Tag: Ballina

Forca e NATO-s në Kosovë (KFOR) shënoi një çerek shekulli angazhimi dhe përkushtimi ndaj sigurisë së qëndrueshme në Kosovë dhe stabilitetit rajonal, në një ceremoni në Kampin “Film City” (Selia e KFOR-it në Prishtinë), sot më 12 qershor 2024.

Ngjarja u drejtua nga Komandanti i KFOR-it, Gjeneralmajor Özkan Ulutaş, morën pjesë presidentja Vjosa Osmani, drejtuesit e Misionit të Sundimit të Ligjit të Bashkimit Evropian (EULEX), Misionit të Kombeve të Bashkuara në Kosovë (UNMIK), Organizatës për Siguri dhe Bashkëpunim në Evropë (OSBE), si dhe Përfaqësuesi Special i Bashkimit Evropian, së bashku me Ambasadorët e vendeve kontribuuese të trupave të KFOR-it dhe liderët fetarë.

“Është një privilegj të qëndroj këtu me ju të gjithë, si Komandant i misionit më të gjatë në historinë e Aleancës sonë, dhe aktualisht më të madhit. KFOR-i përfaqëson përkushtimin e prekshëm, të gjatë dhe të palëkundur të NATO-s ndaj sigurisë në Kosovë dhe stabilitetit rajonal, falë përkushtimit të përditshëm dhe profesionalizmit të ushtarëve dhe personelit civil,” tha Gjeneralmajor Ulutaş.

“Le të nderojmë shërbimin dhe sakrificën e tyre dhe të bëjmë homazhe për ata që humbën jetën duke shërbyer në këtë mision. Pa përkushtimin e qindra mijëra burrave dhe grave që kanë shërbyer nën KFOR gjatë 25 viteve të fundit, NATO nuk do të kishte mundur të luante një rol kaq të rëndësishëm në Kosovë dhe Ballkanin Perëndimor,” shtoi ai.

“Roli i KFOR-it mbetet thelbësor. Është nder të vazhdoj këtë udhëtim me ju, dhe nuk do të kursej asnjë përpjekje, së bashku me mijëra gra dhe burra në uniformë, nga Aleatët dhe partnerët e NATO-s, të cilët jam krenar t’i drejtoj” theksoi Komandanti i KFOR-it.

KFOR-i vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të siguruar një mjedis të sigurt dhe të qetë për të gjithë njerëzit që jetojnë në Kosovë dhe lirinë e lëvizjes, në çdo kohë dhe në mënyrë të paanshme. KFOR-i është reaguesi i tretë i sigurisë, pas Policisë së Kosovës dhe EULEX-it, respektivisht, me të cilët punojmë në koordinim të ngushtë.

Sot për nder të 25 vjetorit të çlirimit të Kosovës, në sheshet e Prishtinës kanë parakaluar njësitet e Forcës së Sigurisë së Kosovës dhe policisë.

Ish-sekretari i NATO-s, Lord George Roberson, tha se mosveprimi i forcave ndërkombëtare do të lejonte vazhdimin e spastrimit të shqiptarëve nga ana e Millosheviqit.

“Pas 78 ditë të bomardimeve, ne e pamë objektivitin tonë të plotësuar. Ushtria e Millosheviqit u largua, NATO hyri dhe refugjatët u kthyen në shtëpi. Jam krenar për atë se çka bëmë atëherë, dhe krenar që jam sot këtu, në Kosovën multietnike dhe paqësore në zemër të Evropës”, tha ai.

Më 12 qershor 1999-të, trupat e NATO-s hyjnë në Kosovë duke çliruar përfundimisht vendin nga okupatori serb.

Ambasadori amerikan në Kosovë, Jeffrey Hovenier, u ka dërguar mesazh shqiptarëve, me rastin e 25-vjetorit të çlirimit të Kosovës.

Përmes një video-adresimi, Hovenier ka thënë se ndjehet krenar me arritjet e shtetit të Kosovës, duke shtuar se këto të arritura janë të jashtëzakonshme.

