ATV

Blog

  • Haxhiu nga Çikatova e Vjetër: U vranë 24 civil të paarmatosur, trupat e tyre u dërguan në Rashkë për t’u fshehur krimi

    Haxhiu nga Çikatova e Vjetër: U vranë 24 civil të paarmatosur, trupat e tyre u dërguan në Rashkë për t’u fshehur krimi

    U.D.Presidentja e Kosovës, njëherit kryetarja e Kuvendit të Kosovës, Albulena Haxhiu ka bërë homazhe në Kompleksin Memorial në Çikatovë të Vjetër.

    Ajo, tha se në këtë vend u vranë 24 civil të paarmatosur me bomba dore.

    “Trupat e tyre përveç se u sulmuan me bomba dore dhe armë automatike u dogjën, u dogjën disa herë me qëllim që të fshehin krimin. U vranë 24 civil të paarmatosur dhe pasi u vranë trupat e tyre u dërguan në Rashkë të Serbisë për tu fshehur krimi….Si institucione jemi angazhuar që të shtojmë edhe kapacitete edhe në Polici edhe në Prokurori Speciale kemi miratuar institutin e krimeve të luftës që të dokumentohen të gjitha krimet që Serbia i ka bërë në Kosovë. Jemi pranë familjeve në këto kohë të vështira…. Dhimbja mbetet e madhe edhe pas 27viteve”, ka thënë ajo.

  • Pacolli: Jemi të gatshëm për kompromise për presidentin, opozita po dëshiron zgjedhje

    Pacolli: Jemi të gatshëm për kompromise për presidentin, opozita po dëshiron zgjedhje

    Ministrja e Mjedisit dhe Planifikimit Hapësinor, Fitore Pacolli, ka thënë se dëshirojnë vazhdimin e qeverisjes dhe se po bëjnë maksimumin për të arritur një marrëveshje për presidentit.

    Pacolli ka thënë se janë të gatshëm për të bërë kompromise dhe këtu ka përmendur edhe deklaratën e zëvendëskryeministrit të parë, Glauk Konjufca, i cili tha se do të tërhiqej nga kandidatura për president, nëse arrihet marrëveshje për një kandidat konsensual.

    “Si LVV nuk jemi të interesuar për shkuarjen ne zgjedhje, po provojmë po tentojmë, po bëjmë maksimumin tonë për gjetur një zgjidhje. Në interesin tonë është që të vazhdojmë qeverisjen. Jemi të gatshëm të bëjmë kompromise, gjithmonë kemi bërë për hir të ecjes përpara, kështu që edhe tani mund t’i bëjmë këto kompromise”, ka thënë ajo në emisionin “Këndi i Debatit” në Tëvë1.

    Por, ajo ka akuzuar paritë opozitare që sipas saj nuk duan marrëveshje dhe janë të interesuar në zgjedhje.

    Pacolli ka vlerësuar se opozita pret që të rritë ketë rritje elektorale në zgjedhje, por sipas saj e kanë gabim.

    “Partitë opozitare nuk kanë vullnet për me zgjidh ketë problem, sepse ata po mendojnë që nëse shkojmë në zgjedhje do të sigurojnë përqindje më të lartë, por që e kanë gabim, kështu menduan edhe para disa muajve. Ne parashikojmë që nëse shkojmë në zgjedhje do të kemi rritje. Ne u themi partive opozitare që të ulemi dhe të bashkëpunojmë dhe të vazhdojmë të qeverisim, sepse prapë se prapë do të jemi në një situatë të njëjtë dhe nuk do të ketë zgjidhje përfundimtare”, ka thënë Pacolli.

    Kryeministri Kurti ka thënë se është në kontakt me partitë opozitare.

    Sipas aktgjykimit të Gjykatës Kushtetuese, 28 prilli është dita e fundit për votimin e presidentit në të kundërtën vendi shkon në zgjedhje të parakohshme.

