Tag: Ballina

Përfaqësuesja e Lartë e Bashkimit Evropian për Politikë të Jashtme dhe të Sigurisë, Kaja Kallas, në kuadër të vizitës në rajon, do të takohet me përfaqësues të partive politike dhe organizatave të shoqërisë civile në Kosovë .

Ajo do të mbajë një konferencë për shtyp në Shtëpinë e Evropës më 22 maj në orën 15:45, e cila do të transmetohet drejtpërdrejt në EBS.

Përfaqësuesja e Lartë Kallas do të vizitojë Misionin e Bashkimit Evropian për Sundimin e Ligjit në Kosovë (EULEX). Ajo do të takohet gjithashtu me Komandantin e KFOR-it Enrico Barduani.

Përfaqësuesja e Lartë e Bashkimit Evropian për Politikë të Jashtme dhe të Sigurisë, Kaja Kallas, do të nisë sot një vizitë në rajon, duke ia filluar nga Beogradi. Ajo më pas vjen në Kosovë ndërsa si destinacion të fundit e ka Maqedoninë e Veriut. Kjo është vizita e saj e dytë në Ballkanin Perëndimor që prej se e ka marrë detyrën e kryediplomates së BE-së.

Komunikata:

Përfaqësuesja e Lartë Kaja Kallas udhëton për në Serbi, Kosovë dhe Maqedoni të Veriut

Më 21-23 maj, Përfaqësuesja e Lartë e BE-së për Punët e Jashtme dhe Politikën e Sigurisë/Zëvendëspresidentja e Komisionit Evropian (HR/Zëvendëspresidente), Kaja Kallas, do të udhëtojë për në Serbi, Kosovë dhe Maqedoninë e Veriut në vizitën e saj të dytë në Ballkanin Perëndimor.

Në Serbi, Përfaqësuesja e Lartë Kallas do të takohet me Presidentin Aleksandar Vuçiq, Kryeministrin Gjuro Macut, me Ministrin e Jashtëm Marko Gjuriq dhe Ministrin e Integrimit Evropian Nemanja Staroviq, Kryetaren e Parlamentit Ana Brnabiq dhe grupet parlamentare të opozitës. Ajo do të flasë me studentët dhe organizatat e shoqërisë civile. Një konferencë për shtyp është planifikuar për në orën 13:15 më 22 maj, e transmetuar drejtpërdrejt në EBS.

Në Kosovë, Përfaqësuesja e Lartë Kallas do të takohet me përfaqësues të partive politike dhe organizatave të shoqërisë civile.

Ajo do të mbajë një konferencë për shtyp në Shtëpinë e Evropës më 22 maj në orën 15:45, e cila do të transmetohet drejtpërdrejt në EBS. Përfaqësuesja e Lartë Kallas do të vizitojë Misionin e Bashkimit Evropian për Sundimin e Ligjit në Kosovë (EULEX). Ajo do të takohet gjithashtu me Komandantin e KFOR-it Enrico Barduani.

Në Maqedoninë e Veriut, Përfaqësuesja e Lartë Kallas do të takohet me Kryeministrin Hristijan Mickoski. Një konferencë e përbashkët për shtyp është planifikuar për 23 maj, e transmetuar drejtpërdrejt në EBS në orën 12:10.

Ajo do të hapë Dialogun e parë për Sigurinë dhe Mbrojtjen midis BE-së dhe Maqedonisë së Veriut me Ministrin e Punëve të Jashtme dhe Tregtisë Timcho Mucunski dhe do të vizitojë Organizatën e Përhershme të Task Forcës Mjekësore Ballkanike (BMTF SO) në prani të Ministrit të Mbrojtjes Vlado Misajlovski.

Ajo gjithashtu do të angazhohet me të rinj vendas, studentë dhe profesionistë të rinj.

Presidentja e Kosovës, Vjosa Osmani, ka arritur në Zvicër për vizitën e saj shtetërore, me ftesë të Presidentes zvicerane, Karin Keller-Sutter. Kjo vizitë shënon një moment historik, pasi është hera e parë që një kreu i shtetit të Kosovës realizon një vizitë shtetërore në këtë shtet.

Lidhur me këtë vizitë, Presidentja Osmani ka ndarë edhe disa fotografi nga momenti i arritjes së saj në Zvicër.

