Tag: Ballina

Gjykata Speciale ia ka vazhduar paraburgimin Kadri Veselit.

Gjyqtarët sërish theksuan se Prokuroria po i përmend të njëjtat argumente.

“Paneli vëren se ZPS-ja po paraqet në thelb të njëjtat argumente që Paneli i ka shqyrtuar dhe hedhur poshtë tashmë në lidhje me çështjet e mëposhtme: (i) ndërgjegjësimi i Z. Veseli për seriozitetin e akuzave të konfirmuara kundër tij; (ii) potenciali i një dënimi të gjatë; (iii) provat e paraqitura kundër tij; dhe (iv) ndërgjegjësimi i Z. Veseli për ndryshimin e kushteve të paraburgimit të tij. Në këtë drejtim, Paneli kujton konstatimin e Panelit të Gjykatës së Apelit se nuk duhet të pritet që Gjyqtari i Procedurës Paraprake të shqyrtojë parashtresa që thjesht përsërisin argumente që janë trajtuar tashmë në vendimet e mëparshme të shqyrtimit”, thuhet në vendim.

Gjyqtarët konstatuan se fakti që gjykimi ka përfunduar, nuk ka asnjë ndikim në rritjen e rrezikut për arratisje. Madje, nuk ka prova që Kadri Veseli synon arratisjen.

“Lidhur me argumentin e ZPS-së se mbyllja e çështjes dhe fillimi i shqyrtimeve rrit rrezikun e arratisjes së Z. Veseli, Paneli kujton konstatimet e tij të mëparshme se hapa të ngjashëm proceduralë, siç është përfundimi i procedurave të provave, nuk e rrisin rrezikun e arratisjes së Z. Veseli. Në mënyrë të ngjashme, Trupi Gjykues konsideron se mbyllja e çështjes dhe fillimi i shqyrtiit nuk ndikon në prezumimin e pafajësisë, në vetvete, nuk e bën më konkrete dhënien e mundshme të një dënimi kundër z. Veseli. Në dritën e sa më sipër, Trupi Gjykues nuk ka gjetur ndonjë faktor shtesë mjaftueshëm bindës për të ndikuar në gjetjen e mëparshme në lidhje me rrezikun e arratisjes”, thuhet në vendim.

Madje, Prokuroria theksoi se përfundimi i gjykimit, e ka rritur presionin publik. Por, gjyqtarët konstatuan se nuk ka shembull konkret ku Veseli ka frikësuar një dëshmitar. Megjithatë, gjyqtarët konstatuan se ai ka ndikim të madh në Kosovë.

“Paneli mban qëndrimin e tij se emrat dhe të dhënat personale të disa dëshmitarëve shumë të ndjeshëm i janë zbuluar Mbrojtjes dhe për këtë arsye janë bërë të njohura për një gamë më të gjerë njerëzish, përfshirë të Akuzuarin. Kjo, nga ana tjetër, rrit rrezikun që informacioni i ndjeshëm që lidhet me dëshmitarët të bëhet i njohur për publikun. Në këtë kontekst, pavarësisht fazës aktuale të këtij rasti, Paneli konsideron se lirimi i një të Akuzuari me informacion të ndjeshëm në zotërim të tij nuk do të ishte i favorshëm për mbrojtjen efektive të dëshmitarëve. Në këtë drejtim, Paneli kujton gjetjen e tij, e cila u mbështet nga Paneli i Gjykatës së Apelit, se rreziku i ndërhyrjes që paraburgimi synon të parandalojë përfshin gjithashtu çdo përpjekje për t’u hakmarrë kundër ose për të nxitur dëshmitarët që kanë hequr dorë tashmë. Paneli kujton se më parë kishte konstatuar se rreziku i ndërhyrjes shtrihej edhe në përpjekjet për të ndërhyrë te dëshmitarët në procedurat paralele, dhe se një çështje në lidhje me pretendimet për ndërhyrje në procedurat aktuale është në vazhdim, përkatësisht Rasti 12. Megjithatë, Paneli konsideron se, në momentin aktual, potenciali për ndërhyrje është i kufizuar, duke vënë në dukje, në veçanti, se Prokuroria Speciale ka paraqitur së fundmi një njoftim për mbylljen e çështjes së saj”, thuhet në vendim.

Gjyqtarët paraburgimin e vazhduan me arsyetimin se në Kosovë ka klimë të frikësimit të dëshmitarëve.

