ATV

Blog

  • Gjykimi për dëbimin e shtetasve turq, ish-shefi i AKI-së shpallet fajtor

    Gjykimi për dëbimin e shtetasve turq, ish-shefi i AKI-së shpallet fajtor

    Ish-shefi i Agjencisë së Kosovës për Inteligjencë, Driton Gashi, është dënuar me katër vjet e tetë muaj burgim për keqpërdorim të detyrës zyrtare.

    Gashi është shpallur fajtor nga Gjykata Themelore e Prishtinës në rastin e dëbimit të gjashtë shtetasve turq, në mars të vitit 2018. Gashit i është caktuar edhe dënimi plotësues.

    Por nga akuzat në këtë rast për keqpërdorim të detyrës zyrtare u liruan ish-drejtori i Departamentit për Shtetësi, Azil dhe Migracion, Valon Krasniqi, dhe Rrahman Sylejmani, ish-drejtor i Drejtorisë për Migracion dhe të Huaj në kuadër të Policisë Kufitare.

    Përderisa mbrojtja e Gashit ka paralajmëruar se do të ankohet rreth vendimit në Apel, avokati i Sylejmanit tha se drejtësia ka triumfuar.

    Prokuroria Speciale e kishte akuzuar Driton Gashin, se pa siguruar asnjë provë se paraqesin rrezik për sigurinë kombëtare, kishte rekomanduar revokimin e lejeve të qëndrimit, me të njëjtin arsyetim ishin dëbuar nga Kosova gjashtë shtetas turq.

    Ndërkohë, ishte raportuar se vetëm një ditë para se të dëboheshin, pati takim mes zyrtarëve të Policisë, Departamentit për Migrim dhe dy zyrtarëve të AKI-së.

    Skandali i dëbimit të Cihan Ozkan, Kahraman Demirez, Hasan Gunakan, Mustafa Erdem, Osman Karakaya dhe Jusuf Karabina për në Turqi, shtet ky që i akuzon për lidhje me Fetullah Gylenin, kishte nxitur reagime ndërkombëtare, për çka Kosova u kritikua për shkelje të të drejtave të njeriut. /atvlive.tv

    Edicionin Qendror të lajmeve në ATV e gjeni në videon më poshtë:

  • KRU “Prishtina” paralajmëron shkyçje për borxhlinjtë

    KRU “Prishtina” paralajmëron shkyçje për borxhlinjtë

    19 korriku ishte afati i fundit që Kompania Rajonale e Ujësjellësit “Prishtina”, ka vendosur për konsumatorët t’i paguajnë borxhet në vlerë prej 45 milionë eurosh, borxh ky i akumuluar nga paslufta.

    Gjatë aksionit për shkyçjen e furnizimit me ujë të pijshëm në lagjen Tophane të Prishtinës, hasën në familje me asistencë sociale të paralajmëruara më parë, andaj te disa shkyçja nuk u realizua.

    “Kemi filluar pikërisht në Tophane ku shuma e borxhit është mjaft e madhe, kësaj familje nuk ua shkyçim për shkak se qenkan me asistencë sociale, mirëpo nuk janë paraqitur te ne”, tha Arjeta Mjeku nga kompania rajonale e ujësjellësit “Prishtina”.

    Por, ujësjellësit telashe i doli me Idriz Cërvadikun, banor i Tophanes, i cili fajësoi kompaninë për mosverifikim të saktë të borxhit.

    Megjithatë, shkyçje pati edhe ndaj bizneseve.

    Zëdhënësja e KRU-së, Arjeta Mjeku, paralajmëroi se shkyçjet do të jenë intensive.

    “Do ta vazhdojmë aksionin edhe për ditë me radhë te të gjithë ata që nuk i kanë paguar borxhet”, tha Mjeku.

