ATV

Blog

  • Fillon projekti “Ora e leximit” në shkollat e kryeqytetit

    Fillon projekti “Ora e leximit” në shkollat e kryeqytetit

    Bazuar në rezultatet e fundit të Testit PISA, 15-vjeçarët në Kosovë janë cilësuar si performues të dobët të leximit. Tani Komuna e Prishtinës po ndërmerr hapa me synim t’i përmirësojë ato, përmes projektit “Ora e Leximit” që tashmë ka filluar në disa shkolla.

    “Kur e marrim një libër të lexojmë e bëjmë secilin kapitull me strategjitë e lexim-kuptimit dhe ato na ndihmojnë ta kuptojmë më mirë se çfarë po lexojmë”, thotë Noa Sefa, nxënëse.

    Që nxënësit të performojnë më mirë në Testin PISA nga Drejtoria e Arsimit në Komunën e Prishtinës thonë se do të realizojnë edhe projekte të tjera.

    “Në 13 shkolla veçse ka filluar ora e leximit, dhe kemi marrë komente jashtëzakonisht të mira prej prindërve, nxënësve dhe mësimdhënësve. Kështu do të vazhdojmë menjëherë me implementimin dhe do të vazhdojmë prej javës së ardhshme furnizimin në të gjitha shkollat e Prishtinës. 300 mësimdhënës veçse janë trajnuar, kështu që do të jetë e lehtë që ta zbërthejnë projektin dhe të fillojnë me implementim. Shpresojmë që prej shtatori do të jetë edhe një vit i ri shkollor dhe do të jetë më e rëndësishme”, tha Besianë Musmurati nga Drejtoria e Arsimit në Komunën e Prishtinës.

    Ky projekt po realizohet në bashkëpunim me organizatën ETEA.

    “Mbi 95 për qind e mësimdhënësve që kanë pilotuar projektin e kornizës në shkolla kanë vlerësuar se kjo qasje e mësimdhënies dhe mësimnxënies kontribuon direkt në të mësuarit logjik, ndërsa 97 për qind e mësimdhënësve kanë konsideruar se ky projekt mundëson qasjen në libra të mirë, të përshtatshëm për fëmijët”, tha drejtori ekzekutiv i organizatës ETEA, Agon Ahmeti.

    Koncepti i këtij projekti është marrë nga Suedia dhe Kanadaja. Të dyja këto shtete kishin pasur probleme në lexim-kuptim të nxënësve në të shkuarën. /atvlive.tv

    Edicionin Qendror të lajmeve e gjeni në videon më poshtë:

  • Kurti prezanton procesin hartues të Strategjisë Shtetërore për Rini 2024-2032

    Kurti prezanton procesin hartues të Strategjisë Shtetërore për Rini 2024-2032

    Reformë për politikëbërjen dhe dokument kryesor orientues karshi rinisë po cilësohet të jetë strategjia shtetërore për rini, për vitet 2024-2032.

    Gjatë prezantimit të procesit hartues si dhe planit të veprimit për 2 vjet, kryeministri Albin Kurti tha se në qendër do të jetë i riu.

    “Strategjia shtetërore për rini do të jetë dokumenti kryesor orientues afatgjatë karshi rinisë, ku secila ministri dhe institucion pritet ta përcaktojë rolin e vet. Përveçse është strategji e cila na orienton drejt zhvillimit, do të jetë edhe një mjet reforme për politikëbërjen ndërsektoriale karshi rinisë. Në të kaluarën kemi pasur planifikim dhe zbatim të fragmentuar, e zaten kur ka pak planifikim, zbatimi është i fragmentuar, i pakonsoliduar dhe shpesh kontradiktor”, tha Kurti.

    Në prezantimin e procesit hartues të Strategjisë Shtetërore për Rini kryeministri tha se planifikimi i së ardhmes po bëhet me të rinjtë. Strategjia për Rini është bërë në bashkëpunim me zyrën e OKB-së në Kosovë.

