Tag: Ballina

Përgatiti: Nora Luta

Vila e sekuestruar e Milan Radojicicit buzë liqenit të Ujmanit, vazhdon të ruhet nga Policia e Kosovës.

Por, më shumë se gjashtë muaj pas hyrjes në fuqi të Udhëzimit administrativ që i hapi rrugë Ministrisë së Punëve të Brendshme për përdorim, objekti milionësh nuk është duke u shfrytëzuar.

Ministri Xhelal Sveçla pati thënë se do të shndërrohet në stacion policor.

Megjithatë për sigurinë e vilës, po kujdeset një numër i vogël i zyrtarëve policorë, derisa burimet i thanë ATV-së se edhe kamerat e sigurisë kohët e fundit nuk kanë funksionuar.

Por, në Drejtorinë e Policisë në veri, thonë se numri i pjesëtarëve të Policisë aty është i mjaftueshëm.

Elshani nuk i përjashtoi telashet me kamerat e sigurisë, por theksoi se objekti është i sigurt.

Numri i vogël i policëve në vilë, sipas profesorit Avni Islami nuk paraqet asnjë shqetësim.

Kjo sepse sipas Islamit, Policia gjithnjë vepron në bazë të një plani operativ.

Në maj të vitit të kaluar, Gjykata e Prishtinës dha pëlqimin për dhënien me qira të pasurisë së sekuestruar të të akuzuarit kryesor për sulmin në Banjskë Milan Radojicic, pas plotfuqishmërisë së urdhrit ndalues përfundimtar.

Agjencia për menaxhimin e pasurisë së sekuestruar dhe të konfiskuar, dhënien me qira e kishte vlerësuar si një ndër format më të duhura për administrimin e tyre deri në përfundim të procesit gjyqësor.

Vila milionëshe e Milan Radojicic po ruhet nga një numër i vogël i pjesëtarëve të Policisë, derisa pati telashe edhe me kamera të sigurisë. Megjithatë për Zëvendës drejtorin e policisë për rajonin e veriut, objekti është i sigurt

Përgatiti: Fatlum Jashari

Tre javë para fundit të mandatit zgjatur të Miroslav Lajcak si Përfaqësues i Posaçëm për Dialogun Kosovë-Serbi, Bashkimi Evropian nuk dha detaje të bollshme lidhur me pasuesin eventual në këtë detyrë.

Megjithatë, zëdhënësja për Punë të Jashtme dhe Siguri, Anitta Hipper, la të kuptohet se mund të ketë lajme së shpejti.

“Mandati i Përfaqësuesit të Posaçëm të BE-së, Miroslav Lajcak, mbetet në fuqi deri në fund të Janarit, dhe procesi i zgjedhjes së pasuesit të tij është në zhvillim. Kështu që, do të ketë më shumë detaje për të përcjellë”, tha Hipper.

Javën e kaluar, pati raportime se diplomatët Peter Sorensen nga Danimarka dhe Pekka Haavisto nga Finlanda, janë kandidatët e interesuar për t’u bërë pjesë e lehtësimit të dialogut Kosovë-Serbi.

Krahas miratimit nga Përfaqësuesja e Lartë për Politikë të Jashtme dhe Siguri, Kaja Kallas, kusht për emërimin eventual të Përfaqësuesit të ri të Posaçëm është pajtimi ndërmjet 27-shteteve anëtare.

Një tjetër mundësi do të ishte emërimi i një këshilltari për dialog nga Kaja Kallas, për çka nuk do tw ishte i domosdoshëm konsensusi brenda BE-së.

Por, me nisjen e procesit për zgjedhjen e emisarit të ri ky version mbetet më pak real.

Edhe pse vlerësoi se më mirë do të ishte sikur Kallas të merrte personalisht në përsipër procesin, opinionisti Bekim Kabashi tha se megjithatë emisari nuk ka rol përcaktues.

“Angazhimi dhe përgjegjësia do të ishte më e madhe. Pra, për bindjen time, do të kishte rol më të madh direkt BE-ja. Por, edhe në këtë formë, siç ka qenë me z. Lajcak, mendoj se z. Lajcak ka
qenë më shumë një përfaqësues teknik sesa vendimmarrës, shto këtu faktin se kanë qenë të përfshira Shtetet e Bashkuara të Amerikës, të cilët mendoj se kanë pasur rol më të madh sesa vet i BE-së”, tha Kabashi.

