ATV

Tag: Ballina

  • Mospërputhje qëndrimesh shtetërore për BQK-në dhe raportet me SHBA-në

    Mospërputhje qëndrimesh shtetërore për BQK-në dhe raportet me SHBA-në

    Përgatiti: Fatlum Jashari

    Përveçse me partnerët ndërkombëtarë, mospërputhje qëndrimesh lidhur me rregulloren e re të BQK-së ka edhe ndërmjet krerëve të shtetit.

    Derisa kryeministri përsërit se Kosova është shtet demokratik dhe qeveria nuk ndërhyn në BQK, presidentja beson se zgjidhja për heqjen e dinarit bëhet përmes diskutimit të Qeverisë me aleatët.

    Duke thënë se ka disa detyra shtëpie për të cilat duhet pyetur aleatët dhe disa jo, në një intervistë, kryeparlamentari pranoi rreziqet nga veprimet e pakoordinuara dhe theksoi se e kupton hidhërimin e amerikanëve në raport me to.

    Pasi situatës iu referua si katrahurë dhe nonsens shtetëror e diplomatik, profesori Dritëro Arifi thekson se Qeveria duhet ta kuptojë politikëbërjen si proces e jo si akt.

    “Mendoj që Qeveria nuk po e thotë të vërtetën, është e pavarur. Në praktikë është, edhe me ligj është, por ne e dimë se në politikë nuk ka asgjë të pavarur, sepse po të ishte kështu siç po pretendojmë, atëherë do të ishte dashur që të gjitha vendimet e gjykatave të zbatohen, e specifikisht vendimin e Gjykatës Kushtetuese për Manastirin e Deçanit. Pra, ne e kuptojmë demokracinë e kuptojmë në mënyrë selektive. Një shtet demokratik nuk funksionon kështu”, tha Arifi.

    Teksa vlerësoi se Kosova nuk humb nëse dëgjon kërkesën amerikane për shtyrje të zbatimit, Arifi kritikoi rolin e presidentes në këtë situatë.

    “Mendoj se më shumë po sillet si një OJQ dhe si notere sesa si presidente, sepse ajo do të duhej të paktën të jepte alternativë, jo të jap këshilla. Për këshilla dhe kritika jemi ne dhe OJQ-të. Presidentja duhet të ketë qëndrim shtetëror. Mendoj se ajo është duke folur nga një orbitë jashtë tokës, nuk është duke e kuptua çka po ndodh ose nuk po dëshiron ta kuptojë, sepse po vërehet se është me qëndrimin e Qeverisë”, tha Arifi.

    Krahas vlerësimit se rregullorja e BQK-se është e drejtë, por se strategjia e zbatimit ishte e pakoordinuar dhe e gabuar, politologu Fidan Ukaj përmendi domosdoshmërinë që kjo të trajtohet vetëm si çështje e brendshme.

    “Temat e brendshme, institucionet e Kosovës nuk duhet t’i lejojnë të jenë pjesë e procesit dialogues. Ne duhet të përqendrohemi në zbatimin e dakordimit që kemi arritur në Bruksel në Ohër. Dhe, assesi nuk duhet të lejojmë që temat ditore ose preferencat e Serbisë apo presidentit Vucic të jenë pjesë e procesit dialoguese në Bruksel”, tha Ukaj.

    Përkundër demantit nga ambasadori i SHBA-së, Jeffrey Hovenier, kryeministri Albin Kurti këmbëngul se raportet e Qeverisë me SHBA-në janë të mira.

  • Kurti: Kosova synon të tërheqë investimet e huaja direkte

    Kurti: Kosova synon të tërheqë investimet e huaja direkte

    Sot në Prishtinë është mbajtur takimi i Këshillit Kombëtar për Ekonomi dhe Investime.

    Kryeministri i Kosovës Albin Kurti, foli rreth mundësive të furnizimit të Kosovës me energji të ripërtëritshme, ku tha se kanë qëllime ambicioze rreth peizazhit energjetik të Kosovës, duke vazhduar njëkohësisht ndërtimin mbi pasuritë tona minerale.

    “Kosova është duke iu drejtuar energjisë së ripërëritshme, me qëllime ambicioze për të transformuar peizazhin e saj energjetik, përderisa gjithashtu vazhdojmë të ndërtojmë mbi trashëgiminë tone të pasur minerale. Para pak javësh kemi përmbyllur ankandin e parë për 100 megavat në Rahovec, me ç’rast 6 korporata serioze ndodhen në garë për prodhim të energjisë së ripërtëritshme, në këtë rast, diellit”, ka deklaruar Kurti.

    Sipas të parit të qeverisë, investimet e huaja direkte janë dyfishuar. Ai tha se planifikohen të jenë edhe 150 megavat tjerë në llote me nga 75 megavat, për të cilat destinacioni nuk do të jetë i specifikuar, duke marrë parasysh se përcaktimi do të bëhet në koordinim me korporatat fituese.

    Kurti shtoi se pritet që ato të finalizohen në korrik të këtij viti. “Synimi ynë është që me strategjinë 2022-2031, t’i shtojmë 1200 megavat prodhim të energjisë elektrike nëpërmjet burimeve të ripërtëritshme, që është shumë ambicioze, por njëkohësisht e realizueshme” ka përfunduar ai.