“25 vjet më parë, forcat e NATO-s mbërritën në Kosovë. Lidershipi i SHBA-së luajti rol jetik për të mundësuar këtë, meqenëse ne, së bashku me aleatët tanë, i dhamë fund njëherë e përgjithmonë fushatës së tmerrshme të spastrimit etnik që regjimi i Millosheviqit e kreu këtu në Kosovë.

Tani, 25 vjet më vonë, jemi krenar për gjithçka që keni arritur. Ju e keni ndërtuar shtetin tuaj sovran, demokratik dhe shumetnik nga themeli. Ajo që keni arritur është e jashtëzakonshme.Shtetet e Bashkuara janë krenare që janë partneri juaj ndërsa shënoni këtë moment historik të rëndësishëm . Dëshiroj të theksoj se përkushtimi i Shteteve të Bashkuara të Amerikës ndaj popullit të Kosovës është po aq i fortë dhe i qëndrueshëm si gjithmonë” tha mes të tjerash Hovenier.

Ambasadori amerikan tha se SHBA-ja qëndron me krenari dhe plotësisht përkrah popullit të Kosovës.

“Kemi qenë me ju që në fillim. Jemi me ju tani. Dhe mirëpresim të qëndrojmë përkrah jush në vitet që vijnë” shtoi Hovenier.

Presidenti i Shqipërisë, Bajram Begaj, ka thënë se shteti i tij do të loboj edhe më shumë për t’i siguruar Kosovës njohje të reja, ndërsa ka paralajmëruar se Serbia dhe aleatët e saj kanë mobilizuar kapacitetet diplomatike e mediale për ta njollosur luftën e drejtë të shqiptarëve, raporton EO.

Në seancën solemne të Kuvendit për nder të 25-vjetorit të çlirimit të vendit, Begaj ka kërkuar që shqiptarët të jenë të bashkuar.

“Në një kohë kur Serbia dhe aleatët kanë mobilizuar kapacitetet diplomatike e mediale për të njollosur luftën e drejtë të shqiptarëve, kemi nevojë më shumë se kurrë të jemi bashkë, për një manifest krenarie kombëtare”, ka thënë Begaj.

Presidenti i Shqipërisë kujtoi ish-presidentin Ibrahim Rugova, ish-veprimtarin Adem Demaçi e ish-komandantin Adem Jashari si figurat e shquara për Pavarësinë e Kosovës.

“Sot nderojmë Ibrahim Rugovën, arkitektin e Pavarësisë së Kosovës. Sot nderojmë Adem Demaqin, sot përulemi përpara Jasharëve, familjes simbol për Kosovën e pavarur. Nderojmë kryetrimin Adem Jasharin, burra të tillë rëndë që lind historie. Sot është dita që kujtojmë të gjithë ushtarët e UÇK. Shqipëria hapi zemrën dhe dyert. Ndërhyrja e NATO-s ndaloi spastrimin etnik. Ata ishin hartuesit dhe zbatuesit të projektit të shtetformimit të Kosovës”, ka thënë tutje Begaj.

“Ne kemi nevoje që të jemi bashkë, nuk mund të lejojmë që krimi të shfaqet si virtyte. Historia na njeh shqiptarët si paqedashës, ne sot kemi përgjegjësinë për të forcuar paqen. Aspiratat tona për integrim janë më të forta se kurrë dhe do të vazhdojmë pa u lodhur për të realizuar këtë objektiv. Kauza e Kosovës nuk ka përfunduar. Shqipëria ka punuar dhe do të punojë për të zgjeruar numrin e vendeve për njohjen e shtetit të Kosovës dhe anëtarësimin në organizata të ndryshme dhe për të zbuluar të vërteten ende të panjohura për gjenocidin në Kosovë. Çdo betejë e juaja është beteja jonë”, ka thënë ai.

Kryeministri Albin Kurti ka thënë se Kosova dëshiron marrëdhënie të mira fqinjësore evropiane me njohje reciproke. Kreu qeveritar, në seancën solemne të Kuvendit të Kosovës për nder 25 vjetorit të çlirimit nga forcat pushtuese serbe, theksoi nevojën e bashkëpunimit të shumanshëm rajonal, pa sulme, agresione dhe diskriminime.

Ai para të pranishmëve tha se Kosova kurrë më e lirë dhe pavarur s’ka qenë. Sipas tij, vendi kurrë më i vendosur s’ka qenë për të mbrojtur lirinë dhe pavarësinë me çdo kusht.

