Tag: Ballina

Vetëm edhe 5 ditë të tjera subjektet politike kanë afat për t’i dërguar presidentes së Kosovës, Vjosa Osmanit, propozimet për anëtarë të Komisionit Qendror të Zgjedhjeve. Përbërja e re e KQZ-së pritet të reflektojë rezultatin e subjekteve politike nga zgjedhjet e fundit parlamentare, të cilat u mbajtën më 28 dhjetor 2025, shkruan Gazeta Express.

Sipas këtyre rezultateve, 6 anëtarë pritet të emërohen nga radhët e subjekteve politike shqiptare: 2 nga Vetëvendosje, 2 nga PDK dhe nga një anëtar për LDK dhe AAK. Katër anëtarë të tjerë do të emërohen nga radhët e komuniteteve pakicë.

Aktualisht, në KQZ, Vetëvendosje dhe PDK përfaqësohen nga dy anëtarë, kurse LDK dhe AAK me nga një anëtar. Nga komunitetet, Lista Serbe ka një përfaqësues, ndërkaq, turqit, boshnjakët dhe romët, gjithashtu nga një anëtar.

Më 9 mars 2026, presidentja e Kosovës, Vjosa Osmani u ka dërguar subjekteve politike kërkesat e veçanta nga të cilat ka kërkuar propozimet me shkrim të emrave të kandidatëve për anëtarë të KQZ-së.

Sipas paragrafit 6 të nenit 61 të Ligjit për Zgjedhjet e Përgjithshme ku flitet për mandatin dhe emërimin e anëtarëve të KQZ-së, subjektet politike duhet që brenda afatit prej 7 ditësh t’i dërgojnë propozimet e tyre. Pra, ky afat do të skadojë më 15 mars 2026.

Po sipas të njëjtit ligj dhe të njëjtit paragraph, emërimi i anëtarëve nga presidenti bëhet brenda 5 ditësh nga dërgimi i propozimeve. Pra, afati i fundit për emërimin e tyre është data 20 mars 2026.

Zgjedhjet e reja – DnV me thirrje për emërimin e anëtarëve të rinj

Situata e re politike në vend, e krijuar pas dështimit të Kuvendit që deri më 5 mars të zgjedhë Presidentin e Kosovës dhe dekretit të presidentes aktuale, Vjosa Osmani, për shpërndarjen e Kuvendit të Kosovës – me shumë gjasa pritet ta çojnë vendin në zgjedhje të parakohshme për Kuvendin e Kosovës.

Në këto rrethana, rrjeti i organizatave që merren me monitorimin e zgjedhjeve në Kosovë, Demokracia në Veprim (DnV), më 7 mars ka kërkuar nga presidentja Osmani që të fillojë procedurën për përbërjen e re të KQZ-së.

“Në këtë moment, kur vendi po përballet me zhvillime që pritet të çojnë drejt një procesi të ri zgjedhor dhe kur 11 marsi – si afat ligjor për këtë procedurë është drejt përfundimit – përmbyllja e procesit të emërimit të përbërjes së re të KQZ-së bëhet edhe më e rëndësishme. Kjo sidomos për shkak se legjislacioni aktual nuk parasheh më vazhdimin automatik të mandatit të përbërjes ekzistuese të KQZ-së deri në emërimin e së resë – në rast të zgjedhjeve – siç ishte rregulluar me ligjin e mëparshëm”, thuhej në kërkesën e DnV-së.

Sipas DnV-së, “çdo proces i mundshëm zgjedhor duhet ta gjejë Kosovën me institucione zgjedhore të konsoliduara, funksionale dhe me mandat të qartë ligjor, në mënyrë që administrimi i zgjedhjeve të mos shoqërohet me dilema për legjitimitetin e tij”.

Emrat e përfolur për anëtarë të KQZ-së

Deri më tani, disa nga partitë politike kanë dërguar në Presidencë propozimet e tyre.

Lidhja Demokratike e Kosovës dhe Alenca për Ardhmërinë e Kosovës kanë dërguar emrat e anëtarëve aktual, Sami Hamiti dhe Muharrem Nitaj, raporton Express.

Merret vesh se Vetëvendosje dhe PDK ende nuk kanë propozuar zyrtarisht përfaqësuesit e tyre për KQZ.

Aktualisht, Vetëvendosje përfaqësohet nga Alban Krasniqi dhe Sami Kurteshi. Ky i fundit nuk ka të drejtë të ri-emërohet pasi që sipas ligjit për zgjedhjet “anëtarët e KQZ-së nuk mund të shërbejnë më shumë se 3 mandate të njëpasnjëshme”.

Kurse, PDK përfaqësohet nga Ilir Gashi dhe Arianit Elshani. Ky i fundit, gjithashtu nuk mund të ri-emërohet për shkak të kufizimit të njëjtë ligjor.

Vjosa Osmani thotë se i kishte besuar shumë Albin Kurtit. Tandemi në krye të shtetit të Kosovës duket se është prishur ndërsa presidentja tani ka treguar se kryeministri është pajtuar me “shumë gjëra” në dialogun me presidentin serb, Aleksandar Vuçiq, për të cilat ajo nuk ka qenë dakord.

Më 27 shkurt të vitit 2023, Kosova dhe Serbia ishin pajtuar për një marrëveshje për “normalizimin e marrëdhënieve”. Pak ditë më pak. më 18 mars, Kurti dhe Vuçiqi ishin në Ohër ku u morën vesh për një aneks të zbatimit të asaj marrëveshjeje, e cila në nenin 7 të saj parashihte “sigurimin e një niveli të përshtatshëm të vetëmenaxhimit për komunitetin serb në Kosovë”.

Osmani thotë se i kishte besuar aq shumë Kurtit, sa që nuk kishte dërguar përfaqësues në dialogun me Serbinë.

“Kryeministri, edhe sipas aktgjykimit të Gjykatës Kushtetuese, e udhëheq dialogun. Unë ia kam besuar plotësisht këtë udhëheqje dhe kam qenë presidentja e parë dhe e vetme që nuk ka dërguar përfaqësues të vetin në dialog. Edhe presidenti Thaçi ka pasur përfaqësuesin e vet në dialog kur kryeministri Mustafa e udhëhiqte atë. Edhe presidentja Jahjaga ka pasë përfaqësuesin e saj në dialog”, tha ajo të hënën në një intervistë në Syri TV.

Përkundër kësaj, ajo tha se s’ishte pajtuar me “shumë gjëra” për të cilat Kurti ishte pajtuar me Vuçiqin. Në këtë rast, ajo e përmendi nenin 7 të marrëveshjes kryesore mes Kosovës dhe Serbisë gjatë qeverisjes së Kurtit me vendit, i cili i referohet Asociacionit të komunave me shumicë serbe.

“Unë kam qenë e vetmja që s’ka dërguar përfaqësues në dialog, duke treguar kështu besim të plotë në kryeministrin, përkundër faktit që shumë prej marrëveshjeve, shumë prej gjërave që i ka arritur atje, unë pastaj i kam kuptuar nga mediat. Përkundër faktit që shumë gjëra për të cilat ai është pajtuar atje, e ka ditur paraprakisht që unë nuk pajtohem me ato qëndrime, por nuk i kam ndërhyrë në punë, përveç rasteve kur ai ka kërkuar komente nga ana ime dhe ato komente ia kam dhënë me shkrim, ia kam dorëzuar dhe e ka ditur qëndrimin tim. Edhe për nenin 7 të Marrëveshjes së Brukselit, edhe për Aneksin e Ohrit, edhe statutin e Asociacionit, për të gjitha këto”, tha Osmani.

Presidentja theksoi se ka pasur mospajtime me Kurtin edhe për “pjesë të caktuara të marrëveshjeve” që ai edhe “ka shprehur gatishmëri për t’i pranuar në Bruksel”.

Duke folur për marrëveshjen për “normalizimin e marrëdhënieve” ndërmjet Kosovës dhe Serbisë, për të cilën ishin marrë vesh Kurti dhe Vuçiqi, Osmani tha se shefi i diplomacisë së Bashkimit Europian atëherë, Josep Borrell e kishte dërguar atë në Kombet e Bashkuara ku u bë “ligjërisht e obligueshme”.

“Pastaj përfaqësuesi i Jashtëm, Borrell është deklaruar publikisht që me pajtimin e të dyja palëve po e konsideron që marrëveshja është arritur dhe ajo marrëveshje pastaj është dërguar në Kombet e Bashkuara, te sekretari i përgjithshëm i Kombeve të Bashkuara, duke e konsideruar atë siç quhet, ‘legally binding’, pra ligjërisht e obligueshme”, tha ajo.

Osmani tha se ajo vetë nuk ka bërë “asnjë koncesion” në takimet dhe diskutimet që tha se i ka pasur, “qoftë me Shtetet e Bashkuara të Amerikës, qoftë me shtetet e tjera”.

