Tag: Ballina

Diaspora e Kosovës është një aset i fuqishëm, por i pashfrytëzuar në forcimin e pozitës ndërkombëtare të vendit, thonë njohësit e kësaj fushe. Dikur forcë lëvizëse e përpjekjeve për pavarësi, sot potenciali i saj mbetet i fragmentuar, sipas tyre.

Me një “potencial të jashtëzakonshëm”, diaspora e Kosovës mund të bëhet faktor në forcimin e pozicionit ndërkombëtar të vendit, por i mungon kauza e unifikuar dhe koordinimi i mirëfilltë, thonë vëzhguesit e veprimtarisë së saj.

Lirim Krasniqi, analist i politikave në organizatën Germin, thotë se “politikat dhe strategjitë duhet të vijnë nga Kosova” dhe të tillat, sipas tij, mungojnë.

Më konstatimin e tij pajtohet edhe ish-zëvendësministri i Jashtëm i Kosovës, Valon Murtezaj, aktualisht ligjërues i Diplomacisë në Shkollën e Menaxhmentit IESEG në Paris.

Sipas tij, Kosova nuk e shfrytëzon siç duhet potencialin e diasporës së saj për të hapur shtigje të reja për diplomaci, në të mirë të vendit.

“Kjo nuk do të thotë se nuk ka veprimtari. Por, veprimtaria e diasporës, e individëve të shquar, e grupeve të ndryshme – qofshin biznesmenë, akademikë, njerëz të kulturës dhe artit – mbetet e fragmentuar dhe e izoluar”, vlerëson Murtezaj për Radion Evropa e Lirë.

Në regjistrimin e fundit të popullsisë në Kosovë, në vitin 2024, për herë të parë u përfshinë edhe kosovarët që jetojnë në diasporë.

Prej tyre, u regjistruan rreth 550 mijë, sipas të dhënave që publikoi Agjencia e Statistikave të Kosovës.

Por, besohet se numri i personave me prejardhje nga Kosova, që jetojnë në diasporë, është shumë më i lartë, vetëm se ata nuk e kanë shtetësinë kosovare.

Cili ishte dhe është roli i diasporës në diplomaci?

Viteve të fundit, diaspora ka luajtur rol në ndarjen e ulëseve në Kuvendin e Kosovës, përmes votës.

Për zgjedhjet e fundit parlamentare, që u mbajtën më 9 shkurt, u regjistruan afro 105 mijë votues nga diaspora, prej të cilëve votuan rreth 80.000 – disa në përfaqësi diplomatike, të tjerët me postë.

Partitë kryesore politike, para dhe gjatë fushatës zgjedhore, organizuan disa tubime me kosovarët në diasporë – sidomos në Evropë – duke kërkuar mbështetje për vota.

Profesori Murtezaj thotë se, marrë parasysh potencialin e madh të diasporës, qasja e partive dhe institucioneve të Kosovës ndaj saj është paradoksale, sepse ajo shihet vetëm si burim votash.

“[Votimi] është minimumi që mund ta bëjë individi. Angazhimi dhe bashkëpunimi do të duhej të ishin shumë përtej kësaj, sepse zgjedhjet janë një ditë në katër vjet, ndërsa kontributi potencial i diasporës është 365 ditë apo tërë jetën”, thotë Murtezaj.

Ai vlerëson se shembulli më i mirë i fuqisë së veprimit të diasporës është periudha e viteve ’90.

Asokohe, Kosova gjendej nën regjimin serb të Sllobodan Millosheviqit, aparati shtetëror i të cilit ushtroi dhunë dhe la pa punë shumicën e madhe të kosovarëve.

Gjatë asaj kohe, remitencat nga diaspora ishin ndër burimet kryesore të mbijetesës për shqiptarët e Kosovës, të cilët organizuan institucionet e tyre paralele.

