Tag: Ballina

Në çështjen gjyqësore ndaj ish-krerëve të Ushtrisë Çlirimtare të Kosovës (UÇK), Hashim Thaçi, Kadri Veseli, Rexhep Selimi dhe Jakup Krasniqi, është marrë vendim që deklaratat e dy dëshmitarëve të pranohen me shkrim, ndërsa mbrojtja do ta ketë mundësinë që t’i marrë në pyetje.

Kështu bëri të ditur Angela Griep, zëdhënëse e Dhomave të Specializuara të Kosovës (DhSK) në Hagë, të enjten gjatë konferencës javore, ku ndër tjerash tregoi edhe për zhvillimet që e kanë karakterizuar Gjykatën gjatë pushimit, raporton “Betimi për Drejtësi“.

“Në të njëjtën çështje gjyqësore, më 20 dhjetor dhe më 6 janar, trupi gjykues vendosi mbi një kërkesë të Prokurorisë për të pranuar si prova dëshmitë me shkrim të dy dëshmitarëve dhe provat materiale shoqëruese, ndërsa dëshmitarët duhet të jenë në dispozicion për t’u marrë në pyetje nga pala kundërshtare. Krahas kësaj, trupi gjykues miratoi një kërkesë të Prokurorisë për të lejuar një dëshmitar të japë dëshmi nëpërmjet video-konferencës”, tha Griep.

Për të njëjtin rast, Griep ripërsëriti që më 18 dhjetor 2024 është miratuar një kërkesë e mbrojtësit të viktimave që një person i afërm i një viktime që tashmë ka ndërruar jetë, të marrë pjesë në emër të saj në procesin gjyqësor.

Ndërsa në rastin Hashim Thaçi, Bashkim Smakaj, Fadil Fazliu, Isni Kilaj dhe Hajredin Kuçi, që ka të bëjë me pretendimet për ndikim në dëshmitarë, Griep tha se Thaçi është deklaruar i pafajshëm.

“Në të njëjtën çështje gjyqësore, më 20 dhjetor, gjykatësja e procedurës paraprake lëshoi vendimin kornizë mbi nxjerrjen e provave dhe çështje të lidhura me të. Ky vendim përcakton kalendarin për procesin e nxjerrjes së provave, gjatë të cilit Prokuroria duhet t’i japë mbrojtjes provat që synon të përdorë gjatë gjykimit, si dhe vendos mbi aspekte të tjera lidhur me përgatitjen e shpejtë të çështjes gjyqësore për gjykim”, tha tutje Griep.

Zëdhënësja tregoi se është bërë publik më 24 dhjetor vendimi i Kushtetueses mbi kërkesën e Thaçit me pretendime për shkelje të të drejtave të tij themelore, për shkak të masave hetimore të posaçme të urdhëruara nga gjykatësi i procedurës paraprake për atë gjatë paraburgimit të tij në 2023-ën.

Zëdhënësja e DhSK-së, tha se në çështjen gjyqësore ndaj Sabit Januzit, Haxhi Shalës dhe Ismet Bahtijarit, më 20 dhjetor 2024, trupi gjykues lëshoi vendimin mbi klasifikimin e disa parashtrimeve dhe urdhëroi ekipet e mbrojtjes të përgatitnin versionet e redaktuara publike të disa parashtrimeve.

“Ndërsa ajo tregoi se më 23 dhjetor 2024, u bë publik versioni i redaktuar i urdhrit për zhdëmtim kundër Pjetër Shalës, me anë të cilit ai u obligua që të paguajë shumën prej 208 mijë eurove.

“Trupi gjykues ftoi kryetaren e DHSK-së të caktojë një gjykatës të vetëm përgjegjës për monitorimin dhe mbikëqyrjen e vënies në jetë dhe zbatimit të urdhrit për zhdëmtim. Megjithëse, trupi gjykues rikujtoi se përgjegjësinë për pagesën e kompensimit për viktimat e mban ekskluzivisht zoti Shala, ai theksoi se aktualisht zoti Shala nuk duket se zotëron mjetet financiare për përmbushjen e urdhrit. Rrjedhimisht, trupi gjykues diskutoi mundësinë e përfshirjes së aktorëve të tjerë në zbatimin e urdhrit për zhdëmtim. Ndër to, ishin programi aktual për kompensimin e viktimave të krimeve në Kosovë si dhe mundësia që donatorë të kontribuojnë me donacione të paspecifikuara për Dhomat e Specializuara”, tha ajo.

Ajo shtoi se yrupi gjykues ka ftuar Kosovën që të miratojë ligjet e nevojshme dhe të krijojë mekanizëm zhdëmtues për kompensimin e viktimave të krimeve që përfshihen në juridiksionin e DhSK-së. Tha se të hënën rifillojnë seancat në gjykimin ndaj ish-krerëve të UÇK-së.

Ndryshe, Dhomat e Specializuara të Kosovës në Hagë, çdo të enjte, në orën 14:30, përmes platformës online “Zoom” mbajnë informim javor ku ofrojnë informacione të përditësuara mbi zhvillimet e fundit lidhur me procedurat gjyqësore dhe veprimtaritë në këtë gjykatë.

Gjykata e Apelit ka vërtetuar vendimin e Gjykatës Themelore të Prishtinës e cila kishte konfirmuar aktakuzën e Prokurorisë Themelore në Prishtinë ndaj ministrit të Punëve të Brendshme, Xhelal Sveçla, dy deputetëve të Vetëvendosjes, Salih Zyba dhe Fitore Pacolli-Dalipi, si dhe deputetes së Lidhjes Demokratike të Kosovës (LDK), Drita Millaku, të cilët akuzohen për hedhjen e gazit lotsjellës në Kuvendin e Kosovës në mars të 2018-ës.

“Refuzohen si të pabazuara ankesat e mbrojtësve të të pandehurve Xh.S, avokat Laur Prenaj, F.P, avokat Lavdrim Salihu, D.M, avokat Labinot Buzuku dhe S.Z, avokat Laura Pnishi, ndërsa aktvendimi i Gjykatës Themelore në Prishtinë, Departamenti i Përgjithshëm, …, i datës 06.06.2024,vërtetohet”, thuhet në vendimin e Apelit, të përpiluar më 13 dhjetor 2024, raporton “Betimi për Drejtësi”.

Ndaj vendimit të Themelores, ankesë kishin ushtruar mbrojtësit e të akuzuarve të lartcekur.

Mbrojtësi i Sveçlës, avokati Prenaj i ka propozuar Gjykatës së Apelit që ankesa të aprovohet dhe akuza të hudhet poshtë, me arsyetimin se vepra për të cilën akuzohet Sveçla nuk përbën vepër penale dhe nuk ka prova të mjaftueshme që mbështesin arsyetimin e bazuar mirë.

Gjithashtu, mbrojtësi i të akuzuarës Pacolli-Dalipi, avokati i Salihu i ka propozuar Apelit që ankesa e tij të aprovohet dhe aktakuza të hudhet poshtë ndaj të mbrojturës të tij, me arsyetimin se është e pabazuar në ligj e prova.

Edhe mbrojtësi i Millakut, avokati Buzuku ka propozuar që ankesa të aprovohet dhe aktakuza të hudhet poshtë si të pabazuar.

Dhe krejt në fund, mbrojtësja e Zybës, avokatja Pnishi i ka propozuar Apelit që ta aprovojë ankesën dhe aktvendimin e Gjykatës Themelore në Prishtinë ta anulojë.

Mbi këto pretendime të avokatëve, Prokuroria e Apelit ka dorëzuar parashtresë përmes të cilës i ka propozuar Gjykatës së Apelit që të gjitha ankesat e avokatëve të refuzohen ndërsa vendimi i Gjykatës Themelore në Prishtinë të vërtetohet.

Mirëpo, sipas Apelit, vendimi i Themelores përmes të cilit është konfirmuar aktakuza e Prokurorisë është i qartë dhe konkret.

Sipas Apelit, në këtë fazë të procedurës aktakuza e ngritur përmban të gjitha elementet e kërkuara sipas ligjit dhe se nuk ka vend për hudhje të aktakuzës, si dhe nuk përjashtohet përgjegjësia penale e të akuzuarve.