Ndërlidhur me këtë ai mori shembull rolin që patën nga jashtë, veçmas këshilltarët e Kancelarit të Gjermanisë dhe Presidentit të Francës.

“Në momente vendimtare ata kanë marrë vendime dhe kanë ardhë me vendime dhe kanë dalë propozime konkrete, siç ka qenë draft-statuti. Për bindjen time Lajcak ka qenë veç postier aty, jo ai që ka përcaktuar formën e atij dokumenti të rëndësishëm që është akoma në tavolinë”, tha Kabashi.

Miroslav Lajcak, të cilit më 31 Janar i përfundon mandati i zgjatur, nisi punën si Përfaqësues i Posaçëm për Dialogun Kosovë-Serbi më 2 Prill 2020.

Në të kaluarën, ish-zëvendës presidentja e Komisionit Evropian, Federica Mogherini e kishte udhëhequr vetë procesin e dialogut, pa emisar.

Përgatiti: Benita Zeneli

Përpjekjet për miratimin e Projektligji për Lirinë Fetare janë kthyer në pikën zero, pasi projektligji i miratuar në qeveri fiks para dy viteve, nuk arriti të miratohet nga legjislativi.

Kjo nismë ligjore, e cila parasheh që 7 bashkësitë fetare ligjërisht do të mund ta sigurojnë statusin e tyre juridik, duke përfshirë këtu edhe Kishën Ortodokse Serbe, nuk mund të miratohet në Kuvend pa votën e dy të tretave të deputetëve.

“Lista serbe qëllimisht e ka bojkotuar… përkundër të metave sa I përket bashkësive fetare të reja themelimit me një numër shumë të ulët të anëtarëve, unë konsideroj që është një lloj politike për të parandaluar çdo lloj avancimi në republikën e Kosovës”, tha Asdren Bytyqi, jurist.

Formalizimi i statusit të Kishës Ortodokse Serbe në Kosovë theksohet edhe në nenin e 7 të marrëveshjes së Brukselit. Aty po ashtu kërkohet që palët të ofrojnë nivel të fortë mbrojtjeje për objektet e trashëgimisë fetare dhe kulturore serbe.

Kryeministri Albin Kurti kishte thënë se një gjë të tillë tashmë e kishin sponsorizuar në projektligjin për lirinë fetare, duke garantuar se nuk bëhet fjalë për ekstraterritorialitet apo kompetenca speciale për kishat ortodokse.

Megjithatë, të martën Blloku 27 anëtaresh insistoi në miratim sa më parë të Ligjit për liritë fetare.

“Ky ligj është në interes të të gjitha komuniteteve dhe ftojmë deputetët e Kuvendit që të mbështesin miratimin e ligjit”, tha Anita Hipper, zëdhënësja e Bashkimit Evropian për Politikë të Jashtme dhe Siguri.

Në Kosovë, bashkësitë fetare rregullohen me një ligj i cili ishte miratuar në vitin 2006. Edhe në legjislaturat e kaluara ishte tentuar të miratohej një ligj i ri, por që pa sukses për shkak i mungesës së votave.

Përgatiti: Krenare Mulliqi

Data e zgjedhjeve po afrohet, por shumë qytetarë nuk e kanë ende të qartë mënyrën se si do të votojnë në këto zgjedhje.

Madje edhe për mundësin e votimit të më shumë se 5 deputetëve, që është risi e këtyre zgjedhjeve thonë se nuk kanë njohuri.

Megjithatë presin që informatat e tilla t’i marrin nga Komisioni Qendror i Zgjedhjeve.

Të paqartë mënyrën e votimit e kanë edhe qytetarët nga diaspora.

Për shkak të ndryshimeve në ligjin për zgjedhje, kampanja informuese do të ishte dashur të niste që moti sipas ish-kryetari të KQZ-së, Mazllum Baraliu.

Nga Komisioni Qendrore i Zgjedhjeve nuk treguan se kur pritet të nisin kampanjat informuese për mënyrën e votimit për zgjedhjet e rregullta paralamentare dhe as se sa buxhet është ndarë për to.

Në zgjedhjet lokale të vitit 2021 afër 70 mijë fletëvotimeve ishin të pavlefshme dhe të zbrazëta.

Kryeministri Albin Kurti ka uruar besimtarët ortodoksë për Krishtlindje në gjuhën shqipe dhe atë serbe.

Kurti në urim tha se kjo festë është kohë e shpresës dhe e mirësisë.

Besimtarët ortodoksë më herët i ka uruar edhe Presidentja Vjosa Osmani.