Edhe këto lëvizje politike në atë periudhë financoheshin kryesisht nga diaspora, e cila lobonte për çështjen e Kosovës gjetkë në botë.

Avni Spahiu, ish-ambasador i Kosovës në Shtetet e Bashkuara dhe në Turqi, e përshkruan si të pazëvendësueshëm rolin e diasporës shqiptare në SHBA për çështjen e Kosovës, gjatë viteve 90.

Ai thekson se diaspora mund ta luajë këtë rol edhe sot, në kohën kur “lobimi në Uashington është në pikën më të ulët”.

Përmes diasporës, ai thotë se Kosova mund të iniciojë riformatimin e “grupit shqiptar të miqësisë”, që aktualisht mungon në Kongresin amerikan, por që dikur përbëhej nga kongresistë si: Eliot Engel, Tom Lantos, Bob Dole e të tjerë.

“Tash, sa mund të bëjë diaspora? Ata janë edhe amerikanë dhe kanë të drejtë të kërkojnë të kontaktojnë me Kongresin, ta bëjnë ‘grupin e miqësisë’. Tash kemi nevojë”, thotë Spahiu për Radion Evropa e Lirë.

Ai shton se diaspora e Kosovës ka individë me ndikim që mund të ndihmojnë në krijimin e “grupeve të miqësisë” edhe në parlamentet e vendeve të tjera perëndimore.

Gjatë viteve ‘80 dhe ‘90, në vendet perëndimore ekzistonin shumë shoqata, klube dhe organizata të tjera të diasporës së Kosovës, që operonin kryesisht mbi bazën e angazhimit vullnetar.

Krasniqi, nga organizata Germin, thotë se ato ishin pikëtakime jo vetëm për ruajtjen e kontakteve ndërmjet shqiptarëve të Kosovës, por edhe për organizimin e ndihmave financiare për vendin, si dhe për krijimin e lidhjeve me kanalet politike dhe diplomatike të vendeve ku jetonin.

Sipas tij, shoqata e organizata të tilla ekzistojnë edhe sot, por nuk mund të pritet që të veprojnë siç vepruan në vitet ‘90.

Kauza që i bashkonte në atë kohë, ishte lufta për demokraci dhe pavarësi të Kosovës nga ish-Jugosllavia, veçanërisht nga Serbia, sipas Krasniqit.

“Atëherë, kauza ishte e përbashkët dhe të gjithë vepronin me forca vetanake, duke e ditur mungesën e një shteti që do t’i orientonte dhe organizonte. Sot, nuk mund të pritet një organizim i tillë, sepse sot e kemi një shtet, i kemi institucionet”, thotë Krasniqi për Radion Evropa e Lirë.

Sipas tij, janë institucionet e Kosovës ato që duhet ta orientojnë sot diasporën, për ta shndërruar potencialin e saj në fuqi diplomatike.

Si të vihet diaspora në funksion të diplomacisë?

Para gati dy javësh, Radio Evropa e Lirë i drejtoi Ministrisë së Punëve të Jashtme dhe Diasporës së Kosovës pyetje në lidhje me koordinimin e mundshëm midis institucioneve të Kosovës dhe diasporës, si dhe për kontributin e saj të mundshëm në forcimin e pozicionit ndërkombëtar të Kosovës, por, nuk mori përgjigje.

Murtezaj, i cili shërbeu si zëvendësministër i Punëve të Jashtme të Kosovës nga marsi i vitit 2016 deri në qershor të vitit 2017, thotë se një nga sfidat që e ka përcjellë dhe vazhdon ta përcjellë këtë ministri, është mungesa e strategjive të veçanta për çdo vend, marrë parasysh kontekstet e ndryshme në shtetet perëndimore dhe të tjera, ku jetojnë kosovarët ose individë me origjinë nga Kosova.

