Tag: Ballina

Qeveria e Republikës së Kosovës ka miratuar propozim-vendimin e Ministrisë së Drejtësisë për t’i kërkuar Presidentes autorizimin për nënshkrimin e Marrëveshjes për Ndihmë të Ndërsjellë Juridike në Çështjet Penale me Mbretërinë e Belgjikës.

Ministrja e Drejtësisë dhe Zëvendëskryeministrja, Donika Gërvalla, tha se marrëveshja është rezultat i negociatave me homologët belgë dhe synon të krijojë bazën ligjore dypalëshe për forcimin e bashkëpunimit në fushën e drejtësisë.

“Kjo marrëveshje harmonizon procedurat dhe mundëson bashkëpunim më të shpejtë dhe të frytshëm ndërmjet dy vendeve”, tha Gërvalla.

Ajo shtoi se marrëveshja do të ndihmojë përmirësimin e infrastrukturës ligjore dhe institucionale të sistemit të drejtësisë në Kosovë, duke intensifikuar bashkëpunimin juridik ndërkombëtar dhe duke konsoliduar kapacitetet e vendit.

Ministrja Gërvalla theksoi gjithashtu se Republika e Kosovës vazhdon të ndërtojë partneritete të qëndrueshme, pasi vetëm kështu forcohet sundimi i ligjit, siguria juridike dhe roli i vendit si partner i besueshëm në drejtësinë ndërkombëtare. /Telegrafi/

Pas mbledhjes së Qeverisë, në konferencë për media dolën ministri i Shëndetësisë Arben Vitia dhe ministri për Punë, Familje dhe Vlera të Luftës Çlirimtare Andin Hoti.

Vitia se shumë shpejtë qytetarët e Ferizajt do të bëhen me spital, brenda 30 muajsh.

“Një spital modern me të gjitha kushtet, në vlerë prej 24 milionë eurosh, një spital që do t’ju ofrojë të gjithë banorëve të atij regjioni, përfshirë edhe komunave përreth siç janë Kaçaniku, Hani i Elezit dhe jo vetëm trajtime, shërbime shumë cilësore, ndoshta më cilësoret në vend kur të përfundojë”, u shpreh Vitia.

Kryeministri Albin Kurti u shpreh “thellësisht i shqetësuar” në fillim të një mbledhjeje të qeverisë, ku foli për stërvitjet e ushtrisë serbe në afërsi të kufirit.

Ai tha se “institucionet e Kosovës mbeten vigjilente dhe të gatshme për t’u përballur me çdo kërcënim”, ndërsa shtoi se “është koha që komuniteti ndërkombëtar të ndëshkojë këtë qasje destabilizuese të Serbisë që kërcënon drejtpërdrejt sigurinë dhe paqen rajonale”.

Kurti tha se është “koha e fundit” që bota demokratike të “ndërmarrë hapa konkretë” edhe për mbrojtjen e shqiptarëve në Luginën e Preshevës, të cilëve u bëri thirrje që të mos bien pre e provokimeve.

“Këto provokime në afërsi të brezit kufitar në Karaçevë nga njësia e brigadës 63 e parashutistëve të Serbisë, përmes stërvitjeve me helikopterë H145M dhe kërcënimeve me parashutë disa metra larg kufirit me Republikën e Kosovës, përbëjnë një shfaqje të rrezikshme të agresionit. Kjo shfaqje bëhet edhe më alarmuese kur kujtojmë se e njëjta njësi ka trajnuar dhe mbështetur grupin e kriminelit Milan Radoiçiq, të cilët realizuan sulmin agresor e terrorist në fshatin Banjskë të Zveçanit, kur vranë rreshterin policor, Afrim Bunjakun – heroin e Kosovës”, tha ai.

Kurti tha se “këto lëvizje ushtarake, kombinuar me retorikën nxitëse të presidentit të Serbisë, Vuçiq, kinse Serbia po përgatitet për një sulm të mundshëm nga një aleancë Kroaci-Shqipëri-Kosovë, si dhe blerja e armatimit kinez dhe rus, konfirmojnë se Serbia po e përdor Rusinë si mjet shantazhi për ta mbajtur rajonin e Ballkanit nën tension të vazhdueshëm”.

Ai përmendi situatën aktuale të sigurisë në botë, që tha se është “tejet e brishtë”, ndërsa tha se Beogradi po e shfrytëzon këtë.

