Blog

Rritja e çmimeve të derivateve po vazhdon të rëndojë xhepat e qytetarëve në Kosovë, duke shtuar edhe më tej barrën e një kostoje jetese tashmë të lartë, raporton Ekonomia Online.

Me naftën që të premten arriti në 1.79 euro për litër, benzina në 1.52 euro dhe gazi në 0.62 euro, qytetarët shprehen të shqetësuar për përballueshmërinë e këtyre çmimeve.

Përveç ndikimit të drejtpërdrejtë në buxhetet familjare, ata paralajmërojnë se shtrenjtimi i karburanteve mund të reflektohet edhe në çmimet e produkteve dhe shërbimeve të tjera, për shkak të rritjes së kostove të transportit.

Brahim Vrellaku, mërgimtar, tregoi se krahasuar me pagat, çmimet në Kosovë janë shumë të larta, duke theksuar krizën institucionale.

“Unë rrugës kur kam ardhur nga Italia për me ardhë në Kosovë, në Kroaci e ke më së pakti 50 përqind naftën më lirë se në Kosovë, Shqipëria e kishte pasur më lartë. Në Kosovë tani është çmimi katastrofë me e krahasuar me pagat të cilat merren në Kosovë, çmimi është tepër i lartë. Unë si e shoh, derisa nuk ka shtet, derisa s’ka Kuvend, derisa s’ka Qeveri, këtu njerëzit jo vetëm naftarët, por edhe të gjithë nëpër dogana për mendimin tim as nuk e dinë kush sa hynë, as çka del, as asgjë. Për mendimin tim është katastrofë gjendja në Kosovë. Nuk janë aspak të përballueshme”, tha ai për Ekonomia Online.

Edhe qytetari Rrustem Avdiu, poashtu i konsideron këto çmime të pakuptueshme dhe aspak të arsyeshme.

“Keq boll, kjo është e pakuptueshme, por çfarë të bësh. Është katastrofë. Qeveria jonë kështu po bën. Populli po e voton këtë qeveri, a kjo e ka qëllimin ta shkatërrojë Kosovën, tjetër jo, përparim s’ka prej saj, vetëm shkatërrim. S’janë të arsyeshme hiç, as të naftës, as çmimet ditore, për çdo ditë janë duke shkuar lartë këto, nuk e di sesi populli po mundet të mbijetojë, shumë problem i madh është”, theksoi ai për Ekonomia Online.

Kurse, qytetari Muharrem Faiku, u shpreh se rritja e çmimeve të naftës ndikon edhe në rritjen e çmimeve të produkteve tjera.

“Sigurisht, shumë shtrenjtë janë, kuptohet ajo, është e papërballueshme. Nuk di çfarë të them, mirëpo çmimi i naftës është shumë i lartë, sigurisht që ndikon, kur rriten çmimet, kjo i rrit edhe çmimet tjera pastaj, sepse kostot e transportit, e këto të gjitha edhe është shumë. Ashtu ashtu unë nuk e përdori shumë (veturën), më shumë eci me biçikletë, kjo ende e zvogëlon mundësinë me e përdorë”, u shpreh ai.

Zëvendësdrejtori i Policisë së Kosovës për rajonin e veriut, Veton Elshani, ka deklaruar se situata e sigurisë në veri të vendit është e qetë dhe stabile, por vazhdon të jetë delikate, kryesisht për shkak të veprimeve apo vendimeve të mundshme politike.

Ai në një intervistë për Ekonomia Online ka thënë se Policia e Kosovës është e pranishme në të gjithë veriun e vendit dhe se nuk ka ndonjë problem të theksuar sa i përket sigurisë.

“Situata e sigurisë në veri të vendit është e qetë, është stabile dhe vazhdon të jetë delikate. Kur them delikate, është më shumë për shkak të veprimeve të mundshme apo vendimeve të mundshme politike. Sepse përndryshe Policia e Kosovës është në krejt veriun e vendit dhe nuk ka ndonjë problem për me theksuar. Ajo çka duhet me thënë është që në rast se do të ndodhë ndonjë incident, Policia i ka kapacitetet e veta për me u marrë me atë problem”, ka thënë Elshani.

Sipas tij, aktualisht Policia e Kosovës ka staf të mjaftueshëm për të menaxhuar situatën në veri.