    Kryeministri i Kosovës Albin Kurti, tha se bujqësia është njëra ndër sektorët që ka shënuar eksporte. Po ashtu, sipas tij edhe sektori IT-së është një sektor që ka shënuar bum të zhvillimit.

    Fjala e plotë e kryeministrit Kurti:

    E nderuara, znj. Rozeta Hajdari, Ministre e Industrisë, Ndërmarrësisë edhe Tregtisë,

    I nderuari, z. Elbert Krasniqi, Ministër i Administrimit të Pushtetit Lokal,

    I nderuari, zëvendësministër në Ministrinë e Mjedisit, Planifikimit Hapësinor dhe Infrastrukturës, Hysen Durmishi, dhe

    Zëvendësministër në Ministrinë e Ekonomisë, Getoar Mjeku,

    Të nderuar udhëheqës të institucioneve të pavarura shtetërore,

    I nderuari, z. Artan Mehmeti, shef i sekretariatit të Këshillit Kombëtar për Ekonomi dhe Investime,

    I nderuari, z. Sergyi Maslichenko, drejtor i Bankës Evropiane për Rindërtim dhe Zhvillim,

    I nderuari, ambasador i Francës në Kosovë, z. Olivier Guerot,

    Të nderuar përfaqësues të sektorit privat,

    Të nderuar përfaqësues të odave dhe asociacioneve sektoriale dhe bilaterale në Kosovë,

    Të nderuar përfaqësues të Agjencive zhvillimore,

    Zonja dhe zotërinj,

    Të nderuar të pranishëm,

    Është nder dhe kënaqësi që të hap këtë ngjarje, ku do të ndajmë vizionet dhe synimet për rrugëtimin e ardhshëm të Kosovës drejt rritjes ekonomike dhe zhvillimit të qëndrueshëm. Si Kryeministër i Republikës së Kosovës, jam i motivuar nga pozicioni unik që zë vendi ynë dhe mundësitë për të ndërtuar një ekonomi progresive, të hapur, gjithëpërfshirëse dhe stabile. Ne synojmë të tërheqim investimet e huaja direkte që sjellin vlerë të lartë dhe punësim cilësor për qytetarët tanë. Në këtë drejtim, Qeveria jonë ka ndërtuar një bazë të mirë për përmirësime të mëtejshme. Vetëm gjatë tri viteve të fundit, investimet e huaja direkte janë dyfishuar, po ashtu edhe eksportet, ndërkaq raporti ndërmjet eksporteve dhe importeve është rritur nga gati 1 me 9 sa ka qenë, në edhe më mirë se 1 me 6.

    Vazhdimi në këtë rrugëtim të suksesshëm, kërkon angazhim të palëkundur. I tillë është përkushtimi ynë për një mjedis biznesi i cili jo vetëm lehtëson dhe inkurajon operimin e ndërmarrjeve brenda dhe jashtë vendit, por gjithashtu fton inovacionin dhe konkurrencën. Kemi vendosur si prioritet të lartë reformimin e kuadrit ligjor dhe rregullator, për të minimizuar barrën administrative dhe për të siguruar një mjedis të barabartë për të gjithë. Kjo përfshin nxitje fiskale për sektorë kyçë dhe investime në infrastrukturë dhe arsim, për të përgatitur fuqinë punëtore të Kosovës për sfidat e ardhshme.

    Qeveria jonë ka vënë në fokus ndërlidhjen e tregut të punës me arsimin dhe aftësimin profesional.

    Promovimi i sektorëve që janë të duhur për Kosovën është esencial për të maksimizuar potencialin tonë ekonomik. Bujqësia dhe sektorët e ushqimit në Kosovë përbëjnë një themel të ekonomisë së eksportit, duke llogaritur 17% të eksporteve totale dhe karakterizohen nga disa avantazhe konkurruese si për shembull, kostot konkurruese të punës, klima kontinentale e përshtatshme dhe industria e gjallë e verës. Ndërkohë, Kosova po shfrytëzon bumin global të teknologjisë së informacionit dhe të komunikimit, duke u pozicionuar si një destinacion kryesor për shërbimet BPO (Business Process Outsourcing), të mundësuara nga teknologjia e informacionit, me një sektor të teknologjisë që ka treguar rritje të konsiderueshme që nga viti 2015. Sektorët e prodhimit të lehtë kanë arritur të krijojnë një prani të konsiderueshme, me pajisjet elektrike, metalin, plastikën dhe prodhimin e drurit, që drejtojnë më shumë se 43% të eksporteve në 2023, duke theksuar pozicionin e fortë të vendit në këto industri. Kosova gjithashtu është duke iu drejtuar energjisë së ripërtëritshme, me qëllime ambicioze për të transformuar peizazhin e saj energjetik, përderisa gjithashtu vazhdojmë të ndërtojmë mbi trashëgiminë tonë të pasur minerare.