  • Nisin punimet në ndërtimin e rrethrrotullimit në magjistralen Gjilan-Prishtinë

    Nisin punimet në ndërtimin e rrethrrotullimit në magjistralen Gjilan-Prishtinë

    Kanë nisur punimet në ndërtimin e rrethrrotullimit në kryqëzimin e rrugës transit në dalje të Gjilanit për Prishtinë, e cila qytetarëve u ka krijuar vështirësi në lëvizjen e lirë të mjeteve.

    Kryetari i Komunës së Gjilanit, Alban Hyseni, tha se kryqëzimi në magjistralen Gjilan-Prishtinë nuk do të jetë më pikë bllokimi.

    “Pas përfundimit të procedurave administrative dhe lidhjes së kontratës, kemi nisur me intervenimet e para në terren”, tha kryetari i Gjilanit.

    Hyseni tha se rrethrrotullimi i ri do të zgjidhë problemin e kolonave të përditshme, duke lehtësuar qarkullimin për të gjithë udhëtarët.

    Ndërsa drejtori i Shërbimeve Publike, Kushtrim Ibrahimi, tha se ky kryqëzim ka shkaktuar kolona të gjata të mjeteve dhe tashmë po i vjen fundit dhe do të zgjidhet problemi.

    “Problemet janë evituar, kontrata është nënshkruar dhe kemi nisur punimet dhe së shpejti do të kemi rreth rrotullimin”, tha Ibrahimi.

  • Çfarë nuk duhet të vishni në dasmë: Këshillat e ekspertëve për të shmangur gafat e veshjes

    Çfarë nuk duhet të vishni në dasmë: Këshillat e ekspertëve për të shmangur gafat e veshjes

    Zgjedhja e veshjes për dasmë shpesh krijon konfuzion. Nga “black tie” deri te “smart casual”, kodet e veshjes nuk janë gjithmonë të qarta dhe gabimet janë të zakonshme.

    Sipas Tracy Mudd, eksperte në The Wedding Travel Company, një nga gabimet më të shpeshta është interpretimi fjalë për fjalë i kodit të veshjes pa marrë parasysh vendndodhjen e dasmës — një problem që ndodh veçanërisht te të ftuarit më të rritur.

    “Ata mbi 50 vjeç zakonisht fokusohen te veshjet elegante dhe të rehatshme që i përshtaten ambientit. Materialet që marrin frymë, prerja e mirë dhe këpucët praktike bëjnë diferencën, sidomos në dasmat jashtë vendit,” shpjegon ajo.

    Sipas saj, kodet e veshjes janë vetëm udhëzim, ndërsa komoditeti është po aq i rëndësishëm për të shijuar ditën.

    Në stinët e ngrohta, materialet e rënda dhe prerjet e ngurta mund të bëhen shpejt të papërshtatshme, veçanërisht në klimë të lagësht. Edhe këpucët mund të krijojnë problem, sidomos në ambiente të jashtme ose rrugë me kalldrëm.

    Një rregull i thjeshtë mbetet i pandryshuar: ngjyrat e çelura janë të pranueshme, por e bardha duhet shmangur, përveç rasteve kur çifti e lejon shprehimisht.

    “Duhet shmangur çdo gjë që mund të ngatërrohet me fustanin e nuses ose me veshjet e çiftit,” thekson ekspertja.

    Më poshtë janë shpjeguar kodet më të zakonshme të veshjes dhe si duhen interpretuar.

    Black tie (formal shumë i lartë)

    Ky është kodi më formal i veshjes, që kërkon fustane të gjata deri në fund dhe kostume elegante. Ngjyrat e forta, detajet luksoze dhe pamja “red carpet” janë të mirëpritura.

    Megjithatë, duhet shmangur çdo gjë tepër e hapur ose e rëndë.

