Tag: Ballina

Policia e Kosovës sot ka zhvilluar një aksion në disa lokacione në Kosovë, ku janë mbyllur dhjetë Komuna Paralele të Serbisë.

Sipas njoftimit të ministrit të punëve të Brendshme, Xhelal Sveçla, Komunat paralele të Serbisë sot janë mbyllur në Lipjan, Obiliq, Prishtinë, Fushë Kosovë, Vushtrri, Novobërdë, Kamenicë, Viti, Rahovec, Skënderaj si dhe posta e zyre tatimore ilegale.

Por, Prokuroria Themelore në Prishtinë ka dalë me një njoftim zyrtar, ku thuhet se Prokurori i Shtetit nuk e ka autorizuar kryerjen e kontrollit apo bastisjes në këto lokacione, pasi nuk ka pranuar ndonjë kërkesë zyrtare nga institucionet.

“Prishtinë 15.01.2025, Prokuroria Themelore në Prishtinë me qëllim të transparencës dhe sqarimit të opinionit publik, njofton se lidhur me rastin e kryerjes së kontrolleve dhe bastisjeve në disa lokacione për shkak të dyshimit se ekzistojnë struktura paralele, prokurori i shtetit sqaron opinionin publik se nuk ka autorizuar kryerjen e kontrollit apo bastisjes në këto lokacione, për shkak se nuk ka pasur ndonjë kërkesë zyrtare me shkrim për kryerjen e këtij aksioni nga ana e institucioneve gjegjëse, për çka edhe nuk është ofruar kurrfarë prove para prokurorit të shtetit për tu krijuar dyshimi i bazuar se është duke u kryer ndonjë vepër penale që bie nën kompetencën e Prokurorisë Themelore në Prishtinë”, thuhet në njoftim.

Tutje, në njoftim thuhet se Prokurori i Shtetit nuk ka mundur që të lëshojë ndonjë autorizim në lidhje me rastin, duke pasur parasysh faktin që me këtë rast nuk janë përfillur procedurat e nevojshme të përcaktuara decidivisht në Kodin e Procedurës Penale të Republikës së Kosovës.

“Prokurori i shtetit është i gatshëm dhe i përkushtuar në ndjekjen e veprave penale dhe kryerësve të tyre, gjithmonë duke u bazuar në legjislacionin në fuqi, si dhe duke u bazuar në parimin e barazisë dhe mos diskriminimit të gjithë qytetarëve të Republikës së Kosovës”, shkruhet në njoftim.

Presidentja e vendit, Vjosa Osmani, në ceremoninë përkujtimore me rastin e 26-vjetorit të Masakrës së Reçakut tha se “kjo masakër na kujton jo vetëm dhimbjen por edhe qëndrueshmërinë e popullit tonë për t’u ngritur dhe për të triumfuar”.

Osmani para të pranishmëve citoi fjalët e ambasadorit William Walker, i cili kishte thënë se “ajo që pash këtu është krim kundër njerëzimit”.

“Në çdo përvjetor jemi në Reçak në fshatin e vogël por me zemër të madhe. 45 banorët e Reçakut u masakruan nga gjenocidi serb. Pamjet e asaj masakre tronditën botën. Walker dëshmoi para botës atë se çfarë e pa me sytë e tij. Ajo që pash këtu është një krim kundër njerizimit, ishin fjalët e ambasadorit Walker”.

“Ajo na kujton jo vetëm dhimbjen e asaj kohe por na kujton edhe qëndrueshmërinë e popullit tonë për t’u ngritur dhe për të triumfuar. Nuk duhet të ndalemi asnjëherë për ta treguar këtë të vërtetë. Sot jemi të gjithë bashkë që sërish të përulemi para dëshmorëve. Ata janë dhe do të jenë heronjtë tanë, kujtimi i tyre do të jetë referencë për çka do që bëjmë. Lavdi dëshmorëve. Zoti e bekoftë Kosovën, Reçakun dhe popullin e saj”, tha Osmani.

Granit Plava në deklaratën e dhënë në polici, më 1 dhjetor 2023, ka deklaruar se një ditë para ditës kritike u takua me bashkëfshatarin e tij, Naim Murseli, ku ky i fundi i ka thënë se ka një rast nga i cili të dy mund të fitojnë para. Puna e tij, i ka thënë se do ishte ta vriste një biznesmene serbe dhe se pas vrasjes do t’ia jepte 30 mijë euro. Tha se kishte pranuar ta kryente vrasjen.

