Tag: Ballina

Zjarrfikësit po bëjnë përpjekje t’i frenojnë zjarret në Los Angeles, që vazhdojnë të shkrumbojnë zona për të shtatën ditë me radhë.

Autoritetet evidentuan së paku 24 njerëz të vdekur si pasojë e zjarreve, ndërsa 16 të tjerë janë të zhdukur.

Guvernatori i Kalifornisë, Gavin Newsom, tha se kjo mund të jetë fatkeqësia më e madhe natyrore në historinë e SHBA-së, pasi ka shkatërruar mijëra shtëpi dhe ka detyruar mbi 100.000 njerëz të evakuohen.

Sipas zyrtarëve, mbi 12.300 struktura janë dëmtuar ose shkatërruar.

Situatën pritet ta përkeqësojnë edhe erërat me shpejtësi 80 deri në 112 kilometra në orë, të cilat, sipas Shërbimit Kombëtar të Motit, nisën të dielën mbrëma dhe do të zgjasin deri të mërkurën.

Zyrtarët paralajmëruan të gjithë popullsinë e Qarkut, prej afro 10 milionë banorësh – se mund të urdhërohet të evakuohet nga flakët dhe tymi toksik.

Ferid Agani nga Partia e Drejtësisë, në emisionin CONTEXT në ATV, tha se zhvillimi i turizmit shëndetësor është një mundësi e jashtëzakonshme për Kosovën, duke veçuar sektorin e stomatologjisë dhe mjekësinë e specializuar.

Agani tha se sektori i stomatologjisë në Kosovë është dëshmuar prej më shumë se dy dekadash dhe se i njëjti model mund të aplikohet në sektorët tjerë të mjekësisë.

“Stomatologët tanë kanë funksionuar në mënyrë perfekte për më shumë se dy dekada. Tani duhet të bëjmë të njëjtën gjë edhe me mjekët e profileve të tjera”, tha Agani.

Ai shtoi se turizmi shëndetësor mund të ndihmojë edhe në kthimin e mjekëve që kanë përfunduar specializimet jashtë vendit dhe të parandalojë largimin e të rinjve.

“Zhvillimi i turizmit shëndetësor do t’i motivojë specialistët tanë të kthehen dhe të punojnë në vend. Për më tepër, do të ofrojë shërbime të cilësisë së lartë për pacientët nga jashtë”, deklaroi Agani.

Deklaratën e plotë të Ferid Aganin në CONTEXT e gjeni në videon më poshtë:

Eman Rrahmani nga Lista për Familjen, në emisionin CONTEXT në ATV, foli për programin “Familja në qendër”, duke theksuar rëndësinë e tij për përmirësimin e natalitetit në vend dhe mbrojtjen e vlerave familjare.

Rrahmani tha se programi synon të adresojë qasjet destruktive që kanë ndikuar negativisht në natalitetin dhe mbështetjen për familjen.

“Nataliteti apo lindshmëria e një çifti është 1.51 lindje, që është edhe më i ulët sesa në Serbi. Kjo është një situatë që askush nuk e kishte paramenduar para disa vitesh”, tha Rrahmani.

Ai kritikoi politikat e mëparshme që, sipas tij, kanë rënduar familjet, duke përfshirë ligjet për martesat e të njëjtit seks dhe praktikat si surrogatësia.

“Pushtetet e kaluara kanë provuar të sjellin ligje dhe angazhime që e dëmtojnë edhe më shumë çështjen e natalitetit, duke filluar prej ligjit për martesa mes burrit me burrë apo gruas me grua,” shtoi ai.

Investimet, puna, arsimi… Këto pak fjalë mund të dëgjoheshin nga tri gra që ecnin në një shesh të zhurmshëm të Prishtinës, këtë fillim-janar.

Me t’iu afruar mikrofonin e Radios Evropa e Lirë, ato nuk hezituan të tregonin se po flisnin për zgjedhjet e 9 shkurtit.

“Një e ardhme më e mirë për vendin”, thanë se është dëshira e përbashkët e tyre.

E kjo, sipas njërës prej tyre, do të mund të arrihej vetëm me ringjalljen e industrisë.

“Të gjitha fabrikat janë mbyllur. Pajisjet në to kanë qenë të vjetruara, por me kohë kanë mundur të modernizohen dhe të krijohen mundësi punësimi për brezat e rinj”, u shpreh Hikmete Xharra, profesoreshë në pension e Gjuhës Angleze.

Kosova, me mbi 2 milionë votues të regjistruar brenda dhe jashtë vendit, mban zgjedhjet parlamentare më 9 shkurt.

