Tag: Ballina

Sot vazhdon seanca e jashtëzakonshme plenare e Kuvendi i Kosovës, në të cilën do të diskutohet për buxhetin e shtetit.

Pas diskutimeve me shefat e grupeve parlamentare, të premten, kryetarja e Kuvendit, Albulena Haxhiu, ka njoftuar se seanca për buxhetin është shtyrë për sot dhe do të fillojë në orën 10:00.

Votimi i buxhetit për vitin 2026 në lexim të parë hasi në kundërshtimin e partive opozitare, të cilat kërkuan më shumë kohë për të shqyrtuar dokumentin prej rreth 700 faqesh.

Deputetët e opozitës kanë deklaruar se duhet ta lexojnë dokumentin për të pasur mundësi të bëjnë propozime konkrete.

Më pas, Haxhiu i thirri për konsultim shefat e grupeve parlamentare dhe vendosi ta shtyjë seancën.

Buxheti i propozuar është në vlerë prej 4 miliardë eurosh. Për të hyrë në fuqi si ligj, buxheti duhet të miratohet edhe në lexim të dytë.

Veprimtari Sali Bislimi, president i OJQ-së “Zëri Perëndimor i Kosovës” (The Western Voice of Kosovo), do të dorëzojë nesër në Dhomat e Specializuara të Kosovës në Hagë një rezolutë, e cila tri vjet më parë i ishte adresuar Qeverisë zvicerane dhe është nënshkruar nga 30 deputetë të Parlamentit Zviceran.

KosovaPress ka siguruar rezolutën e nënshkruar nga 30 deputetë zviceran, të cilët nesër prej orës 11:00 do ta dorëzojë veprimtari Sali Bislimi në Gjykatën Speciale.

Këta deputetë zviceranë që kanë vënë nënshkrimin në këtë rezolutë, kërkohet që kjo gjykatë veprojë me drejtësi, të jetë e paanshme dhe e barabartë.

Veprimtari Sali Bislimi nesër do të dorëzojë ne Gjykatën Speciale këtë rezolute, ku tri vjet më parë i është adresuar Qeverisë zvicerane, e cila është nënshkruar nga 30 deputetë të Parlamentit Zviceran.

Këta deputetë janë nga te gjitha partitë politike zvicerane.Rezoluta do të dorëzohet nesër pranë Dhomave të Specializuara të Kosovës.

Më poshtë Rezoluta me 30 deputetë zviceran të nënshkruar.

Në Dhomat e Specializuara të Kosovës, me seli në Hagë, sot vazhdon seanca e deklaratave përmbyllëse në gjykimin ndaj ish-krerëve të UÇK-së: Hashim Thaçi, Kadri Veseli, Rexhep Selimi dhe Jakup Krasniqi.

Mbrojtja e Jakup Krasniqit ka sot edhe një orë e gjysmë kohë për të përfunduar deklaratën e saj përmbyllëse, të cilën e ka nisur të premten.

Aiden Ellis, i cili përfaqëson Jakup Krasniqin, ka thënë të premten se, sipas provave, nuk është vërtetuar që klienti i tij të ketë pasur përgjegjësinë kryesore për komunikatat.

Sipas mbrojtjes, në dosjen e Prokurorisë thuhet se Krasniqi ka pasur përgjegjësi parësore për komunikatat dhe se ishte hartues e redaktor i tyre.

“Nuk është vërtetuar asnjëherë që z. Krasniqi e ka pasur përgjegjësinë kryesore për komunikatat. Unë do të përfundoj duke thënë se paragrafi 554 i dosjes së Prokurorisë është një shembull i qartë i mënyrave se si ka dështuar Prokuroria”, tha Ellis.

Avokatja e Jakup Krasniqit, Venkateswari Alagendra, tha se Jakup Krasniqi duhet të shpallet i pafajshëm dhe të kthehet pranë familjes së tij.

Ajo theksoi në fjalën e saj se Krasniqi gjendet në paraburgim në Hagë prej 1.926 ditësh.

“Parashtrojmë se ekziston vetëm një opsion: që të merrni vendim pafajësie ndaj të gjitha akuzave të ngritura ndaj Jakup Krasniqit. Në fund të parashtrimit, do t’i bëjmë thirrje gjykatës së nderuar që ta shpallë të pafajshëm Krasniqin dhe ta lejojë këtë zotëri 75-vjeçar të kthehet pranë familjes së tij dhe t’i kalojë vitet që i ka caktuar Zoti me familjen”, tha ajo.

Avokatja Alagendra deklaroi se Zyra e Prokurorit të Specializuar mbështetet në spekulime dhe pretendime të pambështetura në akuzat ndaj Krasniqit. Sipas saj, nuk ka asnjë dëshmitar që pretendon se Krasniqi ka keqtrajtuar ndokënd.

Mbrojtja e Krasniqit e akuzoi Prokurorinë se ka përzgjedhur dokumente dhe pjesë të dëshmive të dëshmitarëve sipas interesave të saj, duke shtuar se ka injoruar pjesët e dëshmive që nuk i përshtaten ZPS-së.

Fjala përmbyllëse e Prokurorisë filloi më 9 shkurt 2026, dhe përfundoi një ditë më pas, më 10 shkurt, kur kryeprokurorja e specializuar, Kimberly West, kërkoi dënim unik prej 45 vjetësh burgim për secilin nga katër të akuzuarit.

