Tag: Ballina

Në ditën e dytë të qëndrimit në kryeqytetin e Gjermanisë, kryeministri i Kosovës, Albin Kurti vazhdoi takimet me përfaqësues politikë dhe deputetë të Bundestagut nga radhët e Partisë Socialdemokrate (SPD), Bashkimit Demokristian (CDU), Partisë së Gjelbër dhe Partisë së Lirë Demokratike (FDP).

Takimet i filloi me Rolf Mützenich, deputetin dhe Kryetarin e Grupit Parlamentar të SPD-së, të cilin kryeministri e falënderoi për ftesën që të merr pjesë në ngjarjen e organizuar mbrëmë nga SPD në shënim të 75-vjetorit të Këshillit të Evropës.

Ndërkaq në një drekë pune takoi deputetët Michael Roth (SPD), Andreas Schwarz (SPD), Knut Abraham, (CDU), Michael Brand (CDU), Jürgen Hardt (CDU), Volkmar Klein (CDU), Volker Ulrich (CDU), Philip Krämer (Grüne), Max Lucks (Grüne), Boris Mijatovic (Grüne), Ulrich Lechte (FDP) dhe Thomas Hacker (FDP).

Tema kryesore e bashkëbisedimeve ishte aplikimi i Kosovës në Këshillin e Evropës dhe rruga drejt anëtarësimit të plotë në këtë organizatë.

Kryeministri Kurti u bëri thirrje deputetëve gjermanë dhe qeverisë gjermane që të vazhdojnë ta përkrahin Kosovën për anëtarësim në votimin final më 16 maj dhe regjistrit të kornizës ligjore, të drejtave të njeriut, sundimit të ligjit dhe demokracisë në Kosovë.

Ndryshe, shumica e deputetëve kanë mbështetur më 16 prill anëtarësimin e Kosovës në debatin në Asamblenë Parlamentare të Këshillit të Evropës lidhur me raportin për anëtarësimin e Kosovës në këtë organizatë. Serbia kundërshton anëtarësimin e Kosovës në këtë organizatë.

Serbia kishte propozuar disa ndryshime në tekstin për rekomandimin që Kosova të pranohet në këtë organizatë. Përmes tyre, kërkohej që Kosova të mos pranohet në Këshillin e Evropës derisa Këshilli i Sigurimit i Kombeve të Bashkuara të mos vendosë për statusin e Kosovës.

Serbia po ashtu kërkoi që në vazhdim të procesit, Kosovës t’i vihet si kusht themelimi i asociacionit të komunave me shumicë serbe. Delegacioni serb po ashtu ka kërkuar që nga teksti të hiqen të gjitha pikat në të cilat vlerësohet përparimi i Kosovës në respektimin e të drejtave të njeriut dhe pakicave dhe në vend të kësaj, Kosova të kritikohet për shkelje të të drejtave. Të gjitha amendamentet e Serbisë janë hedhur poshtë.

Ish-shefi i UNMIK-ut, Joachim Ruecker, tha se Kosova ka bërë arritje të mëdha që nga koha kur ai ishte shef i misionit, duke përmendur mes tjerash mbështetjen që Asambleja Parlamentare i dha vendit për anëtarësim në Këshillin e Evropës.

I pyetur se a ka ardhur koha që UNMIK-u të përfundojë mandatin në Kosovë, Ruecker tha se Këshilli i Sigurimit të Kombeve të Bashkuara nuk do të pajtohej që të shfuqizohet rezoluta.

“Ajo çfarë ka ndodhur kohët e fundit, p.sh në Asamblenë Parlamentare në KiE tregon se integrimi i Kosovës në organizatat ndërkombëtare dhe organizmat euroatlantike është duke përparuar. E di që ende duhet vendimi i Këshillit të Ministrave, megjithatë ky është simbol i asaj se si po progresojnë gjërat”, tha Ruecker në televizionin publik.

“Mendoj se 1244-shi e ka kryer misionin e vet dhe duhet të tërhiqet, por nuk besoj se do të ndodhë në muajt e ardhshëm. Megjithatë më e rëndësishmja është mënyra se si do të shkojë procesi i anëtarësimit të Kosovës në organizmat evropianë, por edhe në drejtim të anëtarësisë në Kombet e Bashkuara dhe ende ka disa pengesa”, theksoi Ruecker.

E duke folur për veriun e Kosovës, diplomati gjerman tha se është në interes të minoritetit serb që të integrohet në institucione të Kosovës dhe të marrin pjesë në zgjedhje, megjithatë, sipas tij influenca nga Beogradi po i ndalon ata.

“Sipas mendimit tim nuk është në interes as të Serbisë, sepse lejimi i minoritetit serb që të integrohet në Kosovë është edhe në interes të Beogradit, sepse, nëse nuk ndodh kjo, Serbia nuk mund të bëhet anëtare e BE-së”, theksoi tutje Ruecker.

Ruecker ndër të tjera tha se në procesin e dialogut mes Prishtinës dhe Beogradit nuk ka progres, megjithatë, sipas tij, largimi i masave të BE-së ndaj Kosovës do të ndodhë së shpejti.

“Mendoj se është çështje kohe, sepse të gjitha hapat tashmë janë marrë dhe u bë votimi për tërheqjen e kryetarëve të komunave. Tentimi u bë që të zgjidhet situata politike në katër komunat në veri dhe mendoj se qeveria juaj është në drejtim të duhur dhe besoj se këto përpjekje do të njihen nga BE-ja dhe do të vazhdojnë projektet që janë pezulluar për momentin”, tha ai.

Ish-shefi i UNMIK-ut theksoi se Kosova duhet të themelojë Asociacionin e Komunave me shumicë serbe dhe Serbia ta njohë ‘de-fakto’ Kosovën si shtet.

“Ju e përmendët marrëveshjen e Ohrit dhe hapat e ardhshëm janë të qartë, duhet të formalizohet dhe mendimi im është që duhet të vazhdohet në mënyrë substanciale realizimi i kësaj marrëveshjeje, por Kosova duhet të merret edhe me themelimin e Asociacionit të Komunave me shumicë serbe dhe të kemi njohje ‘de-facto’ nga Serbia, ndoshta ata nuk e implementojnë, këtë por kjo duhet të vihet në vijën e finishit. Është mjaft e qartë nga ana e BE-së se këto gjëra duhet të ndodhin”, tha Ruecker.

Kryeministri i Republikës së Kosovës, Albin Kurti, mori pjesë në ngjarjen e organizuar nga Partia Socialdemokrate e Gjermanisë, SPD, në hapësirat e Bundestagut gjerman, për nder të 75-vjetorit të themelimit të Këshillit të Evropës.

Në fjalën e tij, Kryeministri Kurti rikujtoi se 75 vjet më parë, në prill të vitit 1949, u krijuan dy institucione që kanë transformuar historinë evropiane: NATO dhe Këshilli i Evropës, të cilat i cilësoi si shtyllat e paqes demokratike në Evropë.

Ai përmendi përjetimet e qytetarëve tanë në luftën për çlirim dhe pavarësi, e për të cilët lidhja me këto institucione perëndimore e demokratike ishte dhe që atëherë mbështetje për t’i ikur tmerreve të kohës.

Duke nënvizuar se vendi ynë aspiron dhe punon për anëtarësimin në NATO e Bashkimin Evropian, kryeministri Kurti tha se hapi i parë për bashkimin me demokracitë evropiane është anëtarësimi në Këshillin e Evropës.

“75 vjet nga krijimi i Këshillit të Evropës, 25 vjet që kur NATO, përfshirë Gjermaninë, shkoi në luftë për të mbrojtur dhe shpëtuar qytetarët e Kosovës nga tmerret e masakrave, vrasjeve, përdhunimeve dhe dëbimeve masive. 2024 është viti i duhur që demokracia e fundit në Evropë që nuk është ende anëtare e Këshillit të Evropës t’i bashkohet asaj”, u shpreh Kryeministri Kurti.

Në vijim, ai elaboroi rreth përkushtimit të vendit tonë për vlerat e parimet demokratike, sundimin e ligjit, mbrojtjen e të drejtave të njeriut e vëmendjen ndaj nevojave të komuniteteve joshumicë.

Ai tha se në këto tri vjet qeverisje, kemi dëshmuar se zhvillimin socio-ekonomik dhe progresi demokratik shkojnë krah për krah.

Kryeministri bëri thirrje miqve tanë gjermanë që ta mbështesin vendin tonë edhe në këtë hap të fundit të anëtarësimit të plotë në Këshillin e Evropës, si vendi i 47-të anëtar.

Në fund falënderoi Bundestagun dhe SPD për mikpritjen, interesin, mbështetjen dhe rolin kyç demokratizimin e Evropës dhe për ndihmën e vazhdueshme.

Të premten e datës 26 prill nën patronatin e Presidentes së Republikës së Kosovës, Vjosa Osmani do të zhvillohet ceremonia zyrtare e dorëzimit të pajisjes moderne SPECT/CT/PET në Klinikën e Mjekësisë Bërthamore.

Sipas njoftimit, ceremonia do të mbahet në ora 12:30 në Qendrën Klinike Universitare të Kosovës.

Ditën e sotme parashikohet të mbajë mot me diell dhe vranësira, ndërsa lokalisht priten reshje të pakta shiu.

Meteo Kosova ka njoftuar se era do fryjë drejtimesh të ndryshme me shpejtësi prej 13-39 km/h.Temperaturat do të shënojnë ngritje, me minimale që do të lëvizin prej 1 deri në 3°C, ndërsa ato maksimale prej 16 deri në 19°C.

I Dërguari i Bashkimit Evropian për Dialogun Kosovë-Serbi, Miroslav Lajçak, ka treguar se në takimin e sotëm të ekipeve negociatore ka prezantuar një dokument që ai e quan të kompromisit.

“Pritëm takimin në kuadër të dialogut për ta çuar para ‘çështjen e dinarit, ku ju dha mjaftueshëm hapësirë të dyja palëve për të shpjeguar pozicionet e tyre. Takimi përfundoi duke prezantuar një dokument kompromisi në përpjekje për t’i bërë bashkë dallimet. Do ta mirëpresim takimin e radhës pasi t’i kemi pranuar komentet konstruktive”, ka shkruar Lajçak

Për këtë takim kryenegociatori kosovar, Besnik Bislimi, ka thënë se Serbia ka kërkuar që t’i mundësohet financimi i strukturave ilegale, deri në themelimin e Asociacionit të Komunave Serbe.

Hosted a Dialogue meeting on a way forward for the “Dinar issue”, which provided enough room for the Parties to explain their positions. Ended by presenting a compromise paper in an effort to bridge the differences. Will host the next meeting after receiving constructive comments pic.twitter.com/iyjE7pIicu

— Miroslav Lajčák (@MiroslavLajcak) April 25, 2024

Ish-kryeministri i Kosovës, Avdullah Hoti, në emisionin CONTEXT në ATV, tha se presidenca është shndërruar në zyrë ku noterizohen Ligjet e miratuara në Kuvend.

Sipas tij, presidentja e Kosovës ka çuar përpara Ligje të cilat shkelin Kushtetutën.

“Qysh ka mundësi që presidentja, si juriste që mban veten, e ka çu përpara Ligjin për Këshillin Prokurorial të Kosovës. Nuk i ka pa ajo shkelje kushtetuese që janë aty, ose në byronë për konfiskim të pasurisë, ose ligjin për çmimet në tavanin plotë ligje tjera. Jam i bindur se i ka parë, port është kthyer sot Zyra e Presidencës së vendit, në zyrë ku noterizohen Ligjet e miratuara në Kuvend, vetëm autorizohen, nuk kalojnë nëpër atë shoshën të presidentit përpara që të nënshkruhen, vetëm noterizohen. Prandaj po them, ka humb kuptimi i funksionimit kushtetues, të pavarur, demokratik, të institucioneve në vend”, tha Hoti.

Ai tha se Qeveria janë mbyllë në zyrat e tyre dhe miratojnë udhëzime, rregullore të ndryshme administrative, që shkelin në fundament ligjet.

“Kur e ke pa më së voni Kryeministrin duke u ballafaqu me deputetë në Kuvend, duke iu përgjigjur interesimeve të deputetëve ose duke u ulë në studion tënde përpara gazetarëve të tjerë, kur e ke parë shoqërinë civile që ulen me zyrtarë të Qeverisë ose kryeministrin ose që involvohen aktivisht në dhënien e komenteve dhe ato komente të merren parasysh në draft ligjet që shqyrtohen të cilat janë në konsultim publik, kur e ke pa? Asnjëherë nuk i sheh ma. Janë mbyllur nëpër zyrat e tyre. Miratojnë udhëzime, rregullore të ndryshme administrative, që shkelin në fundament ligjet. Edhe ne, normalisht që ne detyrohem t’i çojmë në Gjykatë Kushtetuese, t’i ngrisim me komisionet hetimore, sepse kur ngriten në parlament komisionet hetimore? Atëherë kur procedurat e tjera parlamentare nuk të funksionojnë”, tha Hoti. /atvlive,tv

Përgatiti: Nora Luta

Ish-pjesëtarët e Ushtrisë Çlirimtare të Kosovës, Sylejman Selimi e Jahir Demaku, po largohen bashkë nga Pallati i Drejtësisë, të enjten, pak minuta pasi dëgjuan verdiktin e Gjykatës Themelore të Prishtinës, rreth akuzave për krime lufte.

Pas përfundimit të shqyrtimit gjyqësor, kjo gjykatë Selimin e Demakun i liroi nga pika e vetme e aktakuzës që u kthye në rigjykim nga Supremja në 2018-n.