Ditën kritike, Plava tha se Murseli i shkoi në shtëpi me një veturë, duke i thënë se me të do ta kryente vrasjen, por që s’ka pranuar duke thënë se i duhej një veturë më e madhe. Bashkë me Naimin, tha se shkuan në Kralan dhe mori veturën nga një person. Më pas, tha se Naimi ia dha armën e i tha ta përcillte nga pas.

Pasi kishin ndarë rrugët dhe që Naimi i kishte treguar se me çfarë veture do vinte, thuhet se Plava deklaroi që kur erdhi ia bëri me drita. Gjatë gjithë kohës tha se kanë qenë në kontakt me WhatsApp dhe se i ndoqi pas në restorantin ku shkuan Naimi me tani të ndjerën dhe fëmijët. Kur deshën të largoheshin nga aty, tha se Naimi i shkroi “çohu” dhe i kishte treguar kur të niset.

Sipas tij, kur arritën afër vendit të ngjarjes, Naimi i shkroi “ti shko atje dil në pritë kurse unë po vonohem pak derisa të përgatitesh ti”. Më pas, tha se në vendngjarje i doli përpara veturës shkoi kah dritarja e pasagjerit dhe u ka thënë t’i dorëzonin telefonat.

“Qitni telefonat dhe e kam dëgjuar atë vajzën duke thënë mo mo dhe aty e kam vërejt se është shqiptare dhe kam shtënë vetëm një here dhe nuk kam dit se ku kam rrok”, citohet se deklaroi Plava.

Pas kësaj, thuhet se Plava deklaroi që ka ikur nga vendi i ngjarjes, e që rrugës tentoi ta kontaktonte Naimin por ai nuk i është lajmëruar. Nga mediat, tha se të nesërmen e kuptoi se viktima ishte bashkëshortja e Murselit, lajm i cili thotë se e tronditi ngase sipas tij po ta dinte se është shqiptare nuk do ta vriste, transmeton betimi për drejtësi

I akuzuari Granit Plava ka deklaruar po ashtu se në Polici ka qenë disa herë për raste të rrahjeve gjatë kohës kur ishte në shkollë. Tha se Naim Murseli më parë nuk i kishte kërkuar të kryente punë tjera, e se me të njihej që 10-15 vite. Planin e vrasjes, Plava ka thënë se e ka bërë Murseli dhe se puna e tij ka qenë ta përcjellë atë, t’i dalë në pritë kinse ishte grabitje dhe ta vrasë vajzën që i ka thënë se ishte serbe dhe se 30 mijë euro do t’ia jepte të nesërmen.

“Këtë gjë e kam bërë për shkak se më janë nevojitur paratë për sëmundjen e djalit tim”, citohet se tha Plava.

Për motivin se pse Naimi donte ta kryente vrasjen, Plava citohet se deklaroi që ai nuk i ka thënë asgjë vetëm se viktima ka para. Tha se viktimës nuk i kishte marrë asgjë, por mbi tavanin e veturës mori një çantë të cilën e kishte lënë Naimi, e që nga ajo s’mori asgjë dhe e hodhi.

Sipas tij, nuk e ka ditur se sa persona ishin në veturë dhe se nuk ka dëgjuar britma të fëmijëve. Tha se me sa e di askush tjetër nuk ka qenë në dijeni për rastin.

Kushtrim Kokallën, Plava ka thënë se e ka shok nga fëmijëria, dhe se me Naimin nuk njihet përmes tij, por që njihen ngase janë nga i njëjti fshat. Me Kokallën, ishte takuar një natë para vrasjes, por që thotë se ai nuk e ka ditur se do e kryente vrasjen.

Tani i akuzuari Plava ka deklaruar se ditën kur ka ndodhur rasti, Naimi ka shkuar tek shtëpia e tij ia ka dhënë 100 apo 120 euro për ta paguar veturën- naftën.

“Ndjej keqardhje për rastin në fjalë. Po ta kisha ditur se kjo është shqiptare nuk do ta kisha bërë kurrë edhe pse kam pasur shumë nevojë për para për sëmundjen e djalit tim. Për këtë Naimi e ka shfrytëzuar gjendjen time ekonomike…”, citohet se tha Plava.