Postimi i plotë i Kurtit: Krishtlindja është kohë e shpresës, mirënjohjes dhe mirësisë. Në këtë ditë të veçantë i dërgoj urimet më të mira për të gjithë bashkëqytetarët tanë nga komuniteti serb të besimit ortodoks që festojnë sot.

Gëzuar Krishtlindjen! Ju dëshiroj paqe dhe gëzim.

Përfaqësuesja e lartë e Bashkimit Evropian (BE) për politikë të jashtme dhe siguri, Kaja Kallas, do të duhet të vendosë këto ditë në mes të dy kandidatëve për pasardhësin e Miroslav Lajçakut në postin të dërguarit të posaçëm të BE-së për dialogun mes Kosovës dhe Serbisë.

Radio Evropa e Lirë mëson se diplomati nga Danimarka, Peter Sorensen, dhe ish-ministri i Jashtëm i Finlandës, Pekka Haavisto, janë të vetmit kandidatë të cilët janë paraqitur për këtë rol deri të premten e kaluar, kur edhe skadoi afati për dorëzimin e aplikimeve.

Ndërkohë, në BE nuk japin ndonjë hollësi për këtë dhe vetëm konfirmojnë se “procesi i zgjedhjes është në vazhdim e sipër”.

“Mandate i përfaqësuesit të lartë Miroslav Lajçak mbetet në fuqi deri në fund të janarit. Zgjedhja e pasardhësit të tij është momentalisht në vazhdim e sipër dhe në do të japim njoftime të reja me kohë”, ka thënë Annita Hipper, zëdhënëse e BE-së për politikë të jashtme dhe siguri.

Fotografi në një nga takimet ndërmjet Kosovës dhe Serbisë për normalizimin e marrëdhënieve.

Nëse BE-ja dëshiron të sigurojë që të mos ketë vakum, atëherë procedura e caktimit të dërguarit të ri të posaçëm për dialogun, do të duhej të përmbyllej para fundit të këtij muaji, kur Lajçakut do t’i përfundojë mandati zyrtarisht.

Por, përveç vendimit të përfaqësueses së lartë Kallas për emërimin e pasardhësit të Lajçakut, duhet të pajtohen edhe vendet anëtare të BE-së. Grupet punuese në Këshillin e BE-së janë duke u marr me këtë çështje tani.

Burimet diplomatike në Bruksel i kanë thënë Radios Evropa e Lirë se, që të dy kandidatët, do të konsideroheshin si një zgjedhje e duhur, por mes tyre ka disa dallime.

Këto burime thonë se, nëse Kallas do të vendose të ketë në atë postë një person me një peshë më të madhe politike, atëherë përparësi do të kishte ish-ministri i Jashtëm i Finlandës, Pekka Haavisto. Edhe në rastin kur Lajçak kur ishte zgjedhur në këtë postë para pesë vjetësh, si përparësi ishte përmendur fakti se ai kishte qenë ministër i Jashtëm i një vendi anëtar të bllokut.

Por, në anën tjetër, thonë këto burime, nëse Kallas dëshiron që vetë të merret më shumë më procesin e dialogut në aspektin politikë, atëherë Sorensen konsiderohet si kandidat më i përshtatshëm, sepse ka shumë vite që punon në strukturat e Shërbimit të Vlerësimi të Jashtëm të BE-së (EEAS) dhe mbi vete do të merrte më shumë ndërmjetësimin në çështjet teknike në dialog.

Kaja Kallas gjatë takimeve të ndara me kryeministrin e Kosovës, Albin Kurti, dhe presidentin e Serbisë, Aleksandar Vuçiq.

Burimet diplomatike nga vendet anëtare të BE-së vlerësojnë se Sorensen ka pak më shumë gjasa sesa Haavisto.

Kush janë Peter Sorensen dhe Pekka Haavisto?
Si Sorensen, ashtu edhe Haavisto kanë përvojë dhe njohuri rreth Ballkanit Perëndimor.

Peter Sorensen nga Danimarka, ka më shumë përvojë diplomatike në strukturat e Bashkimit Evropian sesa karrierë politike në vendin e tij.

Në Kosovë, Haavisto ka qenë nënkryetar i “Shtyllës IV” (Rindërtimi dhe Zhvillimi Ekonomik) të Misionit të Administratës së Përkohshme të Kombeve të Bashkuara në Kosovë (UNMIK), nga viti 2002 deri në vitin 2006, si dhe këshilltar i lartë i përfaqësuesit të Posaçëm të Sekretarit të Përgjithshëm të OKB-së në Kosovë nga viti 2001 deri më 2002.