“Beogradi po e shfrytëzon këtë moment për ta sfiduar gatishmërinë e institucioneve vendore dhe ndërkombëtare të sigurisë dhe në përgjithësi stabilitetin e Ballkanit Perëndimor, sipas interesave të Serbisë dhe aleatëve të saj Rusisë dhe Iranit, që duan të kenë trazira, konflikte dhe paqëndrueshmëri gjithandej”.

Është bërë përurimi i segmentit të rrugës Vushtrri–Prishtinë.

Në përurimin e këtij segmenti të rrugës po marrin pjesë kryeministri i Republikës së Kosovës, Albin Kurti, dhe ministri i Infrastrukturës dhe Transportit, Dimal Basha.

Ceremonia e prerjes së shiritit është bërë në fshatin Gojbulë, te hyrja e segmentit të zgjeruar të rrugës nga Vushtrria në drejtim të Prishtinës.

Ky segment përfaqëson një hap të rëndësishëm në përmirësimin e infrastrukturës rrugore që lidh dy qytetet kryesore të Kosovës, duke synuar rritjen e qarkullimit më të mirë dhe lidhshmërisë midis zonave përreth./EO

Administrata Tatimore e Kosovës njofton se ka filluar zbatimi i Marrëveshjes ndërmjet Kosovës dhe Italisë për eliminimin e tatimit të dyfishtë dhe parandalimin e evazionit dhe shmangies tatimore në fushën e tatimit në të ardhura.

Në komunikatën për media bëhet e ditur se kjo marrëveshje synon të avancojë marrëdhëniet ekonomike ndërmjet dy vendeve dhe të forcojë bashkëpunimin në çështjet tatimore. Përmes saj mundësohet eliminimi i barrës së tatimit të dyfishtë për individët dhe bizneset, duke kontribuar në krijimin e një mjedisi më të favorshëm për investime dhe aktivitete ekonomike.

Po ashtu, bëhet e ditur se më të njëjtën kohë, marrëveshja adreson parandalimin e evazionit dhe shmangies tatimor, duke kufizuar përdorimin e skemave që çojnë në mos-deklarim apo deklarim jo të saktë. Në kuadër të saj përcaktohen qartë personat e mbuluar dhe mënyra e trajtimit të të ardhurave për qëllime tatimore. Marrëveshja zbatohet për personat rezidentë të njërit apo të të dy shteteve kontraktuese dhe trajton të ardhurat që burojnë përmes subjekteve apo aranzhimeve të ndryshme, në përputhje me legjislacionin përkatës të secilit shtet.

Gjithashtu, marrëveshja siguron respektimin e të drejtave tatimore të shteteve kontraktuese, duke përcaktuar rastet kur përfitimet nga kjo marrëveshje mund të aplikohen.

Zbatimi i kësaj marrëveshjeje përbën një hap të rëndësishëm drejt forcimit të bashkëpunimit ekonomik ndërmjet Kosovës dhe Italisë, si dhe rritjes së sigurisë ligjore për investitorët dhe bizneset që operojnë në të dy vendet.

“Republika e Kosovës vazhdon të zgjerojë rrjetin e saj të marrëveshjeve ndërkombëtare në fushën e tatimeve dhe aktualisht ka në fuqi gjithsej 22 marrëveshje për eliminimin e tatimit të dyfishtë me shtete të ndryshme”, thuhet në komunikatë.

Kosova dhe Shqipëria janë cilësuar si vende “pjesërisht të lira” në raportin më të fundit vjetor të organizatës Freedom House me seli në Uashington.

Megjithatë, Kosova ka shënuar një përmirësim të vogël në Raportin e vitit 2026 për Lirinë në Botë, duke u vlerësuar me 61 pikë nga 100, një më shumë se një vit më parë.

Në raportin e publikuar më 19 mars thuhet se në Kosovë “gjykatat kanë nxjerrë vendime që dëshmojnë pavarësinë e tyre, megjithëse janë përballur me trysni të madhe politike”.

Sipas raportit, kriza politike dhe institucionale që goditi Kosovën gjatë vitit të kaluar, kur vendi u qeveris pothuajse tërë kohën nga një qeveri në detyrë, ka ndikuar në përparimin e vendit në gjyqësor, shkruan Evropa e Lirë.