“Nuk vlejnë sjelljet dhe objektivat e njëjta për secilin vend. Qeveria e Kosovës duhet të ketë strategji unike, individuale për secilin kontekst shtetëror apo regjional nëpër botë”, thotë Murtezaj, duke shprehur bindjen se institucioneve të Kosovës u mungon edhe të kuptuarit e rolit të diplomacisë publike.

“Diplomacia publike shkon përtej komunikimeve zyrtare ‘qeveri me qeveri’ apo ‘ambasadë me ambasadë’. Diplomacia publike prek të gjitha shtresat dhe sferat e jetës në një vend përkatës”, thotë Murtezaj.

Sipas tij, ajo duhet të ketë qëllim edhe krijimin e një terreni për realizimin e ambicieve diplomatike mes autoriteteve të dy shteteve, përmes rritjes së vetëdijes, ndërgjegjësimit dhe më pas edhe njohjes ndërkombëtare të një shteti.

Në këtë lloj diplomacie, thotë Murtezaj, duhet të përfshihen individë nga Kosova që paraqesin histori suksesi dhe që ndihmojnë në relaksimin e marrëdhënieve ndërnjerëzore, kulturore, akademike, institucionale, sportive dhe të tjera.

E, Kosova ka mjaft individë dhe grupe të tilla në diasporë, sipas Murtezajt.

“Për t’i nxjerrë përfitimet nga kjo minierë potenciale e kontributit për Kosovën, duhet një strategji ombrellë, e cila pastaj ka mundësi t’i orientojë këto kontribute në synime të caktuara”, thekson ai.

Kosova, aktualisht, nuk ka të angazhuar asnjë kompani lobimi në Shtetet e Bashkuara të Amerikës.

Ish-ambasadori Spahiu thotë se institucionet e Kosovës po sillen me “komoditet të tepërt” në lidhje me këtë çështje.

Sipas tij, forcimi i imazhit të Kosovës është i domosdoshëm, në kohën kur raportet Kosovë-SHBA janë lëkundur, si pasojë e disa veprimeve të Qeverisë së Kosovës në pjesën veriore të vendit, të cilat SHBA-ja i ka konsideruar si të pakoordinuara dhe me ndikim jo të mirë te komuniteti serb lokal.

“Mendoj se mund të bëhet më shumë. Të kërkojmë forma të reja organizimi dhe që diaspora të mos jetë e shpërqendruar. Iniciativat duhet të nisin nga diplomacia jonë”, thekson Spahiu.

Për Krasniqin, nga organizata Germin, angazhimi i diasporës në çështjet diplomatike është paksa edhe delikat, sidomos kur bëhet fjalë për kontraktimin e kompanive lobuese ose individëve për këtë çështje.

Ai sqaron se shumë individë nga diaspora janë shtetas të vendeve ku jetojnë dhe thotë se kjo do të krijonte një situatë të ndjeshme nëse ata do të angazhoheshin për një shtet tjetër – në këtë rast Kosovën.

Një ide, Krasniqi thotë se mund të jetë krijimi i një departamenti të institucionalizuar, që do të merrej vazhdimisht me çështjet e diasporës dhe angazhimin e saj diplomatik.

Radio Evropa e Lirë bëri përpjekje t’i kontaktojë disa shoqata të kosovarëve në diasporë, si në Evropë, ashtu edhe në SHBA, për të marrë komentet e tyre për qasjen e institucioneve të Kosovës ndaj angazhimit të diasporës në çështje diplomatike. Por, deri në publikimin e këtij artikulli, ato nuk u përgjigjën.

Qytetarët e Kosovës, prej kohësh, pranojnë mbi 1 miliard euro remitenca në vit.

Të dhënat e Bankës Qendrore të Kosovës tregojnë, po ashtu, se diaspora zë vendin e parë sa u përket investimeve të huaja në Kosovë, të cilat bëhen kryesisht në patundshmëri. /Radio Evropa e Lirë

Qeveria në detyrë e Kosovës dhe Qeveria e Maqedonisë së Veriut sot do të përurojnë pikëkalimin e përbashkët kufitar “Hani i Elezit – Bllacë”.