    Në shkyçje janë të përfshira tetë komunat në të cilat operon kompania, Prishtina, Fushë-Kosova, Obiliqi, Podujeva, Shtimja, Drenasi, Lipjani dhe Graçanica. /atvlive.tv

    Edicionin Qendror të lajmeve në ATV e gjeni në videon më poshtë:

  • Mitrovica e Veriut afër anëtarësimit në Asociacion të Komunave, MAPL ia aprovon kërkesën

    Mitrovica e Veriut afër anëtarësimit në Asociacion të Komunave, MAPL ia aprovon kërkesën

    Për kërkesën e dërguar para një muaji mori përgjigje. Mitrovica e Veriut shumë shpejt pritet të bëhet pjesë e Asociacionit të Komunave të Kosovës, pasi Ministria e Administrimit të Pushtetit Lokal e ka aprovuar kërkesën e kësaj komune.

    Në vendimin e siguruar nga ATV-ja thuhet se kërkesa është në pajtim me dispozitat e legjislacionit në fuqi. Tani vendimin përfundimtar do ta marrë vetë Asociacioni i Komunave të Kosovës, derisa kanë mbetur edhe disa procedura.

    Por procedura pritet të marrë pak kohë.

    Kërkesën për anëtarësim në Asociacionin e Komunave të Kosovës të Mitrovicës së Veriut e bëri kryetari Erden Atiq me ta marrë postin. Ndërkaq, në përgatitje të kërkesës është edhe komuna e Zubin-Potokut. /atvlive.tv

    Edicionin Qendror të lajmeve në ATV e gjeni në videon më poshtë:

  • Padi për shpifje ka paralajmëruar Ministria e Drejtësisë, ndaj avokatit Besnik Berisha

    Padi për shpifje ka paralajmëruar Ministria e Drejtësisë, ndaj avokatit Besnik Berisha

    I dyshuar për veprën penale të ushtrimit të ndikimit dhe dhënie të ndihmës kryerësve pas kryerjes së veprës penale, avokati Besnik Berisha ka hedhur akuza të rënda ndaj prokurorit të rastit Rasim Maloku. Arrestimin e tij e ka quajtur arbitrar, teksa për prokurorin e Prokurorisë Themelore të Ferizajt tha se ka ndërmarrë veprime të kundërligjshme, e nën direktivat e ministres së Drejtësisë, Albulena Haxhiu.

    Pretendimet e Berishës, Ministria e Drejtësisë i ka quajtur shpifje, teksa ka paralajmëruar edhe padi. Shefi i kabinetit në këtë dikaster, Genc Nimoni, ka thënë se Ministria e Drejtësisë qëndron larg dhe e papërlyer në këtë rast që, siç është shprehur ai, do të duhej zhvilluar profesionalisht në Gjykatë.

    ATV-ja ka provuar të marrë një qëndrim edhe nga prokurori Rasim Maloku dhe nga Zyra e Kryeprokurorit të Shtetit, por nuk kanë kthyer një përgjigje.

    Ndërkohë, avokati Besnik Berisha dyshohet nga Prokuroria Themelore e Ferizajt se kishte marrë 11 mijë euro për të organizuar mbrojtjen e dy të dyshuarve për fajde dhe ikje nga tatimi, në rastin Brezovica.

    Sipas Prokurorisë, Berisha e kishte ditur se nuk mund të jetë mbrojtës i Gëzim e Salih Sinanit, pasi ishte avokati i një klienti tjetër në po të njëjtin rast.

    Pasi u arrestua, me vendim të Gjykatës Themelore të Ferizajt u la në liri, por ia caktoi masën “Ndalimi për t’iu afruar vendit apo personave të caktuar”, në kohëzgjatje prej një muaji. /atvlive.tv

    Edicionin Qendror të lajmeve në ATV e gjeni në videon më poshtë:

  • Për shkak të motit me vapë është shtuar numri i pacientëve që po kërkojnë shërbime mjekësore

    Për shkak të motit me vapë është shtuar numri i pacientëve që po kërkojnë shërbime mjekësore

    Me ngritjen e temperaturave është rritur edhe numri i pacientëve që kanë kërkuar ndihmë mjekësore në Qendrën Kryesore të Mjekësisë Familjare në Prishtinë.

    Kryeshefi i mjekësisë familjare në këtë qendër, Valdet Hashani, tha se vetëm për 24 orë po ofrojnë më shumë se 400 shërbime mjekësore.

