ATV

Blog

  • Aplikimi për BE simbolik – procesi mund të zgjasë 30 vjet, ish-kolegët thonë se Kurti po fokusohet veç në dialog

    Aplikimi për BE simbolik – procesi mund të zgjasë 30 vjet, ish-kolegët thonë se Kurti po fokusohet veç në dialog

    Ish-bashkëpartiakët e kryeministrit Albi Kurti, e kanë kritikuar qasjen e Qeverisë së tij sa i përket procesit të integrimit në arenën ndërkombëtare.

    Sipas tyre kjo Qeveri gjatë këtyre viteve më shumë ka pasur çnjohje se sa njohje të reja. Ata kanë shtuar se Qeveria është fokusuar më shumë në çështjen e dialogut me Serbin edhe pse kjo nuk ka qenë fillimisht prioritet.

    Sa i përket aplikimit të Kosovës për statusin e vendi kandidat në Bashkimin Evropian, ata thonë se ky proces lidhte me suksesin që do të ketë procesi i dialogut me Serbinë.

    Ish-anëtari i Vetëvendosjes, Nol Nushi, tani sekretar organizativ në Partinë Socialdemokrate, ka thënë se aplikimi i Kosovës për statusin e vendit kandidat në BE është më shumë si një aplikim simbolik, pasi sipas tij, ky proces do të zgjas deri në 30 vjet që të përfundoj.

    “Unë atë e kam parë më shumë si aplikim simbolik duke e parë situatën edhe luftës në Ukrainë ku u angazhuan në NATO Finlanda dhe ndodhën disa zgjerime kështu të përshpejtuara edhe Kosova e bëri këtë aplikim në këtë linjë, me demek krahu perëndimorë kundër Rusisë. Nuk shohë ndonjë zhvillim të shpejt aty sepse edhe po të pranohen duan 20-30 vite që të përfundoj, në rastin më të mirë. Kështu që nuk besoj që është temë që ka me na brengos së shpejti”, tha ai.

    Ai tha se fati i Kosovës është lidhur me fatin e dialogut me Serbinë. Nushi shton se për dy vjet në këtë qeverisej më shumë ka pasur çnjohje se sa njohje të reja, e krejt kjo ai thekson që ka ndodhur si shkak i qasjes së gabueshme të Qeverisë.

    “Fati i shtetit të Kosovës praktikisht është lidh me fatin e dialogut me Serbin, krejt këta qeveritar sot që qeverisin kanë thënë dikur që neve nuk kemi njohje sepse ka korrupsion, ka keq qeverisje, janë të pa aftë qeveritë. Për dy vitet të Kurtit ka më shumë çnjohje, se njohje nuk ka hiq edhe ne gjithmonë kemi qen pro dialogut dhe pro kompromisit në dialog në mënyrë që problemi i Kosovës të zgjidhte një herë e përgjithmonë ndërkombëtarisht”.

    “Ne e konsiderojmë Kosovën shtet të pa varur dhe sovran, problemi është që shumica e botës, e shteteve nuk po na konsiderojnë të tillë. Qysh ndodh ko ndodhë duke e zgjidh problemin me Serbinë. Këtu nuk po më duket se ka qasje nga qeveria jonë, qasje që donë me zgjidh problemin që ta përfundojmë këtë problem. Më shumë po duket një tentativë e Kurtit edhe e Vuçiqit që të investojnë në këtë problem vazhdimisht, që të mos ndalet sepse po ju shërben për elektorat të brendshëm. Në këtë linjë nuk shoh ndonjë përparim të njohjeve, fatkeqësia ke që edhe mas marrëveshjes Ohrit, shtet si Spanja, Greqi që pritej që do të na njeh deklaruan nga Beogradi që nuk ndryshojnë ndryshim. Perspektiva është e zymtë sepse qasja e qeverisë është problematike”, tha ai.