Në garë janë mbi 1.200 kandidatë, prej të cilëve do të zgjidhet përbërja e re e Kuvendit, dhe katër kandidatë për kryeministër: Albin Kurti i Vetëvendosjes, aktualisht në pushtet, Bedri Hamza i Partisë Demokratike të Kosovës, Lumir Abdixhiku i Lidhjes Demokratike të Kosovës dhe Ramush Haradinaj i Aleancës për Ardhmërinë e Kosovës.

Fushata e tyre për t’i bindur qytetarët që të votojnë, nisi zyrtarisht më 11 janar.

Për Nazmije Kaçin, kushdo që të fitojë, do të duhej të angazhohej më shumë për tërheqjen e investimeve të huaja në ndërmarrje të ndryshme të Kosovës.

Si inxhiniere e fizikës, ajo tregoi se ka punuar me vite në Minierën e Kishnicës, e cila deri në vitet ’90 ishte një prej motorëve të ekonomisë së Kosovës, por edhe të Jugosllavisë së atëhershme në përgjithësi.

Sot, kjo minierë, e cila gjendet në magjistralen Prishtinë-Gjilan, punon me kapacitete të reduktuara, pikërisht për shkak të pajisjeve të vjetruara dhe mungesës së investimeve.

Nazmija beson se, viteve të fundit, janë krijuar kushte më të mira të sigurisë për investime të huaja.

“Veriu [zonë e banuar me shumicë serbe] është më i sigurt. Investitorët e huaj e kanë më lehtë të investojnë, por nevojitet angazhim i institucioneve”, sipas saj.

Vetë pensioniste, ajo nuk e lë pa përmendur as këtë kategori të shoqërisë, përfitimet mujore të së cilës variojnë – 120 euro janë pensionet e moshës dhe 218 deri në 318 euro janë pensionet për kontrbutpaguesit.

“Pensionet duhet të rriten deri në 500 euro në muaj. Kjo shumë do të siguronte një mirëqenie më të mirë për pensionistët. Shuma që marrim tash, është shumë e vogël”, sipas Nazmijes.

Në bisedë u përfshi edhe shoqja e tyre.

“Kosova nuk ka ende Shtëpi të Operës dhe Baletit”, tha shkurtimisht ajo.

Zgjedhjet e 9 shkurtit janë të parat të rregullta që do të mbahen në Kosovë që nga shpallja e pavarësisë, më 2008.

Kushdo që i fiton ato, sipas Florim Gashit, do të duhej ta kishte prioritet arsimin.

“Arsimi është ai trungu që shpërndan gjithçka”, sipas tij.

Vetë mësimdhënës për më shumë se dy dekada në qytetin e Podujevës, ai ankohet për cilësinë e ulët në arsim, e cila shpesh është përmendur edhe në raporte dhe vlerësime të ndryshme ndërkombëtare.

“Duhet të bëhen reforma dhe në qendër të jetë mësuesi, e jo dikush tjetër… sepse në pozita udhëheqëse po vijnë njerëz politikë dhe jo profesionalë”, u shpreh ai.

Një tjetër çështje me rëndësi, sipas tij, është edhe siguria në çdo anë të Kosovës, përfshirë edhe pjesën veriore të banuar me shumicë serbe, ku shpesh ka trazira.

“Shih sa bukur është në sheshin e Prishtinës. Liria e lëvizjes është e rëndësishme për qytetarët”, u shpreh mësimdhënësi.

Në sheshin ku po shëtiste ai, REL-i takoi edhe Artan Gjimnicën, i cili jeton në Shtetet e Bashkuara, por po vizitonte Kosovën për festat e fundvitit.

Ai tha se është regjistruar për të votuar me postë nga SHBA-ja.

Për Artanin, askush nuk duhet të bëjë premtime boshe, por të sigurojë zhvillim të vërtetë të vendit.

Partia që ka vendosur ta votojë ai, tha se “e ka treguar veten” dhe prej saj tani pret që të bëjë më shumë në luftimin e korrupsionit dhe rritjen e punësimit.

Kosova, me 1.6 milion banorë të regjistruar, ka shkallën e papunësisë në rreth 10 për qind.

Paga mesatare në vend është 570 euro.

Sipas një vlerësimi të Bankës Botërore, rritja ekonomike këtë vit do të jetë më pak se 4 për qind.

Shumë parti politike dhe kandidatë të tyre ka kohë që kanë nisur të bëjnë fushatë, qoftë me vizita në qytete të ndryshme të Kosovës dhe jashtë saj, qoftë me paraqitje të vazhdueshme televizive.

