Tag: Ballina

Bordi i BQK-së ka miratuar rregulloren e re për Operacionet me Paratë e Gatshme, e cila do të hyjë në fuqi që nga 1 shkurti. Sipas saj, valuta e vetme që lejohet të përdoret për kryerje të transaksioneve të pagesave me para të gatshme dhe në sistemin e pagesave në Kosovë është euro.

Lidhur me këtë temë, mediumi prestigjioz “The Guardian” ka shkruar duke thënë se “Kosova akuzohet për rritje të tensioneve ndëretnike duke ndaluar përdorimin e dinarit serb” , tutje duke përmendur akuzat e Shteteve të Bashkuara të Amerikës dhe Bashkimit Evropian kundër rregullores së re të Bankës Qendrore të Kosovës.

“Shtetet e Bashkuara kanë akuzuar autoritetet e Kosovës se ‘po rrisin tensione ndëretnike’ pa nevojë pasi Qeveria vendosi masën e ndalimit ndaj valutës serbe dhe udhëzoi komunitetin serb të pranojë euron. Bastisjet policore të urdhëruara nga ministri i Punëve të Brendshme në katër organizata që punojnë në zonat e populluara me serbë, që erdhën disa ditë pas vendimit për valutë, kanë shtuar frikë për përshkallëzim të situatës së sigurisë”, ka shkruar “The Guardian”.

Aty janë përmendur edhe akuzat e zyrtarëve serbë se vendimi i BQK-së do të ndikojë në jetën e përditshme të serbëve që varen nga asistenca sociale e Serbisë.

Bashkimi Evropian ka kritikuar Kosovën për hapa “të njëanshëm” duke shtuar se frikësohet që do të nxisin përshkallëzim të raporteve me Serbinë.

“Këta janë hapa shqetësues sepse nuk kontribuojnë në shtensionim të situatës”, ka thënë Josep Borrell, përfaqësuesi i lartë për politikë të jashtme i Bashkimit Evropian. “Nuk janë të koordinuara, janë të njëanshme pa nivelin e duhur të konsultimit paraprak në mënyrë që të parandalohet ndikimi negativ që mund të kenë në terren”.

Zyrtarët evropianë kanë thënë se statusi i organizatave që u mbyllën nga Policia – strukturat paralele të krijuara nga Beogradi – duhet të adresohet në dialogun e lehtësuar nga BE-ja. “The Guardian” ka kujtuar sulmin e 24 shtatorit në Banjskë nga serbë të uniformuar. Ishte vrarë një polic i Kosovës dhe tre sulmues të grupit terrorist.

Euroja ka qenë valuta e vetme në Kosovë që nga paslufta. Por serbët, me rreth 5 për qind të popullatës, vazhdojnë ta përdorin dinarin, e sipas “The Guardian”, ky është reflektim i refuzimit të shtetësisë së Kosovës. Ata marrin pensione, paga e përfitime tjera sociale nga Beogradi.

Komuniteti ndërkombëtar ka kërkuar nga Kosova ta shtyjë rregulloren, duke shtuar se nuk ka pasur kohë të mjaftueshme për informim. Kosova është pajtuar me tranzicion, por s’ka treguar se sa do të zgjasë.

Presidenti i Serbisë, Aleksandar Vuçiq, politikën ndaj dinarit e ka cilësuar “vazhdim të spastrimit etnik”, ndërsa ka paralajmëruar thirrjen e një seance urgjente të Këshillit të Sigurimit të Organizatës së Kombeve të Bashkuara.

“The Guardian” ka shkruar po ashtu në burime se vendimi i Kosovës s’ka të bëjë me dëshirën për provokim, por për të luftuar krimet ekonomike e paratë false. E për strukturat paralele, Beogradi ishte pajtuar t’i hiqte me marrëveshjen e 2013-s.

Mbreti Charles është diagnostikuar me një formë kanceri, ka njoftuar pallati mbretëror Buckingham.

Lloji i kancerit nuk është zbuluar, por sipas një deklarate të pallatit, Mbreti filloi “trajtimet e rregullta”.

E pas këtij lajmi, presidentja e Kosovës, Vjosa Osmani në një postim në X i uron shërim të shpejtë dhe të plotë.

“….Populli i Kosovës u bashkohet me shpresë dhe solidaritet, duke i uruar Madhërisë së Tij shërim të shpejtë dhe të plotë”, shkruan presidentja.

