Tag: Ballina

Kuvendi i Kosovës ka miratuar mbrëmjen e së enjtes përbërjen e 16 komisioneve parlamentare për legjislaturën e dhjetë, me 100 vota për, një kundër dhe asnjë abstenim.

Në mesin e tyre, 9 komisione do të drejtohen nga Lëvizja Vetëvendosje, ku në emër të këtij subjekti politik përbërjen e tyre e prezantoi, shefja e Grupit Parlamentar të VV-së, Arbërie Nagavci.

Sa i përket Komisionit për Buxhet, Punë dhe Transfere, ajo bëri të ditur se kryetar është propozuar deputeti Enver Haliti, ndërsa anëtarë Fatos Geci, Ilir Kërçeli dhe Valon Hoti.

Komisioni për Punë të Jashtme dhe Diasporë do të udhëhiqet nga Arbreshë Kryeziu, ndërsa anëtarë janë propozuar Shqipe Selimi, Vigan Qorrolli, Abdullah Klinaku dhe Fjolla Ujkani.

Në Komisionin për Arsim, kryetare është propozuar Arjeta Fejza, ndërsa anëtarë Fahrush Rexhepi, Mitaher Askuka, Arbërie Nagavci dhe Shqipe Jusufi.

Komisioni për Ekonomi, Industri, Ndërmarrësi, Tregti dhe Inovacion do të udhëhiqet nga Rozeta Hajdari, ndërsa anëtarë janë propozuar Driton Hyseni, Ejup Ahmeti dhe Taulant Kelmendi.

Për Komisionin për Mjedis, Ushqim, Bujqësi, Pylltari, Zhvillim Rural, Infrastrukturë dhe Transport, kryetar është propozuar Arsim Ademi, ndërsa anëtarë Alban Bajrami, Salih Zyba, Artan Abrashi dhe Drita Pajaziti.

Në Komisionin për Shëndetësi, kryetar është propozuar Haxhi Avdyli, ndërsa anëtarë Naim Bardiqi, Fitim Haziri, Labinotë Demi-Murtezi dhe Sylejman Meholli.

Për Komisionin për Siguri dhe Mbrojtje, kryetar është propozuar Mefail Bajqinovci, ndërsa anëtarë Enver Dugolli, Ilir Qeriqi, Rufki Suma dhe Shqipe Selimi.

Komisioni për të Drejtat e Njeriut, Barazi Gjinore, Familje, Vlera të Luftës Çlirimtare dhe Peticione do të udhëhiqet nga Fatmire Kollçaku, ndërsa anëtarë janë propozuar Afërdita Hajrizi, Salih Zyba, Mytaher Askuka dhe Edona Llalloshi.

Në Komisionin për Mirëqenie Sociale, Viktimat e Dhunës Seksuale të Luftës dhe Personat e Pagjetur, kryetar është propozuar Adnan Rrustemi, ndërsa anëtarë Mytaher Askuka, Sylejman Meholli, Mimoza Shala dhe Jeton Raka.

Nagavci theksoi se këto janë propozimet e Lëvizjes Vetëvendosje për përfaqësim në komisione, duke shtuar se në rastet kur nuk është përmendur pozita, emri i parë i listuar nënkupton funksionin e nënkryetarit.

“Kuvendi miratoi përbërjen e 16 komisioneve parlamentare për legjislaturën e 10-të të Kuvendit të Kosovës”, tha kryeparlamentarja Haxhiu, teksa mbylli punimet e kësaj seance.

Lidhja Demokratike e Kosovës (LDK) ka reaguar përmes një deklarate publike lidhur me rezolutën e miratuar në Kuvend, duke theksuar se drejtësia nuk mund të trajtohet në mënyrë të pjesshme apo selektive.

Në reagim thuhet se Kuvendi i Republikës së Kosovës ka “detyrim historik dhe politik të flasë me një zë të përgjegjshëm, të plotë dhe të drejtë për drejtësinë”, e jo përmes rezolutave që, sipas LDK-së, mbesin të pjesshme në përmbajtje dhe mesazh.

LDK ka theksuar se mbështet fuqishëm parimin e gjykimit të drejtë, të paanshëm dhe në përputhje me standardet më të larta kushtetuese dhe ndërkombëtare për çdo qytetar të Kosovës, duke e cilësuar këtë si vlerë themelore të shtetit ligjor dhe të orientimit euro-atlantik të vendit.