“Duam marrëdhënie të mira fqinjësore evropiane me njohje reciproke dhe bashkëpunim të shumë anshëm në të gjithë rajonin tonë. Pa sulme dhe agresione, pa diskriminime dhe shfrytëzime….Kurrë më të lirë dhe të pavarur nuk kemi qenë. Kurrë më të vendosur sesa sot nuk kemi qenë për të mbrojtur lirinë dhe pavarësinë tonë me çdo kusht. Me gjithçka dhe çdo njëri”, tha Kurti.

Ai tha se Kosova dhe populli i saj, bashkë me Shqipërinë kanë forcuar lidhjet me vendet e perëndimit, kurse sikurse para 25 vjetësh ashtu edhe sot Serbia qëndron e rreshtuar prapa Rusisë, ashtu siç Rusia qëndron prapa shumë veprimeve të Serbisë.

“Nga kjo histori duhet nxjerr mësime sikurse kemi bërë nga atëherë deri më sot. Kjo kuptohet më mirë nga rreshtimi gjeopolitik dhe gjeostrategjik i vendeve tona sot. Sikurse atëherë edhe tani Serbia e rreshtuar prapa Rusisë, ashtu siç Rusia qëndron prapa shumë veprimeve të Serbisë. Kosova dhe populli i saj, bashkë me Shqipërinë në vazhdimësi ka shkuar duke forcuar lidhjet dhe aleancën e saj me Shtetet e Bashkuara të Amerikës, Britaninë e Madhe, Gjermaninë dhe Turqinë, Francën e Italinë dhe vende të tjera perëndimore. Bashkimi Evropian është familja jonë e synuar politike, kurse NATO është destinimi ynë ushtarak. Andaj sot po e shënojmë 25 vjetorin e çlirimit të Kosovës duke qëndruar bashkë me aleatët tanë, njësojë sikurse me 12 qershor dhe sikurse në ditën e para të çlirimit”, shtoi Kurti.

Krahas kësaj, ai përmendi sakrificën e dëshmorëve dhe ushtarëve të lirisë për lirinë e Kosovës.

“Që nga fillimi i vitit 2023 dhe deri në mes të këtij viti ditë pas dite për aq sa ka zgjatur lufta e Kosovës i kemi përkujtuar në 25 vjetorët e tyre dëshmorët dhe ushtarët e lirisë dhe betejat e lavdishme të UCK-së. Kemi përkujtuar të vrarët dhe viktimat e të gjithë atyre masakrave. Kemi përkujtuar të zhdukurit me dhunë, viktimat e përdhunimit dhe torturat, pengjet dhe të burgosurit e luftës. Kemi kujtuar dhe denoncuar dëmet dhe shkatërrimit dhe krimet e luftës”, përfundoi ai.

Me intonimin e himnit shtetëror dhe kombëtar dhe një minutë heshtje për të gjithë të rënët për lirinë e Kosovës ka nisur seanca solemne e Kuvendit të Kosovës, në nder të 25 vjetorit të çlirimit nga forcat pushtuese serbe, ku pjesëmarrës janë edhe personalitete dhe figura të rëndësishme rajonale dhe ndërkombëtare. /kp

Kryetari i Kuvendit të Kosovës, Glauk Konjufca, në seancën që po mbahet në nder të 25-vjetorit të çlirimit të vendit, ka thënë se 12 qershori i vitit 1999 është dita e rikthimit të shpresës për popullin e Kosovës.

Konjufca tha se janë të panumërta viktimat shqiptare si rezultat i krimeve dhe keqtrajtimeve nga regjimet okupuese të Serbisë, duke shtuar se këto regjime kishin një synim të vetëm e që ishte shfarosja e një populli të tërë nga territori.

Ai tha se krimet e Serbisë ishin aq të llahtarshme sa që morën përmasën e gjenocidit.

