Blog

Një shtëpi është përfshirë nga flakët paraditen e së enjtes në fshatin Miradi e Epërme të Fushë Kosovës, duke shkaktuar dëme materiale, por pa raportime për të lënduar.

Sipas raportit të Policisë së Kosovës, rasti ka ndodhur më 16 prill 2026 rreth orës 10:39, kur është raportuar se një shtëpi, pronë e një burri kosovar, është kapluar nga zjarri. Dyshohet se zjarri është shkaktuar nga një person i dyshuar, i cili sipas autoriteteve ka aftësi të kufizuara mendore.

I dyshuari fillimisht është dërguar për trajtim dhe kontroll mjekësor në repartin e psikiatrisë. Pas vlerësimit mjekësor, me vendim të prokurorit, ai është ndaluar dhe dërguar në mbajtje.

“Fshati Miradi e Epërme, Fushë Kosovë 16.04.2026-10:39. Raportohet se është përfshirë nga zjarri shtëpia pronë e ankuesit mashkull kosovar. Zjarri dyshohet të jetë shkaktuar nga i dyshuari mashkull kosovar me aftësi të kufizuara mendore. I dyshuari fillimisht është dërguar në psikiatri për kontroll mjekësore, e më pas me vendim të prokurorit është dërguar në mbajtje”.

Një burrë është arrestuar në Podujevë pas një rasti të dhunës në familje, ka bërë të ditur Policia e Kosovës.

Sipas raportit zyrtar, ngjarja ka ndodhur dje rreth orës 10:30, ku i dyshuari, mashkull kosovar, pas një mosmarrëveshjeje me bashkëshorten e tij, e ka dëbuar atë nga shtëpia.

Me vendim të prokurorit, i dyshuari është liruar në procedurë të rregullt.

“Podujevë 16.04.2026-10:30. Është arrestuar i dyshuari mashkull kosovar, pasi që i njëjti pas një mosmarrëveshje ka dëbuar nga shtëpia bashkëshorten e tij. Pas intervistimit, me vendim të prokurorit, i dyshuari është liruar dhe rasti vazhdon në procedurë të rregullt”.

Dy punëtorë të një kompanie private kanë pësuar lëndime trupore gjatë punës në fshatin Ceraj të Mitrovicës së Veriut.

Sipas raportit 24-orësh të Policisë, punëtorët janë rrëzuar nga një mjet pune dhe kanë pësuar lëndime të rënda trupore.

Të lënduarit janë dërguar për trajtim mjekësor në Spitalin Rajonal të Mitrovicës.

Ndërkohë, një i dyshuar mashkull kosovar është arrestuar dhe me vendim të prokurorit është dërguar në mbajtje, ka bërë të ditur PK.

Ish-presidentja e Kosovës, Vjosa Osmani ka përkujtuar të rënët me rastin e 27 vjetorit të masakrave në Poklek, e Çikatovë.

Sipas Osmanit kushdo që thotë se në Kosovë nuk është kryer gjenocid, duhet të shkojë në Poklek e në çdo pjesë të Kosovës.

Ajo thotë se dëshmitë e holokaustit të kryer në Kosovë janë akoma të freskëta.

Postimi i plotë:

Liri Muqolli ishte 6 muajshe kur së bashku me 53 anëtarë të familjes, kryesisht fëmijë e gra, u ekzekutuan, u dogjën njëherë, pastaj u dogjën sërish.

Liri kishte emrin, por lirinë nuk e arriti kurrë.

Kushdo që thotë se në Kosovë nuk është kryer gjenocid, le të shkojë në Poklek e në çdo pjesë të Kosovës. Dëshmitë e holokaustit të kryer në Kosovë janë akoma të freskëta.

Në këte përvjetor të masakrave në Poklek e Çikatovë, kujtojmë e nuk harrojmë kurrë.

Lavdi e përjetshme të gjithë martirëve të lirisë.

Policia në Augsburg të Gjermanisë ka identifikuar dy persona të dyshuar për të shtënat që kanë ndodhur rreth 1 vit më parë në një bar.

Sipas mediave gjermane, dy të dyshuarit janë nga Kosova dhe dyshohet se kanë shtënë me armë zjarri në restorantin “Loco” në rrugën Donauworther të Augsburgut.

Ky veprim është klasifikuar si tentim vrasje.

Një grup special hetues i quajtur “Hettenbach” është krijuar për të sqaruar rastin.

Si pjesë e hetimeve, një bastisje ka ndodhur tetorin e vitit 2025, e cila rezultoi me arrestimin e disa personave për trafikim ilegal të drogës.

“Të dyshuarit janë në Kosovë, dhe zyra e prokurorit publik ka lëshuar kërkesë për ekstradim”, ka raportuar “RadioFatansy” e Gjermanisë.
Policia nuk ka ofruar informacione nëse të dyshuarit janë ndaluar në Kosovë.

Një gjykim i menjëhershëm në Gjermani nuk pritet të ndodhë për shkak të kompeksitetit të procedurave të ekstradimit.

Hetimet mbi motivet e rastit janë duke vazhduar.

Ndërkaq, “Augsburger Allgemeine” ka dhënë detaje mbi rastin e ndodhur në majin e vitit 2025.

“Një shpërthim u dëgjua teksa raketat e fishekzjarrëve ngriheshin në ajër aty pranë. Në zonën e Urës Wertach në Oberhausen, fishekzjarrët tradicionalë të festës Plarrer dëgjohen gjithmonë me zhurmë të madhe. Por zhurmat që kalimtarët dëgjuan në një mbrëmje të majit 2025 nuk vinin vetëm prej tyre”.

“Në atë kohë, dy burra qëlluan me armë drejt një lokali në rrugën Donauworther. Predhat goditën fasadën dhe pjesën ballore me xhama. Brenda në ‘Loco Bar’ kishte mysafirë, ndërsa edhe jashtë, në trotuar, ndodheshin njerëz, por fatmirësisht askush nuk u lëndua”.

“Tani, Prokuroria dhe Departamenti i Hetimeve Kriminale në Augsburg thonë se kanë identifikuar personat që qëndrojnë pas kësaj ngjarjeje, të cilën hetuesit e cilësojnë si tentim vrasjeje”.

Ky medium thotë se ka shumë gjasë që rasti të jetë konflikt mes bandave.

Dje në Podujevë, rreth orës 05:00, janë arrestuar dy të dyshuar meshkuj shtetas të Kosovës, të cilët janë vëllezër.

Sipas autoriteteve, pas një mosmarrëveshjeje mes tyre, të dy janë përfshirë në një përleshje fizike

Të dyshuarit kanë marrë trajtim mjekësor për lëndimet e pësuara. Pas intervistimit, me vendim të prokurorit, njëri nga të dyshuarit është dërguar në mbajtje, ndërsa tjetri është liruar në procedurë të rregullt.

Raporti i plotë:

Podujevë 16.04.2026-05:00. Janë arrestuar dy të dyshuar meshkuj kosovarë-vëllezër, pasi që të njëjtit pas një mosmarrëveshje janë përleshur fizikisht në mes vete. Të dyshuarit kanë pranuar tretman mjekësor, ndërsa pas intervistimit, me vendim të prokurorit një i dyshuar dërgohet në mbajtje, ndërsa tjetri lirohet në procedurë të rregullt.

Policia e Kosovës ka njoftuar se në fshatin Negroc të Komunës së Drenasit, gjatë një aksioni gërmimi dhe eksumimi janë hasur mbetje mortore që dyshohet se i përkasin një personi të zhdukur gjatë luftës së viteve 1998/1999.

Sipas raportit policor, me 16.04.2026, njësitë përkatëse kanë realizuar veprimin hetimor në lokacionin e varrezave të dëshmorëve në këtë fshat.

Gjatë gërmimeve janë gjetur eshtra që dyshohet se i përkasin së paku një personi

Mbetjet mortore janë dërguar në Institutin e Mjekësisë Ligjore (IML) për ekzaminime të mëtejshme mjeko-ligjore dhe identifikim.

Rasti po trajtohet nga organet kompetente.

Në një postim të shkurtër në Truth Social, presidenti amerikan Donald Trump ka përshëndetur atë që ai e quan “një ditë historike për Libanin” pasi armëpushimi 10-ditor midis Izraelit dhe Libanit hyri në fuqi.

Kjo vjen pasi presidenti i Libanit, Joseph Aoun, dhe kryeministri izraelit Benjamin Netanyahu arritën marrëveshjen pas diskutimeve me Trumpin, deklaroi presidenti amerikan.

Megjithatë, vetëm pak orë pas ndërprerjes së dukshme të armiqësive, ushtria libaneze akuzoi Izraelin për “shkelje” të armëpushimit.

Sipas Trumpit, zëvendëspresidenti JD Vance dhe sekretari i shtetit Marco Rubio tani do të punojnë me të dy vendet “për të arritur një PAQE të qëndrueshme”.

Ndërkohë, SHBA ka bërë të ditur gjashtë pika të armëpushimit Izrael-Liban.

Luftimi do të ndërpritet në orën 17:00 EST (ora 23:00 sipas kohës në Kosovë) për 10 ditë si një “gjest vullneti të mirë” nga Izraeli;

Kjo periudhë mund të zgjatet me marrëveshje të ndërsjellë nëse bëhet përparim në negociata dhe nëse Libani “demonstron në mënyrë efektive aftësinë e tij për të pohuar sovranitetin e tij” – një referencë e dukshme për përballjen me Hezbollahun;

Izraeli ka të drejtë të “marrë të gjitha masat e nevojshme për vetëmbrojtje në çdo kohë”, por “përveç kësaj”, nuk do të kryejë sulme;

Gjatë armëpushimit, me mbështetje ndërkombëtare, Libani do të ndërmarrë “hapa kuptimplotë” për të ndaluar Hezbollahun dhe “grupet e tjera të armatosura jo-shtetërore” nga kryerja e sulmeve ndaj Izraelit;

Të gjitha palët i njohin forcat e sigurisë së Libanit si përgjegjëse ekskluzive për sovranitetin dhe mbrojtjen kombëtare të Libanit – jo ndonjë grup tjetër;

Izraeli dhe Libani kërkojnë që SHBA-të të lehtësojnë negociatat e mëtejshme të drejtpërdrejta midis dy vendeve.

Siç theksohet në fund, teksti u miratua nga qeveritë e të dy palëve, tha departamenti.

Ka dështuar mbledhja e Komisionit Ad hoc për përzgjedhjen e kandidatëve për anëtar të KPM-së si pasojë e mungesës së kourumit, raporton Ekonomia Online.

Anëtaret e Komisionit nga Partia Demokratike e Kosovës dolën nga mbledhja ende pa nisur ajo, pasi mungonin anëtarët nga partitë tjera.

Në këtë mbledhje ishte e paraparë shqyrtimi i listës së kandidatëve.

Kryetari i Komisionit nga Lëvizja Vetëvendosje, Alban Bajrami tha se do të tentojnë që gjatë ditës të mbajnë mbledhjen.

“Në rëndësinë e procesit, po e shtymë që me mundësi me u mbledhë gjatë ditës. Për fat të keq, mbrëmë kemi mbetur deri vonë në trajtimin e konkursit të bordit të RTK-së, edhe kjo ka ndikuar paksa te anëtarët që me mundë me mbërri në kohë. Një lloj mirëkuptimi ndoshta me mund me gjetë. Ju njoftojmë monitoruesve dhe mediave për afatin e ri gjatë ditës”, tha Gashi.