“Unë kam ndërtuar relacion të mirë, relacion besimi, por argumentet për ta mbrojtur Kosovën kurrë s’kanë qenë më të fuqishme”, tha ajo.

“Nuk mund ta gjejë askush një njeri nga partnerët ndërkombëtarë që i kemi takuar dhe i kemi pasur dhe i kemi interlokutorë, që do të mund të dalë dhe të thotë ‘Vjosa Osmani e ka pranuar këtë koncesion’, sepse nuk është e vërtetë një gjë e tillë”, tha ndër tjerash Osmani.

Ish-diplomatja Edita Tahiri ka reaguar ndaj përplasjeve të fundit mes Vjosa Osmanit dhe Albin Kurtit, duke thënë se këto tensione kanë dëmtuar imazhin e Kosova në arenën ndërkombëtare.

Sipas saj, fakti që përplasjet mes dy liderëve shtetërorë kanë përfunduar në titujt e mediave botërore nuk i shërben vendit.

Postimi i plotë:

Sot, në Gjykatën Themelore në Prishtinë, ka filluar seanca ndaj Nagip Krasniqit, ish kryeshefi i KEK-ut.

Krasniqi akuzohet se i ka shkaktuar dëme KEK-ut miliona euro.

Sot pritet që të vazhdojë shqyrtimi gjyqësor, ku palët do të paraqesin argumentet dhe provat e tyre para trupit gjykues.

Në seancën e mbajtur më 15 janar, prokurorja Firkije Fejzullahu deklaroi se pas administrimit të provave do të arrihet zbardhja e plotë e gjendjes faktike dhe provimi i fajësisë së të akuzuarve.

Vetë Krasniqi ka cilësuar aktakuzën si të montuar dhe ka theksuar se qëndrimi i tij pesëmujor në paraburgim është i padrejtë.

Sipas aktakuzës, ai, së bashku me Ymer Dragushën dhe Isuf Zejnën, akuzohet për dëmtim të buxhetit të shtetit me rreth 37 milionë euro.

Në seancën fillestare më 7 shkurt 2025, Krasniqi dhe Zejna janë deklaruar të pafajshëm. Ymer Dragusha, një tjetër i akuzuar, ka pranuar fajësinë pas marrëveshjes me Prokurorinë.

Prokuroria Speciale e Republikës së Kosovës (PSRK) më 30 dhjetor 2024 ngriti aktakuzën e re ndaj ish-kryeshefit të Korporatës Energjetike të Kosovës (KEK), Nagip Krasniqi si dhe Ymer Dragushës dhe Isuf Zejnës.

Nagip Krasniqi dhe Ymer Dragusha akuzohen për “Keqpërdorim të detyrës zyrtare”.

Krasniqi akuzohet edhe për “Zbulim të fshehtësisë zyrtare”.

Kurse, Isuf Zejna akuzohet për “Ndihmë në kryerjen e veprës penale keqpërdrim i detyrës zyrtare”.

Tashmë është publikuar draft-raporti i raportuesit për Kosovën në Parlamentin Evropian, Riho Terras. Ky draft-raport përfshin zhvillimet politike, sundimin e ligjit, ekonominë, korrupsionin, dialogun me Serbinë dhe procesin e integrimit evropian të Kosovës për vitin 2025.

Në këtë raport, Terras e ka parë vitin që lamë pas si vit të humbur për Kosovën, pasi që pas zgjedhjeve të 9 shkurtit 2025 nuk u arrit të funksionalizohej as Kuvendi e as Qeveria.

“Megjithëse të tria zgjedhjet që u mbajtën në Kosovë në vitin 2025 – dy parlamentare dhe një lokale – u zhvilluan në mënyrë paqësore dhe të rregullt, procesi normal politik u ndërpre rëndë. Si rezultat, disa reforma politike dhe ekonomike pësuan ngecje dhe Plani i Rritjes për Ballkanin Perëndimor nuk mundi të zbatohej”, thuhet në raport.

Ai ka thënë se Kosova ka bërë përparime të dukshme në reforma zgjedhore, qëndrueshmëri ekonomike dhe në mbrojtjen e të drejtave themelore, por pavarësisht këtyre, sipas Terras sfidat vazhdojnë të mbesin në reformën për drejtësi, liri të mediave, efikasiteti i administratës publike dhe digjitalizim të shërbimeve publike.

