Tag: Ballina

Kryetar i Nisma Socialdemokrate, Fatmir Limaj, në emisionin CONTEXT në ATV, duke komentuar mundësinë për zgjedhje të parakohshme, e cila nuk ishte përkrahur nga AAK-ja, vlerësoi se bëhej fjalë për një kurth të kryeministrit Kurti për PDK-në.

“Verës ka ndodhur gjëja më e mirë e mundshme që ka mujt me ndodh, që mos me ra në kurthin e Qeverisë. Më vjen mirë që shumica e partive opozitare nuk kanë ra në atë kurth, sepse koha e dëshmoi sepse prej qershorit deri tash e dini se çfarë zhvillimesh ka pasur”, tha Limaj.

Ai tha se kryeministri kishte nevojë për zgjedhje të shpejta, sepse sipas tij, ka pësuar debakël në qeverisje për katër vite.

“Aty u pa që Qeveria dhe kryeministri kishte nevojë për zgjedhje të shpejta pa pasur mundësi me bashkëbisedu, pa fushatë, pa asgjë, pa pasur mundësi me i trajtu këto gjëra si duhet, sepse ai e dinte dhe e din që ka pësuar debakël në qeverisje për katër vjet dhe atij nuk i konvenonte një fushatë normale ligjore siç është tash, sepse tash ka mundësi që njerëzit edhe me bashkëbisedu edhe me komuniku me qytetarin drejtpërdrejt edhe ka kohë të mjaftueshme edhe me e ba një rëngën të kësaj çfarë ka ndodhur në katër vite, por edhe me dhanë idetë për të ardhmen”, tha Limaj.

Intervistën e plotë të Fatmir Limajt në CONTEXT në ATV, e gjeni në videon më poshtë:

Përgatiti: Driton Sadiku

Në sallë qenë 78 deputetë. Por seanca nuk fillonte meqë deputetët opozitarë hezitonin të votonin për pjesëmarrje, e pushteti nuk i kishte numrat.

Kështu, seanca në të cilën pritej shqyrtimi i 27 pikave, vonoi të niste më shumë se një orë. Kur kryetari u rehatua ua citoi deputetëve të tjerë rregulloren.

Sidoqoftë, seanca vazhdoi me deklarime jashtë rendit të ditës, kurse deputetët opozitarë nuk i ndalën kritikat ndaj pushtetit.

Kritika për ish-partinë e tij pati edhe deputeti Haki Abazi, por fjala e tij ngjalli reagimet e nënkryetares së Kuvendit.

Pas deklarimeve jashtë rendit, deputetët u kthyen për votim të projektligjeve.

Është e paqartë nëse pajisjet nuk funksiononin, por gati çdo projektligj u desh që të votohej nga 2 apo 3 herë, që t’i merrte votat e mjaftueshme.

Opozita ishte deklaruar se nuk voton asgjë, por një projektligj kishte vota më shumë se deputetë shumica parlamentare.

Përgatiti: Arton Hamiti

Raporti i Komisionit Evropian për Kosovën ka konstatuar “përparim të kufizuar” sa i përket lirisë së shprehjes. Madje, raporti thekson se ka pasur zhvillime të perceptuara si përpjekje të Qeverisë për kontroll mbi median.

Megjithatë, vlerësohet se mjedisi në të cilin punojnë gazetarët është edhe më i vrazhdë sesa e pasqyron raporti i Komisionit Evropian.

Për raportin dhe vërejtjet, qeveria nuk ktheu përgjigje gjatë ditës. Sidoqoftë, thekset e raportit, sidomos për lirinë e shprehjes, opozita i konsideroi si “goditjen më të madhe” kohëve të fundit.

Raporti mes tjerash ngre shqetësime për paqëndrueshmërinë e Transmetuesit Publik dhe dorëheqjet e shumta në mesin e drejtuesve dhe anëtarëve të lartë të Bordit.

Kurse, për sulmet ndaj gazetarëve, raporti thekson nivelin e lartë të pandëshkueshmërisë, gjë që është shqetësim serioz për lirinë e medias.

Në fund, potencon se rekomandimet e Komisionit nga viti i kaluar nuk janë zbatuar dhe mbeten të vlefshme.

