ATV

Blog

  • Tiranë, Prishtinë e Zvicër: Si funksionoi shpëlarja e parave të kokainës?

    Tiranë, Prishtinë e Zvicër: Si funksionoi shpëlarja e parave të kokainës?

    Pronarët e një agjencie udhëtimi në Luzern të Zvicrës dyshohen se kanë transferuar para droge drejt Shqipërisë. Raporte të reja tregojnë si funksiononte sistemi dhe kush qëndron pas tij, njofton portali zviceran Zentralplus.

    Një rrugë e qetë në mes të Tiranës gjendet një këmbimore valutash. Ajo pothuaj nuk bie në sy. Këtu, shkruan portali zviceran Zentralplus, janë transferuar nga Zvicra para të fituara nga tregtia me drogë. Në anën tjetër të rrugës së gjatë të transferimit të parave gjendet një agjenci udhëtimi në Luzern të Zvicrës qendrore. Të përfshirët në këtë vepër dyshohet se kanë përdorur sistemin “havala”. Në këtë sistem, një person dorëzon para në një vend dhe merr një kod; me këtë kod, ai mund të tërheqë të njëjtën shumë në një vend tjetër. Paratë fizike transferohen më vonë.

    Tashmë dihet si është përdorur ky sistem dhe kush qëndron pas tij. Këtë e tregojnë raporte të reja nga mediat shqiptare, të cilat mbështeten në dokumente të prokurorisë speciale dhe në biseda telefonike të përgjuara, shkruan Zentralplus.

    Në qendër qëndron një burrë me nofkën “Visi”. Atij i përkiste në fakt këmbimorja e përmendur në Tiranë, edhe pse zyrtarisht ishte në emër të një të afërmi. Kjo thuhet në një dokument të prokurorisë shqiptare, e cila e ka mbyllur lokalin.

    Detyra e “Visit” ishte koordinimi dhe administrimi i transfertave. Ai dyshohet se organizonte mbledhjen e parave nga rrjetet e drogës në Zvicër, transferimin në Shqipëri dhe shpërndarjen te përfituesit.

    Bisedat e përgjuara tregojnë se ai fliste me persona të ndryshëm për dërgimin e parave nga Zvicra në Shqipëri dhe për shpërndarjen e tyre. Në një rast, gjatë pandemisë kur kufijtë ishin të mbyllur dhe fondet të pakta, ai thoshte: “Për momentin atje lart është mbyllur” dhe “poshtë jemi bosh”. “Atje lart” i referohej Zvicrës, “poshtë” Shqipërisë. Në biseda të tjera diskutohej për mbledhjen dhe transportin e parave.

    Sapo të rifillonin fluturimet, transfertat mund të kryheshin sërish – edhe në drejtim të kundërt. Ai kishte një fond prej dy milionë frangash në Zvicër për këtë qëllim.

    Transporti bëhej shpesh sipas të njëjtit model: nga Luzerni, “korrierët” i çonin paratë me avion në Prishtinë. Aty merreshin dhe dërgoheshin me makinë në Tiranë, ku mbusheshin arkat nga të cilat paguheshin përfituesit e sistemit.

    Shpesh për marrjen e parave në Prishtinë ishte përgjegjës kushëriri i “Visit”, i quajtur “Nipi”. Ai u arrestua në korrik 2020 në kufi, kur iu gjetën 77 mijë franga zvicerane. “Nipi” ishte praktikisht dora e djathtë e “Visit”: kryente transporte ose koordinonte kur ai nuk mundej.

    Pas arrestimit të “Nipit”, rolin kryesor e mori “Papi”. Ai konsiderohet figurë kyçe. Sipas raportimeve, ai kishte jetuar më parë në Zvicër dhe në Shqipëri njihej si “boss” i kokainës. U arrestua në vitin 2018, por u lirua shpejt. Edhe ai dyshohet se kishte një këmbimore.

    “Papi” udhëtonte rregullisht në Prishtinë për të marrë para. Kur nuk arrinte të shkonte vetë, paguante shoferë autobusësh për t’i kontrabanduar paratë. Thuhet se kështu ka transportuar të paktën 800 mijë franga.

    Ai ishte aktiv edhe në Luzern, ku merrte para dhe i çonte në agjencinë e udhëtimit ose në adresa të tjera.

    Një i afërm i pronarit të agjencisë së udhëtimit në Luzern ndodhej në Prishtinë, ai njihej me nofkën “Xeni”. Ai ishte një hallkë kyçe në rrjetin e shpërndarjes. Aty mbërrinin paratë nga trafiku i drogës, zakonisht me avion, dhe prej aty merreshin nga “Papi” dhe të tjerët.

    Ende nuk është e qartë sa thellë janë të përfshirë operatorët kosovarë të agjencisë në këtë rrjet. Në Zvicër, në shtator 2024, u arrestuan gjashtë persona. Akuza: pronari dhe djemtë e tij dyshohet se kanë ndihmuar në transferimin e rreth shtatë milionë frangave jashtë vendit.

    Që nga viti 2022, policia e kishte nën vëzhgim agjencinë. Vetëm brenda një viti u regjistruan mbi 750 vizita nga persona të dyshuar si korrierë droge.

    Në bisedat e përgjuara, agjencia quhej thjesht “zyra”. Operatorët dhe “Visi” dyshohet se merrnin deri në 6 për komision për transfertat.

    Raportet ofrojnë një pasqyrë më të gjerë të rrjetit të trafikut të drogës me lidhje në Shqipëri. Ende mbetet e paqartë nëse ka pasur edhe lidhje të tjera nga Luzerni drejt Shqipërisë.

    Prokuroria federale zvicerane dhe ajo speciale shqiptare po hetojnë rastin. “Visi” ndodhet në paraburgim në Zvicër në pritje të gjykimit. “Papi” është në burg në Shqipëri. Autoritetet kanë sekuestruar para dhe pasuri, përfshirë këmbimore, një vilë bregdetare dhe një apartament në Tiranë. Për të gjithë të përfshirët vlen prezumimi i pafajësisë, shkruan portali zviceran Zentralplus.

  • Aksioni në ndërtim zbulon shkelje në Kosovë: Mbyllen 50 kantiera, dhjetëra kompani drejt gjykatës

    Aksioni në ndërtim zbulon shkelje në Kosovë: Mbyllen 50 kantiera, dhjetëra kompani drejt gjykatës

    Inspektorati Qendror i Punës ka publikuar shifrat e radhës nga aksioni i madh i inspektimeve në sektorët me rrezikshmëri të lartë, që nisi pas shtimit të rasteve të vdekjeve në vendin e punës.

    Aksioni i gjerë i Ministrisë së Punës, në bashkëpunim me Inspektoratin Qendror të Punës, po vazhdon me ritëm të shtuar në sektorin e ndërtimtarisë, pas rritjes së rasteve të aksidenteve dhe vdekjeve në vendin e punës.

    Vetëm gjatë 48 orëve të para të raportimit, rezultatet e publikuara tregojnë për një gjendje shqetësuese në shumë punishte ndërtimore në Kosovë.

    Sipas të dhënave zyrtare, janë inspektuar gjithsej 110 vendpunishte, ndërsa në 50 prej tyre është marrë vendim për ndalim të menjëhershëm të punimeve për shkak të shkeljeve të konstatuara në aspektin e sigurisë dhe shëndetit në punë.

    Po ashtu, gjatë kësaj periudhe janë shqiptuar 33 vërejtje ndaj subjekteve të ndryshme.

    Inspektorati Qendror i Punës ka bërë të ditur se aksioni po fokusohet në sektorët me rrezikshmëri të lartë, ndërsa në këtë fazë vëmendja kryesore është përqendruar te ndërtimtaria, sektor i cili konsiderohet ndër më problematikët sa i përket kushteve të punës dhe numrit të aksidenteve fatale.

    Në raportin e fundit thuhet se vetëm në ditën e gjashtë të aksionit janë realizuar 41 inspektime të reja, të gjitha në sektorin e ndërtimtarisë. Nga këto kontrolle, 16 raste kanë përfunduar me vendim për ndalim të punimeve.

    Sipas ndarjes rajonale, dy ndalime janë shqiptuar në Pejë, 11 në Prizren dhe tri në Prishtinë.

