Tag: Ballina

Këshilli Prokurorial i Kosovës (KPK) të premten ka trajtuar çështjen e ankesës së Blerim Isufajt lidhur me konkursin për pozitën e Kryeprokurorit të Shtetit.

Gjatë mbledhjes, kryesuesi i KPK-së, Arian Gashi, ka propozuar që në rend të ditës të përfshihet edhe autorizimi për drejtorin e përgjithshëm të Sekretariatit të KPK-së, Sami Istrefi, për ta përfaqësuar Këshillin në Gjykatën Kushtetuese lidhur me dhënien e komenteve për ankesën e Isufajt.

Propozimi është miratuar unanimisht nga anëtarët e KPK-së.

“Këshilli autorizoi Drejtorin e Përgjithshëm të Sekretariatit të Këshillit Prokurorial të Kosovës, z. Sami Istrefi, që ta përfaqësojë Këshillin Prokurorial të Kosovës në Gjykatën Kushtetuese për dhënien e komenteve lidhur me ankesën e z. Blerim Isufaj, e cila ka të bëjë me shpalljen e konkursit për pozitën e Kryeprokurorit të Shtetit”, thuhet në njoftimin e KPK-së.

Blerim Isufaj, kryeprokuror i Prokurorisë Speciale të Republikës së Kosovës, kishte dërguar rastin në Gjykatën Administrative pas vendimit të KPK-së për hapjen e konkursit të ri për Kryeprokuror të Shtetit.

Më 18 maj 2026, KPK kishte miratuar shpalljen e konkursit për këtë pozitë me pesë vota për, një kundër dhe një abstenim. Vendimi ishte kundërshtuar nga Isufaj, i cili kishte paraqitur padi duke kërkuar anulimin e tij si të kundërligjshëm.

Në padinë e tij, Isufaj ka pretenduar se KPK nuk ka pasur të drejtë të hapë konkurs të ri, pasi sipas tij ekziston ende vendimi i vitit 2023, me të cilin ai ishte propozuar për dekretim te presidentja e atëhershme.

Sipas tij, ky vendim nuk është shfuqizuar dhe vazhdon të prodhojë efekte juridike, pasi nuk është nxjerrë ndonjë akt formal për tërheqjen ose anulimin e tij.

“Vendimi i KPK-së i datës 18.05.2026 për shpalljen e konkursit të ri, i nxjerrë pa shfuqizim formal të propozimit paraprak, e prek drejtpërdrejtë sferën juridike të paditësit”, thuhet në padinë e Isufajt.

Isufaj ka kërkuar gjithashtu që të shtyhet ekzekutimi i vendimit të KPK-së për shpalljen e konkursit deri në një vendim përfundimtar të gjykatës në këtë çështje administrative.

Megjithatë, Gjykata Administrative më 5 qershor kishte refuzuar kërkesën e tij për masë të sigurisë, ndërsa Gjykata e Apelit e kishte vërtetuar këtë vendim, duke vlerësuar se nuk ishin plotësuar kushtet ligjore për vendosjen e një mase të tillë.

Sipas Apelit, për caktimin e masës së sigurisë duhet të plotësohen në mënyrë kumulative dy kushte: shmangia e një dëmi të rëndë dhe të pakthyeshëm ndaj interesave të propozuesit dhe moscenimi i rëndë i interesit publik.

“Vetëm pretendimi i paditësit se do t’i shkaktohet dëm është argument i pamjaftueshëm për caktimin e masës së sigurisë”, kishte vlerësuar Kolegji i Apelit.

Ndërkohë, më 19 qershor 2026, KPK kishte miratuar pesë kandidaturat për pozitën e Kryeprokurorit të Shtetit. Në garë janë: Atdhe Dema, Naim Abazi, Rafet Halimi, Shqipdon Fazliu dhe Zejnullah Gashi. Kallxo/

Legjislatura e re e Kuvendit të Kosovës do të ketë 41 gra deputete, të cilat përbëjnë rreth 34 për qind të përbërjes së përgjithshme të parlamentit, sipas të dhënave të publikuara nga Instituti Demokratik i Kosovës (KDI).