    “Kam përshtypje shumë të mira për këtë dokument dhe gjithashtu se si e keni artikuluar këtë në mënyrë shumë konstruktive, për zgjidhje për situatën e të rinjve që janë në Kosovë, nevojat e tyre dhe shpresat e tyre”, tha koordinatorja e UNKT-së, Arnhild Spence.

    Strategjia shtetërore për rini ka për synim përmirësimin e situatës së të rinjve të grupmoshave 15-24 vjeç.

    Strategjia, mes tjerash, synon edhe nxitjen e bashkëpunimit ndërmjet organizatave rinore, si dhe ndërmjet organizmave qendrorë dhe atyre komunalë. /atvlive.tv

    Edicionin Qendror të lajmeve e gjeni në videon më poshtë:

  • Komisioni për shëndetësi shqyrton projektligjin për sëmundjet ngjitëse

    Komisioni për shëndetësi shqyrton projektligjin për sëmundjet ngjitëse

    Pas miratimit në Qeveri, Ligji për Parandalimin dhe Kontrollin e Sëmundjeve Ngjitëse po shqyrtohet në komisionet parlamentare të Kuvendit të Kosovës.

    Kryetarja e Komisionit për Shëndetësi dhe Mirëqenie Sociale, Fatmire Kollçaku, ka thënë se Ministria e Shëndetësisë ka kërkuar që një pjesë e rëndësishme e projektligjit për parandalimin dhe kontrollin e sëmundjeve ngjitëse, të rregullohet për shkak se është i paqartë.

    “Ministria e Shëndetësisë ka kërkuar që çështja e transportit të mostrave të qartësohet dhe të definohet më mirë. Ne jemi duke punuar që sa më shpejt ta rregullojmë. Komisioni ka shqyrtuar amendamentet e propozuara nga grupi punues, pra gjysma e punës është përmbyllur”, tha Kollçaku.

    Edhe pse nuk është kompletuar ende, Kollçaku ka përmendur efektet që pritet t’i sjellë ky ligj.

    “Do të kemi një ligj shumë më të mirë, në rastet siç jemi përballur me pandeminë Covid 19”, tha Kollçaku.

    Ndërkohë, ish-Ministri i Shëndetësisë, Armend Zemaj, ka thënë se ky ligj është proceduar me vonesë dhe ka shumë mangësi.

    “Është një ligj i ri i cili është proceduar me shumë vonesë, pas vitit të kaluar, i cili nuk ishte përmbushur. Pasi ligji ka pasur shumë të meta, normal është dashur deputetët të konsultohen me mekanizma të tjerë”, tha Zemaj.

    Ndërkaq, Ministria e Shëndetësisë përmes një përgjigje i ka thënë ATV-së, se ky projektligj është i sponsorizuar nga ata, andaj janë të gatshëm për çdo lloj sugjerimi.

    “MSh-ja si sponsoruese do të jetë e gatshme të japë kontributin e saj për çfarëdo sqarimi, definimi, apo plotësimi deri në miratimin e ligjit në Kuvendin e Republikës së Kosovës”, thuhet në përgjigjen e MSh-së.

    Ministri i Shëndetësisë, Arben Vitia, para dy muajve ka bërë të ditur se me këtë ligj do të jetë më i lehtë monitorimi i situatave me sëmundje ngjitëse. /atvlive.tv

    Edicionin Qendror të lajmeve e gjeni në videon më poshtë:

  • ​Hoti: Pasiguria politike dhe ekonomike po i largon investitorët

    ​Hoti: Pasiguria politike dhe ekonomike po i largon investitorët

    Paqartësia në dialogun me Serbinë dhe Marrëveshja e Ohrit po ndikojnë në rënien e investimeve të jashtme në Kosovë, ka thënë ish-kryeministri i Kosovës, Avdullah Hoti.

    Sipas tij, dakordimi në Ohër e ka betonuar status quo-në në marrëdhëniet mes Kosovës dhe Serbisë.

    Hoti ka thënë me këtë paqartësi politike nuk mund të ketë as investime vendore.