LEXONI EDHE:

Plani, takimet, marrëveshja për pagesën deri te momenti kritik- Deklaratat e Naim Murselit dhe tjerëve në Prokurori e Polici

Prokuroria Themelore e Prishtinës ka ngritur sot aktakuzë lidhur me rastin e vrasjes së Liridona Ademajt.

Prokurorja e rastit, Javorka Perlinçoviq, përmendi si një nga motivet për këtë vrasje marrëdhëniet jo të mira në çift mes Liridonës dhe ish-bashkëshortit të saj, Naim Murselit, gjatë kohës që jetonin në Suedi, që tha se kanë shkuar deri tek problemet pasurore.

“Mund të themi që përderisa kanë jetuar në Suedi, Liridona dhe Naimi, kanë pasur marrëdhënie të çrregulluara martesore dhe familjare gjatë të cilave ka ardhur edhe deri tek problemet pasurore, e për arsyet e tjera që i ka pasur Naimi që ta planifikojë këtë vrasje, mund t’i kuptoni në Gjykatë”, ka deklaruar Prokurorja.

Ajo tha se edhe çështja e motivit e ka vonuar ngritjen e kësaj aktakuze.

“Duhet të sqarojmë përse ka kaluar një kohë e gjatë që nga ngritja e aktakuzës. Duhet të themi që provat materiale në këtë lëndë janë grumbulluar shumë shpejt, megjithatë se çka ka munguar, ka munguar motivi që ka shtyrë kryerësit për veprën. Meqenëse e ndjera ka jetuar një kohë të gjatë në Suedi dhe për këtë arsye organeve atje u jemi drejtuar që të na ofrojnë të dhëna dhe kemi marrë raportin në ato pyetje të cilat iu kemi parashtruar organeve kompetente atje dhe atëherë kemi mundur të gjejmë motivin që e ka shtyrë Murselin për likuidimin e Liridona Ademajt. Derisa nuk i kemi pasur këto të dhëna për të krijuar një pasqyrë për marrëdhëniet familjare në mes tyre, nuk kemi ngritur aktakuzën. Të gjithë të përfshirët kanë marrë pjesë aktive në përgatitjen e veprës penale dhe sigurimin e mjeteve për kryerjen e kësaj vepre”, tha prokurorja.

Liridona Ademaj u vra mbrëmjen e 29 nëntorit 2023, në hyrje të fshatit Bërrnicë të Prishtinës, teksa po kthehej në shtëpinë e saj me bashkëshortin dhe dy fëmijët. Ajo u qëllua me plumb në qafë.

Kryeprokurori i Prokurorisë Themelore në Prishtinë, Zejnullah Gashi, gjatë konferencës së sotme për media ka bërë të ditur se kanë përfunduar hetimet në rastin e vrasjes së Liridona Ademajt dhe se është ngritur aktakuzë ndaj tre të dyshuarve – Naim Murseli, Kushtrim Kokalla dhe Granit Plava.

Kështu ka njoftuar Gashi në konferencën për gazetarë.

“Siç e dini ky ka qenë rast i ndishëm, fillimisht ka qenë i inskenuar si grabitje, mirëpo falë angazhimit maksimal të hetuesve dhe prokurorëve brenda një afati të shkurtë kohor kemi arritur t’i zbulojmë kryesit e kësaj vepre penale”.

“Ka qenë një çështje penale jashtëzakonisht e ndjeshme edhe sa i përket kompleksitetit të saj dhe janë zhvilluar hetime në shumë dimensione për arsye se kemi siguruar ekspertiza edhe brenda edhe jashtë vendit tonë”, tha Gashi.

Liridona Ademaj u vra në moshën 30-vjeçare, më 29 nëntor 2023, në rrugën “Dalip Alshiqi” në Prishtinë.

Policia e Kosovës ka nisur një aksion në dhjetëra lokacione për mbylljen e strukturave paralele serbe.

REL raporton se Policia ka hyrë në Postën e Serbisë dhe Komunën paralele të Prishtinës, e cila që nga paslufta funksionon në Graçanicë.

Para ndërtesës së Postës së Serbisë është vendosur një shirit i verdhë dhe gazetarët e REL-it raportojnë se aktualisht zyrtarë të Policisë ndodhen brenda këtyre dy institucioneve.

