Ministria e Industrisë, Ndërmarrësisë, Tregtisë dhe Industrisë ka publikuar çmimet e derivateve për 24 orët e ardhshme.
Sipas MINT, çmimi për një litër naftë sot është 1 euro e 50 centë, ndërsa benzina 1 euro e 39 centë.
Gasi do të shitet me çmim 0.61 euro për litër.
Çmimet hyjnë në fuqi nga ora 10:00.
Shoqata e Qumështoreve të Kosovës ka njoftuar se masat e ndërmarra nga Ministria e Bujqësisë kanë filluar të japin rezultatet e para, duke bërë që qumështi i fermerëve të grumbullohet në masë më të madhe.
Sipas kësaj shoqate, bazuar në informacionet nga terreni ende ka vështirësi në disa zona, veçanërisht në Podujevë dhe Vushtrri, ku një numër fermerësh vazhdojnë të përballen me mungesë të grumbullimit të prodhimit.
“Problem mbetet pjesa e Podujevës dhe Vushtrrisë, ku rreth 35 fermerë të Podujevës dhe rreth 30 fermerë të Vushtrrisë nuk po u grumbullohet ende qumështi. Janë rreth 5-6 tonë qumësht që ende nuk po grumbullohen”, thuhet në njoftimin e Shoqatës së Qumështoreve.
Shoqata u ka bërë thirrje përpunuesve të qumështit që të mbulojnë edhe këto zona, në mënyrë që e gjithë sasia e prodhuar nga fermerët të grumbullohet.
“U bëjmë thirrje përpunuesve të qumështit që mbulojnë atë pjesë që të grumbullojnë edhe atë sasi, në mënyrë që e gjithë sasia e qumështit të grumbullohet”, ka deklaruar shoqata.
Sipas tyre, kërkesa për qumësht pritet të rritet, ndërsa paralelisht duhet të rritet edhe prodhimi vendor. Megjithatë, ata theksojnë se disa probleme vazhdojnë të mbeten shqetësuese për sektorin, veçanërisht çmimi i grumbullimit dhe vonesat e pagesave ndaj fermerëve.
“Problem i madh vazhdon të mbetet çmimi i grumbullimit dhe vonesat e pagesave deri në gjashtë muaj, e në raste edhe më shumë”, thuhet në reagimin e Shoqatës.
Shoqata ka kërkuar gjithashtu ndalimin e përdorimit të vajit të palmës dhe qumështit pluhur në fabrikat përpunuese, duke e cilësuar këtë si të domosdoshme për stabilizimin e sektorit dhe mbrojtjen e prodhimit vendor.
“Vaji i palmës dhe qumështi pluhur duhet të ndalohen në fabrikat e përpunimit të qumështit. Rrugë tjetër nuk ka për stabilizimin e sektorit dhe kthimin e besimit të konsumatorëve vendorë”, thuhet në njoftim.
Shoqata ka theksuar se mbrojtja e industrisë së qumështit është njëkohësisht mbrojtje për fermerët, konsumatorët dhe ekonominë e vendit.
Vizita e Presidentit të Republikës së Shqipërisë, Bajram Begaj, në komunat e Preshevës dhe Bujanocit ka shkaktuar reagime të shumta në opinionin publik. Ndërsa një pjesë e mediave dhe institucioneve raportuan për një vizitë zyrtare diplomatike dhe takime me përfaqësues lokalë, disa aktorë politikë në Serbi dhe përdorues të rrjeteve sociale e shfrytëzuan këtë ngjarje për të përhapur pretendime për një “hyrje ilegale”, “shoqërim të armatosur”, “zgjerim të Shqipërisë së Madhe” dhe “rrezikim të sovranitetit të Serbisë”.
Analiza e publikimeve në rrjetet sociale tregon se fotografitë dhe deklaratat reale nga vizita janë përdorur jashtë kontekstit, me qëllim krijimin e një narrative alarmiste.
Prania e shërbimeve të sigurisë, simboleve shtetërore dhe qytetarëve është paraqitur si një incident i pretenduar i sigurisë, megjithëse faktet në dispozicion nuk i mbështesin këto pretendime.
