Kryesuesi i Këshillit Gjyqësor të Kosovës, Albert Zogaj, në emisionin CONTEXT në ATV, duke folur për idenë e vettingut, tha se pako e reformës që tashmë është e dakortësuar tanimë në mes të Qeverisë dhe Këshillit Gjyqësor dhe Këshillit Porkurorial, po edhe e Akademisë së Drejtësisë është një pako gjithëpërfshirëse që ka adresu të gjitha çështjet që kanë qenë objekt diskutimi për shumë çështje në sistemin e drejtësisë.
“Është një pako që ka edhe vlerësimet e partnerëve ndërkombëtarë, por sigurisht ka edhe përspektivën e raportit të Venecias, vendimit të Gjykatës Kushtetuese dhe të vlerësimit që ne e kemi i bërë bashkë të gjitha institucionet. Është një pako që në momentin që miratohet, besoj se ka me e përmbyll për një kohë të gjatë çështjen e nevojës për reformë në sektorin e drejtësisë dhe sigurisht që ka me e hapë një pjesë të dytë për diskutimin e saj që është pjesa e insititucioneve dhe që besoj se kjo pako duhet të çmohet dhe vlerësohet nga të gjithë, për faktin që ka legjitimuar të gjitha institucionet dhe ka edhe zotime të institucioneve për zbatimin”, tha Zogaj.
Ai tha se kjo pako e dakortësuar dhe që pritet miratimi, është që nuk varet më as nga KGJK dhe as nga Këshilli Prokurorial, por ekskluzivisht nga Qeveria.
Zëvendësministri i Infrastrukturës, Hysen Durmishi, në emisionin CONTEXT në ATV, tha se rruga e cila do ta lidh Suharekën me Brezovicën, nuk kalon kah livadhet e familjes së tij, të cilat ndodhen në Mushtisht të Komunës e Shtërpcës.
Ai thotë se rruga është larg livadheve të familjes së tij për një kilometër e gjysmë apo dy kilometra.
“Jo, nuk kalon nëpër pronat e mija. Kjo është rrugë regjionale, nuk është rrugë lokale. Problemi është se kjo rrugë, është një prej rrugëve regjionale e cila nuk ka përfundu, nuk është ndërtuar asnjëherë me asfalt, pra është rrugë regjionale e regjistruar nga Ministria e Infrastrukturës para shumë vite, edhe para luftës ka qenë rrugë regjionale. Pra, problemi është se e ka fillu procedurën e prokurimit komuna e Suharekës dhe është gabim, që rrugët që i takojnë nivelit të Ministrisë, me i kontraktu komuna e me i financu Ministria. Ne financojmë plotë rrugë lokale me 100%, por procedurat i kryejnë komunat, njëjtë është edhe për rrugët nacionale, regjionale e autoudhët. Dhe, ata e kanë shkëputur kontratën të cilën e kanë pasur me operatorin ekonomik, e kanë pasur një kontratë vetëm për me e hapë trasenë atje. Tash, ne e kemi projektin si Ministri për përfundimin e komplet për me e lidh Suharekën me Brezovicën. Kjo rrugë nuk është rrugë e fshatit tim, pra është rrugë regjionale që e lidh Brezovicën me Suharekën. Ne e kemi filluar procedurën e prokurimit, është larg atyre livadhe që i kanë përmendur më shumë se një kilometër e gjysmë, dy kilometra, rruga është larg atyre livadheve që janë të familjes time”, tha Durmishi. /atvlive.tv
Një vit e gjysmë nga Deklarata e Përbashkët për të Zhdukurit e kryeministrit të Kosovës, Albin Kurti, dhe presidentit të Serbisë, Aleksandar Vucic, ende nuk ka nisur zbatimi i saj.
Kjo përkundër se me marrëveshjen bazë dhe shtojcën, çështja e të zhdukurve gjatë luftës cilësohej si urgjencë – dhe palët ishin zotuar për bashkëpunim të ngushtë në identifikimin e zonave potenciale të varrezave dhe për gërmime.
