Tag: Ballina

Kryetari i Koalicionit Euroatlantik, Lulzim Basha, në emisionin CONTEXT në ATV, deklaroi se Shqipëria duhet ta mbështesë Kosovën çdo vit me një fond prej 50 milionë eurosh për nevoja të mbrojtjes dhe sigurisë.

Sipas Bashës, kjo mbështetje do të ishte një akt i qartë solidariteti kombëtar, pa cenuar asnjë zë të rëndësishëm të buxhetit të Shtetit Shqiptar.

“Që prej një viti e disa muajsh në Parlamentin e Shqipërisë ndodhet propozimi im, që pas sulmit paramilitar në Banjskë, për t’i dhënë Kosovës çdo vit ndihmë ushtarake në vlerë prej 50 milionë eurosh nga buxheti i Shqipërisë për ta destinuar për mbrojtjen e saj. 50 milionë euro në një qeveri që shpenzon 7.2 miliardë euro në vit janë afërsisht gjysma e shpenzimeve të kësaj qeverie për perde, tavolina, makina të reja – pra për luks qeveritar. Nuk preket asnjë zë tjetër, as investime, as shpenzime sociale”, deklaroi Basha.

Ai shtoi se kjo ndihmë do të duhej të menaxhohej në koordinim me aleatët perëndimorë, si një sinjal i qartë për rajonin dhe komunitetin ndërkombëtar.

“Ky do të ishte një akt i qartë jo vetëm ndaj Kosovës, por ndaj gjithë Evropës, ndaj botës, ndaj Serbisë – që jemi në krah të Kosovës. Pesëdhjetë milionë euro të ndara për buxhetin e mbrojtjes së Kosovës, që ajo mund t’i destinojë në bashkëpunim me Shtetet e Bashkuara të Amerikës, me Bashkimin Evropian, me Britaninë e Madhe, me NATO-n për nevoja të mbrojtjes”, theksoi Basha.

Deklaratën e plotë të Lulzim Bashës në CONTEXT, e gjeni në videon më poshtë:

Kryetari i Koalicionit Euroatlantik, Lulzim Basha, në emisionin CONTEXT në ATV, tha se është koha që shqiptarët të votojnë lirshëm, pa pengesa burokratike dhe pa presione politike, duke kërkuar votim dhe numërim elektronik.

Ai tha se votimi përmes shenjës së gishtit është i mundur dhe tashmë zbatohet edhe në shtete me sfida më të mëdha se Shqipëria.

“Shqiptarët, qytetarët e Republikës së Shqipërisë meritojnë të votojnë pa pengesa, pa gryka shishesh. Shqipëria ka një databazë biometrike të gjithë qytetarëve. Është plotësisht e mundur që një shqiptar kudo ku jeton – nga Australia, Kanadaja, Suedia apo edhe Greqia – të identifikohet thjesht dhe vetëm me shenjën e gishtit. Kjo shmang gjithë burokracinë dhe mundëson votim elektronik, numërim elektronik”, deklaroi Basha.

Sipas tij, qeveria po e kufizon të drejtën e diasporës për të votuar përmes një procesi selektiv dhe jotransparent.

“Qeveria është angazhuar në një proces selektiv në raport me diasporën. Vetëm një pjesë e vogël do të kenë mundësi të votojnë. Sistemi është jotransparent sepse ne vuajmë nga problematika të patronazhimit. Vjen dikush dhe u thotë: hajdeni këtu, mbushni këto fletë votimi, votoni për këtë parti, dhe hajt t’i postojmë. Sistemi që është vënë në funksion është një larje goje me premtimin akoma të pambajtur për votë të lirë e të pakushtëzuar për diasporën”, theksoi Basha.

Deklaratën e plotë të Lulzim Bashës në CONTEXT, e gjeni në videon më poshtë:

Përgatiti: Armand Hoti

Qytetarët e Kosovës, që ndër vite u faturuan për shpenzimin e rrymës në katër komunat veriore të Kosovës, akoma nuk kanë filluar të kompensohen.