    “Kemi rritje të fluksit të pacientëve, për 20% ka rritje, domethënë për 24 orë kalon shifra 450. Kushtet për ofrimin e shërbimeve janë në nivel, nuk kemi asnjë mungesë momentalisht. Është duke u punuar në të gjitha qendrat e kujdesit parësor shëndetësor në Prishtinë, në zonat urbane dhe në ato rurale”, tha Hashani.

    Pacientët të cilët i drejtohen kësaj qendre, thonë se janë të kënaqur me shërbimet mjekësore të cilat po iu ofrohen.

    “I kënaqur jam, s’ka asnjë mungesë të gjitha kushtet janë në nivel. Veç një problem është stafit mjekësor duhet t’i rritet rroga më shumë”, thotë Ramadan Krasniqi, pacient.

    “Kesh për një kontroll, u ndajta shumë i kënaqur. Krejt çka pata nevojë ishin aty, tonat t’mirat”, tha një tjetër pacient.
    “E njëjta situatë është në Qendrën Kryesore të Mjekësisë Familjare në Fushë Kosovë. Vetëm për 24 orë janë duke u ofruar më shumë se 400 shërbime mjekësore”.

    Sipas kryeshefit të qendrës në Fushë-Kosovë, situata po menaxhohet mirë.

    “Kohëve të fundit ka rritje të numrit të pacientëve. Jemi të furnizuar goxha mirë me infuzione e barna. Të gjitha rastet po trajtohen në mënyrë të plotë”, tha kryeshefi i QKMF-së në Fushë-Kosovë, Mustafë Gashi.

    Përveç rasteve urgjente, mjekët u apelojnë qytetarëve që të evitohet dalja jashtë nga ora 10:00 deri në 17:00.

    Sipas Institutit Hidrometeorologjik të Kosovës, moti me temperaturë të lartë do të vazhdojë edhe për disa ditë. /atvlive.tv

    Edicionin Qendror të lajmeve në ATV e gjeni në videon më poshtë:

  • Ushtria e Kosovës do të stërvitet me Forcat Amerikane

    Ushtria e Kosovës do të stërvitet me Forcat Amerikane

    Në vitin 2024, Forca e Sigurisë së Kosovës, mund të angazhohet në stërvitjet ushtarake të udhëhequra nga Shtetet e Bashkuara të Amerikës.

    Projektligji i përvitshëm i Senatit Amerikan për mbrojtje do ta shtojë Kosovën në listën e shteteve të Evropës Lindore që kualifikohen për stërvitje ushtarake të SHBA-së.

    “Komiteti vlerëson përpjekjet e Departamentit të Mbrojtjes për të mbështetur Republikën e Kosovës, ndërsa punon për të zhvilluar dhe përmirësuar forcat e saj të sigurisë kombëtare, veçanërisht përpjekjet për të rritur profesionalizimin, rritjen e ndërveprueshmërisë dhe përforcimin e aftësisë së Kosovës për t’iu përgjigjur kërcënimeve të jashtme dhe hibride”, thuhet në njoftimin e Senatit Amerikan.

    Mundësia që Forca e Sigurisë së Kosovës të jetë krah për krah me ushtarët amerikanë, vlerësohet si lajm i mirë.

    Megjithatë, kërkohet maturi në veprime politike në mënyrë që të mos përsëritet ajo që ndodhi me stërvitjet “Defender Europe 2023”, nga e cila Kosova u përjashtua.

    Në fund të majit, kur shpërthyen tensionet në veri të Kosovës, Shtetet e Bashkuara të Amerikës përjashtuan Kosovën nga stërvitjet “Defender Europe 2023”.