Përgatiti: Fatlum Jashari

Shtyrje të zbatimit të rregullores së Bankës Qendrore të Kosovës, në raport me ndikimet te komuniteti serb, respektivisht çështjen e dinarit, dhe koordinim për periudhën tranzitore kërkuan Shtetet e Bashkuara të Amerikës.

Pas takimit që kryeministri Albin Kurti pati me korin diplomatik ndërkombëtar, ambasadori amerikan, Jeffery Hovenier, tha se problemi me rregulloren qëndron te mënyra e zbatimit, siç vlerësoi ai, pa informim të mjaftueshëm paraprak.

“Derisa, absolutisht respektojmë, mbështesim dhe mirëpresim zbatimin e plotë të Kushtetutës së Kosovës, njohim dhe respektojmë rolin e BQK-së në rregullimin e sektorit financiar – dhe, në fakt, SHBA-ja ka luajtur rol të rëndësishëm duke mbështetur dhe ndihmuar këto institucione, që të jenë të afta të kryejnë funksionet e tyre efektivisht dhe me zotësi, përmes trajnimeve, këshillave të ekspertëve e të tjera. Dhe, sigurisht, i mbështesim përpjekjet për të shmangur krimet financiare, pastrimin e parave, financimin e terrorizmit dhe gjëra të tilla. Ne kemi shqetësime të thella për mënyrën sesi kjo rregullore po zbatohet, sepse besojmë se nuk merr në konsideratë disa realitete dhe shqetësime nga komunitetet”, tha Hovenier.

Pasi tha se pret plan dhe strategji të qartë nga Qeveria, ambasadori paralajmëroi se vazhdimi pa koordinim me SHBA-në mund të përcillet me pasoja.

“Mund të flas vetëm për kërkesën SHBA-së, e cila është shtyrja, në mënyrë që të bëhet më shumë punë për ta zbatuar atë (rregulloren), në një mënyrë që ne besojmë se është në përputhje me standardet evropiane dhe një periudhë të mjaftueshme informimi. Qeveria ka folur për një tranzicion dhe shpresojmë që ky tranzicion i merr në konsideratë këto çështje. Lidhur me veprimet nga SHBA-ja, mund të them se do të shpresonim që Qeveria të jetë partnere me ne në këtë. Kjo është diçka që presim në partneritete. Vullneti i Qeverisë për t’i adresuar këto shqetësime do të përforconte partneritetin tonë të gjerë. Dhe, nëse Qeveria nuk dëshiron të jetë partnere me ne në këtë çështje shumë të ndjeshme, do të ketë ndikim në kualitetin e partneritetit tonë”, tha Hovenier.

Krahas thirrjes për kthim në dialog, Bashkimi Evropian theksin e vuri te rreziku i përkeqësimit të situatës së sigurisë.

“Gjatë javës së shkuar, kemi parë së paku dy shembuj të veprimeve që kanë nxitur shqetësimin e Bashkimit Evropian. Rregullorja e Bankës Qendrore të Kosovës dhe operacionet policore ndaj disa entiteteve të udhëhequra nga Serbia. Këta hapa janë shqetësues për shkak se nuk kontribuojnë në shtensionimin e situatës, këto zakonisht nuk janë të koordinuara, janë veprime të njëanshme apo të ndërmarra pa nivelin e nevojshëm të konsultimit paraprak, në mënyrë që të parandalohet ndikimi negativ që mund të kenë te njerëzit”, ka thënë zëdhënësi për Punë të Jashtme dhe Siguri i BE-së, Peter Stano.

Rregullorja e re e Bankës Qendrore për Operacionet me Para të Gatshme, e cila njeh euron si valutë të vetme për pagesë, hyri në fuqi më 1 Shkurt.

Përgatiti: Driton Sadiku

Ministri Gjerman i Mbrojtjes të hënën qëndroi për vizitë në Kosovë, ku u prit nga krerët e shtetit. Pas takimit me Presidenten Vjosa Osmani, Boris Pistorius nuk kishte si të mos fliste për një temë mjaft aktuale në Kosovë.

Për të, vendimi i BQK-së, që vendos euron si valutë të vetme për kryerje të pagesave në Kosovë, është krejtësisht i ligjshëm, megjithatë, sipas tij, duhet të jepet kohë për zbatimin e tij.