“ Për më tepër, ekziston një klimë e vazhdueshme frikësimi të dëshmitarëve dhe ndërhyrjeje në procedurat penale kundër ish-anëtarëve të UÇK-së në Kosovë, të cilën masat mbrojtëse vetëm nuk mund ta kapërcejnë. Paneli vëren më tej se [REDAKTUAR]. Kjo klimë, siç konfirmoi Paneli i Gjykatës së Apelit, është një konsideratë e rëndësishme për qëllimin e vlerësimit të ekzistencës së një rreziku sipas Nenit 41(6)(b)(ii).53 Në këtë drejtim, Paneli është gjithashtu i vetëdijshëm për detyrën e tij për të mbrojtur si integritetin e procedurave ashtu edhe dëshmitarët e mbrojtur”, thuhet në vendim.

Draft-raportet mbi Kosovën dhe Serbinë iu prezantuan dje anëtarëve të Komitetit për Punë të Jashtme (AFET) të Parlamentit Europian.

European Western Balkans (EWP) raporton se dokumentet identifikojnë kriza të thella politike, si në Prishtinë ashtu edhe nw Beograd dhe u bëjnë thirrje palëve të rifillojnë dialogun për normalizimin e marrëdhënieve.

Ndër të tjera, draft-raporti mbi Serbinë thotë se ritmi i reformave të lidhura me BE-në në Serbi është ngadalësuar ndjeshëm, veçanërisht në fushat e sundimit të ligjit dhe demokracisë.

Ndërkaq, për draft-raportin vjetor të Riho Terras, raportuesi i PE-së për Kosovën, vëren se viti 2025 “ishte një vit i humbur” për të, për shkak të krizës politike të vazhdueshme.

Terras theksoi se “Kosova ishte në paralizë të plotë politike, gjë që pati pasoja edhe për procesin e reformave”.

“Është për të ardhur keq që pasiguria dhe bllokada politike kanë ngadalësuar ndjeshëm reformat e nevojshme që Bashkimi Europian pret nga aplikantët, të cilat janë gjithashtu qartësisht jetësore për vetë vendin. Ka qartësisht fusha në të cilat Kosova ka bërë regres të ndjeshëm gjatë vitit të kaluar”, vërejti ai në prezantimin në AFET.

Dokumenti vëren gjithashtu se dialogu i ndërmjetësuar nga BE-ja midis Kosovës dhe Serbisë nuk ka qenë i frytshëm.

“Dialogu midis Prishtinës dhe Beogradit, i cili ka nisur për të gjetur një kompromis të pranueshëm për palët, për fat të keq, nuk ka dhënë rezultatet e pritura. Dialogu ishte në thelb joaktiv gjatë vitit 2025. Kjo ndodhi edhe për shkak se Kosova nuk kishte një qeveri me mandat dhe kompetenca të plota, ndërsa negociatat në këtë formë nuk kanë perspektivë”, thuhet në të.

Draft-raporti vëren se Komisioni Evropian, Parlamenti Europian dhe shtetet anëtare të BE-së duhet të bëjnë gjithçka për të siguruar që dialogu midis Prishtinës dhe Beogradit të vazhdojë me energji të përtërirë, raporton ky medium.

Për më tepër, ai theksoi rëndësinë e angazhimit konstruktiv nga autoritetet e Kosovës dhe Serbisë për të arritur një marrëveshje gjithëpërfshirëse dhe ligjërisht të detyrueshme për normalizimin, e cila “duhet të bazohet në njohjen reciproke dhe në përputhje me të drejtën ndërkombëtare”.

Dokumenti gjithashtu u bën thirrje pesë shteteve anëtare të BE-së që nuk e kanë njohur pavarësinë e Kosovës “të lëvizin drejt njohjes, duke i mundësuar Kosovës të përparojë në një bazë të barabartë me kandidatët e tjerë”.

Gjithashtu, ai mbështet kërkesën e Kosovës për anëtarësim në Bashkimin Europian, në Këshillin e Europës dhe për integrim në NATO. Këto qëllime vlerësohen si dëshmi e orientimit të palëkundur strategjik të Kosovës drejt integrimit euroatlantik.

“Gjendja e demokracisë dhe sundimit të ligjit është përkeqësuar në Serbi”

Në debatin pas prezantimit të draft-raportit për Serbinë, eurodeputetët vunë në dukje prapambetjen e vendit në fushat që lidhen me sundimin e ligjit dhe i bënë thirrje Komisionit Europian të rishikojë fondet e Planit të Rritjes të alokuara për vendin.

Tonino Picula, Raportuesi i PE-së për Serbinë, deklaroi se pavarësisht faktit që Serbia e kishte shpallur anëtarësimin në BE si qëllimin e saj strategjik, “angazhimet e marra në praktikë nuk sollën rezultate”.