    Ky ishte ndëshkimi që Shtetet e Bashkuara të Amerikës zbatuan kundër Kosovës për, siç u tha, injorimin e këshillave të tyre për ta shmangur rritjen e tensioneve në veri. /atvlive.tv

    Edicionin Qendror të lajmeve në ATV e gjeni në videon më poshtë:

  • Sindikata e Policisë së Kosovës e ka dorëzuar të martën në Kuvend peticionin

    Sindikata e Policisë së Kosovës e ka dorëzuar të martën në Kuvend peticionin

    Peticioni me të gjitha pakënaqësitë e zyrtarëve policorë i është dërguar tashmë Kuvendit. I nënshkruar nga më shumë se 62% e punonjësve të policisë peticioni të martën iu dorëzua Komisionit për të Drejtat e Njeriut dhe Peticione.

    Në të kundërtën po paralajmërohen veprime sindikale.

    Policët në këtë peticion u ankuan ndaj Ligjit të Pagave, për sigurimet shëndetësore e jetësore, ligjin e pensionimit, rrezikshmëri dhe të tjera.

    Të drejta kërkesat e tyre i konsideron anëtari i Komisionit për Siguri, Hisen Berisha.

    Për shkak të pakënaqësive, Sindikata e Policisë kohë më parë kishte njoftuar se më shumë se 40 zyrtarë policorë kanë dhënë dorëheqje vullnetare që nga fillimi i viti. /atvlive.tv

    Edicionin Qendror të lajmeve në ATV e gjeni në videon më poshtë:

  • SHBA pritet të lejojë Kosovën në stërvitjet NATO-n, Statovci: Partneriteti i Kosovës me Amerikën nuk lëkundet

    SHBA pritet të lejojë Kosovën në stërvitjet NATO-n, Statovci: Partneriteti i Kosovës me Amerikën nuk lëkundet

    Deputetja e GP të Lëvizjes Vetëvendosje, Jeta Statovci, e ka quajtur lajm të mirë vendimin e Senatit amerikan që e fut Kosovën në listën e vendeve të Evropës Lindore që kualifikohen për trajnime ushtarake të SHBA-së në mes të tensioneve të rritura në Ballkan.

    Ajo ka thënë se partneriteti i Kosovës me SHBA-të nuk lëkundet dhe se këto ushtrime ushtarake do të jenë në shërbim të fuqizimit të sigurisë në rajon.

    “Shpresoj që ky vendim i SHBA-ve të mos ketë dëshpëruar thellë dyshuesit skeptikë pushtet-varur, por partneriteti i Kosovës me SHBA-të nuk lëkundet. SHBA-të dhe Kosova do të zhvillojnë ushtrime ushtarake të përbashkëta, në shërbim të fuqizimit të sigurisë, paqes dhe stabilitetit në rajon”, ka shkruar ajo, teksa thotë se ShBA-ja qëndron afër Kosovës në të gjitha sferat.

    “Vendimi i Senatit amerikan për ta ftuar edhe Kosovën në listën e vendeve me të cilat ushtria më e fuqishme në botë, ajo e SHBA-ve, bashkë me NATO-n, do të zhvillojnë ushtrime të përbashkëta ushtarake, është edhe një tjetër fakt se; SHBA-të i qëndrojnë afër Kosovës në të gjitha rrafshet. Përkushtimi i Kosovës për demokraci, paqe e stabilitet, është shkollë e marrë më së shumti nga SHBA-të. Vlerat tona të tolerancës, bashkëjetesës, lirisë dhe barazisë, ndahen me ato të SHBA-ve, duke krijuar kështu një partneritet të pa cenueshëm, besnik dhe vizionar”, ka shkruar tutje ajo.

  • ​Përfundoi dëshmia e oficerit britanik, tha se nuk e ka takuar asnjëherë Jakup Krasniqin

    ​Përfundoi dëshmia e oficerit britanik, tha se nuk e ka takuar asnjëherë Jakup Krasniqin

    Oficeri britanik, Francis Ledwidge, e përfundoi dëshminë para trupit gjykues në rastin ndaj ish-krerëve të Ushtrisë Çlirimtare të Kosovës.

    Ai deklaroi se nuk e ka takuar asnjëherë Jakup Krasniqin dhe sipas tij, për të nuk kishte dëgjuar deri kur kishte filluar intervistat.

    Në fund të dëshmisë së tij ai është intervistuar nga mbrojtja e Krasniqit, avokati Aidan Ellis.

