Albulena Haxhiu është zgjedhur kryetar e Kuvendit të Kosovës.
Ajo mori 66 vota ‘’për’’.
Kundër ishin 44 deputetë, dhe 8 ishin abstenime.
Haxhiu, gjatë vitit të kaluar, s’kishte arritur të marrë shumicën e votave edhe pse ishte propozuar me dhjetëra herë për këtë pozitë.
Ndryshe kjo legjislaturë e re e Kuvendit është zgjedhur nga zgjedhjet e 28 dhjetorit. Këto të fundit janë mbajtur pas një bllokade disa mujore.
Është formuar Komisioni i përkohshëm për verifikim të mandatëve.
Secili grup parlamentar e ka nga një përfaqësues.
Komisioni do të përbëhet nga
Adnan Rrustemi (VV)
Përparim Gruda (PDK)
Armend Zemaj (LDK)
Albana Bytyqi (AAK).
Si dhe përfaqësuesit e komuniteve joshumicë.
Për këtë komision votuan 118 deputetë.
Avokati mbrojtës i Hashim Thaçit, Richard Pierre Prosper, në fjalën e tij në kuadër të deklarimeve përmbyllëse ka shpartalluar përpjekjen e Prokurorisë së Hagës për të zhvleftësuar dëshmitë e dëshmitarëve ndërkombëtarë si James Rubin e Wesley Clark.
Prosper është marrë me deklaratën e prokurorit Halling i cili dje gjatë fjalës përmbyllëse të Prokurorisë ka thënë se Rubin e Clark s’kanë pasur informacionet e sakta për situatën në Kosovë, meqë Thaçi ua ka maskuar realitetin.
Avokati Prosper është kthyer për një moment kah Thaçi duke thënë se s’është e mundur që një 29 vjeçar, student e dikur emigrant në Zvicër, të mashtrojë zyrtarë të lartë si Rubin e Clark.
“Ju besoni se ky si 29 vjeçar iu hodhi hi syve Rubinit e Clarkut, sigurisht që jo”, thotë Prosper.
Një total prej 43 ndërtesash publike në Prizren, përfshirë 25 qendra shëndetësore dhe 18 shkolla do të renovohen përmes Programit Rajonal të Efiçiencës së Energjisë të financuar nga Bashkimi Europian, nën kornizën WBIF – Western Balkans Investment Framework, ka bërë të ditur sot Zyra e BE-së në Kosovë.
“Ky investim prej 5 milionë eurove, që kombinon një grant të BE-së me një hua nga Banka Evropiane për Rindërtim dhe Zhvillim (EBRD), do të përmirësojë kushtet e kujdesit shëndetësor dhe të mësimdhënies, do të rrisë efiçiencën e energjisë, do të ulë ndotjen e ajrit dhe do të gjenerojë kursime afatgjata për buxhetet publike”.
Hubert Perr, Shefi i seksonit të bashkëpunimit i BE-së në Kosovë, mori pjesë në nënshkrimin e kontratave për punët nga Komuna e Prizrenit.
Në dhjetor 2025, kontrata të ngjashme të financuara nga BE-ja për 20 ndërtesa publike në Prishtinë u nënshkruan nën të njëjtin program.
Me 3.7 miliardë euro të investuar që nga viti 1999, BE-ja tha se është partneri më i fuqishëm i Kosovës dhe ofruesi më i madh i ndihmës financiare.
Ministri i Mbrojtjes, Pirro Vengu, përmes një postimi në rrjete sociale, njofton se Shqipëria, Kosova dhe Kroacia marrin një hap të rëndësishëm në kuadër të marrëveshjes trilaterale mes tre shteteve.
Në postim, Vengu shkruan se shefat e shtabeve të tre vendeve zhvilluar një takim, ku u theksua bashkëpunimi ushtarak, ndërveprueshmëria dhe gatishmëria operacionale.
“Një tjetër hap i rëndësishëm në kuadër të marrëveshjes trilaterale ndërmjet Shqipërisë, Kosovës dhe Kroacisë, ku shefat e shtabeve të tre vendeve zhvilluan një takim të përbashkët.
Më shumë bashkëpunim ushtarak
Më shumë ndërveprueshmëri
Më shumë gatishmëri operacionale
Fokus në zhvillimin e stërvitjeve dhe trajnimeve të përbashkëta për përballimin e sfidave të sigurisë dhe kërcënimeve hibride.
Viti 2026 do të presë stërvitjen e parë trilaterale, në përputhje me Konceptin Strategjik të NATO dhe objektivat euroatlantike”, shkruan Vengu në rrjete sociale.
Lojërat Mesdhetare “Prishtina 2030”, edicioni i 21-të, do të ofrojnë një program të zgjeruar me 24 sporte konkurruese. Ndër sportet kryesore janë atletika, noti, xhudo, boks, dhe volejbolli, ndërsa nuk mungojnë format moderne si basketbolli 3×3 dhe futsali, i cili zëvendëson futbollin tradicional U21.
Organizatorët mund të shtojnë gjithashtu sporte si Baseball5, Canoe Sprint dhe Kickboxing, duke e bërë këtë edicion më dinamik dhe gjithëpërfshirës se kurrë më parë.
Përgatitjet për ngjarjen përfshijnë investime të mëdha në infrastrukturë sportive në Kosovë, duke përfshirë ndërtimin e një stadiumi kombëtar modern për ceremonitë hapëse dhe mbyllëse, objekte të reja sportive në qytete si Pejë, Ferizaj, Prizren dhe Vushtrri, si dhe përmirësime në pishina gjysmë-olimpike dhe pallate sportive ekzistuese.
Një element kyç është transformimi i Qendrës së Studentëve në Prishtinë në një qendër akomodimi për rreth 4,500 atletë, me ambiente të rinovuara dhe përmirësime në kuzhinë dhe shërbime të tjera, një investim afatgjatë që do të shfrytëzohet edhe pas përfundimit të Lojërave.
Për sportet ujore që kërkojnë det, Kosova ka bërë marrëveshje me Shqipërinë për të zhvilluar eventet në bregdet, një risi historike për këtë edicion.
Në vitin 2030 pritet pjesëmarrja e 3,500 deri në 5,000 atletëve nga 26 vende mesdhetare, duke e bërë këtë ngjarjen sportive më të madhe që Kosova ka organizuar ndonjëherë.
Kryetari i Komunës së Prishtinës, Përparim Rama, ka njoftuar se ora e parë mësimore e 16 shkurtit do t’i kushtohet historikut, rolit dhe sakrificës së Ushtrisë Çlirimtare të Kosovës (UÇK).
“Është një reflektim mbi historinë dhe përgjegjësinë tonë shtetërore! Në prag të 18-vjetorit të Pavarësisë së Republikës së Kosovës, në të gjitha shkollat publike të Kryeqytetit, ora e parë mësimore e 16 shkurtit do t’i kushtohet historikut, rolit dhe sakrificës së UÇK-së”, ka shkruar Rama.
Ai shton se kjo iniciativë është një obligim institucional dhe moral për të kultivuar te brezat e rinj respekt për historinë, sakrificën dhe idealet e vendit.
“Si Kryeqytet, kemi detyrë të kultivojmë te brezat e rinj respekt për historinë, sakrificën dhe idealet tona. Kujtesa historike është themel i identitetit dhe respektit për shtetësinë!”, nënvizon Rama.
Qendra për Studime Universitare e Forcës së Sigurisë së Kosovës realizoi me sukses një ushtrim 36-orësh fushor, gjatë të cilit kadetët zhvilluan një trajnim praktik në operacione mbrojtëse.
Gjatë ushtrimit, kadetët u angazhuan në një sërë detyrash operative, përfshirë fortifikimin e pozicioneve mbrojtëse, operacione zbulimi dhe mbrojtjen e zonës.
Pjesë e këtij ushtrimi ishin edhe tre kadetë nga kolegji mbretëror “Saint-Jean” i Kanadasë, të cilët po vijojnë studimet në QSU për një semestër.
“Ky aktivitet shërbeu për rritjen e gatishmërisë profesionale dhe përmirësimin e aftësive taktike të kadetëve, duke dëshmuar përkushtimin e QSU-së në përgatitjen cilësore të kuadrove të ardhshme”, thuhet në njoftimin e FSK-së.
