Tag: Ballina

Zyra e Bashkimit Evropian në Kosovë dhe Rrjeti Ballkanik për Gazetari Hulumtuse, BIRN Kosova kanë publikuar raportin rreth gjuhës së urrejtjes dhe dezinformimit gjatë fushatës për zgjedhjet parlamentare të 9 shkurtit në Kosovë, raporton KosovaPress.

Në Ditën Ndërkombëtare të Verifikimit të Fakteve, shefi i Zyrës së BE-së në Kosovë, Aivo Orav tha se dezinformimi është më shumë se thjeshtë përmbajtje mashtruese. Ai shtoi se dezinformimi përbënë një kërcënim të drejtpërdrejtë për vetë thelbin e demokracisë.

Orav tha se çdo individ mund të bëhet objektiv i manipulimit të informacionit.

Ndër të tjera, Orav potencoi se raporti në fjalë zbulon se narrativat dezinformuese që u përhapën jo vetëm nga aktorët politikë vendorë, por edhe nga forca të jashtme, me qëllimin për të destabilizuar besimin e publikut në procesin zgjedhor të Kosovës.

Orav tha se Bashkimi Evropian mbetet thellësisht i përkushtuar në mbështetjen e lirisë së medias, gazetarisë së bazuar në fakte dhe përpjekjeve për të luftuar dezinformimin.

Presidentja e Kosovës, Vjosa Osmani tha se dezinformimi nuk është vetëm sfidë por rrezik real për shtetin tonë. Ajo shtoi se gazetaria qytetare e ndihmuar nga teknologjia dhe Intelegjenca Artificiale e kanë bërë verifikimin e fakteve më sfidues, raporton KosovaPress.

Sipas saj ne nuk duhet të leojmë të jemi të manipuluar, derisa potencoi se pa të vërtetën nuk mund të kemi demokraci të mirëfilltë dhe shoqëri të sukseshme.

Osmani theksoi se Serbia dhe Rusia kanë promovuar dezinformimin për ta minuar procesin e demokracisë në Kosovë dhe nxitjen e tensioneve në rajon.

Ndërkaq, të gjeturat kryesore të raportit rreth gjuhës së urrejtjes dhe dezinformimit gjatë fushatës për zgjedhjet parlamentare të 9 shkurtit në Kosovë i shpalosi Kreshnik Gashi nga BIRN Kosovo.

Ai thekson se zgjedhjet në Kosovë u karakterizuan me gjuhë të urrejtjes dhe dezinformata nga Kremlini dhe Serbia.

Po ashtu, Gashi tha se pati gjuhë të urrejtjes dhe dehumanizim për kundërshtarët politik brenda vendit.

Në zgjedhjet e 9 shkurtit sipas këtij raporti pati përdorim të lartë të rrjeteve sociale në multiplifikimin e gjuhës së urrejtjes dhe narrativave dezinformiese.

Rritje të përdorimit të inteligjencës artificiale në dezinformim, prani të influencës kineze në artikuj të sponzorizuar e transparencë e ulët e financimit të fushatës, janë ndër karakteristikat e zgjedhjeve paralmentare sipas Gashit.

Kryetari i Komunës së Kaçanikut, Besim Ilazi ka deklaruar se nuk i di motivet e vrasjes së rreshterit policor, Muhamed Lika i cili u vra mbrëmë pranë banesës së tij në këtë komunë, raporton KosovaPress.

Kryetari Ilazi para medieve tha se deri tani nuk dihet kush është kryesi i kësaj vrasje, dhe as motivi, por shtoi se organet e hetuesisë po vazhdojnë hetimet.

“Deri më tani nuk kemi informacione se cili është kryesi i aktit megjithatë organet e drejtësisë janë duke e bërë punën e tyre dhe shpresojmë se në momentin kur kemi informacione më të sakta do t’ua japin edhe medieve”, tha ai.

Ilazi tha se meqenëse kjo komunë konsiderohet e qetë, “është shokuar me vrasjes e rreshterit policor”.

Ai shton se rreshterin policor, Muhamed Lika e ka njohur si një njeri të edukuar dhe se nuk ka dëgjuar se kishte ndonjë shqetësim me dikë.

