ATV

Blog

  • Valë e të nxehtit në Greqi, temperaturat arrijnë në 42 gradë

    Valë e të nxehtit në Greqi, temperaturat arrijnë në 42 gradë

    Shërbimi Meteorologjik i Greqisë ka paralajmëruar për temperatura deri në 42 gradë Celsius gjatë fundjavës dhe ditëve në vijim.

    Sipas Observatorit Kombëtar të Athinës, në shumë rajone temperaturat do të arrijnë nga 38 deri në 40 gradë, ndërsa lokalisht mund të afrohen në 42 gradë Celsius, shkruan Index.

    Meteorologët thonë se masat ajrore mbi Greqi do të jenë 6 deri në 8 gradë më të ngrohta se vlerat normale për këtë periudhë të vitit.

    Vala e të nxehtit pritet të zgjasë në shumë zona deri në mesin e javës së ardhshme.

  • George Russell fiton Garën Sprint në Holandë, triumf i Mercedes në Zandvoort

    George Russell fiton Garën Sprint në Holandë, triumf i Mercedes në Zandvoort

    George Russell e bën të tijën Garën Sprint të Çmimit të Madh të Holandës në Botërorin e Formula 1. Piloti anglez i Mercedes triumfoi në pistën e Zandvoort, në një garë që u zhvillua pa reshje shiu, me shiu që nisi vetëm pasi Russell kishte kaluar vijën e finishit.

    Starti i Garës Sprint ishte perfekt për George Russell, i cili një ditë më parë kishte fituar pole positionin. Piloti i Mercedesit arriti ta ruajë kryesimin nga fillimi deri në fund, duke regjistruar suksesin e tij të tretë në Garat Sprint.

    Në podium u ngjitën edhe pilotët e Ferrarit dhe McLaren, Charles Leclerc dhe Lando Norris, të cilët u renditën respektivisht në vendin e dytë dhe të tretë.

    Lideri i kampionatit, Andrea Kimi Antonelli, e mbylli Garën Sprint në vendin e katërt, duke lënë pas pilotin tjetër të McLaren, Oscar Piastri.

    Klasifikimin e tetë pilotëve më të mirë të Garës Sprint të Holandës, duke nisur nga vendi i gjashtë, e plotësojnë Max Verstappen, Lewis Hamilton dhe Pierre Gasly.

  • PSG nuk planifikon largime, Zabarnyi dhe Chevalier pritet të qëndrojnë në skuadër

    PSG nuk planifikon largime, Zabarnyi dhe Chevalier pritet të qëndrojnë në skuadër

    Paris Saint-Germain nuk ka ndërmend të largojë lojtarët që janë pjesë e organikës së skuadrës, edhe në rastet kur ata nuk kanë një rol titullari.

    Sipas gazetarit Bruno Solomon, Illia Zabarnyi dhe Lucas Chevalier pritet të qëndrojnë te PSG edhe këtë sezon, pavarësisht pasigurisë për pozicionet e tyre në formacionin e Luis Enriques.

    E ardhmja e Chevalier ka qenë në qendër të spekulimeve që kur ai humbi vendin e titullarit ndaj Matvey Safonov, i cili është shndërruar në zgjedhjen e parë të trajnerit spanjoll pas paraqitjeve të tij të mira.

    Megjithatë, pas dështimit të marrëveshjes së PSG-së për Zion Suzuki, Chevalier mund ta forcojë pozicionin e tij për të mbetur zëvendësuesi i Safonov dhe të vazhdojë të luftojë për një vend në formacionin titullar.

    Nga ana tjetër, Zabarnyi nuk ka arritur ende të fitojë një vend të padiskutueshëm në qendër të mbrojtjes, për shkak të konkurrencës nga Marquinhos dhe Willian Pacho, dy lojtarë që kanë qenë shumë të rëndësishëm në sukseset e PSG-së gjatë dy sezoneve të fundit.

