Blog

Sot në Kosovë pritet të mbajë mot i ngrohtë pranveror, me diell dhe vranësira të cilat do të vijnë duke u shtuar dhe ka potencial për disa riga ose ndonjë rrebesh të izoluar shiu.

Temperaturat do të jenë pranverore. Minimalja pritet të zbres deri në 5 gradë Celsius, kurse maksimalja deri në 24 gradë Celsius.

Në Shqipëri, Maqedoninë Veriore, Luginë të Preshevës dhe Mal të Zi pritet të mbajë mot me diell dhe vranësira të pakta lokale. Temperaturat do të jenë të larta pranverore. Në përgjithësi pritet ditë me diell, por vranësira mund të ketë përreth viseve malore më të theksuara në Mal të Zi.

Të mërkurën po ashtu pritet të mbajë mot kryesisht me diell, por temperaturat do të pësojnë ulje të ndjeshme për shkak të arritjes së një mase të ftohtë ajrore direkt nga verilindja e Kontinentit. Mëngjesi pritet të ketë vranësira më të theksuara me mundësi për ndonjë reshje të izoluar. Fatkeqësisht natën në të enjten në disa rajone mund të ketë ngrica, por të shpresojmë që dëmet të jenë të pakta.

Ndjeshëm më ftohtë do të jetë edhe të enjten dhe të premten kur pritet të kemi intervale kohore me diell, por edhe vranësira të shpeshta me mundësi për reshje lokale shiu, shqote e bore. Reshjet do të jenë të pakta dhe kryesisht afatshkurtra, kurse gjatë netëve në disa rajone fatkeqësisht mund të ketë ngrica nëse nata do të jetë e plotësisht e kthjellët./MeteoBallkan

Prokuroria Themelore në Prizren ka ngritur aktakuzë për posedim të 4.4 kilogramëve kokainë ndaj tre të pandehurve.

Një nga të akuzuarit tashmë e ka pranuar fajësinë në prokurori. I akuzuari Hëvzi Krabaj ua ka shprehur habinë të afërmve se si është kapur me drogë, meqë shitjen e narkotikëve, sipas tij, e bënte te pak njerëz

“M’kanë kapë tap-tap”. Kështu e ka përshkruar arrestimin e njëri prej të akuzuarve, e që e ka pranuar fajin për posedimin e 4.4 kilogramë kokainë.

Shtetasi Hëvzi Krabaj, i dënuar edhe më herët për posedim të narkotikëve, në bazë të aktakuzës së Prokurorisë Themelore në Prizren, është shprehur i befasuar se si është kapur me sasi të madhe droge. Ai dyshon se këtë ia bërë ndonjë mik i tij.

“Nga këto transkripta vërtetohet fakti se si i pandehuri Hëvzi Krabaj është marrë me shitblerjen e substancave narkotike, i cili gjatë bisedës me familjarët e tij, të njëjtëve i drejtohet duke i thënë ‘ama kurrë s’ma ka marrë menja, se naj herë ta nin zemra që bie, ama m’kanë kap tap-tap. Po dyshoj që dikush më ka qit (tradhtuar v.j.), ndonjë shok i imi’. ‘O tash u rujsha shumë se s’jam kanë t’u punu hiç, jam kanë t’u punu me 2 veta, 3 veta, o ti a din sa jam qetësu, po k’tu me ka qitë dikush’”, thuhet në aktakuzën e Prokurorisë Themelore në Prizren.
Për këtë rast jenë të dyshuar tre persona, por dy janë të arrestuar.

Policia e Kosovës që nga gushti i 2025-ës është në kërkim të shtetasit të Maqedonisë së Veriut dhe të Belgjikës, Fidan Husmani, që në bazë të aktakuzës është partner i të akuzuarës Elmedina Rexhepi.

Rexhepi, e cila nuk e ka pranuar fajësinë, ka thënë se nuk ka pasur dijeni për tregtim të narkotikëve.

“Ndër të tjera e pandehura deklaron se nuk ka qenë në dijeni se i pandehuri Fidan Husmani, natën kritike kur është takuar me të pandehurin Hëvzi Krabaj, të ketë poseduar substancë narkotike. E pandehura vërteton faktin se me të pandehurin Fidan Husmani për herë të fundit janë takuar ditën kur ishin nisur në Shkup”, thuhet në aktakuzë.

Në bazë të aktakuzës, Fidan Husmaini dhe Elmedina Rexhepi kanë hyrë në garazhin e një objekti banesor në Prizren, ku u takuan me Hëvzi Krabajn dhe i këmbyen tri ‘tulla’ kokainë me peshë 3.3 kilogramë.

E në banesën e Krabajt në Prizren u gjetën rreth 4 kg e 437 gramë kokainë të cilat sipas Prokurorisë ishin të destinuara për shitje.

Krabaj e Rexhepi pritet të dalin së shpejti para gjykatës për seancën ku do të deklarohen mbi fajësinë, meqë ata janë në paraburgim. E të dyshuarit Fidan Husmani prokuroria nuk ka mundur t’i marrë as deklaratë në procedurë paraprake meqë është në arrati.