Përgatiti: Kastriot Tahiri

Fare pak përpjekje për të përmirësuar cilësinë në arsim ka bërë Kosova, shkruan në Raportin e Progresit të publikuar të mërkurën.

Dhe në mesin e rekomandimeve përmendet rishikimi i teksteve shkollore dhe vlerësimi i mësimdhënësve.

Megjithatë, sipas ish-zëvendësministrit të Arsimit, Dukagjin Popovci, kritikat janë kryesisht të njëjtat me raportet e mëhershme. Por, shton ai, pak po punohet në përmirësimin e gjendjes.

“Në raportin e progresit e përmendet strategjia, dhe bëhen kritika për moszbatimin e saj, janë masa që parashihet me strategji por ka ngecje. Për numrin e inspektorëve për 23 mijë mësimdhënës e po ashtu po dështojnë konkurset, duhet bërë përpjekje për përmirësim”, tha Popovci.

Shqetësuese gjetjet e raportit i cilëson edhe njohësi i arsimit, Egzon Gashi.

“Fatkeqësisht kritikat janë me vend, nëse e shohim sistemin e arsimit, treguesit na tregojnë se jemi mbrapa jo vetëm në gjithë botën e po edhe rajon, fëmijët tanë nuk po trajtohen qysh duhet, dhe reflektohen edhe në punësim e edukim, duhet bërë reforma drastike, duhet me u prekë themeli i arsimit për me u ba ndryshime të mëdha”, tha Gashi.

Kritika ndaj Kosovës pati edhe për numrin e madh të të rinjve të papunë, e që nuk ndjekin arsimimin e lartë ose trajnime.

Megjithatë, Raporti vlerëson se Kosova, po bën përpjekje për të përmirësuar cilësinë e arsimit, ndonëse ka shënuar pak përparim në zbatimin e strategjisë së arsimit për vitet 2022-2026.

Për hapat që do t’i ndërmarrë MASHTI lidhur me përmirësimin e cilësisë së arsimit, ATV-ja adresoi pyetje në zyrën për informim në këtë dikaster, megjithatë askush nuk u përgjigj.

Drejtoria për Hetimin e Krimit të Organizuar dhe Krimeve të Rënda, në koordinim me Prokurorinë Themelore të Prizrenit e kanë zhvilluar një aksion kundër fajdesë dhe detyrimit, ku u arrestuan gjashtë të dyshuar.

Aksioni u zhvillua në disa lokacione në Prizren dhe Suharekë.

Lajmi është konfirmuar edhe nga Prokuroria, me ç’rast janë bërë të ditura detaje të reja – si dhe janë publikuar pamjet nga aksioni i koduar si ‘Milioni’.

Sipas Prokurorisë, të dyshuarit kanë arritur të përfitojnë kundërligjshëm shuma të mëdha të parave si dhe prona, vlera e të cilave kalon shumën mbi 1 milion euro.

Po ashtu, janë sekuestruar njësi banesore, lokale, vetura, armë, kontrata e prova tjera materiale.

Policia e Kosovës i ka publikuar disa momente nga zhvillimi i këtij operacioni.

Shefi i Zyrës së Bashkimit Evropian në Kosovë, Aivo Orav thotë se Kosova e ka detyrim ligjor themelimin e Asociacionit të komunave me shumicë serbe.

Në një intervistë për KosovaPress, ai thekson se Asociacioni është një nga marrëveshjet e dialogut që është ratifikuar në Kuvendin e Kosovës në vitin 2013 dhe si i tillë duhet të zbatohet pa vonesa.

Orav nënvizon se një gjë e tillë theksohet edhe në Raportin për Kosovën, derisa e quan të domosdoshme që Kosova dhe Serbia të bëjnë hapa drejt zbatimit të Marrëveshjes Bazë të Brukselit dhe aneksit të Ohrit, të arritur në vitin 2023.

