Tag: Ballina

Përgatiti: Arton Hamiti

Lokacioni iu ricaktua. Por, pas më shumë së një viti procedurë, Ministria e Kulturës nuk arriti ta bëjë hapin e parë për ndërtimin e Teatrit të Operës dhe Baletit, objekt të cilin qeveritë e njëpasnjëshme e synojnë tash e dy dekada. Tenderi për përzgjedhjen e projektit ideor është anuluar, njoftoi vetë MKRS-ja, pas vendimit final të Organit Shqyrtues të Prokurimit.

Gjykata e Tenderëve konstatoi disa shkelje ligjore në konkursin e hapur nga Ministria e Kulturës në tetor të vitit 2022.

“Operatori Ekonomik i shpërblyer me çmimin e parë, ka shkelur nenin 80 të Ligjit për Prokurimin Publik, duke e zbuluar identitetin e tij në secilën faqe të ofertës. Njësoj kanë vepruar edhe dy operatorët e tjerë të përfshirë në listën finale të rezultateve, duke dhënë informata të zbulimit të identitetit, përmes të cilave komisioni ka mundur të kuptojë qartë se kujt i përket projekti ideor”, thuhet në njoftimin e OSHP-së.

Duke i marrë parasysh këto fakte, ekspertët besuan se juria e formuar nga MKRS-ja nuk mund të bëjë vlerësim të drejtë, andaj kërkuan anulimin e tërësishëm të kësaj procedure.

“Duke u bazuar në gjendjen reale të krijuar, të dy ekspertët vlerësojnë se tashmë rrethanat të cilat janë krijuar e bëjnë të pamundur që juria profesionale të bëjë vlerësim objektiv dhe të barabartë mes Operatorëve Ekonomikë, pasi që është shkelur rregulli bazik, parimi kryesor që vlerësimi i drejtë të bëhet përderisa identiteti i asnjërit pjesëmarrës nuk dihet, por qëndrojnë anonim”, thuhet më tej në njoftimin e OSHP-së.

Teksa komunikimi me zyrtarë nga Ministria e Kulturës gjatë ditës nuk ishte i mundur, Besa Luzha anëtare e këshillit për funksionalizimin e institucionit të Operës kërkoi të merren parasysh vërejtjet.

“Për neve është shumë i rëndësishëm ky objekt. Por, meqë është objekt madhor me rëndësi shumë të madhe nuk është mirë që ministria të ngutet. T’i merr parasysh vërejtjet që të mos i përsërisë shkeljet”, tha Luzha.

Ndërkohë, Ministria e Kulturës ka planifikuar që ky konkurs të këtë kosto deri në 2.5 milionë euro.

Ndryshe, në vitin 2019, Ministria e Kulturës kishte zhvilluar një proces të ngjashëm, por pa epilog. Kurse më 2 dhjetor të 2009 ishte vënë gurthemeli për këtë ndërtesë. Kuvendi i Kosovës në gushtin e vitit 2021 themeloi institucionin e Operës, i cili ende mbetet në konsolidim.

Përfaqësuesi i Bashkimit Evropian për dialogun Kosovë-Serbi, Miroslav Lajçak pas takimit me presidenten, Vjosa Osmani ka mbërritur në qeverinë e Kosovës, për t’u takuar me kryeministrin Albin Kurti.

Nga Bashkimi Evropian gjatë ditës së djeshme kanë thënë se ky takim është pjesë e kontaktit dhe ndërveprimit të vazhdueshëm të Lajçak me partnerët për t’i ndihmuar të ecin përpara në Dialog.

“Kjo është pjesë e kontaktit dhe ndërveprimit të tij të vazhdueshëm me partnerët për t’i ndihmuar ata të ecin përpara në procesin e Dialogut të lehtësuar nga BE”, tha zëdhënësi Peter Stano.

Policia e Kosovës, pas informacioneve që ka pranuar se në një objekt në Komunën e Zveçanit ka gjëra dhe materiale të cilat janë përdorur nga grupet terroriste serbe në kohën e barrikadave, pas kontrollave ka gjetur thasë me rërë.

Lajmin për ATV-në e konfirmoi zëvendësdrejtori i Policisë së Kosovës për rajonin e veriut, Veton Elshani.

