Tag: Ballina

Emisari i Bashkimit Evropian për dialogun Kosovë-Serbi, Miroslav Lajçak, po qëndron në Romë të Italisë, prej nga ka njoftuar që çështja e negociatave Kosovë-Serbi, ishte pjesë e diskutimit në disa takime.

Duke dhënë sinjale sinjale paralajmëruese për hapat që do të bëhen në këtë proces, Lajçak ka bërë të ditur se me zyrtarët italianë, kanë theksuar nevojën urgjente të normalizimit të raporteve mes të dyja vendeve.

“Diskutuam për zhvillimet e fundit në dialogun për normalizimin e marrëdhënieve ndërmjet Kosovës dhe Serbisë, çështjet më të gjera rajonale dhe hapat e tjerë në muajt në vijim”, ka shkruar ai në Facebook.

Emisari evropian nuk la pa përmendur as Konferencën e Sigurisë që u mbajt në Munih javën që shkoi.

“Kam marrë pjesë në ngjarje të shumta të fokusuara në Ballkanin Perëndimor, duke përfshirë një panel diskutimi publik për të ardhmen e Ballkanit Perëndimor, ku theksova nevojën urgjente për normalizimin e marrëdhënieve ndërmjet Kosovës dhe Serbisë”.

Sipas Miroslav Lajçakut, ky normalizim është thelbësor për stabilitetin e rajonit, zhvillimin ekonomik dhe përparimin drejt Bashkimit Evropian.

Përgatiti: Haris Ademi

Që nga marrja e detyrës së kryetarëve shqiptarë në katër komunat veriore, qeveria i ka shtuar masat që mundësojnë punësimin e qytetarëve të kësaj zone të dominuar nga etnia serbe.

Dy ministra nga Prishtina i shkuan Lulzim Hetemit në Leposaviq, për të treguar se do t’i mbështesin dy mijë të punësuar nga i gjithë veriu, me subvencionim të 70% të pagës për gjashtë muaj.

Aktivitetin e ka shtuar edhe Agjencia e Punësimit. Në përgjigjen dhënë ATV-së, APRK-ja tregoi se i ka në listë 4374 punëkërkues nga Mitrovica e Veriut, Leposaviqi, Zveçani e Zubin-Potoku. Në këto dy të fundit, nuk janë aktive Zyrat e Punësimit, pasi kryetarët funksionojnë në objekte alternative.

Për këto masa është skeptik ish-kryetari i Odës Ekonomike, Safet Gërxhaliu.

“Çdo çështje ekonomike është politizuar, a i përgjigjen serbët kësaj, a ka biznes mjaft për 2000 vende pune, qeveria po e përdor si manovër politike…”, tha Gërxhaliu.

Përveç masave për sektorin privat, ka nevojë edhe për staf në institucionet veriore.

Të mërkurën, Ministria e Punëve të Brendshme hapi konkurs për 35 vende pune, për Zyrtar të Regjistrimit Civil dhe të Automjeteve.

Përgatiti: Fatlum Jashari

Dhjetë muaj pas arrestimit dhe pezullimit të Nagip Krasniqit nga pozita e kryeshefit ekzekutiv, bordi i drejtorëve i KEK-ut emëroi një ushtrues detyre të ri.

Detyrën e kryeshefit në këtë ndërmarrje publike do ta ushtrojë Bekir Gërguri, ndërsa Përparim Kabashi, i cili ishte caktuar në këtë detyrë më 25 Prill të vitit të kaluar, është kthyer në pozitën e tij të mëparshme.

“Bordi i Drejtorëve të KEK sh.a njofton se në pozitën e Kryeshefit Ekzekutiv (ushtrues detyre) në Korporatën Energjetike të Kosovës është emëruar z. Bekir Gërguri. Sot, gjatë ceremonisë së pranim-dorëzimit, z. Gërguri ka pranuar detyrat dhe autorizimet e plota për udhëheqjen e të gjitha operacioneve të KEK sh.a” , thuhet në njoftimin e KEK-ut.