Ceremonia do të mbahet nga ora 11:00 brenda territorit të Maqedonisë së Veriut.

Gjatë kësaj ceremonie mund të ketë ngadalësim të qarkullimit në këtë pikë kufitare, bëri me dije dje Qendra Kombëtare për Menaxhim Kufitar.

“Me këtë rast, njoftohen të gjithë qytetarët që planifikojnë të shfrytëzojnë këtë pikë kufitare, se nga ora 10:00 deri në ora 12:00, do të ketë ngadalësim të qarkullimit”, u tha në njoftim.

Ministri i Punëve të Brendshme i Maqedonisë së Veriut, Pançe Toshkovski, në shkurt kishte njoftuar se në prill të këtij viti do të fillojë funksionimi i sistemit të kontrollit të përbashkët kufitar, i njohur si “One Stop Shop”, në pikën e Bllacës, që lidh Maqedoninë e Veriut me Kosovën.

Sipas Toshkovskit, ky sistem do të thjeshtojë procedurat kufitare, duke lejuar që qytetarët e të dyja vendeve të kontrollohen nga një polic i vetëm doganor, duke reduktuar “kohën e pritjes dhe duke lehtësuar kalimin e kufirit mes dy shteteve”.

“Në kuadër të një platforme të përbashkët ‘cloud’, të dhënat ndahen mes dy ministrive përkatëse, me qëllim që të mundësohet hyrja e qytetarëve të Kosovës në Maqedoninë e Veriut dhe anasjelltas, vetëm përmes konstatimit nga një zyrtar policor”, kishte thënë Toshkovski, siç raportonte REL.

Ai kishte dhënë prillin si muajin e fundit kur do të vihej zyrtarisht në funksion kjo.

Këto deklarata ministri i kishte bërë gjatë një vizite në pikën kufitare të Bllacës, së bashku me zëvendëskryeministrin e parë, Izet Mexhiti dhe homologun e tij nga Kosova, ministrin tashmë në detyrë Punëve të Brendshme, Xhelal Sveçla.

Sveçla kishte thënë se kjo do t’ia reduktojë kohën qytetarëve që kalojnë kufirin.

“Për qytetarët e të dyja vendeve është shumë me rëndësi që kalimi të jetë sa më i shpejtë. Për organet e shtetit është që ato të jenë sa më të sigurta. Patjetër se ne po i shfrytëzojmë të arriturat e fundit të teknologjisë që të zvogëlojmë burokracinë, por jo në kurriz të sigurisë, por në të mirë të kohës së qytetarëve”.

Pika kufitare në Bllacë është përballur kohët e fundit me kolona të gjata në të dy anët e kufirit. Procesi për krijimin e pikave të përbashkëta kufitare ka filluar në qershor të vitit 2024.

Zyra e Rregullatorit të Energjisë ka bërë një njoftim zyrtar për media pas mbledhjes së mbajtur sot.

Në këtë njoftim, zyrtarisht kanë treguar se çmimi i energjisë elektrike është rritur për rreth 16 % për të gjitha kategoritë e konsumatorëve, bazuar në të Hyrat e Lejuara Maksimale.

Njoftimi i plotë:

 KOMUNIKATË

Seanca III e Bordit të ZRRE-së në 2025

Më 11.04.2025, Bordi i Zyrës së Rregullatorit për Energji ka mbajtur seancën e tretë për vitin 2025. Në këtë seancë, Bordi i ZRRE-së ka shqyrtuar dhe aprovuar të Hyrat e Lejuara Maksimale për operatorët e licencuar, si në vijim:

– Kërkesa/propozimi fillestar i KOSTT-it për të Hyrat e Lejuara Maksimale për OST/OT – ka qene 101.878 mil€ ndërsa ZRRE i ka aprovuar këto të hyra në vlerën prej 88.198 mil€;

– Kërkesa/propozimi fillestar i KEDS-it për të Hyrat e Lejuara Maksimale për OSSH ka qenë 214.45 mil€ ndërsa ZRRE i ka aprovuar këto të hyra në vlerën prej 180.653 mil€;

– Kërkesa/propozimi fillestar i KESCO-s për të Hyrat e Lejuara Maksimale për FSHU ka qene 447.626 mil€ ndërsa ZRRE i ka aprovuar këto të hyra në vlerën prej 435.626 mil€, ku përfshihen operatorët e licencuar OSSH dhe OST/OT.

Rritja mesatare e tarifave për të gjitha kategoritë e konsumatorëve bazuar në të Hyrat e Lejuara Maksimale është rreth 16%.

Pjesë e shqyrtimit nga Bordi kanë qenë edhe ankesat e konsumatorëve dhe çështje të tjera të lidhura me funksionimin e Zyrës së Rregullatorit për Energji.

Të gjitha vendimet e Bordit të ZRRE do të publikohen në faqen elektronike ëëë.ero-ks.org

Pak pas mbledhjes së Zyrës së Rregullatorit për Energji, ku u miratua propozimi për shtrenjtimin e çmimit të rrymës, ka nisur protesta e paralajmëruar nga iniciativa “Asnjë cent më shumë” në Prishtinë.

Disa qytetarë, të cilët mbajnë pankarta në duar, janë mbledhur në sheshin “Zahir Pajaziti” në kryeqytet.

“Stop vjedhjes me tarifa”, “Fatura jonë, pasuria juaj”, “Nuk paguajmë për dështimet tuaja”, “Qytetarët nuk janë bankomat”, ishin disa nga pankartat që qytetarët po mbajnë në duar.

Ndërkohë, ZRRE-ja, edhe pse nuk e bëri publike përqindjen e saktë të rritjes, Radio Evropa e Lirë raportoi me burime të brendshme se rritja mund të arrijë deri në 16 për qind.

ZRRE-ja tha se do të njoftojë për përqindjen e rritjes së çmimit të rrymës në ditët në vijim.

Pas përfundimit të zgjedhjeve parlamentare në Kosovë, procesi i konstituimit të legjislaturës së re ka nisur zyrtarisht.

Që nga dje, në ambientet e Kuvendit të Kosovës ka filluar regjistrimi i deputetëve të rinj të zgjedhur, si hap formal që i paraprin seancës konstituive.

Gjatë ditës së djeshme, regjistrimin e kanë kryer deputetët e Lëvizjes Vetëvendosje, ndërsa sot pritet të vijojnë deputetët nga radhët e Partisë Demokratike të Kosovës dhe Lidhjes Demokratike të Kosovës.

Ndërkohë, të hënën është paraparë që të regjistrohen deputetët e koalicionit AAK-Nisma, si dhe ata nga komunitetet pakicë.

Ky proces është i domosdoshëm për të mundësuar mbajtjen e seancës së parë të Kuvendit, e cila do të mbahet më 15 prill 2025.

Në këtë seancë, përveç betimit të deputetëve, pritet të zgjidhet edhe kryetari i Kuvendit dhe të formohen strukturat e para parlamentare.

Propozimi për rritjen e çmimit të energjisë elektrike ka ngjallur reagime të ashpra nga qytetarët, ndërsa vendimi pritet të merret të sot.

Me fillim nga ora 10:00, më 11 prill, Bordi i Zyrës së Rregullatorit për Energji do të mbajë seancën e tretë për këtë vit, ku në rend dite është shqyrtimi i propozimit për shtrenjtim të energjisë elektrike për 15 për qind.

Sipas njoftimit të ZRRE-së, përveç miratimit të procesverbalit nga seanca e kaluar, Bordi do të shqyrtojë edhe të hyrat e lejuara maksimale për operatorët energjetikë.

E ndërkohë që autoritetet përgatiten për marrjen e këtij vendimi, qytetarët janë mobilizuar për të kundërshtuar rritjen e çmimit.

Me fillim nga ora 12:00 të së njëjtës ditë, është paralajmëruar protesta e dytë e qytetarëve kundër këtij propozimi, pas një vale të gjerë reagimesh në rrjete sociale, ku janë shënuar qindra komente kundërshtuese.

Përgatiti: Arian Hajdaraj

Me “Kosova dhe Metohija” në Serbi gjithmonë i referohen Republikës së Kosovës.

Por, me këtë term, iu referuan vendit edhe në një institucion që konsiderohet të jetë i saj, respektivisht Zyrën e Prokurorit të Specializuar, në Hagë.

Në një dokument të muajit shkurt 2023, përshkruhet se duke iu drejtuar Sefer Goxhulit, njëri nga dy hetuesit e ZPS-së të cilët po e intervistonin e përmendën emrin për çka i intervistuari ishte ankuar më pas, përmes avokatit të popullit.

“Në fillim të intervistës, njëri prej punonjësve, gjatë leximit të një dokumenti, iu referua Republikës së Kosovës me fjalët ‘Kosovo i Metohija’ (‘Kosovë dhe Metohi’. Në atë moment, ankuesi nuk ngriti ndonjë kundërshtim dhe shqetësim në lidhje me përdorimin e shprehjes ‘Kosovë dhe Metohi’, pasi u këshillua të mos e bënte këtë nga mbrojtësi i tij. Megjithatë, në fund të intervistës, ai shprehu shqetësimin e tij për përdorimin e kësaj shprehjeje në dokumentacion”, thuhet në ankesën e Avokatit të Popullit.

Në përgjigjen ndaj ankesës, ZPS aso kohe kishte pranuar se hetuesi e kishte përdorur termin, por gabimisht. Por, Goxhuli, po në atë ankesë, shprehej i bindur se nuk ishte vetëm lëshim.

Ankuesi gjithashtu pretendon se përdorimi i termit nuk ishte thjesht rezultat i një gabimi gjuhësor nga ana e përfaqësuesit të ZPS-së, dhe vë në dukje faktin se përfaqësuesi në fjalë po e lexonte nga një dokument ku përdorej termi.

Me apo pa qëllim, përdorimi i këtij termi sipas njohësve të punës së këtij institucioni, konsiderohet shkelje e rëndë.

“E konsideroj si një skandal, dhe si një tendencë për ta zhvleftësuar sistemin juridik të Kosovës. Konsideroj që Institucionet e Kosovës, qeveria që do themelohet, se kjo që ishte nuk interesohej, do duhej t’ia shkruante një letër, kryetares së dhomave të specializuara”, tha Xhevdet Smakiqi, avokat.

Kjo shpërfaq edhe diçka tjetër, thotë një tjetër avokat.

“Është e papranueshme dhe e pafalshme. Kjo shpërfaqë faktin se prapa këtij procesi qëndron Serbia”, tha Ardian Bajraktari, avokat.

Sefer Goxhuli, në kohën kur u intervistua, siç kupton ATV, ishte shef i një departamenti në Agjencinë e Kosovës për Inteligjencë.

Përgatiti: Pranvera Krasniqi

Komiteti i Punëve të Jashtme të Parlamentit Evropian miratoi një raport në të cilin përgëzohet progresi që Kosova shënoi në rrugën drejt integrimit evropian.

Në raport vlerësohen reformat në rrugën e Kosovës drejt anëtarësimit në Bashkimin Evropian duke theksuar vendosmërinë e “sigurt” për këtë.

Megjithatë, Kosova është larg heqjes së masave të Bashkimit Evropian ndonëse disa prej euro deputetëve gjatë seancës të së mërkurës bënë thirrje për këtë.

“Ne e dimë në çfarë situate jemi duhet konsensus i plotë, qytetari nuk i vëren, mirëpo shteti po, shumë projekte mbesin pezull, jemi larg mundësisë mu marrë një vendim i tillë, duhet të formohet një qeveri legjitime e që bën pastaj hap me bashkimin evropian”, tha Bekim Kabashi, njohës politik.

Bashkimi Evropian ndëshkoi Kosovën në qershor të 2023-s për shkak të veprimeve të njëanshme të Qeverisë dhe nxitjen e tensioneve etnike në veri.

“Ka shtete të cilat nuk pajtohen dhe këtë gjë mirë e dimë, nuk është procedurë e lehtë, nuk besoj që do të hiqen së shpejti…”, tha Basri Muja, njohës politik.

Kosova ka aplikuar për t’iu bashkuar bllokut 27-anëtarësh qysh në dhjetor të vitit 2022, por që nga ajo kohë nuk ka marrë kurrfarë përgjigje.

Paralajmërimi i ZRRE-së për ngritje të çmimit të energjisë elektrike prej 15% ka shkaktuar pakënaqësi te qytetarët dhe bizneset.

Qytetarët e shohin të papranueshme rritjen e çmimit të energjisë, disa prej tyre mendojnë se ka të bëjë me mungesën e strategjisë adekuate për zhvillim energjetik, ndërsa për dikën tjetër kjo duket e pashmangshme për shkak të zhvillimeve globale.

Lutfi Murtezi, qytetar, thotë se rritja e çmimit të energjisë vjen si pasojë e vendimeve jo adekuate në të kaluarën. Ai kritikon shoqërinë civile dhe faktorët ndërkombëtarë për pengimin e ndërtimit të termocentraleve që do të kishin siguruar energji më të lirë për vendin.

“Nuk është në rregull në këtë kohë krize, po çfarë ti bësh. Ne edhe informatat nuk i kemi si duhet. Kemi bërë gabime edhe para 20 viteve, është dashur t’i ndërtojmë termocentralet tona, të kemi energji të lirë. Shoqëria civile është e para që e ka kundërshtuar dhe e ka kundërshtuar pa të drejtë… të blejmë gjeneratorë dhe energji me çmime të pavolitshme për konsumatorët tonë, nuk kemi pasur politikë të mençur”, tha Murtezi.

Edhe Hasan Berisha konsideron se rritja e çmimit të energjisë elektrike nuk është e arsyeshme dhe propozon që çdo ndryshim të vlerësohet nga institucionet me kujdes.

“Nuk është mirë të shtrenjtohet, është mirë organet kompetente financiare, ata që merren me makro-financa me analiza të standardit të popullsisë me vlerësuar atë, nëse ka nevojë, atëherë edhe nëse bëhet një rritje ajo të mos jetë e madhe. Por, ndryshe në kushtet e tanishme është e pa qëllueshme me ngrit qysh ata po thonë 15% edhe po bëjnë manipulime njëherë prej 1 prill, tani prej 1 majit, nuk është mirë me rrit, aq më tepër kur KEK-u, industria e prodhimit të rrymës, ka deklaruar që brenda vitit nuk do të rritet çmimet e rrymës, atëherë mbetet me pyet pse agjensioni kompetent (ZRRE) po propozon me rritë”, tha ai.

Izet Zhura e sheh si normale rritjen e çmimit të energjisë, duke theksuar se kjo është një dukuri globale. Sipas tij, kërkesat për energji janë rritur pas luftës për shkak të ndërtimit të shumtë të objekteve që konsumojnë më shumë rrymë.

“Mendoj që është normale në këtë kohë edhe shtrenjtimi, sepse është shtrenjtuar energjia në krejt botën, jo vetëm te na. Kosova dikur e ka mbuluar veten kur ka qenë më e vogël, ka pasur më pak banesa e shtëpi, më pak e ka mbuluar kërkesat e veta. Tash pas luftës janë bërë shumë ndërtesa. Ato tash shpenzojnë energji elektrike”, potencoi ai.