Megjithatë, sipas kësaj partie, drejtësia nuk mund të jetë koncept i fragmentuar.

“Ajo ose vlen për të gjithë, ose rrezikon të humbasë legjitimitetin e saj”, thuhet në deklaratë.

Deputetët e LDK-së kanë kërkuar që rezoluta të përfshijë qartë dhe pa ekuivoke obligimin institucional për zbardhjen e të gjitha vrasjeve të pazbardhura pas luftës, përfshirë edhe vrasjet politike. Sipas tyre, kjo është një borxh ndaj viktimave, shoqërisë dhe vetë shtetit të Kosovës.

Refuzimi për ta përfshirë këtë kërkesë, sipas LDK-së, e ka bërë rezolutën “të paplotë në thelb dhe të mangët në mesazh”. Për këtë arsye, Grupi Parlamentar i kësaj partie ka bërë të ditur se nuk pranon të legjitimojë, siç e quan, një qasje të njëanshme ndaj drejtësisë.

Në fund, LDK thekson se qëndrimi i saj është aktiv dhe parimor, duke nënvizuar se nuk shmanget nga përgjegjësia, por e ushtron atë; nuk hesht për drejtësinë, por kërkon që ajo të jetë e plotë; dhe nuk relativizon historinë, por refuzon instrumentalizimin e saj politik.

LDK ka bërë të ditur se do të vazhdojë të kërkojë drejtësi për të gjitha viktimat, procese të drejta e të paanshme dhe një shtet që, sipas saj, ka guximin të përballet me të vërtetën, e jo ta përzgjedhë atë.

Avokati i Rexhep Selimit nis me kundërargumentimin e pretendimit të parë të Prokurorisë kinse Selimi ka pasur kontroll mbi Policinë si ministër i Rendit Publik.

“ZPS-ja nuk ka arritur t’i vërtetojë argumentet e veta”.

Sipas tij, termi “Policia e Ushtrisë Çlirimtare të Kosovës (UÇK)” është një tezë e Prokurorisë, “e hartuar si një kosh ku Prokuroria mund t’i hidhte sa më shumë dëshmi përmes provave jogojore” për të dhënë përshtypjen e gabuar se ekzistonte një lloj policie dhe që drejtohej nga Selimi si ministër i Rendit Publik.

“Pas qershorit, UÇK-ja dhe policia ushtarake e UÇK-së ka qenë nën përgjegjësinë e komandantëve të zonave, nuk ka qenë nën përgjegjësinë e zotit Selimi. Nuk ka ekzistuar një polici e tillë e UÇK-së, ose ministrisë së Rendit Publik, që është mbikëqyrur nga zoti Selimi, siç pretendon ZPS-ja”.

Sipas avokatit, nuk kishte asnjë forcë policie të krijuar në prill të vitit 1999, duke marrë parasysh rrethanat në atë kohë, dhe nuk ka asnjë provë konfirmuese të paraqitur nga dëshmitarë apo ZPS-ja që vërtetojnë një pretendim të tillë.

E mbijetuara e dhunës seksuale gjatë luftës në Kosovë, Vasfije Krasniqi ka shprehur mbështetjen e saj për marshin qytetar “Drejtësi, jo politikë”, të organizuar nga platforma “Liria ka Emër”, i cili do të mbahet, më 17 shkurt në Prishtinë, në mbrojtje të çlirimtarëve që po përballen me një proces të padrejtë gjyqësor në Hagë.

Po ashtu, ajo do të jetë njëra nga folëset që do të mbajë fjalim gjatë këtij marshi.

Krasniqi ka deklaruar se është obligim moral dhe njerëzor për të marshuar për të vërtetën e luftës çlirimtare të popullit të Kosovës dhe për drejtësinë e mohuar për vite me radhë.

“Më 17 shkurt do të jem pjesë e protestës “Drejtësi, jo politikë”. Si e mbijetuar e krimeve të Serbisë që kam kërkuar drejtësi, e ndiej si detyrim moral dhe njerëzor të marr pjesë për të vërtetën, dinjitetin dhe për drejtësinë e cila u është mohuar viktimave për vite me radhë, përfshirë edhe mua. Pa drejtësi nuk ka paqe”, ka thënë Krasniqi.

Platforma “Liria ka Emër” falënderon të gjithë qytetarët, organizatat, grupet shoqërore dhe komunitetet në vend dhe përtej për mbështetjen dhe gatishmërinë për të ndihmuar kauzën tonë për drejtësi të paanshme.

Kryeministri i Republikës së Kosovës, Albin Kurti, ka udhëtuar drejt Gjermanisë ku do të marrë pjesë në edicionin e 62-të të Konferencës së Sigurisë në Mynih – Munich Security Conference 2026 (MSC).

Kjo u bë e ditur përmes një njoftimi për media, ku ndër të tjera thuhet e krahas pjesëmarrjes në ngjarjet e organizuara në kuadër të MSC, kryeministri gjithashtu do të ketë edhe takime bilaterale në margjina të konferencës.

“Kryeministri i Republikës së Kosovës, Albin Kurti, ka udhëtuar drejt Gjermanisë ku do të marrë pjesë në edicionin e 62-të të Konferencës së Sigurisë në Mynih – Munich Security Conference 2026 (MSC). Krahas pjesëmarrjes në ngjarjet e organizuara në kuadër të MSC, kryeministri gjithashtu do të ketë edhe takime bilaterale në margjina të konferencës”, thuhet në njoftim.

Ndryshe, presidentja e Republikës së Kosovës, Vjosa Osmani, e cila ishte ftuar edhe sivjet në Konferencën e Sigurisë në Mynih, ka anuluar pjesëmarrjen e saj për shkak të angazhimeve institucionale dhe prioriteteve të brendshme në vend.

Këshilltari për Media i Presidencës, Bekim Kupina, ka theksuar se Presidentja është shumë mirënjohëse ndaj organizatorëve për ftesën.

“Megjithatë, për arsye të angazhimeve institucionale dhe prioriteteve që lidhen me zhvillime brenda vendit, ajo ka vendosur të mos marrë pjesë këtë vit”, ka thënë Kupina.

Konferenca e 62-të e Munihut do të mbahet nga 13 deri më 15 shkurt, ku do të marrin pjesë qindra udhëheqës botërorë, përfshirë edhe vendet e rajonit.

Kuvendi i Kosovës ka miratuar me 90 vota për ‘Rezolutën e Hagës’ përmes së cilës ka kërkuar nga Dhomat e Specializuara dhe Zyra e Prokurorit të Specializuar në Hagë, që të ushtrojë proces gjyqësor të drejtë ndaj ish-udhëheqësve të Ushtrisë Çlirimtare të Kosovës.

R E Z O L U T Ë

Duke rikonfirmuar përkushtimin e plotë të Kuvendit për respektimin e rendit kushtetues, përfshirë Amendamentin Nr. 24 të Kushtetutës së Republikës së Kosovës për themelimin e Dhomave të Specializuara dhe Zyrës së Prokurorit të Specializuar;

Duke rikujtuar qëllimin e këtij amendamenti dhe përkushtimin e Republikës së Kosovës për të adresuar dhe demantuar akuzat e pabazuara që burojnë nga Raporti i Asamblesë Parlamentare të Këshillit të Evropës [Dokumenti 12462] i 7 janarit 2011, të cilat as pas një dekade hetimesh ndërkombëtare nuk kanë përbërë bazë për t’u përfshirë në aktakuzat e ngritura kundër udhëheqësve dhe luftëtarëve të luftës së Ushtrisë Çlirimtare të Kosovës;

Duke shprehur besimin e plotë në vlerat e Ushtrisë Çlirimtare të Kosovës, si pjesë sublime e historisë sonë të lavdishme, mbi të cilën qëndron Republika jonë dhe duke nderuar sakrificat e burrave dhe grave të Kosovës për lirinë dhe pavarësinë e saj, siç nënvizohet edhe në preambulën e Deklaratës së Pavarësisë së Kosovës;

Duke theksuar përkushtimin tonë të plotë për mbrojtjen e vlerave të demokracisë, ndarjes së pushteteve dhe pavarësisë së pushtetit gjyqësor, të saktësuara në Kushtetutën e Republikës sonë dhe në aktet e standardet ndërkombëtare;