Nga numri i përgjithshëm i grave të zgjedhura në Kuvend, 35 prej tyre kanë siguruar mandatin përmes votave të drejtpërdrejta të qytetarëve, ndërsa 6 deputete kanë hyrë në Kuvend përmes zbatimit të kuotës gjinore.

Në Aleancë janë zëvendësuar tri ulëse (Time Kadrijaj Albana Bytyqi, Teuta Haxhiu), në Partinë Demokratike të Kosovës (PDK) dy ulëse (Eliza Hoxha dhe Ariana Musliu-Shoshi), ndërsa një ulëse është ndryshuar edhe në Listën Serbe(Tanja Vuljoviq).

Sipas të dhënave të KDI-së, gjatë procesit të ndarjes së mandateve nga kuota gjinore ka pasur ndryshime në disa subjekte politike.

Gjykata Themelore në Pejë ka vendosur që të rihapë shqyrtimin gjyqësor në rastin ndaj Halil, Kastriot dhe Kreshnik Mehmetaj, të cilët akuzohen për vrasjen e trefishtë që ndodhi në Gllogjan në vitin 2021.

Vendimi u mor në seancën e së premtes, në të cilën ishte paraparë shpallja e aktgjykimit.

Sipas aktakuzës së Prokurorisë, tre të akuzuarit dyshohet se kanë organizuar dhe kryer sulmin në bashkëpunim me njëri tjetrin, me motiv hakmarrjen.

Avokati i familjes së dëmtuar, Arianit Koci, tha se në seancën e sotme pritej shpallja e aktgjykimit, por gjykata vendosi ta rihapë gjykimin për administrimin e një prove shtesë.

“Sot e kemi pritur vendimin. Sidoqoftë, gjykata ka vlerësuar se duhet të vërtetohet edhe një provë, prandaj e ka rihapur gjykimin. Deri më tash, kryetari i trupit gjykues e ka udhëhequr proceduralisht shumë mirë. Unë, si përfaqësues i familjes së dëmtuar, jam i kënaqur dhe besoj se pas seancës së radhës do të merret vendimi dhe personat e akuzuar do të dënohen”, deklaroi Koci.

I pyetur nga gazetarët nëse ka dijeni për provën që ka ndikuar në rihapjen e gjykimit, avokati Arianit Koci tha se bëhet fjalë për një video.

“Gjykata e ka arsyetuar sot vendimin e vet. Bëhet fjalë për një video dhe për fjalën përfundimtare të prokurores. Sidoqoftë, do ta shqyrtojmë dhe do të përfundojë edhe ky proces”, tha Koci.

Aktakuza thekson se objektiv i sulmit ishte shoferi i autobusit, tashmë i ndjeri Gani Gjokaj. Sipas Prokurorisë, familja Mehmetaj e konsideronte atë përgjegjës për vetëvrasjen e vajzës së tyre, Heroina Mehmetaj, çka pretendohet se ka qenë motivi i krimit.

Në dosjen e rastit thuhet se Halil Mehmetaj ishte zotuar për hakmarrje ndaj Gjokajt dhe se gjatë ceremonisë së varrimit të vajzës së tij kishte vendosur orën e dorës në arkovin e saj.

Sipas aktakuzës, të akuzuarit paraprakisht kishin vëzhguar zonën ku ndodhi ngjarja, duke zgjedhur një vend pa kamera sigurie dhe larg banesave. Prokuroria pretendon se ata i kishin zënë pritë autobusit që qarkullonte në linjën Gjakovë, Gllogjan, ndërsa gjatë sulmit mbetën të vrarë tre persona.

Organi i akuzës pretendon se Kastriot Mehmetaj, i armatosur me një pushkë automatike AK-47, kishte shkuar në këmbë deri në vendin e ngjarjes. Me afrimin e autobusit, ai kishte dalë në mes të rrugës duke u shtirur si i dehur për ta detyruar shoferin të ngadalësonte ose të ndalonte. Pasi autobusi uli shpejtësinë, sipas aktakuzës, ai qëlloi në drejtim të shoferit Gani Gjokaj, duke e lënë të vdekur, ndërsa nga të shtënat humbën jetën edhe dy nxënës 17 vjeçarë, L.H. dhe G.M., si dhe u plagos rëndë F.T.