    Ellis: E keni dëgjuar emrin e Jakup Krasniqit, që ishte zëdhënës i UÇK-së?

    Ledwidge: Po e kisha dëgjuar emrin e tij në veçanti për shkak të pranisë së tij në Malishevë siç është regjistruar nga ato që na ka thënë në intervistat që ne keni intervistuar, ata na kanë thënë se ai ishte zëdhënësi nuk mund të them se e dija se ishte zëdhënësi sepse siç e thash ne ishim të rinj me këtë mjedis dhe për të qenë të sinqertë me ju nuk mendoj se e dija këtë informacion përpara se të më thuhej se Jakup Krasniqi ishte zëdhënësi.

    Tutje ai tha se përkundër përpjekjeve asnjëherë personalisht nuk kishte arritur ta takojë personalisht Jakup Krasniqin.

    Ledwidge: U përpoqëm, por nuk e kam takuar Jakup Krasniqin

    “Jo nuk e kemi takuar, ne u përpoqëm që të bënim takime me të sa i takon përpjekjeve përmes zingjirit të komandës megjithatë me sa më kujtohet informacioni im është se ose u refuzua ai takim me ne ose nuk ia dolëm të siguronim një takim me të, nuk më kujtohet. Kam përshtypjen që kolegët e mi kanë diskutuar me të megjithatë nuk më kujtohet asgjë sa i takon këtyre takimeve”, tha ai.

    Tutje, ai pohoi se kishte njohuri që Krasniqi kishte zhvilluar takime me OSBE-në.

    Ellis: A e dini që zotëri Krasniqi ka mbajtur takime me OSBE?

    Ledwindge: Më kujtohet kjo, po flasim për dhjetor apo nëntor 1998.

    Ellis: Në përgjithësi po iu them se a jeni në dijeni se janë mbajtur takime?

    Ledwidge: Po

    Ellis: A iu kujtohet që janë mbajtur me William Walker dhe të tjerë nga OSBE në janar të 99’ës?

    LedWidge: Më kujtohet që më është thënë diçka e tillë dhe nuk kam arsye të dyshoj.

    Sipas dëshmitarit, një kolonel me emrin Petroviq kishte thënë se Jakup Krasniqi kishte qenë në qendrën e ndalimit të UÇK-së.

    Por kjo u kundërshtua nga avokati mbrojtës i cili tha se Krasniqi nuk ka qenë në asnjëherë në qendrën e ndalimit në Malishevë apo në ndonjë qendër tjetër të tillë.

    Ellis: Jakup Krasniqi nuk ka qenë i pranishëm në qendrën e ndalimit në Malishevë në periudhën që janë përmendur prej jush nga datat 17 deri 26 korrik 1998, dhe ai në fakt nuk ka qenë asnjëherë në ndonjë qendër ndalimi të UÇK-së, ajo çfarë keni dhënë në deklaratat tuaja është opinioni juaj se ju nuk keni qenë të pranishëm atje në korrik të vitit 1999.

    Ledwidge: Ka rrjedhur nga deklaratat që kemi marr nga dëshmitarët.

    Ellis: Po dhe është opinioni juaj se atë çfarë kanë treguar personat që keni folur ishte informacioni i saktë dhe ishte kryesisht informacion nga Bajloseviq nga dy gratë.

    Ledwidge: Ishte përshtypje e përgjithshme në qytet dhe e kam thënë disa herë unë nuk kam fol vetëm me ato dyja por edhe me të tjerë.

    Ellis: Ju vetë nuk e keni identifikuar që bëhej fjalë vërtetë për zotëri Krasniqin.

    Dëshmitari i ZPS-së i cili është një oficer i inteligjencës britanike që ka shërbyer gjatë periudhës së luftës në kuadër të misionit të OSBE në Kosovë, u intervistua edhe nga trupi gjykues.

    Dëshmia e tij në gjykatoren e speciale ka zgjatur dy ditë.

    Gjykimi kundër ish-krerëve të UÇK-së, Hashim Thaçi, Kadri Veseli, Jakup Krasniqi dhe Rexhep Selimi ka nisur më 3 prill me deklaratat hyrëse, ku të gjithë janë deklaruar të pafajshëm për akuzat për krime të pretenduara të luftës.