“Policia e Kosovës ka pranuar informacione se në një objekt publik në komunën e Zveçanit, ka disa gjëra materiale të cilat janë shfrytëzuar nga grupet terroriste serbe në kohën e barrikadave. Sot, gjate kontrolleve që ka bërë Policia, ka konstatuar se në katin e tretë të kësaj ndërtese janë dhjetëra thasë të mbushur me rërë që kane qene si istikame për të sulmuar Policinë dhe në mbrojtje të barrikadës dhe kontrollimit të rrugës kryesore që të dërgon në Zveçan”, thuhet në përgjigjen e Elshanit.

Ai thotë se ky objekt publik është shfrytëzuar nga pjesëtarët e organizatave terroriste si Mbrojtja Civile dhe Brigada e Veriut.

“Kjo është edhe një dëshmi se grupet kriminale kanë qenë të armatosur rend dhe kanë pasur plane që të sulmojnë Policinë e Kosovës në rast se ata do të tentonin t’i largonin barrikadat”, thuhet në përgjigjen e Elshanit. /atvlive.tv

Gregory Kehoe, Joe Reeder, Greenberg Legal Associates dhe anëtarët e kësaj kompanie, kanë kërkuar të tërhiqen nga mbrojtja e Hashim Thaçit në rastin e tij në Gjykatën Speciale. Si shkak në kërkesë është përmendur moskryerja e obligimeve ndaj tyre.

“Z.Thaçi nuk ka përmbushur detyrimin ndaj Gregory Kehoe, Joe Reeder, Asociacionit Greenbuerg Legal dhe anëtarëve të ekipit mbështetës dhe z.Thaçit i është dhënë një paralajmërim i arsyeshëm se do të kërkonin përfundimi nëse nuk u është përmbushur detyrimi”, thuhet në njoftimin e Dhomave të Specializuara.

Në Kosovë nuk ka gatishmëri politike për të hequr dorë prej ndërhyrjeve në gjyqësor, dhe ky vend duhet të punojë ende në luftim të korrupsionit.

Kështu është thënë në raportin e Indeksit për Perceptim të Korrupsionit për vitin 2023, të përpiluar nga organizata ndërkombëtare, Transparency International.

Sikurse vitin e kaluar, Kosova ka 41 pikë.

Indeksi radhit çdo vit 180 shtete dhe territore të botës në bazë të nivelit të perceptuar të korrupsionit në sektorin publik. Ai përdor një metodologji pikësh, sipas së cilës zero tregon për një vend shumë të korruptuar, ndërsa 100 për një vend të pastër nga kjo dukuri.

Në pjesën për Kosovën, në raport është thënë se pavarësisht përpjekjeve të vazhdueshme, reformat që janë kyçe për pavarësi të sistemit të gjyqësorit, sikurse krijimi i procesit të vettingut dhe miratimi i ligjit të ri, që do të mund të fuqizonte integritetin në Këshillin Prokurorial, janë duke lëvizur me ritëm shumë të ngadalshëm.

“Edhe më keq, ndërhyrja e vazhdueshme e Qeverisë në çështjet e gjyqësorit, e ilustruar me shkarkim të shefit të njësisë speciale të Policisë së Kosovës, bashkë me ndërhyrjen e deputetëve të shumicës në hetimin parlamentar për një rast të madh të korrupsionit, sugjerojnë se nuk ka vullnet politik për të hequr dorë prej kontrollit dhe për forcim të mbikëqyrjes së pavarur”, është thënë në raport.

Procesi i vettingut

Procesi i vettingut është premtuar prej Qeverisë së kryeministrit Albin Kurti, në programin katërvjeçar.

Megjithatë, ai ende është në fazën fillestare.

Ky proces nënkupton rivlerësim të prokurorëve dhe gjyqtarëve, rritjen e tyre profesionale, luftim të korrupsionit dhe ndaljen e ndikimit të politikëve apo elementëve tjerë në drejtësi.

Koncept-dokumentin për vettingun e ka vlerësuar edhe Komisioni i Venecias.

Sipas komisionit, vettingu efektiv, në rastin e Kosovës, kërkon kombinimin e masave të ndryshme, që do të kishin efekt pozitiv në integritetin dhe efikasitetin e sistemit të drejtësisë.

Si pikë e parë është rekomanduar verifikimi i nivele të larta në gjyqësor dhe në prokurori.

Amendamentet kushtetuese për vettingun në nivele të larta, janë hartuar prej një komisioni ad-hoc të Kuvendit të Kosovës, i mbështetur prej Ministrisë së Drejtësisë.