Që atëherë Kosova dhe Serbia nuk janë marrë vesh për Termat e Referencës së Komisionit të Përbashkët për monitorimin e punës së Grupit Punues ekzistues.
Krahas njoftimit se kjo temë u diskutua të enjten në nivel kryenegociatorësh në Bruksel, BE-ja konfirmoi për ATV-në se nuk ka marrëveshje ende.
“Zbatimi i Deklaratës së Përbashkët nuk ka filluar ende. Kjo do të ndodhë pasi palët të pajtohen për Termat e Referencës të Komisionit të Përbashkët, i cili parashihet të monitorojë zbatimit e Deklaratës së Përbashkët, në mbështetje të punës së Grupit Punues të kryesuar nga Komiteti Ndërkombëtar i Kryqit të Kuq”, thuhet në njoftimin e BE-së.
Por, pa dhënë detaje, blloku 27-anëtarësh njoftoi se janë në pritje të zhbllokimit të situatës.
“Derisa një marrëveshje është në arritje, Përfaqësuesi i Posaçëm Lajcak është në pritje të komenteve për një çështje të fundit të hapur. BE-ja përsërit se në fund të fundit kjo ka të bëjë me njerëzit – me familjet e atyre që janë ende të zhdukur – dhe kjo çështje nuk duhet të politizohet. Mungesa e angazhimit vetëm sa e vonon edhe më shumë përparimin shumë të nevojshëm në këtë çështje të rëndësishme”, thuhet më tej në njoftimin e BE-së.
Pa treguar hollësi, në kabinetin e zëvendëskryeministrit për dialog, Besnik Bislimi, thanë se Serbia po e bllokon zbatimin e deklaratës së përbashkët.
“Serbia insiston të shtohet një “side letter” krah deklaratës së përbashkët, duke zvarritur edhe më tej fillimin e zbatimit të saj. Për të ardhur keq është fakti që Serbia vijon ta keqpërdorë për qëllime politike një çështje të një urgjence humanitare siç është ajo që lidhet me personat e pagjetur”, tha Klisman Kadiu, këshilltar i zëvendëskryeministrit Besnik Bislimi.
Në mars të këtij vitit, në një intervistë për ATV-në, zëvendëskryeministri Bislimi kishte thënë se Serbia kishte kërkuar ndryshimin e një neni i cili ka për qëllim rregullimin e mos-marrëveshjeve në Grupin Punues.
Në këtë kontekst, pa dhënë sqarime ai kishte thënë se është element që e prek mënyrën e funksionimit të Grupit Punues dhe se ka pasur dakordim paraprak që të largohet pjesëmarrja e UNMIK-u.
Më shumë se 1600 persona ende mbesin në listën e të zhdukurve me dhunë gjatë luftës së fundit.
Nga janari i vitit 2025, të gjithë punëtorët e sektorit publik do t’i marrin pagat me nga 55 euro rritje.
Vlera e koeficientit mbeti e njëjtë, por Qeveria të martën njoftoi për rritjen për 0.5 të sasisë së koeficienteve për njësi.
Ndërkaq një rritje tjetër e pagave, sipas Kryeministrit Albin Kurti, do të bëhet në korrik të 2025-tës.
“Me fjalë të tjera, dikush që e ka koeficienti 5.6 në janar i bëhet 6.1 e në korrik 6.7…”, tha Kurti.
Sipas Ministrit të Financave, në këtë formë do të ketë barazi te të gjitha kategoritë.
|
Kjo rritje, sipas Kurtit, do t’i kushtojë buxhetit rreth 120 milionë euro në vit.
Gjatë qeverisë Kurti, pagat në sektorin publik u ndryshuan në vitin 2023, pas miratimit të Ligjit për Paga, ku disa u ngritën, e pati paga që edhe u ulën. Ndërsa, në vitin 2024, u aplikua
rritja e koeficientit nga 105 në 110 euro.
Kurti dhe Murati njoftuan po ashtu se buxheti për vitin 2025 do të jetë 3.6 miliardë euro, që është më i lartë se buxheti i vitit të kaluar.