Elshani ka theksuar edhe rritjen e numrit të pjesëtarëve të komunitetit serb në Policinë e Kosovës.

“Ne jemi, qëndrojmë shumë mirë me staf policor, me personel. Kemi pasur një mungesë, një mangësi shumë të madhe të personelit policor të përkatësisë etnike serbe, të kosovarëve të përkatësisë etnike serbe. Tash i kemi 151 policë të cilët janë të përkatësisë etnike serbe. Rreth 450 policë në total mjaftojnë për rajonin e veriut sepse nuk ka shumë krim atje, më shumë ka të bëjë me politikë sesa me krim. Por Policia është duke menaxhuar komplet situatën në veri dhe ne jemi të gatshëm me reaguar në rast se diçka ndodh”, është shprehur ai.

I pyetur për dritën e gjelbër që Bashkimi Evropian i dha hapjes së urës së Ibrit, Elshani tha se urat lidhin njerëzit dhe nuk i ndajnë.

“Ne i kemi disa ura të tjera derisa vjen kjo ura kryesore këtu dhe nuk ka absolutisht kurrfarë problemi për kalimin e njerëzve edhe të mallrave edhe të veturave. Urat lidhin njerëzit, nuk ndajnë. Unë nuk dua me thënë diçka për urën specifike, për urën kryesore, por kurrfarë rreziku nuk ka në veri të vendit sepse Policia është aty në secilin vend edhe ne kemi shumë reagime që i bëjmë edhe ndaj njerëzve të cilët janë shtetas kosovarë të përkatësisë etnike shqiptare ose serbe apo të tjerë. Kështu që ne e kryejmë punën tonë, e ruajmë rendin dhe qetësinë publike. Më shumë ka retorikë politike sa i përket kësaj pune sesa ajo çka ka të bëjë me siguri, me çështje të sigurisë”, ka deklaruar Elshani, për Ekonomia Online.

Ai ka folur edhe për kërcënimet ndaj Policisë së Kosovës në veri, duke thënë se pjesëtarët e Policisë janë mësuar me situata të tilla gjatë viteve të fundit.

“Ne jemi që katër vjet aty, jemi mësuar me ato kërcënime: ‘ju vrasim sot, ju vrasim nesër’. Hala s’na kanë vrarë. Kurdoherë që vjen puna aty, merresh me atë lloj situate. Policia e ka punën e vet, e kryejmë punën tonë edhe nuk ka nevojë me u brengosë as qytetarët, sepse në rast se ka nevojë me reaguar, ne jemi aty”, ka thënë zëvendësdrejtori i Policisë së Kosovës për rajonin e veriut, Veton Elshani.

Flet Prof. Dr. Adrian Civici

Ndërsa universitetet shqiptare kanë rifunksionalizuar vitet e fundit ciklet doktorale me standarde më të forta, lidhja mes kërkimit shkencor dhe nevojave konkrete të tregut mbetet ende e brishtë.

Për Prof. Dr. Adrian Civici, problemi nuk është numri i doktoraturave, por cilësia dhe aftësia e tyre për t’u kthyer në kapital real zhvillimi për vendin.

Sipas tij, “mentaliteti” që e sheh doktoraturën si luks akademik ka të bëjë me mungesën e bashkëpunimit universitet – biznes dhe sektorët e rinj që mund të krijojnë një treg më të mirëpaguar për kapitalin njerëzor të kualifikuar.

Shqipëria po prodhon më shumë doktoratura sesa treg që mund t’i absorbojë ato. A kemi krijuar një “inflacion diplomash”?

Në lidhje me doktoraturat nuk mendoj se kemi krijuar një inflacion diplomash, qoftë edhe për faktin se për një kohë të gjatë, procesi i doktoraturave ka qenë i mbyllur. Ka vetëm disa vite që është bërë funksional me rregulla e rregullore më strikte për të gjithë procesin.

Nuk mendoj, se kur është fjala për doktoraturat, ato duhet të shihen thjesht si çështje numrash ose sasi. Thelbi i problemit është cilësia dhe kontributi i tyre real në problematikën e zhvillimit ekonomiko-social të vendit.

Sa e lidhur është sot doktoratura në Shqipëri me nevojat reale të tregut dhe sa mbetet ende një titull formal akademik?

Ky është problemi më thelbësor kur flitet për doktoraturat; lidhja e tyre me nevojat reale të tregut të punës dhe të nevojave për zgjidhje shkencore sa më cilësore.