    Para pak javësh kemi përmbyllur ankandin e parë për 100 megavatë në Rahovec, me ç ‘rast gjashtë korporata serioze ndërkombëtare ndodhen në garë për prodhim të energjisë nga burime të ripërtëritshme, në këtë rast diellin. Ndërkaq edhe 150 megavatë të tjerë do t’i kemi në llote nga 75 megavatë gjatë këtij viti, me shpresë gjatë mesit të vitit 2024, me ç ‘rast nuk do të jenë të specifikuara për nga vendi meqenëse bashkë me korporatat të cilat do të fitojnë ne do të arrijmë që ta bëjmë këtë përcaktim. Pra synimi ynë është që me Strategjinë 2022-2031 t’i shtojmë 1200 megavat prodhim të energjisë elektrike nëpërmjet burimeve të ripërtëritshme që është shumë ambicioze por njëkohësisht edhe e realizueshme.

    Gjithashtu ne dëshirojmë që të bëhemi destinacion i dëshiruar për prodhimin e automjeteve elektrike për shkak të fuqisë punëtore dinamike dhe me kosto konkurruese. Nuk është e rastësishme që në Kosovë kemi raste kur bizneset e caktuara importojnë lëndën e parë ta zëmë nga një vend siç është Austria, dhe prodhimin final e dërgojnë në një vend fqinj të Austrisë siç është Zvicra. Kostot operuese në Kosovë janë të ulëta, edhe sa i përket fuqisë punëtore që paguhet edhe sa i përket qiramarrjes e cila është përgjithësisht e lirë.

    Ne jemi të përkushtuar për të ndërtuar një platformë të fortë për dialogun publiko-privat, që mundëson identifikimin e mundësive dhe adresimin efikas të sfidave. Pra, edhe mundësitë edhe sfidat të shohim se sa mund t’i përcaktojmë së bashku dhe kjo është mënyra se qysh ne mendojmë se ecim përpara: edhe konkurrencë edhe inovacion edhe bashkëpunim. Jo konkurrencë pa bashkëpunim, por natyrisht edhe jo bashkëpunim pa konkurrencë.

    Përmes bashkëpunimit të ngushtë me sektorin privat, asociacionet e biznesit dhe partnerët ndërkombëtarë, si dhe në koordinimin me Shefin tim të Stafit, Luan Dalipin, kemi arritur të zhvillojmë një plan vjetor ambicioz për vitin 2024. Ky plan është mbështetur edhe nga Sekretariati i pavarur i Këshillit, i financuar nga SECO zvicerane, për çka i falënderojmë, dhe i menaxhuar nga BERZh-i në Kosovë, të cilët gjithashtu i falënderojmë.

    Ky plan përfshin një sërë aktivitetesh të synuara për të nxitur investimet dhe eksportet, si dhe për të intensifikuar dhe thelluar dialogun ndërmjet qeverisë dhe sektorit privat. Në këtë plan vjetor janë tri ngjarje kryesore, në tetor dhe në nëntor 2024, në Kosovë, të cilat ofrojnë mundësi të vlefshme për promovim të investimeve të huaja direkte dhe eksportit, si dhe për të gjitha kombinimet e rrjetëzimit: ‘Qeveri-Qeveri’, ‘Biznes-Qeveri’ dhe ‘Biznes-Biznes’. Periudhat për t’u mbajtur mend e shpresoj që të gjithë ju do t’i vendosni në kalendarin e aktivitetve dhe planeve që bëni për vitin në të cilin ndodhemi, janë:

    3-12 tetor 2024, për shërbimet e mundësuara nga TIK;

    24-26 tetor 2024, për Javën e Industrisë së Ushqimit të Kosovës; dhe

    20-26 nëntor 2024, për Konventën e Industrisë së Drurit.

    Gjatë nëntorit të kaluar, nën organizimin e Sekretariatit të Këshillit Kombëtar për Ekonomi dhe Investime, janë mbajtur takime me përfaqësues të odave dhe kompanive më konkurruese të dhjetë sektorëve, prej të cilave kanë rezultuar rreth 130 kërkesa nga sektori privat.

    Dialogu i bazuar në vlera midis sektorit publik dhe atij privat është jetik për identifikimin e mundësive dhe zgjidhjen efikase të sfidave për zhvillimin e sektorit privat.

    Pra, ne jemi një Qeveri që nuk i sheh vlerat e ndara nga interesi, ne i shohim ato bashkë. Është e mundshme t’i kemi bashkë, ne e dimë që nuk janë e njëjta gjë. Vlerat dhe interesi nuk janë e njëjta gjë. Mirëpo nuk duam as vlera por pa interes, ku nuk ka përfitim, ndonjë farë lloj vetëmjaftueshmërie e vlerave por pa dobi materiale nuk është preferencë e jona. Por edhe nuk ka nevojitet një interes brutal i cili shpërfill çfarëdo vlerash. Ne besojmë që është e mundur t’i kemi të dyja këto dhe kjo duhet të jetë princip pune në dialogun tonë publiko-privat.

    Ky dialog ndërmjet sektorit publik dhe privat është jetik për identifikimin e mundësive dhe zgjidhjen efikase të sfidave për zhvillimin e sektorit privat.

    Ne e kuptojmë që një partneritet i fortë midis qeverisë dhe bizneseve është thelbësor për të krijuar një ekonomi dinamike dhe inovative. Përmes këtij dialogu, ne synojmë të kemi një kuptim të përbashkët të mundësive dhe sfidave, duke u angazhuar për zgjidhje të qëndrueshme nga të cilat përfitojnë të gjithë akterët e përfshirë. Kjo do të thotë të dëgjojmë me vëmendje, njëri tjetrin sidomos ne juve, të jemi transparentë në vendimmarrje dhe të veprojmë me integritet.