    “Asnjë investim i jashtëm i rëndësishëm nuk është parë në dy vitet e fundit dhe as nuk duket në perspektivë. Një investitorë i huaj që ishte në procedura për të marrë statusin e investitorit strategjik u refuzua nga Qeveria, edhe pse vendimi i Qeverisë ishte dërguar për miratim në Kuvend”, ka shkruar ai në Facebook.

    Deputeti i Lidhjes Demokratike të Kosovës ka thënë se bizneseve nuk po u ofrohet siguri as në politikat e brendshme ekonomike.

    “Pa asnjë analizë paraprake dhe pa konsultim me komunitetin e bizneseve, Qeveria mori këto vendime: i ndryshoi normat tatimore të tatimit në pronë, të cilat u bën progresive dhe e rritën deri në trefish ngarkesën e tatimit në pronë për biznese; vendosi tua marrë komunave menaxhimin e zonave ekonomike dhe të vendos ato zona nën menaxhimin e drejtpërdrejtë të një Agjencie të re Qeveritare; dhe vendosi të shfuqizojë ligjin për investime të huaja dhe ligjin për investime strategjike. Të dyja këto ligje i shkriu në kuadër të ligjit të investimeve të qëndrueshme, i cili do ta dëmtoj shumë përceptimin pozitiv që ka Kosova sa i përket mbrojtjes së investimeve të jashtme”, ka shtuar ai.

  • Gjiganti gjerman pritet të jetë klubi i ri i Xhakës

    Gjiganti gjerman pritet të jetë klubi i ri i Xhakës

    Sot u bë e ditur nga “LondonWorld” që Granit Xhaka ka vendosur që të largohet nga skuadra e Arsenalit në fund të këtij sezoni.

    Mesfushori me prejardhje kosovare ka vendosur që ta mbyll kapitullin e tij me Arsenalin, dhe të largohet nga “Topçinjtë” këtë verë, raporton KosovaPress.

    Ndërkaq, gazetari i njohur, Fabrizio Romano ka shkruar për Xhakën, ku edhe e ka treguar destinacionin e mundshëm të radhës për mesfushorin 30 vjeçar.

    Xhaka pritet që të rikthehet në Bundesliga, ku Bayer Leverkuseni është në bisedime të avancuara për të siguruar shërbimet e yllit të Arsenalit.

    Thuhet se Bayer Leverkuseni mund ta mbyll një marrëveshje për afro 15 milionë euro me Arsenalin.

    Në anën tjetër, kushtet personale mes Xhakës dhe Bayer Leverkusenit janë shumë afër për tu arritur. Xhaka ka pranuar një marrëveshje katër vjeçare, e cila do ta mbajë atë te Leverkuseni deri në qershor të vitit 2027, nëse gjithçka shkon sipas planit.

    Marrëveshja nuk do të nënshkruhet dhe kompletohet para fundit të këtij sezoni, pasi që Xhaka dëshiron të jetë 100% i fokusuar te Arsenali.

  • Një varg shkeljesh ka gjetur IPK-ja në stacionin policor të Obiliqit

    Një varg shkeljesh ka gjetur IPK-ja në stacionin policor të Obiliqit

    Hetuesit policorë në Stacionin e Obiliqit janë vonuar t’i procedojnë me kohë lëndët në Prokurori. Inspektorati Policor gjatë inspektimit në këtë stacion ka gjetur mangësi edhe në trajtimin e rasteve të dhunës në familje.

    Sipas raportit të IPK-së rreth vlerësimit të performancës, është vënë në pah nevoja për marrjen parasysh edhe të dëshmitarëve të tjerë potencialë, rritjen e cilësisë së kallëzimeve dhe gjatë evidentimit të dosjeve në SMIL të përfshihen dhe urdhrat mbrojtës.