“12 qershori i vitit 1999 është dita e rikthimit të shpresës për popullin e Kosovës. Pas gati një shekulli nën sundimin serb, Kosova u çlirua. Të shumta janë padrejtësitë, diskriminimet, segrenimet, keqtrajtimet, burgosjet, krimet që u ushtruan mbi popullin shqiptar nga regjimet okupuese të Serbisë. Të panumërta janë viktimat shqiptare të këtyre regjimeve që u mbështeten në programet sistematike, historike e politike të shtetit serb që e kishin vetëm një synim, e ky ishte shfarosja e një populli të tërë nga territori dhe përmes krimeve të llahtarshme. Këto krime të Serbisë e morën përmasën e gjenocidit. Për ne Serbia e njëjtë pavarësisht a u quajt dikur mbretëri jugosllave, ose pastaj jugosllavi federative asocialiste”, tha Konjufca.

I pari i Kuvendit tha se duke festuar 12 qershorin është nevojshme të reflektohet mbi të kaluarën e vështire të popullit tonë, pasi sipas tij, kështu nuk harrohet e vërteta.

Konjufca gjithashtu shtoi se Dita e Çlirimit do të festohet si dita e fitores së drejtësisë mbi padrejtësinë dhe dita e fitores së humanizmit mbi fashizmin.

“Kur e kremtojmë 12 qershorin, Ditën e Çlirimit, e kemi domosdoshmëri etike që të reflektojmë mbi historinë se ajo ka qenë për popullin tonë vërtetë e vështirë. Prandaj ta kujtojmë të shkuarën e të mos e harrojmë të vërtetën nuk do të thotë të mos e duam paqen edhe pajtimin, por për ne gjithmonë e shohim pajtimin vetëm si rezultat të drejtësisë. Ne kujtojmë dhe do të kujtojmë gjithmonë sepse duam që padrejtësia dhe pushtimi të mos përsëriten kurrë më. 12 qershorin do ta festojmë si ngadhënjim mbi të keqen, si ditë të fitores të drejtësisë mbi padrejtësinë, lirisë mbi robërinë, të çlirimit mbi shtypjen dhe të humanizmit mbi fashizmin”, tha Konjufca. /kp

Presidentja e Kosovës, Vjosa Osmani, ka thënë se 25 vjet më parë, kur ushtarët e NATO-s shkelën Kosovën, ata ishin shpëtimtar, të popullit të Kosovës, raporton EO.

Në seancën solemne të legjislativit, për nderë të 25-vjetorit të çlirimit, Osmani tha se hyrja e NATO-s ishte një fuqia e solidaritetit ndërkombëtar.

“Thirrjet e popullit tonë, persekutimi i pamëshirshëm dhe jetët e panumërta të humbura nga masakrat e tmerrshme, dëbimi me dhunë dhe spastrimi etnik ishin thirrje për drejtësi që nuk mund të shpërfilleshin më. Muret e tiranisë u shembën, duke hapur rrugën jo vetëm për një Kosovë të lirë, por edhe të pavarur e demokratike. Atë ditë afro 38 mijë ushtarë nga 36 shtete, komunikuan me gjuhën universale, me gjuhën e lirisë. Atë ditë, siç thoshte filozofi dhe shkrimtari francez Andres Glucksman “Evropa lindi në një Prishtinë të lirë”. Sot mund të themi, Evropa lindi në një Kosovë të lirë”, theksoi Osmani.

Shefja e shtetit theksoi se në këtë ditë, do ta kujtojnë përherë rezistencën këmbëngulëse të presidentit historik, Ibrahim Rugova për liri, demokraci dhe Kosovën e pavarur.

“Do ta kujtojmë heroizmin e komandantit legjendar Adem Jashari me familje, të cilët u bën gurthemeli i lirisë sonë. Do të jetojmë gjithnjë edhe me kujtimin për të gjithë dëshmorët e UÇK-së, mbi 13 mijë të vrarët gjatë luftës, në mesin e të cilëve 1133 fëmijë. Nuk do të harrojmë kurrë dhimbjen e shkaktuar nëpërmjet një prej krimeve më të llahtarshme që njeh cilado luftë, krimit të dhunimit si dhe dhimbjen që ende vazhdon për mijëra familje në Kosovë që akoma nuk kanë ku të vendosin lule sepse varret janë të zbrazëta, në kërkim të të zhdukurve me dhunë gjatë luftës”, u shpreh presidentja Osmani.

