Tag: Ballina

Përgatiti: Haris Ademi

Asgjë çka u fol brenda sallës në Komisionin për Mbikëqyrje të Agjencisë Kosovare të Inteligjencës, nuk u bë e ditur jashtë saj. Krejt çka u tha për takimin e së mërkurës me kryespiunin Petrit Ajeti, është vetëm se u diskutua për raportimet mbi tentim-atentatin ndaj kryeministrit Albin Kurti, sa ky ishte në Maqedoni të Veriut, më 10 shkurt.

Pavarësisht se ishte temë e ditës, kryesuesi Sali Zyba nga Vetëvendosja, interesimin e gazetarëve për këtë temë e quajti të vonë.

“Është temë e konsumuar, nuk mund të jap detaje…”, tha Zyba.

Edhe pse tashmë kanë kaluar 11 ditë që nga raportimi i televizionit publik për këtë situatë, Prokuroria Speciale nuk ka kthyer përgjigje për ATV-në nëse ka hapur rast për hetim.

Ehat Miftaraj nga Instituti i Kosovës për Drejtësi, thotë se organet e drejtësisë do të duhej të ishin transparente lidhur me rrezikimin potencial të sigurisë së Kurtit.

“Publiku ka interes për sigurinë e kryeministrit, presidentit, nuk mund të mbahen konfidenciale. Duhet të tregohet nëse vërtet ka pasur atentat, apo ka qenë lajm i rremë”, tha Miftaraj.

Ditën kur u raportua, vetë kryeministri e la si pezull mundësinë e atentatit ndaj tij.

Ndërkaq, këtë e mohoi vetë shteti maqedonas-verior, duke thënë se masat e sigurisë për vizitën e Kurtit kanë qenë sipas rregullave të paracaktuara dhe vlerësimeve të sigurisë.

Përgatiti: Driton Sadiku

Gati një muaj ka kaluar prej se Komisioni Qendror i Zgjedhjeve ka pranuar peticionet për shkarkimin e kryetarëve në katër komunat veriore.

Megjithatë, ende nuk dihet nëse është bërë verifikimi i të gjitha nënshkrimeve.

Madje, KQZ-ja nuk tregoi se edhe sa mund të vonohet ky proces. Detaje, me arsyetimin se kjo i takon KQZ-së, nuk dha as ministri i Administrimit të Pushtetit Lokal, Elbert Krasniqi, ndonëse mohoi të ketë zvarritje në proces.

“Besoj që kjo është njëfarë kalkulimi matematikor dhe është aty dhe besoj që ata shumë shpejt do të hapin procesin për nivelin tjetër, por nuk po zvarritet”, tha Krasniqi.

Sipas udhëzimit administrativ, peticioni i hap rrugë votimit për shkarkimin e kryetarëve në të cilin nevojiten 50 për qind plus një e votuesve të regjistruar.
E në rast se nisma për shkarkimin e kryetarëve ka sukses, presidentja duhet që jo më larg se 45 ditë nga shkarkimi i kryetarëve, t’i shpallë zgjedhjet e reja.

Përgatiti: Nora Luta

Pak minuta pas orës dhjetë, kryetari i Kuvendit, Glauk Konjufca, arrin në sallën e gjykimit, në Gjykatën Themelore të Prishtinës. Konjufca po ballafaqohet me akuzat e Prokurorisë për hedhje të gazit lotsjellës, në mbledhjen e Kryesisë së Kuvendit, të mbajtur në gusht të vitit 2016.

Por, kryeparlamentari nuk e ka shfrytëzuar të drejtën e mbrojtjes për t’u përgjigjur para gjykatës, duke vendosur të mbrohet në heshtje.

Paraprakisht, gjatë kësaj seance dëshminë lidhur me ngjarjet e asaj date e dha deputeti Pal Lekaj. Megjithatë, as Lekajt nuk i kujtohet se kush hodhi gaz, e madje as të jetë ndërprerë ndonjë mbledhje e kryesisë.

Gjatës seancës, gjithashtu, janë administruar provat, përfshirë edhe provë procesverbali i mbledhjes së Kryesisë së Kuvendit, që u propozua nga Prokuroria.