Qeveria pritet të mbajë takim të mërkurën, ku pritet ta miratojë buxhetin e shtetit për vitin e ardhshëm, për të cilin Kurti tha se shpreson se ai do të gjejë mbështetje pastaj në Parlament.
Dikush është kah rrenë nga pak dhe dikush po e flet të vërtetën, ama jo të plotë. Ose po rrejnë komunat, ose po rrejnë mësuesit, ose po rrenë Hekuran Murati.
Meqë ti verifikojë mijëra mësues nuk është fort praktike, meqë me komuna dihet situata, çka vlen për një – vlen për të gjitha – sonte po merremi me Hekuran Muratin.
Javëve të fundit kemi raportuar se si disa komunave i janë bllokuar xhirollogaritë, ose nuk i kanë dalë pagat të gjithëve, për shkak të obligimeve nga kontrata kolektive dhe lëndëve që komunat i humbin në gjykata tash e sa vjet! Rasti i fundit Suhareka! Qe diçka që s’kam menduar që do e them zëshëm në mikrofon:
Deri këtu e ka mirë. Ama duke e njohur Hekuranin dhe duke e ditur që ky vend i ka dhejtëra mijëra arsimtarë, vendosëm ti hyjmë kësaj teme pak më seriozisht dhe t’ua përimtësojmë në stilin e minutave të Hoxhës.
Kontrata kolektive është marrëveshje që parashihet me liogj dhe në rastin e arsimtarëve është nënshkruar ndërmjet Qeverisë së Kosovës, në njërën anë dhe Sindikatës së Bashkuar për Arsim e Kulturë, në anën tjetër.
Kontrata koleketive ndërmjet Qeverisë dhe SBASHK-ut janë nënshkruar më 2017 dhe më 2021. Këtu ndër të tjera parashihet që:
Punëtorët (anëtarë të SBAShK-ut) në vitet jubilare të punësimit përfitojnë shpërblimin jubilar në vlerë:
2.1 për 10 vjet të përvojës së punesë në vlerë të 50% të një page bazë.
2.2 për 20 vjet të përvojës së punesë në vie ë të 75% të një page bazë.
2.3 për 30 vjet të përvojës së punesë në vlerë të një page bazë.
2.4 për 40 vjet të përvojës së punesë në vlerë të 150 % të një page bazë.
2.5 Shpërblimi jubilar paguhet nga punëdhënësi, i punësuari ka plotësuar kushtet e shpërblimit sipas kritereve të nenit 8.
2.6 Shpërblimi jubilar paguhet në Festën e 7 Marsit të çdo viti.
Nëse mendoni që ndalen me kaq privilegjet e mësuesve – gabim i keni. Kontrata kolektive parasheh që çdo vit paga e arsimtarëve të përshtatet me shkallë të inflacionit, pastaj kompensim për shujta ushqimore ditëve të punës, dy Euro në ditë pune, 0,50/o të pagës bazë, për çdo vit të plotë të përvojës në punë, atyre që udhëtojnë që udhëtojnë në vendbanimet e komunës përkatëse ku punojnë u paguhen shpenzimet e rrugës 70% të biletave të trafikut urban dhe me rastin e pensionimit i paguhen edhe tri paga, bile bile specifikohet jo më larg se 30 ditë nga pensionimi.
A është kjo mënyrë politike e favorizimit të SBASHK-ut? Padyshim që po!
A i meritojnë arsimtarët këto privilegje? Pa dyshim që po!
A e kemi sistemin arsimor për faqe të zezë, arsimtarët e padijshëm dhe fëmiëjt tupa? – fatkeqësisht po!!!
Mirëpo, ky nuk është problemi i kësaj kontrate – kjo kontratë e ka një telashe themelore! Nënshkruese e saj është Qeveria, kurse arsimtarët janë punëtorë të Komunave.
Edhe një herë – MASHTI ka nënshkruar kontratë me SBASHK-un për një listë të gjatë të privilegjeve për arsimtarë, arsimtarët janë anëtarë të SBASHK-ut, ama janë punëtorë të komunave, jo të ministrisë!!!