Gjithashtu, në vendim thuhet se nuk ekzistojnë rrethana të tjera që pengojnë ndjekjen penale dhe se ka prova të bazuara mirë se të akuzuarit kanë kryer veprën penale për çka edhe po akuzohen.

“…nuk ka vend për hedhje të aktakuzës, ngase vepra penale për të cilën po akuzohen të pandehurit paraqet vepër penale, nuk ekzistojnë rrethana që përjashtojnë përgjegjësinë penale, nuk ka arrit afati i parashkrimit, nuk ka rrethana të tjera që pengojnë ndjekjen penale dhe ka prova të mjaftueshme për një dyshim të bazuar mirë se të pandehurit kanë kryer veprën penale për të cilën akuzohen…”, thuhet në vendimin e Apelit.

Pretendimet e mbrojtësve të të akuzuarve se nuk ka prova të mjaftueshme që mbështesin dyshimin e bazuar mirë, sipas Apelit, nuk qëndrojnë pasi që këto pretendime do të vlerësohen dhe vërtetohen gjatë shqyrtimit gjyqësor.

Gjithashtu, lidhur me pretendimet që provat materiale që gjenden në aktakuzë nuk kanë lidhshmëri me mes veprimeve të të akuzuarve, sipas Apelit, në këtë fazë nuk do të shqyrtohen pasi që tash në këtë fazë shqyrtohet vetëm ligjshmëria e nxjerrjes së provave dhe ngritjes së aktakuzës.

Pas konfirmimit të aktakuzës, Gjykata Themelore në Prishtinë pritet të caktojë seancën e shqyrtimit gjyqësor.

Ndryshe në seancën fillestare të mbajtur më 26 mars 2024, ministri Sveçla dhe tre deputetët Millaku, Zyba dhe Pacolli-Dalipi ishin deklaruar të pafajshëm për hedhjen e gazit lotsjellës në Kuvend.

Ministri Sveçla dhe tre deputetët Millaku, Zyba dhe Pacolli-Dalipi akuzoheshin edhe për veprën penale “Pengim i personit zyrtar në kryerjen e detyrave zyrtare”, por për këtë vepër në seancën fillestare gjykatësi i rastit Sabit Sadikaj, kishte njoftuar se ka arritur parashkrimi absolut i ndjekjes penale.

“Betimi për Drejtësi”, në tetor të vitit 2021 kishte raportuar ekskluzivisht për aktakuzën e ngritur ndaj ministrit Sveçla dhe deputetëve Millaku, Zyba dhe Pacolli-Dalipi.

Sipas aktakuzës së siguruar nga “Betimi për Drejtësi”, e cila rezulton të jetë ngritur më 29 korrik 2019, Sveçla, Millaku, Zyba dhe Pacolli-Dalipi po akuzohen se më 21 mars 2018, rreth orës 12:10 e deri në orën 15:40, kanë ndezur disa bombola të gazit lotsjellës, të cilat i kishin hedhur brenda sallës së Kuvendit të Kosovës, ku po mbahej seanca plenare.

Aty thuhet se si rrjedhojë e kësaj, të gjithë deputetët ishin detyruar ta lironin sallën e Kuvendit, me ç’rast kanë pamundësuar vazhdimin e seancës.

Me këtë, secili veç e veç akuzohen se kanë kryer veprën penale “Përdorimi i armës apo mjetit të rrezikshëm” nga neni 375, paragrafi 1 të Kodit Penal, kryerësi i së cilës dënohet me burgim prej një deri në tetë vjet.

Kurse, sipas dispozitivit të dytë, thuhet se secili veç e veç kanë kryer veprën penale “Pengimi i personit zyrtar në kryerjen e detyrave zyrtare” nga neni 409, paragrafi 1 të Kodit Penal, pasi kanë penguar deputetët e Kuvendit të Kosovës ne kryerjen e detyrave zyrtare. Kryerësi i kësaj vepre dënohet me burgim prej tre muaj deri në tre vjet.

Presidenti Joe Biden miratoi të mërkurën një deklaratë federale të emergjencës për zjarret e Kalifornisë, që do të mundësojë fonde dhe burime për të luftuar flakët. Presidenti paralajmëroi se rimëkëmbja e zonës do të marrë kohë.