Avokati i ish-presidentit të Kosovës, Hashim Thaçi, Lluka Mishetiq, ka deklaruar se klienti i tij është dhe do të mbetet i pafajshëm në procesin gjyqësor që po zhvillohet në Gjykatën Speciale në Hagë.
Gjatë paraqitjes së tij në deklaratën përmbyllëse, Mishetiq theksoi se diskutimet e trupit gjykues duhet të nisin me prezumimin e pafajësisë, duke shtuar se Zyra e Prokurorit të Specializuar (ZPS) ka dështuar të provojë akuzat e ngritura.
“Ju duhet të konstatoni se ZPS-ja ka dështuar, nuk ka arritur të provojë provat e saj, dhe të nxirrni aktgjykim shfajësues. Hashim Thaçi do të mbetet i pafajshëm”, është shprehur ai.
Sipas mbrojtjes, përfundimi i vetëm i drejtë është se prokuroria nuk ka arritur të përmbushë kriteret e barrës së provës, duke kërkuar nga gjykata një aktgjykim lirues për ish-presidentin.
“Hashim Thaçi është i pafajshëm, pasi ligji ua kërkon ta prezumoni të pafajshëm. Kam dëgjuar kryetarë të Tribunaleve Ndërkombëtare që e keqkuptojnë këtë gjë. Para jush keni katër burra që duhet të prezumohen të pafajshëm. Ky proces ka ardhur këtu pasi Prokuroria ka ngritur pretendime se kanë prova që janë fajtor, dhe për rrjedhojë, për më shumë se 5 vjet jemi në këtë proces, ku duhet të bëhet verifikimi i ZPS-së, për të parë nëse mund të vërtetojnë këto pretendime. Ky gjykim nuk është verifikim i jetës së Hashim Thaçit, por i pretendimit të ZPS-së se Thaçi nuk duhet të jetë i pafajshëm. Ju duhet të nisni kuvendimet se Hashim Thaçi është i pafajshëm, e më pas të mendoni se provat e ZPS-së ju kanë bindur se ai është fajtor. Ju duhet të konstatoni se ZPS-ja ka dështuar, nuk ka arritur të provojë provat e saj, dhe të nxjerrni aktgjykim shfajësues, Hashim Thaçi do të mbetet i pafajshëm. Ju do të arrini në përfundimin e pashmangshëm se ZPS-ja nuk arriti të plotësojë kriteret e barrës së provës,” tha Mishetiq.
Sot, në orën 17:00, mbahet seanca për konstituimin e Kuvendit, e cila do të drejtohet nga deputeti më i vjetër, Avni Dehari nga Lëvizja Vetëvendosje, ndërsa deputetja më e re, Fatma Taçi nga KDTP, do të shërbejë si ndihmëse e tij.
Kryetari i mëparshëm i Kuvendit, Dimal Basha, ka mbajtur një mbledhje përgatitore me përfaqësuesit e subjekteve politike parlamentare, ku janë dakorduar detajet organizative të seancës.
Sipas praktikave dhe Rregullores së Kuvendit, Lëvizja Vetëvendosje, si subjekti me numrin më të madh të deputetëve, do të ulet në ulëset qendrore të sallës plenare. Partia Demokratike e Kosovës do të pozicionohet në anën e djathtë, ndërsa Lidhja Demokratike e Kosovës në anën e majtë. Deputetët e Aleancës për Ardhmërinë e Kosovës, si dhe ata nga komunitetet serbe dhe joserbe, do të ulen në ulëset e tjera të sallës.
Sipas agjendës së prezantuar, pika e parë e rendit të ditës është formimi i Komisionit të përkohshëm për verifikimin e kuorumit dhe mandateve të deputetëve, pas së cilës do të bëhet betimi i tyre.
Më pas, seanca do të vazhdojë me zgjedhjen e Kryetarit të Kuvendit dhe nënkryetarëve. Me vendim të përbashkët, votimi i pesë nënkryetarëve do të bëhet në një pako, sipas propozimit të përfaqësuesve të komuniteteve jo shumicë.
Ndërkohë, është kërkuar nga partitë politike që të dorëzojnë sa më shpejt emrat e grupeve parlamentare, në mënyrë që të nisë procedura për themelimin e trupave punues të Kuvendit.