Më tej, sipas aktakuzës, pas kryerjes së sulmit Kastriot Mehmetaj ishte larguar në drejtim të fshatit Shaptej, ku e priste me veturë Kreshnik Mehmetaj. Prokuroria pretendon se pas kthimit në shtëpi arma e përdorur në krim ishte shkatërruar.

Aktakuza ngarkon edhe Halil Mehmetajn se, në periudhën nga 14 qershori 2020 deri më 26 nëntor 2021, kishte nxitur Kastriot dhe Kreshnik Mehmetajn për vrasjen e Gani Gjokajt, duke e fajësuar vazhdimisht atë për vetëvrasjen e vajzës së tij, Heroina Mehmetaj. /kp/

Zëdhënësi i Gjykatës Speciale në Hagë, Michael Doyle, ka folur për vazhdimin e masës së paraburgimit ndaj katër ish-krerëve të UÇK-së, duke deklaruar se gjyqtarët e shqyrtojnë këtë çështje çdo dy muaj.

Në një deklaratë të publikar në faqën zyrtare të Gjykatës në rrjete sociale, Doyle ka thënë se Trupi Gjykues në çështjen ndaj Hashim Thaçit dhe të bashkëpandehurve të tij vlerëson rregullisht nëse paraburgimi mbetet i nevojshëm dhe proporcional gjatë procesit gjyqësor.

Sipas tij, vendimi për moslirimin e tyre deri më tani lidhet me vlerësimin se ekziston rreziku që ata të kryejnë vepra të tjera penale, veçanërisht ndaj personave që kanë dëshmuar në proces.

Every two months, the Trial Panel in the Thaçi et al. case reviews whether detention is still necessary and proportionate for defendants during their trial. Up until now they have always concluded that a risk exists of Mr. Thaçi and his co-accused committing further offences, in… pic.twitter.com/G7Q02EfS80

— Kosovo Specialist Chambers (@SpecialChambers) July 10, 2026

“ Çdo dy muaj, Trupi Gjykues në çështjen Thaçi etj. shqyrton nëse paraburgimi është ende i nevojshëm dhe proporcional për të pandehurit gjatë gjykimit të tyre. Deri më tani, ata gjithmonë kanë arritur në përfundimin se ekziston rreziku që z. Thaçi dhe të bashkëpandehurit e tij të kryejnë vepra të mëtejshme penale, veçanërisht kundër personave që dëshmuan në gjykimin e tyre”, ka deklaruar Doyle.

Agjencia e Statistikave të Kosovës (ASK) ka publikuar Indeksin e Harmonizuar të Çmimeve të Konsumit (IHÇK) për muajin qershor 2026, sipas të cilit inflacioni vjetor ka arritur në 6.0 për qind, ndërsa në baza mujore është regjistruar një rënie prej 0.1 për qind.

Sipas ASK-së, rritja vjetore e çmimeve është ndikuar kryesisht nga shtrenjtimi i transportit me 13.7 për qind, strehimit, ujit, energjisë elektrike, gazit dhe lëndëve të tjera djegëse me 11.1 për qind, pijeve alkoolike, duhanit dhe narkotikëve me 5.1 për qind, restoranteve dhe shërbimeve të akomodimit me 4.5 për qind, si dhe shëndetësisë me 4.1 për qind.

Rritje të çmimeve janë regjistruar edhe te ushqimet dhe pijet joalkoolike me 3.9 për qind, kujdesi personal dhe shërbimet e ndryshme me 3.2 për qind, mobiljet dhe pajisjet shtëpiake me 3.0 për qind, veshjet dhe këpucët me 2.3 për qind, rekreacioni, sporti dhe kultura me 2.0 për qind, si dhe informacioni dhe komunikimi me 0.2 për qind.

Në anën tjetër, ulje vjetore e çmimeve është regjistruar vetëm te shërbimet arsimore, me 0.6 për qind.

Krahasuar me muajin maj, indeksi i çmimeve të konsumit ka shënuar rënie mesatare prej 0.1 për qind. Kjo është ndikuar kryesisht nga ulja e çmimeve të ushqimeve dhe pijeve joalkoolike me 0.6 për qind, si dhe e strehimit, ujit, energjisë elektrike, gazit dhe lëndëve djegëse me 0.3 për qind.

Ndërkohë, në baza mujore janë shënuar rritje të çmimeve në rekreacion, sport dhe kulturë (0.8 për qind), shërbimet arsimore (0.5 për qind), kujdesi personal dhe shërbimet e ndryshme (0.4 për qind), transporti (0.3 për qind), pije alkoolike, duhani dhe narkotikët (0.2 për qind), mobiljet dhe pajisjet shtëpiake (0.2 për qind), restorantet dhe shërbimet e akomodimit (0.2 për qind), veshjet dhe këpucët (0.1 për qind), si dhe shëndetësia (0.1 për qind).

ASK njofton se publikimi është realizuar duke zbatuar klasifikimin e ri COICOP 2018, me vit bazë 2025 = 100 dhe metodologji të përditësuar.

Ministria e Industrisë, Ndërmarrësisë dhe Tregtisë (MINT) ka publikuar çmimet maksimale të lejuara për derivatet e naftës, të cilat hyjnë në fuqi sot, më 10 korrik 2026, nga ora 10:00.

Sipas vendimit të ri, çmimi maksimal i naftës (dizelit) është 1.47 euro – litri, duke shënuar një rritje prej 3 centësh krahasuar me ditën e djeshme, kur ishte 1.44 euro – litri.

Ndërkohë, çmimi maksimal i benzinës është 1.37 euro – litri, ndërsa i gazit 0.61 euro – litri.

Vendimi është publikuar nga MINT-i dhe vlen për datën 10 korrik 2026.

I përballur me zemërimin e protestuesve në Tiranë që ia kërkojnë dorëheqjen, kryeministri i Shqipërisë po sheh gjithnjë e më shumë zyrtarë të LVV-së, partisë që qeveris në Kosovë, duke mbështetur dhe madje duke marrë pjesë në atë turmë. Megjithëse Edi Rama e kishte shfajësuar homologun e tij në Prishtinë se mund të ishte i përfshirë në “Revolucionin e Flamingove”, Albin Kurti asnjëherë nuk i ka përgënjeshtruar qartë këto pretendime. Dje, zyrtarë të VLEN-it, të lidhur me LVV-në, u ndaluan në Qafë Thanë, ndërsa deputeti socialist Taulant Balla i ekspozoi zyrtarët e partisë së Kurtit që morën pjesë në protestë.

Kryeministri i Shqipërisë, Edi Rama nuk kishte mundur të mos komentonte pas një debati të nxitur në qershor nga pjesëmarrja e disa shqiptarëve nga Kosova dhe Maqedonia e Veriut në protestat kundër qeverisë së tij në Tiranë.

Ai kishte shkruar në një postim në Facebook më 21 qershor se nuk e konsideronte kryeministrin në detyrë të Kosovës, Albin Kurti, përgjegjës për veprimet e disa “sallahanave të Vetëvendosjes” që thoshte se ishin përfshirë në atë që ai e quan “çorbë dreqërish”.

Rama ka kritikuar ashpër atë që e ka quajtur paraqitje të shqiptarëve nga Kosova dhe Maqedonia e Veriut si “diasporë” në protestat në Tiranë. Në fund të atij postimi kërkonte që qëndrimi i disa protestuesve të mos lidhej me emrin e kryeministrit në detyrë të Kosovës.

“Dhe mos të spekullojë askush duke e lidhur këtë shënim me emrin e kryeministrit të Kosovës, sepse kurrësesi nuk mund ta bëj e as ta nënkuptoj në asnjë rrethanë, përgjegjës, për asnjë prej sallahanave të Vetëvendosjes që janë përfshirë në këtë çorbë dreqërish. Nuk e them këtë hiçasfare për një larje protokollare goje, por sepse e di mirë që çdo çadër e gjerë politike mban edhe sallahanat e vet dhe do të fyeja inteligjencën e Albinit po të mendoja se ai gjykon si ata. Kështu që lëreni Albin Kurtin jashtë kësaj çorbe të neveritshme”, shkruante ai.

Vetë Kurti, duke mohuar disa pretendime se partia e tij do të organizonte protesta kundër një projekti të gazit që po ia kërkon SHBA-ja, pati theksuar se LVV-ja i ka bërë “protestat më të fuqishme”.

“Kam parë që kanë qarkulluar disa lajme të rrejshme për atë se Lëvizja Vetëvendosje planifikon të bëjë protesta. Tash natyrisht në këtë shekull, protestat më të fuqishme i ka bërë Lëvizja Vetëvendosje dhe ndoshta kur njerëzit e mendojnë protestën, e mendojnë Lëvizjen Vetëvendosje. Mirëpo kjo nuk flet asgjë për neve. Kjo flet për ata”, kishte deklaruar ai për gazetarët më 16 qershor.

Megjithatë, ish-deputetë, asambleistë dhe zyrtarë të tjerë të LVV-së, partisë që qeveris në Kosovë, i kanë mbështetur në rrjetet sociale dhe disa madje kanë marrë pjesë edhe fizikisht në protestat në Tiranë.

Mbrëmë, deputeti i LVV-së në Maqedoninë e Veriut, Bekim Qoku u ankua se ai dhe disa zyrtarë të VLEN-it – formacionit të shqiptarëve në qeverinë Shkup që mbështeten nga Kurti – u përballën me “një situatë të pashpjegueshme në hyrje të Republikës së Shqipërisë”. Tha se u lanë të prisnin mbi një orë në kufi “pa asnjë sqarim”. Aludonte se kjo kishte lidhje me mbështetjen e tij për protestat në Tiranë.

“Nëse arsyeja lidhet me faktin se kam mbështetur publikisht protestat e fundit në Shqipëri, atëherë kjo do të ishte thellësisht shqetësuese. Ndëshkimi i qytetarëve për shprehjen e mendimit apo për mbështetjen paqësore të protestave nuk është në përputhje me standardet e një shteti demokratik dhe me liritë themelore të garantuara në çdo shoqëri demokratike. Nuk mund ta kuptoj këtë logjikë kur dihet që disa eurodeputetë kanë marrë pjesë fizikisht në protestat aktuale në Tiranë”, shkroi ai në një postim në Facebook.

Qoku, që është edhe këshilltar i Kurtit, e akuzoi qeverinë e Shqipërisë se po vihet “në funksion të autokracisë e të përçarjes së shqiptarëve”.

Arbër Zaimi, një tjetër zyrtar i LVV-së, e shpërndau postimin e bashkëpartiakut të tij dhe kërkoi që institucionet e Shqipërisë “të kërkojnë falje”.

“Ndalimi i hyrjes në Shqipëri të disa deputetëve dhe zyrtarëve shqiptarë nga Maqedonia e Veriut, me justifikimin pse këta kanë përkrahur online protestat në Tiranë, është një veprim i çoroditur dhe për të ardhur keq. Shpresoj që këtë vendim ta ketë marrë ndonjë zyrtar servil e i papjekur, dhe uroj që institucionet e Shqipërisë të kërkojnë falje. Shqipëria simbas ligjeve të saj është demokraci, e preferencat politike të çdo njeriu nuk janë arsye për ta dënuar atë”, shkroi ai.

Postimin e Qokut e shpërndanë edhe zyrtarë të tjerë të LVV-së, përfshirë Elvis Hoxhën, i cili ishte nga ata që shkoi fizikisht në Tiranë për të protestuar.

LVV-ja publikisht nuk është distancuar nga pretendimet se po i mbështet protestat kundër qeverisë shqiptare.

Enver Dugolli, ish-deputet në Kuvendin e Kosovës nga kjo parti, pati thënë se LVV “nuk ka të bëjë asgjë” me protestat. “Thjesht, ne, disa aktivistë apo disa njerëz, eksponentë, solidarizohemi me kërkesat e drejta të qytetarëve, shqetësimet e tyre të drejta dhe me kaq mbaron”, thoshte ai për KosovaPress më 22 qershor.

Me raportet asnjëherë aq të mira Kurti-Rama, disa kanë të drejtë të dyshojnë se kryeministri në detyrë i Kosovës vërtet mund të i përfshirë në këtë “çorbë”.

Kur Rama tha “lëreni Albinin jashtë kësaj çorbe të neveritshme”, një deputet i Partisë Socialiste të Shqipërisë nuk e ndante të njëjtin mendim me shefin e tij të partisë.

Ulsi Manja kishte thënë “ishalla s’ka” lidhje Kurti me këtë, por kishte pyetur se pse ai nuk po distancohej.

“Dakord Kryeminister dakord, me ty jam, po neqoftese Albin Kurti nuk paska lidhje me kete çorbe qensh dhe ishalla s’ka, pse nuk distancohet qeveria e tij nga ky turp me gjoja “diaspore”?! Gjithesesi une mendoj se nuk ka hajvanllek me te madh se sa te vish nga Kosova per te rrezuar qeverine ne Tirane. Jo vetem se nuk e rrezon dot, po i jep nje dore te madhe armiqve te Kosoves qe do thone ja, shikojini kush jane, nuk rrine dot pa rremuje e pa konflikt as me Shqiperine qe e kane pjese te kombit te tyre!!!”, kishte shkruar ish-ministri në një postim në Facebook më 21 qershor.

Kreu i grupit parlamentar të Partisë Socialiste të Shqipërisë, Taulant Balla ka komentuar pjesëmarrjen e zyrtarit të LVV-së, ish-deputetit Egzon Azemi në protestën kundër qeverisë në Tiranë.

Ai publikoi një video në Facebook, duke thënë se Azemi është edhe mik i Besnik Mujecit, aktivstit të LVV-së i cili në verën e vitit 2023 ishte arrestuar në Tiranë për shitje droge.

“Transparenca e Protestës. Identifikojmë sorrat‍. Kur unë flas për sorra inkubatorësh të urrejtjes nga Prishtina dhe Tetova, të cilët maskohen si shqiponja diaspore e kam fjalen për tipa si këta në video që sigurisht nuk kanë si të jenë pro qeverisë së Tiranës. Normal janë kundër Edi Ramës. Edhe kundër meje, pse jo. Sepse i kemi arrestuar me 11 mijë doza drogë”, shkroi Balla në postim.

Para pak ditësh, Azemi kishte publikuar një video në Facebook nga protesta në Tiranë.

“Sheshit të Shqipërisë së Re nuk i shihej as fillimi, as fundi. Nuk mund të mos i bashkohesha një thirrjeje kaq të sinqertë e energjike, që prej 35 ditësh me radhë po ushton kaq pastër e kaq fort! Shqipëria është atdheu i secilit shqiptar dhe kur tentohet të falet e të shitet, nuk do të heshtim kurrë”, kishte shkruar ai.

Protestat në Shqipëri, që tani po quhen “Revolucioni i Flamingove”, nisën fillimisht për të kundërshtuar projektin për ndërtimin e një resorti luksoz në Zvërnec, afër Vlorës, i lidhur me Jared Kushner, dhëndrin e presidentit amerikan, Donald Trump. Më pas kërkesat u zgjeruan dhe pakënaqësitë e shprehura kaluan përtej mbrojtjes së mjedisit. Kryeministrit shqiptar, Edi Rama po ia kërkojnë dorëheqjen.

Pas certifikimit të rezultateve përfundimtare të zgjedhjeve parlamentare të 7 qershorit nga Komisioni Qendror i Zgjedhjeve (KQZ), ka nisur edhe zyrtarisht afati kushtetues për mbledhjen dhe konstituimin e Kuvendit të ri të Kosovës.

Sipas përcaktimeve kushtetuese, Kuvendi i dalë nga zgjedhjet duhet të konstituohet brenda 30 ditësh nga certifikimi i rezultateve, afat i cili përfundon më 7 gusht.

Në këtë kuadër, kryeministri në detyrë, Albin Kurti, ka nisur kontaktet politike duke u dërguar ftesa për takim kryetarëve të tri subjekteve më të mëdha opozitare – Partisë Demokratike të Kosovës (PDK), Lidhjes Demokratike të Kosovës (LDK) dhe Aleancës për Ardhmërinë e Kosovës (AAK).

Lajmi është konfirmuar për Telegrafin nga zëdhënësi i Qeverisë në detyrë, Arlind Manxhuka.

“Po, sot në mëngjes kryeministri Kurti uka dërguar letër për takim kryetarëve të Partisë Demokratike të Kosovës, Lidhjes Demokratike të Kosovës dhe Aleancës”, ka deklaruar Manxhuka.

Pas konstituimit të Kuvendit, pritet të nisin procedurat kushtetuese për formimin e Qeverisë së re, ndërsa më pas do të zhvillohet edhe procesi për zgjedhjen e Presidentit të Republikës së Kosovës.

Avokatët e të akuzuarve Dragisha dhe Jovan Viqentijeviq, si dhe Igor Dimoviq, në fjalët hyrëse në gjykimin për sulmin në kanalin e Ibër-Lepencit, kundërshtuan aktakuzën e Prokurorisë Speciale, duke pretenduar se nuk janë marrë parasysh provat e propozuara nga mbrojtja, raporton Ekonomia Online.

Avokati Nebojsha Vllaiq, mbrojtës i të akuzuarit Jovan Viqentijeviq, tha se nga gjykata pret drejtësi dhe objektivitet, duke akuzuar Prokurorinë se ka injoruar provat e mbrojtjes.

“Pse qytetarët i drejtohen gjykatës, sepse nga gjykata presim drejtësi dhe të vërtetën. Pse bash nga gjykata, sepse gjykata është e obliguar që të jetë objektive dhe e paanshme. Dhe ky obligim nuk e obligon vetëm gjykatën por edhe prokurorin publik. Ne kemi propozuar 10 prova dhe prokurori nuk ka marrë asnjë thjesht nuk i ka interesuar. Këtu prokurorit i pengon se i pandehuri po mbrohet në heshtje… Nuk do të flas (i pandehuri) përderisa prokurori i fsheh të gjitha dhe i fsheh provat tona. Në mënyrë të palejueshme dhe të paligjshme”, tha ai.

Ai kundërshtoi edhe përfshirjen në aktakuzë të disa gjërave të sekuestruara, duke thënë se posedimi i tyre nuk përbën vepër penale.

“Asnjë ligj nuk ndalon të mbahet thika, të gjithë kemi në shtëpi, radio, secili gjuetar ka maska apo uniforma, unë nuk them se prokurori s’guxon t’i përmendë, aktakuza ka arsyetimin le ta sqarojë ai në arsyetim se çka ka pas i pandehuri. Atëherë pretendon se ekzistojnë uniforma ruse po s’është asnjë, unë këtë e kam provu, kjo është e Ukrainës, ndërsa uniforma amerikane e britanike ka më së shumti, po ato prokurori s’i përmend se s’i pengojnë që ato konsiderohen uniforma të miqve në Kosovë, prokurorit i pengojnë uniformat ruse që ta vendos të pandehurin në një situatë më të vështirë. Edhe vepra penale e spiunazhit është kualifikuar jashtëligjshëm. Vlerësimi i dëmit është i tepruar”, tha ai.

Avokati Millosh Deleviq, mbrojtës i Dragisha Viqentijeviqit, tha se nga aktakuza nuk është e qartë se çfarë veprimi konkret ka kryer klienti i tij.

“Ne në gjykimin e kaluar kemi dëgjuar aktakuzën, sot e kemi dëgjuar fjalën hyrëse të prokurorit dhe nuk është e qartë se çfarë ka bërë i mbrojturi im. Çka konkretisht ka bërë ai atë ditë. Kjo aktakuzë dhe kjo çfarë është deklaruar përshkruan ngjarjen që ka ndodhur atë ditë, unë nuk e di deri ku gjykata e shkallës së parë di të tolerojë që prokurori të paraqes aktakuza me këso përmbajtje dhe deri kur do të lejojë që këto aktakuza të hyjnë në fuqi. E vetmja gjë logjike në lidhje me Dragishën është se supozohet se ekziston prova që balta nga çizmet e tij përputhet me baltën nga vendi i ngjarjes. Mirëpo nuk e kemi kuptuar se a është vërtetuar se ato çizme janë pronë e Dragishës. Do të propozojmë 4 dëshmitarë, do të propozojmë video-incizime. Do të kundërshtojmë edhe ekspertizën e baltës në çizme”, tha ai.

Jelena Krivokapiq, mbrojtëse e të akuzuarit Igor Dimoviq, tha se mbrojtja do të ofrojë prova se sendet e sekuestruara janë pjesë e një koleksioni privat.

“Do të ofrojmë prova se bëhet fjalë për koleksionimin e gjërave të vjetra, përkatësisht se i mbrojturi im është koleksionar i pasionuar i gjërave të vjetra që përfshijnë edhe gjëra të ushtrive të vjetra, të cilat janë të rralla, nuk bëhet fjalë për pajisje ushtarake”, tha ajo.

Kryetari i trupit gjykues, Vesel Ismaili, tha se seanca e radhës është caktuar për 27 korrik në orën 10:00 dhe 28 korrik në orën 09:30.

Sipas aktakuzës së Prokurorisë, vëllezërit Dragisha dhe Jovan Viqentijeviq më 29 nëntor 2024, rreth orës 18:50, në fshatin Varagë, Komuna e Zubin Potokut, kanë vendosur eksploziv në pjesën e kanalit të “Ibër Lepenc”, infrastrukturë publike e cila shërben për furnizimin me ujë të pijshëm dhe nevoja të Korporatës Energjetike të Kosovës (KEK) për prodhim të energjisë elektrike.

Në aktakuzën të cilën e ka ngritur prokurori special Bekim Kodraliu, thuhet se të akuzuarit, së bashku me disa persona të tjerë ende të panjohur, pas një marrëveshjeje paraprake, me qëllim të frikësimit serioz të popullsisë së vendit dhe rrezikimit të rendit kushtetues dhe sigurisë së Republikës së Kosovës, e kanë vendosur një sasi të konsiderueshme të eksplozivit që shërben për përdorim ushtarak (rreth 20 kilogramë të llojit Trinitrotoluene “TNT”) në brendësi të kanalit.

Bashkimi Evropian ka miratuar projektet e propozuara nga Kosova në kuadër të programeve IPA 2026–2027, me një vlerë prej 180.5 milionë euro.

Përveç kësaj, përmes Kornizës Investuese për Ballkanin Perëndimor (WBIF) janë siguruar edhe tri grante shtesë në vlerë prej 25.9 milionë euro, duke e çuar mbështetjen totale në 206.4 milionë euro.

Kryenegociatori i Republikës së Kosovës me Bashkimin Evropian, Jeton Zulfaj, bëri të ditur se këto fonde do të investohen në sektorë me rëndësi strategjike për zhvillimin e vendit.

Sipas tij, fondet e IPA 2026–2027 do të mbështesin projekte në fushën e mjedisit dhe veprimit klimatik, energjisë, migrimit dhe menaxhimit të kufijve, përafrimit me Bashkimin Evropian dhe qeverisjes së mirë, konkurrueshmërisë, si dhe sundimit të ligjit.

Rreth gjysma e mjeteve financiare do të destinohen për investime infrastrukturore, ndërsa pjesa tjetër do të përdoret për grante për institucionet dhe asistencë teknike.

Ndërkaq, tri grantet e miratuara në kuadër të WBIF, me vlerë 25.9 milionë euro, do të financojnë ndërtimin e impiantit për trajtimin e ujërave të zeza në Podujevë, në bashkëpunim me BERZH-in, zhvillimin e hidrosistemit Ibër-Lepenc, si dhe segmentin e autostradës Qafë e Duhlës–Banullë.

Sipas Zulfajt, këto investime do të forcojnë kapacitetet institucionale të Kosovës, do të përshpejtojnë përafrimin me standardet e Bashkimit Evropian dhe do të sjellin përfitime të drejtpërdrejta për qytetarët dhe zhvillimin ekonomik të vendit.