    Ndërsa përparojmë, Kosova mbetet e vendosur që të luajë një rol të rëndësishëm në skenën ekonomike rajonale dhe ndërkombëtare. Me një pozicionim strategjik në Evropën Juglindore dhe qasje në tregjet kyçe, së bashku me një fuqi punëtore të re, të shkathët dhe shumëgjuhëshe, dhe një ekonomi të hapur e të qëndrueshme, jemi të përgatitur të mirëpresim investitorët dhe partnerët që dëshirojnë të jenë pjesë e historisë sonë të suksesit.

    Ju faleminderit për kontributin e deritanishëm dhe ju dëshiroj punë të mbarë në këtë diskutim gjithsesi të nevojshëm.

  • Sarrazin për tensionet Kosovë-Serbi: Dritarja nuk është mbyllur ende

    Sarrazin për tensionet Kosovë-Serbi: Dritarja nuk është mbyllur ende

    Në kuadrin e Konferencës së Sigurisë në Mynih, i ngarkuari i qeverisë gjermane për Ballkanin Perëndimor, Manuel Sarrazin, ka theksuar se qëllimi është integrimi i suksesshëm i Ballkanit Perëndimor në BE.

    “Së pari duhet thënë se dritarja nuk është mbyllur ende. Ne kemi të dërguarin e posaçëm të BE, Miroslav Lajcak, i cili punon, ai ka një agjendë dhe do që të arrijë zbatimin dhe implementimin e Ohrit. Dhe qasja jonë është që ta mbështesim atë dhe të bëjmë gjithçka, që kjo dritare të shfrytëzohet, të cilën Miroslav Lajcak e plotëson tani. Ai është shumë aktiv dhe kjo është qasja jonë. Më duket se nuk ka kuptim të mendosh shumë, se çfarë do të vijë paskëtaj. Ne jemi për Ohrin dhe duam që të dyja palët ta çojnë përpara zbatimin e Ohrit dhe mendoj se kjo është vendimtare. Unë shoh në të dyja palët se politika e brendshme do të bëhet një faktor i rëndësishëm. Dua ta them në mënyrë eksplicite; e ardhmja e të gjithë rajonit është në BE dhe kjo duhet të qëndrojë nganjëherë mbi politikën e brendshme”, ka thënë ai për DË, transmeton KosovaPress.

    DW: Si duhet shpjeguar?

    Manuel Sarrazin: Unë besoj se secili e di, që ne ndodhemi në një fazë, kur lufta në Ukrainë, çështja e rendit të ardhshëm botëror, zgjedhjet në SHBA dhe Trumpi, duket se qëndrojnë në plan të parë një herë për një herë. Besoj se nuk duhet të harrojmë, se në të gjitha këto çështje aftësia strategjike e Evropës për ta zhvilluar pozitivisht Ballkanin Perëndimor, do të jetë vendimtare për pyetjen, nëse do të na marrin seriozisht në çështjet e tjera. Sigurisht që nga BE kërkohet që të furnizojë Ukrainën, por tema së paku e dyta për nga rëndësia është Ballkani Perëndimor. Nëse atje kapaciteti i BE nuk funksionon në mënyrë adekuate, si mund të na marrë seriozisht dikush shumë, shumë larg nesh, në konkurrencën globale për çështjet e mëdha botërore.

    DW: Pati një panel lidhur me zgjerimin e BE. Në të mori pjesë presidentja e Gjeorgjisë, një përfaqësuese e Ukrainës, Ballkani Perëndimor mungonte edhe atje. Dhe kur je në rajon, ke shpesh përshtypjen se njerëzit në fakt kanë frikë, se tema e tyre margjinalizohet si rrjedhojë e sfidave të mëdha që sjell Ukraina. Si e interpretoni këtë situatë?

    Manuel Sarrazin: Unë e kuptoj që shumë njerëz kanë, të themi frikë, se e shohim veten prej shumë kohësh duke pritur dhe tani të tjerët duket sikur po e parakalojnë Ballkanin. Së pari mendoj se duhet të kemi parasysh, se çdo histori suksesi e secilit vend drejt zgjerimit do t`i sjellë dobi të gjithëve. Ukraina ka bërë që Evropa të jetë e vendosur për ta dashur zgjerimin edhe me Ballkanin Perëndimor, të gjitha kryeqytetet, jo vetëm Berlini apo Brukseli, edhe të tjerët. Kancelari dhe ministrja e Jashtme janë shumë të lidhur me zgjerimin e Ballkanit Perëndimor në biografinë dhe mendësinë e tyre. Ukraina dhe Ballkani Perëndimor për ne nuk përbëjnë kundështi, por të dy kanë një rëndësi të jashtëzakonshme gjeostrategjike.

    DW: Kurrë më parë nuk ka pasur një formacion kaq të mirë të përfaqësuesve për Ballkanin në BE. Nga ana tjetër koha po ikën, ne jemi tani pak para zgjedhjeve evropiane dhe do të ketë me siguri shumë ndryshime në nivel evropian. Çfarë duhet të nxjerrim nga kjo për politikën ndaj Ballkanit Perëndimor. Çfarë duhet të ndodhë në këtë dritare të shkurtër që është ende aty?

    Manuel Sarrazin: Unë mendoj se është e qartë, të gjithë e kanë të qartë, që në këto kohë po shkruhet histori. Historia shkruhet shpesh më shpejt nga ç’e mendon. Unë mund të them se nuk kam përshtypjen, se punës, veprimtarisë sime po i ikën koha, por çështja është që të punojmë së bashku, që ne, politika e qeverisë gjermane si shtet anëtar i BE-së, të japim kontributin tonë, në mënyrë që koncerti evropian të jetë i suksesshëm në Ballkanin Perëndimor. Dhe ne të gjithë punojmë për një qëllim, që është integrimi i suksesshëm i Ballkanit Perëndimor në BE. Dhe komisioni do të bëjë së shpejti propozime të reja, për ta bërë më të besueshëm rrugëtimin drejt këtij qëllimi.

    DW: Le të ndalemi edhe tek Bosnja e Kosova: Për Bosnjën 12 marsi është një moment i rëndësishëm. A nuk të krijohet përshtypja se vendi po bën një zhvillim politik për të plotësuar më mirë klauzolat e tij. Çfarë duhet të ndodhë nga këndvështrimi juaj si i Ngarkuar për Ballkanin Perëndimor, në mënyrë që nga 12 marsi të hapet ndoshta një kapitull i ri?

    Manuel Sarrazin: Koalicioni ka dhënë disa sinjale subtile, se është i gatshëm të bëjë disa reforma paraprakisht, për të na mundësuar që ta ndjekim pozitivisht rrugën. Këtë do ta shohim, shenjat subtile i shohim, por duam t`i shohim vërtet. Kjo më duket se është situata, ashtu siç është, dhe ne sigurisht që do ta mbajmë të fortë presionin, me qëllim që të shohim sa më shumë zhvillime pozitive. Vendimtare është besueshmëria, që ne të jemi të bindur se rruga e reformave do të vazhdohet më tej në mënyrë të qëndrueshme. Dhe për këtë ne duam të marrim sinjale nga Sarajeva.

    DW: Sfera e dytë e konfliktit, apo ndoshta më e madhja në rajon, vazhdon të jetë çështja Kosovë – Serbi – dialogu. Shumë janë të dekurajuar, bëhen dy hapa përpara dhe pastaj dy prapa, nganjëherë tri hapa prapa dhe një hap para, dhe për këtë shumë edhe kanë thënë, ndoshta dritarja tani mbyllet, kush e di çfarë do të ndodhë pas zgjedhjeve evropiane, pas zgjedhjeve në SHBA. Cila është qasja e të Ngarkuarit për Ballkanin Perëndimor për të sjellë atje një përparim, në mënyrë që dikur të arrihet një zgjidhje e qëndrueshme në marrëdhënien ndërshtetërore ndërmjet Kosovës dhe Serbisë?

    Manuel Sarrazin: Së pari duhet thënë se dritarja nuk është mbyllur ende. Ne kemi të dërguarin e posaçëm të BE, Miroslav Lajcak, i cili punon, ai ka një agjendë dhe do që të arrijë zbatimin dhe implementimin e Ohrit. Dhe qasja jonë është që ta mbështesim atë dhe të bëjmë gjithçka, që kjo dritare të shfrytëzohet, të cilën Miroslav Lajcak e plotëson tani. Ai është shumë aktiv dhe kjo është qasja jonë. Më duket se nuk ka kuptim të mendosh shumë, se çfarë do të vijë paskëtaj. Ne jemi për Ohrin dhe duam që të dyja palët ta çojnë përpara zbatimin e Ohrit dhe mendoj se kjo është vendimtare. Unë shoh në të dyja palët se politika e brendshme do të bëhet një faktor i rëndësishëm. Dua ta them në mënyrë eksplicite; e ardhmja e të gjithë rajonit është në BE dhe kjo duhet të qëndrojë nganjëherë mbi politikën e brendshme.

    DW: Si Vuçiq ashtu edhe Albin Kurti ishin në Mynih. Ka ndonjë lajm pozitiv pas bisedimeve me këto dy politikanë për t’u treguar apo ndonjë shenjë shprese? Pati ndonjë impuls për të cilin mund të thuhet se po ndodh diçka?

    Manuel Sarrazin: Jo diçka për cilën unë mund të flisja këtu. Por një gjë mund të dihet me siguri, se qeveria gjermane mbetet e angazhuar për të bërë gjithçka, në mënyrë që këtu së shpejti të këtë përparim.

  • Në Speciale vazhdon gjykimi ndaj ish-krerëve të UÇK-së

    Në Speciale vazhdon gjykimi ndaj ish-krerëve të UÇK-së

    Në Dhomat e Specializuara të Kosovës (DHSK) në Hagë, sot do të vazhdojë gjykimi ndaj ish-krerëve të UÇK-së.

    Në këtë rast gjyqësor, gjykatësit ditë më parë vendosën që të mos përcaktonin kufizime për “vizitat private”, që do të thotë se vizitat speciale me bashkëshortet ose partneret dhe/ose fëmijët e të paraburgosurve do të kryhen jashtë rrezes së shikimit dhe dëgjimit të oficerëve të paraburgimit.