“Jemi të vetëdijshëm që Kosova ka të drejtë të zbatojë ligjshmërinë e saj, por në deeskalim bën pjesë edhe masat legjitime për sa i përket vendosjes së euros, si valutë e vetme, mirëpo nevojitet që kjo të komunikohet në mënyrë më të përshtatshme, ashtu që askush të mos ketë frikë dhe ketë mosinformim”, tha Pistorius.

Përtej ligjshmërisë, Presidentja Vjosa Osmani theksoi nevojën për dakoordim me aleatët ndërkombëtarë.

“Nga të gjitha kontaktet e mia me kryeministrin mund t’iu siguroi që qëllimet i kemi të njëjta dhe ajo është mbrojtja e kushtetutës së vendit, mbrojtja e sovranitetit, sundimi i ligjit, por njëkohësisht edhe arritja e dakordimit me aleatët tanë sa i përket kësaj çështjeje. Metodat mund t’i kemi të ndryshme, por qëllimet asnjëherë”, tha Osmani.

Duke kërkuar shtensionim të situatës mes Kosovës dhe Serbisë, si dhe duke bërë thirrje për rikthim në dialogun e ndërmjetësuar nga Bashkimi Evropian, Ministri Pistorius njoftoi se Gjermania do të rrisë praninë e saj ushtarake në Kosovë, qysh në pranverë.

“Gjermania pas SHBA-së është njëra nga mbështetëset më të mëdha të Kosovës. Ne bashkëpunojmë me sukses në shumë fusha. KFOR-i mbetet si garantues për stabilitet dhe siguri. Sa u përket marrëdhënieve mes Serbisë dhe Kosovës është kërkesë deeskalimi. E ardhmja e Ballkanit Perëndimor është në Evropë, por parakusht është dialogu. Duke marrë parasysh tensionet aktuale bëjmë thirrje të qartë për maturi dhe kujdes”, tha Pistorius.

Osmani u kujdes ta informojë më shumë ministrin gjerman, veçanërisht për sulmin terrorist në Banjskë për çka tha se terroristët serbë përdorën simbolet e KFOR-it, madje edhe atyre gjerman për ta kryer më lehtë sulmin.

Vizitën zyrtare ministri gjerman e vazhdoi për në kryeministri me shefin e qeverisë, për ta përmbyllur më pas në një takim me homologun kosovar Ejup Maqedonci.

Përgatiti: Armand Hoti

Prej tri vjetësh është ministre e këtij sektori, por tek të hënën, ministrja e Ekonomisë, Artane Rizvanolli, e vizitoi për herë të parë nëntokën e Stan Tërgut.

Ajo thotë se as nuk e ka imagjinuar më përpara atë që pa në horizontin e 10-të në minierën e Trepçës, ku pa nga afër kushtet në të cilat punojnë minatorët.

“Sigurisht që e dimë në nivel racional që puna e minatorëve është shumë e vështirë dhe se kushtet janë të vështira dhe të jashtëzakonshme, mirëpo është e paimagjinueshme deri sa nuk i sheh vetë. Është fatmirësi që në masë të madhe siguria në punë është e mirë, megjithëse ende ka problem”, tha Rizvanolli.

Andaj, e para e ekonomisë thotë se përmirësimi i kushteve do të vendoset lart në listën e prioriteteve të ministrisë, por edhe të menaxhmentit të “Trepçës”, që tash ka kryeshef të ri.

Gjiganti metalurgjik vazhdimisht është mbështetur nga Qeveria e Kosovës me subvencione milionëshe, që kryesisht janë përdorur për mbulimin e shpenzimeve operative.

“Deri më tani shumica e subvencioneve kanë shkuar për shpenzime operative, për mbulim të pagave në radhë të parë, por edhe kriza energjetike dhe rritja e shpenzimeve për energji elektrike tejet e madhe për shkak të krizës, ka bërë që pjesa më e madhe e subvencioneve të jetë për shpenzime operacionale, por kjo absolutisht që duhet të ndryshojë, sepse ua kemi borxh punonjësve të “Trepçës” që të investojmë, që të përmirësojmë edhe kushtet e punës, edhe produktivitetin e punës”, tha Rizvanolli.

Në të njëjtën linjë me ministren është edhe kryeshefi Bashkim Kurti.

“Vetëqëndrueshmëria financiare është prioriteti ynë i parë, por në këtë prioritet t’parë realisht tonin si menaxhment i lartë, normalisht që lidhet apo është një nënkusht i parë i kësaj, është siguria në vendin e punës”, tha Kurti.