“Në Kosovë, për shembull, ligjvënësit e sapozgjedhur nuk arritën të formonin një qeveri për pjesën më të madhe të vitit, ndërsa qeveria në detyrë thuhet se e tejkaloi mandatin e saj teknik, duke rezultuar në zgjedhje të parakohshme; kjo bllokadë i zbehu përparimet e vendit në pavarësinë gjyqësore dhe sigurinë fizike”, thuhet në raport.

Në raportin paraprak, kur Kosova kishte 60 pikë, vendi vlerësohej se kishte shumë institucione publike të minuara nga korrupsioni, se gazetarët përballeshin me frikësim dhe se sundimi i ligjit pengohej nga ndërhyrjet dhe mosfunksionimi në sistemin gjyqësor.

Si renditen vendet e tjera të Ballkanit Perëndimor?

Nga vendet e rajonit, Serbia qëndron më së keqi, pasi vlerësohet me 53 pikë, ndërsa Bosnja e Hercegovina me 54 pikë.

Shqipëria, ndërkohë, vlerësohet më së larti, me 69 pikë, e ndjekur nga Mali i Zi me 68 pikë dhe Maqedonia e Veriut me 67 pikë.

Edhe Shqipëria shënoi përparim për një pikë, krahasuar me raportin e vitit të kaluar.

Raporti Liria në Botë përfshin vlerësime dhe raporte për vendet mbi të drejtat politike dhe liritë qytetare në 195 vende dhe 13 territore në mbarë botën.

Raporti i këtij viti mbulon zhvillimet nga 1 janari 2025 deri më 31 dhjetor 2025.

Puçet ushtarake, dhuna kundër protestuesve paqësorë dhe përpjekjet për të dobësuar garancitë kushtetuese gjatë vitit 2025, bënë që ky të ishte viti i 20-të radhazi të rënies së lirisë globale, sipas raportit nga Freedom House.

Raporti zbuloi se 54 vende përjetuan përkeqësim të të drejtave politike dhe lirive qytetare, ndërsa vetëm 35 shënuan përmirësime.

Sot, vetëm 21 për qind e popullsisë së botës jeton në vende të vlerësuara si të lira, një rënie nga 46 për qind që ishte para dy dekadash, thuhet në raport.

Guinea-Bissau, Tanzania, Burkina Faso, Madagaskari dhe El Salvadori shënuan rëniet më të mëdha të pikëve brenda një viti, ndërsa Siria, Sri Lanka, Bolivia dhe Gaboni gëzuan përmirësimet më të mëdha.

Tri vende – Bolivia, Fixhi dhe Malaui – u përmirësuan nga statusi “pjesërisht të lira” në “të Lira”, falë zgjedhjeve konkurruese, rritjes së pavarësisë së gjyqësorit dhe forcimit të sundimit të ligjit.

Gjykata e Apelit e ka aprovuar pjesërisht si të bazuar ankesën e mbrojtjes së të akuzuarit Zhivojin Neshiq, duke ia ulur dënimin nga 15 në 13 vjet burgim për dhunim seksual gjatë luftës në Kosovë.

Gjykata Themelore në Prishtinë e kishte shpallur fajtor Neshiqin dhe e kishte dënuar me 15 vjet burgim, raporton “Betimi për Drejtësi”

“APROVOHET pjesërisht si e bazuar ankesa e mbrojtësit të akuzuarit Zhivojin Neshic dhe NDRYSHOHET aktgjykimi i Gjykatës Themelore në Prishtine – Departamenti Special, PS.nr.71/2024 i datës 17.06.2025, përkitazi me vendimin mbi dënimin, ashtu që Gjykata e Apelit të akuzuarin Zhivojin Neshic për veprën penale për të cilën është shpall fajtor i shqipton dënim me burgim në kohëzgjatje prej 13 (trembëdhjetë) viteve”, thuhet në vendimin e Apelit të përpiluar më 17 mars 2026.

Apeli e ka hudhur si të palejuar ankesën e përfaqësueses së palës së dëmtuar, avokates Makifete Saliuka e paraqitur kundër aktgjykimit të Themelores. Po ashtu, pjesa tjetër e ankesës së mbrojtësi i të akuzuarit Neshiq, avokatit Millosh Deleviq u refuzua si e pabazuar, ndërsa pjesa tjetër të aktgjykimit mbetet e pandryshuar.

Kundër aktgjykimit të Themelores, ankesë kishet paraqitur mbrojtësi i të akuzuarit Neshiq, avokati Millosh Deleviq për shkelje esenciale të dispozitave të procedurës penale, vërtetimit të gabuar dhe jo të plotë të gjendjes faktike dhe shkeljes së Ligjit Penal. Ka propozuar që Apeli ta lirojë të akuzuarin në mungesë të provave apo lëndën ta kthejë në rigjykim.

Përfaqësuesja e palës së dëmtuar, avokatja Makifete Saliuka, ka parashtruar ankesë për shkak të zbatimit të gabuar të Ligjit Penal lidhur me sanksionin penal, duke propozuar të ndyshohet aktgjykimi i Themelores në pjesën që ka të bëjë me shqiptimin e dënimit dhe që ta dënojë Neshiqin me 20 vjet burgim.

Prokuroria e Apelit përmes parashtresës ka propozuar që ankesa e avokatiit Deleviq të refuzohet si e pabazuar, ndërsa të aprovohet ankesa e avokates Saliuka dhe të akuzuarit t’i shqiptohet dënim me burgim prej 20 vitesh.

Sipas pretendimeve ankimore të avokatit Deleviq, gjykata e shkallës së parë nuk i vlerësoi siç duhet të gjitha faktet vendimtare të këtij rasti. Sipas mbrojtjes, Themelorja ka pranuar versionin e mëvonshëm të deklarimit të viktimës, duke ndryshuar kualifikimin ligjor të veprës penale nga tentativa në vepër penale të përfunduar, pa dëshmi mjekësore apo prova tjera objektive.

Po ashtu, mbrojtja kishte pretendenduar se gjykata e shkallës së parë ka shkel Ligjin Penal, pasi që nuk ka individualizim të veprimeve të të pandehurit dhe as prova të cilat vërtetojnë dashjen e tij, dhe se vetëm prania e tij në uniformë dhe rrethanat e përgjithshme të konfliktit nuk janë të mjaftueshme.

Në ankesën e mbrojtjes janë theksuar edhe pretendimet për shkeljet esenciale të procedurës, në mungesë të arsyeve të qarta dhe të plota mbi faktet vendimtare, identifikimet e kryera pa praninë e mbrojtjes, kontradikta në deklaratat e dëshmitarëve dhe mungesës së provave objektive për inkriminim të të pandehurit, duke propozuar që aktgjykimi i shkallës së parë të anulohet dhe çështja të kthehet në rigjykim.

Në pretendimet ankimore të saj, avokatja Makifete Saliuka ka konsideruar se dënimi është tejet i butë dhe nuk përkon me peshën e veprës penale, pasojat dhe dëmin e shkaktuar.

Cilat janë gjetjet e Apelit?

Sipas aktgjykimit të nxjerrë nga Gjykata e Apelit, janë të pabazuara pretendimet e avokatit Deleviq se dispozitivi i aktakuzës dhe aktgjykimit është i paqartë, bie ndesh me arsyetimin, mungojnë arsyet mbi faktet vendimtare, si dhe se arsyet janë kontradiktore apo të vlerësuara gabimisht, veçanërisht në raport me shkeljet procedurale.

Kolegji i kësaj Gjykate ka vlerësuar se dispozitivi përmban përshkrim të mjaftueshëm të elementeve faktike dhe juridike të veprës penale “Krime lufte kundër popullsisë civile”, dhe se konkludimi i gjykatës së shkallës së parë është mbështetur në prova dhe dëshmi që inkriminojnë veprimet e të akuzuarit.

Tutje, pretendimet e mbrojtjes se deklaratat e dëshmitarëve dhe procedura e identifikimit janë realizuar pa praninë e mbrojtësit, Apeli i ka vlerësuar si të pabazuara.

Mbrojtja në pretendimet ankimore ndaj aktgjykimit të Themelores ka pretrenduar se deklarimet e viktimës në periudha të ndryshme kohore përmbajnë kundërthënie thelbësore. Por, Kolegji i Apelit ka vlerësuar se dëshmia e dëshmitares – të dëmtuarës D1., karakterizohet nga qartësia, pasi faktet dhe rrethanat tregohen në përputhje me kronologjinë e zhvillimit dhe logjikën jetësore të ngjarjes. Andaj, këto pretendime nuk qëndrojnë.