Faktet
Presidenti i Shqipërisë, Bajram Begaj, zhvilloi një vizitë zyrtare në Preshevë dhe Bujanoc, ku u takua me përfaqësues lokalë dhe përfaqësues të komunitetit shqiptar.
Për vizitën raportuan mediat rajonale, duke theksuar se Begaj zhvilloi takime me përfaqësues politikë lokalë dhe diskutoi çështje me interes për komunitetin shqiptar në Luginën e Preshevës.
Informacionet zyrtare për aktivitetet e Presidentit të Shqipërisë u publikuan edhe nga Ambasada e Shqipërisë në Serbi.
https://ambasadat.gov.al/serbia/en/newsroom/presidenti-i-republikes-se-shqiperise-shtz-bajram-begaj-priti-ne-takim-kryetaren-e-komunes-se-presheves-znj-ardita-sinani/
Nuk ekzistojnë prova se vizita ka qenë një operacion i fshehtë, hyrje e paautorizuar apo ndonjë aktivitet i drejtuar kundër integritetit territorial të Serbisë.
Sipas publikimit të Bibliotekës së Qytetit “Mehmet Jusufi” në Preshevë, vizita e Presidentit të Shqipërisë, Bajram Begaj, ishte e lidhur me hapjen e Panairit të Dytë të Librit Shqiptar, një aktivitet kulturor me moton “Libri dhe tradita”.
Në publikim thuhet se në këtë ngjarje morën pjesë përfaqësues të institucioneve, botues, shkrimtarë, artistë dhe vizitorë, ndërsa qëllimi i manifestimit ishte promovimi i librit, kulturës dhe leximit në gjuhën shqipe.
Organizatorët e prezantuan aktivitetin si një takim kulturor kushtuar letërsisë, artit dhe ruajtjes së identitetit gjuhësor e kulturor të komunitetit shqiptar. Vetë karakteri i këtij aktiviteti nuk përbën dëshmi për ndonjë plan për ndryshimin e statusit territorial të Serbisë.
Informacionet zyrtare për vizitën e Presidentit të Shqipërisë lidhen me aktivitete kulturore, takime me përfaqësues lokalë dhe diskutime për pozitën e komunitetit shqiptar në Luginën e Preshevës, dhe jo me ndonjë ndryshim territorial.
Konteksti i deklaratës për “botën shqiptare”: Identiteti nuk është i njëjtë me ndryshimin e kufijve
Një nga deklaratat më të keqpërdorura pas vizitës ishte mesazhi i kryetares së Komunës së Preshevës, Ardita Sinani, se ardhja e Presidentit të Shqipërisë ishte “një mesazh i fuqishëm se Presheva dhe Lugina e Preshevës janë pjesë e pandashme e botës shqiptare”.
Disa portale serbe dhe profile në rrjetet sociale e paraqitën këtë deklaratë si dëshmi të pretendimeve territoriale të Shqipërisë dhe si një hap drejt krijimit të “Shqipërisë së Madhe”.
Demantim:
Megjithatë, shprehja “bota shqiptare” në diskursin politik dhe kulturor shqiptar përdoret më së shpeshti për të përshkruar hapësirat e lidhjeve kulturore, gjuhësore dhe historike të shqiptarëve që jetojnë në shtete të ndryshme.
Për një pjesë të përfaqësuesve politikë dhe intelektualëve shqiptarë, ky term nënkupton identitetin e përbashkët dhe lidhjet kulturore të shqiptarëve në Shqipëri, Kosovë, Maqedoninë e Veriut, Mal të Zi, Luginën e Preshevës dhe zona të tjera ku jeton komuniteti shqiptar.
Vetë përdorimi i këtij termi nuk përbën dëshmi për ekzistencën e një plani për ndryshimin e kufijve të njohur ndërkombëtarisht.