Duke theksuar përkushtimin tonë të plotë për mbrojtjen e të drejtave dhe lirive themelore të garantuara me Kushtetutë dhe me instrumente ndërkombëtare, si Deklarata Universale për të Drejtat e Njeriut, Konventa Ndërkombëtare për të Drejtat Civile dhe Politike dhe Konventa Evropiane për të Drejtat e Njeriut;

Duke e vlerësuar të domosdoshme që të ritheksohen detyrimet që rëndojnë mbi Dhomat e Specializuara dhe Zyrën e Prokurorit të Specializuar, ashtu si edhe mbi çdo institucion tjetër të Republikës së Kosovës, lidhur me zbatimin e standardeve dhe parimeve kushtetuese e ndërkombëtare për administrimin e duhur të drejtësisë;

Kuvendi i Republikës së Kosovës

KËRKON nga Dhomat e Specializuara dhe Zyra e Prokurorit të Specializuar që, në ushtrimin e funksioneve të tyre, të sigurojnë zbatimin me përpikëri të ligjeve dhe Kushtetutës së Kosovës, që përmban standardet më të mira ndërkombëtare, lidhur me një proces gjyqësor të drejtë dhe të paanshëm, duke respektuar gjithashtu parimet e transparencës, llogaridhënies dhe kultivimit të besimit të publikut në drejtësi.KËRKON nga Dhomat e Specializuara dhe Zyra e Prokurorit të Specializuar që, në ushtrimin e funksioneve të tyre, të sigurojnë zbatimin me përpikëri të standardeve kushtetuese dhe ndërkombëtare lidhur me mbrojtjen e të drejtave dhe lirive themelore të Hashim Thaçit, Kadri Veselit, Jakup Krasniqit, Rexhep Selimit dhe të tjerëve, përfshirë edhe detyrimet që burojnë nga jurisprudenca e Gjykatës Evropiane për të Drejtat e Njeriut.KËRKON nga Ombudspersoni i Dhomave të Specializuara, përgjegjësia ekskluzive e të cilit për Dhomat e Specializuara dhe Zyrën e Prokurorit të Specializuar buron nga Kushtetuta e Republikës së Kosovës, që të veprojë me pavarësi dhe paanësi të plotë në ushtrimin e këtij funksioni, në përputhje me detyrimet kushtetuese dhe aktet e standardeve ndërkombëtare lidhur me këtë funksion.KËRKON nga shtetet financuese dhe mbështetëse të Dhomave të Specializuara të Kosovës në Hagë që ta respektojnë marrëveshjen me Republikën e Kosovës, që gjykata të operojë në bazë të ligjeve dhe Kushtetutës së Kosovës, e cila në brendi i ka të gjitha standardet më të mira ndërkombëtare. Shtetet financuese dhe mbështetëse të Dhomave të Specializuara të Kosovës duhet të marrrin përgjegjësi, nëse shkelen këto të drejta.INKURAJON të gjitha shtetet demokratike të bashkohen në thirrjen tonë për respektimin e plotë të standardeve ndërkombëtare për një gjykim të drejtë dhe të paanshëm – standarde këto që burojnë nga tradita kushtetuese e të gjitha shteteve demokratike dhe akteve e rekomandimeve të miratuara nga mekanizmat ndërkombëtarë, përfshirë, por pa u kufizuar, nga Kombet e Bashkuara, Bashkimi Evropian, Këshilli i Evropës dhe Organizata për Siguri dhe Bashkëpunim në Evropë.INKURAJON mekanizmat monitorues për respektimin e të drejtave dhe lirive themelore në kuadër të organizatave ndërkombëtare, si dhe organizatat joqeveritare ndërkombëtare e vendore, për monitorim të shtuar të pajtueshmërisë së funksionimit të Dhomave të Specializuara dhe Zyrës së Prokurorit të Specializuar me standardet ndërkombëtare për mbrojtjen e të drejtave dhe lirive themelore në procese gjyqësore dhe raportimin e shkeljeve të evidentuara.KONFIRMON zotimin dhe përkushtimin për sigurimin e të gjitha mekanizmave, përfshirë ato financiare, në mbështetje të të drejtave të mbrojtjes së udhëheqësve dhe luftëtarëve të Ushtrisë Çlirimtare të Kosovës para Zyrës së Prokurorit të Specializuar dhe Dhomave të Specializuara.KONFIRMON zotimin dhe përkushtimin e plotë për ndërmarrjen e të gjitha veprimeve për afirmimin e vlerave të luftës së Ushtrisë Çlirimtare të Kosovës dhe historisë mbi të cilën është ndërtuar Republika e Kosovës.

Kuvendi i Kosovës ka votuar rezolutën mbrojtjen e krerëve të UÇK-së.

90 vota pro, 1 kundër dhe asnjë abstenim, ka kaluar kjo reoluztë.

Lidhja Demokratike e Kosovës ishte pro rezolutën, por kërkoi që të futet edhe pika për drejtësi për vrasjet politike.

Ndërsa, Përparim Gruda tha se teksti është hartuar nga një grup ekspertesh, duke thënë se nuk mund të ndryshohet.

Presidentja e Kosovës, Vjosa Osmani, i ka ndarë Medaljen Presidenciale “Shën Tereza” Dr. Patrick “Paddy” Dewan, në shenjë mirënjohjeje për kontributin e tij të jashtëzakonshëm në ofrimin e ndihmës profesionale mjekësore për trajtimin e sëmundjeve të rralla tek fëmijët në Kosovë.

Gjatë ceremonisë, Osmani theksoi se Dr.Dewan, ndër vite, ka punuar ngushtë me mjekët vendorë në Klinikën e Kirurgjisë Pediatrike, duke dhënë kontribut të çmuar në trajtimin e rasteve komplekse dhe në ngritjen e kapaciteteve profesionale në këtë fushë.

Ajo vlerësoi lart përkushtimin e tij të vazhdueshëm, si dhe angazhimin për sigurimin e pajisjeve të nevojshme për ndërhyrje kirurgjike, me mbështetjen e komunitetit shqiptar në Australi, çka ka ndikuar drejtpërdrejt në përmirësimin e shërbimeve shëndetësore për fëmijët në vend.

Sipas njoftimit, Medalja Presidenciale “Shën Tereza” i ^shtë ndarë Dr. Dewan në emër të qytetarëve të Republikës së Kosovës, “për kontributin e tij të jashtëzakonshëm dhe përkushtimin shumëvjeçar në trajnimin e kuadrit mjekësor nga Kosova, si dhe për shërbimin e tij në të mirë të fëmijëve të Kosovës”.

Kuvendi i Përgjithshëm i Aleancës për Ardhmërinë e Kosovës do të mbahet më 7 qershor të këtij viti, ku do të zgjidhet kryetari i ri i partisë.

Kështu u bë e ditur në njoftimin zyrtar të subjektit politik, ku po ashtu u theksua se kuvendet e nëndegëve do mbahen nga 20 shkurti deri më 31 mars 2026.

“Në përputhje të plotë me Statutin e partisë, fillimisht anëtarët e Këshillit të Përgjithshëm votuan në mënyrë unanime për formimin e Komisionit për Përzgjedhjen e Kandidatëve dhe Nominime, Komisionit Statutar, Komisionit të Etikës, si dhe për plotësim-ndryshimin e Rregullores për Zgjedhjet në AAK. Në vijim të takimit u votua edhe për formimin e Komisionit për Organizimin dhe Koordinimin e Zgjedhjeve të Brendshme, duke i hapur rrugë shpalljes zyrtare të procesit zgjedhor brenda Aleancës”, thuhet në njoftim.

Po ashtu, kryetari Ramush Haradinaj, gjatë fjalës së tij, bëri të ditur se nuk do të kandidojë për një mandat tjetër në krye të partisë.

Ai falënderoi të gjitha strukturat e Aleancës në të gjitha nivelet për angazhimin dhe përkushtimin e deritanishëm, duke shprehur bindjen se pas përfundimit të zgjedhjeve të brendshme, AAK do të dalë edhe më e fortë dhe më e përgatitur në sfidat që e presin.

Ndërkaq, nënkryetari aktual i partisë, Ardian Gjini, ka bërë të ditur kandidaturën e tij për kryetar të Aleancës, duke mirëpritur njëkohësisht edhe kandidaturat e tjera.