Ka filluar seanca solemne e Kuvendit të Kosovës për shënimin e 25-vjetorit të çlirimit të Kosovës.

Në këtë seancë po marrin pjesë edhe Presidenti i Shqipërisë, Bajram Begaj, Rifat Jashari, ish-presidenti i Kroacisë, Stipe Mesiq, ish-Presidentja e Zvicrës, Micheline Calmy-Rey, Kryeparlamentarja e Shqipërisë, Lindita Nikolla, ish-sekretari i NATO’s, Lordi George Robertson dhe William Walker, i cili gjatë luftës përfaqësoi misionin e OSBE’së, raporton Express.

Walker, i cili atëherë ishte shef i Misionit Verifikues të Organizatës për Siguri dhe Bashkëpunim në Evropë luajti rol kyç në dokumentimin e masakrës në Reçak të Shtimes, ku forcat serbe vranë 45 civilë shqiptarë më 15 janar të vitit 1999.

Seanca filloi me intonimin e himnit shtetëror dhe kombëtar. Pastaj u mbajtë një minutë heshtje për të gjithë të rënët që kontribuan në çlirimin e vendit.

Aleanca Kosovare e Bizneseve (AKB) ka shprehur shqetësimin se rreth 40 për qind e bizneseve, sidomos ato të voglat, nuk janë duke përdorur arkat fiskale 100 për qind, raporton Ekonomia Online.

Kryetari i AKB-së Agim Shahini, ka thënë për EO se ka pasur mungesë të kontrollit të vazhdueshëm të tregut sa i përket kësaj çështje dhe se mos përdorimi i arkës fiskale nga disa biznese bënë që të të këtë një konkurrencë jo të drejtë dhe jo fer me bizneset që përdorin arkat fiskale.

Shahini ka bërë thirrje që Administrata Tatimore e Kosovës dhe Inspektorët tatimor të jenë në vëzhgim të vazhdueshëm të kontrollit të përdorimit të arkave fiskale, në mënyrë që të ketë barazi në treg.

“Fiskalizimi në Kosovë është një proces shumë i rëndësishëm për luftën kundër informalitetit. Edhe pse ky proces është vazhdimisht në rrugëtimin e vetë ka trend i cili e ka penguar ose ka pasur mungesë të kontrollit të vazhdueshëm se fiskalizimi ose arkat fiskale në disa raste janë vetëm si dekor dhe nuk shfrytëzohen nga bizneset. Sipas një analize që ka bërë AKB-ja rreth 40 për qind të bizneseve, sidomos të bizneseve të vogla dhe ato shërbyese nuk i përdorin arkat 100 për qind. Kjo del që neve i bëjmë një konkurrencë jo të drejtët bizneseve që i përdorin arkat 100 për qind. Prandaj Administrata Tatimore e Kosovës dhe Inspektorët tatimor duhet që të jenë në vëzhgim të vazhdueshëm të kontrollit të përdorimit të arkave fiskale, qoftë për kafitërit qoftë edhe për shërbime të ndryshëm. Kjo do të ndikonte dukshëm në rritjen e buxhetit të vendit, në luftën kundër informalitetit dhe barazinë në treg. Ne kemi shumë biznese të cilat janë në kulture fiskale që i përdorin por kemi edhe të tjerë që nuk i përdorin. Prandaj ky proces duhet të jetë vazhdimisht në vëzhgim nga ATK në mënyrë që të kemi barazi në treg”, ka thënë ai.

Kryetari i AKB-së ka shtuar se nderë sektorët që nuk përdorin arkën fiskale janë gastronomia, sallonet e floktarisë, sektori i ndërtimtarisë si dhe sektori i hotelerisë.

“Ndër sektorët që ka dyshime dhe ka fakte të cilët informaliteti është në ekonomi është sektori i gastronomisë i përgjithshëm, po ashtu është ai i hotelerisë, po ashtu i shërbimeve të ndryshme, qoftë i frizerëve, po ashtu sektori i ndërtimtarisë ku është një sektor që ka dukshëm një evazione fiskal. Ne jemi partner në ATK dhe tentojmë që bashkërisht ti shkëmbejmë informatat e ndryshme për këtë fenomen negativ që nuk është vetëm në Kosovë është edhe në shumë vende të tjera por në Kosovë është edhe më i dukshëm”.

