Blog

Policia e Kosovës ka bërë sot të ditur se ka arrestuar dy persona lidhur me vrasjen e vitit 2022 në Lipjan.

E lidhur me këtë rast Prokuroria Themelore e Prishtinës ka dhënë detaje.

“Prokuroria Themelore në Prishtinë – Departamenti për Krime të Rënda, pas një pune intensive në bashkëpunim të ngushtë me Policinë e Kosovës ka arritur të lokalizoj të pandehurin M.G, i cili ishte në kërkim nën dyshim për veprën penale ‘Vrasje e Rëndë’, me ç’rast ndaj të njëjtit është lëshuar aktvendim për ndalim prej 48 orësh, si dhe i janë sekuestruar dy armë, narkotikë, si dhe dokumente të falsifikuara, cilat i pandehuri i ka përdorur gjatë kohës së arratisë, me qëllim të shmangies nga legjitimimi”, thuhet në njoftim.

Po ashtu, në këtë aksion është arrestuar edhe një person tjetër në drejtim të veprës penale “Dhënia e ndihmës kryerësit pas kryerjes së veprës penale” nga neni 380 i KPRK-së.

Në njoftim thuhet se Prokurori i shtetit me kohë do të vazhdoj ndërmarrjen e veprimeve hetimore të nevojshme, si dhe do të shqyrtoj mundësinë e paraqitjes së kërkesës për ndonjë nga masat për sigurinë e prezencës së të pandehurit në procedurë penale.

Prokurori i shtetit do të vazhdoj punën në mënyrë që të gjithë kryerësit e veprave penale të vendosen para drejtësisë.

Pasi ministri për Punë dhe Familje, Andin Hoti, pranoi pasditen e së mërkurës raportin final për trajtimin e rastit të familjes së pesëvjeçarit nga Janjeva e Lipjanit nga ana e Qendrës për Punë Sociale ka thënë se në gjetjet e këtij raporti, konstatohet se në këtë rast është fajtore QPS-ja, por edhe institucione të tjera, andaj paralajmëroi masa ndëshkuese për të gjithë që janë evidentuar për mostrajtim të duhur të rastit.

Lidhur me këtë në një prononcim për Telegrafin zëdhënësja e Prokurorisë Themelore në Prishtinë, Kaltrina Shala ka thënë se Prokurori i Shtetit ka lëshuar autorizim Policisë, me qëllim të mbledhjes dhe grumbullimit të provave dhe intervistimin e palëve, të përfshirë në këtë rast.

“Ju njoftojmë se Prokurori i Shtetit ka lëshuar autorizim Policisë, me qëllim të mbledhjes dhe grumbullimit të provave dhe intervistimin e palëve, të përfshirë në këtë rast. Aktualisht, ende nuk kemi pranuar raport nga Policia. Për çdo zhvillim të mëtejmë lidhur me këtë çështje, do të njoftoheni me kohë”, ka thënë Shala.

Ndërkaq, sot ministri për Punë dhe Familje, Andin Hoti, e ka pranuar raportin final për trajtimin e rastit të familjes së pesëvjeçarit nga Janjeva e Lipjanit nga ana e Qendrës për Punë Sociale.

Ky raport është pranuar, vonë pasditen e së mërkurës nga Divizioni për Inspektimin e Shërbimeve Sociale dhe Familjare.

Ministri Hoti e konfirmoi për KosovaPress se në gjetjet e këtij raporti, konstatohet se në këtë rast është fajtore QPS-ja, por edhe institucione të tjera, andaj paralajmëroi masa ndëshkuese për të gjithë që janë evidentuar për mostrajtim të duhur të rastit.

“Raportin çuditërisht e kam pranuar sot. Njëra prej të gjeturave të raportit thotë që në vendimin e Gjykatës të vitit 2023 i ka obliguar Qendrën për Punë Sociale për monitorimin e familjes në raport me fëmijët. Pra, e ka obliguar Qendrën për Punë Sociale në raport edhe me prindërit për shëndetin mendor të tyre, që QPS-të nuk merren me shëndetin mendor, janë Qendrat për Shëndetin Mendor që merren me shëndetin mendor, jo QPS-së. Sidoqoftë, është nën hetim prej Prokurorisë. Çka mund të ndërmarrim tjetër ne është një propozim ndaj kryetarit të komunës së Lipjanit që me i qit në masa disiplinore të gjithë stafin e Qendrës për Punë Sociale që është në Lipjan dhe këtë do ta bëjmë nesër, sepse sot është jashtë afatit të punës dhe të shqyrtohen nëse ata vërtetë i kanë ndjekur masat”, shtoi ai.

Partia Demokratike e Kosovës, ka njoftuar se kryetari i saj, Bedri Hamza, ka vizituar familjen Prekazi në Prishtinë, ku kanë folur për situatën ekonomike në vend, si dhe, rritjen e çmimeve.

Nga PDK, bëhet e ditur se Hamza ka theksuar se standardi i jetesës është përkeqësuar ndjeshëm kohëve të fundit, duke u bazuar edhe në të dhënat e fundit të statistikave.

‘’ “Është shumë shqetësuese rritja e çmimeve. Inflacioni vetëm në muajin mars ka arritur në 6.7% krahasuar me vitin paraprak. Kur e shohim në periudhë më të gjatë, shumë produkte janë shtrenjtuar 50, 60 deri në 100 për qind. Ndërkohë, të ardhurat në sektorin privat dhe publik nuk kanë arritur ta përcjellin këtë rritje, duke e bërë jetën shumë më të vështirë për qytetarët”, u shpreh Hamza.

Komunikata:

Hamza viziton familjen Prekazi: Rritja e çmimeve po rëndon jetën e qytetarëve, familjet kosovare kanë nevojë për politika që i mbrojnë (Video)

Prishtinë, 16 prill 2026 – Kryetari i Partisë Demokratike të Kosovës, Bedri Hamza, ka vizituar familjen Prekazi në Prishtinë, me të cilën ka diskutuar për sfidat ekonomike me të cilat po përballen familjet kosovare, si pasojë e rritjes së vazhdueshme të çmimeve dhe kostos së jetesës.

Gjatë vizitës, kryetari Hamza theksoi se standardi i jetesës është përkeqësuar ndjeshëm kohëve të fundit, duke u bazuar edhe në të dhënat e fundit të statistikave.

“Është shumë shqetësuese rritja e çmimeve. Inflacioni vetëm në muajin mars ka arritur në 6.7% krahasuar me vitin paraprak. Kur e shohim në periudhë më të gjatë, shumë produkte janë shtrenjtuar 50, 60 deri në 100 për qind. Ndërkohë, të ardhurat në sektorin privat dhe publik nuk kanë arritur ta përcjellin këtë rritje, duke e bërë jetën shumë më të vështirë për qytetarët”, u shpreh Hamza.

Kryefamiljari Afrim Prekazi tha se sfidat e familjes së tij janë të njëjta me ato të shumicës së qytetarëve.

“Janë rritur për 100% nxemja, rryma, uji dhe shumë shpenzime të tjera. Për një familje me një të punësuar, këto janë të papërballueshme. Unë dal në pension pas tre muajsh, ndërsa gruaja pas një viti, dhe brenga jonë më e madhe është si do ta përballojmë këtë situatë me pensionet dhe koston e jetesës”, theksoi ai.

Edhe zonja e shtëpisë, Valbona Shala Prekazi, ngriti shqetësimin për përballimin e shpenzimeve ditore.

“Ne që merremi me mirëmbajtjen e shtëpisë e ndjejmë drejtpërdrejt rritjen e çmimeve. Pagat që kemi, me rritje minimale, nuk e përballojnë jetën e përditshme”, tha ajo.

Kryetari Hamza theksoi se rritja e çmimeve të energjisë dhe karburanteve ka ndikim zinxhir në gjithë ekonominë, ndërsa adresoi edhe përgjegjësinë institucionale për situatën aktuale.

“Kur shtrenjtohet energjia dhe nafta, rriten të gjitha çmimet e tjera. Por fatkeqësisht, edhe kur bie çmimi i naftës, çmimet e produkteve nuk ulen. Shumë qytetarë sot janë të detyruar të hyjnë në kredi apo overdraft vetëm për ta përballuar muajin. Familjet po e bartin barrën kryesore të kësaj krize dhe ato kanë nevojë për politika që i mbrojnë. Qytetarët tanë meritojnë jetë më të dinjitetshme”, tha ai.

Në fund, Hamza u shpreh optimist se situata mund të përmirësohet përmes politikave të duhura dhe angazhimit të sinqertë institucional.

“Nëse dëgjojmë qytetarët dhe punojmë me përkushtim, mund të ndërtojmë një Kosovë më të mirë për të gjithë”, përfundoi Hamza.

Ndërsa kryefamiljari Prekazi shtoi: “Ky vend mund të ecë përpara vetëm me njerëz të mençur dhe vendime të drejta.”

Ministrja e Drejtësisë, Donika Gërvalla ka vizituar të mërkurën Qendrën e Paraburgimit në Gjilan, gjersa ka folur edhe për Marrëveshjen Ndërkombëtare me Mbretërinë e Danimarkës.

Gërvalla në një postim në Facebook shkruan se sistemi korrektues mbetet një nga testet më të drejtpërdrejta të seriozitetit të shtetit ndaj drejtësisë dhe nuk lë hapësirë për standarde të dyfishta.

“Në këtë drejtim, edhe angazhimet ndërkombëtare që kemi marrë, përfshirë këtu Marrëveshjen Ndërkombëtare me Mbretërinë e Danimarkës, e rrisin përgjegjësinë tonë për të ndërtuar një sistem korrektues funksional, të besueshëm dhe në përputhje të plotë me standardet që kërkojmë vetë t’i përfaqësojmë.

Me stafin drejtues dhe atë korrektues, folëm për përgjegjësinë konkrete që kemi në garantimin e respektimit të të drejtave të personave të privuar nga liria, si dhe për nevojën që standardet të zbatohen në praktikë, jo vetëm të mbeten në letër, sepse si trajtohen të privuarit nga liria, tregon sa vlen realisht sundimi i ligjit”, tha ajo.

Gërvalla tha tutje se angazhimi institucional në këtë fushë do të jetë i çdoditshëm dhe i pandërprerë, ndërsa rritja e llogaridhënies dhe e përgjegjësisë institucionale mbetet detyrim dhe jo zgjedhje, që do të ndiqet me vendosmërinë më të madhe. /Telegrafi/

Ministri i Mbrojtjes së Greqisë, Nikos Dendias, pritet të vizitojë sot Prishtinën,

Siç ka njoftuar Ministria e Mbrojtjes së Greqisë, Dendias gjatë qëndrimit në Kosovë do të vizitojë Shtabin e Kontingjentit Grek në kuadër të misionit të KFOR.

Gjithashtu, Dendias pritet të zhvillojë takime me komandantin e KFOR-it dhe zyrtarë të tjerë të lartë të misionit ndërkombëtar për siguri në Kosovë.

Në kuadër të vizitës në Prishtinë, është paraparë edhe një takim privat me kryeministrin e Kosovës, Albin Kurti.

Kujtojmë se sot në Kosovë po qëndron për vizitë zyrtare edhe zëvendëskryeministri dhe ministri i Punëve të Jashtme, Çështjeve Evropiane dhe Bashkëpunimit për Zhvillim të Belgjikës, Maxime Prevot.

Një rast i rëndë ka ndodhur dje, ku një punëtor, Isuf Bislimi, ka humbur jetën në vendin e tij të punës në zonën industriale të Shtimes, në kompaninë ‘’Doni Fruits’’.

Lidhur me këtë rast ka reaguar edhe vetë kompania. Nga kjo e fundit, vdekja e punëtori është cilësuar ‘’lajmë i rëndë’’, dhe se, Bislimi ka qenë një ‘’koleg i përkushtuar, punëtor dhe i respektuar nga të gjithë’’.

‘’ Në këto momente të vështira, shprehim ngushëllimet tona më të sinqerta familjes, miqve dhe të afërmve të të ndjerit. Doni Fruits qëndron pranë familjes Bislimi dhe do të ofrojë të gjithë mbështetjen e nevojshme në këtë periudhë të rëndë’’, është thënë nga kompania.

Postimi:

Me dhimbje të thellë ju njoftojmë se kolegu ynë i nderuar, Isuf Bislimi, ka ndërruar jetë në mënyrë aksidentale gjatë orarit të punës.

Ky është një lajm i rëndë për të gjithë ne në Doni Fruits, pasi kemi humbur një koleg të përkushtuar, punëtor dhe të respektuar nga të gjithë.

Në këto momente të vështira, shprehim ngushëllimet tona më të sinqerta familjes, miqve dhe të afërmve të të ndjerit. Doni Fruits qëndron pranë familjes Bislimi dhe do të ofrojë të gjithë mbështetjen e nevojshme në këtë periudhë të rëndë.

Kujtimi për Isufin do të mbetet gjithmonë pjesë e kompanisë sonë.

Me respekt,

Doni Fruits