Tag: Ballina

Deputeti i zgjedhur i Lëvizjes Vetëvendosje, Glauk Konjufca, deklaroi se kandidatura e Albulena Haxhiut për kryetare Kuvendi mbetet e pandryshuar, por tha se situata aktuale politike nuk mund të zgjidhet pa një marrëveshje ndërpartiake.

“Pa krijimin e një mazhorance për kryetarin e Kuvendit, nuk mund të themelohet Kuvendi. E njëjta vlen edhe për nënkryetarët”, tha Konjufca, duke kërkuar kohë shtesë për të shmangur përsëritjen e të njëjtës situatë.

Kryesuesi Avni Dehari, pas kësaj kërkese, ndërpreu seancën konstituive dhe njoftoi se ajo do të vazhdojë të mërkurën. /atvlive.tv

Për herë të katërt brenda pak ditësh, deputetët e zgjedhur të Kuvendit të Kosovës pritet të mblidhen sot nga ora 15:00 në përpjekje për ta konstituuar legjislaturën e re.

Procesi ka hasur në pengesa që nga seanca e parë konstituive më 15 prill, e cila u ndërpre për shkak të mosmarrëveshjeve për verifikimin e mandateve të deputetëve. Partitë opozitare – PDK, LDK dhe AAK – kundërshtuan raportin e Komisionit për verifikimin e mandateve, duke kërkuar dorëheqje formale nga anëtarët e Qeverisë që ishin zgjedhur deputetë.

Pas një ndërprerjeje të dytë më 17 prill dhe një tentative të tretë më 19 prill, më në fund u arrit konsensus për të votuar raportin e Komisionit të përkohshëm, duke i hapur rrugë betimit të deputetëve.

Deputetët u betuan me formulën kushtetuese, ndërsa Lëvizja Vetëvendosje propozoi Albulena Haxhiun për kryetare të Kuvendit. Megjithatë, ajo nuk arriti të zgjidhet në dy raunde votimi – duke marrë 57 vota për, 20 kundër dhe tre abstenime – një numër i pamjaftueshëm për zgjedhje.

Seanca u ndërpre për herë të tretë, ndërsa sot pritet tentativa e katërt për konstituim të Kuvendit. Vëmendja është përqendruar tek qëndrimet e partive opozitare, të cilat kanë paralajmëruar se nuk do ta mbështesin kandidaturën e Haxhiut.

A do të ketë zgjidhje sot apo do të përsëritet skenari i ditëve të kaluara, mbetet të shihet në vazhdim. /atvlive.tv

Të gjitha zhvillimet e fundit mund t’i përcillni drejtpërdrejt në ATV, në videon më poshtë:

Prokuroria Themelore në Ferizaj ka njoftuar se ka kërkuar caktimin e masës së paraburgimit ndaj shtatë të arrestuarve sot që dyshohen për vrasjen e rreshterit të Policisë, Muhamed Lika.

Në komunikatë thuhet se i mituri bashkë me gjashtë persona tjerë dyshohet se kanë vrarë rreshterin Lika.

“Sipas Prokurorisë, ekziston dyshimi i bazuar se më 01.04.2025, reth ores 23:00, neë Kaçanik, në rrugën “Idriz Seferi”, përkatësisht në katin e II-të të hyrjes së ndërtesës, i mituri në bashkëkryerje me madhorët me iniciale: H.B., R.M., V. ç., E.L., Sh.K., dhe D.G., me dashje dhe përgatitje paraprake ka privuar nga jeta tani të ndjerin zyrtarin policor, M.L., në atë mënyrë që viktima pas përfundimit të orarit të punës, rrugës për në banesen e tij, ku i njëjti ishte përcjellur në vazhdimesi nga madhorët deri te hymja e banesës se tij ku,pasi që hynë në objektin e banesës ku ka jetuar duke u ngjitur shkallëve, i mituri i shkon nga mbrapa dhe pasi që viktima hynë në objektin banesor pas tij hyn edhe i mituri, ku me të takuar të ndjerin ka shtënë në drejtim të tij me armë zjarri.”

Drejtori i Policisë së Kosovës, Gazmend Hoxha tha se shtatë persona janë arrestuar në dy lokacione, Kaçanik dhe Klinë, për përfshirje në vrasjen e rreshterit Muhamed Lika.

“Operacioni është zhvilluar me autorizim të Prokurorisë Themelore të Ferizajt, ku gjatë këtij operacioni janë bastis nëntë lokacione, shumica prej tyre në kaçanik dhe një në Klinë. Në një fshat të Klinës. Gjatë operacionit janë arrestuar shtatë persona të dyshimtë, të cilët dyshohet që kanë marrë pjesë në planifikim dhe ekzekutimin e rreshterit tonë”, tha ai.

“Të gjithë personat janë duke u intervistuar dhe pastaj me vendim të prokurorit do të vendoset tutje për procedim penal”, tha Hoxha.

“Gjatë operacionit janë sekuestruar dy vetura, telefona celularë, disa laptopë, një armë zyrtare me 30 fishekë, maska..”.

Përpjekja e katërt për konstituimin e Kuvendit të Kosovës vijon të hënën. Partitë e opozitës së deritashme, PDK, LDK dhe AAK kanë thënë se nuk do ta përkrahin me votë propozimin e Lëvizjes Vetëvendosje për kryetare, Albulena Haxhiun.

Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës nuk kanë ndryshuar qëndrim për të propozuarën e Lëvizjes Vetëvendosje për kryetare të Kuvendit të Kosovës, Albulena Haxhiun.

Asnjë nga partitë e opozitës së deritashme nuk ka votë për Haxhiun, kanë thënë përfaqësues të këtyre partive politike të hënën.

Ministrja në detyrë e Drejtësisë, e cila në sytë e opozitës konsiderohet si figurë përçarëse më shumë sesa unifikuese, mori 57 vota nga 61 të nevojshme për t’u zgjedhur kryeparlamentare të shtunën, në përpjekjen e tretë për krijimin e Kuvendit.

Ramiz Lladrovci nga Partia Demokratike e Kosovës, në një deklarim për portalin FrontOnline të hënën, e la të hapur mundësinë e gjetjes së një zgjidhje për konstituimin e Kuvendit, por jo me Haxhiun si kandidate për kryeparlamentare.

Ai tha se është i nevojshëm koordinimi mes subjekteve partiake për të kaluar ngërçin e krijuar në proces.

“Po, është detyrë e partisë fituese që me reflektu, në drejtim të jetësimit të vullnetit të popullit, themelimi i institucioneve është shumë i rëndësishëm,” tha ai.

Edhe LDK-ja tha se nuk ka ndryshuar qëndrim për kandidaturën e Haxhiut.

Alban Zogaj, deputet i LDK-së në legjislaturën e nëntë, tha se LDK-ja do të marrë pjesë në seancën e sotme.

“Po do të marrim pjesë. Qëndrimi ynë deri në ketë moment nuk ka ndryshuar” tha ai shkurtimisht për FrontOnline.

AAK-ja e Ramush Haradinajt po ashtu e ka kundërshtuar me votë të shtunën kandidaturën e Haxhiut. Qëndrim të njëjtë do të mbajë edhe në vazhdimin e seancës të hënën, tha sot deputetja e Aleancës, Time Kadrijaj.

“Do të marrim pjesë në seancë, por nuk kemi votë për kandidaturën e Vetëvendosjes” tha Kadrijaj për FrontOnline.

Në vazhdimin e seancës konstituive të shtunën, në emër të Lëvizjes Vetëvendosje, deputeti Glauk Konjufca e propozoi për kryetare të Kuvendit deputeten Albulena Haxhiu.

Në dy procedura votimi, për kandidaturën e paraqitur votuan 57 deputetë, ndërsa kryesuesi Dehari konstatoi se propozimi nuk kalon dhe në këto rrethana njoftoi për ndërprerjen e seancës.

Seanca vazhdon sot në orën 15:00.

Presidentja e Kosovës Vjosa Osmani ka thënë se trashëgimia e Papa Françeskut, i cili vdiq sot në mëngjes, do të jetojë në jetët e panumërta që ai preku.

Vjosa Osmani ka shkruar në X se populli i Kosovës u bashkohet miliona njerëzve në zi për vdekjen e Papës.

“Populli i Republikës së Kosovës i bashkohet miliona njerëzve anembanë botës në zi për vdekjen e Shenjtërisë së Tij, Papa Françeskut – një zë i dhembshurisë, përulësisë dhe drejtësisë në kohën tonë. Trashëgimia e tij do të jetojë në jetët e panumërta që ai preku. Ne qëndrojmë me të gjithë ata që përcjellin mesazhin e tij të qëndrueshëm të shpresës, paqes dhe dinjitetit njerëzor”, shkruan Vjosa Osmani në X.

Papa Françesku vdiq të hënën e 21 prillit, në moshën 88-vjeçare, ka njoftuar Vatikani. Lajmin e trishtë e njoftoi Eminenca e Tij, Kardinali Farrell.

Papa, i cili ishte peshkop i Romës dhe kreu i Kishës Katolike, u bë papë në vitin 2013 pasi paraardhësi i tij Benedikti XVI dha dorëheqjen.

Vatikani njoftoi të hënën ndarjen nga jeta të Papa Françeskut, në moshën 88-vjeçare, raporton agjencia e lajmeve “Reuters”, përcjell ATV.

Papa Françesku, i cili ishte përballur me probleme shëndetësore gjatë muajve të fundit, ka qenë një figurë kyçe për Kishën Katolike që nga zgjedhja e tij në vitin 2013. Gjatë papatit të tij, ai njihej për qëndrimet e tij reformuese dhe thirrjet për drejtësi sociale, paqe dhe dialog ndërfetar. /atvlive.tv

Sot me fillim nga ora 15:00 do të vazhdojë seanca konstituive, me pikat e mbetura nga seancat e kaluar, e që janë zgjedhja e kryetarit të Kuvendit dhe zgjedhja e nënkryetarëve të Kuvendit.

Ndryshe në seancën e së shtunës, deputetët e Kuvendit të Kosovës, përfunduan punën me votimin e raportit të Komisionit të përkohshëm për verifikimin e kuorumit dhe të mandateve të deputetëve dhe betimin e deputetëve.

Gjatë seancë të së shtunës dy herë deputetët dështuan të zgjidhnin Albulena Haxhiun, kryeparlamentare. Haxhiu, ka deklaruar se do të jetë sërish emri i propozuar nga subjekti i saj për pozitën e kryetares së Kuvendit pavarësisht dy tentimeve të dështuara në seancën për konstituimin e legjislaturës së nëntë, për shkak të mungesës së votave të nevojshme.

Partia Demokratike e Kosovës (PDK), përmes një deklarate për media, vlerëson se e njeh të drejtën kushtetuese të partisë së parë për të propozuar kandidatin/en për Kryetar të Kuvendit. Megjithatë, kjo nuk nënkupton domosdoshmërisht edhe përkrahjen e saj për atë kandidaturë. Sipas PDK-së, ora për themelimin e institucioneve të reja të Republikës ka nisur.

Kryetari i LDK-së, Lumir Abdixhiku, pas votimit të mandateve të deputetëve, kishte thënë se është parë situata me numrat për formimin e institucioneve dhe arsyet e bllokimit.

Kryetari i Nismës Socialdemokrate, Fatmir Limaj, pas zhvillimeve në Kuvendin e Kosovës, theksoi nevojën urgjente për ndërtimin e institucioneve funksionale në vend.

Përgatiti: Armand Hoti

Telekomi i Kosovës, nuk e ka paguar ende asnjë këst të kredisë gjashtë milionëshe, që mori nga Qeveria në vitin 2022.

Parat ishin dedikuar për “pakon vullnetare”, që mundësoi largimin nga puna të 302 punëtorëve tepricë.

“Këstin e parë, kemi pasur ta paguajmë në dhjetor të vitit të kaluar, mirëpo pasi u bllokuan llogaritë, nuk arritëm ta paguajmë dhe planifikojmë ta paguajmë tash”, tha drejtori Financiar në Telekom, Feim Kelmendi.

Gjysma e kredisë për këtë pako, planifikohet të kthehet këtë vit.

Telekomi e ka aktive edhe një kredi tjetër 20 milionëshe, që u shpenzua për investime në teknologji. Këstin e parë, duhet ta paguaj në vitin që vjen.

Së fundmi, ndërmarrjes iu aprovua edhe një kredi 10 milionëshe nga qeveria në detyrë.

Mjetet do të shpenzohen për t’i mbuluar detyrimet tatimore dhe ato ndaj kontraktorëve, meqë llogaritë e Telekomit, janë të bllokuara për shkak të një kontesti përmbarimor.

Profesori i ekonomisë, Fidan Qerimi, mbështet ndihmën për Telekomin, porse sipas tij, është dashur të pritet edhe pak.

“Mendoj që ky vendim është dashur të shtyhet së paku për 1 muaj apo pak më shumë, derisa qeveria e re të krijohet dhe ta sheh orientimin e ndërmarrjes”, tha Qerimi.

Totali 36 milionësh, duhet të kthehet deri në vitin 2030.

“Prej vitit të ardhshëm deri në vitin 2030, është mesatarja mujore që duhet të kthehen, e që besoj se kompania e ka këtë kapacitet”, tha Kelmendi.

Vitin 2023 dhe vitin 2024, Telekomi e mbylli me rreth shtatë milion euro fitim secilin.

Përgatiti: Alma Hysenaj

Me lutjet për paqe dhe dashuri mes njëri tjetrit, filloi mesha ceremoniale e Pashkëve në katedralen “Shën Nënë Tereza” në Prishtinë.

Famullitari, Don Agim Qerkini u shpreh se me lutjet e tyre, të kujtojnë të moshuarin, të vetmuarin e të sëmurin që Zoti me anë të lutjeve t’i forcojë në vështirësi të jetës.

“Populli ynë dhe i gjithë njerëzimi, sot kanë shumë nevojë për një paqe të vërtetë, të trefishtë me Zotin, të afërmin, me vetveten, ta lusim Krishtin që paqja e tij të mbretërojë në mbarë botën…”, tha Qerkini.

Në fjalimin e tij drejtuar besimtarëve, tregon arsyen për pjesëmarrjen e gjithë këtyre besimtarëve në meshë.

“Besojmë në një Zot të gjallë, dhe jo vetëm por të gjallë e të pranishëm në mesin tonë. Mëngjesi i kësaj dite thirret në disa shprehje…”, tha Qerkini.

Ndërsa, edhe mbrëmë ipeshkvi i Kosovës, Dodë Gjergji ka përçuar mesazhin e paqes dhe harmonisë, në po të njëjtin vend.

“Edhe pse kjo Pashkë na gjen në një botë të përgjakur, në një Evropë të përçarë dhe në një Kosovë që rënkon nën barrën e papërgjegjësisë politike, pasigurisë për të ardhmen dhe ndarjeve të panevojshme, jemi të ftuar të ruajmë qetësinë e shpirtit”, tha Gjergji.

Pas meshës solemne, nga ora 19:00 është planifikuar edhe pritja solemne në Qendrën “BogdaniPolis”, organizuar nga ipeshkvi Imzot Dodë Gjergji.

Pashkët, janë kremtimi më i madh i kalendarit liturgjik i Kishës Katolike dhe i kishave të tjera të krishtera, të cilat kremtojnë Ringjalljen e Jezusit.