    Ish-deputeti i VV-së Afrim Kasolli, tha se të gjitha proceset e agjendës integruese të Kosovës krahas plotësimit të kritereve, lidhen edhe me suksesin që do ta ketë dialogu Kosovë- Serbi.

    “Sa i përket në përgjithësi agjendës integruese, krahas plotësimit të kritereve të brendshme në mas shumë të madhe do të varet edhe nga dinamikat e dialogut. Në fund të fundit të gjitha raportet e progresit si për Kosovës e po ashtu edhe për Serbinë që janë bërë deri më tani në mënyrë eksplicite e theksojnë se njëri prej kritereve në agjendën integruese të të dyja vendeve është edhe suksesi në dialog. Krahas plotësimit të kritereve të domosdoshme që janë të parapara edhe ky dimension është një kusht i pa tej kalueshëm për të pasur sukses”, tha ai.

    Kasolli i tha Ekonomia Online se Qeveria e Kosovës deri më tani ka qenë e fokusuar në temën e dialogut me Serbinë, prandaj sipas tij, në politikën e jashtme nuk ka asnjë njohje.

    “Në përgjithësi nuk e ka karakterizuar ndonjë dinamik specifike, madje nuk ka qenë thuajse temë kryesore. Qeveria e Kosovës deri më tani kryesisht ka qenë e fokusuara në temën e dialogut, kjo ka qenë tema qendrore, dominuese në politikën e saj të jashtme nuk kemi asnjë njohje, nuk kemi diçka tjetër pavarësisht faktit që premtimi kryesor i Qeverisë ka qenë që tema e dialogut nuk do të jetë prioritet për të. Por praktikat ka dëshmuar që kjo është shndërruar në prioritet politik të saj”, tha ai. /EO

  • 2 maji, Kurti dhe Vuçiqi kërkojnë zgjidhje për Asociacionin

    2 maji, Kurti dhe Vuçiqi kërkojnë zgjidhje për Asociacionin

    Bashkimi Evropian tha të premten se presidenti i Serbisë, Aleksandar Vuçiç dhe kryeministri i Kosovës Albin Kurti, e kanë konfirmuar pjesëmarrjen në takimin e radhës në Bruksel në kuadër të bisedimeve për zbatimin e një marrëveshjeje të mbështetur nga perëndimi për normalizimin e marrëdhënieve ndërmjet të dyja vendeve.

    Takimi që pritet të mbahet në orët e mbrëmjes është i pari i nivelit të lartë politik pas pajtimit në Ohër për rrugën e zbatimit të marrëveshjes që u arrit më 27 shkurt në Bruksel.

    “Pritet të miratojnë deklaratën për personat e zhdukur si pikë të parë të rendit të ditës dhe kjo do të pasohet me paraqitjen dhe diskutimet rreth kuadrit të parë të statutit për formimin e Asociacionit të komunave me shumicë serbe. Pas këtyre dy temave do të shihet sesa mund të diskutohet edhe për çështje të tjera të rëndësisë politike”, tha zëdhënësi i Komisionit Evropian, Peter Stano.

    Diplomatët perëndimor presin nga udhëheqësit e Kosovës dhe Serbisë që gjatë takimit të dy majit të arrijnë përparim në zbatimin e marrëveshjes.

    Këshilltari i Departamentit amerikan të Shtetit, Derek Chollet, shkroi pas një bisede telefonike me presidentin e Serbisë, Aleksandar Vuçiç, se pret një takim konstruktiv dhe përparim në dialog, posaçërisht për formimin e Asociacionit.

    Ekipi menaxhues për hartimin e statutit të kërij asociacioni që përbëhet nga katër pjesëtarë të komunitetit serb, përfshirë një deputete të parlamentit të Serbisë, tashmë ka filluar punën në hartimin e statutit që pritet të paraqitet në tryezën e bisedimeve.