Kështu, kur Qeveria nuk alokon mjete të posaçme për kontratën kolektive, arsimtarët nuk e padisin Qeverinë, por Komunën dhe e fitojnë lëndën edhe në shkallë të parë dhe të dytë.
Çka tash? Komunat detyrohen ti paguajnë arsimtarëve edhe pagat për 10 vjet punë edhe pagat për 20 vjet punë edhe pagat për 40 vjet punë edhe pagat për 40 vjet punë edhe tri paga për pension edhe para për shujta edhe për udhëtim!
Ku i marrin komunat paret? I marrin ose nga mallra e shërbime, ose nga investime kapitale. Pra, e lënë mangu ndonjë rrugë, ose ujësjellës, ose sallë ose park dhe i paguajnë arsimtarët.
Ku është problemi? Problemi është se ka Kryetarë te komunave të fund të vitit që i kanë harxhu 80, 90 ose 102% në rastin e Malishevës, këtë e vërtetova prapë, njeri i ka harxhu mbi 100% të investimeve kapitale. Kur i përfundon investimet kapitale i blen mallrat e shërbimet dhe i humb lëndët nga paditë e arsimtarëve – të bllokohet xhirollogaria.
Tash, do thoni ju, po sa arsimtarë në këtë vend dalin n pension brenda vitit, ose i mbushin 40 vjet punë – as nuk e di as nuk e kam ndër mend me e hulumtu. Ajo çka e di, është sa kontrata kolektive KUSHTON.
Për tri vjet i ka kushtua komunave mbi 120 MILIONË EURO. 120,000,000 Euro! Ka komuna që i sakaton si p.sh. Suharekën që ia bllokon xhirollogaritë.
Kuptohet në Prishtinë nuk e kanë këtë problem. Për dy vjet Prishtinës i janë marrë më shumë se 10 milionë nga kontrata kolektive, ama meqë Përparim Rama nuk kryen investime kapitale dhe nuk din me mshelë asnjë projekt – njërit i teprojnë paret, i paguan mësuesat dhe shenjë nuk ia lë kjo punë.
Tash, dikush mund të thotë po krejt ideja e Hekuranit qenak që me i sakatu kryetarët e komunave, t’ua ndal investimet kapitale që ata të mund të paguajnë arsimtarët.
Unë nuk po them ashtu, edhe pse kur e sheh që për investime të reja kapitale, Suharekës nga Qeveria i shkojnë më pak se 2 euro për kokë banori e Shtimes më shumë se 102 Euro për kokë banori del shihet që po favorizohen komunat e Vetëvendosjes.
Deri këtu pra, jemi kah flasim për situatë që kjo qeveri e ka trashëguar dhe nuk ka pasur gatishmëri që ta zgjidhë, duke dashur të komplikojë jetën komunave.
Mirëpo, këtë muaj Qeveria ka shkuar përtej, janë dy qëndrime palidhje të tij>
Edhe çka që ka qenë Ramë Likaj? Njeri ka qenë ministër, qysh je ti sot. Nëse po thoni kemi duhet ti zbatojmë marrëveshjet e qeverive të kaluara, pse nuk po e zbatoni një marrëveshje të Ramë Likajt?
Kush po thotë? Ti po thu a? Jo Hekuran, nuk kallëzon ti a është shkelje ligjore, konstaton gjykata!
Tash po kthehemi në fillim:
1. Nëse mendon që është shkelë ligji në kontratë kolektive, atakoje në GJykatë, shliroji komunat dhe mundësoju që dhjetëra miliona Euro çdo vit të shkojnë në projekte kapitale
2. Për më tepër nëse je i bindur që është e paligjshme kontrata kolektive, pse po lejon me shku paret e thesarit në xhirollogari të arsimtarëve, nëse arsimtarët po përfitojnë nga një kontratë joligjore? Paramenoje e ke një rast në Han të Elezit, komuna u ka borxh 240 mijë euro arsimtarëve, i paguan edhe 120 mijë euro tjera shpenzime për përmbarues, gjykata dhe avokatë! 50% haraç n përmbarues dhe shpenzime tjera. Nëse është e paligjshme Hekuran, atakoje n Gjykatë!
3. Por, nëse je kah rren dhe kontrata është e ligjshme, atëherë pafytyrësi është të thuash e ka nënshkruar Ramë Likaj, edhe pse pajtohem unë me ty që Rama ia ka huqë i shkreti, po çka me ba Ministër ai – Ministër ti!
Kryeministri Albin Kurti ka thënë se më herët pagat rriteshin vetëm një herë brenda mandatit, dhe atë vetëm në fushatë.
Në një postim në Facebook, ai ka deklaruar se Qeverinë Kurti rritja e pagave po bëhet në secilin vit që nga hyrja në fuqi e ligjit të pagave
“Nga janari i vitit të ardhshëm zyrtarët publikë do të kenë paga më të larta. Më herët pagat rriteshin vetëm një herë brenda mandatit, dhe atë vetëm në fushatë. Me qeverisjen tonë të mirë e demokratike po rriten në secilin vit që nga hyrja në fuqi e ligjit të pagave, ashtu siç e parasheh edhe ligji. Vitin e ardhshëm pagat për punonjësit e sektorit publik do të rriten për 110 euro”.
“Rritja do të bëhet në dy faza. Faza e parë fillon në janar të vitit të ardhshëm dhe parasheh një rritje prej 55 euro, kurse faza e dytë hyn në fuqi nga korriku i vitit 2025, për të plotësuar totalin prej 110 euro rritje, apo një njësi më lartë të koeficientit të pagës bazë”, ka thënë Kurti.
Më tej, Kurti ka shtuar se rritja buxhetore është shpërndarë mbi-proporcionalisht tek ata që kanë pagat më të ulëta, “duke zvogëluar kësisoj edhe më tej hendekun në mes të pagës më të lartë dhe asaj më të ulët”.
” Pra, për mësuesin, policin, ushtarin, infermierin, zjarrfikësin, rritja në përqindje do të jetë rreth 18-20%, kurse për pozitat më të larta rritja në përqindje do të jetë 6-7%. Kostoja e plotë vjetore e kësaj rritjeje do të jetë rreth 120 milionë euro, e që bashkë me rritjen që kemi bërë për pensionet dhe për shtesat për fëmijë, e sjell totalin në 280 milionë euro më shumë para në xhepat e qytetarëve vetëm nga këto tre masa”.
Zëvendëskryeministri i Kosovës dhe shefi i Ekipit Negociator të Kosovës, Besnik Bislimi, ka thënë se Bashkimi Evropian duhet të reagojë në mënyrë të vendosur ndaj veprimeve të Serbisë, pasi dje Qeveria serbe ka miratuar një projektligj për shpalljen e Kosovës “zonë të veçantë sociale të mbrojtur”, raporton Express.
“Cili është perceptimi i BE-së për fytyrën e vërtetë të Serbisë? Ai që në mënyrë të pabesueshme përpiqet të shfaqet si “konstruktiv” duke deklaruar përkushtimin e tij ndaj procesit apo ai që miraton projektligje të tilla dhe shkel vazhdimisht marrëveshjet dhe cenon integritetin dhe sovranitetin tonë territorial? BE-ja si ndërmjetës duhet të përgjigjet dhe të reagojë në mënyrë të vendosur”, ka shkruar Bislimi në “X”.
Numri dy i Qeverisë ka thënë se Serbisë në mënyrë të vazhdueshme e pengon procesin e dialogut, duke shkelur parimet dhe frymën e marrëveshjeve dhe sipas Bislimit, veprimet e njëpasnjëshme te Serbisë nxjerrin në pah konstruktivitetin e rrejshëm.
“Përmes lëvizjeve të vetë Serbisë në terren, duke përfshirë nxitjen e përshkallëzimeve në 3 vitet e fundit, sulmin në Banjska, sulmet kundër institucioneve tona, inkursionin në territorin tonë dhe rrëmbimin e policëve, barrikadat në veri, MIG-të që fluturojnë pranë kufirit tonë duke vendosur ushtria në gatishmëri të plotë dhe të lartë luftarake dhe tani, me projektligjin e persekutimit të paraqitur dje, konstruktiviteti i tyre i rremë vazhdon të ekspozohet”, ka shtuar tutje Bislimi.
1/7 Serbia continues the obstruction of the dialogue process, violating the principles and spirit of the agreements, lastly, through the persecution bill presented yesterday by their government.https://t.co/nq1Y7xyBUa
Këshilli i Sigurimit i Kombeve të Bashkuara (KSOKB), nesër do të diskutojë raportin e ri gjashtëmujor të Sekretarit të Përgjithshëm të OKB-së, Antonio Guterres, për punën e Misionit të OKB-së në Kosovë (UNMIK).
Seanca e Këshillit të Sigurimit të OKB-së për punën e UNMIK-ut, pritet të fillojë në ora 16:00.
Sipas raportit të Guterres i publikuar ditë më parë nga mediat serbe, atmosfera në Kosovë është ende e tensionuar dhe ekziston rreziku i përshkallëzimi i tensioneve.
“Atmosfera në veri të Kosovës është ende e tensionuar, me mundësinë e përshkallëzimit ende të pranishme. U bëj thirrje të gjitha palëve që të përsërisin angazhimin e tyre për dialogun me ndërmjetësimin e Bashkimit Evropian dhe të zbatojnë plotësisht marrëveshjet ekzistuese”, ka thënë Guterres në raportin e rregullt gjashtëmujor për gjendjen në Kosovë.
Që nga miratimi i Rezolutës 1244 të Këshillit të Sigurimit të OKB-së më 10 qershor 1999, ky organ ka diskutuar për Kosovën katër herë në vit deri në vitin 2018.
Në vitin 2019 për Kosovën janë mbajtur tri seanca të Këshillit të Sigurimit të OKB-së, ndërsa nga viti 2020 mbahen çdo vit dy seanca, në prill dhe tetor.
Seanca e fundit në të cilën është diskutuar raporti gjashtëmujor i OKB-së ishte mbajtur më 22 prill, në të cilën Kosova ishte përfaqësuar nga presidentja Vjosa Osmani.
Në seancën e OKB-së më 22 prill, presidentja e Kosovës, Vjosa Osmani, një pjesë të fjalimit të saj ua kishte dedikuar grave që janë të mbijetuara nga masakrat e kryera nga forcat jugosllave në Kosovë.
Të pranishme në këtë seancë me Osmanin kanë qenë, Elhame Muçolli, një grua që ka familjarë të zhdukur në luftë, Fahrije Hoti, si dhe dy gra të mbijetuara të dhunës seksuale gjatë luftës në Kosovë, Vasfije Krasniqi, dhe Shyhrete Tahiri.
Ajo e ka përsëritur nevojën për drejtësi për të gjitha viktimat e luftës në Kosovë.
Në anën tjetër, Vuçiç është ankuar pse ato gra kishin marrë pjesë në takim, duke thënë se ato nuk janë pjesë e stafit diplomatik, dhe pse është diskutuar për të kaluarën, sidomos për kohën e luftës, duke pretenduar se në kohën e luftës ka pasur edhe gra serbe të dhunuara seksualisht në Kosovë.
Osmani, në anën tjetër, kishte thënë se gratë pjesëmarrëse janë edhe pjesë e kabinetit të saj.
I dërguari i Bashkimit Evropian për dialogun mes Kosovës dhe Serbisë, Mirosllav Lajçak, ka thënë të martën se ndihet optimist për pak përparim të arritur në disa çështje me rëndësi gjatë një takimi të kryenegociatorëve javën e kaluar në Bruksel.
Kryenegociatorët e Kosovës dhe Serbisë, Besnik Bislimi dhe Petar Petkoviq, nuk arritën pajtueshmëri gjatë për mënyrën se si të ecet përpara në rrugën drejt normalizimit të marrëdhënieve mes dy vendeve fqinje gjatë takimit të tyre trepalësh me Lajçakun të enjten në Bruksel, por u pajtuan në disa çështje të tjera, raporton Radio Evropa e Lirë.
Lajçak tha të martën në Facebook se, derisa nuk u arrit ndonjë rezultat për rrugën drejt zbatimit të Marrëveshjes së viti 2023, “jam optimist për pak përparim të arritur në disa çështje të rëndësishme, për të cilat do të vazhdojmë punën në javët në vijim”.
Pas takimeve të së enjtes, Bislimi njoftoi se palët ishin pajtuar për disa çështje, përfshirë themelimin e një grupi punues, i cili do t’i harmonizojë rreth 20 certifikata veterinere, të cilat përdoren për kalimet kufitare mes Kosovës dhe Serbisë.
Kosova e ka akuzuar Serbinë në të kaluarën se i ka penguar mallrat dhe bizneset kosovare që kalojnë transit nëpër territorin e Serbisë, pasi Beogradi nuk njeh certifikatën fitosanitare të lëshuar nga Republika e Kosovës.
Ai tha gjithashtu se Lajçak i njoftoi gjatë takimit se Serbia është zotuar se deri në fund të muajit të ardhshëm do të lëshohen linjat e interkoneksionit, që ka qenë marrëveshje e energjisë e vitit 2022.
Takimi i së enjtes ishte i pari trepalësh pas më shumë se tre muajve mes Bislimit dhe Petkoviqit, por ata përsëri dështuan të arrijnë pajtueshmëri për mënyrën se si të ecet përpara në rrugën drejt normalizimit të marrëdhënieve mes dy vendeve fqinje.
Duke folur pas takimit, Bislimi tha se në fokus të takimit ishte gjetja e një mënyre për zbatimin e plotë të Marrëveshjes Bazë, për të cilën Kosova dhe Serbia u pajtuan në fillim të vitit 2023.
“Fatkeqësisht për temën kryesore që jemi mbledh, nuk ka rezultat. Serbia me gjasë ende po ngul këmbë në zbatim të pjesshëm, pra sipas idesë, ‘ne bëjmë diçka ju bëni diçka’”, tha Bislimi.
Kryenegociatori serb Petkoviq tha se Beogradi “nuk po ikë” nga detyrimet që dalin nga Marrëveshja Bazë, por se Prishtina duhet të jetë e para që do të fillojë, duke nisur me themelimin e Asociacionit të komunave me shumicë serbe.
Kosova ngul këmbë se kjo marrëveshje duhet të nënshkruhet së pari, edhe pse BE-ja thotë se ajo është detyruese për palët pavarësisht nënshkrimit, dhe e ka akuzuar Serbinë edhe në të kaluarën se dëshiron vetëm zbatimin e pjesshëm të saj./REL/
Një ngjarje e rëndë ka ndodhur në Elbasan, ku një 24-vjeçar ka humbur jetën si pasojë e plagëve të marra pas shpërthimit të lëndës plasëse, që dyshohet tritol.
Policia bën me dije se i riu ka tentuar që lëndën plasëse ta vendosë në një makinë, por i ka shpërthyer në duar.
Ngjarja ka ndodhur rreth orës 04:10, në lagjen “Shënkoll”, ku dyshohet se një shtetas rreth 24 vjeç, duke vendosur lëndë eksplozive në automjetin tip “Volkswagen”, në pronësi të shtetasit R. Ç., lënda eksplozive ka shpërthyer dhe për pasojë 24 vjeçari është dëmtuar dhe transportuar në spital. Si pasojë e plagëve të marra 24-vjeçari ka humbur jetën në spital.
Është ngritur një grup i posaçëm hetimor me specialistë për Hetimin e Krimeve të Rënda të Drejtorisë Vendore të Policisë Elbasan dhe Departamentit të Policisë Kriminale në drejtimin e Prokurorisë, vijojnë punën për zbardhjen e ngjarjes.