    “Vlerësimi i rrezikut bazuar në indikatorë përkatës, jo në të gjitha rastet, është kryer sipas rregullit. Është e nevojshme që gjatë intervistimit të palëve të parashtrojnë numër më të madh të pyetjeve, lidhur me rastin dhe që në konsultim me Prokurorin kompetent, të përfshijnë dhe dëshmitarë të tjerë potencialë që mund t’i kontribuojnë zbardhjes së rastit. Gjatë hartimit të kallëzimit penal nevojitet të ngrihet performanca në vendosjen e saktë të të dhënave të mbledhura, përmes veprimeve hetimore, të tregohet ndaj kujt ngrihet kallëzimi, evidenca për të dëmtuarit apo viktimat dhe të arsyetohet saktë ngritja e kallëzimit, mbështetur në faktet e grumbulluara përmes veprimeve hetimore”, thuhet në raportin e IPK-së.

    IPK-ja gjatë inspektimit në këtë stacion ka hasur spërkatës kimikë dhe jelekë antiplumb me afat të skaduar.

    “IPK-ja ka inspektuar ad-hoc pesë (5) zyrtarë policorë, për të parë se sa ata janë të kujdesshëm dhe i mirëmbajnë armët e pajisjet, përfshirë dhe municionin. Pistoletat kanë rezultuar të pastra. Spërkatësi kimik dhe jelekët antiplumb janë hasur me afat të skaduar. Fishekët janë ndërruar këtë vit dhe janë zyrtarë. Sa i përket spërkatësit kimik, duhet pasur parasysh se përdorimi eventual i tyre mund të ndikojë në shëndetin e personave, me të cilët mund të ketë ballafaqim”, thuhet në raport.

    Ndërkohë, për të gjitha vërejtjet Inspektorati Policor i ka rekomanduar Komandantit të Stacionit, t’i ndërmarrë veprimet e nevojshme, të cilat, sipas juristëve, janë të domosdoshme.

    Policia e Obiliqit në komentet që ia ka dhënë IPK-së ka thënë se sa i përket furnizimit me jelekë antiplumb dhe spërkatës, tashmë i ka adresuar kërkesat në Drejtorinë e Logjistikës. /atvlive.tv

    Edicionin Qendror të lajmeve e gjeni në videon më poshtë:

  • Asnjë hap para nuk ka lëvizur procesi për përzgjedhjen e guvernatorit të BQK-së

    Asnjë hap para nuk ka lëvizur procesi për përzgjedhjen e guvernatorit të BQK-së

    Asnjë hap para nuk ka lëvizur procesi për përzgjedhjen e guvernatorit të Bankës Qendrore të Kosovës.

    Që nga 7 prilli kur Komisioni për Buxhet i rekomandoi kryetarit të Kuvendit ta kthejë procesin në pikën zero, ky institucion vazhdon të heshtë duke e lënë kështu procesin të bllokuar.

    Derisa Banka Qendrore thotë se janë në pritje të Kuvendit për dhënien e dritës së gjelbër, për ta hapur për herë të dytë konkursin, ky institucion nuk ka kthyer përgjigje as për televizionin.

    Asnjë informacion nuk e kanë as anëtarët e Komisionit parlamentar për Buxhet, të cilët thonë se kjo po bëhet qëllimisht.

    “Këtu ka konflikt të brendshëm partiak të Lëvizjes Vetëvendosje dhe po shihet se ata po mundohen secili me ndiku në përzgjedhjen e guvernatorit dhe më thanë shkurt e shqip, këtu ka lojë pazari”, tha anëtari i Komisionit për Buxhet, Mërgim Lushtaku.

    Lushtaku shtonë se anëtarët e panelit për përzgjedhjen e guvernatorit do të duhej të shkarkoheshin, pasi, sipas tij, mund të përsëriten sërish gabimet e njëjta.

    “Anëtarë të panelit e kanë sjellë në këtë fazë këtë proces, ata nuk janë më kredibilë për të udhëhequr një proces tjetër për guvernatorin e Kosovës”, tha Lushtaku.

    Pas përfundimit të mandatit të ish-guvernatorit Fehmi Mehmeti, më 29 mars në këtë pozitë si ushtrues detyre erdhi Bashkim Nurboja.