Në fund të javës, është planifikuar fjala përfundimtare, në këtë rast vepra penale e të cilit, sipas Prokurorisë, është kryer në vitin 2016.

Konjufca akuzohet se sa ishte deputet hodhi gaz lotsjellës në mbledhjen e kryesisë së Kuvendit, në kundërshtim të ratifikimit të marrëveshjes për demarkacion me Malin e Zi.

Përgatiti: Fatlum Jashari

Për të diskutuar çështjen e dinarit serb në Kosovë, Bashkimi Evropian ka kërkuar mbajtjen e një takimi në Bruksel javën e ardhshme.

Teksa tregoi se Përfaqësuesi i Posaçëm i BE-së për Dialogun, Miroslav Lajcak, e ka caktuar takimin dhe temën në agjendë pa dakordim paraprak me të dyja palët, zëvendëskryeministri Besnik Bislimi tha se nuk do të shkojë në Bruksel.

“Ka një kërkesë nga Brukseli që të mbahet një takim javën e ardhshme për çështjen e rregullimit të transferit të monedhave nga Serbia për në Kosovë, por ky nuk është takim ku duhet të shkojë kryenegociatori për arsye se çështja e dinarit nuk është pjesë e dialogut. Unë shkoj atëherë kur bisedohet për marrëveshjen. Do të shohim se kush do të shkojë”, tha Bislimi.

Paraprakisht, në Çagllavicë, në një diskutim për zhvillimin ekonomik për serbët në Kosovë, zëvendëskryeministri Bislimi njoftoi se pas BQK-së, Qeveria do të ndërmarrë masa tranzitore për ndikimin e rregullores te komuniteti serb.

“Në ditët në vijim, Qeveria do të dalë me 10 masa, me të cilat do të tregojmë se si do të kujdesemi që qytetarët të mos dëmtohen në këtë fazë kalimtare, por fazë që më pas do të garantonte zbatimin plotësisht të formalizimit të sistemit të pagesave”, tha Bislimi.

Më 1 Shkurt, hyri në fuqi rregullorja e re e BQK-së, e cila njeh euro si valutë të vetme për pagesa. Më 7 Shkurt, një automjet nga Serbia, që transportonte miliona dinarë, nuk u lejua të hynte në Kosovë.

Më 12 Shkurt, Banka Qendrore prezantoi periudhën tremujore kalimtare dhe masat lehtësuese, të cilat SHBA-ja i vlerësoi të pamjaftueshme duke kërkuar shtyrjen e zbatimit të vendimit dhe një zgjidhje të përkohshme.

Në këtë fazë nuk ka qartësi se si do të vijohet me pagesat me dinarë, të cilat pjesëtarë të komunitetit serb i përfitojnë nga skemat pensionale dhe sociale të Serbisë.

Presidentja e Kosovës, Vjosa Osmani, priti sot në takim shefin e Zyrës së BE-së në Kosovë, Tomas Szunyog, ambasadorin e Francës në Kosovë, Olivier Guérot, ambasadorin e Italisë, Antonello De Riu dhe zv.ambasadorin e Gjermanisë, Mathias Conrad me të cilët u diskutuan zhvillimet aktuale në fushën e politikës dhe atë të sigurisë.

Në njoftim thuhet se gjatë takimit u diskutua lidhur me përgatitjet që po bëhen për mbajtjen e zgjedhjeve në katër komunat në veri të vendit, në përputhje me legjislacionin në fuqi.

“Presidentja ritheksoi se e drejta për të kërkuar largimin e kryetarëve nëpërmjet nënshkrimeve është e drejtë që u takon qytetarëve dhe se tani pret që në KQZ të kryhen të gjitha procedurat e nevojshme në përputhje me ligjin dhe udhëzimin administrativ në fuqi”, thuhet në komunikatë.

Në takim me ambasadorët, Presidentja Osmani ka theksuar nevojën imediate të heqjes së masave të BE-së ndaj Kosovës, të cilat janë të padrejta dhe krijojnë mungesë ekuilibri në dialog, si dhe njëkohësisht theksoi se Kosova ka ndërmarr hapa konkret në përputhje me planin e dakorduar për këtë çështje. Heqja e masave, theksoi ajo, do të krijonte atmosferë shumë më pozitive për vazhdimin e dialogut parimor ku të dyja palët do të trajtoheshin të barabarta.