“Meqenëse komuna e Kaçanikut ka qenë një komunë mjaftë e qetë prej këtyre rasteve një rast që na ka shokuar të gjithëve dhe nuk i dimë ende motivet se si ka ndodhur ky rast. Por, megjithatë po presim të dhënat zyrtare që do të vijnë dhe atëherë do të kemi informacione të plota…edhe ata nuk kanë asnjë lloj piste hetimi deri tani po flas nga fjalët e komandantit të Policisë, megjithatë organet e hetuesisë janë duke e bërë punën e vetë… Për mua është një çudi një rast i tillë sepse ka qenë një zyrtar policor dhe person dhe njeri mjaftë i edukuar dhe absolut nuk kemi dëgjuae asnjë rast të vetëm të shqetësimit që ka ndodhur nga ai . Për ata për neve ka qenë një rast i befasishëm”, theksoi ai.

I pari i komunës së Kaçanikut tha se nuk ka informacione nëse janë duke u bërë patrullime në këtë qytetet pas rastit të mbrëmshëm.

“Ndoshta që rasti është ende në hetuesi nuk kemi ndonjë urdhër apo së paku informacion që patrullat e policisë janë ne vendet e patrullimit”, theksoi ai.

Kryetari Ilazi tha se ndonëse ende nuk dihet se kur do të varroset rreshteri policor, ai tha se do ta varrosin në varrezat e dëshmorëve në këtë komunë.

Rreshteri policor, Muhamed Lika është vrarë mbrëmë rreth orës 23:00 me armë zjarri në afërsi të banesës së tij në Kaçanik. Ndërkohë, i dyshuari për rastin akoma është në arrati.

Albin Kurti ka filluar takimet me partitë politike të pakicave për konsultim me to në lidhje me formimin e qeverisë së re, tha sot Qeveria e Kosovës në një njoftim për media.

Qeveria tha se kryeministri në detyrë ka filluar konsultimet me partitë sipas afateve kushtetuese drejt formimit të legjislaturës dhe qeverisë së re.

Në komunikatën e qeverisë thuhet se Kurti ka marrë mbështetje për bashkëqeverisje nga deputetja e zgjedhur e komunitetit boshnjak, Emilija Redzepi.

“Në kuadër të këtyre diskutimeve, kryeministri u takua me zëvendëskryeministren e tretë për Çështje të Pakicave dhe të Drejtat e Njeriut dhe kryetaren e Partia e Re Demokratike (NDS), Emilija Rexhepi. Ajo e konfirmoi gatishmërinë e plotë për vazhdim të bashkëpunimit me Lëvizjen VETËVENDOSJE! si fituese e zgjedhjeve të fundit dhe mbështetjes së kryeministrit Kurti në formimin e qeverisë së re”, tha qeveria në njoftim.

“Kryeministri Kurti e falënderoi znj. Rexhepi për bashkëpunimin e frytshëm, rezultatet e arritura gjatë këtij mandati dhe punët e mbara që na presin në katër vjeçarin e ardhshëm”, thuhet në njoftim.

Lëvizja Vetëvendosje është shprehur e sigurt se do ta formojë qeverinë e re, pa përjashtuar mundësinë e krijimit të koalicioneve.

Ministrja e Ekonomisë në largim dhe anëtarja e Vetëvendosjes, Artane Rizvanolli tha të martën se nuk ka alternativë tjetër përpo një qeverie të re me Kurtin kryeministër.

“Sigurisht që në një kohë të tillë, gjithmonë formimi i institucioneve është një pyetje që nuk mund të tejkalohet. Unë mund të them që LVV-ja si forcë politike që tejkalon edhe fuqinë politike të dy partive të tjera që vijnë me radhë, sigurisht që do të formojë Qeverinë Kurti 3 dhe nuk ka asnjë alternativë tjetër se si do të ndodhte ndryshe me këto rezultate të zgjedhjeve”, tha Rizvanolli në një intervistë për RTK Prime në Transmetuesin Publik.

E pyetur nëse LVV-ja do ta formojë qeverinë e vetme, ajo tha se nuk mund të flasë për këtë çështje momentalisht.