Në bazë të raportit të punës së Policisë për vitin 2025, në Kosovë janë zënë 24.4 kilogram kokainë, që vjen e dyta si sasi konfiskuar. Kjo lloj substance tejkalohet vetëm nga marihuana me 1 ton e 315 kilogramë të sekuestruar.

Partia Demokratike e Kosovës u ka dalë në mbështetje studentëve shqiptarë në Maqedoninë e Veriut, të cilët kanë protestuar sot për të drejtën e përdorimit të gjuhës shqipe në proceset arsimore dhe profesionale, përkatësisht për provimin e jurisprudencës.

Në reagimin e PDK’së thuhet se cenimi i kësaj të drejte përbën shkelje të parimeve të barazisë, si dhe është goditje ndaj dinjitetit njerëzor dhe identitetit kombëtar shqiptar.

“E drejta për arsimim dhe vlerësim në gjuhën amtare është e garantuar me kornizën ligjore dhe kushtetuese të Maqedonisë së Veriut, si dhe me standardet ndërkombëtare për të drejtat e njeriut. Cenimi i kësaj të drejte përbën shkelje të parimeve të barazisë, si dhe është goditje ndaj dinjitetit njerëzor dhe identitetit kombëtar shqiptar. Partia Demokratike e Kosovës u bën thirrje institucioneve përgjegjëse atje që t’i trajtojnë me seriozitet kërkesat e studentëve shqiptarë dhe të ndërmarrin hapat e nevojshëm për zbatimin e plotë të të drejtave të garantuara me ligj. PDK mbetet e përkushtuar në mbrojtjen dhe avancimin e të drejtave të shqiptarëve kudo që ata jetojnë”, thuhet në reagim.

Sëmundjet kronike jo-ngjitëse sikurse hipertensioni dhe diabeti, po prekin gjithnjë më shumë njerëz në Kosovë.

Mbi 21 mijë raste të hipertensionit arterial janë shënuar në vitin 2024, që përbën një rritje prej 4.7% krahasuar me vitin paraprak.

Këto shifra, që dolën pas një analize të Institutit të Shëndetit Publik, vënë në pah se sëmundjet kronike jo-ngjitëse përbëjnë shkakun kryesor të sëmundshmërisë dhe vdekshmërisë në vend. E hipertensioni arterial mbetet diagnoza më e shpeshtë.

“Nuk ka ndonjë sëmundje të njohur në botë që ka medikamente më shumë se sa Hipertensioni atreial, prandaj është shumë keq të neglizhohet një sëmundje e vrasëse kur trajtimi është në dorën e pacientit, vetë trajtimi bëhet prej ndryshimit të stilit të jetës siç është zvogëlimi i përdorimit të kripës së kuzhinës, ndërprerja e duhanpirjës, rritja e aktivitetit fizik, zvogëlimi i sasisë së ushqimit që përmban kalori të tepruara dhe krip, dhe në qoftë se këto nuk janë të mjaftueshme dhe tensioni arterial prapë është mbi vlerat referente të rekomanduara pastaj janë barnat të cilat janë disa grupe..”, ka thënë Artan Ahmeti, internist – kardiolog.

Instituti Kombëtar i Shëndetit Publik njofton se ka rritje të rasteve të diabetit tip 2.

Problem i shëndetit publik edhe më tej mbesin sëmundjet malinje. Të dhënat e Institutit nënvizojnë se kanceri i gjirit mbetet ndër më të shpeshtit te femrat, ndërsa te meshkujt dominojnë kanceri i lëkurës dhe ai i zorrës së trashë.

Ndërkohë nga Klinika e Onkologjisë thonë se trendi i paraqitjes së sëmundjeve malinjë në Kosovë mbetet relativisht i qëndrueshëm gjatë viteve të fundit. /RTK

Kompania Rajonale e Ujësjellësit “Prishtina” sh.a, ka njoftuar se lagjja “Dardania” e Prishtinës do të mbetet sonte pa ujë.

Kjo për shkak të një rrjedhje të madhe dhe pamundësisë për intervenim.

“Për shkak të një rrjedhjeje të madhe dhe pamundësisë për intervenim sonte, furnizimi me ujë do të ndërpritet deri nesër kur do të bëhet ndërhyrja. Pa ujë do të mbetet zona e Dardanisë”, thuhet në njoftim.

Shqipëria ka humbur 40 për qind të popullsisë në tre dekada e gjysmë tranzicioni.

Raporti i Tranzicionit 2025–2026 i Bankës Europiane për Rindërtim dhe Zhvillim (BERZH), “Një botë e vjetër, por më e guximshme”, e vë fokusin te emigracioni, i cili është bërë mjaft shqetësues dhe nuk duket se po ndalet.

“Në shumicën e ekonomive postkomuniste, fertiliteti i ulët dhe emigracioni neto i lartë kanë qenë shkaqet kryesore të rënies së popullsisë. Në rastin e Shqipërisë, e cila përfitoi nga rritja e peshës së popullsisë në moshë pune deri në vitin 2023, kostoja e plakjes vlerësohet në 0.28 pikë përqindje, çka përkthehet në një rënie prej 0.53 pikë përqindje krahasuar me dividendin mesatar demografik të përfituar gjatë periudhës 2000–2023.”

Raporti nxjerr në pah se ky boshllëk i madh demografik po përkthehet në një frenim të ndjeshëm ekonomik për Shqipërinë.

“Për periudhën 2024–2050, ndikimi pritet të thellohet në –0.3 deri –0.4 pikë përqindje në vit, duke e bërë Shqipërinë një nga ekonomitë më të ekspozuara në gjithë rajonin e BERZH. Edhe në horizontin 2050–2100, sinjali mbetet negativ, çka tregon se plakja e popullsisë dhe pakësimi i forcës së punës do të vijojnë të shoqërojnë ekonominë edhe në dekadat e ardhshme.”

Mungesa e fuqisë punëtore, rritja e numrit të të moshuarve dhe dobësimi i bazës së kontribuuesve në skemat sociale po e vendosin ekonominë nën presion të vazhdueshëm.

“Në mungesë të rritjes së produktivitetit, investimeve teknologjike, rritjes së kapitalit njerëzor dhe përmirësimit të klimës së biznesit, emigracioni masiv do të vazhdojë të frenojë rritjen ekonomike për të paktën edhe tre dekada.”

Përllogaritjet e Bankës Europiane për Rindërtim dhe Zhvillim në raportin e tranzicionit tregojnë se rreth 23 për qind e të arsimuarve nga vendi tashmë kanë emigruar.

Organizata e Veteranëve të Luftës së Ushtrisë Çlirimtare të Kosovës (OVL UÇK) ka shprehur mbështetje të plotë për studentët shqiptarë që po protestojnë në Maqedoninë e Veriut, duke e cilësuar çështjen e përdorimit të gjuhës amtare si një të drejtë të panegociueshme.

Në reagimin e saj, OVL UÇK thekson se moszbatimi i garancive ligjore për përdorimin e gjuhës përbën jo vetëm shkelje procedurale, por edhe cenim të drejtpërdrejtë të dinjitetit njerëzor dhe stabilitetit shoqëror në vend.

Në deklaratë gjithashtu vihet në dukje se shqiptarët historikisht nuk kanë cenuar gjuhët e komuniteteve të tjera, por përkundrazi kërkojnë trajtim të barabartë për gjuhën e tyre.

Komunikata e plotë:

OVL UÇK qëndron vendosmërisht pas studentëve shqiptarë që po protestojnë në Maqedoninë e Veriut, për mbrojtjen e një të drejte të panegociueshme. Përdorimi i ligjshëm i gjuhës amtare nuk i nënshtrohet kurrë përshtatshmërisë së qeverive. Kur një shtet refuzon të zbatojë garancitë ligjore të vendosura, dështimi shkon përtej procedurës. Një mosveprim i tillë sulmon drejtpërdrejt dinjitetin njerëzor, bashkë me paqen e brishtë që ai shtet pretendon se e mbron.

Historikisht, shqiptarët nuk e kanë shtypur kurrë gjuhën e popullsive fqinje. Nuk kërkojmë të fshijmë identitetin e asnjë kombi, as të poshtërojmë bashkësitë që jetojnë pranë nesh. Megjithatë, gjuha jonë vazhdon të përballet me kufizime dhe status dytësor, në territore që janë historikisht shqiptare.

Dhënia e provimit të jurisprudencës në gjuhën amtare përfaqëson detyrimin minimal të autoriteteve maqedonase dhe të aleatëve të tyre politikë shqiptarë. Këta të rinj kanë të drejtë që rezistojnë dhe meritojnë mbështetje të pakushtëzuar, jo zëra kujdesi e maturie. Dinjiteti shqiptar as nuk do të administrohet e as nuk do të zhduket.

Deputeti i Partisë Demokratike të Kosovës, Artan Behrami sonte në emisionin “DPT te Fidani” ka folur për Marrëveshjen e Ohrit, duke thënë se kryeministri Albin Kurti tenton ta zbatoi atë përmes ndryshimeve ligjore brenda vendit.

Ai u shpreh se Kurti ka ndryshuar strategjinë e negociatave, sepse sipas tij, ai negocion përmes kanaleve të fshehta.

“Trumpi vepron më ndryshe se Bashkimi Evropian. Është e vërtetë që Bashkimi Evropian e ka toleruar z.Kurti, i cili e ka ndryshuar strategjinë e negociatave. Z.Kurti nuk negocion më me fotografi, me shtrëngim duarsh, me buzëqeshje, ky negocion përmes kanaleve të cilat janë kanale të fshehta, ku një zyrtar i tij udhëton në Bruksel dhe krejt implementimin e Marrëveshjes së Ohrit ky është duke e bërë përmes ndryshimit të Ligjit dhe të Rregullores. Ky e din që me Trumpin nuk ka strategji djallëzore të impementimit, ajo duket me u implementu menjëherë”, tha ai.