Gjithashtu, Apeli i ka vlerësuar si të pabazuara pretendimet ankimore të mbrojtjes se identifikimi i të akuzuarit nga ana e viktimës dhe dëshmitarëve është i pasigurt dhe i pambështetur në prova të mjaftueshme.

“Nga analiza kronologjike e provave të administruara në këtë çështje rezulton se identiteti i të pandehurit është përmendur dhe konfirmuar në mënyrë konsistente gjatë gjithë fazave të procedurës”, thuhet në vendimin e Apelit.

Po ashtu, edhe pretendimi për kontradiktë në deklarimet e viktimës lidhur me tentativën apo dhunimin e përfunduar, Kolegji i Apelit ka vlerësuar se nuk qëndron. Kurse për mungesë dëshmish mjekësore, Apeli ka vlerësuar se nuk është rrethanë që përjashton vërtetimin e veprës penale.

“Gjykata e Apelit thekson se mungesa e provave mjekësore nuk përbën rrethanë që përjashton mundësinë e vërtetimit të veprës penale të dhunimit gjatë konfliktit të armatosur. Prandaj, marrë parasysh të lartcekurat, Gjykata e Apelit konstaton se nuk ekziston asnjë mangësi në vërtetimin e gjendjes faktike dhe asnjë rrethanë që do të krijonte dyshim të arsyeshëm mbi përfundimet e gjykatës së shkallës së parë, për çka pretendimet ankimore të mbrojtjes në këtë drejtim refuzohen në tërësi si të pabazuara”, thuhet në vendim.

Të pabazuara, shkalla e dytë i gjen edhe pretendimet e mbrojtjes për shkelje të Ligjit Penal, dispozitave të Kodit të Procedurës Penale, me të cilat pretendohet se gjykata e shkallës së parë nuk ka vërtetuar elementet përbërëse të veprës penale dhe nuk ka individualizuar veprimet e të akuzuarit.

“Nga këto rrethana faktike siç janë deklarimet e viktimës dhe dëshmitarëve tjerë vërtetohet se i pandehuri Zhivojin Neshiq ka qenë pjesëtar i forcave policore serbe”, ka theksuar Apeli.

Sipas Apelit, nga rrethanat e vërtetuara ka rezultuar se i akuzuari ka vepruar me dashje dhe me vetëdije.

“Në aspektin subjektiv, nga rrethanat e vërtetuara rezulton se i pandehuri Zhivojin Neshiq ka vepruar me dashje, duke qenë i vetëdijshëm për natyrën e veprimeve të tij dhe për pasojat e tyre ndaj një personi civil të pambrojtur”, thuhet ne këtë aktgjykim.

Rrjedhimisht, sipas këtij aktgjykimi, Gjykata e Apelit ka konstatuar se gjykata e shkallës së parë ka zbatuar drejt Ligjin Penal dhe se në rastin konkret janë vërtetuar të gjitha elementet përbërëse të veprës penale “Krime lufte kundër popullatës civile”.

“Gjykata e Apelit konstaton se gjykata e shkallës së parë ka vërtetuar drejtë dhe në mënyrë të plotë gjendjen faktike, ka bërë vlerësim të drejtë dhe të gjithanshëm të provave të administruara gjatë shqyrtimit gjyqësor dhe ka zbatuar drejt ligjin penal”, vlerëson Apeli.

Ndërsa, sa i përket vendimit mbi dënimin, Apeli thekson se mbrojtja e të akuzuarit në ankesë nuk ka paraqitur pretendime të drejtpërdrejta lidhur me lartësinë e dënimit të shqiptuar nga gjykata e shkallës së parë, por ka kërkuar lirimin e të pandehurit nga dënimi duke kontestuar fajësinë e tij, përkatësisht duke pretenduar vërtetim të gabuar dhe jo të plotë të gjendjes faktike, si dhe shkelje të Ligjit Penal.

“Gjykata e Apelit e konsideron të drejtë këtë vlerësim të gjykatës së shkallës së parë, duke pasur parasysh se veprat e dhunës seksuale gjatë konfliktit të armatosur përbëjnë shkelje të rënda të së drejtës ndërkombëtare humanitare dhe cenim serioz të integritetit fizik dhe psikologjik të viktimave. Rrethanat konkrete të kryerjes së veprës, mënyra e ushtrimit të dhunës dhe pozita e viktimës si person civil i pambrojtur gjatë konfliktit të armatosur, përbëjnë elemente që e rrisin shkallën e rrezikshmërisë shoqërore të veprës penale”, thuhet në vendimin e Apelit.