Ata përpiqen të fitojnë besimin e 2.075.868 votuesve të regjistruar, duke premtuar investime në arsim, shëndetësi, ekonomi, infrastrukturë, bujqësi e sport, por edhe rritje të pagave dhe pensioneve.

Qytetarët që biseduan me REL-in, thanë se planifikojnë të votojnë, por nëse pritjet e tyre do të përmbushen, mbetet për t’u parë.

Premtime të ngjashme, ata kanë dëgjuar edhe më herët… /REL/

Ndihmës Sekretari i Departamentit Amerikan të Shtetit për Evropën dhe Euroazinë, James O’Brien, ka folur rreth dialogut strategjik mes ShBA-së dhe Serbisë.

O’Brien në një intervistë për RTS-në, ka thënë se çështja e Kosovës është një nga më të ndjeshmet, pasi që Shtetet e Bashkuara dhe Serbia nuk pajtohen rreth kësaj teme.

“Dialogu strategjik SHBA-Serbi është një mundësi për dy qeveritë tona për të bashkëpunuar në programe që do të jenë të përhershme. Është një shenjë e pjekurisë së marrëdhënieve tona. Presidenti Vuçiq theksoi temat e tij të rëndësishme, janë gjashtë apo shtatë tema në atë listë dhe kjo do të krijojë një mënyrë në të cilën ne mund të bashkëpunojmë në afat të gjatë”, tha ai transmeton Klankosova.tv

Ai tha se tani ekziston një mundësi për të propozuar një vizion se si mund të jetojnë serbët në Kosovë.

“Qëndrimi ynë është se ekziston një mundësi për të propozuar një vizion se si serbët mund të jetojnë brenda Kosovës si komunitet, por edhe si qytetarë të plotë të Kosovës. Dialogu strategjik është një mundësi për t’u siguruar se ka shumë mirëkuptim të qëndrimeve të të gjitha palëve. Vendimet do të jenë në dorën e popullit të Serbisë dhe ata do të duhet të vendosin nëse janë të gatshëm të ndërmarrin hapat që pret Evropa, pra njohjen e kufijve. Mendoj se ky dialog do të jetë një nga mjetet me të cilat do të mund të shmangim keqkuptimet”, tha O’Brien.

Diplomati amerikan theksoi se shpesh krijohej përshtypja se puna e qeverisë nuk ishte efektive, por se ishte e nevojshme të vazhdonin bisedimet për të parë se cilat ishin problemet reale, transmeton Klankosova.tv

Ndihmës Sekretari i Departamentit Amerikan të Shtetit për Evropën dhe Euroazinë, ndër të tjera foli edhe për ndryshimin e administratës atje, pas mbarimit të mandatit të presidentit Joe Biden dhe ardhjes së Donald Trumpit, në krye të Shtëpisë së Bardhë.

James O’Brien, tha se Shtetet e Bashkuara të Amerikës do t’i kushtojnë vëmendje nevojave të Kosovës që të ketë sukses në aspiratat e saj, por edhe faktit që serbët në ato zona të jetojnë mirë dhe me cilësi, siç është rasti me komunitetet nëpër Evropë që jetojnë në vende ku nuk kanë lindur.

“Nëse flasim, mund t’i zgjidhim të gjitha problemet”, tha ai.

Hashim Thaçi, Kadri Veseli, Rexhep Selimi dhe Jakup Krasniqi, në rastin “Thaçi dhe të tjerët”, do të dalin përpara trupit gjykues të hënën, pasi Gjykata Speciale ishte në pushim dimëror për tri javë.

Seancat do të rikthehen në orarin e tyre të rregullt, nga e hëna në të enjten, me fillim nga ora 09:00.

Ndërkohë, Dhomat e Specializuara të Kosovës kanë vendosur të pranojnë me shkrim dëshmitë e dy dëshmitarëve.

Ky vendim është marrë më 6 janar, ndërsa mbrojtja do të ketë mundësinë t’i marrë në pyetje dëshmitarët përkatës. Angela Griep, zëdhënëse e Dhomave të Specializuara, theksoi gjatë konferencës së saj javore se ky vendim është pjesë e një procesi të vazhdueshëm të shqyrtimit të provave.

“Dëshmitë e shkrimtuara do të pranohen dhe mbrojtja do të mund t’i pyet dëshmitarët. Ky është një hap i rëndësishëm në përgatitjen e gjykimit,” tha Griep, duke shtuar se po ashtu është miratuar që një dëshmitar të japë dëshmi nëpërmjet video-konferencës.

Në të njëjtën çështje, më 20 dhjetor dhe 6 janar, trupi gjykues gjithashtu ka aprovuar disa kërkesa të Prokurorisë për paraqitjen e provave të tjera materiale dhe dëshmive të tjera shoqëruese.