Departamenti i Zjarrfikësve të Qarkut të Los Anxhelosit u përball me katër zjarre me rrezikshmëri për jetën, që kanë vrarë të paktën dy persona, kanë djegur mbi 1000 ndërtesa dhe kanë detyruar dhjetëra mijëra njerëz të evakuohen.

“Departamenti i Zjarrfikësve të Qarkut Los Anxhelos ishte përgatitur për një ose dy zjarre të mëdha pyjesh, por jo katër, veçanërisht duke patur parasysh këto erëra të qëndrueshme dhe lagështinë e ulët”, tha të mërkurën shefi i zjarrfikësve të qarkut Los Anxhelos, Anthony C. Marrone.

Ai tha se mbi 2000 hektarë janë djegur dhe zjarri po vazhdon të përhapet.

“Nuk kemi asnjë përqindje kontrolli”, tha zoti Marrone.

Zyrtarët kanë paralajmëruar banorët që t’i kushtojnë vëmendje urdhrave të evakuimit dhe të largohen kur të udhëzohen.

Dy mijë anëtarë të Gardës Kombëtare janë dislokuar për të ndihmuar zjarrfikësit vendas.

Në Palisadet e Paqësorit, zjarri kalonte nga një shtëpi në tjetrën, i shtyrë nga erërat e forta me fuqi uragani. Në të njëjtën zonë, zjarrfikësit thanë se uji pati shteruar.

“Patëm një kërkesë të jashtëzakonshme për sistemin tonë në Palisades”, tha të mërkurën Janisse Quiñones, drejtuese dhe inxhiniere kryesore në Departamentin e Ujit dhe Energjisë në Los Anxhelos. “E çuam sistemin deri në ekstrem”. Kërkesa për ujë ishte “katër herë mbi nivelin… për 15 orë rresht”, shtoi ajo.

Më vonë të mërkurën, aeroplanët mbështetës që ishin ndalur nga erërat e forta, u ngritën sërish në ajër, duke hedhur ujë dhe lëndë anti-zjarr.

Mbi 400,000 shtëpi dhe biznese janë pa energji në të gjithë Los Anxhelosin, sipas faqes në internet poweroutage.us.

Uashingtoni po mbështet përpjekjet për shuarjen e zjarrit të Kalifornisë me katër avionë të mëdhenj cisternë të Shërbimit Pyjor të Shteteve të Bashkuara dhe u njoftua se është nisur edhe një i pestë shtesë. Qeveria federale po ndihmon edhe me 10 helikopterë përpjekjet për shuarjen e zjarrit. Ndërkohë, dhjetëra zjarrfikëse të Shërbimit Pyjor u vendosën në gatishmëri për t’u dislokuar./VOA/

Kryetari i Sindikatës së Bashkuar të Arsimit, Shkencës dhe Kulturës (SBASHK), Rrahman Jasharaj ka paralajmëruar se kjo sindikatë do të kërkojë të drejtat e mësimdhënësve nga çdo qeveri, madje theksoi se nëse kërkesat nuk përfillen, do të pasojnë greva dhe protesta në arsim.

Jasharaj ka thënë se cilindo subjekt politik që vjen në pushtet, sindikata do ta konsideroj që është vullnet i popullit dhe do të tentoj që të komunikoj dhe të ketë dialog me të.

“Ne do t’i kërkojmë të drejtat tona dhe nëse nuk i realizojnë le ta dijnë se prapë do të ketë greva e protesta nga SBAShK-u, nëse kërkesat tona nuk përfillen nga qeveria që do të vijë nga zgjedhjet e 9 shkurtit”, paralajmëroi ai për EO.

Jasharaj, ka deklaruar se sindikata po ndjek me vëmendje fushatën e zgjedhjeve të 9 shkurtit 2025, duke shtuar se është i gatshëm të bashkëbisedoj me të gjitha partitë garuese.

Ai ka potencuar se ka premtime për rritje pagash dhe një qasje më pozitive ndaj sindikatave.

Sipas tij, vitet e fundit nën qeverisjen e Kurtit kanë qenë të vështira për sindikatat, pasi ka munguar dialogu dhe bashkëpunimi.