    Parregullsitë e bëra gjatë procesit të përzgjedhjes së kandidatëve për guvernator, bënë që ky proces të përsëritet edhe një herë. /atvlive.tv

    Edicionin Qendror të lajmeve e gjeni në videon më poshtë:

  • Grupi i përbashkët punues nuk ka nisur ende punën, dialogu mund të zvarritet

    Grupi i përbashkët punues nuk ka nisur ende punën, dialogu mund të zvarritet

    Pa asnjë darkordim për sekuencimin e zbatimit të marrëveshjes së Brukselit dhe shtojcës së Ohrit, përfundoi takimi i së hënës ndërmjet kryenegociatorëve të Kosovës dhe Serbisë, Besnik Bislimi dhe Petar Petkoviç.

    Pajtim nuk pati për termat e referencës të Komitetit të Përbashkët Mbikëqyrës e as të Grupit të Përbashkët punues për të zhdukurit, pasi, sipas kryenegociatorit Bislimi, Petkoviç ishte i interesuar të diskutonte vetëm për Asociacionin.

    Për takimin e parë të Grupit Punues për të pagjeturit u përmend një afat prej 60 ditësh, i cili varet fillimisht nga miratimi i termave të referencës që, eventualisht, duhet të bëhet në një takim tjetër të kryenegociatorëve.

    Teksa konstaton se marrëveshja është në pikën zero të zbatimit, Fitim Mulolli nga PolCon nuk pret që diskutimet të marrin epilog të shpejtë.

    “Jo të barten pas verës, por sigurisht edhe 2024-ta do të na zërë, sepse, po e përsëris, aq shumë ka terminologji të përgjithshme dhe të paqartë në atë marrëveshje të Ohrit dhe do të duhet të formohen grupe e nëngrupe punuese, do të duhet të hartohen udhëzues e manuale zbatimi etj., për të arritur në një fazë për të qenë të gatshëm për zbatim e lëre më për të pasur zbatim të plotë të asaj marrëveshjeje”, tha Mulolli.

    Teksa përmend se marrëveshja ishte arritur për shkak të presionit ndërkombëtar dhe jo vullnetit të palëve, opinionisti Bekim Kabashi vlerëson se Asociacioni është pikë kyçe dhe se çështjet e tjera përdoren për zvarritje të procesit.

    “Nuk kemi parë vullnet asnjëherë që Kosova dhe Serbia të gjejnë një pajtim për çfarëdo teme qoftë ajo. E kemi palën kosovare, e cila insiston në temat e tjera dhe refuzon të diskutojë për asociacionin. E dëgjuam kryeministrin Kurti që tha se pika 7 nuk është detyrimisht pika që duhet të zbatohet e para, në anën tjetër kemi Serbinë që insiston për Asociacionin”, tha Kabashi.

    Më 27 Shkurt, në Bruksel, Kosova dhe Serbia arritën Marrëveshjen për rrugën drejt normalizimit, ndërsa më 18 Mars, në Ohër, u pajtuan për aneksin e zbatimit.

    Hapat e vetëm konkretë, deri tani, janë miratimi i Deklaratës për të zhdukurit dhe prezantimit të draft-statutit të Asociacionit të komunave me shumicë serbe. /atvlive.tv

    Edicionin Qendror të lajmeve e gjeni në videon më poshtë:

  • Osmani dhe Kurti kërkuan nga BE-ja të ketë qëndrim më të qartë në raport me shkeljet

    Osmani dhe Kurti kërkuan nga BE-ja të ketë qëndrim më të qartë në raport me shkeljet

    Kryeministri Albin Kurti këmbëngul se vetëmenaxhimi i komunitetit serb apo Asociacioni i komunave me shumicë serbe, nuk është pika e parë e as e vetmja në marrëveshjen për rrugën drejt normalizimit të marrëdhënieve Kosovë – Serbi.

    Draft-dokumenti i sekuencimit të zbatimit, të cilin ua ka prezantuar Përfaqësuesi i Posaçëm, Miroslav Lajcak, sipas kryeministrit, nuk mund të bëhet marrëveshje nëse ka në fokus vetëm nenin 7.