    Ata ndodhen në qendrën e paraburgimit në Hagë prej nëntorit të vitit 2020./KP

  • Kosova bëhet anëtare e Komisionit Ndërkombëtar për Personat e Zhdukur

    Kosova bëhet anëtare e Komisionit Ndërkombëtar për Personat e Zhdukur

    Kosova është bërë anëtare e Komisionit Ndërkombëtar për Personat e Zhdukur (ICMP).

    Kështu ka bërë të ditur sot Ministria e Punëve të Jashtme dhe Diasporës, e cila ka informuar se zëvendëskryeministri i MPJD-së, Kreshnik Ahmeti e ka falënderuar drejtorin e Divizionit të Traktateve, Jules van Eijndhoven për rolin konstruktiv të Mbretërisë së Holandës, si shtet depozitar për konventën mbi themelimin e Komisionit Ndërkombëtar për Personat e Zhdukur.

    “Sot, Zëvendësministri i Punëve të Jashtme dhe Diasporës, z. Kreshnik Ahmeti, i shoqëruar nga Kryetari i Komisionit Qeveritar për Personat e Pagjetur, z. Andin Hoti, dhe Ambasadori i Republikës së Kosovës në Mbretërinë e Holandës, z. Dren Doli, dorëzoi instrumentet e aderimit të Republikës së Kosovës në Komisionin Ndërkombëtar për Personat e Zhdukur (International Commission on Missing Persons) me seli në Hagë, gjë e cila shënon hapin përfundimtar për anëtarësimin e Republikës së Kosovës si anëtare në këtë organizatë të rëndësishme ndërkombëtare. Në ceremoninë e organizuar nga Ministria e Punëve të Jashtme të Holandës për dorëzimin e instrumenteve për aderimin e Republikës së Kosovës në këtë organizatë ndërkombëtare, zëvendësministri, z. Ahmeti, falënderoi Drejtorin e Divizionit të Traktateve, z. Jules van Eijndhoven për rolin konstruktiv të Qeverisë së Mbretërisë së Holandës, si shtet depozitar për konventën mbi themelimin e Komisionit Ndërkombëtar për Personat e Zhdukur. Njëkohësisht, z. Ahmeti falënderoi zyrtarët e pranishëm të ICMP për angazhimin dhe kontributin e tyre shembullor në Kosovë për më shumë se dy dekada. Z. Ahmeti njëherësh përsëriti përkushtimin e Republikës së Kosovës në promovimin dhe avancimin e rolit të kësaj organizate të shprehur në takimin me Drejtoren Ekzekutive të Komisionit, z. Kathryne Bomberger, të mbajtur më 22 Maj të këtij viti, me ç ‘rast Komisioni ishte njoftuar për hapat që Republika e Kosovës kishte ndërmarr për t’u bërë pjesë e kësaj organizate.”, është bërë e ditur në komunikatë.

    Komisioni Ndërkombëtar për Personat e Zhdukur është organizatë ndër-qeveritare e themeluar në vitin 1996, e cila adreson çështjen e personave të zhdukur në rrethana të konflikteve të armatosura, shkeljes së të drejtave të njeriut, fatkeqësive natyrore, krimit të organizuar, migrimit ilegal, etj.

    Komisioni ka selinë në Mbretërinë e Holandës, në qytetin e Hagës, dhe është e vetmja organizatë ndërkombëtare e ngarkuar ekskluzivisht për të punuar në çështjen e personave të zhdukur.

    Komisioni Ndërkombëtar për Personat e Zhdukur ka qenë i angazhuar intensivisht edhe në Kosovë, përgjatë dhe pas luftës së fundit, duke luajtur një rol të jashtëzakonshëm në zgjidhjen e rasteve të personave të zhdukur gjatë luftës në Kosovë dhe ofrimin e mbështetjes së nevojshme në procesin e identifikimit e mbetjeve mortore përmes përdorimit të metodave shkencore të identifikimit.