Si sfidë e cila do të trajtohet, sipas ministres, është numri i vogël i minatorëve.

Për këtë vit, Trepça me dy njësitë e saj që udhëhiqen nga shqiptarët synon t’i eksploatojë mbi 195 mijë tonë xehe të plumbit dhe zinkut.

Përgatiti: Nora Luta

Pothuajse një vit prej kur u arrestua nën dyshimet për krime lufte në Kamenicë, Zlatan Arsiq nga kjo e hënë është në liri.

Gjykata Themelore e Prishtinës, Arsiqin, në mungesë të provave, nuk e ka gjetur fajtor për krime lufte.

Gjatë shqyrtimit gjyqësor, sipas Gjykatës Prokuroria Speciale nuk ka arritur të argumentojë se ishte Arsiq, ai që e maltretoi e kanosi me jetë Besim Muhaxherin.

Megjithatë, sipas gjykatës, aktgjykimi lirues për Arsiqin nuk e konteston faktin se Muhaxheri ishte keqtrajtuar gjatë luftës.

Mbrojtja e familja e Arsiqit e kanë mirëpritur vendimin e gjykatës së shkallës së parë.

“Asnjë provë nuk e ka konfirmuar faktin se Zlatani kreu një krim lufte. Këtë e kemi pretenduar si mbrojtje në fillim dhe gjatë kërkesës për hedhjen e aktakuzës dhe gjatë procedurës së provave. Është e padiskutueshme se Zlatan Arsiqi ka pasur alibi dhe se ai nuk ka qenë aty kur pretendohet se ka ndodhur ngjarja”, tha Vasilije Arsiq, avokat i Zlatan Arsiqit.

Prokuroria Speciale e Kosovës kishte ngritur aktakuzë ndaj Arsiqit, i cili kishte shërbyer në Policinë e Kosovës, në korrik të vitit të kaluar.

Sipas aktakuzës, Arsiqi në mars të 1999-ës, në Stacionin Policor në Kamenicë, në bashkëkryerje me pjesëtarë të tjerë të policisë serbe, e kishte ndaluar Besim Muhaxherin, të cilin më pas e rrahin, e keqtrajtojnë në mënyrë çnjerëzore duke e kanosur edhe me jetë.

Por, gjatë dëshmisë, Muhaxheri kishte dhënë deklarata kundërthënëse, e kishte identifikuar Arsiqin, por nuk ishte shprehur i sigurt për mënyrën dhe kohëzgjatjen e keqtrajtimit.

I kontaktuar nga televizioni, Muhaxheri ka thënë se nuk dëshiron ta komentojë vendimin e gjykatës.

Ambasadori i Shteteve të Bashkuara në Kosovë, Jeffrey Hovenier, e ka përsëritur të hënën kërkesën ndaj Qeverisë së Kosovës për shtyrje të vendimit për zbatim të rregullores së Bankës Qendrore të Kosovës (BQK).

Këto deklarata ai i bëri pas takimit më kryeministrin e vendit, Albin Kurti, zëvendëskryeministrin Besnik Bislimi dhe ministrin e Financave Hekuran Murati, teksa ai ishte i shoqëruar nga ambasadorët e vendeve të QUINT-it.

Ai tha se ShBA është e shqetësuar se zbatimi i rregullores së BQK-së do të ndikojë në mënyrë të padrejtë në komunitetet pakicë, duke iu referuar komunitetit etnik serb.

Ambasadori amerikan tha se shteti i tij dëshiron të shtyhet zbatimi i këtij vendimi pasi sipas tij duhet zhvilluar një plan dhe strategji në mënyrë që të funksionojë vendimi në fjalë.

