Kuvendi i Kosovës ka dështuar sërish të konstituohet, edhe pas përpjekjes së 17-të.
Në seancën e mbajtur të shtunën, propozimi për formimin e komisionit për votimin e fshehtë mori vetëm 53 vota për dhe një kundër, duke pamundësuar vazhdimin e procesit për zgjedhjen e kryetarit të Kuvendit.
Seanca e radhës është thirrur për ditën e hënë, më 20 maj, në ora 10:30.
Kryeministri i Shqipërisë, Edi Rama, ka bërë të ditur se po shqyrtohet mundësia që Franca të përfshihet në ndërtimin e linjës hekurudhore që do të lidhë Durrësin me Prishtinën. Deklarata u bë gjatë konferencës së përbashkët për media me presidentin francez, Emmanuel Macron, i cili ndodhet për një vizitë zyrtare në Shqipëri.
Rama theksoi gjithashtu se bashkëpunimi me Francën do të zgjerohet edhe në fusha të tjera kyçe, përfshirë administrimin e ujërave dhe menaxhimin e mbetjeve urbane.
“Ne duam të fuqizojmë marrëdhënien edhe në drejtim të administrimit të ujërave ku Franca është kampione e inovacionit, e eksperiencës dhe ka kompani që operojnë në të gjithë botën. Kemi folur edhe për mbetjet dhe jemi duke punuar për të pasur një plan të përgjithshëm dhe strategji që bazohet në hapat e punës për procesin e negociatave. Dhe këtu ne kemi shumë për të bërë. Nëse arrijmë të kemi deri në fund bashkëpunimin me ekselencën franceze do të jemi shumë të fituar”, tha ai.
Ai konfirmoi se një nga temat e diskutimit me presidentin Macron ka qenë edhe hekurudha Durrës–Prishtinë.
“Kemi folur edhe për përfshirjen e Francës në ndërtimin e hekurudhës Durrës –Prishtinë dhe në fund më vjen mirë që kur presidenti erdhi këtu herën e kaluar, ishim në ish-shtëpinë e diktatorit Enver Hoxha ku po fillonte puna për ta transformuar në qendër kulturore”.
Kreu i qeverisë shqiptare vlerësoi gjithashtu mbështetjen që Franca po i jep Shqipërisë në rrugën drejt integrimit evropian.
Deputetët e zgjedhur të Kuvendit të Kosovës do të mblidhen sot për të 17-ën herë me radhë në përpjekje për ta konstituuar Kuvendin, proces ky që po vazhdon prej më shumë se një muaji. Vazhdimi i seancës së nisur më 15 prill pritet të zhvillohet nga ora 10:30.
Kuvendi ka lëshuar njoftim zyrtar për mbajtjen e kësaj seance, që vjen pasi një ditë më parë dështoi miratimi i komisionit për votimin e fshehtë të Albulena Haxhiut nga VV si kandidate për kryeparlamentare, çka bëri që seanca të ndërpritet.
Po atë ditë, Presidentja e Kosovës, Vjosa Osmani, thirri në takim liderët e katër partive më të mëdha parlamentare: PDK, LDK, VV dhe AAK, për të diskutuar rreth bllokadës së krijuar.
Megjithatë, takimi nuk prodhoi asnjë marrëveshje konkrete mes partive.
Kreu i PDK-së, Memli Krasniqi, tha se kishte kërkuar nga kryetari i VV-së, Albin Kurti, që të tërheqë kandidaturën e Albulena Haxhiut, duke e quajtur këtë si një hap të nevojshëm për të dalë nga kriza: “Në emër të PDK-së, kërkova që kryetari i VV-së, deputeti Kurti, ta ndryshojë kandidaten. Një gjë e tillë nuk pres që do të ndodh. Jemi në situatën e njëjtë ku jemi,” u shpreh Krasniqi.
Edhe Ramush Haradinaj nga AAK e mbështeti ftesën e Presidentes dhe theksoi rëndësinë e një kandidature unifikuese për drejtimin e Kuvendit: “E kemi mirëpritur këtë mundësi të bisedës me presidenten,” deklaroi ai.
Ndërkaq, lideri i LDK-së, Lumir Abdixhiku, shprehu zhgënjimin e tij për mungesën e vullnetit nga partia në pushtet për të zhbllokuar procesin: “Nga partia e parë nuk ka brengë, as urgjencë që kjo çështje të zgjidhet sa më parë,” theksoi ai.
Pas përfundimit të takimit, kryeministri në detyrë, Albin Kurti, nuk dha asnjë deklaratë për mediat.
Po ashtu, presidentja Osmani ka pritur në takim përfaqësuesit e partive jo shumicë të Kuvendit të Kosovës.
Tutje, Osmani ka vlerësuar pozitivisht qëndrimin e përfaqësuesve të partive politike që morën pjesë në takimin e thirrur nga ajo për të diskutuar situatën aktuale politike në vend.
Në një konferencë për media pas takimit, Osmani përgëzoi liderët për qasjen konstruktive që, sipas saj, treguan gjatë diskutimeve, pavarësisht dallimeve në qëndrime.
“Dua t’i përgëzojë liderët për qasjen konstruktive përgjatë këtij takimi, sado që kishin qëndrime të ndryshme në shumicën dërmuese të temave. Pra, në qoftë se mund ta them, ekziston një disponim minimal që jam e bindur se do të rritet me kalimin e kohës”, u shpreh ajo.
Ndërkohë, paralajmëroi mundësinë e dërgimit të çështjes në Gjykatën Kushtetuese në rast se zvarritja vazhdon: “Dërgimin në Gjykatë Kushtetuese e kemi diskutuar për herën e parë,” tha ajo, duke shtuar se ka parë vetëm një “disponim minimal” nga liderët për zgjidhje.
Gjatë qëndrimit në Tiranë, ku po mbahet Samiti i liderëve të rajonit me zyrtarë të Bashkimit Evropian, presidentja e Kosovës, Vjosa Osmani, është takuar me Përfaqësuesen e Lartë të BE-së për Politikë të Jashtme dhe Siguri, Kaja Kallas.
Në një njoftim, Osmani e ka përshkruar Kallasin si një përkrahëse të kahmotshme të vizionit për një Evropë të bashkuar dhe të sigurt, duke bërë të ditur se javën e ardhshme Kallas do të vizitojë Kosovën.
“Duke qenë se gjatë vizitës së saj javën e ardhshme në Kosovë do të jem në një vizitë shtetërore të paracaktuar jashtë vendit, takimin e realizuam në Tiranë”, ka shkruar presidentja Osmani në profilin e saj.
Ajo shtoi se Kosova është e gatshme të hedhë hapin e radhës drejt integrimit në BE, duke u bërë thirrje institucioneve evropiane që t’i përgjigjen këtij momenti me “guxim, qartësi dhe vendosmëri” – vlera që, sipas saj, i mishëron edhe vetë lidershipi i Kaja Kallas.
Sekretari i Përgjithshëm i NATO-s, Mark Rutte, ka deklaruar për mediat kosovare se dialogu Kosovë-Serbi dhe situata në Ballkanin Perëndimor do të jenë tema kryesore në Samitin e Komunitetit Politik Evropian që mbahet sot në Tiranë.
Ai theksoi se forcat KFOR në Kosovë dhe EUFOR në Bosnjë e Hercegovinë janë prezente për të siguruar stabilitetin në rajon, dhe për këtë çështje ka diskutuar edhe gjatë takimit të ministrave të jashtëm të NATO-s në Antalia, Turqi.
Rutte gjithashtu ritheksoi rëndësinë e bisedës së tij me presidentin serb Aleksandar Vuçiq, duke e cilësuar si shumë të rëndësishme.
LEXONI EDHE:
Presidentja Vjosa Osmani ka arritur në samitin e Komunitetit Politik Europian ku e përfaqëson Kosovën. Ajo u prit nga nikoqiri i ngjarjes, kryeministri Edi Rama.
Komuniteti Politik Europian sivjet mblidhet nën moton “Europa e re në një botë të re: unitet – bashkëpunim – veprim i përbashkët”.
Udhëheqësit do të takohen fillimisht në një seancë plenare kushtuar sigurisë dhe një vizioni të përbashkët për të ardhmen e Europës.
Nga ora 11:45 do të flasin disa nga liderët kyçë të samitit, përfshirë presidentin ukrainas Volodymyr Zelensky, që do të pasojë fjalën e Ramës.
Përfaqësuesja e Lartë e Politikës së Jashtme të Bashkimit Evropian, Kaja Kallas në një deklaratë për media para nisjes së Samitit të Komunitetit Politik Evropian ka folur për temat që do t’i diskutojnë.
Ajo nga gazetarët u pyet edhe se çfarë pret nga dialogu Kosovë-Serbi.
“Pak kohë më parë kemi emëruar përfaqësuesin e ri të Posaçëm për Dialogun, presim normalizimin e marrëdhënieve, sigurisht”, tha ajo.
Përfaqësuesja e Politikës së Jashtme të BE-së paralajmëroi se së shpejti do të vizitojë Kosovën.
Kallas foli edhe për sanksionet ndaj Rusisë si dhe për vendosmërinë e Bashkimit Evropian për të qëndruar pranë Ukrainës.
Presidentja Vjosa Osmani po përfaqëson Republikën e Kosovës në samitin e gjashtë të liderëve të Komunitetit Politik Evropian (EPC), i cili po mbahet këtë edicion në Tiranë. Në këtë ngjarje marrin pjesë 45 liderë evropianë, përfshirë përfaqësues të institucioneve të Bashkimit Evropian, shkruan Gazeta Sinjali.
Sipas njoftimit nga Presidenca, Presidentja Osmani do të pritet nga kryeministri shqiptar Edi Rama dhe do të marrë pjesë në të dy seancat kryesore të samitit. Më pas, ajo do të bashkëkryesojë tryezën e liderëve me temën “Një Evropë e hapur me kufij të sigurt”, së bashku me kryeministrin kroat, Andrej Plenkoviq.
“Kjo tryezë e liderëve do të trajtojë sfidat e sigurisë në kontinent dhe mundësitë që lidhen me migrimin dhe lëvizshmërinë, me theks të veçantë në fuqizimin e të rinjve, si dhe në shfrytëzimin e potencialit të mërgatës si motor për zhvillim ekonomik dhe stabilitet. Në këtë tryezë të bashkëkryesuar nga Presidentja Osmani do të marrin pjesë liderë nga mbarë Evropa, përfshirë kryeministrat e Italisë, Austrisë, Hungarisë, Belgjikës, ndër të tjerë”, thuhet në njoftimin e Presidencës.
Në kuadër të samitit, Presidentja Osmani do të zhvillojë edhe takime bilaterale me liderë të tjerë evropianë.
Shqipëria është sot në vëmendjen e Europës. Sekretari i Përgjithshëm i NATO-s, Mark Rutte, do të vizitojë kryeqytetin shqiptar si pjesë e Samitit të Komunitetit Politik Evropian, njoftoi organizata më e fuqishme ushtarake me seli në Bruksel.
Rutte do të zhvillojë takime të shumta dypalëshe, përfshirë edhe një me kryeministrin shqiptar, Edi Rama.
Ndërkohë, në Tiranë ka mbërritur edhe kryeministri britanik Keir Starmer, i cili u prit sot nga Rama. Në Samit pritet të marrin pjesë edhe liderë të tjerë të rëndësishëm si Emmanuel Macron, Olaf Scholz dhe Rishi Sunak.
Takimi zhvillohet në një kohë kur Ukraina dhe Rusia po përgatiten për bisedimet e para të paqes që nga fillimi i luftës.
Presidentja Vjosa Osmani ka folur pas takimit që ka pasur me liderët e partive në Kosovë, pjesë e të cilit ishin kryetari i VV-së, Albin Kurti, ai i PDK-së, Memli Krasniqi, kryetari i LDK-së, Lumir Abdixhiku dhe ai i AAK-së, Ramush Haradinaj.
Osmani tha se fokusi i saj në këtë takim ka qenë konstituimi i Kuvendit.
“Kishte disponim minimal, por me kalimin e kohës, besoj se do të rritet”.
Ajo tha se ky ishte vetëm takimi i parë, dhe “nëse është e nevojshme do t’i takojë edhe liderët veç e veç”.
Osmani la të kuptohet se do ketë edhe takime të tjera, gjatë ditëve në vazhdim.
Ndryshe, sot bëhen 1 muaj nga seanca e parë e Kuvendit të Kosovës, por fatkeqësisht nuk ka pasur rezultate pozitive.