    Ministri i Administrimit të Pushtetit Lokal, Elbert Krasniqi, shkroi se sipas një vendimi të vitit 2020 parashihet që Ekipi Menaxhues të bashkërendohet më ministrinë e tij dhe t’i raportojë asaj. Por, ky ekip, tha ai, nuk i është përgjigur një ftese për takim.

    Kryetari i Parlamentit të Kosovës, Glauk Konjufca, tha se mos raportimi nga ana e ekipit menaxhues është qasje e papërgjegjshme ndaj institucioneve të vendit.

    “Unë nuk pres ndonjë gjë të mirë nga një kryesuese e këtij Ekipi menaxhues e cila është deputete e Aleksandar Vuçiçit dhe deputetja e Aleksandar Vuçiçit nuk mundet me shkrujt pjesë të rregullimit institucional të Republikës së Kosovës, kjo është ABC e interesit tonë publik dhe shtetëror”, tha ai.

    Konjufca tha se Ekipi menaxhues duhet të përbëhet nga njerëz të Kosovës që nuk e përfaqësojnë në asnjë mënyrë interesin e Serbisë. Ai tha se Kosova nuk do të pranojë asgjë nga ky ekip që është në shpërputhje me Kushtetutën e Kosovës.

    “Ata e kanë nënshkruar edhe me 2015 marrëveshjen për Asociacionin por më e lartë është Kushtetuta jonë, më e lartë është Gjykata jonë Kushtetuese e cila e ka rrëzuar atë poshtë. Kështu që nëse nisemi nga ky princip, nëse e mbajmë këtë drejtim edhe mundësia e Ekipit menaxhues edhe e (Aleksandar) Vuçiçit për të dëmtuar Kosovën nëse ne i mbajmë interesat tona, nëse ne nuk bëjmë kompromis me kushtetutën tonë, hapësira e tyre është faktikisht fiktive për t’i bërë dëm Kosovës”, tha zoti Konjufca.

    Udhëheqësit e Serbisë dhe të serbëve lokal në veriun e Kosovës thonë se kusht për kthimin e serbëve në institucionet e Kosovës është themelimi i Asociacionit të komunave me shumicë serbe dhe me 23 prill bojkotuan zgjedhjet e organizuara nga autoritetet e Kosovës në veriun e banuar më shumicë serbe.

    Kuvendi komunal i Mitrovicës së Veriut ku shumicë janë përfaqësuesit e komunitetit shqiptar pas largimit të përfaqësuesve serbë nga institucionet e Kosovës miratoi dje një kërkesë që të hapet për lëvizjen e lirë të makinave ura kryesore mbi lumin Ibër, që shënon edhe vijën ndarëse me komunën e Mitrovicës së Jugut.

    Kjo kërkesë nxiti reagimin e presidentit të Serbisë, Aleksandar Vuçiç, i cili tha se kryeministri i Kosovës, Albin Kurti, me këtë kërkesë dëshiron të largojë serbët nga Kosova, dhe se po dëshiron konflikte me çdo kusht.

    Ura kryesore mbi lumin Ibër, që nga paslufta ka ndarë Mitrovicën e Jugut të banuar me shqiptarë dhe të veriut të banuar me serbë ndërsa ende mbetet e mbyllur për lëvizjën e makinave. Hapja e saj ishte pjesë e marrëveshjes së arritur në vitin 2015 ndërmjet Kosovës dhe Serbisë, por nuk është zbatuar kurrë.

  • Rama: Nga vendet e rajonit, vetëm në Kosovë dhe Shqipëri nuk ka ndikim rus

    Rama: Nga vendet e rajonit, vetëm në Kosovë dhe Shqipëri nuk ka ndikim rus

    Në Forumin Ekonomik Delphi në Athinë, kryeministri i Shqipërisë Edi Rama, ka thënë se Shqipëria dhe Kosova janë dy vendet e Ballkanit Perëndimor, në të cilat Rusia nuk ka ndikim.

    Rama ka thënë se dialogu Kosovë Serbi është ende çështje e madhe dhe zgjidhja do të thotë të mbyllësh një kapitull përgjithmonë.