    “Nuk e përmban neni shtatë marrëveshjen, por marrëveshja nenin shtatë. Këtë gjë zëvendësi im dhe kryenegociatori Bislimi e ka bërë shumë të qartë në takimin e djeshëm që e ka pasur me kryenegociatorin e Serbisë me ndërmjetësimin e zotëri Lajçakut. Ne kemi theksuar se dëshirojmë një plan zbatimi i cili është i hollësishëm, konkret, serioz, i balancuar dhe gjithëpërfshirës. Nuk mund të jetë plani i zbatimit të sekuencuar për marrëveshjen që kemi bërë vetëm në nenin shtatë”, tha Kurti.
    Ai kërkoi që BE-ja të reagojë për shkeljet që Serbia ia ka bërë marrëveshjes.

    “Deri më sot nga ndërmjetësit nuk kemi një qëndrim sa i përket denoncimit tonë për shkeljet e Serbisë. Ne jemi të interesuar për zbatim të plotë të menjëhershëm të marrëveshjes, pa kushte dhe pa vonesa”, tha Kurti.

    Ndërkaq, presidentja Vjosa Osmani kërkoi që Bashkimi Evropian të mos e interpretojë marrëveshjen në atë formë që Asociacioni të vendoset si parakusht për zbatimin e tërësisë së dakorduar.

    “Ne presim që BE-ja të mos kërkojë që të zbatohen gjëra për të cilat nuk jemi pajtuar. Ndërkaq, të kërkohet pikërisht ajo që janë pajtuar Kosova dhe Serbia. Ne presim akoma që BE-ja të jetë e qartë në raport me shkeljet e Serbisë, deri tani nuk e kemi pa një gjë të tillë”, tha Osmani.

    Më 11 Maj, gjatë vizitës në Prishtinë, Përfaqësuesi i Posaçëm i BE-së, Miroslav Lajcak, i prezantoi kryeministrit një draft-dokument për metodologjinë e zbatimit të nenit 7, për vetëmenaxhimin e komunitetit serb.

    Por, zëvendëskryeministri Besnik Bislimi në Bruksel tha se nuk mund të ketë draft të metodologjisë, pa pasur plan të zbatimit për marrëveshjen në tërësi. /atvlive.tv

    Edicionin Qendror të lajmeve e gjeni në videon më poshtë:

  • ‘’Deklarata e Ohrit e errët dhe e paqartë’’ – Qerkini kritik për Marrëveshjen në Ohër

    ‘’Deklarata e Ohrit e errët dhe e paqartë’’ – Qerkini kritik për Marrëveshjen në Ohër

    Kryetari i Qendrës Burimore për Persona të Zhdukur, Bajram Qerkini, në një prononcim për ATV-vë, tha se Deklarata e Ohrit për personat e pagjetur, për ta ka qenë e errët dhe e paqartë.

    “Deklarata e cila ka qenë në Ohër është e errët, gjoja se tash në Bruksel do të sqarohet dhe do të jetë një deklaratë e dakordume ose ajo çka është folur apo është fillu, të folët ose vendoset në Bruksel kur të nënshkruajnë dy palët, kur të merren vesh Vuçiq dhe Kurti”, tha Qerkini.

    Ai tha se çfarë ndodhi në Bruksel dhe për çka kanë biseduar Kurti e Vuçiq, nuk e ka ditur.

    “Çfarë ka ndodhur, ka ndodhur se kanë biseduar por se çka nuk e kemi ditur. Pardje kanë shkuar për së dyti për të vazhduar temën të cilën e kanë lënë për personat e pagjetur. Ato politike nuk po i flas. Sipas deklaratës të cilën e ka dhënë Besnik Bislimi kur është kthy, ai ka folë shumë shkurt. Atë natë ka thënë se nuk o morëm vesh për ato çka kemi bisedu, por iu ka interesu veç Asociacioni e aspak këto pikat e tjera”, tha Qerkini. /atvlive.tv

    Emisionin e plotë e gjeni në videon më poshtë: