Tag: Ballina

Shqipëria ka mbyllur tre kapitujt e parë të negociatave për anëtarësim në Bashkimin Evropian, gjatë Konferencës së IX-të Ndërqeveritare Shqipëri–BE, e cila u mbajt të martën në Bruksel.

Bëhet fjalë për kapitujt 25, 26 dhe 30, të cilët lidhen me shkencën dhe hulumtimet, arsimin dhe kulturën, si dhe politikën e jashtme.

Dy prej këtyre kapitujve, 25 (Shkenca dhe Hulumtimet) dhe 26 (Arsimi dhe Kultura), zakonisht konsiderohen fusha ku nuk ka nevojë për negociata të thelluara, pasi nuk ekziston një kornizë e përbashkët ligjore e Bashkimit Evropian, por vetëm disa parime bazë.

Megjithatë, sipas metodologjisë së re të procesit të zgjerimit të BE-së, edhe këto kapituj nuk mund të mbyllen pa miratimin e raportit të ndërmjetëm për përmbushjen e kritereve kalimtare në fushën e sundimit të ligjit (IBAR).

Shqipëria e ka siguruar këtë raport pas disa vonesave, për shkak të rezervave të disa shteteve anëtare të BE-së, duke hapur kështu rrugën për mbylljen e kapitujve negociues.

Kapitulli 30, që lidhet me politikën e jashtme, është mbyllur gjithashtu, pasi Shqipëria ka qenë e përafruar plotësisht me qëndrimet e Bashkimit Evropian në këtë fushë. Për më tepër, vendi është anëtar i NATO-s.

Kryeministri shqiptar, Edi Rama, pas konferencës në Bruksel, e ka cilësuar këtë zhvillim si një tjetër hap të rëndësishëm në procesin e integrimit evropian.

“Ky është një gur kilometrik tjetër në rrugëtimin tonë të pakthyeshëm drejt Bashkimit Evropian”, është shprehur Rama.

Ndërkaq, komisionarja evropiane për Zgjerim, Marta Kos, e ka cilësuar këtë moment historik për Shqipërinë, por ka paralajmëruar se vendi ka ende punë përpara për përmbylljen e të gjithë kapitujve negociues.

Negociatat e Shqipërisë me BE-në përfshijnë gjithsej 33 kapituj. Vendi kishte shënuar progres të madh vitin e kaluar duke arritur hapjen e të gjithë kapitujve, ndërsa tash ka hyrë në fazën e mbylljes së tyre.

Zejnullah Gashi është dekretuar në pozitën e Kryeprokurorit të Shtetit.

Kështu ka njoftuar ushtruesja e detyrës së presidentes së Kosovës, Albulena Haxhiu, përmes një shkrimi në Facebook, duke bërë të ditur se vendimi është marrë pas një shqyrtimi të kujdesshëm të propozimit dhe dokumentacionit të dërguar nga Këshilli Prokurorial i Kosovës.

Sipas Haxhiut, në procesin e shqyrtimit janë përfshirë edhe informacionet e institucioneve kompetente të sigurisë, si dhe raportet e organizatave që kanë monitoruar procesin e përzgjedhjes.

Ajo ka theksuar se vendimi është marrë duke pasur parasysh rëndësinë e funksionit të Kryeprokurorit të Shtetit dhe nevojën për funksionalizimin e plotë të institucioneve të drejtësisë, në përputhje me përgjegjësitë kushtetuese dhe ligjore.

“Funksioni i Kryeprokurorit të Shtetit është një nga shtyllat kryesore të sundimit të ligjit dhe mbrojtjes së rendit kushtetues. Beteja kundër krimit të organizuar, korrupsionit, ndjekja e kriminelëve të luftës, dhunuesve dhe krimit të çfarëdo forme duhet të marrin përgjigje të prerë nga organi i akuzës”, ka shkruar Haxhiu.

Ajo i ka uruar Gashit sukses në detyrën e re, duke shprehur pritjen që ai ta ushtrojë funksionin me integritet të lartë profesional e moral, paanshmëri dhe guxim, duke vepruar gjithmonë në përputhje me Kushtetutën dhe ligjet e Republikës së Kosovës.

Ditë më parë u bë e ditur se mbrojtja e ish-presidentit Hashim Thaçi, ka kërkuar nga Gjykata Speciale në Hagë lirimin e tij me kusht, duke ofruar garanci financiare 50 mijë euro, gjersa lidhur me këtë janë deklaruar edhe nga Gjykata Speciale.

Siç është bërë e ditur në kërkesën e mbrojtjes thuhet se ish-presidenti Thaçi nuk paraqet rrezik të arratisjes dhe se ai ka ofruar garanci financiare 50 mijë euro për të siguruar lirimin e tij.

Ndër të tjera në kërkesë bëhet e ditur edhe për kushtet të cilat, ish-presidenti, është i gatshëm t’i pranojë.

Aty, përveç garancisë prej 50 mijë eurosh, thuhet se, Thaçi nuk do të largohet nga territori i Kosovës, dhe se ai, do të dorëzojë pasaportën dhe çdo dokument tjetër udhëtimi.

Po ashtu, thuhet se, Thaçi do të përmbahet nga bërja e çdo deklarate publike, drejtpërdrejt ose tërthorazi në media dhe, ose në rrjetet sociale, si dhe, ai nuk do të diskutojë përmbajtjen e çështjes së tij me askënd, përveç anëtarëve të caktuar të ekipit të tij mbrojtës.

Kushtet e publikuara në kërkesë:

Z. Thaçi është i gatshëm t’u përmbahet kushteve të ngjashme me ato që u janë vendosur bashkë të akuzuarve të tij, të cilat janë cilësuar si “një kornizë e provuar dhe e përshtatshme për lirimin e përkohshëm”,⁵⁵ ose çdo kushti tjetër që Gjyqtari i Vetëm i Gjykimit (GVG) e konsideron të përshtatshëm, përkatësisht:

a) Z. Thaçi nuk do të largohet nga territori i Kosovës, përveç nëse autorizohet për këtë nga një trup gjykues kompetent i Dhomave të Specializuara të Kosovës (DhSK);

b) Z. Thaçi do t’ia dorëzojë Regjistrarit pasaportën dhe çdo dokument tjetër udhëtimi, përfshirë vizat dhe çdo dokument identifikimi që mund të përdoret për udhëtim. Ky detyrim shtrihet edhe mbi çdo pasaportë ose dokument të ri udhëtimi që mund t’i lëshohet nga autoritetet e Kosovës ose autoritete të tjera pas nxjerrjes së këtij vendimi. Nëse prania e z. Thaçi kërkohet në selinë e DhSK-së, Regjistri do t’ia vërë në dispozicion pasaportën vetëm për atë qëllim. Pas kthimit të tij në Kosovë, pasaporta do t’i dorëzohet sërish Regjistrarit;

c) Z. Thaçi do të japë adresën ku do të banojë në Kosovë gjatë gjithë kohëzgjatjes së procedurës gjyqësore dhe do të kërkojë leje nga DhSK-ja përpara çdo ndryshimi të vendbanimit;

d) Z. Thaçi do të depozitojë pranë Regjistrarit, si kusht paraprak për lirimin e tij, një garanci financiare në formën e një transferi monetar në shumën prej 50.000 eurosh në llogarinë e Regjistrit;

e) Z. Thaçi do të përmbahet nga çdo kontakt ose komunikim, të drejtpërdrejtë apo të tërthortë (nëpërmjet çdo personi tjetër), të çfarëdo lloji dhe me çfarëdo mjeti, me bashkë të akuzuarit e tij (Bashkim Smakaj, Isni Kilaj, Fadil Fazliu dhe Hajredin Kuçi);

f) Z. Thaçi do të përmbahet nga çdo kontakt ose komunikim, të drejtpërdrejtë apo të tërthortë (nëpërmjet çdo personi tjetër), të çfarëdo lloji dhe me çfarëdo mjeti, me çdo person për të cilin ai e di se është dëshmitar në këtë ose në ndonjë çështje tjetër para DhSK-së;

g) Z. Thaçi do të përmbahet nga çdo kontakt ose komunikim, të drejtpërdrejtë apo të tërthortë (nëpërmjet çdo personi tjetër), me çdo person që në Aktakuzën e Ndryshuar të Konfirmuar pretendohet se ka marrë pjesë ose ka ndihmuar në sjelljen penguese objekt të kësaj çështjeje;

h) Z. Thaçi nuk do të diskutojë përmbajtjen e çështjes së tij me askënd, përveç anëtarëve të caktuar të ekipit të tij mbrojtës, përfshirë edhe anëtarët e ngushtë të familjes, dhe do t’i informojë çdo personi që bën pyetje lidhur me çështjen e tij se ai i nënshtrohet një ndalimi të tillë nga DhSK-ja;

