelore e Prishtinës.

    “Ju njoftojmë se pas kërkesës së Prokurorisë Speciale për vazhdimin e masës së paraburgimit, në çështjen penale kundër të pandehurve D.M., B.S. dhe V.T., Gjykata Themelore në Prishtinë – Departamenti Special ka aprovuar kërkesën e PSRK-së dhe tre të pandehurve, ua ka vazhduar masën e paraburgimit në kohëzgjatje prej dy muajsh, për secilin. Masa e paraburgimit të pandehurve iu është vazhduar nga data 24.12.2023 deri me datë 24.02.2024”, thuhet në përgjigjen e zëdhënëses së Gjykatës, Mirlinda Gashi.

    Tre të arrestuarit, Blagoje Spasojeviq, Dusan Maksimoviq dhe Vladimir Tolicin, dyshohen për vepra kundër rendit kushtetues të Kosovës, si dhe kryerje të veprave terroriste për sulmin ndaj
    Policisë, të dielën e 24 shtatorit, në Banjskë të Zveçanit, si pasojë e të cilit kishte mbetur i vrarë rreshteri policor Afrim Bunjaku, ishte plagosur zyrtari Alban Rashiti, dhe një tjetër kishte mbetur i lënduar. Ata janë në paraburgim që nga muaji shtator i këtij viti.

    Sipas kërkesës së PSRK-së për caktimin e masës së paraburgimit, Vladimir Tolic dhe Blogoje Spasojevic janë të përfshirë direkt në vrasjen e rreshterit policor Afrim Bunjaku, dhe plagosjen e zyrtarit Alban Rashiti.

    Sipas dosjes, i dyshuari tjetër, Dusan Maksimovic, vetëm 27 vjeç, me dashje iu ka ofruar ndihmë, duke incizuar skena të vendit të ngjarjes lidhur me lëvizjet e pjesëtarëve të Policisë së Kosovës, të cilët ishin duke zhvilluar operacion kundër të dyshuarve të përfshirë në këtë rast. /atvlive.tv

  • Ish-ambasadori amerikan: Vuçiq është përgjegjës për ndërhyrjet në zgjedhje

    Ish-ambasadori amerikan: Vuçiq është përgjegjës për ndërhyrjet në zgjedhje

    Ish-ambasadori i Shteteve të Bashkuara në Serbi, Micheal Kirby, ka dhënë një vlerësim të protestave të fundit në Beograd. Ai ka theksuar se pjesëmarrësit në protestë dukej se ishin të pakënaqur, por jo të gatshëm të rrëzojnë qeverinë.

    Ish-ambasadori i ShBA-së në Serbi, Micheal Kirby ka deklaruar se qytetarët që protestuan në Beograd të dielën dukeshin si një masë e pakënaqur, por jo si një forcë e gatshme për të rrëzuar çdo qeveri.

    “Kam parë zhgënjimin e qytetarëve. Nuk e di nëse dhuna ishte e sajuar – por duket se mes protestuesve kishte nga ata që donin të merrnin diçka më shumë prej saj”, ka theksuar Kirby.

    Ai ka deklaruar se autoritetet serbe informacionet që marrin nga Rusia e marrin si të vërtetë të pamohueshme.

    “Jam në dijeni se ambasadori rus dhe presidenti Vuçiq kanë biseduar. Rusët janë specialistë në përhapjen e dezinformatave dhe përmbajtjeve të rreme. Rebelët gjatë protestës mund të ishin kundërshtarë të parregullsive zgjedhore që ndodhën, por nuk përjashtohet që ata të ishin agjitatorë të cilët ishin futur nga Partia Progresive Serbe apo rusët”, ka theksuar Kirby për Zërin e Amerikës.

  • Aksident i rëndë në afërsi të Plavës, raportohet për katër të vdekur

    Aksident i rëndë në afërsi të Plavës, raportohet për katër të vdekur

    Katër persona raportohet se kanë vdekur si pasojë e një aksidenti të rëndë në Barane në afërsi të Plavës, në Mal të Zi.

    Siç raportojnë mediat atje dy nga viktimat janë çift bashkëshortor.

    Nga ky aksident ka mbetur i plagosur edhe një person, i cili ndodhet jashtë rrezikut për jetën.

    Radio Televizioni i Malit të Zi raporton se të gjithë të vdekurit janë nga Plava.

  • PDK-ja dorëzon sot edhe një lëndë tjetër në Kushtetuese

    PDK-ja dorëzon sot edhe një lëndë tjetër në Kushtetuese

    Grupi Parlamentar i Partisë Demokratike të Kosovës, sot do të dorëzojë edhe një lëndë tjetër për vlerësim në Gjykatën Kushtetuese.

    Dorëzimi do të bëhet nga ora 10:30.

    Sipas njoftimit, pas dorëzimit të dokumentacionit, do të ketë edhe prononcim për media.

  • Hill për protestat në Beograd: Legjitimiteti varet nga transparenca, të respektohet vullneti i popullit

    Hill për protestat në Beograd: Legjitimiteti varet nga transparenca, të respektohet vullneti i popullit

    Ambasadori i Shteteve të Bashkuara të Amerikës në Serbi, Christopher Hill, ka reaguar pas protestës së dhunshme të opozitës të dielën para ndërtesës së Komisionit Republikan të Zgjedhjeve (RIK) në Beograd.

    “Në orët dhe ditët në vijim, liderët e Serbisë dhe qytetarët e saj duhet të kujtojnë: Legjitimiteti i proceseve demokratike varet nga transparenca dhe nga gatishmëria e të gjitha palëve, fituese apo humbëse, për të respektuar vullnetin e popullit të shprehur në kutinë e votimit”, shkroi ai në platformën X.

    Diplomati amerikan ka potencuar po ashtu se dhuna dhe vandalizmi ndaj institucioneve shtetërore nuk kanë vend në një shoqëri demokratike, derisa ka shtuar se “duke qenë se policia ruan rendin publik, ajo duhet të bëjë të pamundurën për të mbrojtur dinjitetin e qytetarëve dhe të drejtat civile”.

    “Kam besim të plotë se Serbia do t’i kalojë këto sfida me demokracinë e saj të forcuar. Të gjithë qytetarët e Serbisë kanë të drejtë të dëgjohen për të shprehur pikëpamjet e tyre politike në mënyrë paqësore dhe pa përdorur dhunë”, theksoi Hill.

    Ndërsa Departamenti amerikan i Shtetit u ka bërë thirrje autoriteteve në Serbi që të bashkëpunojnë me misionin e OSBE-së në hetimin e pretendimeve për parregullsi zgjedhore, një ditë pas protestës së dhunshme në Beograd ku më shumë se 30 demonstrues janë arrestuar gjatë protestës së koalicionit opozitar “Serbia kundër dhunës” në kryeqytetin serb.

    “Ne jemi të fokusuar, në bashkëpunimin me Serbinë, për forcimin e qeverisë demokratike dhe sundimin e ligjit, përmirësimin e bashkëpunimit rajonal, vazhdimin e rritjes ekonomike dhe përshpejtimin e përparimit të Serbisë në rrugën drejt anëtarësimit në Bashkimin Evropian. E ardhmja e Serbisë qëndron në Perëndim”, thuhet në përgjigjen e DASh-it për Zërin e Amerikës.

    Në protestën e opozitës së bashkuar rreth koalicionit “Serbia kundër dhunës” që është zhvilluar të dielën, qindra protestues kanë tentuar të futen brenda Asamblesë Komunale të Beogradit, duke thyer xhamat e dyerve dhe dritareve në shenjë revolte, duke nxitur reagimin e autoriteteve.