    Në vendimin e 9 shkurtit, Trupi Gjykues shqyrtoi informacion nga Zyra Administrative në lidhje me raste të tjera të nxjerrjes së informacionit konfidencial gjatë vizitave dhe u shpreh se “në të paktën dy raste, z. Selimi u përmendi dy palëve të paautorizuara informacion konfidencial në lidhje me dy dëshmitarë të mbrojtur, çka përbën nxjerrje të informacionit konfidencial. Po kështu, z. Thaçi u përmendi informacion konfidencial dy anëtarëve të familjes së tij, çka përbën nxjerrje të informacionit konfidencial”.

    Megjithatë, Trupi Gjykues përsëri nuk vendosi kufizime për vizitat private me bashkëshortet ose partneret dhe fëmijët. Megjithëse Trupi Gjykues nuk vendosi kufizime për vizitat private, gjykatësit theksuan se “kur Administratorja (ose shefi i Paraburgimit) ka informacion se ekziston rrezik i besueshëm që të zbulohet informacion gjatë një vizite, përfshirë gjatë një vizite private, Administratorja, (ose shefi i paraburgimit që vepron në emër të saj) ka kompetencë të refuzojë vizitën dhe/ose të caktojë masa që janë proporcionale dhe të domosdoshme për trajtimin me efektivitet të rrezikut.

    Gjykatësit gjithashtu u tërhoqën vërejtje të akuzuarve dhe Mbrojtjes që të mos zbulojnë informacion konfidencial, përfshirë dëshmi të dëshmitarëve të mbrojtur, gjatë vizitave në objektin e paraburgimit.

    Gjykatësit përsëritën gjithashtu se një i paraburgosur mund të kundërshtojë para Trupit Gjykues çdo vendim të Administratores për refuzimin ose vendosjen e kufizimeve për një vizitë private specifike.

    Më 14 shkurt në të njëjtën çështje gjyqësore, Trupi Gjykues miratoi tërheqjen e Gregori Kihou si kryembrojtës i Hashim Thaçit, që hyn në fuqi ditën kur Administratorja e DHS-së cakton kryembrojtësin e ri për të përfaqësuar z. Thaçi.

    Lidhur me një aspekt tjetër që ka të bëjë me mbrojtësit: pasi ka marrë kërkesën e Venkatesvari Alagendrës në lidhje me emërimin e saj të mundshëm si mbrojtëse e Salih Mustafës, Trupi Gjykues në çështjen gjyqësore Thaçi dhe të tjerët, më 8 shkurt konstatoi se mund të lindë konflikt interesi nëse ajo përfaqëson Salih Mustafën krahas pozitës aktuale si mbrojtëse e Jakup Krasniqit.

    Megjithatë, Trupi Gjykues thekson se ky vendim nuk duhet të kuptohet si shprehje e mendimit të Trupit Gjykues mbi emërimin ose jo të znj. Alagendra si mbrojtëse e z. Mustafës, sepse për këto aspekte vendos Administratorja.

  • Sërish protestojnë punëtorët e sigurimit fizik në KEK

    Sërish protestojnë punëtorët e sigurimit fizik në KEK

    Shoqata Sindikale e Sigurimit Fizik në KEK ka njoftuar se sot nga ora 10:00, do të mbajë protestë.

    Sipas njoftimit kjo protestë do të jetë paqësore dhe do të fillojë nga sheshi “Zahir Pajaziti”, dhe pastaj para zyrave të KEK-ut.

    Sipas kryetarit të Sindikatës së Re Korporata Energjetike e Kosovës, Nexhat Llumnica, protesta është organizuar në shenjë proteste kundër vazhdimit të tenderimit të paligjshëm të këtij departamenti, pagave të ulëta, dhe kushteve të rënda për punonjësit e sigurimit fizik në KEK.

  • Ministri Aliu raporton në Komisionin për Mbikëqyrjen e Financave Publike

    Ministri Aliu raporton në Komisionin për Mbikëqyrjen e Financave Publike

    Ministri i Mjedisit, Planifikimit Hapësinor dhe Infrastrukturës, Liburn Aliu, do të raportojë sot para Komisionit për Mbikëqyrjen e Financave Publike.

    Në këtë komision do të shqyrtohet raporti i auditimit të performances” Prokurimet e negociuara pa publikim të njoftimit për kontratë në Ministrinë e Mjedisit, Planifikimit Hapësinor dhe Infrastrukturës në vitin 2021”.

    Mbledhja e komisionit fillon në orën 14:00.

  • “Nënshkrimi” kryefjalë e kryeministrit, nuk e mendon avancimin e njëanshëm

    “Nënshkrimi” kryefjalë e kryeministrit, nuk e mendon avancimin e njëanshëm

    Përgatiti: Fatlum Jashari

    Kryeministri Albin Kurti njoftoi se nuk ka marrë ftesë nga Bashkimi Evropian për takim të nivelit të lartë në kuadër të dialogut Kosovë – Serbi.

    Ai tha se është “përgjithësisht pozitiv” në raport me një ftesë eventuale nga Përfaqësuesi i Lartë, Josep Borrell, teksa theksin e vuri te mungesa e nënshkrimit të marrëveshjes së Brukselit dhe shtojcës së Ohrit.