Kujtojmë, më 11 prill pritet të miratohen tarifat e reja të energjisë elektrike nga ZRRE-ja, pasiKOSTT, KEDS dhe KESCO kërkuan një gjë të tillë për shkak të importit të energjisë elektrike. Nisma qytetare “Asnjë centë më shumë” do të mbajë të premten protestën e radhës për kundërshtuar e shtrenjtimin e energjisë elektrike.

Zyra e Rregullatorit për Energji Elektrike në Kosovë (ZRRE) bën shqyrtimin dhe caktimin e përvitshëm të tarifave të rrymës që shpallen çdo 1 prill dhe vlejnë deri më 31 mars.

Më 2024, ZRRE-ja e uli çmimin për konsumatorët komercialë dhe industrialë tre për qind, por më 2023 tarifat u rritën 15 për qind për të gjitha kategoritë e konsumatorëve.

Konsumatorët që shpenzojnë deri në 800 kilovatë në orë në muaj, çmimi i rrymës gjatë ditës është 7.79 centë për kilovat, ndërsa mbi 800 kilovatë pjesa mbi këtë u llogaritet me çmim 14.45 centë.

Kosova ka kapacitet të prodhojë rreth 800 megavatë rrymë në orë, ndërsa nevojat në stinën e dimrit arrijnë në 1.300. Mbi 20 për qind e energjisë elektrike prodhohet nga burimet alternative, si hidrocentralet, panelet solare dhe centralet me erë. Strategjia për Energji 2022-2031 përqendrohet tek investimet në energji të ripërtërirë, por një pjesë përfshin edhe TC Kosova A. /kp

Agim Bahtiri nga Lëvizja Vetëvendosje është regjistruar si deputet në Kuvendin e Kosovës. Ai komentoi para mediave qëndrimet sa i përket formimit të qeverisë, për çka tha se numrat do të bëhen me deputetët e Republikës së Kosovës.

Sa i përket formimit të qeverisë së re, Bahtiri tha se “numrat do të bëhen me deputetët e Republikës së Kosovës”.

“Unë mendoj se po, janë numrat për formimin e qeverisë…Numrat janë të deputetëve të cilët janë 61 e më shumë dhe ata do të bëhen… Është mendim i tyre, ne e dimë se i kemi numrat dhe do i bëjmë me deputetët e Republikës së Kosovës”, shtoi ai.

Kurse, kryeministri në detyrë, Albin Kurti edhe sot (e enjte) nuk i është përgjigjur mediave sa i përket formimit të qeverisë apo zgjedhjeve të jashtëzakonshme të mundshme.

Kryetari i LVV-së, Albin Kurti nuk është përgjigjur as dje për refuzimin e ftesës për konsultim që i bëri kryetari i Lidhjes Demokratike të Kosovës, Lumir Abdixhiku, gjatë ditës së martë. Përgjigje nuk dha as nëse do t’i ftojë partitë e tjera.

Ndërsa, nga legjislatura e ardhshme, Bahtiri tha se pret normalizimin e marrëdhënieve me Serbinë.

“Mendoj se qytetarë e Kosovës e kanë dhënë verdiktin e tyre për t’i çuar njerëzit më të mirë që ata kanë menduar dhe ne do t’i çojmë proceset e tyre… mendoj se zhvillimi ekonomik më të mirë për gjithë qytetarët pa dalim nacionaliteti dhe rajoni. Dhe mendoj se kryesorja e kësaj kohe që do të vije është që të bëjmë një herë e përgjithmonë ndërprerjen e mosmarrëveshjeve me Serbinë”, deklaroi ai.

Në zgjedhjet e 9 shkurtit, LVV-ja mori 48 mandate, numër ky i pa mjaftueshëm për të qeverisur e vetme në Kosovë.