Ndërsa, më 18 dhjetor 2024, mbrojtësit e viktimave kishin kërkuar që një anëtar i familjes së një viktimë që ka ndërruar jetë, të mund të marrë pjesë në emër të saj gjatë procesit gjyqësor.

Qendra Kombëtare për Menaxhim Kufitar ka bërë të ditur gjendjen e rrugëve që çojnë drejt pikave të kalimit kufitar në Kosovë.

Sipas raportit më të fundit, të gjitha rrugët janë të kalueshme për automjete, por drejtuesit duhet të kenë pajisje dimërore, për shkak të borës në disa segmente rrugore.

Në rrugët Mitrovicë – Bërnjak, Gjakovë – Qafë Morinë, Gjakovë – Qafë e Prushit, Gjilan – Dheu i Bardhë dhe pika të tjera, rrugët janë të mbuluara me borë, por pa prani të akullit apo pengesave si rrëshqitje dheu.

Edhe në Mitrovicë – Jarinjë, Pejë – Kullë, Podujevë – Merdar, Prizren – Vërmicë, qarkullimi mbetet i sigurt për automjetet pavarësisht borës.

Drejtuesit e automjeteve këshillohen që të pajisen me zinxhirë, goma dimërore dhe mjete të tjera për qarkullim të sigurt, sidomos në zonat me borë dhe kushte të tjera dimërore.

Moti sot në Kosovë parashihet të jetë kryesisht i vranët e me reshje të izoluara bore në disa zona, ka njoftuar Instituti Hidrometeorologjik i Kosovës.

Temperaturat minimale do të lëvizin mes minus 5 e minus 2 gradë celsius, e maksimalet mes minus 2 dhe zero gradë.

“Era do të fryjë nga verilindja dhe veriperëndimi, me shpejtësi 1-9 m/s”, ka njoftuar IHMK-ja.

Borë me intensitet të lartë është duke rënë sot në vendin tonë. Si pasojë edhe rrugët kanë nisur të jenë vështirë të qarkullueshme.

Nga pamjet e publikuara deri tani rruga Prishtinë – Gjilan, Prishtinë – Ferizaj, Prishtinë-Pejë, por edhe rrugët në kryeqytet janë të papastruara dhe vështirë të qarkullueshme, duke mos harruar edhe rrugët që dërgojnë në vendet turistike si në Bogë.

Ish-ministri i Mjedisit, Fatmir Matoshi, ka publikuar video ku ka thënë se rrugët janë të papastruara, ndërsa në video shihet edhe një veturë e rrokullisur.

“Rrugë të papastruara gjithandej”, ka shkruar ai në Facebook.

Komuna e Prishtinës ka njoftuar pas orës 11:00 se ekipet po punojnë për t’i bërë rrugët të kalueshme.

“Të gjitha ekipet përgjegjëse janë angazhuar intensivisht dhe po punojnë pa ndërprerje për të siguruar që rrugët të jenë të kalueshme! Megjithatë, reshjet e dendura të borës që po vazhdojnë pa ndërprerje po e vështirësojnë situatën në terren”, thuhet në njoftimin në faqen zyrtare të komunës.

Ndërkaq, Policia e Kosovës ju ka bërë thirrje vozitëve të kenë kujdes.

“Bazuar në situatën e tanishme ku kemi ndryshim të kushteve atmosferike dhe reshje të borës, Policia e Kosovës apelon tek të gjithë pjesëmarrësit në trafik, në veçanti shoferëve të automjeteve për kujdes të shtuar, përshtatje të shpejtësisë me kushtet atmosferike dhe me gjendjen e rrugës, mbajtje të distancës mes mjeteve si dhe ngadalësim gjatë lëvizjes në rrugë të mbuluara me borë dhe me ngrica”, thuhet në apelin e Policisë.

Diplomacia e Kosovës ka pësuar regres dhe stagnim gjatë mandatit të Ministres së Punëve të Jashtme, Donika Gërvalla, duke mos arritur të përmbushë pritshmëritë e qytetarëve dhe nevojat strategjike të vendit, kanë vlerësuar analistët politikë në vend, raporton EO.

Sipas tyre, për katër vite nën udhëheqjen e qeverisë aktuale, vendi nuk ka arritur të sigurojë asnjë njohje të re dhe ka pasur shumë sfida në anëtarësimin në organizata ndërkombëtare.

Sipas politologut Albinot Maloku, një nga arsyet kryesore të dështimeve diplomatike është mungesa e një vizioni strategjik nga Ministrja Gërvalla dhe ndikimi i çështjeve të brendshme, veçanërisht dialogu me Serbinë, siç u shpreh për Ekonomia Online.