Më tej në njoftim thuhet se gjatë takimit ajo ritheksoi se për fat të keq Serbia nuk po përballet me përgjegjësi për nxitjen e sulmit ndaj ushtarëve të KFOR-it në maj e as për sulmin e agresionit kundër Kosovës në shtator të vitit të kaluar.

“Kjo situatë, sipas saj, mund ta nxisë Serbinë që t`i shtojë veprimet destabilizuese në rajon”, thuhet në njoftim.

Në fund thuhet se një pjesë e takimit iu kushtua edhe çështjes së zbatimit të Rregullores së BQK-së, me ç’rast Presidentja ritheksoi se është me rëndësi që nuk po kërkohet që kjo rregullore të shfuqizohet, por thjesht që të punohet në një plan tranzicioni për zbatim të saj e cila merr parasysh edhe shqetësimet e të gjithë qytetarëve që mund të afektohen nga një vendim i tillë.

“Duke ritheksuar rëndësinë e zbatimit të Kushtetutës në çdo cep të Kosovës, Presidentja ka shtuar se suksesi në këtë drejtim është i lidhur edhe me nivelin e bashkëpunimit me aleatët tanë të cilët kanë qenë gjithnjë mbështetësit më të fuqishëm të pavarësisë, sovranitetit dhe sigurisë së shtetit tonë”.

Zëvendëskryeministri i Kosovës, Besnik Bislimi, tha se Qeveria e Kosovës shpejt do të prezantojë dhjetë masa lidhur me mënyrat se si qytetarët të mos dëmtohen gjatë “fazës kalimtare” të zbatimit të vendimit, që ndalon përdorimin e dinarit serb për kryerjen e pagesave.

Që nga 1 shkurti, në Kosovë ka hyrë në fuqi rregullorja e Bankës Qendrore të Kosovës që parasheh euron si valutën e vetme në Kosovë për kryerjen e pagesave me para të gatshme.

Gjatë një tryeze me temën “Zhvillimi ekonomik për serbët në Kosovë”, Bislimi tha se janë të vetëdijshëm për vështirësitë që mund të krijojë rregullorja e BQK-së te serbët në Kosovë.

“Ne jemi të vetëdijshëm që në afat të shkurtër zbatimi i kësaj mase mund të krijojë vështirësi për një pjesë të qytetarëve të cilët kanë marrë dhe vazhdojnë të marrin mbështetje financiare nga Republika e Serbisë. Banka Qendrore [e Kosovës] ka nxjerrë një varg aktivitetesh dhe masash përmes së cilave synon ta zbusë këtë ndikim”, tha Bislimi.

“Por, në ditët në vijim edhe Qeveria e Kosovës do të dalë me një listë prej dhjetë masash përmes së cilave ne do të tregojmë se si do të kujdesemi që qytetarët të mos dëmtohen në këtë fazë kalimtare, por fazë e cila do të garantonte pastaj zbatimin në plotëni të sistemit të pagesave”, tha ai.

Shteti serb ndan miliona euro për serbët në Kosovë pasi ua paguan atyre – përmes një sistemi paralel – rrogat, pensionet dhe ndihmën shtesë.

Në vende të caktuara në Graçanicë, qytetarët serbë më 20 shkurt nuk kanë mundur të marrin ndihmën sociale dhe shtesat për fëmijë në postë, që punon sipas sistemit serb, sepse punonjësit u kanë thënë se nuk kanë para për t’i paguar këto shtesa.

Po ashtu, më 21 shkurt një grup i mësimdhënësve në Mitrovicë të Veriut protestuan para Kursimores së Postës së Serbisë, pasi nuk morën pagat.

Beogradi e ka kritikuar ashpër rregulloren e BQK-së, duke e interpretuar si synim të Qeverisë së Kosovës për dëbim të serbëve.

Rregullorja e BQK-së është kritikuar edhe nga faktori ndërkombëtar që ka thënë se vendimi është marrë pa konsultime paraprake dhe pa marrë për bazë ndikimin te komuniteti serb.