“Informaliteti është i shprehur jo vetëm në transaksione financiare është ne transaksione të ndryshme kontraktuale, në punësim, është informlaiteti në blerje, shitje me pakicë gjithmonë po flasim. Kjo e bënë Kosovën jo një vend të përshtatshëm për investitor. Numri i bizneseve që janë të regjistruara dhe numri i bizneseve të cila kanë arke fiskale është rreth 50 për qind më pak. Kjo nuk do të thotë se të gjithë operatorët ekonomik nuk kanë obligim të kenë arka fiskale, por flasin gjithmonë për shitje me pakice”, ka thënë ai.

Kosova sot shënon 25-vjetorin e Ditës së Lirisë apo Çlirimit të Kosovës, kur trupat paqeruajtëse të NATO-s hynë në Kosovë pas fushatës ajrore të Aleancës së Veri-Atlantikut kundër caqeve ushtarake e policore serbe në Kosovë dhe Serbi.

Fushata bombarduese e NATO-s, që zgjati 78 ditë, përfundoi më 10 qershor 1999, pas miratimit të Rezolutës 1244 të Këshillit të Sigurimit të Organizatës së Kombeve të Bashkuara (OKB), me kapitullimin e Serbisë dhe tërheqjen e forcave të saj nga Kosova.

Rezoluta 12 44 e OKB-së në Kosovë vendosi administratën e përkohshme të OKB-së, UNMIK, për të administruar me vendin e shkatërruar nga lufta, për një periudhë transitore deri në ngritjen e kapaciteteve vendore dhe zgjidhjen e statusit të Kosovës.

Ajo, po ashtu, siguroi bazën ligjore për vendosjen e 50.000 trupave paqëruajtëse të udhëhequra nga NATO-ja për ta siguruar paqen në Kosovë, që njëherësh ishte edhe misioni më i madh paqëruajtës i Aleancës veriatlantike.

Vendosjes së trupave paqeruajtëse i parapriu Marrëveshja Teknike e Kumanovës, që parashihte tërheqjen e të gjitha forcave serbe nga Kosova dhe hyrjen e trupave ndërkombëtare të NATO-s në Kosovë.

Tërheqja e plotë e trupave serbe përfundoi më 20 qershor 1999.

Ushtarët e parë që u futën brenda territorit të Kosovës më 1999 ishin pjesëtarë të ushtrisë norvegjeze. Ata ishin pjesë forcave paqeruajtëse nga 36 vende të botës – prej të cilëve 30.000 ishin të shteteve të NATO-s – që erdhën në Kosovë.

Me hyrjen e trupave ndërkombëtare u mundësua kthimi në shtëpitë e tyre i më shumë se 800.000 refugjatëve, persona të zhvendosur brenda dhe jashtë Kosovës, të dëbuar nga shtëpitë e tyre, që po strehoheshin në kampe në Shqipëri dhe Maqedoni të Veriut.

Ndërhyrja ushtarake e NATO-a ndodhi pas gati një dekade përpjekjesh diplomatike ndërkombëtare për t’i ndalur luftërat në ish-Jugosllavi. Në Kosovë, asaj i parapriu Konferenca e Rambujesë dhe e Parisit, ku Serbia refuzoi kompromisin që të ndalte dhunën e forcave të saj në Kosovë.

Në luftën e viteve 1998-’99 janë vrarë më shumë se 13.000 persona dhe janë zhdukur më shumë se 6.000 persona.

Qindra shqiptarë të vrarë nga Kosova janë gjetur në varreza masive në Serbi. Trupat e tyre janë bartur nga forcat serbe me qëllim që të fshehen krimet.

Udhëheqësit politikë dhe ushtarakë të Serbisë janë arrestuar, gjykuar dhe dënuar nga Gjykata Ndërkombëtare e Hagës për ish-Jugosllavi për krimet kundër njerëzimit të kryera në Kosovë.

Ndër ta ishte edhe Slobodan Millosheviqi, i cili vdiq në burg pa arritur të dënohet për përgjegjësinë në urdhërimin e krimeve të luftës në Kosovë.