    “Kjo është diçka shumë e rëndësishme dhe strategjike, marrëdhëniet janë shumë më mirë se ç’kanë qenë më përpara, ekziston mungesa e stabilitetit”, tha Rama, transmeton tch.

    Ai tha se duket sikur rusët duan të ndezin fitilin.

    “Kur flitet për gjeopolitikën e Ballkanit Perëndimor kemi një marrëdhënie shumë komplekse, Shqipëria, Maqedonia dhe Mali i Zi. Shqipëria nuk ka fare lidhje me ndikimin rus ndërsa dy të tjerat janë nën influencën ruse ndërkohë është edhe Serbia dhe Bosnja me ndikim rus ndërsa Kosova është si ne. Në Serbi ndikimi rus është deri në 70% krahasuar me Shqipërinë që mund të jetë deri në 1.2%”, ka thënë kryeministri Rama.

    Ai tha se Shqipëria Kosova, Maqedonia dhe Mali i Zi kanë miratuar sanksionet ndërsa Serbia nuk e ka bërë, kjo mund të jetë një pikë kthese. “Ne kemi përqafuar 100% sanksionet dhe nuk është problem për ne ndërsa në rastin e Serbisë sanksionet do të përktheheshin në mungesë gazi kështu që është më mirë të ecim me hapa të qëndrueshëm drejt unifikimit të sanksioneve”.

    “Duhet të mbajmë parasysh faktin që Vuçiq është në situatë të vështirë, jo vetëm ai por kushdo të ishte në drejtimin e Serbisë, ku popullariteti i Putinit është më i madhe se i tij, mendoj se po bën gjënë e duhur. Ne kemi mbështetur Ukrainën gjatë gjithë kohës por duhet të përkufizojmë që çfarë ndodh nëse Ukraina fiton luftën dhe për sa kohë nuk kemi përkufizim të saktë duhet të mbijetojmë me shkatërrimin e përgjakshëm dhe të ngrirë, kjo është diçka që mund të vazhdojë përgjithmonë, tha Rama.

  • IKD: Kuvendi u injorua nga Qeveria

    IKD: Kuvendi u injorua nga Qeveria

    Instituti i Kosovës për Drejtësi e ka vlerësuar të dobët punën e Kuvendit të Kosovës gjatë vitit 2022.

    IKD ka thënë se Kuvendi nisi punën pa miratuar Programin e Punës për vitin 2022, edhe pse një program i tillë parashihet me Rregulloren e Kuvendit të Kosovës, dhe pa miratuar edhe programin e punës të sesionit vjeshtor në seancë plenare.

    Ndërsa, tha se viti 2022 e karakterizoi Kuvendin me numër të madh të pikave të rendit të ditës nga seancat e mbetura nga viti 2021.

    “Seancat e rregullta të Kuvendit janë karakterizuar me vazhdime të shumta të seancave, që përbëjnë 53% të totalit të seancave të rregullta. Kontrolli parlamentar lidhur me punën e qeverisë dhe mbikëqyrjes së institucioneve të pavarura pothuajse ka qenë inekzistent. Në së paku 18 raste, Kuvendi ka dështuar të miratojë raportet vjetore të institucioneve kushtetuese dhe agjencive të pavarura. Po ashtu, ka dështuar në 18 raste të zgjedhë organet kolegjiale dhe inviduale, duke bërë pengesë të funksionimit të tyre”, thuhet në raportin e IKD-së nga monitorimi i punës së Kuvendit për vitin 2022.

    Sa i përket llogaridhënies së Qeverisë përballë Kuvendit, IKD-ja ka gjetur se Kuvendi u injorua nga Qeveria, përderisa Kryetari i Kuvendit apo Kryesuesi i seancës nuk morën masa ndaj Qeverisë, ashtu siç kërkohet me Rregullore.

