Tag: Ballina

Kryeministri i Kosovës, Albin Kurti ndodhet në Shtetet e Bashkuara për të marrë pjesë në seancën e jashtëzakonshme të Këshillit të Sigurimit të OKB-së, e thirrur me kërkesë të Serbisë.

Zyra e tij njoftoi se shefi i ekzekutivit Kosovar shoqërohet edhe nga ministrja e jashtme, Donika Gërvalla-Schwarz, e cila prillin e vitit të kaluar nuk ngurroi t’i kthehej ashpër homologut serb Ivica Dacic në mbledhjen e atëhershme të organit të lartë të OKB-së.

Serbia do të përfaqësohet nga Aleksandër Vuçiç, dhe pritet që sonte në New York për herë të parë në kuadër të Këshillit të Sigurimit të ketë një përballje Kurti-Vuçiç për çështjen e dinarit.

Kërkesa e Beogradit erdhi pas vendimit të BQK-së për të ndaluar përdorimin e dinarit serb për pagesat kesh në Kosovë, si dhe për mbylljen e komunave paralele serbe atje. Serbia insiston se vendimi për ndalimin e dinarit është i jashtëligjshëm, dhe e cilësoi atë “vazhdimësi të masave të dhunës brutale fizike dhe institucionale ndaj serbëve”.

Madje Beogradi shkoi deri aty sa ta përshkruante këtë si një lëvizje që synon “spastrimin etnik dhe zhdukjen e popullatës serbe”. Pavarësisht thirrjeve të komunitetit ndërkombëtar, Prishtina nuk u zbraps nga vendimi i saj, por Kurti e pranoi se do të nevojitet një periudhe tranzitore per implementimin e vendimit.

Dinari serb është përdorur në zonat me shumicë serbe në Kosovë që nga periudha e pasludftës. Shteti serb ua paguan serbëve të Kosovës përmes një sistemi paralel pagat, pensionet, ndihmat sociale, dhe përfitimet tjera.

Një seancë e jashtëzakonshme e Këshillit të Sigurimit të Kombeve të Bashkuara për situatën në Kosovë, do të mbahet sot në orët e mbrëmjes.

Kjo seancë vjen me kërkesë të Serbisë e cila do të përfaqësohet nga presidenti Aleksandar Vuçiq, raporton Tanjug.

Serbia i ka dorëzuar të hënën misionit të Guajanës, i cili kryeson Këshillin e Sigurimit të OKB-së, për të thirrur një seancë të jashtëzakonshme për shkak të situatës në Kosovë, në të cilën ndër të tjera theksohet se situata aktuale është në kontrast të fortë me Kartën e OKB-së dhe Rezolutën 1244 të KS të OKB-së dhe e cila është e një natyre të tillë që kërkon mbajtjen e një sesioni të posaçëm të Këshillit të Sigurimit.

Përgatiti: Haris Ademi

Zëvendëskryeministri Besnik Bislimi po vlerëson se Gjykata Kushtetuese është duke devijuar prej misionit të vet. Sipas tij, organi më i lartë kushtetues në disa raste po përzihet në punët e Qeverisë, në disa prej nismave ligjore.

Këtë reagim, Bislimi e tha të mërkurën, kur u paralajmërua prej Partisë Demokratike se do t’i drejtohet kësaj gjykate, lidhur me Projektligjin për Komisionin e Pavarur të Medieve, nëse Qeveria nuk kërkon mendim për të, nga Komisioni i Venecias.

“Ne këtë ligj do ta dërgojmë në Gjykatën Kushtetuese”, tha deputeti i PDK-së, Isak Shabani.

Prandaj Bislimi propozon që, për kompetenca shtesë, Kushtetuesja të garojë në zgjedhje.

“Duhet me u bë qeveri njëherë, me dalë me kërku vota si Gjykatë Kushtetuese, tani me dalë me caktu…”, tha Bislimi.

Numri dy i qeverisë thotë se projektligji për KPM-në u është përshtatur direktivave të Bashkimit Evropian.

“Është e qartë që duhet të krijohen rregulla që sigurojnë konkurrueshmëri, që mbrojnë të miturit dhe të rinjtë, menaxhim të standardizuar, transparencë të pronësisë, databazë të medias që operojnë në treg”, tha Bislimi.

Ndryshe mendon Besnik Tahiri, që përmend akuzat për tentim të kapjes së mediave nga qeveria.

“Këshilli i Mediave të shkruara dhe AGK-ja po akuzojnë se shteti është duke i marrë nën kontroll mediat online…”, tha Tahiri.

Pavarësisht kundërshtimeve, anëtarët e pushtetit në komision arritën ta miratojnë projektligjin me gjashtë vota pro.

Përgatiti: Krenare Mulliqi

Një furgon i cili po bartte 117 milionë, respektivisht rreth 1 milion euro dinarë serbë drejt Kosovës, nuk është lejuar të kalojë kufirin. Furgoni u ndalua në pikën kufitare në Jarinjë.