“Kjo nuk është diçka për të cilën unë mund të them momentalisht”, u përgjigj ministrja në largim.

Një ngjarje e rëndë ka ndodhur mbrëmë në rrugën “Idriz Seferi” në Kaçanik, ku Kosova u trondit nga vrasja e rreshterit të Policisë, Muhamed Lika. Ai u qëllua për vdekje para ndërtesës ku banonte në Kaçanik.

Për vrasjen e rreshterit Lika, para pak minutash ka reguar kryetari i Kuvendit të Kosovës, Glauk Konjufca.

Ai është shprehur i pikëlluar për këtë ngjarje dhe po ashtu ka bërë thirrje për hetimin e rastit dhe kapjen e autorit.

“Shumë i pikëlluar për vrasjen e rreshterit policor Muhamed Lika në Kaçanik. Kjo është një ngjarje e rëndë dhe tejet pikëlluese, ku u qëllua për vdekje një zyrtar policor i Kosovës, i cili deri dje ishte në shërbim të mbrojtjes së rendit dhe sigurisë së qytetarëve.

Bëj thirrje për hetime sa më të plota e të shpejta që është e mundur, në mënyrë që autori apo autorët e këtij krimi të vendosen përballë drejtësisë”, ka shkruar Konjufca në Facebook.

Tutje, ai iu ka shprehur ngusëllimë familjarëve, miqve dhe kolegëve të rreshterit Muhamed Lika.

Një veturë e Policisë së Kosovës shihet ende e pozicionuar në rrugën “Idriz Seferi” në Kaçanik, aty ku mbrëmë u vra rreshteri Muhamed Lika.

Pamjet nga vendi i ngjarjes tregojnë prani të shtuar të policisë, ndërkohë që hetimet për zbardhjen e këtij rasti të rëndë janë në vazhdim, raporton ATV.

Në hyrjen e objektit ku banonte viktima vërehen edhe shenja të dukshme në mur dhe derë, që mund të jenë pjesë e provave të mbledhura nga hetuesit.

Ngjarja tragjike ndodhi pranë hyrjes së ndërtesës ku banonte viktima, rreth orës 23:00 të së martës.

Rreshteri Lika u qëllua me armë zjarri në momentin që po hynte në banesën e tij. Ekipi i emergjencës e transportoi menjëherë në Qendrën e Mjekësisë në Kaçanik, por për shkak të plagëve të rënda ai nuk arriti të mbijetojë — vdekja e tij u konstatua nga mjekët.

I dyshuari për këtë vrasje është ende në arrati, ndërkohë që motivet mbeten të panjohura.

Kujtojmë se vrasja e rreshterit Muhamed Lika është vrasja e pestë që ka ndodhur në dhjetë ditët e fundit në Kosovë. /atvlive.tv

Ministrja e Ekonomisë, Artane Rizvanolli është përpjekur që ta heqë nga vetja përgjegjësinë për propozimin për rritje të çmimit të energjisë elektrike, në një intervistë të rrallë për media të martën.

Në një intervistë për RTK, me fillim të saj, Rizvanolli ZRRE-ja e theksoi se ZRRE-ja është “institucion i pavarur” dhe se ky institucion e ka propozuar rritjen.

“Siç e dini, ZRRE-ja si institucion i pavarur i ka publikuar raportet konsultative më 14 mars dhe ka propozuar një rritje mesatare të çmimit rreth 15 për qind. E para: vendimi nuk është marrë për strukturën tarfore dhe e dyta: kjo rritje e propozuar nuk është përcaktuar ende sesi do të ndahet kjo rritje te bizneset apo te amvisëritë”, tha Rizvanolli të martën, transmeton Paparaci.

Në vazhdim, përfaqësuesja e Qeverisë që erdhi në pushtet me premtime për zbritje të çmimit të rrymës, e pranoi se qeveria është pro shtrenjtimit të energjisë elektrike.

Por, në një tjetër përpjekje dëshpëruese për t’u arsyetuar, tha se Qeveria ka propozuar që rritja të zbutet.

Sipas Rizvanollit, Qeveria i ka propozuar ZRRE-së që të mos preken amvisëritë që shpenzojnë deri në 800 kw/H.