    “Edhe kjo legjislaturë, është karakterizuar nga gjuha jo parlamentare, polarizimi i skajshëm ndërmjet deputetëve dhe grupeve parlamentare dhe po ashtu ndërmjet deputetëve dhe kabinetit qeveritar”, thotë raporti i cili është prezantuar nga Naim Jakaj.

    Në raport thuhet se gjatë vitit të kaluar 9% e deputetëve janë përballur me ligjin.

    Kurse, theksohet se transparenca dhe llogaridhënia e Kuvendit mbetet sfidë.

    “Mbledhjet e komisioneve parlamentare vazhdojnë të mos transmetohen nga Kuvendi. Ndërsa jashtë funksionit mbetet votimi elektronik në seancat plenare, duke pamundësuar informimin e qytetarëve për votat e tyre”.

    Në lidhje me aktivitetin legjislativ, puna e Kuvendit është përcjellë me joefikasitet, sipas IKD-së.

    “Në secilën seancë plenare, projektligjet janë bartur nga një seancë në tjetrën për shkak të mungesës së kuorumit nga ana e shumicës parlamentare dhe mos pjesëmarrjes së opozitës në procesin e votimit. Në fund të vitit 2022, Kuvendi nuk i ka shqyrtuar në parim nëntë projektligje dhe në lexim të dytë dy projektligje. Përkundër faktit që i ka shqyrtuar, Kuvendi nuk ka arritur të vendosë për tre projektligje në lexim të parë dhe për një projektligj në lexim të dytë. Këto projektligje janë bartur për shqyrtim dhe votim në sesionin pranveror të vitit 2023”.

    Kuvendi, për më tej, nuk e ka votuar asnjë projektligj të sponsorizuar nga ana e grupeve parlamentare opozitare (4 prej tyre), në ndërkohë ka votuar për dy projektligje të sponsorizuara nga grupi parlamentar i shumicës parlamentare.

    Jakaj ka thënë se Kuvendi ka rritur përdorimin e praktikës së shmangies së afateve të parapara me rregulloren e Kuvendit në lidhje me shqyrtimin e projektligjeve të rëndësishme.

    “11% e projektligjeve janë miratuar në procedurë të përshpejtuar, ku në të shumtën e rasteve, përshpejtimi u propozua nga GP i LV-së”.

  • LV-ja krenohet me liberalizimin e vizave – Opozita thonë s’e kjo Qeveri s’ka merita

    LV-ja krenohet me liberalizimin e vizave – Opozita thonë s’e kjo Qeveri s’ka merita

    Lëvizja Vetëvendosje po e konsideron si meritë të kësaj Qeverie dhe aplikimin e Kosovës në Këshillin e Evropës. Ndërkohë, të kundërtën e thonë dy partitë opozitare, Partia Demokratike e Kosovës dhe Lidhja Demokratike e Kosovës.

    Sipas PDK-së e LDK-së, me fajin e mazhorancës ka humbur momentumi që Kosova ta fitojë liberalizimin qysh në vitin 2016, pasi kjo parti sa ishte në opozitë e kundërshtonte demarkimin e kufirit me Malin e Zi.

    Deputetja e Grupit Parlamentar të Lëvizjes Vetëvendosje, Jeta Statovci konsideron se Kosova ka më shumë stabilitet se çdo vend tjetër i rajonit. Ajo thotë se heqja e regjimit të vizave ka ardhur si rezultat i përmirësimit në raport me sundimin e ligjit dhe luftën kundër korrupsionit.

    “Mund të them se aktualisht përqendrimi dhe fokusi në këtë demokracinë tonë të re po e përcjell edhe elementet tjera që flasin për forcimin e demokracisë si demokracia më e fortë në gjithë rajonin, duke e marrë për bazë edhe çështjen e qëndrueshmërisë financiare dhe performancës ekonomike të cilat japin një stabilitet më të lartë se sa pjesa tjetër e rajonit, përmirësimi në raport me sundimin e ligjit dhe luftën kundër korrupsionit, janë sinjale shumë pozitive të cilat janë mirëpritur edhe nga ana e eurodeputetëve, besoj që tani janë përcjellë edhe tutje në mekanizmat të cilët janë në kuadër të BE-së, andaj këtu shohim edhe suksese të cilat përfshijnë edhe liberalizimin e vizave edhe hapin e parë karshi Këshillit të Evropës, i cili në pilar ka çështjen e të drejtave të njeriut, sundimit të ligjit si dhe demokracisë”, thotë Statovci.