Madje as nuk dihet se kur do të ndodh.

Distributori KEDS po vazhdon të mos e zbatojë vendimin, pavarësisht se kërkesa për shtyrje të vendimit të Zyrës së Rregullatorit të Energjisë, iu refuzua nga dy shkallët e Gjykatës Komerciale, si dhe nga Gjykata Supreme.

“Gjykata përkatësisht Departamenti për Çështje Administrative, duke vepruar sipas kësaj çështje me aktvendimin e datë 17.05.2024, ka refuzuar kërkesën e KEDS për shtyrjen e ekzekutimit të vendimit të ZRrE, deri në marrjen e vendimit gjyqësor përfundimtar me padi, si të pabazuar. Dhoma e Dytë e Gjykatës Komerciale, me aktvendimin e datë 18.06.2024 ka refuzuar si të pabazuar ankesën e propozuesit dhe ka vërtetuar vendimin e Dhomës së Shkallës së Parë”, thuhet në aktvendimin e Gjykatës Komerciale.

Vendimi i ZRRE-së thotë se qytetarët duhet kompensuar në vlerë prej rreth 40.8 milionë eurosh, që vërtetohen se kanë paguar aktivisht për periudhën shkurt 2012 – tetor 2017.

“Padia ndaj vendimit të ZRRE-së me të cilën jemi obliguar të bëjmë kompensimin 40 milionësh është parashtruar në gjykatë më 7 maj 2024. Kërkesa për shtyrje të ekzekutimit të vendimit të ZRRE-së na është refuzuar në të gjitha shkallët, kurse për çështjen kryesore ende nuk jemi ftuar. Arsyet pse KEDS e ka kontestuar vendimin e ZRRE-së me padi është se KEDS nuk ka qenë fare palë ndërgjyqëse në procesin kontestimor nga i cili ka dalë Vendimi i Gjykatës, i cili obligon kompensimin e faturave të paguara për katër komunat në veri”, thuhet në përgjigjen nga KEDS-i.

Mbështetur në aktgjykimin e Gjykatës Kushtetuese, ZRRE-ja para një viti obligoi KEDS-in t’ua kthejë borxhin kosovarëve, duke i kompensuar çdo muaj nga qershori 2024 – deri në prill 2030.

“ZRRE është dashur përkundër zvarritjeve që tenton t’ia bëjë KEDS dhe KESCO, është dashur ta obligojë KEDS dhe KESCO-n, ta rimbursojë këtë më së buti ta quaj zbutje të qytetarëve përmes faturës së energjisë, në rimbursim të faturës së energjisë, që vështruar sipas pasqyrave të të hyrave të lejuara të ZRRE-së…që nga prilli i vitit 2024 fatura e rrymës për qytetarët është dashur të jetë më e ulët për 10.47%”, tha Izet Ibrahimi, ekspert i energjisë.

Sidoqoftë, ekonomisti Jakup Bellaqa, thotë se qytetarët pësojnë nga mos-kompensimi në kohën kur paralajmërohet shtrenjtim i rrymës.

ZRRE nuk ktheu përgjigje nga java e kaluar e deri të martën, për këtë çështje.

Përgatiti: Alma Hysenaj

Seanca e së martës në Hagë përfundoi më herët se që ishte planifikuar.

Gjykimi ndaj katërshes së UÇK-së, Hashim Thaçi, Kadri Veseli, Jakup Krasniqi, Rexhep Selimi dhe Kadri Veseli, të akuzuar për vepra që ndërlidhen me krime të lufte nuk u mbajt meqë dëshmitari i paraparë nuk u paraqit në gjykatë.

Ky dëshmitar ishte i fundit i propozuar nga Zyra e Prokurorisë së Specializuar por dëshmia e tij do të pranohet me shkrim.