Aktualisht, punonjësit e të dyja institucioneve janë duke u larguar nga objektet.

Lajmi është konfirmuar edhe nga Policia e Kosovës.

“Mund të konfirmojmë se, sot në orët e hershme të mëngjesit, Policia e Kosovës në bashkëpunim dhe koordinim me institucionet kompetente ka filluar realizimin e një operacioni policor i cili përfshinë disa rajone të Kosovës, si DRP Prishtinë, DRP Gjilan, DRP Gjakovë dhe DRP Mitrovicë Jugu”, ka njoftuar Policia, që ka shtuar se pas përfundimit të operacionit do të bëhen publike informacionet shtesë.

Degë të tjera të kësaj poste ishin mbyllur edhe në veriun e Kosovës të banuar me shumicë serbe, më 5 gusht të vitit të kaluar – në një lëvizje të kritikuar nga Bashkimi Evropian dhe SHBA-ja, që në atë kohë ishin shprehur “thellësisht të zhgënjyer” dhe e kishin quajtur aksionin të njëanshëm dhe të pakoordinuar.

Edhe shumë institucione të tjera serbe janë mbyllur gjatë aksioneve të ndërmarra nga Policia e Kosovës vitin e kaluar. Aksione të tilla vazhduan edhe këtë vit.

Në Bruksel sot do të mbahet takimi i parë i Komisionit të Përbashkët për të pagjeturit.

Kryetari i komisionit Qeveritar për Persona të Pagjetur, Andin Hoti deklaroi të hënën se takimi i 15 janarit ka për qëllim përcaktimin e planit të punës për seancat e ardhshme, si dhe adresimin e disa çështjeve të rëndësishme për çështjen e të zhdukurve.

Në një postim në llogarinë e tij në Facebook, ai bëri me dije se delegacioni i Kosovës do të prezantojë disa kërkesa kyçe që ndërlidhen kryesisht me monitorimin e zbatimit të Deklaratës për Personat e Zhdukur, me fokus të veçantë në shkresën për arkivat, të cilën  e kanë adresuar tek presidenti serb, Alleksandar Vuçiq.

“Ky takim është një hap i rëndësishëm drejt zbatimit të marrëveshjes ekzistuese ‘Deklaratës për Persona të Zhdukur’ e miratuar me 2 Maj 2023”.

Delegacioni kosovar do të përfaqësohet në këtë takim nga Halil Cenaj.

Lidhur me takimin e sotëm ka folur edhe emisari evropian për dialogun e Brukselit, Miroslav Laçak.

Ai mes tjerash potencoi ditë më parë se gjatë misionit të tij në Amerikë, me ndihmëssekretarin e Shtetit për Çështjet Evropiane dhe Euroaziatike, Jim O’Brien dhe me zëvendëssekryetarin e Shtetit për Ballkanin Perëndimor, Alexander “Sasha” Kasanofin, diskutuan rreth dialogut.

“Përsëri në Bruksel, fokusi i kësaj jave do të jetë tek Personat e Zhdukur me takimin e parë të Komisionit të Përbashkët”, ka shkruar Lajçaku.

“Në Uashington, D.C., u angazhova në diskutime të hollësishme me ndihmëssekretarin e Shtetit për Çështjet Evropiane dhe Euroaziatike, Jim O’Brien dhe zëvendësndihmës Sekretarin e Shtetit për Ballkanin Perëndimor, Sasha Kasanof. Së bashku, ne u thelluam në sfidat dhe mundësitë gjeopolitike me të cilat përballet rajoni, duke theksuar rëndësinë e bashkëpunimit të vazhdueshëm dhe nevojën për të avancuar në Dialogun e Normalizimit”, u shpreh më tutje emisari.

Marrëveshja për çështjen e të pagjeturve është arritur gjatë muajit dhjetor të vitit të kaluar.

Inspektorati Policor i Kosovës (IPK) ka publikuar raportin e inspektimit të quajtur “Trajtimi i aksidenteve të trafikut nga Policia e Kosovës”, ku i ka dhënë shtatë rekomandime për Policinë.