    Në të njëjtën ditë, inspektorët kanë shqiptuar edhe 13 vërejtje ndaj kompanive ku janë gjetur parregullsi që kërkojnë përmirësim të menjëhershëm, ndërsa në 13 raste të tjera nuk është konstatuar nevoja për ndonjë masë ndëshkuese.

    Ndërkohë, në tetë raste është lejuar vazhdimi i punimeve, pasi kushtet janë vlerësuar të pranueshme, ndërsa në 12 raste subjektet kanë eliminuar parregullsitë e evidentuara gjatë kontrollit dhe kanë përmirësuar kushtet e sigurisë.

    Inspektorati ka sqaruar se kolona ku figuron numri i ndalimeve të punimeve nënkupton automatikisht edhe numrin e kërkesave për kundërvajtje që do të procedohen ndaj kompanive përkatëse.

    Në njoftim bëhet e ditur se në përfundim të aksionit, të gjitha subjektet që kanë rezultuar me ndalim të punimeve do të procedohen automatikisht në Gjykata për kundërvajtje, në përputhje me shkeljet e konstatuara gjatë inspektimeve.

    Po ashtu, është paralajmëruar edhe faza e riinspektimeve, e cila do të zhvillohet gjatë ditëve në vijim sipas afateve të përcaktuara nga inspektorët përgjegjës.

    “Procesi i Riinspektimeve do të kryhet në ditët në vijim të aksionit sipas afateve kohore të përcaktuara nga Inspektorët për eliminim të parregullësive. Eleminim të parregullësive nënkupton procesin kur subjekti inspektuar ka ndërmarrë veprime në përmirësim të gjendjes së Sshp-së.”, thuhet në njoftim.

    Sipas sqarimit të Inspektoratit, eliminimi i parregullsive nënkupton rastet kur subjekti i inspektuar ka ndërmarrë veprime konkrete për përmirësimin e gjendjes së sigurisë dhe shëndetit në punë.

    Sa i përket shpërndarjes së inspektimeve në komunat kryesore të vendit, raporti tregon se në Prishtinë janë inspektuar 12 vendpunishte, në Fushë Kosovë 10, në Ferizaj 13, në Gjilan 12, në Mitrovicë 13, në Lipjan 12, në Podujevë 11, në Drenas 11 dhe në Gjakovë 16.

    Për gjendjen në këtë sektor ka reaguar edhe kryetari i Sindikatës së Pavarur të Sektorit Privat të Kosovës, Jusuf Azemi, i cili ka vlerësuar se mungesa e vigjilencës dhe pakujdesia e pronarëve të kompanive ndërtimore mbeten ndër arsyet kryesore të vdekjeve në vendin e punës.

    Sipas tij, problemet nuk lidhen vetëm me mungesën e kushteve teknike, por edhe me dënimet e buta që shqiptohen ndaj kompanive që shkelin rregullat e sigurisë.

    Azemi ka deklaruar se edhe dënimet nga gjykatat dhe nga inspektorët janë shumë të lehta dhe nuk krijojnë efekt parandalues.

    Ai ka theksuar se kur një punëtor humb jetën në vendin e punës, shpeshherë pronari apo menaxheri i kompanisë ndalohet vetëm për 48 orë dhe më pas lirohet, gjë që sipas tij nuk përkon me seriozitetin e pasojave.

    “Edhe dënimet e gjykatave edhe të inspektorëve janë aq të buta sa që s’mund të marrësh me mend. Kur e shohim që një punëtor vdes në vendin e punës, një pronar ose menaxher i kompanisë mund të mbahet për 48 orë në stacionin e policisë dhe pastaj është i lirë. Mendoj që Inspektorati Qendror i Punës duhet të pajiset më shume me inspektorë të punës, inspektorë që dinë të zbatojnë Ligjin mbi Sigurinë dhe Shëndetin në rend të parë. Në rend të dytë, të jenë më vigjilent dhe rastet që i shohin se janë me rrezikshmëri duhet t’i mbyllin deri në një kohë të caktuar”, theksoi Azemi.

    Kreu sindikal ka kërkuar që Inspektorati Qendror i Punës të pajiset me më shumë inspektorë profesionalë, të trajnuar për zbatimin e Ligjit për Sigurinë dhe Shëndetin në Punë.

    Po ashtu, ai ka kërkuar që rastet me rrezikshmëri të lartë të mbyllen menjëherë deri në eliminimin e plotë të rreziqeve.

    Sipas Azemit, rreth 70 për qind e rasteve të vdekjeve në vendin e punës në Kosovë vijnë pikërisht nga sektori i ndërtimtarisë, ndërsa mosha mesatare e viktimave është vetëm 38 vjeç.

    Sipas tij, nëse respektohet Ligji për Sigurinë dhe Shëndetin në Punë, shumë prej këtyre rasteve tragjike mund të shmangen dhe numri i aksidenteve do të binte ndjeshëm.

    Aksioni i nisur në fillim të kësaj jave do të zgjasë gjithsej 15 ditë dhe do të shtrihet në shtatë rajone të Kosovës, me synim identifikimin e shkeljeve, përmirësimin e kushteve të punës dhe parandalimin e rasteve të reja fatale në vendpunishte.

  • Haxhiu: Bordi i Paqes më 27 prill në Kuvend

    Haxhiu: Bordi i Paqes më 27 prill në Kuvend

    Kryetarja e Kuvendit, Albulena Haxhiu pas mbledhjes së Kryesisë ka deklaruar se është vendosur që më 27 prill të mbahet seancë plenare, por se kjo nuk do të jetë për presidentin.

    Ajo, ka thënë se në seancën e 27 prillit do të adresohen çështje me rëndësi, përfshirë këtu edhe shqyrtimin e Projektligjit nr.10/L-007 për anëtarësimin e Republikës së Kosovës në Bordin e Paqes

    “Do të doja të ishte ashtu, por ende jemi në pritje të një konsensusi sa i përket çështjes së presidentit”, tha ajo.

    “Kryesia e Kuvendit vendosi që më 27 prill në orën 10:00 të mbajë një seancë të re, për t’i adresuar disa çështje shumë të rëndësishme, dhe në këtë drejtim është anëtarësimi i Kosovës në Bordin e Paqes”, u shpreh Haxhiu.

  • Përplasja e trenave në Danimarkë, raportohet për 17 të lënduar

    Përplasja e trenave në Danimarkë, raportohet për 17 të lënduar

    Dy trena lokalë u përplasën ballë për ballë në Danimarkë të enjten, duke lënë të lënduar të paktën 17 persona, katër prej të cilëve janë në gjendje kritike, tha shërbimi i emergjencës për Reuters.

    Transmetuesi publik DR tregoi imazhe të dy trenave të verdhë dhe gri, të dy me dëmtime të dukshme në pjesën e përparme, përballë njëri-tjetrit në një zonë të pyllëzuar, raporton Reuters.

    Incidenti ndodhi në veri të Kopenhagës, në një linjë treni që lidh qytetet Hillerod dhe Kagerup, tha policia në një deklaratë.

  • Gjuha seksiste e Gecit ndaj Çitakut, Tahiri: Ajo është frymëzim për të vazhduar përpara

    Gjuha seksiste e Gecit ndaj Çitakut, Tahiri: Ajo është frymëzim për të vazhduar përpara

    Shefi i Grupit Parlamentar të PDK-së, Arian Tahiri ka thënë fjalë miradije për Sekretaren e Përgjithshme të kësaj partie, Vlora Çitakun, njëherësh nënkryetaren e Kuvendit.

    Përmes një postimi në Facebook, Tahiri thotë se për Çitakun ka mirënjohje pasi sipas tij, ajo ngriti zërin e Kosovës në botë dhe kontribuoi në forcimin e saj si shtet.

    “Ka momente kur ndalesh dhe reflekton për rrugën që kemi bërë si vend. Me mirënjohje për ata që e ngritën zërin e Kosovës në botë dhe kontribuuan në forcimin e saj si shtet, si Vlora Çitaku, që me dinjitet dhe guxim e mbrojti Kosovën në OKB. Frymëzim për të vazhduar përpara, me më shumë përkushtim, përgjegjësi dhe dashuri për vendin tonë”, ka shkruar Tahiri.

    Reagimi i deputetit vjen pasi Fatos Geci nga VV ka fyer rëndë nënkryetaren e Kuvendit duke përdorur gjuhë seksiste ndaj saj.