“Ky është vendim i ZRRE-së, të cilët ata kanë thënë se do ta marrin brenda dy javësh në vijim, ndërsa ne si qeveri kemi propozuar që rritja të zbutet dhe për këtë kemi dhënë disa argumente. E dyta është që të mos preken nga rritja amvisëritë që konsumojnë nën 800 kW/h për muaj. E treta është që të shtohet numri i blloqeve të konsumit duke shtuar një ose më shumë breze të konsumit mbi këtë konsumin prej 800 Kw/h të cilën e kemi aktualisht”, tha ajo.

Rizvanolli tha se statistikat tregojnë se amvisëritë që konsumojnë mbi 1000 kilovat për orë, përbëjnë një numër të vogël të ekonomive familjare.

“Në nëntor të vitit 2024, vetëm 12 për qind e amvisërive kishin konsumuar mbi 1000 kW/h, mirëpo këto kishin konsumuar 39 për qind të konsumit të gjithëmbarshëm të familjeve”, sipas Rizvanollit.

ZRRE-ja pritet që të marrë vendim për shtrenjtimin e propozuar të energjisë elektrike më 11 prill.

Aktivistë të shoqërisë civile kanë zhvilluar një sërë aktivitetesh kundër shtrenjtimit të energjisë elektrike.

Edhe opozita, e cila është e fokusuar aktualisht te veprimet politike paszgjedhore, e ka kundërshtuar rritjen e çmimit të rrymës.

Presidentja e Kosovës, Vjosa Osmani, tha se në takimin me sekretarin e jashtëm të Mbretërisë së Bashkuar David Lammy, i propozoi lidhjen e marrëveshjes për thellimin e bashkëpunimit në fushat e mbrojtjes dhe ekonomisë, raporton EO.

Ajo në konferencën për media pohoi se ky propozim u mirëprit nga sekretari britanik Lamy.

“Kjo vizitë është një dëshmi e marrëdhënieve të shkëlqyera dhe të çmuara ndërmjet dy shteteve. Kam bërë propozimin për lidhjen e marrëveshjes për thellimin strategjik të bashkëpunimit ndërmjet Kosovës dhe Mbretërisë së Bashkuara që do të mbulojë fushën e mbrojtjes dhe ekonomisë. Sot kemi diskutuar gjerë e gjatë për bashkëpunimin në këto fusha. E vlerësoj faktin që e keni mirëpritur këtë bashkëpunim. Një temë e rëndësishme ishte edhe dialogu me Serbinë”, tha presidentja Osmani.

Një protestë kundër shtrenjtimit të energjisë elektrike në Kosovë, para Zyrës së Rregullatorit për Energji (ZRRE), e cila pritet të vendosë rreth një propozimi për ngritjen e çmimit të rrymës në vend, ka përfunduar me arrestimin e disa personave në mëngjesin e së mërkurës.

Aktivistë kundër shtrenjtimit të rrymës bllokuan zyrat e ZRRE-së në lagjen Lakrishte, në Prishtinë, para se të prangoseshin nga Policia e Kosovës, raporton Radio Evropa e Lirë.

Arsyeja e arrestimit të tyre nuk është bërë e ditur, dhe as numri i personave të arrestuar. Radio Evropa e Lirë ka kontaktuar Policinë e Kosovës, por nga ky institucion nuk kanë dhënë hollësi për këtë ngjarje.

“ZRRE-ja është në bllokadë. Bllokimi do të vazhdojë deri në zotimin publik nga ZRRE se nuk do ta miratojë rritjen e çmimit të rrymës për 15%. Vetëm atëherë mund t’i kthehen punës”, u tha në një postim të faqes “KEDS t’i kthehet Kosovës”, para arrestimeve.

ZRRE-ja paralajmëroi se, nga muaji prill, faturat e energjisë elektrike mund të rriten për 15 për qind.

Aktualisht, për konsumatorët që shpenzojnë deri në 800 kilovatë në orë brenda një muaji, çmimi i rrymës gjatë ditës është 7.79 centë për kilovat. Në rast të shtrenjtimit për 15%, ata do të paguanin 8.96 centë.