Siç raportuan mediat serbe dinarët ishin të destinuar për pagat, pensionet, përfitimet sociale dhe pagesat tjera për serbët. Dinarët po transportoheshin në kasafortën e Bankës Popullore të Serbisë në Leposaviq.

Nga Dogana e Kosovës përmes një përgjigje për ATV-në thanë se vetëm zbatuan rregulloren e BQK-së, e cila parasheh që qarkullimi i mjeteve monetare duhet bërë prej kompanive të autorizuara nga BQK-ja.

“Sot kanë ardhur përfaqësuesit e një kompanie, palës serbe, kanë pyetur në Jarinjë se a lejohet, ne ia kemi kumtuar që sipas vendimit të BQK-së, qarkullimi i mjeteve monetare duhet me u bo prej kompanive të autorizuara nga BQK-ja. Ne i kemi treguar që kompania duhet të jetë e licencuar dhe e autorizuar nga BQK-ja.”, thuhet në përgjigjen e Doganës së Kosovës.

Lidhur me rastin reagoi edhe zëvendëskryeministri Besnik Bislimi, i cili akuzoi Serbinë se këtë e bëri një ditë para mbledhjes së Këshillit të Sigurimit.

“Imagjinojeni një paralele, ku para inspektorit doganor, shfaqet njё kamion me mallra tё konsumit tё përditshëm, nga individë qё prezantohen nё emër tё kompanive inekzistuese dhe pretendojnё qё mallin janё duke e dёrguar te njё kompani, e cila po ashtu nuk figuron askund nё regjistrat zyrtarё tё shtetit”, ka thënë Bislimi.

Ky është transferimi i parë i parave pas 1 shkurtit dhe hyrjes në fuqi të rregullores së Bankës Qendrore të Kosovës për ndalimin e qarkullimit të dinarëve.

Kjo rregullore parasheh që euro të jetë valuta e vetme për pagesa në Kosovë, duke ndaluar përdorimin e dinarit serb.

Përgatiti: Leart Hoxha

Kryetari i Komunës së Prishtinës, Përparim Rama, sqaroi të martën në emisionin Context, se kryeqyteti nuk ka nisur proces të ri të këmbimit të pronave.

Sipas Ramës, ka vazhduar një proces të nisur më herët me pronarët e një toke në afërsi të Liqenit të Badocit, që ishte vlerësuar nga Ministria e Financave me vlerë 8 milionë Euro. Kjo tokë kishte kushte të ndërtimit, por ndërkohë u shpall zonë e mbrojtur dhe Komuna u detyrua të këmbejë tokë me pronarët.

Sot, ATV-ja nga Komuna siguroi procesverbalet e takimeve të zyrtarëve të komunës me pronarët e tokës në Badoc.

Në këto dokumente precizohet zyrtarisht se Komuna fillimisht iu kishte ofruar tokë në zonën e Matiqanit dhe kjo ofertë ishte refuzuar.

Më pas, në një takim të tetorit 2023, pronarët e tokës në Badoc kishin kërkuar që këmbimi të bëhet me tokë në qendër të Prishtinës dhe kjo ishte refuzuar nga Komuna.

Si përfundim ishte arritur pajtimi që kompensimi të bëhet me një pjesë të një parcele 80-hektarëshe tek Prishtina e Re, jo me krejt parcelën.
Vendimi i Komunës së Prishtinës për këmbimin e tokës me pronarët Rrahman Haradini dhe Shaban Konxheli, është pezulluar nga Gjykata Themelore në Prishtinë, si masë sigurie, pas padisë së IKD-së ndaj Komunës së Prishtinës.

Ndërkohë, të enjten është thirrur seancë e jashtëzakonshme e Asamblesë Komunale me pikë të rendit të ditës “tërheqja e këtij vendimi për këmbim të pronave”.

Përgatiti: Fatlum Jashari

Në hapin e parë, Zyra e Rregullatorit për Energji ka hedhur poshtë propozimin e KESCO-s për ngritje të sërishme tarifave.

Në raportin konsultativ si përgjigje ndaj aplikimit të KESCO-s për të hyrat e lejuara maksimale, Rregullatori refuzoi kërkesën rritjen e hyrave – e cila do të përbënte barrë të re për konsumatorët.

Por kjo nuk është finale, pasi procesi vijon me hapjen e komenteve nga palët deri më 21 Shkurt.

“Të hyrat e Lejuara Maksimale caktohen në nivelin që mundëson të licencuarit e rregulluar t’i mbulojnë kostot e arsyeshme operative dhe të mirëmbajtjes së aseteve të tyre dhe të realizojnë kthim të arsyeshëm në investimet e tyre”, thuhet në njoftimin e ZRRE-së.

Referuar praktikave nga e kaluara, eksperti i energjisë, Naim Bujupi, nuk pret që raporti përfundimtar të ndryshojë.

“Të hyrat maksimale në bazë të kërkesës së KESCO-s janë rreth 410 milionë euro, ndërsa ato të propozuara nga ZRRE-ja janë diku 401 milionë euro. Nëse i krahasojmë me të hyrat e lejuara maksimale të vitit të kaluar, kemi një diferencë diku 3 milionë euro, që i bie që praktikisht nuk do të ketë rritje ose një rritje shumë e vogël”, tha Bujupi.