    “I ke bë 100 vjet, ke mbetë pa martu. Gru e keqe”, i ka thënë deputeti Geci, Çitakut.

  • Ilir Kërçeli reagon me një video pasi Gecët thanë se ai ia ka dhënë Fatosit fjalimin për Thaçin

    Ilir Kërçeli reagon me një video pasi Gecët thanë se ai ia ka dhënë Fatosit fjalimin për Thaçin

    Deputeti i Vetëvendosjes Ilir Kërçeli, i ka reaguar familjes Geci, të cilët mbrëmë thanë se fjalimin të cilin e lexoi deputeti tjetër i VV-së Fatos Geci, ishte shkruar nga ai.

    Nëpërmjet një videoje në Facebook, Kërçeli tha se deklaratat e familjes Geci, i lexoi sot në mëngjes.

    “Deputeti në fjalë, Fatos Geci ka deklaruar se fjalimin e ka shkruar vet. Sa më përket mua për qëndrimin tim për krerët e UÇK-së në Hagë, dihet publikisht”, ka thënë deputeti Kërçeli.

    Ai thotë se ka qenë në vizitë në Hagë si dhe ka bërë thirrje publike për pjesëmarrje në protestën për krerët e UÇK-së në Hagë.

    “Para disa jave në Komisionin për Buxhet dhe financa, kam votuar për buxhet shtesë për të akuzuarit në Hagë”, ka vazhduar Kërçeli.

    E lutem sot e dje e çdo ditë që sa më parë ata të lirohen e të kthehen tek familjarët e tyre. E ndjeva obligim moral këtë sqarim edhe pse dihet botërisht”, tha ai.

  • 50 ditë nga fillimi i Kupës së Botës, cilat janë pesë problemet kryesore që po e përcjellin turneun?

    50 ditë nga fillimi i Kupës së Botës, cilat janë pesë problemet kryesore që po e përcjellin turneun?

    Me 50 ditë deri në nisjen e Kupës së Botës, FIFA dhe shtetet nikoqire po përballen me kritika për çështje sociale, politike dhe logjistike që po e rrethojnë turneun.

    Kanadaja dhe Meksika do ta bashkëorganizojnë turneun me Shtetet e Bashkuara, të cilat së bashku me Izraelin më 28 shkurt nisën një luftë kundër Iranit, shtet pjesëmarrës në Kupën e Botës. Edhe pse lufta është aktualisht nën një armëpushim të përkohshëm dhe të brishtë, pjesëmarrja e Iranit mbetet e paqartë.

    Tifozët në të tri vendet nikoqire po reagojnë ashpër edhe ndaj çmimeve të larta të biletave, ndërsa politikanë lokalë dhe publiku kanë shprehur shqetësime për rritjen e tarifave të transportit në linjat që lidhin stadiumet në SHBA.

    Al Jazeera Sport sjell një pasqyrë të shqetësimeve kryesore në prag të turneut, që nis më 11 qershor me ndeshjen hapëse mes Meksikës dhe Afrikës së Jugut.

    Çfarë është më e fundit rreth pjesëmarrjes së Iranit në Kupën e Botës?

    Kombëtarja e Iranit po vazhdon përgatitjet, por zyrtarët kanë bërë të ditur se vendimi përfundimtar për pjesëmarrjen do të merret nga qeveria dhe Këshilli i Sigurisë Kombëtare, pasi të shqyrtohet siguria e lojtarëve në SHBA.

    Irani kishte deklaruar muajin e kaluar se mund të mos marrë pjesë, sidomos nëse vendi nikoqir nuk garanton sigurinë e ekipit. Kjo erdhi pas një postimi në rrjete sociale nga presidenti Donald Trump, ku ai sugjeroi se siguria e ekipit iranian nuk mund të garantohej në SHBA vend ku Irani pritet t’i luajë të gjitha ndeshjet e grupit.

    Federata iraniane më pas i kërkoi FIFA-s t’i zhvendoste ndeshjet e Iranit nga SHBA në Meksikë, por FIFA e refuzoi kërkesën. Presidenti i FIFA-s, Gianni Infantino, deklaroi javën e kaluar se Irani “duhet të vijë” në turne.

    Irani do t’i luajë të gjitha ndeshjet e fazës së grupeve në Bregun Perëndimor të SHBA-së. Nëse kalon tutje, edhe ndeshjet e fazës me eliminim do të zhvillohen po në SHBA.

    Çmime të larta të transportit në qytetet nikoqire në SHBA

    Tifozët pritet të paguajnë gati 12 herë më shumë se tarifa e zakonshme prej 12.90 dollarësh për një udhëtim vajtje-ardhje me tren nga Penn Station në Manhattan drejt stadiumit MetLife në East Rutherford, New Jersey stadiumi ku do të luhet finalja e Kupës së Botës dhe edhe shtatë ndeshje të tjera.

    Guvernatorja e New Jerseyt, Mikie Sherrill, dhe FIFA janë kritikuar reciprokisht për çmimin prej 150 dollarësh për një udhëtim rreth 15-minutësh (14 km). Sherrill ka thënë se FIFA duhet t’i mbulojë kostot, ndërsa FIFA ka reaguar se nuk është e obliguar ta bëjë këtë.

    Në Boston, udhëtimi me tren drejt stadiumit Gillette kushton rreth katër herë më shumë se çmimi normal (rreth 20 dollarë), ndërsa autobusi vajtje-ardhje drejt Foxborough arrin 95 dollarë.

    Los Angeles dhe Philadelphia janë zotuar se nuk do t’i ndryshojnë tarifat. Kansas City ofron 15 dollarë vajtje-ardhje drejt stadiumit Arrowhead. Houston ka shtuar autobusë dhe vagona treni, por synon t’i mbajë tarifat aktuale: 1.25 dollarë për autobusët dhe trenat e lehtë, si dhe opsione parkim+transport nga 2 deri në 4.50 dollarë.

    Çmime të larta të biletave, kërkesë më e ulët

    Çmimet e larta të biletave kanë shkaktuar zemërim te tifozët, të cilët thonë se politika e çmimeve po i përjashton mbështetësit e zakonshëm. Raportohet se shitjet për disa ndeshje të mëdha kanë mbetur prapa pritshmërive, çka shihet si pasojë e çmimeve.

    FIFA i nxori biletat në shitje në dhjetor me çmime nga 140 dollarë (Kategoria 3 në raundin e parë) deri në 8.680 dollarë për finalen. Më pas, kur shitja u rihap më 1 prill, çmimet u rritën deri në 10.990 dollarë.

    Kandidatura e Amerikës së Veriut kishte premtuar bileta deri në 21 dollarë, por bileta më e lirë është vendosur 60 dollarë. Shumica e biletave kushtojnë të paktën 200 dollarë për ndeshjet me ekipe më të forta.

    FIFA ka paralajmëruar edhe një raund tjetër shitjesh, në përputhje me numërimin mbrapsht prej 50 ditësh: biletat do të jenë të disponueshme në kategoritë 1-3 për të gjitha 104 ndeshjet, me parimin “i pari vjen, i pari shërbehet”.

    Kundërshtime për bastisjet ndaj emigrantëve gjatë ndeshjeve

    Politikat e administratës Trump për deportime masive dhe shtrëngim të emigracionit ligjor kanë ngritur frikë se audienca ndërkombëtare e Botërorit mund të vihet në shënjestër nga autoritetet amerikane të emigracionit.

    Javën e kaluar, Infantinos iu kërkua të ushtrojë presion që të shmangen bastisjet gjatë turneut. Gazetarë sugjerojnë se agjentë të ICE dhe CBP kanë qenë të pranishëm në ndeshjet e Kupës së Botës për Klube vitin e kaluar, edhe pse administrata Trump ka mohuar se ka pasur operacione zbatimi.

    Sipas The Athletic, drejtues të FIFA-s e kanë paraqitur idenë e një moratoriumi të përkohshëm si përfitim të mundshëm për imazhin e administratës, dhe shpresojnë që Infantino ta përdorë marrëdhënien e tij me Trumpin për të ulur frikën e tifozëve.

    Dhuna në Meksikë ngre alarm për sigurinë e turneut

    Meksika po përballet me shqetësime për sigurinë pas një sulmi ndaj turistëve pranë kryeqytetit. Të hënën, një sulmues i vetëm hapi zjarr në Teotihuacan vend i Trashëgimisë Botërore të UNESCO-s dhe një nga atraksionet më të vizituara në Meksikë duke vrarë një turist kanadez dhe duke plagosur 13 të tjerë.

    Ngjarja ka shtuar pyetjet mbi protokollet e sigurisë të qeverisë së presidentes Claudia Sheinbaum në prag të turneut. Sheinbaum ka thënë se Meksika do ta forcojë sigurinë.

    “Detyrimi ynë si qeveri është të marrim masat e duhura që një situatë e tillë të mos përsëritet. Por është e qartë se kjo është diçka që nuk kishte ndodhur më parë”, tha ajo.

  • FSK-ja ndan detaje nga vizita disaditore e gjeneralit Osborn

    FSK-ja ndan detaje nga vizita disaditore e gjeneralit Osborn

    Adjutanti i përgjithshëm i Gardës Kombëtare të Iowas (GKA), gjeneralmajor Stephen Osborn, ka realizuar vizitë disa-ditore në Forcën e Sigurisë së Kosovës.

    Fillimisht, ai u prit në takim nga komandanti i FSK-së, gjenerallejtënant Bashkim Jashari, ku u diskutua mbi bashkëpunimin e shkëlqyer në kuadër të Programit të Partneritetit Shtetëror ndërmjet FSK-së dhe GKA-së.

    Në vazhdën e agjendës, gjeneral Osborn vizitoi Shtabin e Përgjithshëm të FSK-së, ku u njoftua me zhvillimet kryesore në ngritjen e kapaciteteve operacionale, aktivitetet trajnuese, duke u fokusuar në linjat kryesore të përpjekjes si pjesë e planifikimit të përbashkët.

    “Gjithashtu, ai vizitoi edhe Gardën Kombëtare (GK), ku iu prezantua zhvillimi dhe kapacitetet specialistike, sfidat aktuale dhe objektivat zhvillimore të kësaj komande për të ardhmen. Në këtë rast, u diskutua edhe mundësia e zgjerimit të bashkëpunimit në aktivitete të përbashkëta në fushat ku Garda Kombëtare është e specializuar” njofton FSK-ja.

    Gjenerali Osborn falënderoi gjeneral Jasharin për pritjen dhe vlerësoi lart progresin e FSK-së, duke rikonfirmuar mbështetjen për avancimin e mëtejmë të kapaciteteve operacionale në përmbushje të misionit kushtetues dhe ligjor të forcës.

  • Me 25 minuta vonesë, fillon mbledhja e Kryesisë së Kuvendit

    Me 25 minuta vonesë, fillon mbledhja e Kryesisë së Kuvendit

    Kryesia e Kuvendit është mbledhur sot, për të diskutuar pikat e rendit të ditës për seancën plenare.

    Ndonëse takimi ishte njoftuar të fillojë në orën 09:00, nisja vonoi 25 minuta.

    E kryesuar nga kryetarja e Kuvendit, Albulena Haxhiu, në mbledhje do të diskutohet pikat si në vijim:

    I. Miratimi i procesverbalit të mbledhjes së mëparshme të Kryesisë së Kuvendit,

    II. Propozimi i rendit të ditës për Seancën plenare të radhës:

    1. Shqyrtimi i Projektligjit nr.10/L-007 për anëtarësimin e Republikës së Kosovës në Bordin e Paqes,

    2. Shqyrtimi i Projektligjit nr.10/L-040 për Ratifikimin e Marrëveshjes ndërmjet Qeverisë së Republikës së Kosovës dhe Këshillit të Ministrave të Republikës së Shqipërisë për Lojërat Mesdhetare Prishtina 2030,

    3. Shqyrtimi i parë i Projektligjit nr.10/L-031 për Energjinë,

    4. Shqyrtimi i parë i Projektligjit nr.10/L-032 për Energjinë Elektrike,

    6. Shqyrtimi i parë i Projektligjit nr.10/L-044 për Inspektoratin Qendror të Trashëgimisë Kulturore,

    6. Emërimi i tre (3) anëtarëve të Këshillit Shtetëror të Cilësisë, të Agjencisë së Kosovës për Akreditim,

    7. Shqyrtimi i Propozim-vendimit të Qeverisë së Republikës së Kosovës për formimin e Komisionit për dhënien e Provimit të Jurisprudencës.

    III. Shqyrtimi i propozimeve dhe i kërkesave

    Mbledhja e Kryesisë i paraprin seancës plenare që fillon në orën 10:00.

  • Gërxhaliu: Projekti “The Prishtina Film City” rrezikon të dështojë, humbin mbi 3 mijë vende pune

    Gërxhaliu: Projekti “The Prishtina Film City” rrezikon të dështojë, humbin mbi 3 mijë vende pune

    Ekonomisti dhe ish-kryetari i Odës Ekonomike të Kosovës, Safet Gërxhaliu, ka ngritur shqetësime lidhur me fatin e projektit “The Prishtina Film City”, duke vlerësuar se ai po përballet me rrezik serioz për dështim në Kosovë.

    Në një analizë të publikuar, Gërxhaliu ka theksuar se ky projekt nuk është vetëm një ide zhvillimore, por edhe një test për mënyrën se si vendi trajton investimet e huaja.

    “Rasti i projektit ‘The Prishtina Film City’ nuk është vetëm një projekt i madh në letër, por një test i qartë për mënyrën se si Kosova i trajton investimet e huaja dhe idetë transformuese zhvillimore”, ka deklaruar ai.

    Sipas tij, projekti parasheh ndërtimin e një kompleksi prej 65 hektarësh në Prishtinë, me studio filmike dhe infrastrukturë të modeluar sipas industrisë amerikane të filmit.

    “Nëse do të realizohej, ky projekt do ta poziciononte Kosovën në hartën globale të industrisë kreative”, ka theksuar Gërxhaliu.

    Ai ka përmendur edhe ndikimin potencial në punësim, duke theksuar se projekti parashikon rreth 3 mijë vende pune direkte.

    “Në një ekonomi si Kosova, ku papunësia e të rinjve mbetet sfidë strukturore, një impakt i tillë do të ishte i rëndësishëm, nëse shifrat do të shoqëroheshin me plan real implementimi”, është shprehur ai.

    Sa i përket aspektit financiar, Gërxhaliu ka bërë të ditur se investimi i parashikuar arrin në rreth 150 milionë euro, me potencial për të gjeneruar të ardhura të konsiderueshme vjetore.

    “Nëse këto projeksione do të ishin të mbështetura në studime serioze fizibiliteti dhe kontrata reale investimi, atëherë do të flisnim për një nga projektet më transformuese në rajon”, ka shtuar ai.

    Megjithatë, ai ka ngritur dilema për kapacitetin institucional të vendit për ta realizuar një projekt të tillë.

    “Pa studim të pavarur fizibiliteti, siguri të investitorëve dhe kornizë të qartë implementimi, çdo projekt i tillë rrezikon të mbetet në nivel koncepti”, ka theksuar Gërxhaliu.

    Sipas tij, mungesa e dinamikës dhe seriozitetit në proces ka krijuar pasiguri te investitorët potencialë, pavarësisht se projekti ishte premtuar nga autoritetet komunale.

    “Nëse kemi arritur në një situatë ku projekte të nivelit ‘Hollywood’ nuk arrijnë të kalojnë filtrin e realizueshmërisë në Kosovë, atëherë sfida nuk është mungesa e investitorëve, por mungesa e besimit dhe kapacitetit institucional për t’i absorbuar ato”, ka deklaruar ai.

    Gërxhaliu ka theksuar edhe rëndësinë e diplomacisë kulturore dhe potencialin që ka Kosova në këtë drejtim, duke përmendur vizitat e figurave të njohura ndërkombëtare, si Gérard Depardieu, Maria Grazia Cucinotta, Tony Robinson, William Baldwin, Denis O’Hare dhe Louis Mandylor.

    “Zhvillimi ekonomik nuk matet me madhësinë e projekteve në letër, por me aftësinë për t’i kthyer ato në realitet të qëndrueshëm”, ka përfunduar ai, duke shtuar se projekti mund të realizohet, por rrezikon të mos ndodhë në Kosovë.