Ai ka mbi 15 vjet përvojë në rajonin e Ballkanit Perëndimor.

Gjatë karrierës së tij diplomatike në BE, Sorensen ka shërbyer si përfaqësues i posaçëm i BE-së për Bosnje e Hercegovinë dhe shef i zyrës së BE-së në Sarajevë, ndërsa ka qenë edhe përfaqësues special i përfaqësuesit të lartë të BE-së në Serbi. Në rajonin e Ballkanit ka punuar edhe në misionin e OSBE-së në Kroaci.

Po ashtu ka qenë edhe shef i delegacionit të Bashkimit Evropian në Shkup.

Ai aktualisht është këshilltar në EEAS për diplomaci digjitale.

Në anën tjetër, Pekka Haavisto ka qenë ministër i jashtëm i Finlandës. Në atë cilësi ai e kishte vizituar edhe Kosovën edhe Serbinë.

Haavisto ka mbështetur fuqishëm procesin e dialogut dhe ka kritikuar Serbinë për lobimin kundër njohjes së pavarësisë së Kosovës, ndërsa Kosovën e ka kritikuar kur kishte vendosur tarifa ndaj importit të mallrave nga Serbia vite më parë.

Si ministër i Jashtëm i Finlandës, Haavisto ka qenë mbështetës i madh i procesit të zgjerimit të BE-së dhe avancimit të raporteve me vendet e Ballkanit Perëndimor.

Haavisto, në kohën e pas luftës në Kosovë, ka punuar edhe në strukturat a Administratës së UNMIKU-ut, që janë marrë me pasojat ekologjike pas luftës. Ai ka garuar tri herë në zgjedhjet për president të Finlandës. Gjithmonë ka përfunduar në pozitën e dytë. Haavisto në karrierën e tij politike ka qenë edhe ministër i Mjedisit i Finlandës.

Roli i të dërguarit të posaçëm
Burimet diplomatike të BE-së thonë se pritet që pasardhësi i Lajçakut të jetë vetëm i dërguar i posaçëm për dialog mes Kosovës dhe Serbisë dhe të mos ketë detyrime tjera lidhur me rajonin e Ballkanit Perëndimor.

Lajçak në titullin e tij ka edhe detyrat për “çështje tjera rajonale” përveç angazhimit si lehtësues në dialogun mes Kosovës dhe Serbisë.

Për këtë rol më herët është përmendur edhe emri i ish-presidentit dhe ish-kryeministrit të Sllovenisë, Borut Pahor.

Kryediplomati i Bashkimit Evropian, Josep Borrell (majtas), dhe kryeministri i Kosovës, Albin Kurti, para takimit në Bruksel, më 26 qershor 2024.

Pahor gjatë verës vet e kishte konfirmuar se ishte i interesuar për këtë postë dhe e kishte edhe mbështetjen e Qeverisë së vendimit të tij. Por, ai njoftoi të premten se ai nuk do të garonte për të dërguar të posaçëm të BE-së për dialogun Kosovë-Serbi, pasi ka kuptuar se kërkohet më shumë një nivel diplomatikë sesa politikë.

Dialogu mes Kosovës dhe Serbisë është duke u zhvilluar me lehtësimin e Bashkimit Evropian për më shumë se 13 vjet.

BE-ja vazhdon të ngul këmbë se zbatimi i të gjitha marrëveshjeve të arritura deri tani është detyrim për Kosovën dhe Serbinë, dhe se ky mbetet edhe kusht për avancimin e tyre në procesin e integrimeve evropian.

Burimet diplomatike në BE thonë se ky qëndrim i BE-së nuk do të ndryshojë as në të ardhmen, pa marrë parasysh se kush do të jetë lehtësues në dialog./rel

Bashkimi Evropian i ka bërë thirrje Kosovës për miratimin e Projektligjit për Lirinë fetare përmes së cilit pritet të definohet statusi për Kishën Ortodokse Serbe.

Zëdhënësja e BE-së, Anitta Hipper, në konferencën e sotme për media tha se miratimi i këtij ligji në Kuvendin e Kosovës është në interes të të gjitha komuniteteve në Kosovë kur u pyet mbi statusin e Kishës Serbe.

“Dhe për projektligjin e Kishës Ortodokse Serbe, ne bëjmë thirrje për miratimin e Ligjit për Lirinë Fetare. Ky ligj është në interes të të gjitha komuniteteve dhe ftojmë deputetët e Kuvendit që të mbështesin miratimin e ligjit”, tha ajo.