Në vendimin e Apelit thuhet se në procesin e individualizimit të dënimit, kjo gjykatë mori parasysh edhe rrethanat që lidhen me personalitetin dhe sjelljen e të pandehurit, përfshirë edhe sjelljen e tij pas kryerjes së veprës penale, dhe në këto rrethana ka vlerësuar edhe kohëzgjatjen e dënimit me burgim.

Sipas Apelit, nga shkresat e lëndës nuk rezulton se i akuzuari pas kryerjes së veprës penale ka qenë i përfshirë në kryerjen e veprave të tjera penale të natyrës së njëjtë apo të ngjashme.

“Gjykata e Apelit vlerëson se një dënim me burgim në kohëzgjatje prej 13 (trembëdhjetë) vite është proporcional me shkallën e fajësisë së të pandehurit, me rrethanat konkrete të kryerjes së veprës penale dhe me nevojën për të shprehur dënimin shoqëror ndaj veprimeve që përbëjnë shkelje të rënda të së drejtës ndërkombëtare humanitare”, thuhet në vendim.

Kurse, për ankesën e përfaqësueses së palës së dëmtuar, Apeli gjeti se ankesa nuk është e lejuar dhe si të tillë e hudhi poshtë.

“…ankesa e palës së dëmtuar në rastin konkret është e palejuar, ngase vepra penale për të cilën është dënuar i akuzuari, nuk hyn në kategorinë e veprave penale për të cilat lejohet ankesa e të dëmtuarit, andaj edhe kolegji penal i kësaj gjykate këtë ankesë e hedhi poshtë si të palejuar”, vlerëson Apeli.

Kolegji konstaton se nuk është bërë balancim i plotë i rrethanave individuale të rëndësishme për individualizimin e dënimit, veçanërisht në raport me rolin konkret dhe shkallën individuale të përgjegjësisë së të pandehurit, andaj ndryshoi aktgjykimin vetëm në pjesën e dënimit.

Gjykata Themelore në Prishtinë më 17 qershor 2025 ka shpallur aktgjykim dënues ndaj Zhivojin Neshiqit, duke e dënuar me 15 vjet burgim për krime lufte ndaj popullatës civile në Kosovë, saktësisht për dhunim seksual ndaj një viktime.

Gjykimi ndaj të akuzuarit kishte filluar më 11 shtator 2024, e i cili gjykim nga shkalla e parë ishte mbajtur i mbyllur për publikun, me qëllim të ruajtjes së informacioneve dhe jetës personale të të dëmtuarës.

Ndryshe, në fillim të seancës fillestare më 11 shtator 2024, gjykatësja Violeta Namani-Hajra kishte bërë të ditur se sipas aktakuzës së Prokurorisë Speciale të Republikës së Kosovës (PSRK) të datës 26 gusht 2024, Zhivojin Nesiq akuzohet se në bashkëkryerje ka kryer veprën penale “Krime lufte kundër popullsisë civile” nga neni 142 lidhur me nenin 22 të Ligjit Penal Jogosllav, aktualisht e inkriminuar si “Krime kundër njerëzimit” nga neni 143 paragrafi 1, nën paragrafi 1.6 dhe 1.11 lidhur me nenin 31 të Kodit Penal të Republikës së Kosovës.

Komisioni Evropian ka konfirmuar zyrtarisht heqjen e të gjitha masave financiare ndaj Kosovës, duke hapur rrugën për rifillimin e plotë të mbështetjes financiare nga Bashkimi Evropian.

Konfirmimi u bë gjatë një debati në Parlamenti Evropian, ku përfaqësuesi i Komisionit Evropian, Jiri Plecity, deklaroi se tashmë janë liruar të gjitha fondet që më parë ishin të bllokuara.

Ai theksoi se ky vendim shënon një hap drejt riangazhimit të plotë të BE-së me institucionet e Kosovës, me synimin për ta rikthyer vendin në rrugën e integrimit evropian.

Ndërkohë, një zëdhënës i Komisioni Evropian bëri të ditur se, pas përfundimit të procedurave të brendshme, është miratuar lirimi i rreth 205 milionë eurove ndihmë financiare.

Këto fonde përfshijnë rreth 74 milionë euro për projekte në kuadër të programeve vjetore IPA 2021 dhe 2022, si dhe 131 milionë euro për projekte të financuara përmes Kornizës së Investimeve për Ballkanin Perëndimor (WBIF).

Sipas zyrtarëve evropianë, në vijim pritet një intensifikim i bashkëpunimit mes Bashkimi Evropian dhe institucioneve të Kosovës, ndërsa theksohet se Prishtina zyrtare duhet të përshpejtojë reformat dhe të përmbushë obligimet që lidhen me procesin e integrimit, përfshirë edhe dialogun e ndërmjetësuar nga BE-ja.

BE-ja ka bërë të ditur se do të vazhdojë të monitorojë nga afër zhvillimet në Kosovë dhe progresin në zbatimin e reformave. /Telegrafi

Kryeministri i Kosovës, Albin Kurti dë të mbledhë sot kabinetin qeveritar.

Në rend dite në mbledhjen e sotme janë gjithsej 17 pika.

Ndër të tjera në rend dite në mbledhjen e sotme të Qeverisë është shqyrtimi i Propozim-vendimit për bartjen e Zyrës për çështjet e kategorive të dala nga lufta e UÇK-së, e cila vepron në kuadër të ZKM-së, në Ministrinë për Punë, Familje dhe Vlerat e Luftës Çlirimtare, shqyrtimi i Propozim-vendimit për Themelimin dhe Funksionimin e Sistemit për Zbatimin e Mbështetjes së Bashkimit Evropian për Kosovën përmes Instrumentit për Reforma dhe Rritje Ekonomike për Ballkanin Perëndimor.

Në rend dite sot po ashtu është shqyrtimi i Propozim-vendimit për të kërkuar nga Presidentja e Republikës së Kosovës, dhënien e autorizimit për Ministren e Drejtësisë për nënshkrimin e Marrëveshjes për Ndihmë të Ndërsjellë Juridike në Çështjet Penale, me Qeverinë e Mbretërisë së Belgjikës.

Në rend dite sot është edhe shqyrtimi i Propozim-vendimit Preliminar për shpronësim për interes publik të pronave të paluajtshme të pronarëve të cilat preken nga realizimi i Projektit: Zgjerimi i Rrugës Nacionale M25, Prishtinë – Podujevë, shqyrtimi i Propozim-vendimit për mandatin e Komisionit për Verifikimin e Diplomave të lëshuara nga Universiteti i Mitrovicës së Veriut, e të tjera.

Sipas njoftimit të ZKM-së, mbledhja do të fillojë në ora 11:00. /Reporteri.net/

Deputeti i Partisë Demokratike të Kosovës, Përparim Gruda, ka deklaruar se pret që Gjykata Kushtetuese e Kosovës të shpallë dekretin e presidentes Vjosa Osmani për shpërndarjen e Kuvendit të kushtetueshëm dhe të përcaktojë që zgjedhjet e reja duhet të mbahen brenda 45 ditëve.

Gruda në Debat Plus ka shtuar se Kuvendi i Kosovës e ka konsumuar të drejtën për të zgjedhur presidentin dhe se çdo interpretim tjetër, si ai i afatit 60-ditor, nuk është i vlefshëm.

“Ne presim që dekreti i presidentes Osmani për shpërndarjen e Kuvendit të shpallet kushtetues, dhe Gjykata Kushtetuese të përcaktojë që duhet të shpallen zgjedhjet e reja dhe se duhet të mbahen brenda 45 ditëve. Kjo sepse kështu është e përcaktuar në Kushtetutën e Kosovës”, ka theksuar ai.

Ai ka theksuar se Kuvendi duhet të kishte zgjedhur presidentin 30 ditë para përfundimit të mandatit të presidentit në detyrë.

“Kuvendi i Kosovës e ka konsumuar drejtën e vet për me zgjedh një president. Dhe asnjë interpretim obstruktiv që i bëhet Kushtetutës sikur qenkan edhe 60 ditë tjera nuk mendoj që është i vlefshëm. Kuvendi i Kosovës është dashur me zgjedh presidentin 30 ditë para se t’i përfundojë presidentit ekzistues mandati”, ka deklaruar Gruda në Debat Plus.

Gruda ka theksuar se afati 30-ditor në Kushtetutë është për një qëllim tjetër, ndërsa afati 60-ditor shërben për një qëllim tjetër.