“Ne jemi duke përcjellë me vëmendje para fushatën dhe do ta përcjellim edhe fushatën për të parë se çfarë po thonë, sidomos kandidatët për kryeministër, deklarimet e para të kandidatit të LDK-së, PDK-së dhe AAK-së, premtimet janë të mëdha urojmë të jenë ashtu. E kam fjalën edhe te vlera e koeficientit 150 që do të ndikojë në rritjen e pagave. Ata kanë premtuar që do të kenë qasje ndryshe ndaj sindikatave dhe besoj që deklarimet e tyre do t’i mbajnë dhe do të kemi një frymë tjetër karshi situatës që kemi. Këto katër vitet e qeverisë Kurti i kemi pasur vite të vështira sepse ka ndikuar dialogu. Ai bashkë me kabinetin e tij ka pasur një qasje tejet të gabuar ndaj sindikatave duke mos përfillë as kërkesën për takime as dialogun. Jemi ndër shtetet e rralla që Këshilli Ekonomik Social është barakaduar dhe bllokuar me fajin e ministrit Murati. Mbrapa kësaj nuk ka mbetur as ministrja Nagavci që nga greva e vitit 2022 nuk ka gjetur asnjë ditë kohë të ulemi dhe të bisedojmë jo vetëm me ne, por edhe me Këshillin e Prindërve”, ka thënë Jasharaj.

Jasharaj thekson se të gjithë mësimdhënësit nuk janë të përgatitur për t’u avancuar, por sipas tij janë të përgatitur që ta mbajnë orën ashtu siç është.

 “Ne gjërat që ndodhin në arsim i mësojmë nga mediat, por nuk jemi të kyçur në asnjë aktivitet që zhvillon MAShTI dhe në rastin e fundit është edhe procesi i avancimit, i cili është mbajtur jashtë çdo transparence dhe mësimdhënësit nuk e ka ditur se çka po i pret. Nuk është mirë që t’i jepet kahja tjetër. Është normale që të gjithë mësimdhënësit nuk janë të përgatitur për tu avancuar, por janë të përgatitur ta mbajnë orën ashtu siç është”, ka deklaruar Jasharaj.

Ai beson se opozita ka mësuar nga gabimet e kaluara dhe do të ketë një qasje ndryshe nëse vjen në pushtet.

“Presim që do të jetë një fushatë tepër e ngjeshur, presim se çka po na thonë të gjitha palët, nëse na thërrasin për t’u takuar ne do të takohemi dhe do të bisedojmë me ta. Besoj që opozita ka mësuar nga e kaluara dhe nëse vjen në pushtet nuk do t’i bëjë gabimet që i ka bërë dikur, besoj që kjo Qeveri që është tani do ta ndryshoj qasjen jo vetëm ndaj nesh, por edhe ndaj gjykatave, mediave. Ngase qëndrimi i Kurtit ka qenë armiqësor ndaj sindikatave e veçmas ndaj neve që së bashku me Muratin kanë dashur ta shuajnë në tërësi duke e shpikur EKosova”, ka theksuar ai.

Sa i përket Qeverisë aktuale, Jasharaj ka kritikuar qëndrimin armiqësor të Kurtit dhe Muratit ndaj sindikatave, duke pohuar se ata kanë tentuar t’i shuhen ato dhe të kontrollojnë punëtorët.

“Ne kemi menduar që Vetëvendosja do të jetë ajo ngase programi i saj ka qenë shumë social, para zgjedhjeve dhe ardhjes në pushtet, Kurti na ka premtuar mrekullira dhe asnjë nga këto nuk e ka bërë, dhe zhgënjimi ynë nuk është vetëm pse nuk i kanë mbajtur premtimet, por zgjerimi ynë është pse kjo qasje tmerrësisht e gabuar ndaj nesh dhe mundohen të na nxjerrin te publiku si armiqtë e tyre. Gjegjësisht ata janë armiqtë e sindikatave, sepse kanë dashur t’i shuajnë sindikatat, dhe të bëjnë çfarë të duan me punëtorët”, potencoi ai.

Ai gjithashtu ka shprehur zhgënjim për premtimet e pa përmbushura të Vetëvendosjes, veçanërisht për programin social dhe premtimet për sindikatat.