    “Nëse na thërrasin për nënshkrim të marrëveshjes padyshim që shkoj… Në momentin që Serbia do ta nënshkruante marrëveshjen, të gjitha ato shkelje të mëhershme anulohen dhe krijohet siguria ligjore për rrugën përpara. Pra, edhe në kuptimin e së kaluarës së hidhur edhe në kuptimin e së ardhmes së ndritshme nënshkrimi na shfaqet si domosdoshmëri dhe unë uroj që kjo të bëhet këtë pranverë, pasi nuk u bë në atë të kaluarën”, tha Kurti.

    Vetë BE-ja konfirmoi se nuk ka ftesë për takim të nivelit të lartë në këtë fazë.

    Për kryeministrin zbatimi i njëanshëm i zotimeve të dialogut nuk është opsion.

    “Përderisa edhe partnerët tanë evropianë dhe amerikanë thonë se normalizimi duhet të jetë me Serbinë, unë nuk besoj që mund të ketë normalizim të njëanshëm. Dhe, insistoj që normalizimi të jetë normal. Pra, nuk mund të kemi një normalizim i cili është në kundërshtim me të drejtën e Republikës së Kosovës për të ekzistuar, për t’u mbrojtur, për të qenë e lirë. Por, duhet të jetë edhe sipas standardeve dhe normave evropiane”, tha Kurti.

    Kryeministri Albin Kurti u përgjigj edhe për demantin publik nga ambasadori i Shteteve të Bashkuara të Amerikës, Jeffrey Hovenier, për çështjen e dinarit.

    “Unë nuk e kam thënë qëndrimin e asnjë shteti tjetër, por si kryeministër i Republikës së Kosovës kam folur që raportet, bashkëpunimi me Shtetet e Bashkuara të Amerikës është shumë i mirë. Jemi partnerë, aleatë, miq. Kjo nuk do të thotë që pajtohemi absolutisht çdoherë, në çdo vend, për gjithçka”, tha Kurti.

    Referuar deklaratës së homologut Edi Rama se “çdo sulm mbi Kosovën është sulm mbi Shqipërinë”, kryeministri Kurti tha se këtë vit ka plane për shtim të bashkëpunimit me Shqipërinë, në çdo aspekt.

  • Dorëheqjet e serbëve mbajnë pezull funksionimin e degëve në Zubin Potok e Leposaviq

    Dorëheqjet e serbëve mbajnë pezull funksionimin e degëve në Zubin Potok e Leposaviq

    Përgatiti: Nora Luta

    Pak metra larg komunës, ndodhet dega e Gjykatës Themelore të Mitrovicës, këtu në Zubin-Potok.

    Por ndryshe nga objekti komunal, në hyrje të degës së gjykatës, e cila është e mbyllur nga nëntori i vitit 2022, valon flamur i shtetit serb.

    Përveç në Zubin Potok, as dega e gjykatës në Leposaviq nuk ofron shërbime që nga ajo kohë, kur dhanë dorëheqje stafi dhe gjyqtarët e nacionalitetit serb.

    Mungesa e tyre, sipas juristëve, ka vështirësuar qasjen e qytetarëve në drejtësi.

    Megjithatë, sipas Këshillit Gjyqësor të Kosovës, Gjykata në Mitrovicë ka zgjidhur më shumë lëndë vitin e kaluar, krahasuar me vitet paraprake.

    Kryesuesi Albert Zogaj thotë se dorëheqjet që janë pezull pamundësojnë hapjen e vendeve të reja të punës.

    Me përjashtim, por jo të gjithë gjyqtarët, e prokurorët e dorëhequr, që vepruan me direktiva të Serbisë, duhet të kthehen në punë, sipas Qendrës Kosovare për Studime të Sigurisë.

    Gjyqtarët dhe stafi administrativ i nacionalitetit serb dhanë dorëheqje nga pozitat e tyre në gjykatën në veri, shkaku i vendimit të Qeverisë për targa dhe arrestimit të ish-drejtorit të Policisë në këtë pjesë.

    KGJK-ja i kishte shkarkuar ish-kryetaren, Liljana Stefanovic, dhe ish-udhëheqësin e divizionit të Apelit në veri, Nikolla Kabashiq, në tetor të vitit të kaluar, pasi e kishte konsideruar pjesëmarrjen e tyre në organizimet e Listës Serbe si shkelje të rëndë.

  • TELEKOMI kundër vendimit të gjykatës komerciale

    TELEKOMI kundër vendimit të gjykatës komerciale

    Përgatiti: Armand Hoti

    Kryeshefja e “Telekomit”, Burbuqe Hana, e cilësoi si antiligjor vendimin e shkallës së parë të Gjykatës Komerciale, që lë në fuqi urdhrin përmbarimor të vitit 2019, që derivon nga vendimi i Arbitrazhit të 2016-s me kompaninë “Dardafon”.

    Kryeshefja Hana tha se “Telekomit” po tentohet t’i grabiten mbi 5.7 milionë euro.

    “Nëpërmjet këtij aktvendimi lihet në fuqi urdhri përmbarimor, i lëshuar në vitin 2019, i cili hap rrugën për bllokimin e llogarive bankare të Telekomit dhe grabitjen e shumës prej mbi 5.7 milionë euro të tjera. Në ndërkohë me të gjitha provat dhe faktet e paraqitura në Gjykatë, është vërtetuar se Telekomi i Kosovës e ka paguar shumën prej mbi 40 milionë eurosh, në emër të vendimit të Arbitrazhit, ndonëse vendimi ishte për shumën prej rreth 27 milionë eurosh”, tha Hana.