“E vërtetë, nuk është vetëm raporti i këtij viti që merret me dialogun por edhe raporti i mëparshëm është marrë me dialogun, sepse fillimisht Serbia dhe Kosova janë pajtuar për normalizimin e marrëdhënieve dhe Bashkimi Evropian në mënyrë aktive po e lehtëson këtë proces. Kështu që ka shumë më tepër se çfarë duhet bërë, dhe kaq shumë nga këto detyrime janë në një marrëveshje reciproke të cilat duhet të zbatohen. Është absolutisht e qartë”, thotë ai.

Duke folur për të ardhmen e dialogut, Orav thotë se dinamika e këtij procesi mbetet të shihet pas konstituimit të strukturave të reja në Bashkimin Evropian.

“Është e vështirë për mua sepse dua të them se duhet të vazhdojmë, nëse do të jetë pak më ndryshe, apo një mënyre tjetër që nuk më takon mua ta them për momentin sepse unë jam thjesht ambasador këtu në Kosovë dhe nuk mund të jap këtë lloj mendimi për momentin, por Përfaqësuesi special i Bashkimit Evropian, Brukseli dhe përfaqësuesi i ri i lartë duhet të vendosin se si të vazhdojnë kur komisioni i ri të vijë, dhe shpresojmë se do të ndodhë më 1 dhjetor por mund të ndodhë edhe pak më vonë”, thekson Orav.

Megjithatë, diplomati evropian, konsideron se Kosova e ka detyrim ligjor të themelojë Asociacionin e komunave me shumicë serbe.

“Gjatë këtyre viteve kur Kosova dhe Serbia po negociojnë në këtë proces të dialogut, janë arritur disa marrëveshje, dhe Asociacioni i shumicës serbe [komunave] është një nga marrëveshjet. Mendoj se vetëm një marrëveshje është ratifikuar nga parlamenti i Kosovës me shumicë dy të tretat e votave. Dhe është një detyrim ligjor për ta bërë atë, dhe për ta zbatuar atë, pra si në latinisht ‘Pacta sunt servanda’ [marrëveshjet duhet të respektohen], kështu që marrëveshjet duhet të respektohen dhe zbatohen”, shton ai.

Duke përmendur Raportin e progresit për vendin, ambasadori Orav, thotë se Kosova ka pasur përparim të mirë në disa fusha.

Ai thekson funksionimin e mirë të liberalizimit të vizave, linjëzimin e politikës së jashtme të Kosovës me Bashkimin Evropian, agjendën e reformave dhe zhbllokimin e vendimmarrjes në CEFTA.

“Mendoj se do të veçoja katër fusha, njëra është liberalizimi i vizave, më në fund u krye dhe u desh shumë kohë, por më në fund është aty dhe tani liberalizimi i vizave po funksionon shumë mirë. E dyta është ndjekja vullnetare nga Kosova e politikës, së jashtme dhe të sigurisë, së përbashkët të Bashkimit Evropian. Dua të them se mund të tingëllojë pak e mërzitshme, por për ta thënë më konkretisht, Kosova i është bashkuar Bashkimit Evropian në sanksionet e saj kundër Rusisë, kundër Bjellorusisë, dhe kjo është e jashtëzakonshme sepse Kosova po e bën këtë në baza vullnetare. Pastaj e treta është agjenda e reformave, kur presidentja Ursula Von Der Layen ishte këtu ajo theksoi gjithashtu se sa mirë ka punuar Kosova me agjendën reformatore, dhe unë mund ta përsëris atë. Dhe fusha e katërt është CEFTA, sepse tani Kosova po merr pjesë në punën e CEFTA-s, janë zhbllokuar 12 marrëveshje të rëndësishme për rajonin dhe mendoj se ky është një hap shumë i mirë për Kosovën por edhe për të gjitha vendet e tjera të rajonit drejt tregut të përbashkët”, thekson Orav.

Duke folur për Raportin e Komisionit Evropian, Orav deklaron se Kosova ka bërë progres të kufizuar në reformën në drejtësi.

“Nuk ka ngecje në këtë raport, por në disa raste, po, kemi përmendur se është bërë vetëm progres i kufizuar, por është prapë progres, por ende pak gjëra duhen bërë, dhe këtu mund të përmend ndoshta reformën në drejtësi kur ende ka pak gjëra që duhen bërë. Dhe gjithashtu liria e medias, në përgjithësi ka liri të medias, mjedisi mediatik është shumë pluralist, por më pas ka pikëpyetje për pronësinë, transparencën dhe financimin e medias, ku ende ka shumë për të bërë”, përfundon Orav.