Ai kujtoi se Serbia vendosi të mos marrë pjesë në samitin BE-Ballkani Perëndimor, ndërsa mori pjesë në një paradë ushtarake në Moskë.

Picula vuri në dukje se legjislacioni zgjedhor ka mangësi serioze, si dhe se është e qartë se pa ndryshime strukturore dhe zbatim të plotë të të gjitha rekomandimeve të ODIHR-it, zgjedhjet e ardhshme nuk mund të jenë të drejta.

Për më tepër, ai vlerësoi se ndryshimet në ligjet kryesore gjyqësore “përfaqësojnë një hap prapa të papranueshëm në procesin e pranimit dhe një goditje të rëndë për pavarësinë e gjyqësorit”.

Draft-raporti, shkruan EWP, dënon fuqimisht masat represive dhe përdorimin e tepërt të forcës dhe dhunës policore kundër protestuesve, si dhe arrestimet arbitrare dhe ngacmimet sistematike të opozitës, aktivistëve, shoqërisë civile dhe gazetarëve.

“Qytetarët kanë të drejtë të kërkojnë llogari për korrupsionin e përhapur sepse duan transparencë. Ata kanë të drejtën e lirisë së shprehjes, sundimit të vërtetë të ligjit dhe reformave demokratike… Ka pasur një goditje shqetësuese dhe të vazhdueshme ndaj lirisë dhe autonomisë akademike, e dukshme përmes presioneve financiare, administrative dhe të tjera mbi komunitetin akademik”, theksoi Picula.

Ai kujtoi se roli i Parlamentit Europian nënkupton gjithashtu mbikëqyrjen e buxhetit dhe fondeve të Bashkimit Europian, duke përfshirë ndarjen e fondeve nga Plani i Rritjes për Ballkanin Perëndimor.

“Është e diskutueshme se si kjo ngecje dhe kthim prapa i Serbisë në rrugën e BE-së është plotësuese e pagesave nga Plani i Rritjes”, vërejti Picula.

Sipas tij, situata e medias në Serbi “është e frikshme në nivele të shumëfishta”.

“Unë dënoj fuqimisht përshkallëzimin e sulmeve dhe frikësimin e gazetarëve që e kthen vendin në disa kohë të zymta… Liria e shprehjes është nën presion në rritje, ndërsa REM nuk ka funksionuar për një kohë të gjatë… Përpjekjet për të eliminuar mediat e tjera të pavarura po forcohen… Fatkeqësisht, fushatat e shpifjes dhe dezinformimi toksik vazhdojnë të dominojnë në Serbi”, vuri në dukje Picula.

Ministria e Industrisë, Tregtisë, Ndërmarrësisë dhe Inovacionit (MINTI) ka reaguar pas aksionit të Prokurorisë Themelore në Prishtinë dhe Policisë së Kosovës, i zhvilluar në mëngjesin e së mërkurës në Agjencinë për Regjistrimin e Bizneseve (ARBK).

Sipas MINTI-t, hetimet po zhvillohen lidhur me një rast që ka të bëjë me ndryshimin e pronësisë së një biznesi pas ndërrimit të jetës së pronarit.

Në reagim thuhet se, pas shqyrtimit të dokumentacionit dhe vendimeve gjyqësore relevante, është konstatuar një keqinterpretim i një aktgjykimi gjyqësor, i cili më pas është korrigjuar përmes procedurave ligjore.

“Ju njoftojmë se, pas shqyrtimit të dokumentacionit dhe vendimeve gjyqësore relevante, stafi i ARBK-së ka konstatuar muaj më parë se kishte ndodhur një keqinterpretim i një aktgjykimi gjyqësor. Si rrjedhojë, ky interpretim është korrigjuar përmes procedurave përkatëse ligjore dhe administrative”, thuhet në reagim.

Më tej, MINTI ka shprehur gatishmërinë për bashkëpunim me organet e rendit dhe drejtësisë, me qëllim të zbardhjes së plotë të rastit.

Blerim Shabani nga Ministria për Familje, ka mbajtur një konferencë për media lidhur me rastin e 5vjeçarit nga Janjeva e Lipjanit, i cili dyshohet se është keqtrajtuar nga prindërit e tij.

Para mediave, Shabani tha se ministrja ka autorizuar njësinë inspektuese dhe ka kërkuar raport të hollësishëm sa i përket trajtimit të rastit të vogëlushit dhe gjashtë fëmijëve të tjerë të kësaj familje.