Në deklaratën e kryetares së Komunës së Preshevës, Ardeta Sinani, pas takimit me Presidentin e Shqipërisë Bajram Begaj, përmenden tema si pozita e komunitetit shqiptar në Luginën e Preshevës, arsimi, infrastruktura dhe të drejtat e qytetarëve, ndërsa shprehja “bota shqiptare” përdoret në kontekstin e identitetit dhe vëmendjes institucionale, jo si paralajmërim për ndryshim kufijsh.
https://www.facebook.com/ardita.sinani/posts
Deklarata nuk përmban thirrje për ndryshim kufijsh apo kërkesa territoriale, por një mesazh politik për mbështetje dhe lidhje me komunitetin shqiptar.
Manipulimi 1: “Siguria shqiptare po shëtitet nëpër Serbi me armë të gjata”
Disa llogari në rrjetet sociale publikuan fotografi të kolonave me automjete të zeza, duke pretenduar se bëhej fjalë për “shqiptarë të armatosur që hyjnë pa kontroll në Serbi”.
Demantim:
Ky pretendim paraqet keqinterpretim të protokollit standard të sigurisë.
Gjatë vizitave të krerëve të shteteve dhe zyrtarëve të lartë shtetërorë është praktikë e zakonshme prania e ekipeve të sigurisë, automjeteve zyrtare dhe kolonave mbrojtëse.
Organizimi i vizitave të zyrtarëve të huaj zhvillohet përmes procedurave diplomatike dhe institucionale të shtetit pritës.
Organizimi i vizitave të zyrtarëve të lartë të huaj në Republikën e Serbisë realizohet përmes procedurave diplomatike dhe institucionale. Protokolli Diplomatik i Ministrisë së Punëve të Jashtme të Serbisë merr pjesë në përgatitjen dhe realizimin e vizitave zyrtare të ministrave të jashtëm dhe zyrtarëve të tjerë të lartë në Serbi.
https://www.mfa.gov.rs/lat/ministarstvo/diplomatski-protokol/o-protokolu
Fotografitë e shoqërimit të sigurisë, në vetvete, nuk përbëjnë dëshmi për hyrje ilegale, rrezikim të sigurisë apo cenim të sovranitetit.
Manipulimi 2: “Shqipëria e Madhe po zgjerohet në Serbinë qendrore”
Disa profile dhe faqe të krahut të djathtë në rrjetet sociale përdorën fotografi të fëmijëve me veshje tradicionale dhe flamuj shqiptarë, duke pretenduar se vizita ishte dëshmi e “zgjerimit të Shqipërisë së Madhe”.
Demantim:
Pretendime të tilla paraqesin keqpërdorim të simboleve kulturore dhe kombëtare.
Prania e flamujve kombëtarë, veshjeve tradicionale ose simboleve të komunitetit në një ngjarje publike nuk përbën dëshmi për një plan politik për ndryshimin e kufijve.
Informacionet zyrtare për vizitën lidhen me takime me përfaqësues lokalë dhe çështje që kanë të bëjnë me pozitën e komunitetit shqiptar, dhe jo me ndryshime territoriale.
Ambasada e Shqipërisë në Serbi – aktivitetet e Presidentit Bajram Begaj
Manipulimi 3: Automjetet me targa shqiptare u paraqitën si “pushtim”
Në rrjetet sociale u shpërndanë fotografi të automjeteve me targa të Shqipërisë, duke pretenduar për “hyrje masive” dhe “pushtim”.
Demantim:
Prania e automjeteve me targa shqiptare gjatë vizitës së Presidentit të Shqipërisë nuk përbën dëshmi për hyrje ilegale apo kërcënim të sigurisë.
Delegacionet shtetërore, gazetarët, mysafirët dhe qytetarët mund të udhëtojnë ndërmjet shteteve në përputhje me procedurat në fuqi.
Një fotografi e një automjeti nuk mund të konfirmojë pretendimet për “pushtim” dhe as të paraqitet si dëshmi për një incident politik apo të sigurisë.
Përfundim
Vizita e Presidentit të Shqipërisë, Bajram Begaj, në Preshevë dhe Bujanoc nuk ishte “hyrje ilegale”, “pushtim” dhe as dëshmi për ndryshim kufijsh.
Analiza tregon se disa media, aktorë politikë dhe llogari në rrjetet sociale përdorën fotografi dhe deklarata reale, por i paraqitën ato përmes narrativave të pasakta dhe dezinformuese.
Vizita diplomatike u paraqit përmes narrativave dezinformuese si incident sigurie, protokolli standard i mbrojtjes si kërcënim, ndërsa simbolet kulturore dhe identitare si dëshmi të ambicieve territoriale.
Për pretendimet për ndryshim kufijsh ose “zgjerim të Shqipërisë së Madhe” në lidhje me këtë vizitë nuk ekzistojnë fakte të verifikueshme./The Geopost/
Bordi i Paqes ka njoftuar se pjesëtarë të Forcës së Sigurisë së Kosovës i janë bashkuar misionit ndërkombëtar në Gaza.
Përmes një njoftimi në rrrjetin social “X”, Bordi i Paqes ka bërë të ditur se anëtarët më të rinj të kontingjentit do të angazhohen në fusha të ndryshme, përfshirë logjistikën dhe çështjet civile.
Forca Ndërkombëtare Stabilizuese (ISF) ka thënë se mirëpret anëtarët e rinj.
“ISF mirëpret anëtarët më të rinj të Forcës së Sigurisë së Kosovës në ekip. Ata do të mbështesin përpjekjet për siguri në Gaza në fusha si logjistika dhe çështjet civile”, thuhet në njoftim.
Pjesëmarrja e FSK-së në misione ndërkombëtare konsiderohet pjesë e angazhimit të Kosovës për të kontribuar në operacionet e sigurisë dhe stabilitetit, në bashkëpunim me partnerët ndërkombëtarë.
Marrëveshja për anëtarësim në Bordin e Paqes fillimisht ishte iniciuar nga ish-presidentja Vjosa Osmani, e më pas ajo ishte ratifikuar edhe në Kuvendin e Kosovës.
Forca Ndërkombëtare Stabilizuese buron nga një plan 20-pikësh i presidentit amerikan, Donald Trump, për t’i dhënë fund luftës së Izraelit në Gazë.
The #ISF welcomes the newest members of the Kosovo Security Force to the team. They will support the Gaza security effort in areas such as logistics and civil affairs.#StabilityStartsHere pic.twitter.com/Pv0xWif4Gz
— Board of Peace (@BoardOfPeace) July 12, 2026
Drejtori i Komunikimeve i Presidencës së Turqisë, Burhanettin Duran, ka përkujtuar 31-vjetorin e gjenocidit të Srebrenicës, duke e cilësuar atë si një nga kapitujt më të errët të historisë së njerëzimit dhe një plagë që vazhdon të mbetet e hapur në ndërgjegjen kolektive.
Në një deklaratë, Duran tha se masakra, në të cilën u vranë më shumë se 8 mijë myslimanë boshnjakë, mbetet një nga krimet më të rënda të kryera ndonjëherë kundër dinjitetit njerëzor. Ai tha se i kujton me mëshirë viktimat e gjenocidit dhe se ndan me gjithë zemër dhimbjen dhe pikëllimin e popullit të Bosnjë e Hercegovinës, raporton “TRT World”.
Duran theksoi se Turqia do të vazhdojë të qëndrojë fuqishëm në mbrojtje të paqes, drejtësisë dhe dinjitetit njerëzor, si dhe do të mbetet zë i të shtypurve kudo që ndodhin përndjekje, padrejtësi apo tragjedi humanitare – nga Bosnjë e Hercegovina dhe Kosova, te Kaukazi, Lindja e Mesme, Gaza dhe Afrika.
Ai rikujtoi fjalët e presidentit turk, Recep Tayyip Erdogan, se një botë më e drejtë është e mundur, duke shtuar se Ankaraja do të vazhdojë të punojë për forcimin e ndërgjegjes së përbashkët të njerëzimit dhe për vendosjen e një paqeje të qëndrueshme.
Gjenocidi i Srebrenicës ndodhi në korrik të vitit 1995, kur forcat serbe të Bosnjës, të udhëhequra nga gjenerali Ratko Mlladiq, pushtuan zonën e shpallur të sigurt nga OKB-ja në Srebrenicë dhe, gjatë disa ditëve, vranë sistematikisht më shumë se 8 mijë burra dhe djem boshnjakë.
Ky krim është njohur nga gjykatat ndërkombëtare si gjenocid dhe konsiderohet mizoria më e rëndë e kryer në tokën evropiane që nga përfundimi i Luftës së Dytë Botërore.
Ankaraja e ka shfrytëzuar edhe në vitet e kaluara përvjetorin e Srebrenicës për të ripërsëritur thirrjet për llogaridhënie ndërkombëtare dhe për të paralajmëruar kundër përsëritjes së mizorive masive që mbeten pa u trajtuar nga komuniteti ndërkombëtar.
Ushtarët amerikanë të KFOR-it, të caktuar në Komandën Rajonale-Lindje (RC-East), në kuadër të misionit të NATO-s në Kosovë, po zhvillojnë patrullime të rregullta përgjatë asaj që KFOR-i e quan “Vijë Administrative Kufitare”, përgjatë zonës së tyre të përgjegjësisë që lidhet me Serbinë dhe Maqedoninë e Veriut.
KFOR-i, përmes një njoftimi të publikuar në rrjetet sociale, ka bërë të ditur se këto patrullime zhvillohen gjatë gjithë vitit dhe kanë për qëllim ruajtjen e vetëdijes për situatën në terren, mbështetjen e stabilitetit dhe lirisë së lëvizjes, monitorimin e ndryshimeve në mjedisin operacional, si dhe sigurimin e një pranie të dukshme të forcave të sigurisë.
Sipas KFOR-it, këto aktivitete janë pjesë e angazhimit të vazhdueshëm të misionit të NATO-s për të garantuar një mjedis të sigurt dhe të qetë për të gjithë qytetarët që jetojnë në Kosovë, duke vepruar në mënyrë të paanshme dhe transparente.
Numri i aksidenteve me pasoja fatale dhe i personave që kanë humbur jetën në trafikun rrugor në Kosovë ka shënuar rritje gjatë gjashtëmujorit të parë të vitit 2026, krahasuar me periudhën e njëjtë të vitit paraprak.
Sipas statistikave të Policisë së Kosovës, nga janari deri në qershor të vitit 2026 janë regjistruar 45 aksidente fatale, ndërsa në të njëjtën periudhë të vitit 2025 ishin 40 raste. Edhe numri i viktimave ka shënuar rritje, nga 45 persona në 46.
Eksperti i komunikacionit, Lavdim Hamiti, ka vlerësuar se mungesa e sinjalizimit rrugor, infrastruktura jo e përshtatshme dhe mungesa e investimeve në sigurinë në komunikacion janë ndër faktorët kryesorë që po ndikojnë në rritjen e aksidenteve.
Sipas tij, qytetarët nuk kanë mundësi të ndryshojnë gjendjen e rrugëve apo të vendosin sinjalizime, por duhet të tregojnë kujdes të shtuar gjatë vozitjes.
“Është një zinxhir problemesh që ndikojnë deri te aksidentet. Njëra prej tyre është mungesa e sinjalizimeve, ndërsa një tjetër është infrastruktura jo e duhur. Kemi zhavorr në rrugë, kyçje pa sinjalizime dhe vende të rrezikshme që mund të shkaktojnë huti te vozitësit”, ka deklaruar Hamiti për EO.
Ai ka theksuar se gjatë sezonit veror, me rritjen e numrit të automjeteve dhe ardhjen e mërgimtarëve, rreziku për aksidente shtohet edhe më shumë.
Hamiti ka kërkuar nga institucionet që të ndërmarrin masa konkrete për përmirësimin e infrastrukturës, vendosjen e sinjalizimeve dhe eliminimin e pikave të rrezikshme në rrugë.
“Për uljen e numrit të aksidenteve nuk mjaftojnë vetëm gjobat. Vetëdijesimi i qytetarëve është ai që ndikon në uljen e aksidenteve. Duhet të punohet më shumë në sigurinë rrugore”, ka thënë ai.
Sipas statistikave të Policisë së Kosovës, përveç aksidenteve fatale, gjatë kësaj periudhe janë rritur edhe aksidentet me lëndime, nga 3 mijë e 943 raste në vitin 2025 në 4 mijë e 117 raste në vitin 2026.
Numri i personave të lënduar ka shënuar një rënie të lehtë, nga 7 mijë e 513 në 7 mijë e 482 persona. Ndërkohë, aksidentet me dëme materiale kanë rënë nga 6 mijë e 696 në 6 mijë e 8 raste.
Policia ka bërë të ditur se gjatë gjashtëmujorit të parë të vitit 2026 ka shqiptuar 394 mijë e 82 tiketa trafiku, krahasuar me 372 mijë e 425 tiketa në periudhën e njëjtë të vitit 2025.
Një person është arrestuar në Prizren nën dyshimin se merrej me kultivimin e bimëve narkotike të llojit kanabis.
Sipas raportit të Policisë së Kosovës, rasti është raportuar më 10 korrik, kurse njësitet policore, në bazë të urdhëresës së gjykatës, kanë kryer kontroll në shtëpinë, autolarjen dhe automjetin e të dyshuarit.
Gjatë kontrollit në oborrin e tij, policia ka gjetur dy bimë të dyshuara të llojit kanabis, me gjatësi 50 dhe 62 centimetra, si dhe një peshore elektronike.
I dyshuari, mashkull kosovar, është arrestuar dhe është intervistuar në lidhje me rastin, ndërsa me vendim të prokurorit, pas përfundimit të intervistimit, i dyshuari është dërguar në mbajtje.
Prizren 10.07.2026-09:00. Është arrestuar i dyshuari mashkull kosovar nën dyshimin se i njëjti është duke u marr me kultivimin e bimëve narkotike të llojit kanabis. Njësit policore kanë zbatuar urdhëresën e gjykatës, ku kanë kryer urdhër kontrollin në shtëpinë, autolarje dhe automjetin e të dyshuarit. Gjatë kontrollit në oborrin e tij janë gjetur të mbjella dy bimë të llojit kanabis me gjatësi 50 dhe 62 cm, si dhe një peshore elektronike. Me vendim të prokurorit pas intervistimit i dyshuari është dërguar në mbajtje”, thuhet në raport.
Ministria e Industrisë, Ndërmarrësisë, Tregtisë dhe Inovacionit (MINT) ka publikuar çmimet maksimale të lejuara për shitjen e derivateve të naftës, të cilat hyjnë në fuqi nga ora 10:00 e ditës së sotme.
Sipas vendimit të ri, çmimi maksimal i lejuar për një litër naftë është 1.49 euro.
Ndërkohë, çmimi maksimal për benzinën është përcaktuar në 1.38 euro për litër, ndërsa për gazin në 0.61 euro për litër.
Këto çmime do të vlejnë deri në vendimin e radhës nga MINT për përcaktimin e çmimeve maksimale të lejuara të derivateve.
Rritja e deficitit tregtar të Kosovës gjatë muajit maj 2026 po konsiderohet si pasojë e mungesës së mbështetjes institucionale për sektorin privat, kostove të larta të prodhimit dhe orientimit gjithnjë e më të madh të ekonomisë drejt importeve. Njohësit e ekonomisë, ish-kryetari i Odës Ekonomike të Kosovës, Safet Gërxhaliu, dhe ekonomisti Bashkim Mustafa, vlerësojnë se pa politika konkrete për stimulimin e prodhimit vendor dhe eksportit, vendi do të vazhdojë të thellojë varësinë nga importi.
Sipas të dhënave të Agjencisë së Statistikave të Kosovës (ASK), deficiti tregtar në muajin maj 2026 u rrit për 4 për qind krahasuar me të njëjtën periudhë të vitit të kaluar, duke arritur në 544.4 milionë euro, nga 523.4 milionë euro sa ishte në maj 2025. Eksportet mbuluan vetëm 14.7 për qind të importeve.
Ish-kryetari i Odës Ekonomike të Kosovës, Safet Gërxhaliu në një intervistë për Ekonomia Online tha se sektori privat po përballet me sfida të shumta, ndërsa sipas tij mungon mbështetja institucionale dhe promovimi i prodhimeve vendore.
“Sektori privat është duke u ballafaquar me sfida të shumta. Në rend të parë, mungon një mbështetje institucionale, qoftë në mënyrë direkte, qoftë indirekte. Në rend të dytë, kemi një vakum diplomatik, ku vërtet, në vend që të promovohen vlerat e prodhimeve dhe shërbimeve ‘Made in Kosova’, ata merren me zgjedhje dhe me agjenda politike. Dhe, definitivisht, situata aktuale në Kosovë është më se shqetësuese, gjë që rëndohet edhe nga fakti që Kosova çdo ditë e më tepër po e vulos fatin e dënimit për të qenë shtet i varur nga importi. Prandaj, është krijuar ky luks që ne mund të jetojmë nga importi. Nuk kemi një trajtim të mirëfilltë për të promovuar prodhimet dhe shërbimet vendore. Fati i diplomacisë ekonomike në Kosovë shumë më tepër ka mbetur në dorë të bizneseve sesa në dorë të institucioneve dhe kjo është vërtet goditja më e madhe”, tha ai.
Gërxhaliu tha se rritja e çmimit të energjisë elektrike dhe problemet me furnizimin kanë ndikuar drejtpërdrejt në konkurrueshmërinë e prodhimeve kosovare.
“Prandaj, nuk duhet të na habisë fakti që sot jemi vërtet një shoqëri e varur, ku krahas importit të produkteve, importojmë edhe inflacion të heshtur. Dhe kur krejt kësaj i shtohet fakti që me ngritjen e çmimit të energjisë dhe me këtë mungesë që po ndodh sa i përket furnizimit me energji elektrike, prodhimet dhe shërbimet e Kosovës kanë rënë në konkurrencë dhe nuk janë konkurrente në tregjet evropiane. Është vërtet shqetësimi më i madh. Këtë e thotë diaspora, e cila në të kaluarën është furnizuar me shumë prodhime ‘Made in Kosova’, por tani, falë krejt kësaj që është duke ndodhur në Kosovë, prodhimet e Kosovës nuk janë konkurrente në tregun evropian. Ata furnizohen nga Polonia, Hungaria, Bullgaria, Spanja e Portugalia e jo nga Kosova. Prandaj duhet vërtet të jenë të orientuar në mbështetje ekonomike të sektorit privat, mbështetje të sektorit prodhues dhe vetëm atëherë mund të kemi trende pozitive që mund të ndikojnë në përmirësimin e bilancit të pagesave. Kur krejt kësaj i shtohet fakti që sot nuk kemi investitorë të huaj apo fare pak investime nga diaspora, besoj që është një momentum që duhet të na orientojë më tepër për stabilitet politik, për diplomaci ekonomike dhe për tërheqjen e investitorëve apo investimeve të huaja, qoftë nga diaspora, qoftë nga brendet ndërkombëtare”, u shpreh ai.
Duke folur për rritjen e importeve, përfshirë edhe ato nga Serbia, ai tha se bizneset udhëhiqen nga logjika ekonomike.
“Jo vetëm nga Serbia, rritja e importit është vërtet evidente nga viti në vit. Në këtë drejtim duhet të kuptohet që në një biznes emocionet janë dytësore, racionaliteti ekonomik dhe kalkulimet janë vendimtare. Vetë fakti që i njëjti mall i importuar nga Austria apo Gjermania koston e transportit e ka 2 mijë e 800 deri në 3 mijë euro, ndërsa i njëjti prodhim nga Serbia e ka vetëm 500 euro, është arsyeja e parë. E dyta, mos harroni që brendet më të mëdha evropiane janë të fokusuara dhe të orientuara në përfaqësitë e tyre në Serbi. Në këtë drejtim, kur analizohet struktura e prodhimeve, shumë pak janë prodhime njëqind për qind serbe. Janë shumë më tepër brende evropiane dhe ndërkombëtare që janë aktive në Serbi dhe ato produkte, qoftë si finale, qoftë si gjysmëprodukte, të cilat inkorporohen në prodhimet kosovare, janë të importuara. T’i thuash dikujt që ne importojmë lëndë të parë për mobileri, kur mobilerinë e kemi sektorin më të zhvilluar, apo që importojmë lëndë të parë për paketimin e pijeve freskuese apo pijeve energjetike dhe shumë gjysmëprodukte të tjera që inkorporohen në prodhimin final në Kosovë, është realitet i kohës. Mirëpo, besoj që në aspektin e partneritetit rajonal ne duhet shumë më tepër të bëjmë në drejtim të fuqizimit të prodhimit vendor dhe jo gjithmonë të jemi ata që në emër të patriotizmit e kalkulojnë kah importon lëndë të parë dhe prodhime biznesi kosovar”, theksoi Gërxhaliu, për Ekonomia Online.
Edhe ekonomisti Bashkim Mustafa e lidh rritjen e deficitit tregtar me mungesën e politikave që mbështesin prodhimin vendor.
“Mungesa e politikave të duhura dhe adekuate për të stimuluar bizneset vendore dhe për të përkrahur prodhimin vendor ka bërë që tregtarët dhe bizneset ta kenë më të lehtë të blejnë dhe të importojnë produkte sesa të prodhojnë dhe të zgjerojnë zinxhirin e prodhimit. Pse ndodh kjo? Sepse kostot operative të bizneseve janë rritur. Janë rritur çmimet e energjisë elektrike, është rritur kostoja e fuqisë punëtore dhe është rritur çmimi i derivateve në muajt e fundit. Kjo bën që bizneset e Kosovës të mos jenë konkurruese me ato të huaja. Ato fitojnë më lehtë dhe më shumë duke importuar mallra dhe shërbime sesa duke prodhuar. Për eksport, pothuajse nuk mund të flitet”, deklaroi Mustafa.
Ai shtoi se qeveria e ardhshme duhet ta ketë prioritet krijimin e politikave fiskale që ndihmojnë prodhuesit dhe eksportuesit.
“Hapat e parë të qeverisë së ardhshme, kushdo që ta formojë atë, duhet të jenë një analizë e mirëfilltë e gjendjes së bizneseve dhe krijimi i politikave të duhura fiskale, të cilat do t’i stimulojnë bizneset prodhuese dhe ato që kanë potencial eksporti. Këto biznese duhet të mbështeten dhe subvencionohen në forma të ndryshme, qoftë përmes uljes së kostos së energjisë elektrike, qoftë përmes subvencionimit të kostos së fuqisë punëtore. Duhet të gjenden politika të duhura, në mënyrë që të shpëtohen edhe këto pak biznese prodhuese që kanë mbetur në vend”, tha Mustafa.
Sipas ASK-së, eksporti i mallrave në maj 2026 arriti në 94.1 milionë euro, ndërsa importi në 638.6 milionë euro. Krahasuar me të njëjtën periudhë të vitit 2025, eksportet u rritën për 15.7 për qind, ndërsa importet shënuan rritje prej 5.6 për qind.
Tregtia e jashtme e Kosovës në maj 2026 u karakterizua me rritje të deficitit tregtar, ndërsa eksportet vazhduan të mbulojnë vetëm një pjesë të importeve.
“Të dhënat nga tregtia e jashtme e mallrave në Kosovë tregojnë për një rritje të deficitit tregtar prej 4,0 % në muajin maj 2026, në raport me periudhën e njëjtët të vitit 2025, gjegjësisht në vlerë prej 544,4 milion Euro, krahasuar me deficitin prej 523,4 milion Euro në vitin 2025. Eksporti mbulon importin me 14,7 %”, njoftoi Agjencia e Statistikave e Kosovës.
Sipas ASK-së, eksporti i mallrave në muajin maj 2026 kishte vlerën 94,1 milionë euro, ndërsa importi 638,6 milionë euro – që është një rritje prej 15,7% për eksport, si dhe një rritje prej 5,6% për import – duke krahasuar me periudhën e njëjtë të vitit 2025.