Terras në këtë draft raport ka thënë se angazhimi i vazhdueshëm për reforma gjithëpërfshirëse dhe qeverisje gjithëpërfshirëse është thelbësor për përparimin e Kosovës në rrugën e integrimit evropian.

Në lidhje me dialogun Kosovë-Serbi, ai ka thënë se nuk ka dhënë rezultatet e pritura.

“Në thelb, dialogu ishte pothuajse i pezulluar gjatë vitit 2025. Kjo ndodhi edhe për shkak se Kosova nuk kishte një qeveri me mandat dhe autoritet, dhe negociatat në këtë formë nuk kanë perspektivë. Komisioni Evropian, si dhe Parlamenti Evropian dhe shtetet anëtare, duhet patjetër të bëjnë gjithçka për të siguruar që dialogu Prishtinë-Beograd të vazhdojë me energji të re. Prandaj, zgjatja e mandatit të Përfaqësuesit Special, Peter Sörensen, deri në shkurt 2028, është shumë e mirëpritur”, thuhet në këtë draft-raport.

Për zgjerimin e BE-së, ai ka thënë se është një nga historitë më të rëndësishme të suksesit të BE-së dhe sipas tij, ai duhet të vazhdoj pasi qëllimi më i gjerë gjeopolitik i zgjerimit është eliminimi i të ashtuquajturave “zona gri” nga harta e Evropës.

“Ndryshimet e mëdha që kanë ndodhur në kontekstin e luftës së agresionit të Rusisë kundër Ukrainës duhet ta rrisin gatishmërinë e Bashkimit Evropian për t’u përballur me aktorë globalë autoritarë konkurrues. Si Rusia ashtu edhe Kina kanë treguar se kanë interesa shumë të qarta në Ballkanin Perëndimor. Integrimi evropian i Kosovës është një proces i dyanshëm. Që Kosova të realizojë reformat e nevojshme, është e nevojshme edhe ndihma nga Bashkimi Evropian. Liberalizimi i vizave ka forcuar më tej kontaktet mes njerëzve dhe perspektivën evropiane të qytetarëve të Kosovës”, thuhet në draft-raport.

Në lidhje me masat ndëshkuese që BE i ka vendosur Kosovës në vitin 2023, ai ka thënë se ndikuan shumë negativisht në përparimin e Kosovës drejt Evropës.

“Edhe pse masat e BE-së kanë filluar gradualisht të lehtësohen, ndikimi i tyre në shoqëri mbetet shumë shqetësues. Veçanërisht të prekura nga këto masa janë organizata të ndryshme të shoqërisë civile, pakicat kombëtare, si dhe ndërmarrjet e vogla dhe të mesme, të cilat kanë marrë mbështetje të rëndësishme operative nga programet e BE-së. Masat gjithashtu mund të kenë një ndikim negativ në besueshmërinë e Bashkimit Evropian tek popullsia e Kosovës. Edhe pse mbështetja për Bashkimin Evropian ka mbetur shumë e lartë, ekziston rreziku që ajo të ulet si rezultat i këtyre masave”, thuhet më tutje në raport.

Komiteti i Punëve të Jashtme i Parlamentit Evropian (AFET) do të shqyrtojë draft-raportet për disa vende kandidate të Bashkimit Evropian (BE) gjatë një takimi të planifikuar për 16 dhe 17 mars. Raportet u përgatitën nga raportuesit përkatës të institucionit.

Pas një shkëmbimi pikëpamjesh me Komisioneren për Zgjerim Marta Kos të martën, anëtarët e komisionit do të diskutojnë detajet e draft-raporteve në lidhje me Kosovën, Bosnjë e Hercegovinën, Ukrainën, Moldavinë e Serbinë të nesërmen.

Draft-raporti i AFET për Kosovën përgatitet nga raportuesi Riho Terras. Dokumenti analizon zhvillimet politike, sundimin e ligjit, ekonominë, korrupsionin, dialogun me Serbinë dhe procesin e integrimit evropian të Kosovës.

Ai vlerëson progresin e Kosovës në raport me BE-në; përfshin kritika, rekomandime dhe vërejtje për institucionet e Kosovës; propozon qëndrimin politik të Parlamentit Evropian për Kosovën.

Pas publikimit të këtij draft-raporti, i njëjti prezantohet në PE nga eurodeputeti Terras.

Më pas, deputetët e komitetit paraqesin amendamente (ndryshime). Komiteti AFET voton raportin, dhe raporti i miratuar shkon për votim në seancë plenare të Parlamentit Evropian

Vetëm pas këtyre hapave ai bëhet rezolutë zyrtare e Parlamentit Evropian.

Gjykata Themelore në Prishtinë, Departamenti për të Mitur ka shpallur aktgiykim dënues ndaj pesë të akuzuarve B.Rr., D.Rr., F.S., M.S., dhe M.R., të cilët akuzohen për dhunimin e të miturës- që njihet si rasti i 11-vjeçares. I akuzuari B.Rr., u dënua me 12 vjet burgim, ndërkaq katër të tjerët me nga 10 vjet burgim.

Sipas Gjykatës, i akuzuari B.Rr., është shpallur fajtor dhe është dënuar me 12 vjet burgim. Kurse, të akuzuarit D.Rr., F.S., M.S., dhe M.R., janë shpallur fajtorë dhe janë dënuar secilit veç e veç me nga 10 vjet burgim, raporton “Betimi për Drejtësi“.

Të akuzuarve, në dënimin me burgim do t’iu llogaritet koha e kaluar në paraburgim dhe arrest shtëpiak deri në plotfuqishmëri të këtij aktgjykimi, por jo më shumë se dënimi i shqiptuar.

Me këtë vendim, të akuzuarit obligohen secili veç e veç që në emër të shpenzimeve të procedurës penale- për paushallin giyqesor të paguajnë shumën nga 500 euro dhe në emër te taksës për Fondin e Kompensimit të Viktimave të Krimit, secili veç e veç shumën nga 50 euro, të gjitha këto në afatin prej 15 ditëve, nga dita kur aktgjykimi të marrë formën e prerë.

E dëmtuara për realizimin e kërkesës pasurore-juridike udhëzohet në kontest të rregullt civil. Kundër këtij vendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë.

Ndyshe, Prokuroria Themelore në Prishtinë më 21 dhjetor 2022 kishte ngritur aktakuzë ndaj tetë personave, të moshës madhore, si të pandehur për përfshirje në rastin e dhunimit të 11-vjeçares në Prishtinë, në muajin qershor.

Sipas aktakuzës, i pandehuri B.Rr., ngarkohet për veprën penale “Dhunimi”, nga neni 227 paragrafi 7 lidhur me paragrafin 4 pika 4.7 lidhur me paragrafi 1 të KPRK-së, i pandehuri D.Rr., ngarkohet për veprat penale “Dhunimi”, nga neni 227 paragrafi 7 lidhur me paragrafin 4 pika 4.7 lidhur me paragrafin 1 të KPRK-së, dhe “Trafikimi me njerëz”, nga neni 165 paragrafi 2 lidhur me paragrafin 1 të KPRK-së.

I Dërguari Special Presidencial për Misione të Veçanta të Shteteve të Bashkuara, Richard Grenell, ka reaguar pas deklarimeve të mbrëmshme të presidentes Vjosa Osmani se Administrata Trump është Administrata për pro-kosovare që kur vendi ka shpallur pavarësinë.

Grenell ka thënë se “Osmani po gënjen”, duke thënë se ajo bashkë me Kurtin kanë qenë një “ekip i tmerrshëm”.

Sipas Grenell, Osmani thotë gjithçka për mbijetesën e saj politike.

“Ajo po gënjen.Ekipi Kurti/Osmani ka qenë një katastrofë dhe të gjithë e shohim qartë këtë. Ajo thotë gjithçka për mbijetesën e saj politike”, ka shkruar Grenell.

Presidentja e Republikës së Kosovës, Vjosa Osmani, priti sot në takim Ambasadorin e Mbretërisë së Bashkuar në Kosovë, Jonathan Hargreaves.

Në takim nga presidenca thuhet se u diskutua për zhvillimet e fundit politike në vend.

Presidentja shprehu mirënjohjen për mbështetjen e vazhdueshme të Mbretërisë së Bashkuar për Kosovën dhe popullin tonë.

Tutje, ajo theksoi përkushtimin e vazhdueshëm të Republikës së Kosovës për të thelluar bashkëpunimin me Mbretërinë e Bashkuar dhe për të hapur kapituj të rinj të partneritetit që kontribuojnë në arritjen e objektivave të përbashkëta.

Gjatë bisedës u theksua edhe rëndësia e ruajtjes së një mjedisi demokratik, ku respektohen mendimet e ndryshme dhe debati publik zhvillohet në mënyrë të përgjegjshme.

Në këtë kontekst, u theksua se gjuha kërcënuese dhe bullizuese është e papranueshme dhe nuk duhet të ketë vend në diskursin publik.