Kuvendi i Kosovës sot do të mbajë seancë plenare ku në rend janë dite 27 pika.

Seanca do të fillojë me deklarimet jashtë rendit të ditës, për të vazhduar me propozimin e Grupit Parlamentar të Lëvizjes Vetëvendosje për zëvendësimin e deputetëve në komisione parlamentare dhe propozim-Vendimin për hartimin e Nismës legjislative të qytetarëve nga Qeveria e Republikës së Kosovës.

Do të bëhet shqyrtimi i dytë i Projektligjit nr.08/L-288 për mbrojtjen e konsumatorit, shqyrtimi i dytë i Projektligjit nr.08/L-295 për kripto-asetet, shqyrtimi i dytë i Projektligjit nr.08/L-265 për regjistrin e pronarëve përfitues, shqyrtimi i propozimit të gjashtë (6) deputetëve nga GP të PDK-së, për shkarkimin e anëtarëve të Bordit të Radiotelevizionit të Kosovë, zgjedhja e tre (3) drejtorëve të Bordit të Ndërmarrjes Publike Operatori i Sistemit, Transmisionit dhe Tregut.

Po ashtu do të bëhet emërimi i anëtarit në Këshillin Shtetëror të Cilësisë të Agjencisë së Kosovës për Akreditim, nga radhët e studentëve, shqyrtimi i Projektligjit nr.08/L-317 për aderim në “Konventën për njohjen dhe ekzekutimin e vendimeve të huaja në çështje civile apo tregtare”, shqyrtimi i Projektligjit nr.08/L-318 për aderim në “Konventën për marrjen e provave jashtë vendit në çështje civile apo tregtare”,

shqyrtimi i Projektligjit nr.08/L-319 për aderim në “Konventën për zgjedhjen e marrëveshjeve gjyqësore”, shqyrtimi i parë i Projektligjit nr.08/L-312 për ndalimin e përdorimit të pijeve energjike për personat e moshës nën tetëmbëdhjetë (18) vjeç,

shqyrtimi i parë i Projektligjit nr.08/L-315 për banim social dhe të përballueshëm, shqyrtimi i parë i Projektligjit nr.08/L-320 për sigurimin e detyrueshëm të kujdesit shëndetësor, shqyrtimi i parë i Projektligjit nr.08/L-322 për Byronë Shtetërore për Verifikimin dhe Konfiskimin e Pasurisë së Pajustifikueshme.

Deputetët do të bëjnë edhe shqyrtimin e parë të Projektligjit nr.08/L-316 për ndryshimin dhe plotësimin e Ligjit nr.08/L-036 për Dërgimin e Forcës së Sigurisë së Kosovës jashtë vendit, shqyrtimin e parë të Projektligjit nr.08/L-321 për ndryshimin dhe plotësimin e Ligjit nr.06/L-032 për Kontabilitet, Raportim Financiar dhe Auditim.

Do të bëhet edhe shqyrtimi i raportit me rekomandime për mbikëqyrjen e zbatimit të Kodit nr.06/L-006 të Drejtësisë për të Mitur, shqyrtimi i raportit me rekomandime për mbikëqyrjen e zbatimit të Ligjit nr.05/L-049 për Administrimin e Pasurisë së Sekuestruar dhe të Konfiskuar, i ndryshuar dhe plotësuar me Ligjin nr.08/L-034y themelimi i Komisionit Ad-Hoc për përzgjedhjen e kandidatëve për anëtarë të Bordit të Radiotelevizionit të Kosovës, nga komuniteti shqiptar, shqyrtimi i Propozimit të shtatë (7) deputetëve nga radhët e komuniteteve tjera që nuk janë shumicë, për shkarkimin e nënkryetarit të Kuvendit të Republikës së Kosovës, Bahrim Shabaniy shqyrtimi i Raportit vjetor financiar të Buxhetit të Republikës së Kosovës, për vitin 2023, shqyrtimi i Raportit vjetor të Performancës së Zyrës Kombëtare të Auditimit për vitin 2023, shqyrtimi i Raportit vjetor të Fondit të Kursimeve Pensionale të Kosovës për vitin 2023 dhe miratimi i buxhetit të Komisionit Hetimor Parlamentar për procesin e subvencionimit të blerjes së teksteve shkollore dhe mjeteve mësimore për nxënësit e nivelit të Arsimit fillor dhe Arsimit të Mesëm të Ulët për vitin shkollor 2023/2024, për periudhën kohore, prej 4 korrik 2024 deri në përfundim të mandatit të tij.