Në pozitën e zëvendëskryeshefit u emërua Ramadan Budakova.

Megjithatë, KEK-u nuk sqaroi nëse ka ndryshim në marrëdhënien e punës me Nagip Krasniqin.

KEK-u nuk sqaroi as nëse Gërguri do ta ushtrojë detyrën deri në shpalljen e konkursit për kryeshef të ri apo krijimin e rrethanave eventuale për kthimin e Krasniqit në pozitë.

Bekir Gërguri ka qenë kandidat i Lëvizjes Vetëvendosje për asamblist, ndërsa Ramadan Budakova njihet si përkrahës i kryeministrit Albin Kurti.

Nën dyshimet për keqpërdorim të detyrës, Nagip Krasniqi u arrestua më 19 Prill 2023, u suspendua nga detyra disa ditë më vonë. Ai është liruar nga paraburgimi dhe ndaj tij është caktuar masa që i ndalon t’i afrohet KEK-ut.

Përgatiti: Benita Zeneli

Nga 30 pika sa ishin në rend dite në Kuvend, rreth 20 ishin shqyrtime në lexim të parë e të dytë të projektligjeve.

Projektligji që solli përçarje edhe në mesin e grupit parlamentar të Vetëvendosjes, ishte ai për shëndetin riprodhues dhe fertilizim të asistuar mjekësor.

Për këtë projektligj ishin propozuar 42 amendamente prej tyre, 20 vetëm të deputetit Visar Korenica.

“Pasi po flasim te dhurimi i qelizave riprodhuese për aplikim te njerëzit, që nuk kufizohet te çifti, por i jepet hapësirë edhe individit. Në versionin e parë ka qenë e specifikuar që edhe gruaja e pamartuar të ketë të drejtë të pranojë qeliza për riprodhim, tash i jepet mundësi edhe individit, gjinisë mashkullore. Kjo i jep më shumë problem, pasi individ mundet të jenë edhe të gjinisë së njëjtë, jo vetëm gjinisë së kundërt”, tha Korenica.

Megjithatë, as për amendamentin e parë të Korenicës, nuk pati përkrahje të mjaftueshme. Votimi u përsërit tri herë, derisa as deputeti tjetër nga Vetëvendosja, Eman Rrahmani, nuk votoi.

“Me qëllim që të pamundësohet që të procedohet më tej projektligji njëri nga deputetët nuk po voton”, tha kryetari i Kuvendit, Glauk Konjufca

Për këtë reagoi deputeti Rrahmani.

“S’kam nevojë me ta përmend emrin. Kjo është për të kuptuar teknikisht pse s’po ndodh. Deputetët e kanë shpjeguar pozicionin e vet”, tha Konjufca.

Në votimin e tij në herën e tretë, 12 deputetë votuan për, 32 kundër dhe 14 abstenuan, duke shtyrë shqyrtimin e projektligjin për ndonjë seancë tjetër.

Ndërkohë, debat pati edhe për projektligjin për noterinë, të cilin ministrja e Drejtësisë, Albulena Haxhiu, për prezantim e kishte ngarkuar ministrin e Kulturës, Hajrullah Çeku.

Ndërkaq, ndryshe nga Haxhiu, si rrallëherë në Kuvend për prezantimin e disa prej projektligjeve të Ministrisë që ai drejton, ishte i pranishëm ministri i Punëve të Brendshme, Xhelal Sveçla.

Deputetët me shumicë votash arritën të miratojnë Projektligjin për letërnjoftimin, atë për kontrollin e kufirit shtetëror, ndërkaq për projektligjin për gjendjen civile nuk pati kuorum.

Përgatiti: Armand Hoti

Bashkimi Evropian ka ftuar palën kosovare dhe atë serbe të takohen në kryeqytetin politik të Evropës, në njëvjetorin e marrëveshjes së Brukselit. Por, diskutimi këtë herë do të zhvillohet rreth vendimit të autoriteteve në Prishtinë që ndalon përdorimin e dinarit.

Të mërkurën, kryenegociatori i Kosovës, Besnik Bislimi, tha se ai nuk do të marrë pjesë në këtë takim. Por, nga zyra e tij nuk kanë treguar se kush do ta përfaqësojë Kosovën në Bruksel më 27 shkurt.

Për ATV-në, zëdhënësi i Bashkimit Evropian, Peter Stano, tha se përzgjedhja e përfaqësuesve është lënë në vullnetin e dy vendeve përkatëse.

“Zakonisht ne nuk i komentojmë korrespondencat me partnerët tanë, por ftesa nga i dërguari i posaçëm Lajçak nuk kishte specifikuar se kush duhet ta përfaqësojë Kosovën dhe kush Serbinë”, ka thënë Stano.

Stano komentoi edhe deklaratën e Bislimit se emisari Lajçak ka shkelur parimet.

“Ne shpresojmë se zoti Bislimi do t’i vlerësojë përpjekjet, në vend që, në mënyrë të pabazë, t’i akuzojë zyrtarët e BE-së. Një sjellje e tillë është e papranueshme”, ka thënë Stano.

Episodin e fundit në raport me Brukselin e komentojnë edhe njohësit. Derisa një palë thotë se çështja e dinarit i takon pjesës teknike të dialogut, pala tjetër thotë se për dinarin sqarime duhet dhënë Banka Qendrore.

Ftesa për me dialogu për dinarin duhet të shihet si kërkesë legjitime e një shteti që pretendon se qytetarët e atij po trajtohen keq prej Kosovës… Por nuk duhet të diskutohet në nivel teknik, jo në nivel politik”, tha gazetari Zekirja Shabani.

“Unë mendoj që kryenegociatori nuk duhet të shkojë dhe askush prej Qeverisë së Kosovës nuk duhet të shkojë, por nëse lehtësuesit evropianë, apo amerikanë kanë nevojë për informacione shtesë, atëherë janë njerëzit përgjegjës në Bankën Qendrore të Kosovës”, tha profesori Basri Muja,.

Rregullorja e Bankës Qendrore të Kosovës hyri në fuqi më 1 shkurt dhe parasheh euron si valutën e vetme për kryerjen e pagesave me para të gatshme.

Ministri i Shëndetësisë, Arben Vitia, ka vizituar shkollën e mesme të ulët, “Hyzriu e Samiu”, në fshatin Letanc të Podujevës. Aty, filloi vaksinimi kundër papilloma virusit human (HPV) që parandalon kancerin në qafën e mitrës, raporton EO.

“Po fillojmë vaksinim e vajzave të klasave të gjashta me vaksinën HPV e cila parandalon kancerin e qafës së mitrës. Kosova edhe në shekullin e kaluara ka vuajtur nga sëmundjet ngjitëse dhe ka pas vdekje të panumërta të qytetareve tanë gjatë shekullit të kaluar si pasojë e këtyre sëmundjeve.”, tha Vitia.

“Unë morra vesh që dje ka filluar në Komunën e Podujevës dje përmbi 80 për qind e vajzave e klasave të gjashta në vendin ku është bërë vaksinimi e kanë marr këtë vaksinë që është jashtëzakonisht lajmë i mirë dhe përfund apeloj të gjithë prindërit pa përjashtim t’i stimulojnë vajzat ta marrin këtë vaksinë”, tha Vitia, duke shtuar se kjo vaksinë nuk ka efekte anësore.

“Aspak efekte anësore nuk ka, e cila që nuk trajton po parandalon një sëmundje shumë të rrezikshme siç është kanceri i qafës së mitrës. Ministria e Shëndetësisë ka investuar dikun 5 milionë euro më shumë për këtë vit, jo vetëm për këtë vaksinë por edhe për dy vaksina të tjera dhe do të vazhdojë të investoj edhe më shumë në parandalim, natyrisht siç kemi investuar dhe po investojmë në Kliniken e Onkologjisë”, tha tutje Vitia.