    Megjithatë, drejtuesit e klubit parisien vazhdojnë ta vlerësojnë potencialin e qendërmbrojtësit ukrainas, ndërsa në ndeshjet e fundit është vërejtur edhe një përmirësim i dukshëm në paraqitjet e tij.

    Kështu, pavarësisht roleve të tyre jo të padiskutueshme, Zabarnyi dhe Chevalier nuk pritet të largohen nga PSG gjatë kësaj vere.

  • MLS gjobit Messin dhe Fray pas përleshjeve në ndeshjen ndaj Philadelphia Union

    MLS gjobit Messin dhe Fray pas përleshjeve në ndeshjen ndaj Philadelphia Union

    Major League Soccer ka gjobitur sulmuesin e Inter Miamit, Lionel Messi, dhe mbrojtësin Ian Fray, me shuma të pazbuluara, pas dy incidenteve të ndara fizike në zonën e kokës dhe qafës gjatë barazimit 2-2 ndaj Philadelphia Union.

    Messi u ndëshkua për goditjen me shuplakë në pjesën e pasme të qafës së lojtarit të Philadelphia Union, Quinn Sullivan, teksa të dy po shkëmbenin fjalë në mesin e fushës. Incidenti ndodhi në minutat e fundit të takimit, ndërsa liga e konsideroi shkelje të rregullores që ndalon kontaktin me fytyrën, kokën ose qafën e kundërshtarit.

    Ndeshja kishte një rëndësi të veçantë për Messin, i cili shënoi golin e tij të parë pas vdekjes së babait, Jorge Messi, ndërsa regjistroi edhe një asistim.

    Ndëshkimi i Ian Fray erdhi pas një përleshjeje të mëvonshme me Quinn Sullivan brenda zonës së penalltisë. Fray e kapi kundërshtarin për qafe, ndërsa situata u tensionua edhe më shumë mes lojtarëve.

    Ndeshja përfundoi me kartonë të kuq për Yannick Bright të Inter Miamit dhe Cavan Sullivan të Philadelphia Union, por më pas Paneli i Pavarur i Rishikimit vendosi unanimisht të anulojë kartonin e kuq dhe pezullimin prej një ndeshjeje për Cavan Sullivan.

    Kështu, Messi dhe Fray do të përballen me gjoba financiare, por pa pezullim, ndërsa Inter Miami vijon përgatitjet për ndeshjet e radhës në MLS.

     

  • Ish-kampioni i botës, Zolani Tete, vritet me armë zjarri në moshën 38-vjeçare

    Ish-kampioni i botës, Zolani Tete, vritet me armë zjarri në moshën 38-vjeçare

    Ish-kampioni i botës në dy kategori të peshave, Zolani “Last Born” Tete, është vrarë me armë zjarri në moshën 38-vjeçare në Afrikën e Jugut.

    Ngjarja e rëndë ndodhi të premten mbrëma në Mdantsane, në provincën Eastern Cape, kur Tete po kthehej në shtëpinë e tij dhe ishte duke pritur që të hapej porta e oborrit.

    Sipas policisë, dy persona të armatosur dhe me maska dolën nga një automjet tjetër dhe hapën zjarr ndaj boksierit dhe një 27-vjeçareje që ndodhej me të në veturë. Tete tentoi t’i shpëtonte breshërisë së plumbave duke futur automjetin në oborr, por u plagos rëndë dhe ndërroi jetë në vendin e ngjarjes.

    Gruaja që ishte me të u qëllua disa herë dhe u dërgua në spital, ku vazhdon të marrë trajtim. Policia ka nisur hetimet për vrasjen, ndërsa deri tani nuk raportohet për ndonjë arrestim. Motivi i sulmit mbetet ende i paqartë.

    Tete ishte një nga emrat më të njohur të boksit në Afrikën e Jugut. Ai fitoi titullin botëror të IBF-së në kategorinë junior-bantamweight në vitin 2014, ndërsa më vonë u shpall kampion bote edhe në kategorinë bantamweight të WBO-së.