Sipas agjendës zyrtare, Presidentja Osmani do të zhvillojë takime me Presidenten zvicerane dhe me anëtarët e Këshillit Federal, si dhe do të mbajë një fjalim në Parlamentin e Zvicrës. Pas këtyre takimeve, dy presidentet do të mbajnë një konferencë të përbashkët për media.

“Për nder të Presidentes Osmani dhe delegacionit nga Kosova, Presidentja Keller-Sutter do të organizojë banket shtetëror, duke nderuar kësisoj miqësinë e qëndrueshme dhe partneritetin në mes dy shteteve”, thuhet në njoftimin e Presidencës së Kosovës.

Vizita do të vazhdojë edhe gjatë ditës së dytë, ku Presidentja Osmani dhe homologja e saj zvicerane do të vizitojnë një ndërmarrje prodhuese në pjesën lindore të Zvicrës, si dhe një qendër të Universitetit Saint Gallen.

Në fund të vizitës, Osmani do të qëndrojë në Gjenevë, ku do të takohet me mërgatën shqiptare që jeton dhe vepron në Zvicër.

Ka dështuar edhe përpjekja e 19-të për konstituimin e Kuvendit të Kosovës, që prej nisjes së seancës konstituive më 15 prill. As në tentativën e sotme, e mbajtur më 21 maj, nuk pati zhbllokim të situatës.

Kryesuesi i seancës, Avni Dehari, njoftoi se në sallë ishin të pranishëm 109 deputetë. Kur u hodh në votim Komisioni Zgjedhor për zgjedhjen e kryetarit të Kuvendit, ai mori vetëm 54 vota për, 1 kundër dhe asnjë abstenim – numra të pamjaftueshëm për ta çuar përpara procesin.

Si pasojë, seanca u ndërpre dhe u caktua që të vazhdojë të enjten, më 23 maj, në ora 11:00. /atvlive.tv

Përfaqësuesja e lartë e Bashkimit Evropian për Politikë të Jashtme dhe Siguri, Kaja Kallas, pritet të vizitojë Kosovën dhe Serbinë gjatë kësaj jave. Analistët politikë presin që Kallas në vizitën e saj të parë në Kosovë të sjell një plan konkret për rifillimin e dialogut Kosovë-Serbi, duke marrë parasysh edhe paralajmërimin e presidentit francez, Emmanuel Macron në Tiranë se dialogu do të rifillojë në javën në vijim, shkruan KosovaPress.

Megjithatë, ka edhe dilema nëse mund të ketë diçka konkrete në zbatim të marrëveshjes së Brukselit dhe aneksit të Ohrit, të dakorduar mes palëve në vitin 2023, përderisa në Kosovë ende nuk janë formuar institucionet e reja pas zgjedhjeve të 9 shkurtit.

Madje, në pikëpyetje, sipas analistëve, është edhe legjitimiteti i kryengociatorit kosovar, Besnik Bislimi nëse mund të zhvillojë takime në Bruksel dhe zbatojë zotimet në këtë proces, përderisa qeveria është në detyrë. Ani pse për një gjë të tillë, presidentja e vendit, Vjosa Osmani, ditë më parë tha se Bislimi ka legjitimitetit të zhvillojë takime në Bruksel në emër të Kosovës, nëse kërkohet nga BE-ja.

Në lidhje me rifillimin e dialogut me Serbinë dhe mundësinë që kryenogciatori kosovar, Besnik Bislimi të zhvillojë takim trepalësh në Bruksel në zyrën e tij nuk dhanë përgjigje për KosovaPress. Të heshtur qëndruan edhe në Bashkimin Evropian mbi mesazhet që do t’i sjell Kallas në Kosovë e Serbi, derisa nuk treguan nëse do të ketë rifillim të dialogut në nivel të kryenegociatorëve.

Takimi i fundit në nivel të kryengoaciatorëve të dialogut ka qenë në dhjetor të vitit 2024.

Politologu, Albinot Maloku thotë për KosovaPress se shefja e diplomacisë së bllokut evropian pritet të sjell në Kosovë edhe mesazhin që e dha presidenti francez, Emmanuel Macron, gjatë vizitës në Tiranë për nevojën e rifillimit të dialogut mes Kosovës dhe Serbisë.

Megjithatë, ai është skeptik nëse do të ketë ndonjë hap konkret të palëve për zbatimin e marrëveshjes së Brukselit dhe aneksit të Ohrit.

“Unë pash që presidenti francez, [Emanuel] Macron, paralajmëroi si vullnet për të ecur përpara drejt një dialogu të drejtë, një dialogu të drejtpërdrejtë. Për rrjedhojë, kemi planin franko-gjerman në të cilin Franca është dizajnuesi kryesor. Do të fillojë një riangazhim për faktin se dizajnuesit e këtij plani nuk e kanë kohën e Republikës së Kosovës por duan të kenë hapa të shpejtë dhe të konkretizuar. Dialogu dihet se është pjesa thelbësore e qeverisë së ardhshme që do të përballet dhe nuk është asgjë e re. A do të ketë diçka të konkretizuar? E vetmja gjë që mund të konkretizohet është se momentin kur rifillon dialogu do të bëhet matja se a ka bërë lëvizje Kosova dhe Serbia drejt jetësimit të ‘Po’-së së thënë në Bruksel dhe Ohër”, thekson ai.

Ndërkaq, analisti politik, Dorajet Imeri thotë se vizita e Kallas në Kosovë e Serbi tregon nevojën për të vijuar me procesin e dialogut mes dy vendeve.

Madje, ai deklaron se krijimi i këtij momentumi në dialog duhet të jetë një alarm zgjimi për partitë politike në Kosovë që të formohen institucionet e reja pas zgjedhjeve të 9 shkurtit.

“Situata aktuale në vend duket se ka alarmuar diplomacinë perëndimore dhe në veçanti zonjën Kallas që ka paralajmëruar një vizitë në vendin tonë. Kjo vizitë është në frymën e asaj që presidenti francez e potencoi se javët e ardhshme pritet të rifillojë dialogu mes Kosovës dhe Serbisë. Në këtë prizëm konsideroj se BE-ja dhe shtetet veç e veç do të marrin me shumë seriozitet këtë çështje dhe kjo besoj do të jetë një alarm zgjimi për partitë politike në Kosovë që të konstituohet Kuvendi dhe të formohet qeveria. Në këtë mënyrë shmanget ky hendeku në të cilën gjendemi dhe zbrazëtia institucionale që gjendet vendi ynë. Prandaj ardhja e zonjës Kallas dhe deklarimi i presidentit francez disa ditë më parë janë në linjën e njëjtë – atë të nevojës për vijuar me procesin dialogues mes dy vendeve”, deklaron Imeri.

Javën e kaluar, presidentja e vendit, Vjosa Osmani, në samitin evropian në Tiranë, tha se nëse kërkohet nga BE-ja mund të ketë takime trepalëshe në Bruksel, pasi, sipas saj, Kosova ka kryenegociatorin në dialog me kompetenca të plota.

“ Kosova ka kryenegociatorin, që është me fuqi të plotë – zëvendëskryeministri i parë, i cili nuk ka kandiduar apo zgjedhur si deputet, ka kompetenca që, nëse kërkohet nga BE-ja, të ketë një takim në nivel kryenegociatorësh,” deklaroi Osmani.

Mirëpo, politologu Maloku thotë se pozicioni i zëvendëskryeministrit në detyrë, Besnik Bislimi është teknik dhe se ai nuk ka legjitimitet të marrë hapa drejt zbatimit të marrëveshjeve në dialog, derisa s’ka institucione të reja.

“Të tjerët nuk kanë legjitimitet, sidomos jo për të marrë hapa diçka që lidhet me dialogun. Pozicioni i tyre është teknik. Pavarësisht asaj nëse është deputet apo jo. Një figurë e qeverisë nuk është që ka legjitimitetin pasi njerëzit që ushtrojnë detyrat janë në pozicion teknik dhe pa kompetencë ligjore dhe kushtetuese për të marrë masa drejt implementimin që e prek Kosovën në aspektin ndërkombëtar”, shton Maloku.

Prej fundit të vitit 2024 nuk ka pasur asnjë takim në nivel të dialogut në Bruksel. Kosova dhe Serbia në vitin 2023 janë dakorduar për Marrëveshjen e Brukselit dhe aneksin e Ohrit, mirëpo palët ende nuk kanë nisur zbatimin e saj.

Komisioni Evropian në shkurt të vitit 2025 ka emëruar përfaqësuesin e ri në dialog, diplomatin danez Peter Sorensen, duke zëvendësuar Miroslav Lajçakun.

Prej marrjes së detyrës edhe përfaqësuesja e re e BE-së për Politikë të Jashtme dhe Sigurisë, Kaja Kallas ka ritheksuar nevojën e rifillimit të dialogut dhe zbatimin e marrëveshjeve./kp

Deputetët do të mblidhen sërish sot për një tentim të radhës për konstituim të Kuvendit të Kosovës. Kjo është përpjekja e nëntëmbëdhjetë me radhë që prej 15 prillit kur ka filluar seanca konstituive.

Vazhdimi i seancës konstituive bëhet në orën 11:00, por zhvillimet nuk tregojnë shpresë se do të ketë zhbllokim të situatës.

Çështja e konstituimit të legjislaturës së nëntë ka ngecur te votimi i kryetarit të Kuvendit pasi partia e parë e dalë nga zgjedhjet e nëntë shkurtit, Lëvizja Vetëvendosje – në koalicion me Guxo dhe Alternativa nuk po arrin t’i sigurojë 61 votat e nevojshme për të zgjedhur Albulena Haxhiun kryeparlamentare.

Partia Demokratike e Kosovës dhe Aleanca për Ardhmërinë e Kosovës kanë kërkuar ndërrim të kandidatit të propozuar ndërkaq, Lidhja Demokratike e Kosovës është shprehur kundër çdo propozimi të Lëvizjes Vetëvendosje.

Në disa seanca, kryesuesi i seancës, Avni Dehari i Lëvizjes Vetëvendosje, ka tentuar që procesi i votimit të bëhet në mënyrë të fshehtë, por kjo nuk është përkrahur nga partitë e tjera parlamentare.

Që prej 15 prillit, deputetët po mblidhen çdo 48 orë për konstituim të Kuvendit.

E në mbledhjet e fundit, nga Lëvizja Vetëvendosje u propozua që vazhdimet e seancave të mos bëhen çdo 48 orë – siç e kërkon rregullorja e Kuvendit, por të bëhen një herë në javë. Kjo nuk gjeti mbështetje.

Në përpjekje për të zhbllokuar situatën, javën që shkoi, presidentja Vjosa Osmani takoi përfaqësuesit e partive politike, por as aty nuk pati pajtim për konstituim të Kuvendit.

Kryeministri në detyrë Albin Kurti në një intervistë ekskluzive për RTK-në ka zbuluar qëndrimet e tij që kanë të bëjnë me konstituimin e Kuvendit të Kosovës, që nesër do të jetë tentimi i 19-të me radhë. Kurti tha se besuan që konstituimi i legjislativit do të bëhej shpejt, derisa për emrin e Albulena Haxhiut, e cila nuk ka arritur t’i marrë deri tash votat e nevojshme për t’u ngjitur në krye të Kuvendit, tha se është propozimi i duhur.

“Ne kemi besuar që do ta kemi konstituimin e kuvendit shumë të shpejt. Kemi propozuar Albulena Haxhiun që është gruaja më e votuar si deputete në legjislaturën e nëntë. Besoj që është propozimi i duhur, përveçse ne jemi të obliguar që ta kemi propozimin si parti fituese. 57 deputetë ishin për Albulena Haxhiun, nevojiteshin 61, në mesin e tyre nuk janë vetëm të koalicionit LVV- Alternativa e Guxo por edhe deputetë të pakicave. Nuk arritëm t’i kemi 61, provuam disa herë”, tha Kurti derisa një për një foli se si dështoi fillimisht formimi për komisionin për verifikimin e mandateve, e që sipas tij më vonë ata që e kundërshtuan e kuptuan se e kishin gabim.

Kreu në detyrë i qeverisë tha se duke parë se nuk i kishin 61 vota, provuan që zgjidhjen t’ua jap presidentja.

“Kryesuesi, Avni Dehari i dërgoi letër presidentes dhe ajo tha se ju vetë duhet ta gjeni zgjidhjen. Kaluam nga votimi i hapur në përpjekje për votim të fshehtë, mirëpo tash jemi në këtë pikë ku 10 herë është refuzuar komisioni për zgjedhjen me votim të fshehtë. Është për të ardhur keq, meqë aktgjykimi i Kushtetueses në pikat 124 dhe 125 thotë se me votim të hapur ose të fshehtë duhet të bëhet zgjedhja. Ne kaq kemi mundësitë tona, por ajo çfarë po ndodhë është e paprecedentë sepse po pamundësohet kuorumi, sepse aktgjykimi gjithashtu thotë se të gjithë deputetët, secili e secila duhet të votojë për, kundër ose të abstenojë. Por, ajo çfarë kemi tash, jo emri i Albulena Haxhiut tashmë, por kundërshtimin e votimit të fshehtë përmes pamundësimit të kuorumit që është shkelje e aktgjykimit”, tha ndër të tjera, Kurti.

Ai ka përmendur ftesat që u bëri PDK-së e LDK-së në tentim për të dal nga ngërçi, që sipas tij, takimi trelateral përfundoi me bilateral dhe pa sukses.

Kurti tha se zgjidhja nuk është t’i imponohen propozimet njëri-tjetrit.

“Unë besoj që zgjidhja e duhur përpara është që të mos ia imponojmë propozimet njëri- tjetrit, por zgjedhja e kryetarit e nënkryetarëve të shkojë bashkë në paketë e të fillojë numërimi te poshtë për formimin e qeverisë, sepse tash po shkon numërimi përpjetë”, tha Kurti.

Tregoi se LDK-ja e cila nuk iu përgjigj takimit i kishte thënë se nuk ishte vendi e koha për marrëveshje për procedurë, por se duhej marrëveshje politike, prandaj i ofroi koalicion qeveritar LDK-së, gjë që sipas tij, u refuzua ashpër.

“Nesër nuk është në pyetje Albulena që është propozimi ynë, por është në pyetje pikërisht komisioni për votim të fshehtë. Nëse opozita janë të sigurt që Albulena nuk fiton përsëri le ta provojnë me votim të fshehtë. Porsa të konstituohet kuvendi, si kryetar i partisë që ka fituar zgjedhjet, do t’i kem 61 vota minimum për qeverinë e re, por paraprakisht na duhet një kuvend i ri”, tha ai.

Kryeministri në detyrë tha se gjatë mandatit të tij katër vjeçar ka pasur edhe sovranitet shtetëror edhe integritet territorial, e edhe mirëqenie sociale e rritje ekonomike sipas tij, të paparë më herët.

“6 për qind mesatarisht në vit, asnjëherë pa rënë nën 4 për qind të bruto produktit dhe tash ka ardhur radha ta kemi edhe kuvendin e ri për qeverinë e re në legjislaturën e nëntë. Ne kemi synuar 500 mijë vota siç dihet. Kemi pasur rezultat të mirë me rreth 400 mijë vota, me 48 deputet”, tha Kurti në intervistë për RTK-në.

Historiani Durim Abdullahu, në emisionin CONTEXT në ATV, tha se Kosova ka bërë përparim të dukshëm në dokumentimin institucional të krimeve të luftës, duke theksuar rolin e strategjisë së drejtësisë tranzicionale dhe themelimin e instituteve përkatëse.

Sipas tij, Kosova është ndër vendet e vetme në rajon me strategji të miratuar për drejtësinë tranzicionale dhe me institute që merren me dokumentimin e krimeve edhe para dhe gjatë luftës.

“Kosova është vendi i vetëm në rajon, me sa di unë, që ka të miratuar nga institucionet e saj një strategji të drejtësisë tradicionale, e cila është miratuar në qershorin e vitit të kaluar. Ka pak më shumë se një vit, mos gaboj, që është themeluar dhe funksionalizuar Instituti për Hulumtimin e Krimeve të Kryera gjatë Luftës, mandati i të cilit shtrihet edhe në periudhën më të hershme, pothuajse gjatë gjithë shekullit të njëzetë, që merret edhe me krimet dhe ngjarjet që kanë çuar drejt luftës,” tha Abdullahu.

Ai tha se dokumentimi i ngjarjeve të luftës mbështetet edhe nga projekte të universiteteve, shoqërisë civile dhe bashkëpunime ndërkombëtare.

“Universiteti i Prishtinës, disa prej departamenteve të tij – si Historia, Antropologjia, Fakulteti Juridik – kanë qoftë kurse të veçanta, qoftë projekte në bashkëpunim me institucione e ambasada, ku kanë intervistuar të mbijetuar e dëshmitarë të luftës dhe kanë trajtuar çështje të memorializimit, përkujtimit dhe muzealizimit të ngjarjeve të luftës,” deklaroi Abdullahu.

Deklaratën e plotë të Durim Abdullahut në CONTEXT, e gjeni në videon më poshtë:

Kryeministri në detyrë, Albin Kurti sërish ka refuzuar të përgjigjet për konsituimin e Kuvendit të Kosovës.

Kurti mori pjesë në nisjen e ndërtimeve të objekteve për banim të përballueshëm. Aty u pyet në lidhje me takimin me presidenten Vjosa Osmani dhe nëse ndjehet përgjegjës lidhur me ngërçin politik.

“Për ato çështjet tjera të bllokimeve janë në Prishtinë, ne jemi për ndërtim këtu”, deklaroi Kurti.

Kuvendi i Kosovës nuk arriti të konstituohet as dje në përpjekjen e tetëmbëdhjetë. Seanca u ndërpre dhe vazhdimi i saj do të bëhet nesër në orën 11:00. /kp

Negocimi i marrëveshjes së Kosovës me Bashkimin Evropian në kuadër të Planit të Rritjes për Ballkanin Perëndimor nuk mund të kthehet në pikën zero, pavarësisht vonesave për ratifikimin e saj në parlament, thonë në qeverinë në detyrë. Në anën tjetër, në bllok deklarojnë se po presin ratifikimin e marrëveshjes në Kuvendin e Kosovës, në mënyrë që të disbursojnë mjetet e para-financimit prej 61 milionë eurosh.

Disbursimi i mjeteve të para-financimit për Kosovën është i ndërlidhur me miratimin e dy marrëveshjeve ndërkombëtare në Kuvend, të cilat, për shkak të pamundësisë së konstituimit të legjislaturës së nëntë, nuk mund të ndodhin tani. Kjo situatë, sipas njohësve të integrimeve evropiane, nëse vazhdon edhe më tutje, do të rrezikojë marrjen e këtyre fondeve.

Plani i Rritjes është një kornizë e re e BE-së për përshpejtimin e reformave për integrim evropian të tërë rajonit, që kombinon reformat me kontribut të drejtpërdrejtë financiar nga fondet e BE-së në buxhetet e vendeve përfituese dhe projekte investuese. Me zbatimin e këtyre reformave, Kosova do të përfitojë deri në 882.6 milionë euro fonde të BE-së. Nga kjo shumë totale, 253.3 milionë euro janë grante, ndërsa pjesa tjetër prej 629.3 milionë eurosh janë hua afatgjata.

Vonesat në marrjen e këtyre mjeteve, sipas Klisman Kadiut, këshilltar i zëvendëskryeministrit në detyrë, Besnik Bislimi, po ndodhin “si pasojë e bllokimit nga opozita” të rrugës për formimin e institucioneve, e cila, siç thotë ai, ka një dëm të dukshëm për marrjen e fondeve dhe avancimin e reformave të integrimit evropian.

“Nuk bëhet fjalë për kthim në pikën zero, por për një dëm të dukshëm dhe bllokues të vijimësisë në marrjen e fondeve dhe avancimin në zbatimin e reformave, që po vjen si pasojë e bllokimit nga opozita të rrugës për formimin e institucioneve të reja. Mesa duket për ta, interesat personale dhe partiake janë më të rëndësishme sesa interesat shtetërore dhe krijimi i institucioneve të reja, që do sillte edhe marrjen e para-financimit në vlerën 7% apo 61,2 milionë euro nga shuma totale prej 882,6 milionë euro që do të përfitojë Kosova nga Bashkimi Evropian përmes Planit të Rritjes për 3 vitet e ardhshme”, thotë Kadiu në një përgjigje për KosovaPress.

Ndërkaq, në Bashkimin Evropian nuk treguan për KosovaPress se – nëse vazhdon vonesa nga ana e Kosovës për ratifikimin e marrëveshjes për Planin e Rritjes – a mund të rikthehet në pikën zero negocimi i saj.

Megjithatë, zëdhënësja e Bashkimit Evropian, Anitta Hipper, thotë për KosovaPress se në rastin e Kosovës janë në fazën përfundimtare të hapave procedurale, të cilët pritet të mundësojnë disbursimin e parave paraprake sa më shpejt në vitin 2025.

“Komisioni e ka vlerësuar Agjendën e Reformës dhe ka konkluduar se ajo është në përputhje me objektivat dhe kërkesat e Mekanizmit për Reforma dhe Rritje. Agjenda e Reformës u miratua më 23 tetor 2024 përmes një Vendimi Zbatues të Komisionit, pas një opinioni pozitiv nga Shtetet Anëtare. Kosova ka kërkuar lirimin e parave paraprake deri në 7% të shumës totale të parashikuar në kuadër të këtij Mekanizmi. Aktualisht, Komisioni dhe Kosova janë në fazën përfundimtare të hapave procedurale, të cilët pritet të mundësojnë disbursimin e parave paraprake sa më shpejt në vitin 2025, në pritje të përfundimit të procesit të ratifikimit nga ana e Kosovës”, thuhet në përgjigjen e saj për KosovaPress.

Për shkak të kësaj situate, por edhe nevojave të brendshme, sipas analistit politik Dorajet Imeri, themelimi i institucioneve të reja pas zgjedhjeve të 9 shkurtit, është urgjencë.

“Konstituimi i institucioneve të Kosovës, fillimisht Kuvendi dhe më pas qeveria, nuk është vetëm një urgjencë e brendshme, por edhe në veçanti me raportet me partnerët strategjikë dhe Bashkimin Evropian. Ka miliona euro që janë në pritje të zotimeve që Kosova mund të marrë dhe kjo nuk mund të bëhet pa konstituimin e Kuvendit. Është shumë e rëndësishme për Kosovën që sa më parë që të jetë e mundur të konstituojë Kuvendin dhe të formojë qeverinë, në mënyrë që Kosova t’i japë përgjigje BE-së dhe nevojave të qytetarëve”, deklaron ai.

Qeveria e Kosovës ka negociuar dhe aprovuar që në tetor të vitit të kaluar Agjendën e Reformave me Bashkimin Evropian për Planin e Rritjes dhe si e tillë ajo është aprovuar si vendim edhe nga Komisioni Evropian.

Në hapat e radhës, janë dy marrëveshje që duhet të ratifikohen nga Kuvendi. E para është marrëveshja për Instrumentin e Planit të Rritjes, e cila është nënshkruar nga qeveria dhe Komisioni Evropian dhe është dërguar në Kuvend që në dhjetor 2024. E dyta është ajo për ratifikimin e marrëveshjes për hua.

Konstituimi i Kuvendit ka ngecur, pasi Lëvizja Vetëvendosje nuk po arrin t’i sigurojë 61 votat e nevojshme për të zgjedhur Albulena Haxhiun kryetare të Kuvendit. Partitë që deri më tash ishin në opozitë po kërkojnë një kandidat tjetër, pasi sipas tyre, Albulena Haxhiu është një emër i papranueshëm./KP

Presidentja e Kosovës, Vjosa Osmani së fundmi është kërcënuar me jetë. Në adresën elektronike të presidencës ka shkuar një mesazh përmes të cilit një person e kërcënon me vrasje të parën e shtetit.

Lidhur me këtë, ka reaguar zotëriu i parë, Prindon Sadriu i cili përmes një postimi në Facebook thotë se kjo nuk është hera e parë që presidentja kërcënohet, pasi ka me dhjetëra.

Sipas tij, këto kërcënime janë pasojë direkte e mosveprimit.

“Kur këto përsëriten, nuk janë më thjesht fjalë. Janë sistem. Janë strategji. Dhe mbi të gjitha: janë pasojë direkte e mosveprimit. Sepse askush nga kërcënuesit nuk është përballur me drejtësinë. Asnjë veprim. Asnjë përgjegjësi. Dhe kur institucionet përkatëse heshtin, dhuna natyrshëm që flet. Kur institucionet përgjegjëse nuk mbrojnë, kërcënuesit ndihen të sigurt”, ka shkruar Sadriu.