Në raport thuhet se IPK-ja ka kërkuar përmbushje të strukturës policore me personel të mjaftueshëm, përfshirje më të gjerë të personelit në trajnime profesionale dhe të avancuara, pajisjes së njësive me pajisje për regjistrim dhe skanim të të dhënave nga vendi i aksidentit dhe përdorim i programeve të licencuara për skicimin e vendit të aksidentit.

IPK-ja ka përmendur sigurimin e personelit të mjaftueshëm për Njësinë Rajonale të Trafikut Rrugor në Mitrovicë të Veriut.

“IPK-ja u rekomandon Shefave të Njësive Rajonale të Trafikut Rrugor dhe Njësisë për Kontrollin e Autostradave që në koordinim me Divizionin e Trajnimeve, të ndërmarrin hapa në drejtim të përfshirjes më të gjerë të personelit në trajnime specifike profesionale dhe të avancuara në fushën e trafikut”, thuhet në mesin e shtatë rekomandimeve.

IPK-ja gjithashtu ka rekomanduar që shefat e njësive të trafikut dhe mbikëqyrësve të ekipeve të rrisin kontrollin mbi vartësit, “për t’u siguruar se ata hartojnë kallëzime penale cilësore, me informata të mjaftueshme të dala nga trajtimi i aksidenteve”.

Nebojsa Milic nga Iniciativa Qytetare “Drejtësia Popullore”, në emisionin COMPASS në ATV, deklaroi se iniciativa e tij është opozita e vetme ndaj Listës Serbe në veri dhe ndaj regjimit aktual në Beograd.

Milic tha se iniciativa është e organizuar dhe ka bashkëpunuar me disa parti, por është tërhequr nga negociatat me to për shkak të mungesës së garancive.

“Kjo iniciativë e jona qytetare është opozita e vetme për Listën Serbe në veri, por edhe opozitë e gjithë regjimit në Beograd. Ne jemi të organizuar dhe kemi bashkëpunim me disa parti, por jemi tërhequr nga negociatat me ato parti. Ne kemi kërkuar garanci të sigurta që të mos tërhiqmi nga ato parti para zgjedhjeve, por kur nuk i morëm këto garanci, dhe u tërhoqëm. Ne jemi duke garuar vetë dhe do të përpiqeni të qëndrojmë e të marrim pjesë e ta përfundojmë këtë proces deri në fund”, tha Milic.

Ai siguroi se iniciativa e tij do të qëndrojë e përkushtuar për të përfunduar këtë proces deri në fund, duke synuar të sjellë ndryshime në skenën politike.

Intervistën e plotë me Nebojsa Milicin në COMPASS e gjeni në videon më poshtë:

Përgatiti: Ardiana Jashari

Lufta në Ukrainë si dhe konflikti në Lindje të Mesme kanë shkaktuar probleme me migracion dhe inflacion edhe brenda shteteve anëtare të Bashkimit Evropian.

Madje këto dy çështje janë duke pasur ndikim edhe sa i përket anëtarësimit të Ballkanit Perëndimor në Bashkimin Evropian, tha eurodeputeti Lars Patrick i cili të martën mbajti ligjëratë para studentëve të Kolegjit AAB.

“Pse? Sepse njerëzit po bëjnë më shumë pyetje: ne kemi probleme brenda shteteve anëtare, shumë çështje të pazgjidhura, pse duhet të marrim më shumë probleme, pse duhet të kemi më shumë probleme duke pranuar shtete të reja në BE, siç janë gjashtë shtetet e Ballkanit Perëndimor? Shtet si për shembull Kosova, si Ukraina, Gjeorgjia dhe Moldavia”, tha eurodeputeti Lars Patrick.

Patrick Berg shtoi se këto dy çështje madje duhet të jetë prioritet për politikanët, të cilët duhet të përqendrohen në mundësitë e shteteve përkatëse për anëtarësim në BE.

“Nëse kjo nuk ndodhë mendoj se njerëzit në Republikën e Kosovës, veçmas gjeneratat e reja, sikur shumë prej jush këtu në këtë dhomë, mund të largoheni nga BE-ja dhe idealet e BE-së, dhe të largoheni nga vendi”, tha Patrick Berg.

Lars Patrick Berg është një politikan gjerman i cili që nga viti 2019 është pjesë e Parlamentit Evropian.

Më shumë detaje i gjeni në Edicionin Qendror të lajmeve në videon më poshtë: