ATV

Blog

  • Kamionët me mallra serbe as sot nuk lejohen të hyjnë në Kosovë

    Kamionët me mallra serbe as sot nuk lejohen të hyjnë në Kosovë

    Asnjë kamion me mallra me origjinë nga Serbia nuk ka hyrë në territorin e Kosovës, që kur Qeveria e Kosovës ka marrë vendim për ndalimin e hyrjes se kamionëve me produkte dhe targa serbe në Kosovë dy ditë më parë.

    “Nuk kemi pasur asnjë hyrje, është duke u zbatuar masa e sigurisë për ndalimin e hyrjes”, tha zëdhënësi i Doganave të Kosovës Adriatik Stavileci.

    Qeveria e Kosovës, më 14 qershor, ka marrë vendim për të shtrënguar kontrollet kufitare me Serbinë.

    Ky vendim është marrë pas arrestimit të tre pjesëtarëve të Policisë së Kosovës nga forcat serbe, raporton Radio Evropa e Lirë.

    Kosova e konsideron arrestimin e tre zyrtarëve policorë si rrëmbim nga autoritetet e Serbisë në territorin e saj. Sipas Policisë së Kosovës, zyrtarët policorë janë arrestuar në Tresave/Bare që gjendet në komunën e Leposaviqit, brenda territorit të Kosovës.

    Më 15 qershor, dhjetëra kamionë me targa të Serbisë dhe me të Kosovës, u panë të parkuar në anën serbe të kufirit në Merdare, pasi nuk u lanë të futen në Kosovë.

    Kryeministri i Kosovës, Albin Kurti, tha të enjten se institucionet e sigurisë e kanë shtrënguar kontrollet kufitare me Serbinë, në përgjigje të situatës së krijuar pas arrestimit të tre pjesëtarëve të Policisë së Kosovës nga forcat serbe.

    Kryeministri Kurti mohoi të ketë ndalim të hyrjes së mallrave nga Serbia duke theksuar se masat “nuk janë ekonomike apo tregtare, por janë masa të sigurisë”.

    Serbia është një ndër pesë shtetet që eksporton më së shumti në Kosovë.

    Para vendimit të ekzekutivit, brenda një dite ky shtet eksporton mallra në vlerë prej një milion euro.

    Vetëm gjatë vitit të kaluar në tregun vendor kanë hyrë mallra në vlerë prej 372 milionë euro, derisa Kosova ka shitur në Serbi produkte në vlerë prej rreth 62 milionë euro./REL/

  • ​Mashtroi një kompani në Francë, i sekuestrohet vetura në Vushtrri

    ​Mashtroi një kompani në Francë, i sekuestrohet vetura në Vushtrri

    Policia e Kosovës ka arritur të lokalizojë dhe të sekuestrojë veturën, e cila vite më parë nga një kompani e Francës, iu ishte dhënë me qira të dyshuarit mashkull kosovar, për të cilën veturë i dyshuari nuk kishte kryer obligimet.

    Sekuestrimi i veturës ka ndodhur dje pasdite në Vushtrri. Ndërkohë, rasti është duke u hetuar.

  • Begaj në Forumin e Prespës për dialog: Askush s’mund të verë në pikëpyetje integritetin territorial të Kosovës

    Begaj në Forumin e Prespës për dialog: Askush s’mund të verë në pikëpyetje integritetin territorial të Kosovës

    Kosova është një realitet politik i pakthyeshëm, sovraniteti dhe integriteti territorial i së cilës nuk mund të vihet në pikëpyetje nga askush, tha presidenti i Shqipërisë Bajram Begaj.

    Në adresimin e tij në Forumin e Prespës, presidenti shqiptar foli për nevojën për kompromis dhe njohje të ndërsjellë ndërmjet Kosovës dhe Serbisë, si kontribut për stabilitetin në rajon.

    Ndërsa, duke iu referuar marrëveshjes së Prespës, Presidenti Begaj, nënvizoi se është koha e duhur që liderët e Kosovës dhe Serbisë të ndërmarrin përgjegjësitë historike, për ta çuar përpara procesin e pajtimit dhe të normalizimit të marrëdhënieve midis tyre.

    Presidenti Begaj, vlerësoi gjithashtu edhe zhvillimet aktuale gjeopolitike dhe influencën e tyre në proceset demokratizuese, duke nënvizuar, se nga historia kemi mësuar se demokracia nuk është e pakthyeshme dhe tolerimi apo mosveprimi i menjëhershëm e i koordinuar në mbrojtje të institucioneve dhe vlerave demokratike e bën kalimin nga demokracia në autokraci thjesht çështje kohe.

    Në mbyllje të fjalës, Presidenti Begaj bëri thirrje për përcjelljen e një mesazhi të përbashkët të liderave nga ky forum, duke nënvizuar, se pavarësisht situatave gjeopolitike, e ardhmja e rajonit do të jetë në familjen evropiane dhe euroatlantike.

  • Me këtë formacion pritet të luajë Kosova sonte ndaj Rumanisë

    Me këtë formacion pritet të luajë Kosova sonte ndaj Rumanisë

    Lëndimi i dyshes Elbasan Rashani dhe Edon Zhegrova do ta detyrojë trajnerin e Kosovës. Alain Giresse që të bëjë ndryshime në formacionin startues për ndeshjen kundër Rumanisë.

    Këto dy kombëtare ballafaqohen sonte në stadiumin “Fadil Vokrri” me fillim nga ora 20:45 në ndeshjen e vlefshme për grupin I të kualifikimeve për në Kampionatin Evropian që mbahet vitin e ardhshëm, raporton KosovaPress.

    Ndryshimi kryesor që pritet ta bëjë Giresse është në fazën e sulmit, aty ku në vend të të lënduarit Edon Zhegrova pritet të aktivizohet Ermal Krasniqi.

    Ish-sulmuesi i Ballkanit luan pikërisht në futbollin rumun tek skuadra CFR Cluj dhe kjo shihet si një përparësi që ai të luajë nga minuta e parë sonte.

    Përkrah Krasniqit pritet të luajë dyshja Muriqi-Rashica të mbështetur nga mesfusha e përbërë nga treshja Dreseviç-Kryeziu-Muslija.

    Për “Dardanët”, opcioni i vetëm është fitorja sepse çdo rezultat tjetër do t’i linte ata pa shpresë për kualifikim në EURO 2024.

    Ky është formacioni i mundshëm i Kosovës përballë Rumanisë: Muric; Vojvoda, Rrahmani, Aliti, Paqarada; Dresevic, H.Kryeziu; Muslija; Krasniqi, Muriqi, Rashica.

  • Pas vdekjes së tij, kështu do të ndahet pasuria e Berlusconit

    Pas vdekjes së tij, kështu do të ndahet pasuria e Berlusconit

    Edhe pse akoma nuk kanë kaluar 24 orë që nga lajmi se ish-kryeministri i Italisë Silvio Berlusconi ka ndërruar jetë, është vendosur që trashëgimia e një prej personave më të pasur të ndahet mes pesë fëmijëve të tij.

    Agjencia mediatike Ansa ka treguar se pasuria prej më shumë se 4 miliardë eurosh do të ndahet tek fëmijët e politikanit, të cilat kanë ardhur në jetë nga dy martesa.

    Pritet të zbulohet para noterit nëse gruaja e tretë Marta Fascina, e cila u martua vetëm simbolikisht pa asnjë të drejtë ligjore, të marrë pjesë në ndarjen e rëndësishme të pasurisë së Berlusconit.

    Nga deklarata e pasurisë në vitin 2021 e paraqitur nga Berlusconi në Parlament ka një shumë të tatueshme prej gati 18 milionë eurosh.

    Megjithatë, tema qendrore e trashëgimisë është ndarja e aksioneve të kompanive, të cilat gjithashtu luajnë një rol shumë të rëndësishëm.

    Nëse në vend të testamentit të tij Berlusconi do të kishte rregulluar ndryshe një të tretën e trashëgimisë në disponueshme, Barbara, Eleonora dhe Luigi mund të bëheshin pronarë të 45% të pasurisë.

  • Sherifi: Kurti po bën driblime në politikë

    Sherifi: Kurti po bën driblime në politikë

    Sekretari i NISMA-s Socialdemokrate, Bilal Sherifi, në një intervistë për ATV-në, tha se kryeministri Kurti është duke bërë “driblim” në politikë për të fituar pak kohë, por sipas tij, me këtë nuk fitohen betejat politike.

    “I kam analizuar 5 pikat e kryeministrit. Këtu është problemi i tij që sa herë të vihet në pozicione të vështira, nxjerrë pika dhe kalon një periudhë, i harron pikat. Ju kujtohen ato 6 pikat e shkurtit, kur të gjithë në Kuvend i duartrokitën… i harroi. tash, ende pa u tharë ngjyra mirë e atyre 6 pikave, nxori pesë pika tjera. Këto quhen driblingje në politikë. Nuk fitohen betejat duke driblu, sepse krejt çka ke bërë, krejt çka ke arritë është që të fitosh pak kohë, amo problemi është në tavolinë. Përpjekjet e Kurtit janë vetëm duke i dhënë pak më shumë kohë, hapësirë për të manovruar, por nuk janë duke ia zgjidhur problemin”, tha Sherifi. /atvlive.tv

  • ​Protestuesit tentojnë të hyjnë me dhunë në komunë

    ​Protestuesit tentojnë të hyjnë me dhunë në komunë

    Protestuesit në Leposaviq kanë tentuar para gjysmë ore të hyjnë me dhunë në ndërtesën e komunës, por nuk janë lejuar nga ushtarët e KFOR-it.

    Ata pasi kanë kuptuar se në ndërtesë ndodhet ministri për Komunitete, Elbert Krasniqi dhe se duhet të hyjë brenda edhe nënkryetarja e kësaj komune, Dragana Miletiq, janë organizuar dhe kanë kaluar kordonin e ushtarëve hungarezë, mirëpo, janë ndaluar nga ushtarët tjerë të cilët ndodhen në hyrje të ndërtesës.

    Deri tani nuk është shënuar ndonjë incident, por situate mbetet nën tension.

  • Për 24 orë 63 aktakuza kundër 77 personave

    Për 24 orë 63 aktakuza kundër 77 personave

    Prokuroria e Shtetit njoftoi se gjatë 24 orëve të fundit nga prokuroritë themelore janë ngritur 63 aktakuza kundër 77 personave, për kryerjen e veprave të ndryshme penale.

    Po ashtu, me urdhër të Prokurorit të Shtetit janë ndaluar gjashtëmbëdhjetë (16) persona dhe janë paraqitur nëntë (9) kërkesa për caktimin e masës së paraburgimit ndaj dhjetë (10) personave, të dyshuar se kanë kryer vepra të ndryshme penale.

    Prokuroria Themelore në Prishtinë, gjatë 24 orëve të fundit, me urdhër të prokurorit ka ndaluar shtatë (7) persona, ka paraqitur tri (3) kërkesa për caktimin e masës së paraburgimit ndaj katër (4) personave, si dhe ka ngritur njëzetepesë (25) aktakuza kundër tridhjetekatër (34) personave për vepra të ndryshme penale.

    Prokuroria Themelore në Prizren, gjatë 24 orëve të fundit, me urdhër të prokurorit ka ndaluar një (1) person të dyshuar, si dhe ka ngritur tri (3) aktakuza kundër tre (3) personave, për vepra të ndryshme penale. 

    Prokuroria Themelore në Pejë gjatë 24 orëve të fundit ka ndaluar dy (2) persona të dyshuar për vepra penale, ka parashtruar tri (3) kërkesa për caktimin e masës se paraburgimit ndaj tre (3) personave dhe ka ngritur pesë (5) aktakuza kundër shtatë (7) personave, për vepra të ndryshme penale.

    Prokuroria Themelore në Gjilan, me urdhër të prokurorit ka ndaluar tre (3) persona, ka paraqitur një (1) kërkesë për caktimin e masës së paraburgimit kundër një (1) personi dhe ka ngritur njëmbëdhjetë (11) aktakuza kundër dymbëdhjetë (12) personave.

    Prokuroria Themelore në Gjakovë, gjatë 24 orëve të fundit, me urdhër të prokurorit kujdestar, ka ndaluar një (1) person në kohëzgjatje prej 48 orësh, ka paraqiturnjë (1) kërkesë për caktimin e masës së paraburgimit ndaj një (1) personi dhe ka ngritur një (1) aktakuzë ndaj një (1) personi.

    Prokuroria Themelore në Mitrovicë, ka ndalur një (1) person dhe ka ngritur shtatë (7) aktakuza kundër shtatë (7) personave për vepra penale të ndryshme.

    Prokuroria Themelore në Ferizaj, gjatë 24 orëve të fundit, ka ndaluar një (1) person të dyshuar, ka parashtruar një (1) kërkesë për caktimin e masës së paraburgimit kundër një (1) personi, si dhe ka ngritur njëmbëdhjetë (11) aktakuza kundër trembëdhjetë (13) personave, për vepra të ndryshme penale.

  • Oda Amerikane për vendim ndaj Klanit: Shkel dispozitat ligjore, mesazh shqetësues për bizneset e investitorët

    Oda Amerikane për vendim ndaj Klanit: Shkel dispozitat ligjore, mesazh shqetësues për bizneset e investitorët

    Oda Ekonomike Amerikane në Kosovë shpreh shqetësimin e thellë lidhur me vendimin e Ministrisë së Industrisë, Ndërmarrësisë dhe Tregtisë së Kosovës për pezullimin e certifikatës së regjistrimit të biznesit të televizionit Klan Kosova. Ky vendim jo vetëm që shkel dispozitat e Ligjit për Shoqëritë Tregtare por dërgon një mesazh shqetësues për komunitetin e biznesit dhe investitorët potencialë. Si përfaqësues të komunitetit të biznesit amerikan në Kosovë, ne besojmë fuqishëm në respektimin e parimeve të praktikave të drejta dhe transparente të biznesit, si dhe në mbrojtjen e të drejtave të bizneseve që operojnë brenda vendit.

    Pezullimi arbitrar i certifikatës së regjistrimit të biznesit të Klan Kosovës ngre shqetësime për stabilitetin dhe parashikueshmërinë e mjedisit të biznesit në Kosovë. Veprime të tilla gërryejnë besimin e komunitetit të biznesit, si vendor ashtu edhe ndërkombëtar, dhe dekurajojnë investimet. Vendimi bie ndesh me parimet e Ligjit për Shoqëritë Tregtare, i cili synon të krijojë një mjedis të favorshëm për bizneset për të lulëzuar, kontribuar në ekonomi dhe për të krijuar mundësi punësimi.

    Ky vendim nxjerr në pah nevojën për një gjyqësor të pavarur dhe procedura transparente ligjore. Vendimi i Ministrisë për të pezulluar certifikatën pa arsyetimin e duhur ose pa një proces të rregullt ligjor cenon sundimin e ligjit. Është thelbësore që çështjet ligjore, si pezullimi i certifikatave të regjistrimit të biznesit, të trajtohen përmes proceseve të drejta dhe transparente, duke siguruar që bizneset të kenë mundësinë të mbrojnë interesat e tyre dhe të trajtojnë çdo shqetësim në mënyrë të drejtë dhe të ligjshme.

    Po ashtu pezullimi i certifikatës së regjistrimit të biznesit të Klan Kosovës ka implikime më të gjera për lirinë e mediave dhe mbrojtjen e pavarësisë së gazetarisë. Mediat luajnë një rol kritik në promovimin e transparencës, llogaridhënies dhe demokracisë. Çdo veprim që kufizon funksionimin e organizatave mediatike i minon këto parime dhe ngre shqetësime për gjendjen e lirisë së shtypit në Kosovë. Vendimi krijon një precedent shqetësues dhe mund të pengojë mediat e tjera të raportojnë lirisht dhe objektivisht.

    Në përfundim, Oda Ekonomike Amerikane në Kosovë kërkon nga Ministria e Industrisë, Ndërmarrësisë dhe Tregtisë që të rishqyrtojë vendimin e saj për pezullimin e certifikatës së regjistrimit të biznesit të televizionit Klan Kosova. Respektimi i parimeve të Ligjit për Shoqëritë Tregtare dhe sigurimi i një mjedisi biznesi transparent dhe të parashikueshëm janë jetike për nxitjen e rritjes ekonomike dhe tërheqjen e investimeve. Për më tepër, ruajtja e lirisë së medias dhe promovimi i pavarësisë gazetareske janë thelbësore për një demokraci të qëndrueshme. Ne i bëjmë thirrje Ministrisë që ta korrigjojë këtë situatë, të rikthejë besimin në komunitetin e biznesit dhe të riafirmojë përkushtimin e saj për respektimin e sundimit të ligjit dhe mbrojtjen e të drejtave të bizneseve në Kosovë.

  • Kërcënoi prindërit me jetë, arrestohet një person në Pejë

    Kërcënoi prindërit me jetë, arrestohet një person në Pejë

    Një person është arrestuar dje në Pejë, pasi ka kërcënuar prindërit e tij me jetë.

    “Është arrestuar i dyshuari mashkull kosovar nën dyshimin se i njëjti ka kanosur me jetë prindërit e tij kosovarë. I dyshuari pas intervistimit me urdhër të prokurorit është dërguar në mbajtje.”, ka bërë të ditur Policia.

    Rasti i cilësuar si “Dhunë në familje” është duke u hetuar.