“E keqja është sepse edhe të drejtat që i kemi pasur të fituara Qeveria Kurti gradualisht na ka mohuar, tri premtimeve që kanë qenë jashtëzakonisht të mëdha ka kaluar në ndëshkime të mëdha. Edhe nxitja e armatës së tyre në Facebook që të na shajnë dhe të na fyejnë, në tërë sistemin arsimor dhe të tjerët që kanë ngritur zërin. Qeveria Kurti uroi që mos të vijë më si e tillë në Kosovë, uroj që të vijë koalicion partisë sepse kur ka koalicion asnjëri nuk e ndjen që është më i madh i këtij vendi por bashkëpunojë”, shtoi Jasharaj.

Ministri i Shëndetësisë, Arben Vitia, në një konferencë ka bërë të ditur se deri tani në Kosovë nuk është paraqitur asnjë rast me virusin HMPV.

Ai ka theksuar se janë marrë të gjitha masat në rast nevoje për të përballuar çdo situatë rreth këtij virusi.

Vitia ka thënë se nuk duhet të ketë panik te qytetarët për këtë sëmundje

“Nuk kemi akoma rast me HMPV. Nga IKSHPK-ja janë në kontakte të vazhdueshme me të gjitha mekanizmat më adekuat që ekzistojnë për këtë problem dhe jemi në kontakt me OBSH dhe çdo institucion tjetër. Në momentin e parë që paraqitet një rast menjëherë merren masat me rekomandimet e IKSHPK-së. Asnjë lloj panike nuk ka për qytetarët. IKSHPK dhe SHSKUK veç kanë filluar masat dhe përgatitjet. Nëse do të kishte arsye për panik, ne do të kishim dalë me informata , nuk ka asnjë arsye për të pasur panik për këtë”, ka thënë ai.

Metapneumovirusi (HMPV) i njohur për mjekët, ka shkaktuar një pandemi në Kinë prej disa javësh. Rasti në fjalë u identifikua tek 71-vjeçari, i cili ka pasur një lidhje me vajzën e tij, e cila udhëtoi drejt Kinës gjatë festave të fundvitit.

Pas kthimit, babai i saj filloi të shfaqë simptomat e para të sëmundjes. Ai e vizitoi fillimisht një klinikë private dhe më pas, më 3 janar, u shtrua në spitalin Papanikolaou, që ka një nga klinikat më të avancuara të mushkërive.

Pas një testi PCR të kryer të shtunën, të hënën u konfirmua se ai ishte pozitiv ndaj virusit HMPV.

Policia e Kosovës në rajonin e veriut është duke realizuar një aksion në objektin e strukturave paralele serbe.

Sipas mediave lokale mësohet se aksioni po realizohet në objektin që operon si Administratë Tatimore e të ardhurave të Serbisë.

Këtë e ka konfirmuar edhe zëvendësdrejtori i Policisë për Rajonin e Veriut, Veton Elshani.

Ai ka thënë se kanë gjetur prova që vërtetojnë dyshimet e tyre për operim ilegal të kësaj zyre dhe se e kanë mbyllur.

Elshani ka bërë me dije se nuk ka ndonjë person të arrestuar.

“Rreth orës 09:00 kemi hy në këtë ndërtesë e cila sipas informacioneve tona ka funksioni si zyrë tatimore, si degë e Ministrisë së Financave të Serbisë. Në këtë vend kemi hasë në prova që e vërtetojnë dyshimin tonë dhe pas konsultimit me Prokuror, njerëzit që janë hasë aty janë larguar dhe ajo ndërtesë është mbyllë deri në verifikim të plotë të fakteve”, ka thanë Elshani.

Nën llupën e Ministrisë së Industrisë, Ndërmarrësisë dhe Tregtisë janë naftëtarët, prodhuesit e produkteve të ndërtimit dhe disa sektorë të tjerë në vend.

Rozeta Hajdari, ministre e MINT-it, thotë se një nga detyrat kryesore të kësaj ministrie është mbrojtja e konsumatorëve nga abuzimet me çmimet dhe cilësinë e produkteve, duke siguruar një mbikëqyrje strikte, si dhe duke ndërmarrë masa për të parandaluar manipulimin e çmimeve që mund të shkaktojnë dëm për qytetarët.