    Por të kundërtën e thotë deputetja e Partisë Demokratike të Kosovës, Blerta Deliu-Kodra. Hapin e parë drejt anëtarësimit në Këshill të Evropës, Deliu-Kodra e quan lajm të mirë, por që kërkon më shumë punë drejt anëtarësimit në KiE.

    “Natyrisht që aplikimi për Këshill të Evropës dhe fakti që Kosova e ka kaluar një raund të parë, është lajm i mirë për Kosovën dhe natyrisht duhet t’i gëzohemi të gjithë edhe pse është vetëm fillimi i një angazhimi. Ju e keni parë edhe angazhimin e shteteve dhe na mbetet ende punë për të bërë që ne ta mbërrijmë anëtarësimin në këtë mekanizëm të rëndësishëm”, u shpreh Deliu-Kodra, teksa fajëson VV-në për vonesat në liberalizimin e vizave.

    “Ndërkohë për çështjen e vizave, unë konsideroj që ka qenë një padrejtësi e madhe që iu është bërë Kosovës. Ne në vitin 2016 i kemi përmbushur të gjitha kriteret. Nuk është çështje e meritave, sa që është e dhimbshme që qytetarët e Kosovës për kaq vite kanë jetuar të izoluar nga një e drejtë e cila padrejtësisht iu është mohuar Kosovës. Në vitin 2016. vendimi ka qenë politik, arsyetimi i BE-së ka qenë që është marrë nga Këshilli i Ministrave, dhe natyrisht që zhvillimi i rrethanave të reja, fakti që ne për tri vite e kemi humbur një momentum që e kemi prolonguar demarkimin e kufirit me Malin e Zi, dhe për këtë ka një përgjegjësi por po e them se nuk mund të bëhet fjalë për merita sepse padrejtësisht janë privuar nga një e drejtë qytetarët e Kosovës”, thotë Deliu-Kodra.

    Ndërsa deputetja e Lidhjes Demokratike të Kosovës, Rrezarta Krasniqi, vonesat për liberalizimin e vizave për kosovarët ka ardhur si pasojë e kundërshtive të Demarkacionit me Malin e Zi.

    Thotë se Vetëvendosja e ka shtyrë edhe më shumë procesin e liberalizimit.

    “Jo aspak nuk ka merita e sidomos sa i përket liberalizimit të vizave, sepse në vitin 2015-16, Kosova ka qenë në pak me Gjeorgjinë dhe Ukrainën në çështjen e liberalizimit të vizave, ndërsa në atë kohë ka qenë marrëveshja e Demarkacionit ku kjo parti sa ka qenë në opozitë ka bërë protesta të dhunshme, gjithashtu në Kuvend ka hedhur gaz lotsjellës kundër kësaj marrëveshje. Pra kjo (VV) vetëm e ka shtyrë procesin e liberalizimit të vizave, mirëpo tani ka ardhë një momentum tjetër duke e ditur luftën në Ukrainë dhe pak a shumë edhe marrëveshja e cila është dakorduar në Ohër, pra këto dy procese siç duke kanë lidhje me marrëveshjen”, thotë Krasniqi. /EO

  • Khloe Kardashian përballet me kancer

    Khloe Kardashian përballet me kancer

    Khloe Kardashian zbuloi më shumë detaje rreth frikës së saj nga kanceri i lëkurës në një trailer të ri për sezonin e tretë të “The Kardashians”.