“Diplomacia e Kosovës gjatë mandatit të Gërvallës, si ministre e Jashtme dhe shefe e diplomacisë, ka pësuar regres dhe stagnim, të cilin Kosova nuk e ka merituar. Kjo ka ardhur si pasojë e shumë faktorëve, fillimisht nga mungesa e një vizioni strategjik të mirëfilltë nga ana e ministres dhe pastaj nga ndikimi i çështjeve të brendshme, si pasojë e dialogut që ka imponuar këtë rrjedhë ngjarjesh në Kosovë”, ka thënë ai.

Ai theksoi se gjatë këtij mandati, Kosova nuk ka arritur të ketë rezultate të dukshme në fuqizimin e pozitës së saj ndërkombëtare.

“Në rrafshin diplomatik, Kosova nuk ka për çfarë të krenohet gjatë këtij mandati. Shpresoj që në qeverinë e ardhshme të ketë një vizion tjetër, pa marrë parasysh kush do të jetë në qeveri, pasi i gjithë ky stagnim dhe regres është i padurueshëm për nevojat e Kosovës, sidomos në sektorët e njohjes së shtetit dhe fuqizimin e faktorizimit të saj ndërkombëtar. Çdo shtet duhet të ketë një tregues të tillë themelor: faktorizimin e tij në arenën ndërkombëtare”, ka thënë ai.

Analisti politik, Afrim Kasolli, potencoi se mungesa e njohjeve të reja ndërkombëtare dhe dështimi për t’u anëtarësuar në Këshillin e Evropës janë dëshmi e dështimit diplomatik të këtij mandati.

Ai vuri në dukje se Kosova ka dështuar të kapitalizojë edhe rastet kur mund të kishte përfitime diplomatike, si në rastet e sulmeve në veri, në Banjskë dhe Ibër-Lepenc.

“Kanë munguar sukseset diplomatike, dhe kjo është evidente. Kosova nuk ka arritur të sigurojë asnjë njohje ndërkombëtare gjatë kësaj periudhe. Po ashtu, ka dështuar, edhe pse ishte shumë afër, të realizojë me sukses anëtarësimin në Këshillin e Evropës, organizatën më të vjetër evropiane. Vendi vazhdon të ndodhet nën masa sanksionuese, që janë si pasojë e veprimeve të brendshme, por që gjithashtu janë reflektim i dështimit diplomatik të qeverisë së Kosovës, përkatësisht të Ministrisë së Punëve të Jashtme. Kohë pas kohe, deklarata të skandaloze të ministres së Punëve të Jashtme kanë shoqëruar raportet me vendet partnere ndërkombëtare. Deri më tani, Kosova nuk ka arritur të shndërrojë asnjë prej dy rasteve të mundshme përfitimi diplomatik, siç kanë qenë sulmi në fshatin Banjsk dhe sulmi në Ibër-Lepenc. Përkundër kësaj, Kosova nuk ka arritur ta përkthejë këtë agresion në një avantazh diplomatik, që reflekton një dështim të shtetit”, ka thënë ai.

Kasolli për Ekonomia Online gjithashtu theksoi shqetësimet për marrëdhëniet e tensionuara me aleatët perëndimorë, duke përfshirë edhe kritikat nga zyrtarët e lartë të administratës amerikane.

Ai tha se qeveria e ardhshme e Kosovës do të përballet me sfida të mëdha në fushën diplomatike.

“Duhet të përmendim marrëdhëniet e tensionuara me aleatët perëndimorë, veçanërisht deklaratat shqetësuese të zyrtarëve të lartë të administratës amerikane, se Kosova, me sjelljet dhe veprimet e saj, po ia pamundëson ShBA-së të lobojë në arenën ndërkombëtare. Ky mandat në këtë sferë ka qenë i pasuksesshëm dhe ka qenë karakterizuar nga dështime të theksuara diplomatike. Çdo qeveri që do të krijohet duhet të ketë parasysh se do të përballet me një sfidë të madhe në këtë drejtim, për shkak se Kosova, edhe pas këtyre zgjedhjeve, do të ketë detyrime të paplotësuara në raport me obligimet që ka marrë në procesin e dialogut në Bruksel. Pavarësisht se kush e krijon qeverinë dhe kush bëhet kryeministër, Kosova ka obligim që të gjejë një rrugëzgjidhje nga kjo bllokadë, e cila ka penguar përmirësimin e pozicionit të saj ndërkombëtar”, ka thënë ai për Ekonomia Online.