Faktikisht ka një ndërgjegjësim më të madh të universiteteve për ta respektuar sa më cilësisht një sfidë të tillë.

Po synohet që kërkimet doktorale të integrohen sa më mirë në projekte e akse kërkimore eficiente në funksion të nevojave reale të ekonomisë dhe kërkimit shkencor.

Të mos jenë thjesht dhe vetëm kërkime individuale apo kërkime për të marrë një gradë shkencore rutinë. Por, duhet ta pranojmë se kjo është ende një rrugë e gjatë që kërkon progres të vazhdueshëm dhe mbi të gjitha, koncepte të qarta metodologjike e ndërveprim me strategjitë kombëtare të zhvillimit ekonomiko-social të vendit.

Mbi të gjitha, kërkohet dhe bashkëveprim e koordinim më i mirë me universitetet apo qendrat kërkimore europiane e ndërkombëtare për të shkuar natyrshëm drejt kërkimeve doktorale ndërdisiplinore e bashkëkohore.

Pse sektori privat shqiptar rrallë e përkthen një PhD në një pagë më të lartë apo rol më të avancuar?

Edhe sektori publik dhe ai privat e nxisin shumë pak ose aspak vlerësimin e doktoraturave. Ekziston një mentalitet i gabuar që doktoratura është më shumë një “luks shkencor” personal pa efekte të dukshme në cilësinë e kapitalit njerëzor.

Ky mentalitet është shumë i përhapur, sidomos në sektorin privat që më shumë priret ndaj kompetencave që zotërojnë punonjësit se sa nga gradat apo titujt akademikë.

Në një ekonomi si Shqipëria, a është doktoratura investim racional financiar, apo më shumë bast personal dhe akademik?

Besoj se mbizotërojnë më shumë rastet kur doktoratura shihet si bast personal e akademik. Këtë e provon dhe fakti se pothuajse 100% e doktorantëve janë pjesë e mjediseve universitare e akademike. Pra, një element i rëndësishëm i karrierës dhe detyrimeve akademike.

Çfarë i mungon sot lidhjes universitet – biznes në Shqipëri që kërkimi shkencor të kthehet në vlerë ekonomike reale?

Kjo është një lidhje shumë e gjerë dhe strukturore. Problemi kryesor qëndron në dobësitë që ne kemi aktualisht në bashkëpunimin dhe bashkëveprimin ndërmjet universiteteve dhe biznesit.

E thënë ndryshe, kërkimet doktorale nuk janë të integruara apo pjesë e sfidave të biznesit, tregut apo qeverisjes, qoftë kjo qendrore apo lokale.

A mendoni se Shqipëria ka hyrë në një fazë ku diploma nuk garanton më automatikisht status ekonomik apo social?

Po. Tashmë kemi hyrë plotësisht në këtë fazë. Ky është një trend i përgjithshëm në shumë vende të botës, sidomos ato të zhvilluara.

Diploma universitare apo doktorale tregon shumë për cilësinë e burimeve njerëzore, por nuk po konsiderohen më si merita e vetme apo kryesore për statusin ekonomik apo shoqëror. Në plan të parë kanë dalë zotërimi i kompetencave specifike sipas kërkesave të sektorëve, bizneseve apo vetë tregut të punës.

A mund të krijojnë sektorë si Inteligjenca Artificiale, energjia e pastër apo agro-tech një treg të ri që paguan më mirë kapitalin njerëzor të kualifikuar?

Pa tjetër. Këta sektorë janë aktualisht në një trend zgjerimi të shpejtë. Në njëfarë mënyre, janë sfidat kryesore të zhvillimit në dekadën e ardhshme. Janë sektorët ku po investohet më shumë kapital e burime njerëzore të kualifikuara me kërkesat e kohës.

Statistikat tregojnë, se aktualisht, këta janë dhe sektorët ku kapitali njerëzor i kualifikuar paguhet më mirë, vlerësohet më shumë dhe ku konkurrenca është më e madhe. Kjo situatë është e dukshme dhe në Shqipëri.

Ju keni folur shpesh për nevojën e transformimit të modelit ekonomik shqiptar. A mund të ndërtohet një ekonomi inovacioni pa investim serioz në kërkim dhe doktoratura cilësore?