“Ne kemi ndërmarrë disa hapa, siç është mbikëqyrja profesionale, kemi kërkuar një raport kronologjik të hollësishëm lidhur me trajtimin, menaxhimin e fëmijëve nga Qendra për Punë Sociale, dhe normalisht në përputhje me këto kompetenca dhe përgjegjësi, kemi autorizuar dhe Njësinë Inspektuese e cila është në kuadër të Ministrisë që ne bëjmë pjesë”, tha ai.

“Por ajo që është e rëndësishme që ta sqarojmë, çështja e trajtimit dhe menaxhimit të rastit është çështje e kompetencës ekskluzive e komunës”.

Pos tjerash, Shabani tha se Ministria ka dhënë pëlqimin që fëmijët të dërgohen në strehimore.

Kujtojmë se prindërit e dyshuar janë arrestuar dhe është caktuar masa e paraburgimit për 30 ditë.

Shefi i Grupit Parlamentar i Aleancës për Ardhmërinë e Kosovës, Besnik Tahiri kritikoi sot Qeverinë Kurti, duke thënë se është stërmbushur me të emëruar politikë, ministri fiktive dhe pa program.

Tahiri theksoi se në vend të një qeverie funksionale dhe të orientuar drejt rezultateve, po shohim një sistem të ndërtuar për rehati politike, pa vizion të qartë dhe pa program konkret.

Postimin e tij i plotë:

Sot, prezantova analizën e Kabinetit me 21 anëtarë dhe 453 staf politik, një strukturë që në vend të efikasitetit reflekton një zgjerim të tepruar të emërimeve politike. Rregullorja e re synonte rregull dhe qartësi, por në praktikë kemi mbi 200 këshilltarë politikë dhe dhjetëra këshilltarë të jashtëm, ndërsa administrata profesionale mbetet në rol dytësor.

Kryeministri me buxhet të shtetit/pare të popullit, me deri në 24 këshilltarë, zëvendëskryeministrat deri në 11 secili, ministrat deri në 7, dhe së paku 2 zëvendësministra për çdo ministri pa ndarje të qartë përgjegjësish – një model që prodhon më shumë poste sesa rezultate.

Në krahasim me rajonin dhe vendet e Bashkimit Evropian, kjo strukturë është dukshëm më e madhe dhe më e kushtueshme, me rreth 26 staf për ministër, shumë mbi mesataren evropiane. Në vend të një qeverie funksionale dhe të orientuar drejt rezultateve, po shohim një sistem të ndërtuar për rehati politike, pa vizion të qartë dhe pa program konkret.

Bashkësia Islame e Kosovës ka dalë me njoftim lidhur me festën e Fitër Bajramit, më 20 mars.

Në njoftimin e BIK thuhet se manifestimi qendror për festën e Fitër Bajramit në Republikën e Kosovës do të mbahet në Xhaminë e Madhe në Prishtinë, shkruan Reporteri.net.

Programi fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga kryeimami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim ef. Tërnava, i cili do t’i drejtohet opinionit të gjerë me mesazhin e kësaj feste.

Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.
Me fat festa e Fitër Bajramit!”, thuhet në njoftim.

Prokuroria Themelore në Prishtinë ka njoftuar se në bazë të urdhrit të lëshuar nga Gjykata Themelore në Prishtinë, në orët e hershme të mëngjesit të ditës së sotme, ka realizuar një aksion.

Gjatë këtij aksioni janë kryer bastisje në Agjencinë e Regjistrimin e Bizneseve (ARBK), institucion që funksionon në kuadër të Ministrisë së Industrisë, Ndërmarrësisë dhe Tregtisë, për shkak të dyshimeve për kryerjen e veprave penale ‘’Keqpërdorimi i pozitës apo autoritetit zyrtar’’ sipas nenit 414 të Kodit Penal të Republikës së Kosovës, si dhe veprën penale ‘’Rastet e posaçme të falsifikimit të dokumenteve’’, sipas nenit 391 të KPRK-së.

Aksioni është ende në zhvillim e sipër, ndërsa Prokuroria Themelore në Prishtinë është duke ndërmarrë të gjitha veprimet e nevojshme ligjore në funksion të zbardhjes së plotë të rastit.

Gazeta Insajderi ka marrë vesh se në stacionin policor janë shoqëruar tre persona. Në mesin e tyre, sipas burimeve, është shoqëruar edhe ushtruesja e detyrës së kryeshefes së ARBK’së Igballe Rexha- Jashari.

Dyshimet e para janë për shkak të ndryshimit të aksioneve të pronësisë së një biznesi.

Policia ka bastisur zyret e ARBK’së, duke mos lejuar punëtorët të futen në objekt.