Shtetet e Bashkuara kanë kërkuar që Kosova të shtyjë zbatimin e vendimit, duke argumentuar se mospërmbushja e kësaj kërkese veçse ka ndikuar te cilësia e raporteve mes Uashingtonit dhe Prishtinës.

BQK-ja ka thënë se vendimi do të zbatohet përmes një faze tranzitore jo më të gjatë se tre muaj./REL

Kryetari i Kuvendit të Kosovës, Glauk Konjufca ka komentuar raportet e Kosovës me Shtetet e Bashkuara të Amerikës. Ai tha se raporti i dy palëve është i qetë dhe nuk është për t’u shqetësuar.

Konjufca tha se i mirëkuptojnë kritikat që SHBA-ja i jep Kosovës, sepse sipas tij janë kritika të qëlluara.

“Ai theksoi se SHBA-ja Kosovën e sheh nga një nivel më i lartë Evropian, ndërsa vendi ynë situatën e njëjtë e sheh në një perspektivë tjetër dhe për këtë arsye vërejtjet e tyre janë më ndryshe”, tha ai pas një gjykimi në Gjykatën Themelore.

Ambasadori i Gjermanisë në Kosovë, Jorn Rohde, ai i Francës, Olivier Guerot si dhe ambasadori italian, Antonello De Riu i kanë shkuar në takim kryeministrit, Albin Kurti.

Ndryshe, pas vendimit të BQK-së për të ndaluar përdorimin e dinarit presioni nga ndërkombëtarët është shtuar.

Po ashtu vlen të theksohet se ambasadorët kanë mbajtur një takim me Kurtin edhe javë më parë.

Ndërkohë, Shtetet e Bashkuara të Amerikës, Gjermania dhe Bashkimi Evropian, tashmë kanë dalë me qëndrimet e tyre mbi këtë çështje.

Kryeministri i Kosovës, ka thënë se ky është vendim i BQK-së dhe se politika nuk mund të ndërhyjë në vendimet e institucioneve të pavarura.

Regjistrimi i popullsisë dhe zgjidhja e problemit për qentë endacak janë ndër dy çështje që do të diskutohet sot në takimin e mbajtur ndërmjet kryeministrit të Kosovës, Albin Kurti, ministrit të Administrimit të Pushtetit Lokal, Elbert Krasniqi dhe disa kryetarëve të komunave.

Kryeministri Kurti tha se në këtë takim do të diskutojnë për dy çështje të rëndësishme dhe urgjente sipas tij, për çka përmendi regjistrimin e popullsisë i cili do të nis në fillim të muajit prill.

Për këtë, Kurti tha se politikbërja e bazuar në të dhëna është e rëndësishme si për nivelin qendror ashtu edhe për atë lokal, për çka iu bëri thirrje komunave për bashkëpunim sa më të mirë me Agjencinë e Statistikave të Kosovës për realizimin e procesit të regjistrimit të popullsisë.

“Regjistrimi i popullsisë do të fillojë në fillim të muajit prill, pra një muaj e gjysmë nga sot. Ky regjistrim do të rezultojë me të dhëna të shumta që do të mundësojnë vendimmarrësve dhe shfrytëzuesve tjerë duke filluar nga qeveria, shoqëria civile, bizneset, donatorët e investitorët të zhvillojnë strategji, programe e produkte dhe ofrojnë shërbime që i plotësojnë nevojat e qytetarëve. Politikbërja e bazuar në të dhëna është e rëndësishme si për nivelin qendror ashtu edhe për atë lokal të qeverisjes, sepse mundëson planifikim të mirë, shpërndarje të drejtë dhe të barabartë të burimeve për arsim, shëndetësi dhe punësim…Në mënyrë që regjistrimi të realizojë në tërësi objektivat për gjenerimin e të dhënave të plota dhe të sakta nevojitet një bashkëpunim dhe bashkëveprim i ngushtë ndërmjet Agjencisë së Statistikave të Kosovës dhe komunave të Republikës. Andaj shfrytëzoj rastin që edhe në këtë takim të bëjë thirrje për përkushtim dhe angazhim të përbashkët të të gjithëve në përfundimin me sukses të këtij procesi me rëndësi qenësore për zhvillimin socio-ekonomik të vendit tonë”, tha Kurti.