“Sapo u bashkova me kolegët e mi nga trupi diplomatik për një bisedë dhe një informim nga kryeministri Kurti, zëvendëskryeministri Bislimi, dhe ministri i financave Murati duke biseduar sigurisht për çështjen në të cilën po punojmë të gjithë, e cila është çështja se si të sigurohemi që rregullorja, ju e dini, rregullorja e ndryshuar e miratuar nga Banka Qendrore të mos ndikojë padrejtësisht në elementin e shoqërisë kosovare, dhe siç u shpreha gjatë një deklarate të fundjavës, ne jemi të shqetësuar që zbatimi i kësaj rregulloreje, përveç nëse ka disa rregullime, do ndikojë në mënyrë të padrejtë te komunitetet pakicë, duke përfshirë komunitetin etnik serb. Pra, kjo ishte biseda që bëmë, do të thoja se të gjithë ne nga trupi diplomatik, që folëm për këtë çështje, shprehëm shqetësime shumë të ngjashme për mënyrën e zbatimit të saj. Unë vetëm mund të ritheksoj atë që Shtetet e Bashkuara shpresojnë të shohin, ne shpresojmë ta shohim një shtyrje në zbatimin e kësaj rregulloreje derisa të jetë bërë më shumë punë për të zhvilluar një plan dhe një strategji, dispozita që faktorizojnë disa realitete që shqetësojnë komunitetin, por edhe disa praktika, si e merr një individ, i cili merrte një përfitim social në të holla nga një zyrë postare, tani në një mënyrë që të funksionojë për të. Dhe kështu, këto janë bisedat që kemi bërë”, tha Hovenier.

Hovenier shtoi se Shtetet e Bashkuara të Amerikës mbështesin zbatimin e plotë të Kushtetutës së Kosovës dhe respektojnë rolin e BQK-së, por se mënyra e zbatimit të kësaj rregullorje nuk merr parasysh disa prej shqetësimeve të komunitetit serb.

“Ne gjithashtu besojmë fuqishëm se nuk ka informacion të mjaftueshëm publik për ta shpjeguar këtë. Pra, përderisa ne absolutisht respektojmë, mbështesim dhe mirëpresim zbatimin e plotë të Kushtetutës së Kosovës dhe ndërkohë që e njohim dhe respektojmë rolin e Bankës Qendrore dhe rregullimin e sektorit financiar, dhe ndërkohë që, në fakt, Shtetet e Bashkuara kanë luajtur një rol të rëndësishëm, rolin për të ndihmuar në mbështetjen e këtyre institucioneve që të jenë në gjendje të kryejnë funksionet e tyre në mënyrë efektive dhe të aftë përmes trajnimeve, përmes një këshille eksperte dhe gjithçka tjetër. Dhe sigurisht që ne mbështesim përpjekjet për të shmangur krimet financiare, pastrimin e parave, financimin e terrorizmit, dhe gjëra të tilla. Ne kemi shqetësime të thella për mënyrën e zbatimit të kësaj rregulloreje që nuk besojmë se merr parasysh disa realitete dhe shqetësime nga komuniteti, pra kjo ishte e jona, për këtë ishte kjo bisedë”, tha Hovenier.

Ndërkaq i pyetur se nëse Qeveria e Kosovës ka dhënë ndonjë shenjë se do ta ndryshojë vendimin e saj dhe nëse Kosova rrezikon të përballet me sanksione të reja, Hovenier tha se është në dorën e Qeverisë të deklarohet për zbatimin e rregullores.

Kurse sa i përket asaj se nëse qeveria amerikane mund të marrë veprime kundër Kosovës, nëse nuk i përgjigjet kësaj kërkese, Hovenier ka thënë se “shpresojmë që Qeveria të jetë partnere me ne”, duke shtuar që nëse ndodh e kundërta, kjo gjë “do të ketë ndikim në kualitetin e partneritetit tonë”.

“Pra, do ta lë qeverinë të flasë se sa është e përgatitur të rishqyrtojë se si do ta zbatojë këtë rregullore. Unë mund të flas vetëm për atë që është kërkesa e Shteteve të Bashkuara, që është një shtyrje, kështu që të ketë më shumë punë për ta zbatuar atë në një mënyrë që ne besojmë se është në përputhje me standardet evropiane dhe për të pasur një periudhë të mjaftueshme edukative. Dua të them që qeveria ka folur për një tranzicion dhe ne shpresojmë që ai tranzicion të marrë parasysh këto shqetësime. Në lidhje me çdo veprim të qeverisë amerikane, gjithçka që mund të them është, ne do të shpresonim që qeveria të bashkëpunojë me ne për këtë. Kjo është ajo lloj gjëje për të cilën ne kërkojmë partneritet, dhe në masën që qeveria është e gatshme të jetë partnere në adresimin e këtyre shqetësimeve, ajo do të përforcojë partneritetin tonë më të gjerë, ndërsa në masën që qeveria nuk dëshiron të jetë partnere me ne për këtë çështje shumë të ndjeshme do të ketë ndikim në cilësinë e partneritetit tone”, tha Hovenier.