Po më 10 shkurt u dha fjala për mbrojtjen, ndërsa më 11 shkurt 2026 fjalën përfundimtare e dha mbrojtja e Hashim Thaçit dhe filloi ajo e Kadri Veselit, e cila vazhdoi edhe më 12 shkurt. Pas përfundimit të saj, filloi mbrojtja e Rexhep Selimit.

Të gjithë kërkuan që ish-krerët e UÇK-së të lirohen të pafajshëm, duke thënë se prokuroria nuk e ka argumentuar të kundërtën. /RTK

Flamuri i Kosova u ngrit në Chicago për të shënuar 18-vjetorin e pavarësisë, krahas flamurit të SHBA dhe atij të qytetit.

‘’Në nder të 18-vjetorit të Pavarësisë, flamuri i Republikës së Kosovës u ngrit në Çikago të premten, krahas flamujve të Shteteve të Bashkuara të Amerikës dhe të Qytetit të Çikagos. Kosova18 🇽🇰🤝🇺🇸@’’’, thuhet në njoftim.

Zëvendëssekretarja e Përgjithshme e NATO-s, Radmilla Shekerinska, në një intervistë për agjencinë e lajmeve Beta, ka thënë se NATO është duke pritur që ata që janë përgjegjës për sulmin e Banjskës të dalin para drejtësisë. Ajo ka thënë se përmes kësaj duan që të parandalojnë që diçka e tillë të përsëritet.

Shekerinska ka thënë se kanë marrë garanci nga Beogradi se autorët do të mbahen përgjegjës.

 “Ne morëm garanci ose një angazhim shumë të qartë nga autoritetet në Beograd se përgjegjësia do të përcaktohet dhe ky do të jetë qëndrimi ynë në të ardhmen”, ka thënë Shekerinska.

Sekretari i Përgjithshëm i NATO-s, Mark Rutte, në një konferencë në Bruksel këtë javë se ai “ende pret përgjegjësi” për ngjarjet në Kosovë, duke shtuar se presidenti serb i kishte premtuar se do ta përmbushte atë dhe se priste ta bënte këtë së shpejti.

Duke folur për këtë deklaratë, Shekerisnka ka thënë se kjo tregon që NATO pret nga autoritetet serbe që të dalin me rezultate.

Kur u pyet nëse kjo do të thoshte se deri më tani nuk kishte pasur rezultate për këtë çështje, Shekerinska u përgjigj se Rute “prandaj po bënte thirrje përsëri për përgjegjësi”.

Kryeministri i Kosovës, Albin Kurti, dhe kryeministri i Kroacisë, Andrej Plenkoviq, kanë zhvilluar të shtunën një takim në margjinat e Konferenca e Sigurisë në Mynih, ku kanë biseduar për disa çështje me interes të përbashkët.

Një nga temat e diskutuara mes Kurtit dhe Plenkoviqit ishte statusi i pakicës kroate në Janjevë.

Ndërkohë, Plenkoviqi e ka uruar Kurtin për rizgjedhjen si kryeministër dhe ka theksuar se Kroacia vazhdon ta mbështesë Kosovën në rrugën drejt Bashkimit Evropian.

“Ne vazhdojmë t’i forcojmë marrëdhëniet bilaterale dhe e mbështesim rrugën evropiane të Kosovës. Gjatë Konferencës së Sigurisë në Munih diskutuam situatën në rajon, sfidat e sigurisë dhe statusin e pakicës kroate në Janjevë”, ka shkruar Plenkoviq në X.

Kroacia edhe në të kaluarën ka kërkuar që komuniteti kroat në Kosovë të njihet me Kushtetutë si pakicë.

Ministrja e re e Tregtisë, Industrisë, Ndërmarrësisë dhe Inovacionit, Mimoza Kusari Lila ka pranuar sot zyrtarisht detyrën nga ish-Ministrja Rozeta Hajdari.

Kusari-Lila është zotuar për politika mbështetëse për sektorin privat, start-up-et, fuqizimin ekonomik të grave, forcimin dhe brendimin e produkteve “Made in Kosova”, si dhe ngritjen e eksportit dhe rritjen e produktivitetit të prodhimit kosovar.

“Incentivizimi i bizneseve për të punuar me politka miqësore mjedisore, duke promovuar ekonominë qarkore, do të kenë fokusin tim të veçantë”, ka shkruar Kusari-Lila.

Drejtoria për Mirëqenie Sociale në Komunën e Mitrovicës ka nisur aksionet humanitare në prag të muajit të shenjtë të Ramazanit, me qëllim mbështetjen e familjeve me gjendje të rënduar ekonomike.

Drejtori i Drejtorisë për Mirëqenie Sociale, Ramadan Beshiri, ka njoftuar se në bashkëpunim me donatorët janë shpërndarë 50 pako ushqimore për familjet në nevojë.

Sipas tij, ky aktivitet synon lehtësimin e barrës sociale dhe ofrimin e mbështetjes konkrete për kategoritë më të ndjeshme të shoqërisë.

Nga Komuna e Mitrovicës kanë bërë të ditur se aksionet humanitare do të vazhdojnë edhe gjatë muajit të Ramazanit, në funksion të solidaritetit dhe përkrahjes sociale për qytetarët që përballen me vështirësi ekonomike.