Ministria e Bujqësisë, Pylltarisë dhe Zhvillimit Rural dhe Agjencia e Ushqimit dhe Veterinës ka njoftuar njofton lidhur me menaxhimin e rasteve të sëmundjeve infektive te gjedhët, konkretisht Bruceloza dhe Tuberkulozi.

Ministria ka bërë me dije se rasti i parë i konfirmuar është identifikuar më 3 mars 2026, tek një fermer në fshatin Lubishtë, Komuna e Vitisë.

“Në përputhje me legjislacionin në fuqi dhe udhëzimin administrativ përkatës, Agjencia e Ushqimit dhe Veterinës (AUV) është duke vepruar brenda afateve ligjore të përcaktuara për ndërmarrjen e masave përkatëse, përfshirë edhe procesin e asgjësimit të kafshëve të infektuara”, thuhet në njoftim.

Sipas dispozitave ligjore, eliminimi i kafshëve të konfirmuara me këto sëmundje realizohet brenda një afati deri në 30 ditë nga data e konfirmimit. Në këtë kuadër, të gjitha veprimet institucionale janë duke u zhvilluar në përputhje të plotë me këtë afat kohor, duke garantuar menaxhim të kontrolluar dhe të sigurt të situatës.

Ministria e Bujqësisë, Pylltarisë dhe Zhvillimit Rural, në bashkëpunim të ngushtë me Agjencinë e Ushqimit dhe Veterinës (AUV), mbeten të përkushtuara në zbatimin e plotë të masave ligjore dhe profesionale për parandalimin dhe kontrollin e këtyre sëmundjeve, si dhe mbeten të përkushtuara në ruajtjen e shëndetit publik dhe garantimin e sigurisë ushqimore në vend.

“Njëkohësisht, u bëjmë thirrje të gjithë fermerëve dhe qytetarëve që të bashkëpunojnë me autoritetet kompetente dhe të raportojnë çdo dyshim për raste të ngjashme”.

Tre shtetas kosovarë kanë humbur jetën si pasojë e shembjes së betonit në një kantier ndërtimi në Vjenë pasditen e së martës.

Pajtim Bajrami, Asllan Musliu e Istref Zekaj, janë tre nga katër viktimat e rastit tragjik që tronditi kryeqytetin austriak.

Aksidenti thuhet se ka ndodhur rreth orës 14:30 gjatë punimeve në një objekt banimi.

“Gjatë punimeve të ndërtimit, skelet dhe pjesët e kallëpeve, si dhe sasi të mëdha betoni janë shembur”, ka thënë zëdhënësi për media i brigades së zjarrfikësve në Vjen.

Siç kanë rrëfyer dëshmitarët në vendin e ngjarjes, shembja e betonit i ka zënë në tokë pesë punëtorë.

Përkundër reagimit të shpejtë të urgjencës dhe qytetarëve të pranishëm, vetëm njëri nga pesë punëtorët ka arritur të shpëtohet.

Ai është një 45-vjeçar dhe thuhet se ka pësuar lëndime të rënda në kokë.

Vdekjen e shtetasve kosovarë e kishte konfirmuar mbrëmë Ambasada e Kosovës në Austri. Fillimisht ishte konfirmuar vdekja vetëm e dy shtetasve, ndërsa më vonë kishin njoftuar edhe për viktimën e tretë.

Kryeministri Albin Kurti u shpreh i tronditur thellësisht me lajmin për vdekjen e disa personave si pasojë e një aksidenti në një punishte ndërtimi në Vjenë të Austrisë, ndër të cilët tre shqiptarë nga Kosova.

“Na ka tronditur thellësisht lajmi për vdekjen tragjike të disa personave në Austri. Sipas informacioneve zyrtare nga Ambasada jonë atje, tre prej tyre janë identifikuar si qytetarë të Republikës së Kosovës”, shkroi ai në një postim në Facebook.

Kurti u shprehu ngushëllime familjeve të viktimave.

“Në këto momente të rënda, shpreh ngushëllimet e mia më të sinqerta për familjet e viktimave dhe të gjithë ata që janë prekur nga kjo humbje e madhe”.

Kryeministri tha se është në “komunikim të ngushtë” me Ambasadën e Kosovës në Vjenë.

“Qeveria e Republikës së Kosovës është në komunikim të ngushtë me Ambasadën tonë në Vjenë për të ofruar gjithë mbështetjen e nevojshme”.

Sipas njoftimit të Ambasadës, aksidenti ka ndodhur në distriktin Alsergrund, gjatë punimeve ndërtimore, kur një pjesë e konstruksionit është shembur, duke lënë punëtorët të bllokuar nën rrënoja.