Përveç kësaj, si çështje urgjente për të diskutuar, Kurti vlerësoi problemin e vazhdueshëm me qentë endacak, derisa potencoi se kjo situatë është shqetësuese për të gjitha komunat.

Kurti tha se strategjia për zgjidhjen e këtij shqetësimi përfshinë disa hapa ndër institucional, siç është ndërtimi i strehimoreve dhe zhvillimin e shërbimeve lokale të menaxhimit të qenëve.

Ai tha se është propozuar që të ndërtohen katër strehimore për qentë endacak, në komunën e Prishtinës, Prizrenit, Pejës, Gjilanit dhe Kamenicës.

Lidhur me këtë, Kurti iu bëri thirrje kryetarëve të komunave për bashkëpunim me grupin punues për arritjen e objektivave të synuara nga të cilët përfitues janë të gjithë sipas tij.

“Është çështja e qenëve të braktisur dhe endacak. Ky është një shqetësim që e ka çdo komunë dhe për të cilën qeveria e ka krijuar grupin koordinues të udhëhequr Ministria e Administrimi të Pushtetit Lokal. Strategjia e dalë nga ai grup parasheh disa hapa ndër institucional ndër to, ndërtimin e strehimoreve dhe zhvillimin e shërbimeve lokale të menaxhimit të qenëve. Për momentin Grupi punues propozon ndërtimin e katër strehimoreve në katër komuna. Në Prishtinë, në Prizren, në Pejë dhe Gjilan e Kamenicë…Iu bëjë thirrje që të bashkëpunoni sa më ngushtë më këtë Grup koordinues në arritjen e objektivave të synuara nga të cilët përfitues janë të gjithë”, potencoi Kurti.

Ndërkaq, ministri i Administrimit të Pushtetit Lokal, Elbert Krasniqi tha se me një bashkëpunim më efikas dhe projekte konkrete me shumën e buxhetit të ndarë, mund të ndikojmë drejtpërdrejt sipas tij në përmirësimin e jetës së qytetarëve.

Krasniqi u bëri thirrje komunave që të raportojnë në sistemin për përformancën e vitit 2023, ngase është obligim ligjor dhe se në të kundërtën do të ndërmerren masa ndëshkuese ndaj komunave që nuk raportojnë.

Po ashtu, Krasniqi u bëri thirrje komunave për aplikim në programin për financimin e projekteve infrastrukturore që është i hapur deri me datën 28 shkurt.

“Me datë 9 shkurt mbajtëm ceremoninë e grandit të përformancës komunale ku nënshkruam marrëveshje në vlerë prej 8.3 milionë euro me 11 komunat përfituese. Me 15 shkurt është hapur thirrja që komunat të raportojnë në sistemin për përformancën e vitit 2023. I ftoj komunat të raportojnë pasi që raportimi është obligim ligjor pavarësisht nëse ajo komunë kualifikohet për grantin e përformancës ose jo. Për këto dy vite paraprake janë këto komunat që nuk kanë raportuar në sistemin e përformancës komunale. Në vitin 2021 Skenderaj, ndërsa në vitin 2022 është njëra ndër komunat përfituese me mbi 1 milion euro. Në vitin 2022, Ferizaj, Shtërpca, Novobërda, Kllokoti dhe katër komunat e veriut të vendit…Jam duke diskutuar me anëtarët e komisionit përkatës që të bëhet plotësim ndryshimi i ligjit dhe të parashihen masat penalizuese për komunat të cilat nuk raportojnë në sistem. Po ashtu i bëjë thirrje komunave për aplikim në programin për financimin e projekteve infrastrukturore që është i hapur deri me datën 28 shkurt”, tha Krasniqi.

Pas fjalimit të Kurtit dhe Krasniqit, takimi me kryetarët e komunave po vazhdon i mbyllur dhe pa praninë e mediave. Të pranishëm në takim ishin edhe ministri i Financave, Punës dhë Transfereve, Hekuran Murati dhe ministrja e Arsimit, Shkencës dhe Teknologjisë, Arbërie Nagavci. Ndërkaq, pritet që të ketë deklarata për media pas diskutimeve.