    Megjithatë, momenti që e bëri atë të njohur në mbarë botën erdhi në vitin 2017. Tete nokautoi bashkëkombësin e tij Siboniso Gonya vetëm pas 11 sekondash, duke regjistruar atë që njihet si nokauti më i shpejtë në një meç për titull botëror.

    Vitet e fundit të karrierës së tij u shoqëruan me një periudhë të vështirë. Pas një testi pozitiv për substancën e ndaluar stanozolol, pas duelit me Jason Cunningham në vitin 2022, Tete u suspendua për katër vjet. Dënimi i tij përfundoi më 29 korrik të këtij viti.

    Tete po përgatitej për rikthimin në ring dhe kishte synime për ta vazhduar karrierën profesionale. Madje, sipas raportimeve lokale, ai kishte planifikuar të rikthehej në ring më 29 nëntor.

    Vdekja e tij ka tronditur komunitetin e boksit në Afrikën e Jugut, ndërsa autoritetet lokale e kanë cilësuar humbjen e Tetes si një goditje të rëndë për sportin dhe komunitetin e Mdantsane, vendi që e nxori një prej kampionëve më të suksesshëm të boksit të vendit.

  • Amir Rrahmani dhe Drita Stublla kurorëzohen në Prishtinë

    Amir Rrahmani dhe Drita Stublla kurorëzohen në Prishtinë

    Kapiteni i Përfaqësueses së Kosovës dhe futbollisti i Napolit, Amir Rrahmani, ka kurorëzuar dashurinë me partneren e tij, Drita Stublla, duke i dhënë fund beqarisë.

    Çifti, i cili prej kohësh është treguar tejet i rezervuar sa i përket jetës private, tashmë ka vendosur të ndajë me ndjekësit disa momente nga historia e tyre e dashurisë, përfshirë edhe pamje nga kurorëzimi civil.

    Amiri dhe Drita kanë qenë në një lidhje prej rreth dy vitesh, ndërsa kapitulli i ri në historinë e tyre nisi me një propozim romantik në Sicili. Më 30 maj, gjatë qëndrimit në ishullin italian, Rrahmani i propozoi martesë partneres së tij, në një moment që duket se ishte po aq i veçantë sa edhe vendi ku ndodhi. Por, siç ka treguar vetë Drita, pas propozimit çifti mori një vendim disi spontan – të mos e zgjaste shumë pritjen për martesën.

    Në një prej postimeve të saj, Drita ka rrëfyer me humor se pas propozimit vendosën papritur që të martoheshin gjatë muajit korrik.

    “Pas propozimit, vendosëm papritur të martoheshim një ditë në korrik, e më pas u kthyem në shtëpi dhe fjetëm një gjumë”. Dhe kështu ndodhi. Dyshja e ka kurorëzuar zyrtarisht dashurinë e tyre përmes një ceremonie civile në Komunën e Prishtinës, duke nisur kështu një kapitull të ri si të martuar.

    Drita ka ndarë në rrjetet sociale edhe disa fotografi nga kjo ditë e veçantë, duke zbuluar për herë të parë më shumë detaje rreth martesës.

    Madje, ajo ka bërë shaka edhe me natyrën e saj të rezervuar, duke e përshkruar veten si një person që publikon fotografi me partnerin vetëm “një herë në dy vite”. Megjithatë, një detaj kishte rënë në sy prej disa javësh. Në profilin e saj në Instagram, Drita kishte ndryshuar mbiemrin nga Drita Stublla në Drita Rrahmani, duke lënë të kuptohej se kishte kurorëzuar dashurinë me futbollistin kosovar.

    Tashmë, përmes publikimit të pamjeve nga ceremonia, ajo e ka konfirmuar zyrtarisht martesën. Drita Stublla, e cila është e angazhuar si menaxhere e marketingut, është gjithashtu motra e stilistes së njohur prishtinase Lia Stublla. Ndërkohë, Amir Rrahmani vazhdon të jetë një prej emrave kryesorë të futbollit kosovar, si kapiten i Përfaqësueses së Kosovës dhe futbollist i Napolit. /Telegrafi/

  • Aksion në Deçan, pesë persona ndalohen për bixhoz të paligjshëm

    Aksion në Deçan, pesë persona ndalohen për bixhoz të paligjshëm

    Pesë persona janë arrestuar dhe ndaluar në Deçan, nën dyshimin se kanë organizuar skema piramidale dhe bixhoz të paligjshëm.

    Aksioni është ndërmarrë mbrëmë nga Prokuroria Themelore në Pejë, në koordinim me Policinë e Kosovës dhe Stacionin Policor në Deçan.

    “Gjatë kontrollit të lokalit ku dyshohet se zhvillohej kjo veprimtari, janë gjetur dhe sekuestruar përkohësisht prova materiale që dyshohet se kanë shërbyer për zhvillimin e kësaj veprimtarie, përfshirë letra/karta të lojës, pesë (5) telefona mobilë, si dhe para të gatshme në shumën prej 1,615 (një mijë e gjashtëqind e pesëmbëdhjetë) euro”, thotë Prokuroria.

    Me urdhër të prokurorit të shtetit, pesë të dyshuarit janë ndaluar për 48 orë.

    Prokuroria ka bërë të ditur se brenda afatit ligjor do të ndërmarrë veprimet e nevojshme procedurale, përfshirë kërkesën për caktimin e masës së sigurimit ndaj të dyshuarve.

    “Me urdhër të prokurorit të shtetit, pesë personat e dyshuar janë ndaluar për 48 orë, ndërsa brenda afatit ligjor, prokurori i rastit do të ndërmarrë veprimet e nevojshme procedurale, përfshirë parashtrimin e kërkesës për caktimin e masës së sigurimit ndaj të dyshuarve, sipas dispozitave ligjore në fuqi. Prokuroria Themelore në Pejë, në koordinim të vazhdueshëm me Policinë e Kosovës, mbetet e përkushtuar në luftimin e kriminalitetit dhe dukurive të kundërligjshme, si dhe në ndërmarrjen e veprimeve ligjore ndaj të gjithë personave që dyshohet se përfshihen në veprimtari të tilla”, thotë Prokuroria.

  • Prezantohet projekti i banimit social adekuat, Kurti e cilëson një investim të rëndësishëm për dinjitetin e familjeve

    Prezantohet projekti i banimit social adekuat, Kurti e cilëson një investim të rëndësishëm për dinjitetin e familjeve

    Kryeministri në detyrë, Albin Kurti mori pjesë në konferencë për media të paralajmëruar nga ministrja në detyrë e Mjedisit dhe Planifikimit Hapësinor, Fitore Pacolli, dhe ministri në detyrë për Punë, Familje dhe Vlera të Luftës Çlirimtare, Andin Hoti.

    Kurti në konferencën që pati në fokus çështjet që lidhen me banimin social dhe politikat për mbështetjen e familjeve në nevojë, këtë projekt e ka cilësuar si një investim të rëndësishëm për dinjitetin e familjeve, barazinë dhe sigurinë sociale.

    “Sot po prezantojmë projektin e banimit social adekuat në Republikën e Kosovës, një investim ky i rëndësishëm për dinjitetin e familjeve, si dhe për barazinë e sigurinë sociale. Kësisoj po bëjmë një hap të rëndësishëm në një prej fushave të cilën e kemi vendosur në qendër të punës tonë si Qeveri e Republikës së Kosovës, e kjo është përmirësimi i mirëqenies së familjeve e krijimi i kushteve më të mira për jetë”, tha Kurti.

    Ndërsa, ministrja në detyrë e Mjedisit dhe Planifikimit Hapësinor, Fitore Pacolli, ka njoftuar se nga e hëna do të nisë nënshkrimi i marrëveshjeve me 21 komuna përfituese, në kuadër të projektit për banim social.

    “Duke filluar nga dita e hënë, ne nisim nënshkrimin e marrëveshjeve me 21 komuna përfituese, duke shënuar kështu investimin më të madh publik në fushën e banimit social në Kosovë. Ky projekt nuk është thjesht një projekt infrastrukturor, por një platformë e vërtetë për drejtësi sociale, ku askush nuk mbetet pas”, tha Pacolli.

    Sipas saj, projekti ka një vlerë totale prej 37 milionë eurosh, prej të cilave 25 milionë euro financohen drejtpërdrejt nga Banka Zhvillimore e Këshillit të Evropës, ndërsa 12 milionë euro nga Qeveria e Republikës së Kosovës, raporton kp.

    “Ai ka një vlerë prej 37 milionë eurove, ku 25 milionë euro financohen direkt prej Bankës Zhvillimore të Këshillit të Evropës, ndërsa 12 milionë euro nga Qeveria e Republikës së Kosovës”, deklaroi Pacolli.

  • Agjenti i Julian Alvarez thumbon drejtuesit e Atletico Madridit

    Agjenti i Julian Alvarez thumbon drejtuesit e Atletico Madridit

    Agjenti i yllit të Atletico Madridit, Julian Alvarez, Fernando Hidalgo, ka publikuar një mesazh të drejtpërdrejtë për drejtuesit e klubit spanjoll nga “Metropolitano”.

    Hidalgo shkroi në llogarinë e tij në Instagram një thënie mjaft thumbuese ndaj drejtuesve të Atletico Madridit, në një moment kur e ardhmja e sulmuesit argjentinas vazhdon të jetë në qendër të vëmendjes.

    Kjo deklaratë erdhi pasi Atletico Madridi refuzoi ta shiste Alvarezin te Barcelona gjatë kësaj vere, pavarësisht interesimit dhe kërkesave të shumta nga kampionët spanjollë.

    Zyrtarët e klubit madrilen këmbëngulin se lojtari nuk ka marrë asnjë premtim nga drejtuesit se mund të largohet nga “Metropolitano”.

    Siç dihet, Alvarez është një objektiv i madh i Barcelonës, por Atletico Madridi nuk dëshiron ta lejojë sulmuesin argjentinas të bashkohet me një prej rivalëve të tyre.

    Më saktësisht, klubi madrilen po kërkon një shumë shumë më të lartë për transferimin e tij te Barcelona, krahasuar me klubet e tjera. Në këtë kontekst, është përmendur edhe shifra prej 500 milionë eurosh, aq sa klauzola e lirimit të lojtarit.

  • “Mora Fjalë” ndez atmosferën për Kosovën në Lojërat Mesdhetare Taranto 2026

    “Mora Fjalë” ndez atmosferën për Kosovën në Lojërat Mesdhetare Taranto 2026

    Kosova ka nisur në mënyrë të veçantë pjesëmarrjen në Lojërat Mesdhetare Taranto 2026, ku atmosfera është ndezur nga tingujt e këngës “Mora Fjalë” të Shkurte Fejzës.

    Kënga e njohur shqiptare është kthyer në një lloj kolone zanore për delegacionin kosovar, duke u dëgjuar në fshatin mesdhetar, në rrugët ku lëvizin sportistët dhe në ambientet ku zhvillohen garat. Kjo atmosferë ka sjellë emocione dhe krenari te sportistët kosovarë, të cilët po përfaqësojnë vendin në një prej ngjarjeve më të rëndësishme shumësportëshe të rajonit.

    Kosova ka shkëlqyer edhe gjatë ceremonisë së hapjes, ku delegacioni kosovar parakaloi me krenari dhe mori ovacione të shumta nga të pranishmit.

    Pjesëmarrja në Taranto 2026 është historike edhe për nga numri i sportistëve. Kosova përfaqësohet me një delegacion rekord prej 163 sportistësh, 87 meshkuj dhe 76 femra, të cilët do të garojnë në 21 sporte.

    Lojërat Mesdhetare po zhvillohen nga 21 gushti deri më 3 shtator në Itali, ndërsa pas ceremonisë së hapjes, vëmendja tashmë është te garat.

    Sportistët kosovarë synojnë rezultate sa më të mira dhe medalje, me shpresën që kjo pjesëmarrje rekord të kurorëzohet edhe me suksese në arenën sportive.