    Hana theksoi se gjyqtari i rastit nuk e ka marrë për bazë vendimin e shkallës së dytë të Gjykatës Komerciale, që kërkonte realizimin e një ekspertize financiare.

    “Gjyqtari i rastit në vendimin e tij përpiqet të manipulojë me qëndrimin e Telekomit të Kosovës se kinse Telekomi po e mohon lartësinë e detyrimit të vendimit të Arbitrazhit. Kjo s’është aspak e vërtetë dhe mund të vërtetohet në të gjitha shkresat e lëndës. E vërteta është se Telekomi jo vetëm që e ka njohur lartësinë e obligimit të dalë nga Arbitrazhi, por edhe ka paguar mbi 13 milionë euro më tepër. Për këtë mbipagesë Shkalla e Dytë me të drejtë ka kërkuar që të bëhet ekspertizë financiare nga ndonjë kompani e licencuar e auditimit”, tha Hana.

    Zyrtari kryesor financiar i ndërmarrjes publike, Fehmi Kelmendi, shprehu dyshimet se gjykatës të caktuar brenda komerciales ndikohen nga kompania “Dardafon”.

    “Dyshimi ynë pse është skemë kriminale është se vendimi duhet të ekzekutohet në shkallën e parë, ndërsa ne kur eventualisht, jemi të sigurt që do fitojmë në shkallën e dytë nuk mund t’i kthejmë mjetet prapa. Ne mund të vijmë në situatën që me na mbetë në dorë vendimi i shkallës së dytë që është në favor tonin, mirëpo paratë nuk kemi si t’i kthejmë sepse kompania “Dardafon” nuk ka asnjë aktivitet nga viti 2019. Ne dyshojmë se kjo kompani ka ndikim të fuqishëm në gjykatës të caktuar brenda Gjykatës Komerciale”, tha Kelmendi.

    Për rastin, Telekomi i Kosovës ka ngritur kallëzim penal në Prokurorinë Speciale.

    Nga Telekomi paralajmëruan se do kërkojnë drejtësi në çdo instancë, përfshirë edhe gjykatat ndërkombëtare.

    ATV-ja ka kontaktuar me zëdhënësen e Gjykatës Komerciale, mirëpo ajo ka refuzuar të komentojë mbi akuzat e “Telekomit”.

  • Stano: Në këtë moment s’do ketë raund të ri të dialogut mes Kosovës dhe Serbisë

    Stano: Në këtë moment s’do ketë raund të ri të dialogut mes Kosovës dhe Serbisë

    Zëdhënësi i Bashkimit Evropian, Peter Stano, ka thënë për agjencinë serbe të lajmeve “Beta” se në këtë moment BE-ja nuk mund të ketë një raund të ri të dialogut mes Kosovës dhe Serbisë.

    “Nuk kemi asgjë në bazë të së cilës do të mund të shpallnim një dialog të mundshëm të nivelit të lartë”, tha ai, duke iu referuar deklaratës së presidentit serb Aleksandër Vuçiç, se pret një ftesë në Bruksel këto ditë dhe se shpreson në një zgjidhje për ndalimin e përdorimit të dinarit në Kosovë.

    Ndërkaq dy ditë më parë, Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell, ka theksuar se stabiliteti i qëndrueshëm dhe paqja në rajon mund të arrihet vetëm përmes normalizimit të marrëdhënieve ndërmjet Kosovës dhe Serbisë.

    Këto komente, i ka bërë pas takimeve të ndara që ka pasur me kryeministrin e Kosovës, Albin Kurti, dhe presidentin e Serbisë, Aleksandër Vuçiç, në Mynih të Gjermanisë, në margjinat e Konferencës së Sigurisë.

    “Rruga drejt kësaj çon përmes dialogut të lehtësuar nga BE-ja”, pati shkruar Borrell në platformën X (ish-Twitter), derisa ka ndarë pamje nga takimet që ka pasur me Kurtin dhe Vuçiç-in.

    Ndërsa, kryeministri Kurti, në takim me Borrell-in dhe të dërguarin e BE-së për dialogun Kosovë-Serbi, Miroslav Lajçak, ka kërkuar nënshkrimin e Marrëveshjes Bazë (Bruksel 27 shkurt, Ohër, 18 mars) dhe heqjen e masave ndaj Kosovës.

    “Kryeministri kërkoi heqjen e masave kufizuese të padrejta të vendosura nga Bashkimi Evropian”.

    Përmes një komunikate nga Zyra e Kryeministrit është thënë se sipas Kurtit nënshkrimi marrëveshjeve është bërë i nevojshëm për shkak të shkeljeve të vazhdueshme nga Serbia.

    Nga ana tjetër, përmes një postimi në platformën sociale, Facebook, Vuçiç ka njoftuar se tema kryesore e takimit mes tij dhe ndërmjetësuesve të procesit të dialogut ka qenë pikërisht Kosova dhe, sipas tij, “përpjeka e Kurtit për të kryer në heshtje spastrim etnik të serbëve”.