Kosova dhe Serbia në Marrëveshjen e Ohrit janë dakorduar që të palët të zyrtarizojnë statusin e Kishës Ortodokse Serbe.

“Palët do të zyrtarizojnë statusin e Kishës Ortodokse Serbe në Kosovë dhe do të ofrojnë nivel të fortë mbrojtjeje për objektet e trashëgimisë fetare dhe kulturore serbe, në përputhje me modelet ekzistuese europiane”, thuhet ndër të tjera në Nenin 7 të marrëveshjes së 27 shkurtit 2023.

Për këtë çështje në mars të 2023-ës kishte folur kryeparlamentari Glauk Konjufca ku kishte thënë se Kisha Ortodokse Serbe nuk mund të bëhet me status special.

Ai kishte thënë se shteti sekular i Kosovës e ka “distancën e barabartë ndaj çdo bashkësie fetare në Kosovë”, përfshirë edhe atë ortodokse.

“Është larg barabartë të gjithave njëjtë. Kisha ortodokse tash nuk mundet me kërku për një status special në shtetin e Kosovës, ku ne e nënshkruajmë atë”.

Megjithatë, Konjufca kishte thënë se “statusin do ta definojmë se i mungon”.

Politikani francez i ekstremit të djathtë, Jean Marie Le Pen, ka vdekur në moshën 96-vjeçare.

Lajmi është bërë i ditur nga familja.

Le Pen i cili kishte qenë në një institucion përkujdesjeje për disa javë.

Ai ishte një mohues i Holokaustit dhe një ekstremist i papenduar për racën, gjininë dhe emigracionin, e po ashtu themeloi partinë e ekstremit të djathtë francez “Fronti Kombëtar” në vitin 1972.

Ai arriti në balotazhin e zgjedhjeve presidenciale kundër Jacques Chirac në vitin 2002.

Rregullorja e Bankës Qendrore të Kosovës që transaksionet financiare të kryhen vetëm në euro, nuk e ka arritur qëllimin e saj, pasi valuta e Serbisë, dinari ende qarkullon në zonat serbe në Kosovë dhe të ardhurat nga buxheti i Serbisë nuk konvertohen në euro, thotë për Radion Evropa e Lirë (REL) profesori i ekonomisë në Universitetin e Prishtinës, Mejdi Bektashi.

“Kjo rregullore ishte një vendim i nxituar. Një vendim politik i kësaj Qeverie”, mendon ai dhe shton se çështja e heqjes së dinarit duhej të zgjidhej nëpërmjet dialogut për normalizimin e marrëdhënieve midis Kosovës dhe Serbisë, i ndërmjetësuar nga Bashkimi Evropian.

Bektashi thekson se edhe pas një viti nga miratimi i rregullores, nuk ekziston një marrëveshje për transferimin e parave që do t’i siguronte Bankës Qendrore të Kosovës qasje në këto fonde, raporton Radio Evropa e Lirë.

Guvernatori i Bankës Qendrore të Kosovës (BQK), Ahmet Ismaili, duke e komentuar këtë rregullore në konferencën vjetore në fund të dhjetorit, tha se ajo ka pasur një “efekt pozitiv” në të gjithë sektorin financiar, duke sjellë “unifikimin e sektorit dhe ndërprerjen e financimeve të paligjshme”.

Rregullorja, e cila ndalon pagesat me valuta të tjera pos euros – rrjedhimisht edhe me dinarë – u miratua në fund të dhjetorit 2023 dhe hyri në fuqi më 1 shkurt 2024.

Pjesëtarët e komunitetit serb, të cilët marrin të ardhura të ndryshme nga buxheti i Serbisë në dinarë, reaguan ashpër ndaj kësaj rregulloreje, ndërsa ajo u kritikua edhe nga komuniteti ndërkombëtar me arsyetimin se mund të ketë pasoja negative për komunitetet pakicë.

Profesor Bektashi thotë se e vetmja gjë që ka ndryshuar gjatë këtij viti është se qytetarët e Kosovës nga komuniteti serb duhet të shkojnë në Serbi për t’i marrë të ardhurat e tyre në dinarë.

“Periudha e tranzicionit duhej të kishte një kuptim, që Banka Qendrore e Kosovës dhe Banka Popullore e Serbisë të arrinin një marrëveshje për konvertimin e dinarit në euro dhe të sigurohej qarkullimi i parave për pensionistët dhe të tjerët që marrin të ardhura në dinarë”, konsideron Bektashi.