Referuar faktorit korrigjues nga viti paraprak në vlerë 25 milionë euro, Bujupi sqaroi se ZRRE-ja mund të përshtatë të hyrat e akterëve të sektorit për të mos lejuar ngritje tarifash.

“Faktori korrigjues është bërë te furnizuesi i shërbimit universal për faktin se kemi rritje të vlerës së importit, pra në bazë të bilancit të energjisë janë lejuar 70 gigavatë orë, ndërsa të realizuara janë diku 212 gigavatë orë. Praktikisht, kjo kosto duhet të mbulohet nga tarifat, mirëpo përshtatja e kostove mund të bëhet nga rregullatori”, tha Bujupi.

Në raportin konsultativ, ZRRE-ja refuzoi edhe kërkesën e KEK-ut për ngritje të çmimit të furnizimit me shumicë për KESCO-n, nga 29.5 në 31.5 euro.

Dy herë radhazi, më 2022 dhe 2023, Kosova pati ngritje të tarifave të energjisë elektrike.

Zëdhënësi i Bashkimit Evropian (BE), Peter Stano, ka thënë të mërkurën se Kosova rrezikon të mbetet prapa në rrugën e saj drejt anëtarësimit në bllok, për shkak të, siç i quajti ai, veprimeve në njëanshme të saj.

Ai i bëri thirrje Kosovës dhe Serbisë të përqendrohen në përmbushjen e detyrimeve që dalin nga marrëveshjet për të cilat janë pajtuar në dialogun e ndërmjetësuar nga BE-ja.

Kosova është kritikuar vazhdimisht së fundmi nga BE-ja, për shkak të vendimit të Bankës Qendrore të Kosovës për ta ndaluar përdorimin e dinarit serb për transaksione me para ta gatshme në gjithë vendin, si dhe për mbylljen e disa komunave paralele serbe në Dragash dhe Pejë.

BE-ja i ka quajtur të njëanshme këto vendime dhe ka kërkuar që Kosova t’i zgjidhë këto çështje në bisedime me Serbinë në dialogun e ndërmjetësuar nga ajo.

“Po shohim shumë gjëra për të cilat kemi reaguar, sidomos në rastin e Kosovës, me veprime të njëanshme që kanë krijuar shqetësim për ne. Kjo krijon frikë në anën tonë se Kosova mund të mbetet jashtë dhe të mbetet prapa“, tha Stano.

Rregullorja e BQK-së, e cila kërkon që euroja të jetë valuta e vetme që mund të përdoret për pagesa me para të gatshme në gjithë vendin, hyri në fuqi më 1 shkurt, me gjithë trysnin e madhe ndërkombëtare për shtyrjen e zbatimit të saj.

Ministri për Komunitete dhe Kthim në Qeverinë e Kosovës, Nenad Rashiq, tha të mërkurën se gjatë një takimi me kryeministrin e Kosovës, Albin Kurti, janë pajtuar se rregullorja e BQK-së për ndalimin e dinarit është në një periudhë tranzicioni.

Vendimi për heqjen e dinarit në Kosovë përkon me mbylljen e komunave paralele që punojnë në sistemin serb dhe janë të paligjshme për Kosovën.

Në dy javët e fundit janë mbyllur katër komuna paralele serbe në Dragash dhe në Pejë.

Stano tha se nuk sheh rrezik për bllokim të dialogut mes Kosovës dhe Serbisë, Stano, pavarësisht mungesës së përparimit në disa takimet e fundit.

“Dialogu po vazhdon dhe puna jonë po vazhdojmë për t’u ndihmojmë palëve që më në fund të fillojnë të sillen në mënyrë konstruktive dhe ato të lëvizin përpara. Nuk kemi frikë nga ndonjë bllokadë, në fakt ne nuk kemi frikë nga asgjë. Por, vetëm kem frikë që njerëzit në Kosovë dhe në Serbi të mbesin jashtë asaj që është për ta e rëndësishme, procesi i integrimit”, theksoi Stano.

Ai shtoi se “ne vazhdojmë punën tonë dhe përfaqësuesi i posaçëm Mirosllav Lajçak, si dhe përfaqësuesi i lartë Joseph Borrell janë duke vazhduar punën me partnerët, si me ata në rajon ashtu edhe me ata në skenën ndërkombëtare, për të mundësuar të dyja palëve që të nisin të bëjnë hapa të cilat do t’u mundësonin avancimin në të gjitha çështjet në dialog… sidomos në zbatimin e gjithë asaj që është arritur vitin e shkuar si në Bruksel, ashtu edhe në Ohër”.

Sipas BE-së, Kosova dhe Serbia arritën Marrëveshjen për normalizimin e marrëdhënieve dhe Aneksit për zbatimin e saj në fillim të vitit 2023. Por, ato nuk janë duke u zbatuar, pavarësisht trysnisë ndërkombëtare./REL/