ZRRE-ja i shqyrton dhe cakton tarifat e energjisë elektrike çdo vit dhe ato janë në fuqi nga 1 prilli deri më 31 mars të vitit pasues.

Vendimi për shtrenjtimin ose jo të rrymës këtë vit pritet të merret më 11 prill, ndërsa tarifat e reja është thënë se do të mund të hynin në fuqi retroaktivisht nga 1 prilli, ose nga 1 maji.

Sipas ZRRE-së, rritja e tarifave këtë vit është e domosdoshme, për shkak të uljes së prodhimit të energjisë, rritjes së konsumit dhe varësisë së madhe nga importet me çmime të larta.

Kosova nuk mund ta sigurojë energjinë e nevojshme për mbi 1.6 milion banorët e saj vetëm me prodhimin nga Korporata Energjetike e Kosovës (KEK).

Një nga arsyet është vjetërsia me dekada e termocentraleve “Kosova A” dhe “Kosova B”.

Prodhim ka edhe përmes burimeve të ripërtërishme, por në sasi më të vogla.

Prodhimi i pamjaftueshëm bën që një pjesë e konsiderueshme e furnizimit të sigurohet përmes importeve, që janë të shtrenjta. /REL

Avokati Amer Alija, në emisionin CONTEXT në ATV, tha se Gjykata Speciale është drejt përfundimit të misionit të saj dhe pritet që, pas përmbylljes së rastit kryesor kundër Thaçit dhe të tjerëve, të mbyllet brenda pak vitesh.

Sipas tij, tashmë nuk priten aktakuza të reja, ndërsa edhe stafi i dhomave të specializuara do të nisë të reduktohet gradualisht.

“Unë e besoj që ky rast kundër Thaçit dhe të tjerëve është rasti kryesor. Tani më kanë pasur mjaftueshëm kohë që në rast se kanë pasur prova, të kishin ngritur akuza të reja. Besoj që gradualisht kompetencat dhe stafi i cili është angazhuar do të fillojë të reduktohet”, deklaroi Alija.

Ai tha se mbyllja zyrtare do të ndodhë pas përfundimit të plotë të rasteve dhe pas njoftimit të Këshillit të Evropës nga Zyra e Prokurorit se nuk ka më aktakuza të planifikuara.

“Pas përfundimit të rastit më të madh, nëse nuk ka rigjykim, brenda pak viteve do të kemi edhe mbylljen e kësaj gjykate. Kjo gjykatë është krijuar për një dyshim specifik që rrjedh nga raporti i Dik Martit, dhe provat kryesore kanë qenë ato që janë përdorur edhe në proceset e kaluara, në Tribunalin e Hagës, në UNMIK dhe EULEX”, shtoi Alija.

Deklaratën e plotë të Amer Alijës në CONTEXT, e gjeni në videon më poshtë:

Avokati Taulant Hodaj, në emisionin CONTEXT në ATV, dha një lajm të mirë lidhur me Gjykatën Speciale në Hagë, duke thënë se nuk pritet të ngriten aktakuza të reja dhe se rasti aktual pritet të përfundojë në shkallë të parë brenda këtij viti.

Hodaj theksoi se ndonëse procesi ka pasur shumë seanca të mbyllura, pritet që brenda vitit të ketë një vendim në shkallën e parë për rastin aktual.

“Ky rast mendoj që në praktikën ndërkombëtare penale do të jetë një ndër rastet që më së paku ka pasë transparencë… por unë besoj që në fund të këtij viti të kryhet në shkallë të parë kjo rast,” deklaroi Hodaj.

Ai zbuloi gjithashtu se nga ajo që ka parë dhe dëgjuar në përvojën e tij të drejtpërdrejtë, Gjykata Speciale nuk ka më qëllim të ngrejë aktakuza të reja për krime lufte.

“Është një gjë e mirë që kjo gjykatë po shihet që nuk do të ngritë aktakuza të reja për krime lufte… kanë qenë rreth dyqind persona që janë marrë si të dyshuar dhe tani një numër i madh janë
liruar nga ky status,” tha Hodaj.

Deklaratën e plotë të Taulant Hodajt në CONTEXT, e gjeni në videon më poshtë: