Tag: Ballina

Zyra e Rregullatorit të Energjisë ka shtyrë afatin për dorëzimin e aplikimeve të operatorëve të sektorit energjetik në procesin vjetor të shqyrtimit të tarifave.

Afati i ri është caktuar për datë 28 janar, pasi kompanitë ende nuk i kanë kompletuar dokumentet. Vendimi për tarifat e reja pritet të merret para fundit të marsit, ndërsa ato do të hyjnë në fuqi më 1 prill.

Zyra e Rregullatorit të Energjisë ka shtyrë afatin për dorëzimin e aplikimeve fillestare nga operatorët e sektorit të energjisë në kuadër të procesit vjetor të shqyrtimit të tarifave.

Afati i ri është caktuar për datën 28 janar 2026. Drejtori menaxhues i ZRRE-së, Petrit Pepaj, ka bërë të ditur për Radio Kosovën se shtyrja është bërë pasi kompanitë ende nuk e kanë kompletuar dokumentacionin e tyre për aplikim. Sipas tij, pas pranimit të aplikimeve, ZRRE do të ndërmarrë një shqyrtim të hollësishëm ligjor, rregullativ dhe financiar.

Pepaj, në një përgjigje me email, ka theksuar se në këtë fazë nuk mund të paragjykohet nëse do të ketë rritje të tarifave të energjisë elektrike. Ai tha se vetëm pas analizës së plotë dhe procesit të konsultimit publik do të vlerësohet ndikimi i mundshëm tarifor për konsumatorët.

Nga ana tjetër, kryetari i Dhomës së Tregtisë dhe Industrisë, Kushtrim Ahmeti, ka deklaruar se operatorët e sektorit energjetik zakonisht presin momentin e fundit për dorëzimin e dokumenteve. Sipas tij, duke parë gjendjen aktuale në sektorin e energjisë dhe reduktimet e shpeshta, pritet se do të ketë ndryshime tarifore.

“Duke e parë situatën se si po shkon sektori energjetik, me gjithë këto reduktime të shumta që po ndodhin dhe duke ua lënë fajin njëra-tjetrës, na bën të kemi dyshimet tona se nga të gjitha kompanitë që do t’i dërgojnë kërkesat e tyre në ZRRE, do të ketë kërkesa për rritjen e të hyrave, gjë që pa dyshim do të ndikojë në rritje të tarifave për ne si konsumatorë”, tha Ahmeti.

Ai u ka bërë thirrje qytetarëve që të mos e pranojnë një rritje të re të çmimit të energjisë elektrike, duke kujtuar se pasojat e rritjes së fundit prej 16.1 për qind po ndihen çdo ditë.

“Jemi duke pasur rritje të vazhdueshme të çmimeve jo vetëm të produkteve, por edhe të shërbimeve. Për shembull, kemi pasur rritje të çmimeve të shërbimeve të ujësjellësit. Këto po i vërteton edhe Agjencia e Statistikave të Kosovës”, shtoi ai.

ZRRE pritet të marrë vendimin përfundimtar para fundit të muajit mars, ndërsa tarifat e reja të energjisë elektrike, cilat do qofshin ato, do të hyjnë në fuqi më 1 prill./RTK/

Instituti Hidrometeorologjik i Kosovës ka bërë të ditur se në vend vërshimet/përmbytjet, po bëhen gjithnjë e më të shpeshta, si pasojë e kushteve meteorologjike (intensitet i lartë i reshjeve për periudhë të shkurtë kohore, shkrirja e shpejtë e borës), pastaj faktorët gjeomorfologjik – relievi, pjesa më e madhe e ujërrjedhave, burimin e tyre ose formohen në viset më të larta të cilat rrjedhin rrëmbyeshum në formë të rrëkeve.

Sipas një raporti të IHMK-së thuhet se vetëm disa lumenj, ose pjesë të tyre si p.sh lumi Sitnica, Ibri, rrjedha e mesme dhe e poshtme e Drinit të Bardhë, për shkak të karakterit fushorë, përmbysin më ngadalë, shkaku i sipërfaqes, pozitës, konfiguracionit të terrenit.

“Në Kosovë brenda një periudhe 5 vjeçare, kemi pasur paraqitje të përmbytjeve me shkallë më të lartë gjatë vitit 2021, 2023 dhe tani nga 5 – 8 janar 2026. Këto të fundit, ishin në përmasa me një periudhë kthyese hidrologjike prej 50 viteve (sidomos pjesa perëndimore apo pellgu i Drinit të Bardhë). Si pasojë e reshjeve të shumta të shiut e pastaj edhe të shkrirjes së borës (sidomos në zonat më të lara malore), fillimisht në pjesën perëndimore (Rrafshi i Dukagjinit), qendrore (disa pjesë të Rrafshit të Kosovës dhe Drenicës), e më pas edhe në pjesën më të madhe të vendit, lumenjtë kryesorë të Kosovës, si Drini i Bardhë (kryesisht rrjedha e mesme dhe e poshtme), pastaj, Ereniku, Mirusha, Toplluha, Bistrica e Deçanit, Lumi Klina, Sitnica, Drenica, Ibri etj me degët e tyre, duke filluar nga datë 05-08/01/2026, kanë pasur ngritje të shpejta dhe të larta të niveleve dhe prurjeve të ujit”.

IHMK bën të ditur se nga 08/01/2026 e deri më datë 10/01/2026, mesatarisht në territorin e së Kosovës kanë rënë 41.3 mm (l/m2) reshje, ndërsa nga datë: 01-10/01/2026, mesatarisht në Kosovë kanë rënë 124.1 mm, apo ≤ 64.9 mm ose 50.6% më shumë se sasia mesatare e janarit 1961 – 2024.

Po ashtu, në njoftim thuhet se sasia më e lartë e reshjeve prej 400.4 mm (l/m2), gjatë kësaj periudha është regjistruar në Junik, pastaj në Gllogjan 331.2 mm, Radoniq 280.8 mm, Kuqishtë 256.8 mm, Kramovik 245.5 mm, Gjakovë 217.3 mm, Restelicë 201.8 mm, Klinë 199 mm etj.

Siç vërehet nga të dhënat, sasia më e madhe e reshjeve është regjistruar në pjesën perëndimore të Kosovës në Pellgu i Drinit të Bardhë 192.8 mm, ku si pasojë janë shkaktuar edhe vërshimet/përmbytjet më të mëdha.

Pastaj, ato kanë qenë më të theksuara në pellgun e Lepencit me mesatare 104.3 mm, me maksimumin e tyre prej 116.6 mm në Ferizaj.

Ndërsa, në pellgun e Ibrit, mesatarisht kanë rënë 89 mm, me maksimumin e tyre prej 164.8 në Komoran, pastaj në Drenas 154.2 etj. (Siç vërehet nga të dhënat sidomos të nën pellgut të Drenicës, janë regjistruar sasi më të larta të reshjeve, prandaj janë shkaktuar përmbytje, kryesisht në rrjedhën e tij të mesme dhe të poshtme).

Në pellgun e Moravës së Binçës mesatarisht kanë rënë 68.7mm, me maksimum në Vërbicë të Zhegocit ku janë regjistruar 89.9 mm.

Tutje në njoftim thuhet se Instituti Hidrometeorologjik i Kosovës (sektori i hidrologjisë), deri para situatës me përmbytje, ka operuar me një numër prej 34 stacionesh automatike Hidrometrike (GPRS), të cilat janë të vendosura në të gjitha pellgjet, duke përfshi lumenjtë kryesorë si p.sh: Në pellgun e Drinit të bardhë 12 stacione, Ibri 11, Morava e Binçës me 6, Lepenci 3 dhe lumi plavës me 2 stacione hidrometrike.

“Në 7 profile hidrometrike janë të instaluara sisteme të kamerave për fotogrametri, të cilat i regjistrojnë këta parametra: nivelin e ujit (h), shpejtësinë e rrjedhës (v) dhe prurjen (q). Në profilet tjera, janë të vendosur/instaluar censorët, të cilët e bëjnë regjistrimin e nivelit të ujit në intervale çdo 15, 30 dhe 1h. Të dhënat rruhen në data Logerin e tyre të cilat përmes sistemit GPRS, transferohen në serverin qendrorë të IHMK-s në Prishtinë. Aty bëhet, ruajtja, përpunimi, analizimi dhe pastaj publikimi i të dhënave pas një analize dhe kontrolli. Gjatë periudhës 5–10 janar 2026, Republika e Kosovës ka përjetuar reshje intensive të shiut dhe shkrirje të borës, çka ka ndikuar ndjeshëm në gjendjen dhe sjelljen e lumenjve kryesorë dhe ka shkaktuar përmbytje në shumë zona. Situata hidrologjike për këtë periudhë u monitorua Instituti Hidrometeorologjik i Kosovës (IHMK)”.

Zyra e Rregullatorit të Energjisë ka shtyrë afatin për dorëzimin e aplikimeve të operatorëve të sektorit energjetik në procesin vjetor të shqyrtimit të tarifave.

Afati i ri është caktuar për datën 28 janar, pasi kompanitë ende nuk i kanë kompletuar dokumentet.

Vendimi për tarifat e reja pritet të merret para fundit të marsit, ndërsa ato do të hyjnë në fuqi, më 1 prill.

Kryeministri në detyrë i Kosovës, Albin Kurti, zhvilloi dje një takim të përbashkët me Ambasadorin e Suedisë në Kosovë, Jonas Westerlund dhe Ambasadorin e Mbretërisë së Bashkuar në Kosovë, Jonathan Hargreaves.

Sipas komunikatës, çështjet aktuale, përmbyllja e procesit zgjedhor të 28 dhjetorit dhe formimi i institucioneve në vijim, prioritetet e qeverisë së ardhshme dhe bashkëpunimi në fusha me interes të përbashkët, ishin ndër temat kryesore të këtij diskutimi të përbashkët.

“Në takim kryeministri theksoi përkushtimin ndaj sundimit të ligjit gjithandej Kosovës pa diskriminim e privilegje për të gjithë qytetarët dhe komunitetet, rritjen e vazhdueshme ekonomike dhe progresin shoqëror e avancimin demokratik, si dhe angazhimin për paqe e siguri me rend publik dhe kufij të mbrojtur dhe integrimin në Bashkimin Evropian dhe NATO”, thuhet në komunikatë.

Siç ka njoftuar Qeveria, Kurti të hënën ka zhvilluar takim të veçantë me Ambasadorin e Mbretërisë së Bashkuar në Kosovë, Jonathan Hargreaves.

Në Qendrën e Numërimit dhe Rezultateve janë rinumëruar rreth 74% apo 1,887 nga 2,557 vendvotime.

Zëdhenësi i KQZ’së, Valmir Elezi, ka thënë për Express se procesi është përmbyllur në 27 komuna.

“Nga fillimi i këtij procesi (e martë, 13 janar 2026, ora 18:00) dhe deri më tani (e martë, 27 janar 2026, ora 10:00) janë rinumëruar rreth 74% apo 1,887 nga 2,557 vendvotime”, tha Elezi.

Sekretari i Përgjithshëm i NATO-s, Mark Rutte, ka thënë se aleanca pret përgjegjësi nga Serbia për ngjarjet në Kosovë, duke përfshirë sulmin në Banjskë dhe gjithashtu edhe sulmet ndaj ushtarëve të KFOR-it në maj të 2023-ës.

Rutte gjatë një adresimi në Komitetin për Punë të Jashtme të Parlamentit Evropian, ka thënë po ashtu se për të dyja këto ngjarje, presidenti i Serbisë Aleksandar Vuçiq, ka premtuar përcaktimin e plotë të përgjegjësisë.

“Kam një marrëdhënie personale me presidentin (e Serbisë) Aleksandar Vuçiq. E njohim njëri-tjetrin prej shumë vitesh. Por, natyrisht presim nga ai që të përcaktojë përgjegjësinë për atë që ndodhi disa vite më parë, dhe kjo për dy çështje. Për të dyja ka premtuar përcaktimin e plotë të përgjegjësisë”, tha Rutte.

Sekretari i Përgjithshëm i NATO-s gjatë këtij adresimi, rikonfirmoi edhe mbështetjen për dialogun Kosovë-Serbi.
Rutte po ashtu theksoi se NATO-ja është e përkushtuar ndaj situatës së sigurisë në Ballkanin Perëndimor, duke theksuar se aleanca ushtarake perëndimore nuk do të lejojë krijimin e një vakumi të sigurisë në Bosnje dhe Hercegovinë.

Tensionet mes Kosovës dhe Serbisë kanë qenë të rritura viteve të fundit dhe incidenti më i rëndë u regjistrua shtatorin e vitit 2023 në Banjskë të Zveçanit, kur një grup serbësh të armatosur sulmuan Policinë e Kosovës, duke vrarë një rreshter. Në këmbimet e zjarrit që pasuan u vranë tre sulmues serb.

Politikani nga Kosova dhe biznesmeni Millan Radoiçiq e mori përgjegjësinë për sulmin, dhe prej atëherë ai ndodhet në Serbi, ku nuk është ndjekur penalisht deri më sot.

Këtij incidenti të armatosur i paraprinë protesta në veri të Kosovës të mbajtura në maj të po atij viti. Më shumë se 90 pjesëtarë të misionit paqeruajtës të NATO-s në Kosovë, KFOR kishin pësuar lëndime – disa prej tyre lëndime të rënda – pas përleshjes me protestuesit serbë në Zveçan.

Dhuna në Zveçan shpërtheu pasi serbët lokalë kundërshtuan hyrjen e kryetarëve të rinj shqiptarë në ndërtesat komunale në Zveçan, Leposaviq dhe Zubin Potok – komuna në veri të Kosovës, të banuara me shumicë serbe – pas zgjedhjeve lokale të mbajtura më herët po atë vit, që u bojkotuan nga serbët lokalë.

Për ngjarjet në Zveçan, janë arrestuar dhe akuzuar dhjetëra persona, dhe disa janë dënuar me burgim pas marrëveshjeve me prokurorinë për pranimin e fajësisë. NATO-ja ka kërkuar që përgjegjësit për të dyja rastet të përballen me drejtësinë. /REL

Ministria e Financave, Punës dhe Transfereve ka njoftuar të gjithë studentët se pagesat në vlerë prej 100 euro janë realizuar në tërësi, të ekzekutuara në disa grupe, për të gjithë studentët që kanë përmbushur kriteret dhe janë përfitues.

Ministria ka bërë të ditur se janë realizuar pagesat e para të bursës së mobilitetit për studentët që jetojnë në distancë dhe plotësojnë kriteret për këtë bursë.

“Studentët të cilët nuk i kanë përmbushur kriteret e përcaktuara dhe, për rrjedhojë, nuk janë përfitues, janë njoftuar zyrtarisht për refuzimin përmes email-it të përdorur gjatë aplikimit në platformën e-Kosova. Për çdo ankesë apo paqartësi, ju mund të kontaktoni në adresat elektronike përkatëse, sipas kategorisë: Studentët që kanë ankesë lidhur me shtesën prej 100 euro, të drejtohen në emailin: [email protected]: Studentët që kanë ankesa ose paqartësi lidhur me bursën e mobilitetit, të kontaktojnë në emailin: [email protected]”, thuhet në njoftim.

Policia e Kosovës ka gjetur dhe sekuestruar një arsenal armësh dhe municioni në një shtëpi të braktisur në fshatin Joshevik, komuna e Zveçanit.

Sipas njoftimit të Policisë, më 24 janar 2026, rreth orës 09:20, pas pranimit të informatave përmes rrugëve operative, u zhvillua kontrolli i shtëpisë, ku u gjetën:

1 armë automatike AK-47

1 pushkë gjysmë automatike dy tytëshe

10 karikatorë të zbrazët

6 karikatorë të mbushur me nga 30 fishekë

84 copë fishekë për pushkë automatike

14 copë fishekë për pushkë gjysmë automatike

1 rrip për fishekë

2 granata dore M50

Pajisje për pastrimin e armëve

Lidhur me rastin, është njoftuar Prokurori i Shtetit, i cili ka udhëzuar inicimin e hetimeve për veprën penale “Mbajtje në pronësi, kontroll ose posedim të paautorizuar të armëve”.

Policia bën të ditur se deri në këtë fazë nuk ka persona të arrestuar në lidhje me rastin.

Në fund, Policia e Kosovës falënderon qytetarët për bashkëpunimin dhe ndihmën e vazhdueshme, duke inkurajuar që çdo rast të dyshimtë ose veprim të kundërligjshëm të raportohet në numrin emergjent 192 ose në stacionin më të afërt policor. “Vetëm përmes bashkëpunimit të ndërsjellë mund të sigurojmë një ambient më të sigurt për të gjithë qytetarët, pa dallim”, thuhet në njoftim.

Sindikata e Bashkuar e Arsimit, Shkencës dhe Kulturës (SBASHK) ka shprehur shqetësim se vonesat në konstituimin e institucioneve të reja, si pasojë e rinumërimit të votave, mund të çojnë në bllokada buxhetore dhe vonesa në pagesat e punëtorëve të sektorit publik, përfshirë mësimdhënësit, policët dhe administratën, raporton Ekonomia Online.

Kryetari i SBASHK-ut, Rrahman Jashari në një interivistë për Ekonomia Online, tha se vendimi për rinumërim mund të ndikojë drejtpërdrejt në shtyrjen e mëtejme të procesit zgjedhor, duke vonuar formimin e Kuvendit dhe Qeverisë së re, çka sipas tij rrezikon funksionimin normal financiar të shtetit dhe pagesat mujore për punëtorët.

“Kjo situatë që është krijuar është tepër e rëndë, nga se ne pritëm gati një vit që të formohen institucionet dhe pastaj shkuam më 28 dhjetor në zgjedhje, tash doli kjo sihariqi tjetër, dhe me siguri do të shtyhet formimi i institucioneve. Ka pyetje të arsyeshme të njerëzve, por madje edhe në arsim se çka nëse nuk bëhen pagat, nga se buxheti, gjegjësisht Ligji për buxhetin e vitit 2026 ende nuk është aprovuar dhe mund të paraqiten bllokada dhe probleme, sepse po shihet institucionet do të vonohen së themeluari, nga se po shkojmë në rinumërimin e votimeve të tërësishme që e kërkon një kohë dhe kjo nuk ka ndodhur ndoshta në këtë masë kaq të madhe në të kaluarën. Si do qoftë, edhe të mos kishte ndodhur ky rinumërim, jemi vonë nga se një vit e më shumë nuk kemi asnjë institucion. SBASHK edhe sindikatat e tjera janë në pritje, kanë pritur që të formohet edhe Këshilli Ekonomik Social. Pastaj kemi pritur që të jemi të pranishëm edhe në Këshillin Shtetëror të licencimit të mësimdhënësve dhe në komisionet e tjera për të dhënë kontributin tonë, mirëpo nuk ka ndodhur kjo me fajin e MASHT-it, po Këshilli Ekonomik Social me fajin e ministrit në detyrë Hekuran Murati, i cili me vite e ka penguar reformimin e këtij Këshilli”, tha ai.

Jashari shtoi se mungesa e dialogut institucional dhe pezullimi i proceseve ligjore po krijojnë pasiguri të madhe për punëtorët e arsimit dhe sektorëve të tjerë publikë.

“Mungon dialogu dhe këto pritje shtojnë numrin e ankesave dhe të kërkesave. Ne kemi pritur se Parlamenti i Kosovës do ta lexojë dhe do ta aprovojë edhe atë kërkesën tonë për ndryshime ligjore për skemat pensionale të financuara nga shteti, nga se padrejtësisht u është mohuar. Kjo skemë u ka mohuar të drejtën punëtorëve të arsimit që t’iu numërohen ato vite si kontributdhënëse dhe kemi pritur me padurim që Parlamenti do ta thotë fjalën e tij, por ja po shihet nuk ka Parlament, nuk ka Qeveri dhe gjërat po rrjedhin kështu. Uroj që të mos ndodh barrikadimi, gjegjësisht bllokimi i pagave, sepse mësimdhënësit e Kosovës, por jo vetëm këta, por edhe policët, edhe administrata dhe zjarrfikësit e të tjerë kryesisht janë në kredi dhe çdo vonesë edhe për kredi do të ketë probleme, por edhe jeta e tyre do të vështirësohej shumë, nga se një pjesë e tyre jetojnë pikërisht me pagën që e marrin”, tha ai.

Ai theksoi se prioriteti i një qeverie të re duhet të jetë rikthimi i dialogut me sindikatat dhe zgjidhja e çështjeve të hapura në arsim.

“Hapat e parë që duhet t’i bëjë (qeveria e re) për mësimdhënësit dhe për sindikatat e tjera është dialogu. Në kohën e qeverisë së kaluar, po them tani, Kurti nuk ka pasur fare dialog, urojmë që të vijë një qeveri e cila do t’i dëgjojë kërkesat e punëtorëve të arsimit dhe të tjerëve për t’u ulur dhe biseduar. Pika më e nxehtë te arsimi është mungesa për momentin e kontratës kolektive, nga se ministrja Nagavci i ka ikur detyrës që ka pasur për t’u ulur me ne për të formuar komision dhe për ta nënshkruar. Shteti ynë në vendet e rralla të botës që nuk ka as marrëveshje kolektive, që vlen për të gjithë, e nuk ka as kontrata kolektive. Asnjëherë nuk pyetëm as për Ligjin e pagave, në vend që të ngritet vlera e koeficientit është rritur vetë koeficienti dhe është krijuar një amulli”, tha ai.

Kryeministri në detyrë, Albin Kurti, tha se komisionerët dhe individët që janë përfshirë në manipulim të votave duhet të dënohen.

Në reagimin e parë për këtë çështje, Kurti deklaroi se kjo u bë në “mënyrë klandestine” nga komisionerët brenda subjekteve politike.

“Komisionerë e individë që në mënyrë klandestine janë përfshirë në manipulime votash brenda subjekteve politike duke dëmtuar kolegë e subjekte politike nuk kanë amnisti. I inkurajojmë institucionet përgjegjëse që hetimet të shkojnë deri në fund”.

Ai tha se partia e tij, Lëvizja VETËVENDOSJE!, ka qenë “gjithnjë gardiane e ruajtjes së vullnetit politik të shprehur përmes votës në kuti të votimit dhe ashtu do të qëndrojë përherë”.

“Republika e Kosovës është shembull i demokracisë në rajon dhe i proceseve zgjedhore. Adresimi përmes ligjit dhe llogaridhënies për rastet e dyshimeve të manipulimeve brenda subjekteve politike, është i domosdoshem për integritetin e procesit. Vullneti i qytetarëve është i shenjtë, vota është e lirë, dhe kjo do të garantohet deri në fund. Dyshimet duhet të hetohen, manipuluesit duhet të ndëshkohen, këto raste nuk duhet të na shfaqen kurrë më në të ardhmen”.

Deklarata e Kurtit vjen pas aksionit të djeshëm të Prokurorisë e policisë në Prizren nga i cili 109 persona u ndaluan për falsifikim votash.

Kryeprokurori i Prizrenit, Petrit Kryeziu, dje në konferencën për media pas aksionit tha se ky manipulim votash nuk ka mundur të ndodhë pa ujdi mes partive të mëdha.

“Do të kishte qenë e pamundur që këto vota të ndryshoheshin nëse nuk do të kishte pasur kompromis nga komisionerët për ta bërë këtë nga të katër partitë më të mëdha”, tha Kryeziu.