Në një intervistë për KosovaPress, Rozeta Hajdari flet edhe për raportet tregtare në vendin tonë, si dhe për investimet e huaja direkte gjatë vitit 2024.

Ajo madje thotë se ka përmirësim të bilancit tregtar eksport-import.

“Kemi dyfshim të eksportit dhe përmirësim të bilancit tregtar nga raporti eksport-import nga një me nëntë – një me gjashtë. Kemi dyfishim të investimeve të huaja direkte gjatë këtij mandati”, thotë Hajdari.

Sa i përket monitorimit të tregut, ministrja Hajdari thotë se ndërhyrjet më të mëdha kanë qenë në tregun e naftës, për çka shton se afër 50 për qind e operatoreve ekonomik kanë qenë të palicencuar në tregun e naftës.

“Për herë të parë në Republikën e Kosovës kemi filluar me mbikëqyrjen efektive të produkteve të ndërtimit me qëllim që të sigurojmë cilësinë e ndërtimeve të larta banesore, rregullimin, mbikëqyrjen e tregut, të produkteve të naftës, formalizmin e bizneseve në fushën e tregtisë në naftë, rritjen e kontrollimit të cilësisë së naftës dhe mbrojtjen e konsumatorëve nga abuzimet me çmimet me inflacion. Janë afër 12 mijë inspektime gjatë mandatit tonë qeverisës nga periudha mars 2021 – shtator 2024 në krahasim me periudhën paraprake që ishte në vitin 2017-2020. Kryesisht ndërhyrjet më të larta kanë qenë në tregun e naftës, ku kemi gjetur shumë operator ekonomik të pa licensuar, afër 50 për qind të operatoreve ekonomik kanë qenë të palicensuar në tregun e naftës”, shton Hajdari.

Derisa përmend sektorët për të ndaluar keqpërdorimet në treg, ajo thotë se me politiken e re për investime synojnë që të sjellin një inkurajim të prodhueseve serioz.

“Kemi ndaluar keqpërdorimet në sektorin e naftës, duhanit, pastaj trupat vlerësues të komfirmitetit që kanë qenë të jashtëligjshëm, tenderët e jashtëligjshëm, skemat e granteve të jashtëligjshme. Menjëherë filluam në plotësimin e zbrazëtirave, përmirësimin e ambientit për të bërit biznes të drejtë, të adaptueshëm dhe konkurrues, duke hartuar dhe miratuar në Qeveri dhe Kuvend 22 ligje që janë për mbrojtjen e investimeve për reformë në parqet industriale teknologjike…Me politikën e re për investime ne po synojmë që të sjellim një inkurajim të prodhueseve vendor, të qytetarëve që kanë kursime për të investuar në industrinë prodhuese, përpunuese, por edhe në sektorë tjerë strategjikë”, nënvizon Hajdari.

Ministrja Hajdari thotë se do t’i zgjerojë skemat mbështetëse për bizneset gjatë vitit 2025.

Derisa tregon për masat mbështetëse për bizneset, thotë se vetëm skema e granteve për këtë vit përfshin rreth 8 milionë euro.

“Sa i përket masave mbështetëse për bizneset tona për vitin 2025, ne synim kemi që të zgjerojmë skemat mbështetëse…Presim me këto masat e reja që janë të planifikuara të përkrahim sa më shumë bizneset në zgjerim të kapaciteteve prodhuese, në lehtësim të eksportit qoftë edhe përmes masave, granteve, por edhe përmes marrëveshjeve të tregtisë. Pastaj, përmes lidhjes sa më shumë të ofrueseve të shërbimeve me prodhuesit vendor që të rrisin dhe përmirësojnë inovacionin në produktin me vlerë të lartë të shtuar për tregun vendor dhe ndërkombëtar, por edhe në lehtësimin e tregtisë…Vetëm skema e granteve për vitin 2025 përfshin rreth 8 milionë euro nga Agjencia KIESA, por janë edhe masat tjera qeveritare”, deklaron Hajdari.

Përgjatë vitit 2024, KIESA ka mbështetur rreth 500 biznese në vlerë prej 7.3 milionë euro./kp