Më vonë, në mars të vitit 2023, kryetari i Kuvendit të Kosovës, Glauk Konjufca, i pati dërguar disa ndryshime të amendamenteve në Gjykatën Kushtetuese, për të kuptuar nëse janë në përputhje me Kushtetutën.

Gjykata Kushtetuese nuk e ka dhënë ende fjalën e saj në këtë çështje, ndonëse, sipas ligjit, ky grup duhet të japë vlerësim brenda gjashtë muajsh, pas pranimit të kërkesës.

Sipas raportit të Programit për Zhvillim të Organizatës së Kombeve të Bashkuara (UNDP) dhe Agjencisë së Shteteve të Bashkuara për Zhvillim Ndërkombëtar (USAID), Pulsi Publik, i publikuar këtë vit, vetëm 29 për qind e qytetarëve janë të kënaqur me punën e sistemit të drejtësisë në Kosovë./rel

Kryeministri i Kosovës, Albin Kurti, pret sot në takim Përfaqësuesin e Posaçëm të Bashkimit Evropian për dialogun Kosovë-Serbi, Miroslav Lajçak, raporton Ekonomia Online.

Pas vizitës në Beograd, përfaqësuesi i posaçëm i BE-së, Miroslav Lajçak sot do të vijë edhe në Prishtinë.

Takimi i Kurtit me Lajçakun do të nisë në orën 15:00, njoftoi Qeveria e Kosovës.

Përgatiti: Fatlum Jashari

Një ngritje eventuale e tarifave të energjisë elektrike për të tretin vit me radhë, nga qytetarë dhe njohës të fushës, do të ishte e pakuptimtë dhe e dëmshme.

Në aplikimin e saj në ZRRE, për t’i lejuar më shumë të hyra, KESCO-ja si shkaktare të rritjes eventuale të kostove përmend propozimin e KEK-ut për ngritje të çmimit të furnizimit me shumicë nga 29.5 në 31.5 Euro.

“Është absurde kërkesa për rritje të tarifave të energjisë elektrike, sidomos tash kur i pamë faturat e dhjetorit dhe të janarit që i befasuan qytetarët… ZRRE-ja do të duhej me automatizëm ta refuzojë për shkak se është kërkesë absurde dhe e pabazuar. Nuk është bazë e mjaftueshme që KEK-u po e rritë koston e prodhimit të energjisë elektrike, sepse nuk reflekton shumë”, tha njohësi i ekonomisë, Zekirja Shabani.

Po ashtu, krahas ndikimit të importit, duke iu referuar një hulumtimi të një instituti privat vendor, te rritja e kostos KESCO-ja futi edhe propozimin për rritjen e pagave të punëtorëve të saj për 15%, me arsyetimin se ata mund të ikin jashtë vendit.

“Është absurde për shkak se qytetarët nuk duhet ta paguajnë pagën e një punëtori të KESCO-s, duke e pasur parasysh që KESCO dhe KEDS-i, bashkë, janë dy kompanitë me qarkullimin më të madh në Kosovë, në top 10 kompanitë, KESCO dhe KEDS bashkë qarkullojnë mbi 380 milionë euro në vit”, tha Shabani.

Një ngritje e re do të ishte tronditëse për shumë qytetarë, të cilët ankohen për papërballueshmërinë e tarifave aktuale.

“Janari, 476 Euro. Në Emshir jetoj, me rrymë ngrohna. Përpara deri në 200 kurrë s’u shku, 160, të njëjtat sene janë krejt. Çka pusi u bo nuk e di?! Veç për dy muaj po i jap në 900 Euro rrymë! Me i thanë atij dostit atje që do me na rjepë, merre një brisk e rjepna krejt”, thotë Avdi Pollomi, qytetar.

“Një njeri jam. Në banesë të huaj jam. Unë e paguaj ujin, rrymën, bërllokun, qira nuk paguaj në atë banesë. A rryma shtrenjtë po vjen, 54 euro e gjysmë më ka ardhë dhjetori, a vitin e kaluar e kam pasë 7 euro dhjetorin. Tash janari ka ardhë 45 Euro. Me 100 euro jetoj”, tha Nazlije Shabani, qytetare.

Pas ngritjes së tarifave të energjisë elektrike dy herë radhazi, në hapje të procesit të rregullt të shqyrtimit KESCO-ja i ka propozuar ZRRE-së një ngritje tjetër.

Në këtë kompani nuk janë përgjigjur ende lidhur me këtë temë.