i) Z. Thaçi do të përmbahet nga bërja e çdo deklarate publike, drejtpërdrejt ose tërthorazi (për shembull, nëpërmjet anëtarëve të familjes), në media dhe/ose në rrjetet sociale lidhur me DhSK-në, Zyrën e Prokurorit të Specializuar (ZPS) dhe/ose çdo procedurë para DhSK-së;

j) Z. Thaçi do të paraqitet për një verifikim javor pranë Policisë së Kosovës, në përputhje me procedurat e përcaktuara nga Regjistrari;

k) Z. Thaçi do të dorëzohet në paraburgimin e DhSK-së, nëse urdhërohet për këtë, dhe do të marrë pjesë në çdo seancë gjyqësore sipas kërkesës së DhSK-së. Çdo mosparaqitje para DhSK-së, sipas urdhrit, do të sjellë konfiskimin e garancisë financiare të parashikuar në nënparagrafin (d), si dhe lëshimin e menjëhershëm të një urdhër-arresti;

l) Z. Thaçi do ta njoftojë Regjistrarin për adresën ku do të qëndrojë gjatë kohës që ndodhet në territorin e Shtetit Pritës për të marrë pjesë në seancat gjyqësore dhe do t’u përmbahet çdo kufizimi të lëvizjes në territorin e Shtetit Pritës që mund t’i vendoset gjatë periudhës së qëndrimit të tij atje;

m) Z. Thaçi do ta respektojë klasifikimin konfidencial të vendimit për lirimin e tij dhe nuk do ta publikojë, zbulojë apo diskutojë në çfarëdo mënyre përmbajtjen e tij, drejtpërdrejt ose tërthorazi, me asnjë person, përfshirë çdo të akuzuar në Objektin e Paraburgimit dhe anëtarët e familjes së tij, me përjashtim të avokatit të tij dhe anëtarëve të caktuar të ekipit mbrojtës, derisa vendimi të bëhet publik me urdhër të GVG-së; dhe

n) Z. Thaçi do t’i përmbahet çdo vendimi, urdhri ose udhëzimi tjetër të Gjyqtarit të Vetëm të Gjykimit dhe të Regjistrarit.

Specialja flet për dorëzaninë e Hashim Thaçit

Nga Dhomat e Specializuara të Kosovës në Hagë bëhet e ditur se trupi gjykues do të marrim vendimin në kohën e duhur, lidhur me kërkesën e mbrojtjes së Hashim Thaçit për lirim me kusht dhe ofrim të disa garancive përfshirë edhe dorëzanin prej 50 mijë euro.

“Trupi Gjykues do të nxjerrë një vendim lidhur me këtë kërkesë në kohën e duhur”, ka deklaruar për Radio Dukagjinin, zëdhënësi i Gjykatës Speciale, Michael Doyle.

Kërkesën për lirim me kusht të ish-presidentit, Hashim Thaçi mbrojtja e tij e ka parashtrua më 6 korrik të këtij viti dhe brenda një afati të arsyeshëm trupi gjykues duhet të kthej një përgjigje.

Përveç garancisë prej 50 mijë eurosh, thuhet se Thaçi nuk do të largohet nga territori i Kosovës, dhe se ai do të dorëzojë pasaportën dhe çdo dokument tjetër udhëtimi.

Po ashtu, thuhet se, Thaçi do të përmbahet nga bërja e çdo deklarate publike, drejtpërdrejt ose tërthorazi në media dhe, ose në rrjetet sociale, si dhe, ai nuk do të diskutojë përmbajtjen e çështjes së tij me askënd, përveç anëtarëve të caktuar të ekipit të tij mbrojtës. /Telegrafi

Nga dita e sotme, qytetarët do të paguajnë më shumë për një litër naftë. Ministria e Industrisë, Ndërmarrësisë, Tregtisë dhe Inovacionit (MINT) ka publikuar çmimet e reja maksimale të lejuara për derivatet e naftës, duke njoftuar rritje të çmimit të dizelit me 2 cent.

Sipas vendimit, çmimi maksimal i naftës (dizelit) është 1.52 euro për litër, nga 1.50 euro sa ishte më parë. Ndërkohë, benzina mbetet në 1.39 euro për litër, ndërsa gazi në 0.61 euro për litër.

Çmimet e reja kanë hyrë në fuqi nga ora 10:00 e datës 14 korrik 2026, në përputhje me vendimin e MINT-it.

Sot është një ‘super të martë’. Kështu e ka quajtur 14 korrikun, komisionerja për Zgjerim e Bashkimit Evropian, Marta Kos, e cila theksoi për herë të parë në më shumë se dy dekada, po mbahen katër konferenca të anëtarësimit në të njëjtën ditë.

Kos përmes një video në rrjetin social X ka bërë të ditur procesin që po zhvillohet, gjersa Shqipëria do të mbyllë kapitujt e parë të saj.

“Sot është një ‘Super e Martë’ për zgjerimin e Bashkimit Evropian. Për herë të parë në më shumë se dy dekada, po mbajmë katër konferenca të anëtarësimit në të njëjtën ditë…Katër vendet që janë në krye të procesit – Ukraina, Moldavia, Shqipëria dhe Mali i Zi – po hedhin të gjitha hapa të rëndësishëm përpara…

Shqipëria do të mbyllë kapitujt e saj të parë, ndërsa Mali i Zi ndodhet në fazën përfundimtare të negociatave formale, pasi ka mbyllur 18 nga 33 kapitujt. Tani, ky momentum i krijuar sot duhet të shndërrohet në rezultate konkrete në terren”, shkruan ajo.

Ndryshe, delegacioni shqiptar, i kryesuar nga kryeministri Edi Rama, do të formalizojë mbylljen e kapitullit 25 (Shkenca dhe Kërkimi), kapitullit 26 (Arsimi dhe Kultura) dhe kapitullit 30 (Marrëdhëniet me Jashtë), fusha këto të harmonizuara me standardet e BE-së.

Konferenca do të nisë në orën 19:00, ndërsa një orë më vonë do të mbahet një konferencë për shtyp mbi ecurinë e procesit të integrimit.

Policia e Kosovës ka njoftuar se ka arrestuar katër persona për kanosje dhe armbëmbajtje pa leje ën Feerizaj gjatë ditës së djeshme.

Të dyshuarit: H.TH( 50 vjeç), SH.TH(27 vjeç). E.B ( 37 vjeç) dhe E.H (27 vjeç), me vendim të prokurorit të shtetit janë ndaluar në mbajtje për 48 orë, ndërsa ndaj tyre janë iniciuar raste për veprat penale:

“Kanosja”, “Mbajtja në pronësi, kontroll ose posedim të paautorizuar të armëve dhe “Asgjësimi apo dëmtimi i pasurisë”.

Postimi i plotë:

Më datën 13.07.2026, në stacionin policor në Ferizaj është paraqitur një ankues, M.B, i cili ka deklaruar se ishte kanosur nga disa persona.

Pas ndërmarrjes së veprimeve operative-hetimore nga njësitet reaguese dhe njësia e hetimeve, janë identifikuar dhe lokalizuar personat e dyshuar në një lokal në Ferizaj, ku gjatë kontrollit janë sekuestruar katër armë zjarri dhe sasi municioni.

Të dyshuarit: H.TH( 50 vjeç), SH.TH(27 vjeç). E.B ( 37 vjeç) dhe E.H (27 vjeç), me vendim të prokurorit të shtetit janë ndaluar në mbajtje për 48 orë, ndërsa ndaj tyre janë iniciuar raste për veprat penale:

“Kanosja”, “Mbajtja në pronësi, kontroll ose posedim të paautorizuar të armëve dhe

“Asgjësimi apo dëmtimi i pasurisë”.

Bashkimi Evropian ka njoftuar se e ka caktuar shefin e ri të Zyrës në Kosovë.

Ai është diplomati gjerman Dirk Schubel, i cili zyrtarisht do ta merr detyrën më 1 shtator duke pasur në këtë pozitë Aivo Oravin.

Mandat i tij fillestar do të jetë dyvjeçar, njofton BE-ja.

Mandati i Përfaqësuesit Special të BE-së për Kosovën është i përqendruar në promovimin e një Kosove të qëndrueshme, demokratike dhe shumetnike, duke mbështetur perspektivën e saj evropiane përmes komunikimit publik dhe angazhimit të synuar me qytetarët.

Detyrat kryesore përfshijnë monitorimin e progresit në prioritetet politike, ekonomike dhe të sigurisë, kontributin në forcimin e të drejtave të njeriut, sundimit të ligjit dhe mbrojtjes së komuniteteve pakicë, si dhe promovimin e koordinimit politik të Bashkimit Evropian për të siguruar një prani të bashkërenduar dhe të dukshme të BE-së në Kosovë.

Kush është përfaqësuesi i ri i BE-së në Kosovë?

Dirk Schubel është diplomat gjerman me përvojë të gjatë në pozita udhëheqëse në Shërbimin Evropian për Veprim të Jashtëm (EEAS), Komisionin Evropian, si dhe në Ministrinë e Punëve të Jashtme të Gjermanisë. Aktualisht, ai shërben si shef i Divizionit për Rusinë në EEAS.

Më herët, ai ka qenë i Dërguar Special i BE-së për Partneritetin Lindor nga viti 2022 deri në vitin 2024. Gjithashtu, ka drejtuar Delegacionin e Bashkimit Evropian në Bjellorusi nga viti 2019 deri në vitin 2022 dhe Delegacionin e BE-së në Moldavi nga viti 2009 deri në vitin 2013, ku ka luajtur rol kyç në avancimin e angazhimit të BE-së në fqinjësinë lindore.

Këshilli emëroi Dirk Schubel si Përfaqësuesin e ri Special të Bashkimit Evropian për Kosovën. Ai do ta marrë detyrën më 1 shtator 2026.

Mandati i tij përfshin gjithashtu ofrimin e udhëzimeve politike në nivel lokal për Misionin e Bashkimit Evropian për Sundimin e Ligjit në Kosovë (EULEX Kosovo), si dhe mbështetjen e dialogut ndërmjet Beogradit dhe Prishtinës, me synim nxitjen e stabilitetit rajonal dhe marrëdhënieve të mira fqinjësore.

Përfaqësuesit Specialë të Bashkimit Evropian promovojnë politikat dhe interesat e BE-së në rajone, vende ose çështje me rëndësi të veçantë për Unionin. Ata luajnë rol aktiv në mbështetjen e reformave, forcimin e stabilitetit dhe sundimit të ligjit.

Aktualisht, 11 Përfaqësues Specialë të BE-së mbështesin punën e Përfaqësueses së Lartë të Bashkimit Evropian për Punët e Jashtme dhe Politikën e Sigurisë, Kaja Kallas.

Asociacioni i Gazetarëve të Kosovës, Lëvizja FOL, Instituti i Kosovës për Drejtësi dhe juristja e së drejtës së medias, Flutura Kusari, kanë njoftuar se nuk do ta vlerësojnë procedurën e përzgjedhjes së drejtorit të përgjithshëm të Radio Televizionit të Kosovës, duke argumentuar se procesi zhvillohet në rrethana që, sipas tyre, nuk garantojnë pavarësi institucionale.

Në një reagim të përbashkët, organizatat theksojnë se vendimi është marrë pas monitorimit të vazhdueshëm të RTK-së, i cili, sipas tyre, tregon se transmetuesi publik po përballet me presion politik në disa nivele.

“Arsyet kryesore për këtë vendim bazohen në monitorimin tonë të RTK-së, i cili tregon se Transmetuesi Publik aktualisht është duke u përballur me presion politik, i cili shfaqet në forma të ndryshme: përmes ndërhyrjeve në përmbajtjen e lajmeve, përmes presionit ndaj gazetarëve, si dhe përmes presionit financiar me vonesa të pagave”, thuhet në reagim.

Sipas tyre, në këto rrethana, Bordi i RTK-së nuk ka lirinë e nevojshme për të zhvilluar një proces të pavarur dhe profesional për zgjedhjen e drejtorit të ri të përgjithshëm.

“Në këto rrethana, ne jemi të bindur se Bordi i RTK-së nuk gëzon lirinë për të vepruar sipas bindjeve profesionale në përzgjedhjen e drejtorit të ardhshëm të Transmetuesit Publik”, thuhet më tej në deklaratë.

Megjithatë, AGK, Lëvizja FOL, IKD dhe Flutura Kusari kanë bërë të ditur se do të vazhdojnë ta monitorojnë punën e Bordit të RTK-së dhe zhvillimet që lidhen me procesin e përzgjedhjes, por pa dhënë vlerësim për të.

“Ne do të vazhdojmë të monitorojmë mbledhjet e RTK-së, përfshirë edhe takimet për përzgjedhjen e drejtorit të përgjithshëm, por nuk do të ofrojmë vlerësim për këtë proces”, përfundon reagimi i përbashkët.

Një nënë ka ndarë përvojën e saj pas qëndrimit në Klinikën e Pediatrisë në Qendrën Klinike Universitare të Kosovës (QKUK), ku kishte dërguar djalin e saj dyvjeçar për trajtim pas disa ditësh me të vjella dhe diarre.

Sipas rrëfimit të saj, pas kontrollit mjekësor dhe analizave, fëmija u vendos të shtrohej në Pediatri për shkak të gjendjes shëndetësore.

Ajo ka treguar se gjatë qëndrimit në klinikë është përballur me vështirësi që lidhen me mungesën e disa kushteve bazike, duke përmendur pritjen për pranim, vështirësi gjatë vendosjes së kanilës, si dhe shqetësime për higjienën në dhomën ku duhej të qëndronte djali i saj.

“Një fëmijë dyvjeçar, i sëmurë, i dehidratuar dhe i lodhur, duhej të shpohej disa herë derisa procedura të kryhej me sukses”, ka shkruar ajo, duke shtuar se kishte kërkuar që procedura të kryhej nga dikush me më shumë përvojë.

Nëna ka ngritur shqetësime edhe për kushtet në repart, duke pretenduar se në dhomë kishte mungesë të çarçafëve të pastër, sapunit dhe mjeteve bazike të higjienës.

Ajo ka theksuar se kërkesat e saj nuk lidhen me luks, por me kushte minimale për një ambient ku trajtohen fëmijë të sëmurë.

“Ne nuk kërkojmë dhoma private apo komoditete të veçanta. Kërkojmë pastërti, higjienë, masa bazike të kontrollit të infeksioneve dhe komunikim profesional me prindërit”, ka deklaruar ajo.

Në rrëfimin e saj, nëna ka përmendur edhe një situatë pas trajtimit, kur kishte kërkuar heqjen e kanilës së djalit, por sipas saj ishte përballur me vonesa dhe mungesë koordinimi mes stafit të ndërrimeve.

Ajo ka bërë thirrje për përmirësim të kushteve në institucionet shëndetësore, duke theksuar se sakrifica dhe kujdesi i prindërve për fëmijët nuk duhet të zëvendësojë përgjegjësitë e sistemit shëndetësor.

Policia e Kosovës ka nisur hetimet lidhur me dyshimet se rreth 20 persona janë helmuar pasi kanë konsumuar ushqim në një piceri në Prishtinë. Rasti po hetohet në koordinim me Prokurorin e Shtetit dhe institucionet përkatëse.

Policia ka konfirmuar se më 10 korrik ka pranuar informacion për një rast të dyshuar të helmimit nga ushqimi.

“Lidhur me pyetjet tuaja, ju njoftojmë se më 10.07.2026, Policia ka pranuar një informatë lidhur me dyshimin për helmim nga ushqimi të disa personave. Menjëherë janë ndërmarrë veprimet e nevojshme policore në koordinim me Prokurorin e Shtetit dhe institucionet përkatëse”, thuhet në përgjigjen e Policisë.

Ndërkohë, personat që dyshohet se janë prekur nga helmimi kanë kërkuar ndihmë mjekësore në Klinikën Infektive të Qendrës Klinike Universitare të Kosovës (QKUK) që nga dita e premte.

Shefi i ndërrimit në Klinikën Infektive, Izet Sadiku, ka bërë të ditur se 16 pacientë janë hospitalizuar që nga e premtja, ndërsa edhe tre të tjerë kanë kërkuar trajtim gjatë së dielës.

“16 pacientë janë të hospitalizuar që nga e premtja, ndërsa tre të tjerë kanë ardhur këtë të diel”, ka deklaruar Sadiku.

Sipas tij, mjekët janë në pritje të rezultateve të analizave laboratorike për të përcaktuar shkakun e saktë të helmimit dhe për të verifikuar nëse gjendja e pacientëve lidhet me ushqimin e konsumuar.

Ai ka bërë të ditur se gjendja shëndetësore e pacientëve është e mirë dhe se ata po marrin trajtimin e nevojshëm mjekësor.

Ndërkohë, Agjencia e Ushqimit dhe Veterinarisë ende nuk ka dalë me një deklarim zyrtar lidhur me rastin.