Ata akuzoheshin se në cilësinë e pjesëtarit të UÇK-së, gjatë vitit 1998, kishin cenuar shëndetin e një civili nga lagja Shipol e Mitrovicës, i ndaluar në Likoc.

Gjykata deri te ky vendim, të cilin theksoi se e mbështeti në standardet vendore dhe ndërkombëtare, tha se erdhi pas analizimit të deklaratave të dëshmitarit A, e cila ishte e vetmja provë në të cilën bazohej akuza ndaj Selimit e Demakut.

Sipas gjykatës, dëshmia e një dëshmitari si e vetme ka qenë e mangët në këtë rast.

Vendimin e ka cilësuar të drejtë mbrojtja e Selimit.

Nga akuzat për krime lufte Selimin e Demakun, i kishte liruar edhe gjykata e shkallës së parë në kohën e EULEX-it, por Apeli e kishte ndryshuar vendimin duke i shpallur fajtorë.

Procesi ndaj Selimit e Demakut nisi pas gjashtë vjetësh, në fillim të këtij muaji, kur lënda u bart në Departamentin Special, nga Gjykata e Mitrovicës.

Selimi kishte vuajtur tetë vjet burgim, ndërsa Demaku shtatë, pasi ishin shpallur fajtorë në rastin “Drenica 1” dhe “Drenica 2”.

Përgatiti: Fatlum Jashari

Përkundër që Kodi i Punës i Korporatës Energjetike parasheh vendimmarrje brenda 6 muajsh, bordi vendosi për shkarkimin e Nagip Krasniqit nga pozita e kryeshefit, saktësisht 365 ditë pas pezullimit nga detyra.

Pos vendimmarrjes për shkarkim ose kthim në detyrë, të cilat i parasheh ky akt i brendshëm i KEK-ut – bordi shkeli edhe afatin e funksionimit me ushtrues detyre të kryeshefit.

Kohë të çuar dëm e vlerësoi këtë periudhë gazetari Zekirja Shabani, i cili vonesën në vendimmarrje e ndërlidhi me atë që e quajti besim të Qeverisë në pafajësinë e Krasniqit.

“Vendimi i djeshëm është shumë i vonuar, sidomos në kohën kur po flasim për investime potenciale në KEK, të nevojshme për të operuar, për të mbajtur gjallë KEK-un, dhe për të mos pasur dilema se me një drejtor tjetër ish bë më mirë ose me këtë drejtor ishte bë më mirë, por kemi pasë fatin e keq me operua me një drejtor në burg e me shpresua që kthehet një ditë, por u pa që krejt koha u harxhua kot”, tha Shabani.

Pa paragjykuar epilogun e hetimeve ndaj tashmë ish-kryeshefit, Shabani foli për implikimet në aspektin menaxherial, pasi këtë vit ishin paraparë rehabilitime të thella në të dyja termocentralet, në vlerë totale rreth 200 milionë euro.

“Një drejtor që nuk varet prej kryeministrit, që nuk varet shumë prej politikës, për shkak se KEK-u ka nevojë për investime të mëdha dhe domosdo ka nevojë për profesionistë. Nuk ka nevojë për politikanë brenda KEK-ut. Prandaj, krejt kjo zvarritje më shumë ngjan me një plan të politikës për të mos bërë asgjë në KEK, sesa me një vizion për të zhvilluar KEK-un”, tha Shabani.

Pasi tha se partia në pushtet ka shkelur parimet e saj në rastin e Krasniqit, drejtori i organizatës Çohu, Arton Demhasaj, vlerësoi se mos-zgjedhja me kohë e kryeshefit të ri pengon planet investive.

“Ndërmarrja kryesore publike që është KEK-u, më profitabilja, me buxhetin më të madh, me mbetë një vit me ushtrues detyre, dhe, potencialisht kjo mund të zgjasë edhe tre apo katër muaj derisa të kryhen procedurat e drejtorit të ri, d.m.th. kjo tregon se çfarë serioziteti ka pasur qeverisja e tanishme sa i përket KEK-ut”, tha Demhasaj.

Më 19 Prill 2023, Nagip Krasniqi ishte arrestuar nën dyshimet për keqpërdorim të detyrës, ushtrim ndikimi dhe konflikt interesi.

Ai ishte suspenduar gjashtë ditë më vonë, 25 Prill të vitit të kaluar – ndërsa, sipas njoftimit, konkursi për kryeshefin e ri pritet të shpallet ditët në vijim.

Prokuroria nuk ka ngritur aktakuzë ndaj Krasniqit, ndërsa ai aktualisht është i lirë dhe ndaj tij nuk ka ndonjë masë kufizuese.