“Sot si rregull do të kishim filluar të dëgjojmë dëshminë e dëshmitarit të prokurorisë…. Sidoqoftë dëshmitari nuk është në gjendje të vij sot, edhe ZPS-ja ka kërkuar që të pranohet dëshmia e tij sipas rregullit 155”, ka thënë kryetari i Trupit Gjykues, Charles Smith.

Dëshmitari i cili duhej të dëshmonte ishte i 125-ti derisa nga Zyra e Prokurorit të Specializuar shpesh herë kanë thënë se nuk do të ftojnë asnjë dëshmitar pas 4 prillit.

Dhe tani kur seancat në këtë proces gjyqësor janë shtyrë për afat të pacaktuar kurdo që rifillojnë në bankë do të ulen dëshmitarët e mbrojtjes.

Aktakuza ndaj Thaçit, Veselit, Selimit dhe Krasniqit është konfirmuar më 26 tetor 2020.

Përgatiti: Driton Sadiku

Pritjet për të kaluar matanë kufirit në Maqedoni të veriut, variojnë nga 5 deri në 10 minuta.

Koha e pritjes, synohet të shkurtohet edhe më shumë me menaxhimin e përbashkët të kufirit, që planifikohej të fillonte nga kjo e martë, por që u shty për pak ditë.

Ndërkaq, Ministria e punëve të brendshme Maqedonase, tregoi për televizionin se çfarë ka mbetur pa përfunduar, para se marrëveshja mes dy shteteve të filloi së zbatuari.

“Përgatitja teknike dhe logjistike nënkupton disa aspekte, ndër të cilat:
• konfigurimin dhe instalimin e aplikacionit për shkëmbimin e përbashkët të të dhënave
• testimin e platformave të komunikimit dhe procedurave operacionale,
• sigurimin e mbështetjes teknike në terren
• rregullimin dhe pajisjen e zyrave të përbashkëta dhe ambienteve të punës dhe shërbimet
• bashkërendimin e punëve lidhur me logjistikën dhe funksionimin e pandërprerë të ekipeve të përbashkëta”, thuhet në njoftimin nga Ministria e Punëve të Brendshme e Maqedonisë së Veriut.

Pritjet janë që kontrolli i përbashkët të filloi nga 14 prilli, teksa qytetarët e shohin si mjaftë të nevojshëm.

Marrëveshja për kontrollin e përbashkët të kufirit, ishte nënshkruar në nëntor të 20024-tës në mbledhjen e përbashkët mes qeverive të të dyja vendeve, teksa fillimisht planifikohej të niste së zbatuari nga 1 janari.

Presidentja e Republikës së Kosovës, Vjosa Osmani, pas certifikimit të rezultatit përfundimtar të zgjedhjeve për Kuvendin e Republikës së Kosovës, të mbajtura më 9 shkurt 2025 dhe në përputhje me autorizimet kushtetuese dhe afatet ligjore, ka thirrur mbledhjen e parë të Legjislaturës së nëntë të Kuvendit të Kosovës për datën 15 prill 2025.

Gjatë kësaj seance zgjidhet kryetari dhe nënkryetarët e Kuvendit, dhe deputetët e rinj bëjnë betimin.

Në seancën e 1 prillit në Hagë u mbyll faza e prezantimit të dëshmitarëve të ftuar nga Zyra e Prokurorit të Specializuar në rastin e gjykimit të ish-krerëve të Ushtrisë Çlirimtare të Kosovës (UÇK)

Në mungesë të dëshmitarit të fundit të ftuar nga Zyra e Prokurorit të Specializuar (ZPS), seanca u përfundua më herët se që ishte planifikuar, pa u dhanë një datë e re kur do të vazhdojë gjykimi.

“Pjesa e mbetur e seancave të kësaj jave janë anuluar dhe gjykimi është shtyrë deri në një njoftim të mëtejshëm”, thuhet në njoftimin e publikuar në uebfaqen e Dhomave të Specializuara të Kosovës.

Zëdhënësi i ZPS-së, Chrisopher Bennet, konfirmoi për REL-in se ZPS-ja do ta përmbyllë të gjithë rastin e saj deri më 15 prill.

“Në këtë fazë, ZPS-ja nuk do të japë deklarata të mëtejshme në gjykatë”, tha Bennet.

Ish-presidenti i Kosovës, Hashim Thaçi, ish-deputeti Rexhep Selimi dhe dy ish-kryetarët e Kuvendit të Kosovës, Kadri Veseli dhe Jakup Krasniqi, akuzohen për krime lufte dhe krime kundër njerëzimit.

Dëshmitari i cili ishte planifikuar të jepte dëshminë e tij sot ishte i 125-ti i ftuar nga Zyra e Prokurorit të Specializuar (ZPS), që më parë kishte thënë se nuk do të ftonte asnjë dëshmitar pas 4 prillit.

Pasi u tha se dëshmitari i fundit “nuk ishte në gjendje të paraqitej”, ZPS-ja kërkoi që dëshmia e tij të pranohej me shkrim.

Pasi ZPS-ja përfundon marrjen në pyetje të dëshmitarëve, ekipet mbrojtëse të katër të pandehurve – të cilët janë deklaruar të pafajshëm – do të paraqesin rastin e tyre.

Mbrojtja e Thaçit tha në fund të vitit të kaluar se, nëse vendos të sjellë dëshmitarët e saj, nuk do të jenë më shumë se 10 të tillë.

Gjykimi ndaj tyre nisi në prill të vitit 2023, teksa ekipet mbrojtëse vazhdimisht janë ankuar për kohëzgjatjen e këtij procesi.

Ata gjenden në qendrën e paraburgimit në Hagë që katër vjet dhe vazhdimisht kërkesat e tyre për lirim nga paraburgimi janë refuzuar nga gjykatësit.

Në nëntor të vitit të kaluar, kryetarja e Dhomave të Specializuara të Kosovës, Ekaterina Trendafilova, kishte thënë se u takon gjykatësve që të vendosin nëse do të lirojnë nga paraburgimi katër ish-krerët e Ushtrisë Çlirimtare të Kosovës kur Prokuroria e Specializuar të përfundojë rastin e saj.

Zyra e Prokurorit të Specializuar kishte konfirmuar aktakuzën ndaj ish-krerëve të UÇK-së në tetor të vitit 2020, por e bëri publike vetëm një muaj më vonë.

Aktakuza i ngarkon të akuzuarit për përgjegjësi “personale”, por edhe për “krimet e kryera nga vartësit e tyre”.

Aktakuza thotë se katër të akuzuarit dhe anëtarë të tjerë të UÇK-së ishin pjesë e një “ndërmarrjeje të përbashkët kriminale” dhe “kanë ndarë qëllimin e njëjtë për të marrë dhe ushtruar kontrollin në gjithë Kosovën me të gjitha mjetet, përfshirë edhe frikësimin, keqtrajtimin, ushtrimin e dhunës dhe eliminimin e atyre që i konsideronin kundërshtarë”.

Gjykata Speciale apo Dhomat e Specializuara dhe Zyra e Prokurorit të Specializuar hetojnë krimet e pretenduara të pjesëtarëve të Ushtrisë Çlirimtare të Kosovës, të kryera kundër pakicave etnike dhe rivalëve politikë që nga janari i vitit 1998 deri në dhjetor të vitit 2000.

Gjykata është themeluar në vitin 2015 nga Kuvendi i Kosovës dhe është pjesë e sistemit gjyqësor të Kosovës, por vepron me personel ndërkombëtar dhe ka selinë në Hagë. /REL

Sot është paralajmëruar se do të ndodh shtrenjtimi i tarifave të rrymës për 15 për qind, megjithatë, nga ZRrE-ja kanë thënë se vendimi pritet të merret më 11 prill.

Kryetari i Bordit të Zyrës së Rregullatorit të Energjisë, Ymer Fejzullahu ka mohuar se është marrë vendim lidhur me tarifat e energjisë elektrike, duke thënë se në fuqi mbesin tarifat ekzistuese.

“Vendimi pritet të merret më 11 prill. Varësisht se si vendos bordi, ato mund të hyjnë në fuqi retroaktivisht nga 1 prilli ose nga 1 maji, kur është edhe periudha e faturimit, pasi që s’ka kuptim që kjo të bëhet në gjysmë të muajit”, tha Fejzullahu, duke shtuar se aktualisht janë duke shqyrtuar komentet e dërguara nga institucionet dhe të tjerët.

“Kemi deklaruar se shqyrtimi do të zgjas deri në dy javë, por mund të zgjas edhe më shumë”, deklaroi ai.

Rritja e çmimit të rrymës, ka ngjallur reagime të mëdha dhe pakënaqësi te qytetarët dhe bizneset dhe presidenca, por deri tash Qeveria e Kosovës nuk ka komentuar dhe as reaguar lidhur për rritjen e paralajmëruar. Për shkak të pakënaqësive, më 5 prill është paralajmëruar edhe një protestë në Prishtinë.

Përndryshe, më 30 mars 2025, ka ndryshuar edhe orarin e tarifës së ulët të rrymës. KESCO ka bërë të ditur se ky orar do të vlejë nga sot e deri me 30 shtator.

Tarifa e ulët gjatë kësaj periudhe, do të jetë nga ora 23:00 deri në ora 08:00. Ky ndryshim vjen si pjesë e aplikimit të tarifës verore, duke u mundësuar konsumatorëve kursime më të mëdha gjatë orëve të caktuara të natës.

Një shpërthim ka ndodhur pas mesnate në qendër të Zveçanit, pranë objektit të Postës, duke shkaktuar dëme materiale, ku si pasojë e incidentit, forca të shumta të Policisë së Kosovës janë vendosur në zonë që nga mbrëmë.

Lidhur me rastin, Policia e Rajonit të Veriut ka dhënë detaje, duke konfirmuar se nga shpërthimi nuk ka persona të lënduar, por janë shkaktuar dëme materiale.

Zëvendësdrejtori i Policisë për Rajonin e Veriut, Veton Elshani, ka deklaruar për Sinjalin se xhamat e një pjese të objektit janë thyer si pasojë e shpërthimit, ndërsa policia po vazhdon hetimet në vendngjarje.

“Nuk ka persona të lënduar, janë thyer xhamat në një pjesë të objektit, por për momentin nuk mund të japim më shumë informacione. Policia, me njësitë përkatëse, është ende në vendin e ngjarjes”, tha Elshani.

Ndërsa sot, Elshani konfirmoi se në objekt është gjetur edhe një mjet i pashpërthyer, i cili më pas u neutralizua në mënyrë të kontrolluar nga njësitë policore.

“Një mjet veç ka shpërthy e një tjetër e kemi shpërthyer ne në mënyrë të kontrolluar. Nuk ka lëndime, ka dëme materiale dhe  Policia po punon në ndriçim të rastit.”, tha Elshani.

Kryeministri në detyrë Albin Kurti vizitoi Baskësinë Islame të Kosovës dhe uroi të gjithë besimtarët myslimanë me rastin e Fitër Bajramit.

Pas pritjes nga myftiu Naim Tërnava, Kurti uroi sa më shumë dashuri, paqe dhe begati.

“Qeveria e Republikës së Kosovës e vlerëson dhe e çmon lart rolin dhe kontributin e Bashkësisë Islame të Kosoëvs në të gjitha etapat e zhvillimit, përparimit dhe rezistencës. Urime dhe gëzuar! Për hajr Bajrami, Zoti kabull agjëruesve! Një mirënjohje për Bashkësinë Islame të Kosovës që ndihmon të varfrit. Në këtë pranverë përkujtojmë 37 dëshmorët që vijnë nga imamët e Kosovës. Sa më shumë dashuri, paqe dhe begati në sofrat tuaja “, tha kreu i qeverisë Kurti.