Kryetari i Sindikatës së Bashkuar të Arsimit dhe Shkencës, Rrahman Jasharaj, ka komentuar rritjen e pagave të punëtorëve të sektorit publik. Ai kritikoi Qeverinë duke thënë se kjo ngritje është e ulët dhe nënçmuese.

Në një intervistë për Ekonomia Online, Jasharaj ka thënë se pagat e mësimdhënësve duhet të kenë rritje 30 për qind në kuadër të koeficientit 1. Tutje, ai shtoi se ende po vazhdohet praktika që të mos ketë komunikim ndërmjet sindikatave dhe nivelit qendror.

“Nga komunikimi i parë që kemi bërë me kryetarët e nivelit komunale dhe universiteteve shihet dhe është e arsyeshme. Jemi të zhgënjyer me deklaratën para mediave dhe kryeministrit Kurti dhe ministrit Murati, ne kemi bërë kërkesë tash e dy muaj drejtuar kryeministrit që të ketë një lëvizje të vlerës së koeficientit për së paku 30 % duke e argumentuar me ngritjen e vazhdueshme të çmimeve dhe duke bërë përpjeke që punëtorët e arsimit por edhe sektorët e tjerë ta kenë një mbështetje që të përballen më lehtë me çmimet që po ngrite. Ishte i befasishëm deklarimi i djeshëm ngase Kurti e Murati po vazhdojnë me atë praktikën që të mos komunikojnë fare me sindikatat por të sjellin vendime ashtu siç ju teket”, ka thënë Jasharaj.

Kryesindikalisiti i arsimit ka theksuar se ky vendim në këtë kohë, mund të lexohet si deklarim për fushatë elektorale. Sipas tij, Qeveria ka qasje të gabuar, dhe nuk ka disponim për të bashkëpunuar me sindikatat.

“Kemi një premtim se në janar do të ketë lëvizje brenda koeficienteve që dyshojmë që nuk është e mundur ngase që ligji për pagat e ka prodhuar Parlamenti dhe vetëm ai ka të drejtë të ndërhyjë në ligje, ndërsa Murati ka mundur të bëjë më lehtë lëvizjen e ta ngrit koeficientit por ta ngrit tani e jo në janar, sepse janari ka disa muaj dhe nuk dihet se çfarë do të ndodh, nga disa mund të lexohet si një deklarim pranë fushatës sidoqoftë, punëtorët e arsimi dhe jo vetëm janë tepër të pa kënaqur ngase me këtë lëvizje nëse e kthejmë në euro i bie diku 50 euro, ngritje që është tepër e ulët dhe është nënçmuese dhe kam frikë që kjo do të reflektojë tek anëtarësia jonë”, theksoi ai.

“Ne e kemi shpërndarë një formularë në të gjitha institucionet arsimore dhe po presin se çfarë po na thonë anëtarësia. Sepse ata e dinë që ne jemi angazhuar shumë por kemi hasur në problem me qasjen e gabuar të Qeverisë, sidomos është tek ngritja e koeficientit por edhe tek kontrata kolektive, ku siç duhet zonja Nagavci nuk ka disponim që të ulet me ne e të bisedojmë as për çështjet tjera e as për kontratën që është tejet e rëndësishme për sektorin e arsimit por kontrata janë të rëndësishme edhe për kontratat tjera”, deklaroi ai.

“Nëse vazhdohet kështu ne do ta analizojmë vullnetin e anëtarësisë, dhe pastaj do të shohim çfarë do të bëjmë tutje, kam frikë se anëtarësia e zhgënjyer edhe më këtë vendim, do të jetë edhe më kategorike që ne të fillojmë me veprime sindikale dhe do të angazhohemi sa ma pak të bllokohet procesi mësimor, ngase nxënësit nuk janë fajtor pse është kjo situatë e tillë”, shtoi ai.

Tutje, ai ka ritheksuar se kjo rritje, nuk është e mjaftueshme, madje krahasoi pagën e punëtorëve të arsimit në Shqipëri me atë të Kosovës.

Sipas Jasharaj, një mësimdhënës se Shqipëri ka pagën mbi 900 euro, ndërsa lëvizja e pagës për 55 euro në Kosovë, shkakton irritim për punëtorët, raporton EO.

“Nuk është e mjaftueshme sepse është një lëvizje që nuk ndikon shumë, nuk i ndihmon as punëtorëve të arsimit, as policisë e të tjerëve, përballje me inflacionin përballje me ngritjen e vazhdueshme të çmimeve, e aq më tepër kur edhe mësimdhënësit e tjerë kanë komunikim me shqiptarët e Shqipërisë, dihet publikisht se Qeveria e Shqipërisë, bëri një lëvizje të dukshme të pagave, paga në Shqipëri tek arsimi kanë shkuar në 900 e më shumë euro, kjo lëvizje me 50 euro më tepër i irriton sesa që do t’i gëzojnë punëtorët e arsimit e të tjerët”, përfundoi ai.

Qeveria e Kosovës të mërkurën ka njoftuar se pagat për punëtorët e sektorin publik do të rriten nga janari i vitit 2025.

“Të gjithë të punësuarve në sektorin publik, pagat do t’u rriten për 55 euro nga janari, dhe për 55 euro tjera nga muaji korrik i vitit të ardhshëm”- u shpreh ai, duke bërë të ditur se rritja e përgjithshme e pagave brenda vitit 2025 do të jetë gjithsej 110 euro bruto”, ka njoftuar Kurti në konferencë.

Përgatiti: Fatlum Jashari

Krahas nëntë shteteve të tjera që synojnë anëtarësimin në Bashkimin Evropian, Komisioni Evropian miratoi raportin për Kosovën, në kuadër të Pakos së Zgjerimit 2024.

Krahas një game të gjerë vlerësimesh dhe rekomandimesh në pothuajse të gjitha fushat, dokumenti i njohur si “raporti i progresit” vëmendje të veçantë i kushton procesit të normalizimit të marrëdhënieve Kosovë-Serbi.

Në konferencën pas miratimit të raporteve, Përfaqësuesi i Lartë për Politikë të Jashtme dhe Siguri, Josep Borrell, foli për rëndësinë që zgjerimi jo vetëm ta rrisë por edhe forcojë BE-në. Në këtë kontekst, ai lavdëroi Kosovën ndërsa kushtëzoi Serbinë.

“Thjeshtë, ju nuk mund të mbani lidhje me Rusinë ose të provoni të bëni biznes zakonshëm dhe të prisni që vendi juaj do të jetë pjesë e BE-së. Është njëra ose tjetra. Ndër vite kemi parë se rreshtimi me politikën tonë të përbashkët të jashtme dhe të sigurisë është treguesi më i rëndësishëm që një vend kandidat ndan vlerat dhe orientimin tonë gjeo-politik. Disa nga partnerët tanë janë plotësisht të rreshtuar me politikën tonë të jashtme dhe të sigurisë. Mund të përmend: Maqedoninë e Veriut, Shqipërinë, Malin e Zi, Bosnjë e Hercegovinën dhe Kosovën, e cila po rreshtohet vullnetarisht… Serbia herët a vonë duhet të rreshtohet me BE-në, përndryshe anëtarësimi minohet, por ende jemi në proces”, tha Borrell.

Teksa në dialogun Kosovë-Serbi përmendi si suksese zgjidhen e çështjes së targave, lëvizjes së lirë dhe energjisë në veri, Borrell qartësoi se asnjëra nga dy vendet nuk mund të anëtarësohet në BE nëse s’ka normalizim të marrëdhënieve.

“Për të dyja, Kosovën dhe Serbinë, shpejtësia e zgjerimit dhe përparimit të tyre në dialogut drejt normalizimit të marrëdhënieve, i lehtësuar nga BE-ja, duhet të shkojnë dorë për dore. Nuk mund të bësh njërën pa e bërë tjetrën. Përparimi drejt BE-së dhe zgjidhja ndaj dialogut, janë të ndërvarura dhe ndërvepruese”, tha Borrell.

Krahas përmendjes së Planit të Rritjes si përshpejtuese e procesit të integrimit të Ballkanit Perëndimor, komisionieri Oliver Varhelyi, theksoi se përveç si reagim ndaj zhvillimeve gjeo-politike, zgjerimi është interes i BE-së.

“Nëse ka një gjë që duhet të bëhet e qartë, është ajo që Komisioni ka punuar palodhshëm që ta vendosë zgjerimin sërish në agjendë, jo vetëm ta diskutojë atë por edhe të bëj përparim në këtë. Dhe mendoj se me shtetet anëtarë kemi bërë punë. Mendoj se zgjerimi tani është në mesin e tri prioriteteve kryesore… Në fund të mandatit të ardhshëm të Komisionit mund të shohim të ndodhë zgjerimi, por edhe integrimi në terren”, tha Varhelyi.

Të dy thanë se raportet janë të bazuara në merita dhe në thelb të vlerësimit kanë sundimin e ligjit dhe reformat.

Në këtë kontekst, si arritje ata përmendën faktin se për dallim nga viti 2019, tani janë nëntë vende kandidate për anëtarësim, plus Kosova potencialisht kandidate.

Përgatiti: Fatlum Jashari

Bashkimi Evropian konstatoi se i ashtuquajturi projektligj për juridiksionin gjyqësor serb në Kosovë dhe shpallja e Kosovës “zonë e mbrojtjes së veçantë sociale” nga Qeveria e Serbisë, përbën shkelje të pastër të obligimeve të ndërmarra në dialogun e Brukselit.

Pa treguar nëse do të ketë pasoja nëse procedohet tutje, blloku 27-anëtarësh vetëm i konfirmoi shkeljet nga shteti fqinj.

“Që nga Marrëveshja e Brukselit e 2013-tës, Kosova dhe Serbia kanë obligime të qarta lidhur me juridiksionin përkatës të tyre. Projektligji i propozuar i Qeverisë së Serbisë [për deklarimin e Kosovës si një zonë të mbrojtjes së veçantë, dhe për organizimin dhe juridiksionin e autoriteteve gjyqësore për ndjekjen e veprave penale në Kosovë], ashtu siç është publikuar, përbën shkelje të qartë të obligimeve të Serbisë nga dialogu dhe janë në kundërshtim me rizotimin ndaj dialogut së fundmi”, tha zëdhënësja e BE-së, Nabila Massrali.

BE-ja kërkoi që Qeveria e Serbisë ta tërheqë projektligjin e miratuar më 28 Tetor.

“Bashkimi Evropian i kujton Serbisë që ka obligim nga të gjitha marrëveshjet e dialogut, si pjesë integrale e integrimit të saj në BE, dhe i bën thirrje Serbisë ta rishqyrtojë projektligjin”, tha Massrali.

Ndaj vendimit në Beograd, reagoi edhe zëvendëskryeministri për dialog Besnik Bislimi, duke kërkuar ndëshkimin e Serbisë.

“Cili është perceptimi i BE-së për fytyrën e vërtetë të Serbisë? Ai që në mënyrë të pabesueshme përpiqet ta paraqesë si “konstruktive” duke përmendur zotimet e saj ndaj procesit, apo ai që miraton projektligje të tilla dhe vazhdimisht shkel marrëveshjet dhe cenon integritetin dhe sovranitetin tonë territorial? BE-ja, si ndërmjetës, duhet të përgjigjet dhe të reagojë në mënyrë të fortë”, tha Bislimi.

Vendimi i Qeverisë së Serbisë vjen vetëm pak ditë pas njoftimit se kryeministri i saj, Milos Vucevic, i ka dërguar letër BE-së, në të cilën zotohet për zbatimin e marrëveshjes për rrugën drejt normalizimit të marrëdhënieve me Kosovën.