    “Shpesh gabimi ndodh kur zgjidhen veshje të rënda, sidomos në dasma jashtë vendit. Materialet e lehta dhe të ajrosshme funksionojnë më mirë pa humbur formalitetin,” thotë Mudd.

    Formal

    Këtu zakonisht përfshihen fustane të gjata ose midi, ose kostume të rregullta.

    Sfida është të ruhet eleganca pa humbur rehatinë, sidomos në ditë të gjata ose mot të nxehtë.

    Kjo kategori lejon eksperimentim me forma: dekolte të theksuara dhe shpinë të hapur mund të jenë të përshtatshme në restorante ose hotele luksoze, ndërsa ambiente fetare kërkojnë stil më modest.

    Cocktail

    Pak më i lirshëm se formal, por ende i rregullt dhe festiv.

    Gabimi më i madh është të vishet shumë thjesht.

    Fustanet më të shkurtra, materialet e lehta dhe detajet dekorative janë të pranueshme. Nëse dukeni gati për një mbrëmje elegante, jeni në drejtimin e duhur.

    Semi-formal

    Shpesh përdoret për ceremoni civile ose vetëm pritje pas dasmës.

    Ky kod mund të krijojë konfuzion sepse është më fleksibël.

    Duhet shmangur veshjet e përditshme si lino shumë e thjeshtë apo kombinime jo formale. Zgjedhjet më të mira janë fustane të thjeshta ose komplete moderne, por ende të menduara për event.

    Smart casual

    Një nga kodet më të keqkuptuara.

    Shumë njerëz e interpretojnë si “shumë të thjeshtë”, por kjo është gabim.

    Xhinset dhe veshjet sportive nuk janë të përshtatshme. Më mirë janë fustane verore të rregullta ose kombinime të thjeshta por elegante, të shoqëruara me këpucë të rregullta — jo atlete.

  • Këta janë emrat e kandidatëve për anëtarë të Bordit të RTK-së që shkojnë për votim në Kuvend

    Këta janë emrat e kandidatëve për anëtarë të Bordit të RTK-së që shkojnë për votim në Kuvend

    Pasi Komisioni Ad-hoc ka intervistuar gjithsej 61 kandidatë për anëtarë në Bordin e Radio Televizionit të Kosovës (RTK), nga ky proces do të përzgjidhen 6 anëtarë shqiptarë, 1 nga komuniteti serb dhe 1 nga komunitetet tjera joshumicë.

    Për votim në seancë plenare do të paraqiten 12 kandidatë shqiptarë me më së shumti pikë nga radhët e kandidatëve shqiptarë, 2 nga komuniteti serb dhe 2 nga komunitetet tjera joshumicë.

    Votimi nuk do të mbahet në seancën e sotme të Kuvendit, por në një seancë tjetër.

    Anëtarët që morën pjesë në këtë proces nga ky komision janë: Arbërie Nagavci – kryetare; Arbëreshë Kryeziu Hyseni; Fitim Haziri; Nezir Kraki; Alban Bajrami; Ganimete Musliu; Armend Zemaj – zëvendëskryetar i parë; Slavko Simiq dhe Emilija Rexhepi – zëvendëskryetare e dytë.

    Kandidatët shqiptarë që do të paraqiten për votim në seancë plenare janë: Arbërore Riza, Gëzim Brahaj, Valmire Thaqi, Fatos Mustafa, Lulzim Beqiri, Flokart Aliu, Fatmir Podrimaj, Ilirjan Himaj, Xheraldina Çernobregu, Anita Toçi, Avni Zuka, Njomza Beqiri Novosella.

    Ndërsa kandidatët nga radhët e komunitetit serb: Vidosav Kostovic dhe Ivana Milic. Kurse, nga komunitetet tjera joshumicë: Anesa Colakovic dhe Aldin Sabani.

    Ndryshe, në këtë proces Komisioni Ad-hoc ka zhvilluar 53 intervista me kandidatë shqiptarë: Arbërore Riza; Armend Kubati; Rasim Çubolli; Hazir Reka; Gëzim Brahaj; Valmire Thaqi; Ali Misimi; Mimoza Vila; Dafina Boja; Enver Gashi; Gasper Konami; Fatos Mustafa; Rahmi Limani; Fadil Lepaja; Kujtim Nushi; Visar Berisha; Lutfi Bilalli; Fatbardha Osmani Jashari; Shukrije Rama; Bardhyl Plakolli; Bajram Koqinaj; Lulzim Beqiri; Vlera Kastrati; Florije Manaj Zogaj; Besart Hyseni; Besa Maxhuni; Jehona Murati Dugolli; Avni Dalipi; Flokart Aliu; Dhurata Prokshi; Fatmir Podrimaj; Adriana Sedaj; Genc Berisha; Majlindë Leci; Gëzime Pacolli Pllana; Ilirjan Himaj; Isuf Berisha; Erza Shala; Halit Veliu; Sadik Ahmetaj; Vegim Kraja; Fatime Buzolli; Melihate Zeqiri; Afërdita Camaj Isa; Shqipe Ahmeti Berisha; Eljesa Elezi Daka; Xheraldina Çernobregu; Anita Toçi; Arta Jashari; Avni Zuka; Dardana Goranci Iliyaz; Demir Reshiti; Njomza Beqiri Novosella.

    Mirëpo, për disa prej tyre u konstatua se largohen nga gara për shkak se kanë ndalesa.

    Po ashtu, janë intervistuar 3 kandidatë nga radhët e komunitetit serb: Vidosav Kostovic, Ana Ameti Kostic dhe Ivana Milic. Kurse, 5 kandidatë nga radhët e komuniteteve tjera joshumicë: Anesa Colakovic, Mediha Yarimhoro, Zylerha Ustaibo Mecihan dhe Amanda Toska. /Betimi për Drejtësi

  • Pse NASA planifikon të vendosë reaktorë bërthamorë në sipërfaqen e Hënës?

    Pse NASA planifikon të vendosë reaktorë bërthamorë në sipërfaqen e Hënës?

    Kapacitetet në hapësirë janë rritur ndjeshëm në vitet e fundit, me misionin Artemis II të NASA-s që çoi astronautët Reid Wiseman, Christina Koch, Victor Glover dhe Jeremy Hansen në Hënë në misionin e parë hënor në më shumë se 50 vjet.

    Dhe tani, agjencia hapësinore amerikane thuhet se po synon një qëllim edhe më ambicioz: të vendosë reaktorë bërthamorë në Hënë deri në vitin 2030 përmes Projektit të saj të Energjisë Sipërfaqësore Fission, me plane për të lëshuar një reaktor me fuqi mesatare në orbitë deri në vitin 2028.

    Por për këtë detyrë të vështirë, NASA do të duhet të bashkojë forcat me Departamentin e Energjisë të SHBA-së dhe Departamentin e Mbrojtjes, shkruajnë mediat e huaja.

    Në këtë drejtim, Zyra e Shkencës dhe Teknologjisë e Shtëpisë së Bardhë (OSTP) ka ndarë tashmë udhëzime të reja për agjencitë federale për të zhvilluar një plan veprimi për teknologjinë bërthamore hapësinore.

    “Energjia bërthamore në hapësirë do të na japë energjinë elektrike, ngrohjen dhe shtytjen e qëndrueshme thelbësore për një prani të përhershme në Hënë, Mars dhe më gjerë”, ka thënë OSTP në një postim në X.

    Pse energjia diellore është e kufizuar në hapësirë

    Sipas mediave të huaja, përcjell Telegrafi, ky ndryshim ndodh kryesisht sepse energjia diellore dhe burimet e tjera tradicionale të energjisë nuk do të jenë të mjaftueshme për të mbështetur në mënyrë të besueshme vendbanimet njerëzore afatgjata në Hënë ose planetë të tjerë, siç është Marsi.

    Nata hënore është një arsye kryesore për këtë, pasi një natë e vetme në Hënë zgjat rreth 14 ditë në Tokë.

    Gjatë kësaj kohe, panelet diellore nuk mund të përdoren dhe bateritë nuk kanë kapacitet të mjaftueshëm për të mbështetur një bazë të tërë gjatë periudhave të ftohta dhe të errëta.

    Mbështetja vetëm në energjinë diellore gjithashtu e bën më të vështirë për programe si Artemis të eksplorojnë rajone të errëta përgjithmonë siç është poli jugor hënor, i cili nuk sheh kurrë rrezet e diellit, por përmban akull uji të vlefshëm.

    Në të kundërt, reaktorët bërthamorë ofrojnë kryesisht energji të vazhdueshme dhe të bollshme për vite me radhë përmes ndarjes bërthamore, pavarësisht nga moti, rrezet e diellit ose vendndodhja. S

    Shtytja elektrike bërthamore gjithashtu mund të ndihmojë “anijet kozmike” të kryejnë misione komplekse dhe afatgjata pa rrezikuar shterimin e karburantit.

    “Ka ardhur koha që Amerika të fillojë me energjinë bërthamore në hapësirë”, postoi administratori i NASA-s, Jared Isaacman, në X.

    Projekti i Energjisë Sipërfaqësore Fission pritet të ketë një kapacitet projektimi prej 40-100 kilovatësh energji elektrike, i cili duhet të jetë i mjaftueshëm për të mbështetur një habitat të vogël hënor me laboratorë shkencorë dhe pajisje për nxjerrjen e burimeve për disa vite.

    Ky projekt pritet të ndihmojë SHBA-në të forcojë pozicionin e saj në teknologjinë hapësinore në krahasim me Kinën dhe Rusinë, ndërsa siguron një shtrat testimi hënor për të avancuar teknologjitë për misionet e ardhshme me ekuipazh në Mars.

    Sistemi pritet të funksionojë në mënyrë autonome me mirëmbajtje minimale të kërkuar nga astronautët, duke mbetur i shkallëzueshëm dhe modular.

    Dhe ai do të duhet të marrë parasysh aplikimet që mund të mbështesin si shtytjen hapësinore ashtu edhe jetën e ardhshme në Hënë.

  • NASA: Asteroidi “Zoti i kaosit” do të kalojë pranë Tokës brenda 3 vitesh

    NASA: Asteroidi “Zoti i kaosit” do të kalojë pranë Tokës brenda 3 vitesh

    Një asteroid me madhësinë e tre fushave të futbollit do të kalojë pranë Tokës brenda tre vitesh, duke u dhënë shkencëtarëve një shans të rrallë për të studiuar një shkëmb kolosal hapësinor nga afër.

    I quajtur Apophis — sipas hyjnisë së lashtë egjiptiane të njohur si “Zoti i kaosit” — asteroidi pritet të kalojë pranë planetit më 13 prill 2029, sipas NASA-s.

    Ai do të vijë rreth 32,186 km nga sipërfaqja e Tokës, që është më afër se shumë satelitë në orbitë, ka njoftuar agjencia.

    Shkencëtarët e konsiderojnë Apophisin si “një asteroid potencialisht të rrezikshëm”.

    Por, NASA ka njoftuar se nuk ka rrezik të përplasjes me Tokën për të paktën 100 vjet.

    “Nuk ka rrezik për Tokën, për askënd ose asgjë që jeton në të, ose për astronautët apo satelitët në hapësirë”, tha agjencia.

    “Por ngjarja është një mundësi e mahnitshme dhe krejtësisht e pashembullt për të mësuar shumë më tepër rreth Apophis dhe asteroidëve të ngjashëm pranë Tokës”, shtoi ajo.

    Ndryshe, është jashtëzakonisht e pazakontë që një asteroid aq i madh sa Apophis të kalojë kaq afër Tokës.

    NASA vlerëson se ngjarje të tilla ndodhin mesatarisht një herë në disa mijëra vjet.

    Nëse ky vlerësim është i saktë, atëherë kalimi i asteroidit në vitin 2029 do të jetë i pari i këtij lloji në histori që do të vëzhgohet nga afër me teknologjinë moderne.

    Apophis u zbulua për herë të parë më 19 qershor 2004 nga astronomët Roy Tucker, David Tholen dhe Fabrizio Bernardi në Observatorin Kombëtar Kitt Peak në Arizona.

  • Tragjedi në Indonezi, rrëzohet helikopteri – 8 të vdekur

    Tragjedi në Indonezi, rrëzohet helikopteri – 8 të vdekur

    Një helikopter që fluturonte midis plantacioneve në ishullin Borneo, Indonezi, u rrëzua, duke vrarë tetë personat në bord.

    Airbus H130 në pronësi të PT Matthew Air Nusantara humbi kontaktin të enjten, pesë minuta pasi u ngrit nga distrikti Melawi në provincën West Kalimantan.

    Ai ishte duke udhëtuar drejt një plantacioni të vajit të palmës në distriktin Kubu Raya.

    Sipas Agjencisë Kombëtare të Kërkimit dhe Shpëtimit dhe Ministrisë së Transportit, ekipet e kërkimit më vonë gjetën rrënojat dhe trupat e dy anëtarëve të ekuipazhit dhe gjashtë pasagjerëve në pyjet e dendura në distriktin Sekadau.

    Njëri nga të vrarët ishte malajzian.

    Indonezia, një arkipelag i gjerë me rreth 270 milionë banorë, është përballur me aksidente transporti, duke përfshirë rrëzime aeroplanësh dhe helikopterësh dhe fundosje tragetesh.

  • “2.1 milionë euro për softuerë që propagandojnë”, Kica-Xhelili flet për “linçin online” të VV-së

    “2.1 milionë euro për softuerë që propagandojnë”, Kica-Xhelili flet për “linçin online” të VV-së

    Nënkryetarja e Lidhjes Demokratike të Kosovës, Doarsa Kica-Xhelili, ka akuzuar partinë në pushtet, Lëvizja Vetëvendosje, duke thënë se kjo e fundit po përdor softuerë të avancuar për propagandë në rrjetet sociale.

    Në Debat Plus, Kica-Xhelili deklaroi se bëhet fjalë për një vlerë prej rreth 2.1 milionë eurosh të shpenzuara për softuerë që, sipas saj, shërbejnë për manipulim të opinionit publik në hapësirën online.

    Ajo tha se ekzistojnë sisteme që gjenerojnë automatikisht komente dhe profile të rreme, të cilat aktivizohen në varësi të përmbajtjes që publikohet në rrjete sociale.

    “Janë 2.1 milionë euro të softuerëve që po blihen për të propaganduar online. Softuerë në vit… Ekzistojnë dhe na është bërë e ditur, fatkeqësisht për shkaqe konfidenciale të marrëveshjeve kontraktuale nuk ka u është dhënë asnjëherë dëshmia që do të mund ta shfrytëzonim. Por, po ekzistojnë softuerë, të cilët gjenerojnë komente dhe profile fallco… ta thjeshtoj në qoftë se e publikohet një video e Lumir Abdixhikut duke thënë diçka, në momentin që boti e identifikon fjalën Lumir, e ka për detyrim t’i gjenerojë 200 komente në atë postim”, ka thënë Kica-Xhelili.

    Kujtojmë se disa ditë më parë në Debat Plus ish-deputeti i Lëvizjes Vetëvendosje, Florin Krasniqi, ka folur në lidhje me atë që ai e përshkroi si një strukturë të organizuar për sulme online.

    Krasniqi pretendoi se gjatë kohës sa ishte pjesë e kësaj partie, kishte kontribuar financiarisht në krijimin e një infrastrukture që, sipas tij, përdorej për ofendime dhe linçime në rrjetet sociale.

  • “Ndoshta e bëj sot”, mesazhi rrëqethës i 14-vjeçarit në Turqi pak para se të vriste nëntë persona brenda një shkolle

    “Ndoshta e bëj sot”, mesazhi rrëqethës i 14-vjeçarit në Turqi pak para se të vriste nëntë persona brenda një shkolle

    Detaje të rënda kanë dalë në dritë nga sulmi tragjik në një shkollë në Kahramanmaraş, Turqi, ku një nxënës 14-vjeçar hapi zjarr duke vrarë 9 persona, mes tyre 8 nxënës dhe një mësues.

    Pak para sulmit, i mituri kishte postuar një mesazh shqetësues në një bisede online në anglisht, ku shkruante: “Mund ta bëj sot tek nxënësit e klasës së tretë, të pestë dhe të gjashtë, përgatituni, ndihem shumë i lodhur sot”.

    Fillimisht u raportua se autori kishte kryer vetëvrasje, por hetimet mjeko-ligjore tregojnë një tjetër version. Sipas raportit, ai ka ndërruar jetë nga gjakderdhja e pakontrolluar pas një plage të shkaktuar nga një objekt i mprehtë në këmbën e djathtë, që i kishte këputur një enë të madhe gjaku.

    Plaga dyshohet se është shkaktuar gjatë përpjekjeve për ta neutralizuar, kur prindër dhe stafi i shkollës ndërhynë për ta ndalur. Në trupin e tij u gjetën gjurmë gjaku të tharë, ndërsa në duar kishte qese mbrojtëse najloni dhe në shpinë katër elektroda.

    Një nga dëshmitarët, Necmettin Bekçiu, baba i dy nxënësve, deklaroi se hyri në shkollë sapo dëgjoi të shtënat dhe pa mësuesit që përpiqeshin ta ndalonin autorin në shkallë. Ai tha se ndërhyri duke përdorur një thikë për ta ndaluar.

    “Qëllimi im ishte ta pengoja të arratisej dhe të dëmtonte të tjerët”, u shpreh ai.

    Sipas familjes, 14-vjeçari ishte i izoluar dhe kalonte shumë kohë në internet dhe duke luajtur videolojëra me armë. Babai i tij, ish-oficer policie, deklaroi se djali kishte ndjekur një psikolog për dy muajt e fundit.

    Një video e publikuar tregon se dy ditë para sulmit, babai e kishte çuar të birin në poligon qitjeje dhe i kishte dhënë këshilla për përdorimin e armës. Armët e përdorura në sulm rezultojnë të kenë qenë të babait, i cili tashmë është arrestuar.

    Gjithashtu, hetimet tregojnë se i mituri ishte i ndikuar nga figura të dhunshme, duke përdorur në profilin e tij një referencë ndaj Elliot Rodger, autor i një masakre në SHBA në vitin 2014.

    Ngjarja e rëndë ka prekur thellë opinionin publik në Turqi edhe për shkak të aktit heroik të mësueses së matematikës, Ayla Kara, 56 vjeç, e cila humbi jetën duke u përpjekur të mbronte nxënësit.

    Sipas raportimeve, ajo vrapoi drejt klasës së pestë sapo dëgjoi të shtënat dhe u përpoq t’i mbulonte fëmijët me trupin e saj, duke marrë plagë fatale. Mësuesja, nënë e tre fëmijëve, ishte shumë e dashur nga nxënësit dhe kolegët.

    Ngjarja ka shkaktuar tronditje të thellë në Turqi dhe më gjerë, duke rikthyer në vëmendje shqetësimet për sigurinë në shkolla dhe ndikimin e dhunës tek të miturit.