    “Melanoma është vdekjeprurëse”, tha Kardashian. “Kjo është shumë më serioze nga sa parashikoja të ishte.”

    Traileri dha një paraqitje të shkurtër se sa të shqetësuar ishin miqtë dhe familja e Kardashian gjatë trajtimit të saj për një melanoma në faqe.

    Kardashian zbuloi për herë të parë diagnozën e saj të melanomës në tetor, duke detajuar përvojën e saj që ajo tha se filloi muaj më parë kur vuri re për herë të parë një gungë të vogël në fytyrën e saj.

    “Pasi vura re një gungë të vogël në fytyrën time dhe supozova se ishte diçka e vogël sa një zgavër, vendosa ta bëja atë me biopsi 7 muaj pasi kuptova se nuk po lëvizte”, tha Kardashian në Instagram në atë kohë.

    Kardashian shtoi se ajo bëri biopsi të gungës pasi dy dermatologë i thanë se mund të ishte një gjendje “tepër e rrallë” për dikë në moshën e saj.

    “Disa ditë më vonë më thanë se duhet të bëja një operacion të menjëhershëm për të hequr një tumor nga fytyra ime,” tha ajo.

    Ajo tha se do të duhej të mbante një fashë në faqe pas operacionit dhe shumë fansa më vonë lanë komente në fotot e saj duke pyetur se çfarë kishte në fytyrën e saj.

  • ​Abdixhiku: Lidhja jonë është e fortë

    ​Abdixhiku: Lidhja jonë është e fortë

    Kryetari i Lidhjes Demokratike të Kosovës, Lumir Abdixhiku ka njoftuar se sonte në Gjakovë kanë zhvilluar takimin e radhës “LDK ju dëgjon”.

    Abdixhiku ka shkruar në Facebook se aty në mes qytetarëve e veprimtarëve të tyre, marrin energjinë për të vazhduar.

    “Në takimet tona, tashmë të zakonshme në çdo qytet, përveç se marrim fotografinë e drejtë të vendit tonë, marrim dhe energjinë e mbështetjen e domosdoshme për të vazhduar tutje. Lidhja jonë është e fortë. Gjakova sonte dukej bukur”, ka shkruar ai.

  • Ligji i Pagave, Ministria e Financave konfirmon se po punojnë në evitimin e gabimeve

    Ligji i Pagave, Ministria e Financave konfirmon se po punojnë në evitimin e gabimeve

    Ministria e Financave bashkë me atë të Punëve të Brendshme ka bërë të ditur se sot do të ekzekutohen pagat e treta për sektorin publik sipas Ligjit për Paga që u votua në shkurt.

    Bëhet e ditur se këto dy ministri po punojnë në evitimin e gabimeve dhe se pas përmirësimeve, të gjithë zyrtarët publik do ta marrin në mënyrë retroaktive diferencën për të gjithë muajt, që nga hyrja në fuqi e këtij ligji.

    “Gjatë këtij muaji, me prioritet, ekipet përgjegjëse kanë punuar në përfshirjen në sistem të pagave për (i) punonjësit që nuk u kanë dalë pagat në muajt e kaluar, (ii) punonjësit që janë rekrutuar/kanë lidhur kontratë me institucionet publike pas hyrjes në fuqi të Ligjit”, thuhet në njoftim.

    Po ashtu, këto dy ministri kanë bërë të ditur se kërkesat që shqyrtohen nga to kanë përafërsisht bazë si në shpjegimet që mund t’i gjeni më poshtë:

    1. Punonjës aktual që nuk u janë ekzekutuar pagat (në prioritet brenda muajit mars – pagat u paguhen retroaktivisht nga momenti i hyrjes në fuqi të Ligjit);
    2. Punonjës të rinj që punësohen/lidhin kontratë pas hyrjes në fuqi të Ligjit (në prioritet brenda muajit mars);
    3. Punonjës të cilëve, pas hyrjes në fuqi të Ligjit, u është përcaktuar koeficient i gabuar në raport me koeficientin sipas sistemit të vjetër të pagave (vijon korrigjimi edhe në ditët dhe javët në vazhdim–pagat u barazohen retroaktivisht nga momenti i hyrjes në fuqi të Ligjit);
    4. Punonjës të cilëve vet shtojca përkatëse e Ligjit u ka përcaktuar klasifikim të posaçëm, p.sh ekspertë sipas shtojcave të posaçme, specialistët, inspektorët, punonjësit në arsim, shëndetësi, art, kulturë e trashëgimi kulturore apo një fushë tjetër, (vijon korrigjimi edhe në ditët dhe javët në vazhdim – pagat u barazohen retroaktivisht nga momenti i hyrjes në fuqi të Ligjit);
    5. Punonjës të cilët kanë kërkuar ndërrim klase, statusi apo kategorie nga çfarë janë aktualisht (kjo kategori mund të rishikohet vetëm pas miratimit të strukturës organizative përmes aktit që përmban klasat për secilin pozicion brenda strukturës. Institucionet obligohen sipas Vendimit të Qeverisë Nr. 04/128 të datës 16.02.2023, të përfundojnë miratimin e akteve normative që rregullojnë ndër të tjera, klasifikimin e vendeve të punës në kuadër të strukturave përkatëse).
    6. Arsye të tjera.
  • Lajçak nga Greqia: S’është koha për ta hapur Urën e Ibrit

    Lajçak nga Greqia: S’është koha për ta hapur Urën e Ibrit

    Emisari i BE-së për dialogun Kosovë-Serbi, Miroslav Lajçak, është shprehur i prerë për çështjen e hapjes së Urës së Ibrit. Ai ka thënë se nuk është koha për ta bërë një gjë të tillë.

    Lajçak këtë e ka thënë në forumin e Delfit në Greqi, ku pjesëmarrës është edhe kryeministri i Kosovës, Albin Kurti.

    Emisari evropian e ka quajtur kalim nga kriza në tjetrën diskutimet për targat, energjinë elektrike e tokat, duke kërkuar nga pala kosovare dhe serbe të shmangin veprimet e një-anshme.

    “Ne ende po na u duhet të përballemi me këtë përditë. Teksa flasim, në Mitrovicë ka pasur kërkesë që të hapet ura [Ura e Ibrit]. Atmosfera, dukshëm, nuk është që të ndodh një gjë e tillë”, deklaroi Lajçak, teksa tha se të dyja palët duhet të respektojnë vijat e kuqe të njëra-tjetrës.

    Këshilltarët komunal në veri të Mitrovicës e kanë miratuar kërkesën për hapjen për qarkullim të urës kryesore mbi lumin Ibër. Kjo është bërë me propozimin e asamblistes nga radhët e Lëvizjes Vetëvendosje, Aida Ferati-Doli.

    Reagimi i Lajçak është i pari që vjen nga ndërkombëtarët lidhur me propozimin e VV-së në komunën veriore të Mitrovicës për hapjen e Urës së Ibrit.

  • Kurti nga Greqia: BE-ja, projekti më i rëndësishëm – duhet ta mbrojmë

    Kurti nga Greqia: BE-ja, projekti më i rëndësishëm – duhet ta mbrojmë

    Kryeministri i vendit, Albin Kurti, gjatë Forumit Ekonomik të Delphit që po mbahet në Greqi ka thënë se Bashkimi Evropian është projekti më i rëndësishëm politik.

    Ai tha se BE-ja, po ashtu është edhe procesi historik i paqes dhe prosperiteti që nga Lufta e Dytë Botërore, projekt të cilin duhet “ta ushqejmë dhe mbrojmë”.

    “Në qershor do të bëhen njëzet vjet nga Samiti i Selanikut dhe premtimi për anëtarësim të Ballkanit Perëndimor. Për të bërë një hap të madh përpara, nevojitet një mendim i ri”, ka shkruar Kurti.