Sfida më e madhe e modelit ekonomik shqiptar është zhvillimi i sektorëve me vlerë të shtuar të lartë, është zhvillimi i degëve e sektorëve që sigurojnë atë që quhet Rritje Ekonomike Cilësore, atë që quhet Punësim cilësor me standarde të larta që paguhet më mirë, por dhe kontribuon më shumë.

Pa dyshim, që në këtë këndvështrim, vëmendja dhe shtimi i financimeve drejt inovacionit, teknologjive të reja, Inteligjencës Artificiale, Big data, energjive të rinovueshme, teknologjisë blockchain, smart city, etj., përbën thelbin e zhvillimit sot dhe në të ardhmen e afërt.

A po e përdorin universitetet doktoraturën edhe si burim të ardhurash, në një kohë kur infrastruktura kërkimore mbetet e dobët?

Nuk besoj se universitetet po e përdorin doktoraturën si burim të ardhurash. E tillë do të ishte nëse doktoraturat do të orientohen shumë më mirë se deri më sot, drejt kërkimeve aplikative në funksion të kërkesave të biznesit, drejt krijimit të patentave, apo elemente të tjera të kësaj natyre, të cilat mund të ofrohen në treg dhe të garantojnë të ardhura nga këto lloj doktoraturash.

Deri tani, nuk mund të pohohet që kjo gjë po ndodh, qoftë edhe për shkak të infrastrukturës së dobët kërkimore./Monitor

Ministri në detyrë i Mbrojtjes, Ejup Maqedonci thotë se optimizimi gradual i pranisë së KFOR-it mbi Urën e Ibrit është reflektim i situatës së sigurisë në Kosovë.

Përmes një postimi në Facebook, Maqedonci tha se Kosova ka ndërtuar institucione profesionale dhe të besueshme të sigurisë.

Ai theksoi se bashkëpunimi dhe koordinimi me KFOR-in dhe partnerët ndërkombëtar vazhdon të jetë i ngushtë, transmeton Klankosova.tv.

“Optimizimi gradual i pranisë së KFOR-it, përfshirë përshtatjen e pranisë në urën mbi Ibër, është para së gjithash reflektim i përmirësimit të situatës së sigurisë në Kosovë dhe i rritjes së kapaciteteve të institucioneve tona të sigurisë. Ky është një proces i bazuar në vlerësime profesionale të situatës në terren dhe nuk paraqet zvogëlim të sigurisë për asnjë qytetar apo komunitet në Republikën e Kosovës.Kosova ka ndërtuar ndër vite institucione profesionale dhe të besueshme të sigurisë, ndërsa bashkëpunimi dhe koordinimi me KFOR-in dhe partnerët ndërkombëtarë vazhdon të jetë i ngushtë. Siguria e të gjithë qytetarëve të Kosovës, pa dallim etnie, është dhe mbetet përgjegjësi dhe prioritet i institucioneve tona”, shkroi Maqedonci në Facebook.

Ndër të tjera, Maqedoni tha se përpjekjet e lidershipit të Serbisë për ta paraqitur optimizimin e pranisë së KFOR-it si kërcënim për komunitetin serb apo si dëshmi të një situate të paqëndrueshme në Kosovë nuk përputhen me realitetin në terren

“Përkundrazi, ato synojnë të krijojnë perceptimin e një krize atje ku vlerësimet profesionale të sigurisë tregojnë progres”.

Një sulmues i armatosur me shpatë ka hyrë në shkollën e mesme Brinellskolan në Fagersta të Suedisë, duke plagosur disa persona. I dyshuari është ndaluar nga policia, ndërsa sipas mediave lokale, ai është qëlluar në këmbë nga efektivët.

Bashkia e Fagerstas konfirmoi ngjarjen dhe u bëri thirrje qytetarëve të respektojnë perimetrin e sigurisë dhe udhëzimet e policisë.

“Një sulmues i armatosur me shpatë ka hyrë në Brinellskolan dhe ka plagosur disa persona”, thuhet në njoftimin e autoriteteve lokale.

Sipas raportimeve të mediave suedeze, i dyshuari dyshohet se ishte i armatosur me një hanxhar. Numri i saktë i personave të plagosur ende nuk është bërë i ditur.

Policia vijon kontrollet në ambientet e shkollës, ndërsa disa institucione arsimore në afërsi janë vendosur në bllokim si masë paraprake.