Banka Popullore e Serbisë ka insistuar që çështja e dinarit të diskutohet në kuadër të dialogut, gjë që Kosova përgjithësisht e ka refuzuar, duke argumentuar se kjo është çështje e brendshme.

Cila është gjendja reale në terren?
Petar nga Mitrovica e Veriut është punëtor i një prej institucioneve të mbyllura, që funksiononin sipas sistemit serb, të cilat Kosova i ka mbyllur me arsyetimin se “funksiononin në mënyrë të paligjshme”.

Në një bisedë për Radion Evropa e Lirë, Petari thotë se aktualisht nuk shkon në punë, porse pagën e merr rregullisht.

“Paga më transferohet në një llogari që është në dinarë. Ndoshta edhe kjo duhej të zgjidhej, që paga të konvertohej disi dhe ta merrnim normalisht në euro në Kosovë, përmes bankave si NLB Banka ose Raiffeisen Banka, që ndodhen në qytetin tonë”, thotë ky qytetar.

Ai vëren se “asnjëra palë nuk dëshiron t’i kushtojë vëmendje popullit që po kalon nëpër vështirësi”.

Banka Qendrore e Kosovës ka pohuar se heqja e transaksioneve financiare në dinarë nuk e ndalon pagesën e të ardhurave nga buxheti i Serbisë, por ato duhet të jenë ekskluzivisht në euro, për të mundësuar qasjen në rrjedhën e parasë.

Megjithatë, deri më sot, këto të ardhura kanë mbetur në dinarë. Gjithashtu, në disa zona serbe – kryesisht në komunat në veri – dinari vazhdon të qarkullojë si mjet pagese në objektet tregtare.

Beogradi zyrtar refuzon t’i mbyllë institucionet e veta në Kosovë, dhe disa prej tyre janë transferuar në vendet kufitare në Serbi. Aty janë vendosur edhe bankomatë, prej nga qytetarët e Kosovës tërheqin të ardhurat e tyre në dinarë.

Radomiri nga Leposaviqi thotë se tani, “si zakonisht”, i tërheq të ardhurat e tij në dinarë në Rashkë, një qytet kufitar në Serbi, rreth 30 kilometra larg kësaj komune me shumicë serbe në veri të Kosovës.

“Zakonisht shkojmë atje (në Rashkë) dhe blejmë edhe produkte serbe që këtu (në Kosovë) ishin të ndaluara për një periudhë. Jemi mësuar të paguajmë edhe me kartelë… në përgjithësi, nuk është shumë e thjeshtë, por po përshtatemi”, thotë ai.

Ai vë në dukje se në pikat kufitare krijohen radhë të gjata gjatë kohës kur bëhen pagesat nga buxheti i Serbisë, dhe shpesh ndodh të presin për disa orë për të kaluar nga Kosova në Serbi ose anasjelltas.

“Duhet të armatosesh me durim, sepse krijohen turma të mëdha kur bëhet pagesa e pensioneve ose ndonjë e ardhur tjetër. Në familje kam dy pensionistë (prindërit), i kam çuar në Rashkë, por tani kam marrë një autorizim dhe ua tërheq pensionet vetë”, tregon Radomiri.

Miloradi nga Graçanica, një komunë me shumicë serbe pranë Prishtinës, deri në heqjen e dinarit e merrte pensionin me çek, pra paratë i jepeshin në sportelin e Postës që funksiononte në sistemin serb ose i dërgoheshin në adresën e shtëpisë nga postieri.

Ai shpjegon se në muajt e parë pas ndalimit të përdorimit të dinarit, shkonte çdo muaj në Serbi për ta tërhequr pensionin, por më pas ka hapur një llogari në bankën e Kursimores së Postës serbe , ku i transferohen paratë.

Tani, siç thotë, kartën bankare ua jep fëmijëve të tij, të cilët e tërheqin pensionin e tij në Serbi.

Çdo vit Serbia ndan miliona euro për pagesën e të ardhurave për serbët në Kosovë.

Përveç pagave dhe pensioneve, aty përfshihen edhe ndihmat financiare si asistenca sociale, shtesat për fëmijë dhe të ngjashme.

Në fund të tetorit të vitit 2024, Qeveria e Serbisë shpalli territorin e Kosovës si “zonë të mbrojtjes së veçantë sociale”, gjë që parashikon ndihmë shtesë financiare për të papunët, pensionistët dhe fëmijët./REL