Sipas transmetuesit publik suedez SVT, në zonën përreth shkollës është mobilizuar një prani e madhe e forcave të emergjencës, përfshirë ambulanca, automjete policie dhe një helikopter.

Ngjarja ka ndodhur në Fagersta, qytet me rreth 12 mijë banorë në Suedinë qendrore.

Divorcet në Kosovë kanë shënuar një rritje të konsiderueshme në muajin qershor 2026, duke arritur në 147 raste, krahasuar me 117 raste të regjistruara në muajin maj.

Kjo nënkupton se vetëm brenda një muaji janë regjistruar 30 divorce më shumë, ndërsa në përqindje rritja ka qenë 25.6 për qind.

Të dhënat administrative të publikuara për muajin qershor tregojnë kështu një rritje të dukshme të numrit të çifteve që kanë përfunduar martesën përmes procedurës së shkurorëzimit.

Në maj janë regjistruar 117 shkurorëzime, ndërsa në qershor numri ka arritur në 147.

Rritja e divorceve është regjistruar në një muaj kur në Kosovë është rritur edhe numri i martesave.

Gjatë qershorit 2026 janë regjistruar gjithsej 1 mijë e 279 kurorëzime, brenda dhe jashtë Kosovës. Krahasuar me majin, kur numri i kurorëzimeve ishte rreth 1 mijë e 37, numri i martesave është rritur me 23.3 për qind.

Megjithatë, rritja e shkurorëzimeve në përqindje ka qenë pak më e lartë se rritja e kurorëzimeve. Shkurorëzimet u rritën me 25.6 për qind, ndërsa kurorëzimet me 23.3 për qind.

“Në muajin qershor 2026 janë regjistruar gjithsej 1 279 kurorëzime (brenda dhe jashtë Kosovës). Krahasuar me muajin maj 2026, në muajin qershor 2026 numri i kurorëzimeve u rrit me 23,3%. Ndërsa, gjatë muajit qershor 2026, janë regjistruar 147 raste të shkurorëzimeve në Kosovë Krahasuar me muajin maj 2026, numri i shkurorëzimeve u rrit me 25,6%”.

Ndërsa, gjatë muajit qershor 2026, janë regjistruar 147 raste të shkurorëzimeve në Kosovë Krahasuar me muajin maj 2026, numri i shkurorëzimeve u rrit me 25,6%.

Në qershor, për çdo 100 kurorëzime të regjistruara janë evidentuar rreth 11.5 raste shkurorëzimi. Ky raport është vetëm një krahasim i numrit të regjistrimeve gjatë të njëjtit muaj dhe nuk do të thotë se 11.5 për qind e martesave të lidhura në qershor janë prishur, pasi shkurorëzimi mund t’u referohet martesave të lidhura në vite të ndryshme.

Ndryshimet demografike gjatë qershorit nuk janë kufizuar vetëm te martesat dhe shkurorëzimet.

Sipas të dhënave të publikuara, gjatë qershorit 2026 janë regjistruar 2 mijë e 674 lindje, brenda dhe jashtë Kosovës. Prej tyre, 1 mijë e 399 kanë qenë meshkuj dhe 1 mijë e 275 femra.

Krahasuar me majin, numri i lindjeve është rritur për 14.9 për qind.

Në të njëjtën kohë, janë regjistruar edhe 920 raste të vdekjeve, prej të cilave 494 meshkuj dhe 426 femra. Edhe te vdekjet është shënuar rritje krahasuar me muajin paraprak, prej 5.6 për qind.

Të dhënat për lindjet, vdekjet, kurorëzimet dhe shkurorëzimet publikohen në bazë të të dhënave administrative./Monitor

Dy vatra zjarri në përmasa të mëdha janë aktivizuar në zonat e Tenës dhe Kodër Rrëshenit, në bashkinë Mirditë.

Flakët po përhapen me shpejtësi, të favorizuara nga bimësia e dendur dhe temperaturat e larta, duke iu afruar banesave në zonë.

Top Channel bën me dije se deri tani janë evakuuar 4 familje, ndërsa situata mbetet e vështirë dhe pritet që, në varësi të përhapjes së flakëve, të ketë edhe evakuime të tjera.

Strukturat e emergjencës dhe shërbimet zjarrfikëse ndodhen në terren dhe po punojnë për vënien nën kontroll të vatrave të zjarrit.